បរទេស៖ ចិននៅតែនាំចូលប្រេងឆៅច្រើនជាងគេពីអារ៉ាប៊ីសាអូឌីតឆ្នាំមុននេះបើតាមស្ថិតិដែលបានចេញជាផ្លូវ ការ ខណៈដែលរុស្ស៊ីជាជើងឯករង ប៉ុន្តែបរិមាណនៃការជួញដូរប្រេងកើនឡើង។

នាថ្ងៃទី ២០ ខែមករា ឆ្នាំ២០២៣ ទីភ្នាក់ងារសារព័ត៌មានបរទេសបានរាយការណ៍ពីទីក្រុងប៉េកាំង ប្រទេសចិន អំពីទិន្នន័យពីការិយាល័យគយកណ្តាលរបស់ប្រទេសចិនបានបង្ហាញស្ថិតិពីការនាំចូល ប្រេងឆៅក្នុងរយៈពេលមួយឆ្នាំកន្លងទៅ ហើយជាលទ្ធិផលបានបង្ហាញថាការនាំចូលដ៏ធំបំផុតពីអារ៉ាប៊ីសាអូឌីតនៅតែជាលំដាប់ទីមួយ ដែលមានចំនួន ៨៧.៤៩ លានតោន ឬជាមធ្យម ១.៧៥ លានបារ៉ែលក្នុងមួយថ្ងៃ។

ចំនួននៃការនាំចូលដ៏ច្រើននេះ ខណៈពេលដែលប្រទេសរុស្ស៊ីជាលំដាប់រងជាប្រទេសជាប់ចំណាត់ថ្នាក់លេខ ២ ក្នុងការដឹកជញ្ជូនប្រេងឆៅមកកាន់ចិន ដែលមានកំណត់ត្រា ៨៦.២៥ លានតោន កើនឡើង ៨ ភាគរយធៀបនឹងឆ្នាំ ២០២១ ឬជាមធ្យម ១.៧២ លានបារ៉ែលក្នុងមួយថ្ងៃ។

យ៉ាងណាមិញ រដ្ឋាភិបាលក្រុងប៉េកាំង ឬរោងចក្រចម្រាញ់ដែលគាំទ្រដោយមជ្ឈិម បានធ្វើការកាត់បន្ថយការទិញប្រេងឆៅរបស់រុស្ស៊ីយ៉ាងខ្លាំង ចាប់តាំងពីខែវិច្ឆិកា ឆ្នាំ២០២២មក ដោយគេជឿថាចិនធ្វើនេះដើម្បី ចៀសវាងការប៉ះពាល់ដោយទណ្ឌកម្មរបស់អាមេរិក។

ទោះជាយ៉ាងណាប្រតិបត្តិករឯកជននៅតែបានបន្តនាំចូលប្រេងឆៅពីរុស្ស៊ីមិនដាច់តាមរយៈឈ្មួញកណ្តាលដែលមិនបានបង្ហាញឈ្មោះជាច្រើន៕ ប្រភព៖ Dailynews

ប្រទេសអ៊ុយក្រែន ៖ មេដឹកនាំប្រទេសអ៊ុយក្រែនបានថ្លែងថា ហេតុការណ៍ធ្លាក់ឧទ្ធម្ភាគចក្រដែលធ្វើឱ្យមានមនុស្សស្លាប់១៤នាក់ និងធ្វើឱ្យរដ្ឋមន្ត្រីក្រសួងមហាផ្ទៃអ៊ុយក្រែនស្លាប់នោះ គឺជាប់ពាក់ព័ន្ធនឹងសង្គ្រាម ។

កាលពីថ្ងៃទី១៩ ខែមករា កន្លងមក លោកប្រធានាធិបតីអ៊ុយក្រែន Volodymy Zelensky បានថ្លែងអំពីករណីឧទ្ធម្ភាគចក្រធ្លាក់នៅក្នុងសាលារៀនមត្តេយ្យមួយកន្លែងនៅបរិវេណជាយក្រុងគៀវ ប្រទេសអ៊ុយក្រែន ដែលធ្វើឱ្យលោក Denis Monastersky រដ្ឋមន្ត្រីក្រសួងមហាផ្ទៃអ៊ុយក្រែនបាត់បង់ជីវិត។

លោកប្រធានាធិបតីអ៊ុយក្រែន Volodymy Zelensky បញ្ជាក់ថា ហេតុការណ៍ធ្លាក់ឧទ្ធម្ភាគចក្រនេះកើតឡើងដោយសារសង្គ្រាម ។ បើទោះបីជាប្រទេសអ៊ុយក្រែនមិនបញ្ជាក់ថា រុស្ស៊ីជាប់ពាក់ព័ន្ធនឹងហេតុការណ៍នេះក្តី ប៉ុន្តែលោកប្រធានាធិបតីអ៊ុយក្រែន និយាយថា ៖ «វាមិនមែនចៃដន្យទេ ខណៈប្រទេសកើតសង្គ្រាម» ។ លោកក៏បានអំពាវនាវឱ្យប្រទេសលោកខាងលិចឆាប់បញ្ជូនអាវុធមកឱ្យអ៊ុយក្រែន មុននឹងរុស្ស៊ីបើកឆាកប្រយុទ្ធជាថ្មីទៀតមកលើអ៊ុយក្រែន ។

គួរបញ្ជាក់ថា ហេតុការណ៍ធ្លាក់ឧទ្ធម្ភាគចក្របានកើតឡើងនៅជាយក្រុងគៀវ ដោយឧទ្ធម្ភាគចក្រនេះបានហោះទៅបុកអគារសាលារៀនមត្តេយ្យមួយកន្លែង ដែលបណ្តាលឱ្យមានមនុស្សស្លាប់បាត់បង់ជីវិត១៤នាក់ ក្នុងនោះក៏មានលោករដ្ឋមន្ត្រីក្រសួងមហាផ្ទៃអ៊ុយក្រែន Monastersky និងមន្ត្រីជាន់ខ្ពស់នៅក្នុងក្រសួងមហាផ្ទៃផងដែរ ៕

ប្រភព ៖ Mono News

បរទេស៖ ប៉ូលិសម៉ិកស៊ិករកឃើញបាវមួយ មានកាបូបចំនួន ៤៧ ដោយមានដាក់សាកសពមនុស្សជាច្រើននាក់នៅកប់នៅក្នុងដីជាន់ក្រោមដីក្នុងក្លឹបនៃតំបន់អសុវត្ថិភាពមួយកន្លែង។

នាថ្ងៃទី ២០ ខែមករា ឆ្នាំ២០២៣ មានសេចក្ដីរាយការណ៍ពីសារព័ត៌មាន The Sun បានឱ្យដឹងថាប៉ូលីសម៉ិកស៊ិកបានរកឃើញបាវមួយ ដែលបានកប់នៅក្នុងដីនៃក្លឹបមួយកន្លែងនៃប្រទេសម៉ិកស៊ិក ដែលក្នុងបាវនោះមានកាបូបចំនួន ៤៧ ដែលពោរពេញដោយសាកសពជាច្រើននាក់។

ចំណាត់កានេះបានកើតឡើង បន្ទាប់ពីប៉ូលីសបានដឹកនាំការវាយឆ្មក់លើឃ្លាំងរោងចក្រមួយដែលត្រូវបានប្រែក្លាយទៅជាក្លឹបរាត្រី Tenango del Valle ចម្ងាយប្រហែល ៧២ គីឡូម៉ែត្រភាគនិរតីនៃទីក្រុងម៉ិកស៊ិក ដើម្បីធ្វើការតាមចាប់ខ្លួនជនសង្ស័យ ម្នាក់ជាសមាជិកក្រុមក្មេងទំនើង ដែលមានទំនាក់ទំនងជាមួយ Jalisco New Generation Gang (CJNG) ដែលជាក្រុមជួញដូរគ្រឿងញៀនដ៏សកម្មនៅពីក្រោយឧក្រិដ្ឋកម្មហឹង្សាជាច្រើនក្នុងប្រទេស។

ពេលចូលដល់ទីតាំងកើតហេតុ ប៉ូលិសមានការសង្ស័យ នឹងបានក៏ពេលព្យាយាមជីកកកាយក្នុងតំបន់ ក្លឹបរាត្រីនៅជាន់ក្រោមដី គេក៏បានរកឃើញបាវជាច្រើន បង្កការភ្ញាក់ផ្អើលយ៉ាងខ្លាំងព្រោះមានកាបូបជាច្រើននៅក្នុងនោះ ដែលកាបូបនីមួយៗមានបំណែកនៃសាកសពរបស់មនុស្សលាក់នៅខាងក្នុង។ បន្ទាប់មកសមត្ថកិច្ចបានប្រញាប់ប្រញាល់ប្រមូលវត្ថុតាងទាំងអស់បញ្ជូនទៅកាន់ផ្នែកកោសល្យវិច្ច័យដើម្បីធ្វើការត្រួតពិនិត្យ ហើយតាមការពិនិត្យជាបឋម គេបានបង្ហាញថាជាសំណល់សាកសពរបស់ជនរងគ្រោះ យ៉ាងតិច ២០ នាក់។

ទោះជាយ៉ាងណាក៏ដោយ ចំនួនជនរងគ្រោះអាចកើនឡើងដោយសារតែបំណែកដ៏ច្រើនដែលមិនត្រូវបានគេកំណត់អត្តសញ្ញាណ ឬភ្ជាប់ទៅនឹងបំណែកផ្សេងទៀតជាច្រើន ហើយប៉ូលិលកំពុងតែធ្វើការស៊ើបអង្កេតយ៉ាងក្ដៅគគុកក្នុងការតាមឈ្វែងរកជនដៃដល់ក្នុងករណីឃាតកម្មដ៏ច្រើនមួយនេះ៕ ប្រភព៖ Khaosod

ប្រទេសបារាំង ៖ កាលពីថ្ងៃទី១៩ ខែមករា សមាជិកសហជីពបារាំងជាច្រើននាក់បានលះបង់ការងាររបស់ខ្លួនទូទាំងប្រទេស ដើម្បីតវ៉ានឹងផែនការរបស់ប្រធានាធិបតីលោក Emmanuel Macron ដែលនឹងបន្ថែមអាយុចូលនិវត្តន៍រហូតដល់៦៤ឆ្នាំ ។ វាជាផ្នែកមួយនៃផែនការកំណែទម្រង់ប្រព័ន្ធសោធននិវត្តន៍ បើទោះជាពលរដ្ឋភាគច្រើនក្នុងប្រទេសមិនយល់ស្របក្តី ។ កាលពីថ្ងៃទី១២ ខែមករាកន្លងមក សមាជិកសហជីពធ្លាប់បានណាត់គ្នាថា នឹងធ្វើបាតុកម្មទ្រង់ទ្រាយធំនៅថ្ងៃទី១៩ ខែមករា ។

អ្នកប្រើប្រាស់ផ្លូវនានា រួមទាំងរថភ្លើងនៅក្នុងទីក្រុង និងរថភ្លើងក្រោមដីទាំងក្នុងក្រុងប៉ារីស និងទីក្រុងធំៗទូទាំងប្រទេស ក៏ដូចជាអ្នកធ្វើដំណើរតាមយន្តហោះទាំងអស់បានពន្យារពេល ឬផ្អាកការធ្វើដំណើរកាលពីថ្ងៃទី១៩ ខែមករា ដោយសារសមាជិកសហជីពជាច្រើននាក់លះបង់ការងាររបស់ខ្លួនទូទាំងប្រទេស ដើម្បីប្រឆាំងផែនការរបស់រដ្ឋាភិបាលដែលនឹងបង្កើនអាយុចូលនិវត្តន៍រហូតដល់៦៤ឆ្នាំ ។

ក្នុងថ្ងៃតវ៉ានេះ រថភ្លើងក្រោមដីបានផ្តល់សេវាកម្មសម្រាប់តែរថភ្លើងគ្មានអ្នកបើកបរប៉ុណ្ណោះ ខណៈជើងហោះហើរនៅអាកាសយានដ្ឋានអ័កលីក្នុងទីក្រុងប៉ារីស ក៏ត្រូវពន្យារពេលហោះហើរដែរ ។ លើសពីនេះ សាលារៀនឯកជនត្រូវបិទដោយសារគ្រូមិនមកបង្រៀន ។

មុននេះ លោកនាយករដ្ឋមន្ត្រីបារាំង Elizabeth Bourne បានប្រកាសផែនការបន្ថែមអាយុចូលនិវត្តន៍ចំនួន២ឆ្នាំទៀត (ពី៦២ឆ្នាំ ទៅ៦៤ឆ្នាំ) នៅក្នុងឆ្នាំ២០២៧ ដោយផែនការនេះត្រៀមបញ្ជូនទៅកាន់រដ្ឋសភាពិចារណា ។ រដ្ឋាភិបាលបារាំងអះអាងថា កំណែទម្រង់ប្រព័ន្ធសោធននិវត្តន៍នេះនឹងជួយឱ្យមានតុល្យភាពថវិកា និងសន្សំថវិកាប្រមាណជាង១ម៉ឺនយូរ៉ូក្នុង១ឆ្នាំនៅឆ្នាំ២០៣០ ។ បើមិនធ្វើកំណែទម្រង់ប្រព័ន្ធសោធននិវត្តន៍ទេ វានឹងមានឱនភាពថវិកានាពេលអនាគត ។

ទោះយ៉ាងណា ពលរដ្ឋបារាំងមិនយល់ស្របជាមួយផែនការនេះទេ ជាពិសេស មន្ត្រីរាជការ ដោយសារធ្វើឱ្យពួកគេទទួលប្រាក់ចូលនិវត្តន៍ និងផលប្រយោជន៍យឺតយ៉ាវ ។ បច្ចុប្បន្ន ពលរដ្ឋបានរងផលប៉ះពាល់ពីការចាយវាយខ្ពស់ក្នុងជីវភាពប្រចាំថ្ងៃ ។ តាមការស្ទង់មតិចុងក្រោយក្នុងសប្តាហ៍នេះថា ពលរដ្ឋ៦៨% មិនយល់ស្របតាមវិធានការនេះ និងបានរិះគន់រដ្ឋាភិបាលផងដែរ ៕

ប្រភព ៖ TNN World

ប្រទេសចិន ៖ លោក ចូសែប វូ រដ្ឋមន្ត្រីការបរទេសតៃវ៉ាន់ បានថ្លែងកាលពីពេលថ្មីៗនេះថា ទីក្រុងប៉េកាំងទំនងជាធ្វើការវាយប្រហារមកលើតៃវ៉ាន់នៅប៉ុន្មានឆ្នាំខាងមុខនេះ ។ លោកបញ្ជាក់ថា ប្រធានាធិបតីចិន លោក ស៊ី ជីនពីង នឹងធ្វើបែបនេះ អាចជាការព្យាយាមទាញពលរដ្ឋតៃវ៉ាន់ឱ្យគេចចេញពីបញ្ហាផ្សេងៗក្នុងស្រុក ។

ក្នុងការផ្តល់សម្ភាសន៍ជាមួយសារព័ត៌មានស្កាយ លោក ចូសែប វូ បញ្ជាក់ថា ៖ «ស្ថានការណ៍របស់តៃវ៉ាន់ក្នុងរយៈពេល២ឆ្នាំចុងក្រោយនេះអាក្រក់យ៉ាងខ្លាំង បើធៀបនឹង២ឆ្នាំមុននេះ» ។ លោកបន្តថា ៖ «សម្រាប់ខ្ញុំ នៅឆ្នាំ២០២៧ គឺជាឆ្នាំដែលយើងទាំងអស់គ្នាត្រូវប្រុងប្រយ័ត្នឱ្យបានខ្ពស់» ។

រដ្ឋមន្ត្រីការបរទេសតៃវ៉ាន់រូបនេះបន្ថែមថា នៅឆ្នាំ២០២៧ គឺវាអាចទៅរួចដែលលោក ស៊ី ជីនពីង នឹងចូលអាណត្តិទី៤របស់លោក ខណៈ៣អាណត្តិ លោក ជីនពីង មិនអាចសម្រេចគោលដៅណាមួយក្នុងពេលកាន់តំណែង ពេលខ្លះ លោក ជីនពីង ត្រូវគិតពីបញ្ហាផ្សេងៗដើម្បីសម្រេចជោគជ័យ ។

លោក ចូសែប វូ បានសម្តែងការបារម្ភថា រឿងអាក្រក់បំផុតក្នុងការប្រឈមមុខជាមួយក្រុងប៉េកាំងកាន់តែអាចទៅរួច ដោយលោកបានលើកឡើងពីករណីប្រទេសចិនបង្កើនកម្លាំងកងទ័ពរបស់ខ្លួនជុំវិញកោះតៃវ៉ាន់ ហើយលោកក៏បានបន្ទោសការគំរាមកំហែងរបស់ក្រុងប៉េកាំងមកលើតៃវ៉ាន់ផងដែរ ។

កាលពីខែតុលា ឆ្នាំ២០២២ លោក ស៊ី ជីនពីង បាននិយាយថា បើទោះជាទីក្រុងប៉េកាំងត្រូវការរួមជាតិជាមួយតៃវ៉ាន់ដោយសន្តិវិធី ប៉ុន្តែប្រទេសចិនមិនបដិសេធលទ្ធភាពនៃការប្រើប្រាស់កងកម្លាំងទេ ។ វាជាជម្រើសក្នុងការចាត់វិធានការចាំបាច់ទាំងអស់ដើម្បីសម្រេចបាននូវគោលដៅនោះ ៕

ប្រភព ៖ Mgronline

កម្ពុជានឹងប្រើប្រាស់ “គុនខ្មែរ (Kun Khmer)” សម្រាប់ការប្រើប្រាស់ជាផ្លូវការក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣នៅប្រទេសកម្ពុជា មិនមែន “Muay Thai” របស់ប្រទេសថៃនោះទេ។

ដោយសង្កេតឃើញមានការយល់ច្រឡំអំពីកីឡាគុនខ្មែរ និងមួយថៃ ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) បានពន្យល់ថា ៖ “នៅក្នុងធម្មនុញ្ញរបស់សហព័ន្ធកីឡាអាស៊ីអាគ្នេយ៍បានដាក់ពាក្យថា “កីឡាមួយ” ជាគុនខ្មែរ។ ក្នុងនេះគឺកម្ពុជាយើងធ្វើជាម្ចាស់ផ្ទះ យើងប្រកួតកីឡាមួយ ប៉ុន្ដែយើងបានសុំការឯកភាពពីគេដាក់ថា គុនខ្មែរ យើងចូលរួមក្នុងកីឡាមួយ ក៏ប៉ុន្ដែជាគុនខ្មែរ មិនមែនមួយថៃទេ។ មួយថៃគឺមួយថៃ ដូច្នេះកីឡាមួយ គឺមិនមែន មួយថៃ ទេ”។

ឯកឧត្តមបានលើកឡើងថា ក្នុងនាមប្រធានសហព័ន្ធកីឡាមួយអាស៊ី គឺមិនមែនមួយថៃ ហើយប្រធានរបស់សហព័ន្ធកីឡាមួយពិភពលោក គឺជនជាតិឡាវ ប៉ុន្តែក៏មិនមែនមួយថៃដែរ។ កម្ពុជាក៏មិនចូលរួមក្នុងសហព័ន្ធមួយថៃ (IFMA) នោះទេ។ កម្ពុជាមិនចូលរួមជាសមាជិកទេ ប៉ុន្ដែបើជាសកម្មភាពកីឡាប្រកួត កម្ពុជាប្រកួតនៅក្រៅប្រទេស បើខាង មួយថៃ អញ្ជើញ កម្ពុជាចូលរួមប្រកួតលក្ខណៈមួយថៃ ប៉ុន្ដែបើថៃ ឬប្រទេសផ្សេងមកស្រុកខ្មែរវិញ ពួកគេត្រូវចូលរួមប្រកួតជាលក្ខណៈ គុនខ្មែរ៕

បរទេស៖ តំបន់ Guryong ដែលត្រូវបានគេស្គាល់ថាជាតំបន់ “អនាធិបតេយ្យចុងក្រោយ” នៅក្នុងទីក្រុងសេអ៊ូល ប្រទេសកូរ៉េខាងត្បូង ត្រូវបានឱ្យដឹងថាបានខូចខាតយ៉ាងខ្លាំង ដោយសារភ្លើងឆាបឆេះ ជាលទ្ធផល អាជ្ញាធរបានធ្វើការជម្លៀសមនុស្សប្រមាណ ៥០០ នាក់ចេញពីតំបន់គ្រោះថ្នាក់ទៅកាន់ទីមានសុវត្តិភាព។

នាថ្ងៃទី២០ ខែមករា ឆ្នាំ២០២៣ ទីភ្នាក់ងារសារព័ត៌មានបរទេសរាយការណ៍ពីទីក្រុងសេអ៊ូល ប្រទេសកូរ៉េខាងត្បូង ដោយនាយកដ្ឋានពន្លត់អគ្គីភ័យស្រុក Gangnam ក្នុងទីក្រុងសេអ៊ូលបានរាយការណ៍ថា មានអគ្គិភ័យបានកើតឡើងនៅក្នុងតំបន់អនាធិបតេយ្យ Guryeong នាពីព្រឹកថ្ងៃសុក្រនេះ (ម៉ោងក្នុងស្រុក)។

ជាមួយគ្នានោះសមត្ថកិច្ចពាក់ព័ន្ធបានប្រញាប់ប្រញាស់ចុះទៅដល់កន្លែងកើតហេតុដើម្បីរួមគ្នា គ្រប់គ្រងស្ថានការណ៍ រួមមានក្រុមពន្លត់អគ្គីភ័យចំនួន ១៧០ នាក់ ប៉ូលីសចំនួន ២៦០ នាក់ និងមន្ត្រីរដ្ឋាភិបាលប្រហែល ៣០០ នាក់ផ្សេងទៀត។

ការឆាបឆេះនេះត្រូវបានគេរកឃើញថាបានបំផ្លាញសង្កាត់ និងភូមិជាច្រើនដែលបណ្តាលឱ្យខូចខាតផ្ទះប្រហែល ៦០ខ្នង ខណៈមនុស្សប្រហែល ៥០០ នាក់ត្រូវជម្លៀសទៅកាន់ទីជម្រកបណ្តោះអាសន្ន។

គួរឱ្យដឹងផងដែរថានៅក្នុងតំបន់នេះមានផ្ទះប្រហែល ៦៦៦ គ្រួសារ ហើយផ្ទះភាគច្រើនត្រូវបានសាងសង់ពីឈើ ដែលនេះចាត់ទុកថាជាឥន្ធនៈដ៏ល្អក្នុងការឆេះរីករាលដាលកាន់តែខ្លាំង។

ទោះជាយ៉ាងណា របាយការបឋមមិនមានការបញ្ជាក់ពីមូលហេតុច្បាស់លាស់ និងមិនបានបញ្ជាក់ថាមានអ្នកស្លាប់ ឬ របួសក្នុងហេតុការណ៍នេះនោះទេ ស្របពេលប្រធានាធិបតីកូរ៉េខាងត្បូងលោក Yun Seok-Yol បានប្តេជ្ញាចិត្តយ៉ាងពេញទំហឹងក្នុងការជួយជនរងគ្រោះ និងទទួលខុសត្រូវ ក្នុងហេតុការណ៍អគ្គិភ័យមួយនេះ។

គួររំលឹកផងដែរថា Guryeong ជាតំបន់ “អនាធិបតេយ្យចុងក្រោយ” នៅក្នុងរដ្ឋធានីរបស់ប្រទេសកូរ៉េខាងត្បូង តំបន់នេះបានកើតឡើងនៅក្នុងទសវត្សរ៍ឆ្នាំ ១៩៨០ នៅពេលដែលប្រជាជនក្រីក្រត្រូវការផ្លាស់ទីលំនៅមករស់នៅទីនេះ ដើម្បីបើកផ្លូវសម្រាប់គម្រោងអភិវឌ្ឍន៍ស្រុក Gangnam ដែលជាតំបន់សម្បូរទឹកបំផុតរបស់កូរ៉េខាងត្បូងសម្រាប់សេដ្ឋកិច្ចនាពេលបច្ចុប្បន្ន៕ ប្រភព៖ Dailynews

ប្រទេសថៃ ៖ កាលពីថ្ងៃទី១៨ ខែមករា កន្លងមក លោក ផលភី សុវណ្ណឆាវី អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងលោក អនុថិន ឆាន់វីរៈ ឧបនាយករដ្ឋមន្ត្រី និងរដ្ឋមន្ត្រីក្រសួងសុខាភិបាល បានលើកឡើងក្នុងកិច្ចប្រជុំវេទិកាសេដ្ឋកិច្ចពិភពលោក (World Economic Forum) នៅទីក្រុងដាវ៉ូស ប្រទេសស្វីសថា ថៃជាប្រទេសមួយក្នុងតំបន់អាស៊ាន ដែលទាក់ទាញការវិនិយោគ មជ្ឈមណ្ឌលសុខភាព និងគមនាគមន៍ដឹកជញ្ជូនក្នុងតំបន់ ។

កិច្ចប្រជុំក្នុងប្រធានបទ «ភាពទាក់ទាញរបស់អាស៊ាន» លោក អនុថិន បាននិយាយអំពីចំណុចខ្លាំងរបស់អាស៊ាន និងថៃ ក្នុងផ្នែកសេដ្ឋកិច្ច និងការវិនិយោគ ខណៈលោក អនុថិន បានដើរតួជាអ្នកជំរុញអាស៊ានទៅកាន់ពិភពលោក ។ កិច្ចប្រជុំនេះមានវិនិយោគិនបរទេសជាច្រើនចូលរួមប្រជុំដូចជា លោកស្រី Merit Janow ប្រធានក្រុមហ៊ុន MasterCard, លោក Luhut B Panchaitan រដ្ឋមន្ត្រីក្រសួងកិច្ចការសមុទ្រ និងវិនិយោគឥណ្ឌូណេស៊ី និងលោកស្រី Teresita Cycoson អនុប្រធានក្រុមហ៊ុន SM Investment Corporation របស់ហ្វីលីពីនជាដើម ។

លោក ផលភី សុវណ្ណឆាវី អគ្គលេខាធិការរងនាយករដ្ឋមន្ត្រីថៃ បានឆ្លើយតបសំណួរអំពីកត្តាលូតលាស់ជាបន្តបន្ទាប់របស់អាស៊ាន រហូតដល់សមត្ថភាពសម្របខ្លួនរបស់អាស៊ានចំពោះស្ថានការណ៍ផ្សេងៗបានយ៉ាងមានប្រសិទ្ធភាព បើទោះជាប្រឈមជាមួយបញ្ហាជម្លោះ និងមានជំងឺកូវីដរាតត្បាតក្តី ក៏អាស៊ានអាចដោះស្រាយបញ្ហាបានគួរឱ្យសរសើរ និងសហការរួមគ្នាយ៉ាងល្អ ។ លោកបន្តថា ផ្នែកសុខាភិបាល ប្រទេសថៃត្រូវបានជ្រើសរើសជាទីតាំងលេខាធិការដ្ឋាននៃមជ្ឈមណ្ឌលអាស៊ាន និងការដោះស្រាយបញ្ហាបន្ទាន់ រួមទាំងជំងឺរាតត្បាត ដែលចាត់ទុកថា ជាកិច្ចសហការរួមគ្នាដោះស្រាយបញ្ហាសុខាភិបាលក្នុងតំបន់អាស៊ាននាថ្ងៃអនាគត ។

ដោយឡែក ទាក់ទងនឹងសក្តានុពលនៃកំណើនសេដ្ឋកិច្ចអាស៊ាន លោក អនុថិន រដ្ឋមន្ត្រីក្រសួងសុខាភិបាល បានស្នើឱ្យតាមដានគម្រោង Land Bridge នៅប្រទេសថៃ ។ វានឹងជួយលើកកម្ពស់សក្តានុពលក្នុងតំបន់ ព្រោះអាស៊ានជាចំណុចកណ្តាលក្នុងការដឹកជញ្ជូនទំនិញឆ្លងកាត់មហាសមុទ្រ Andaman ជាមួយឈូងសមុទ្រថៃ ដែលបង្កើតឱកាសឱ្យថៃ និងប្រទេសក្នុងតំបន់ផងដែរ ។

លោក អនុថិន បញ្ជាក់ថា ប្រទេសថៃកំពុងតែនាំមុខផ្នែកសុខាភិបាល ខណៈនិស្សិតបរទេសមកសិក្សាផ្នែកពេទ្យនៅថៃ ។ លើសពីនេះ ថៃជាទីកន្លែងសម្រាកលំហែរកាយ និងពិនិត្យសុខភាព ដោយថៃមានការព្យាបាលតាមវេជ្ជសាស្ត្រទំនើប ព្យាបាលបែបបុរាណ ព្រមទាំងការស្វែងរកផលិតផលសុខភាព និងឱសថធម្មជាតិផ្សេងៗ ៕

ប្រភព ៖ The Reporters