ប្រទេសហូឡង់ ៖ Philips ជាក្រុមហ៊ុនធំផលិតឧបករណ៍អេឡិចត្រូនិក និងបច្ចេកវិទ្យាសុខភាពរបស់ប្រទេសហូឡង់ បានប្រកាសថា មានផែនការកាត់បន្ថយបុគ្គលិកចំនួន៦.០០០នាក់នៅទូទាំងពិភពលោក ឬស្មើ៥% នៃបុគ្គលិកទាំងអស់ ។ ការកាត់បន្ថយបុគ្គលិកនេះ គឺដើម្បីកាត់បន្ថយការចំណាយលើដើមទុន និងបង្កើនប្រាក់ចំណេញរបស់ក្រុមហ៊ុន ។

ក្រុមហ៊ុននិយាយថា ក្រុមហ៊ុននឹងកាត់បន្ថយបុគ្គលិកចំនួនពាក់កណ្តាលនៅឆ្នាំ២០២៣នេះ ហើយពាក់កណ្តាលទៀតនឹងកាត់បន្ថយនៅឆ្នាំ២០២៥ ។ មានការរាយការណ៍ថា ក្នុងចំណោមបុគ្គលិក៦.០០០នាក់ដែលត្រូវបញ្ឈប់នោះ ក្នុងនោះមានបុគ្គលិក១.១០០នាក់ធ្វើការនៅប្រទេសហូឡង់ ។

ការប្រកាសនេះ ជាផ្នែកមួយនៃផែនការកាត់បន្ថយដើមទុន ដែលក្រុមហ៊ុន Philips បានប្រកាសកាលពីតុលា ឆ្នាំ២០២២ ខណៈក្រុមហ៊ុនត្រូវការកាត់បន្ថយបុគ្គលិក៥% បន្ទាប់ពីចំនួនការលក់ និងប្រាក់ចំណេញធ្លាក់ចុះ ។

លោក Roy Jacobs នាយកប្រតិបត្តិថ្មីរបស់ក្រុមហ៊ុន Philips ថ្លែងថា ៖ «ក្រុមហ៊ុនមិនបានប្រើប្រាស់ប្រយោជន៍ពីសក្តានុពលទីផ្សារដ៏រឹងមាំទេ ដោយសារត្រូវប្រឈមនឹងការងារសំខាន់ៗមួយចំនួន» ៕

ប្រភព ៖ pptvhd36

ប្រទេសកូរ៉េខាងត្បូង ៖ កូរ៉េខាងត្បូងបានប្រកាសលុបចោលបម្រាមពាក់ម៉ាស់ក្នុងអគារ បន្ទាប់ពីប្រើប្រាស់បម្រាមនេះជាង២ឆ្នាំ ក្រោយពីស្ថានភាពជំងឺកូវីដ-១៩ បានធូរស្រាល ហើយការឆ្លងជំងឺកូវីដបានធ្លាក់ចុះក្នុងរយៈពេល៧ខែនេះ ។

ទីភ្នាក់ងារគ្រប់គ្រង និងបង្ការជំងឺកូរ៉ខាងត្បូងបញ្ជាក់ថា ចាប់តាំងពីថ្ងៃទី៣០ ខែមករា តទៅ ប្រជាពលរដ្ឋកូរ៉េខាងត្បូងអាចធ្វើដំណើរទៅកាន់ទីកន្លែងផ្សេងៗ និងកន្លែងហាត់ប្រាណ ដោយមិនចាំបាច់ពាក់ម៉ាស់បន្តទៀតទេ ។

រដ្ឋាភិបាលបានលុបចោលវិធានការពាក់ម៉ាស់នៅក្នុងម្លប់ តាំងពីបានប្រើប្រាស់វិធានការនេះនៅខែតុលា ឆ្នាំ២០២០ ប៉ុន្តែលើកលែងទីកន្លែងខ្លះដែលត្រូវពាក់ម៉ាស់បន្ត គឺមន្ទីរពេទ្យ គ្លីនិកលក់ថ្នាំពេទ្យ និងប្រព័ន្ធដឹកជញ្ជូនសាធារណៈ ។ ការលុបចោលបម្រាមនេះ បន្ទាប់ពីមន្ទីរពេទ្យនានារបស់កូរ៉េខាងត្បូងអាចទប់ទល់នឹងស្ថានការណ៍ជំងឺកូវីដ ខណៈការឆ្លងថ្មីស្ថិតក្នុងលំដាប់មួយអាចគ្រប់គ្រងបាន ។

ប្រទេសកូរ៉េខាងត្បូងរាយការណ៍ថា មានអ្នកឆ្លងជំងឺកូវីដថ្មីចំនួន៧.៤១៦នាក់នៅថ្ងៃទី៣០ ខែមករា ហើយឆ្លងចំនួន២២នាក់ទៀតពីក្រៅប្រទេស ដែលធ្វើឱ្យចំនួនអ្នកឆ្លងសរុបស្មើ៣០.១៥៧.០១៧នាក់ ។ នេះចាត់ទុកជាតួលេខទាបបំផុតចាប់តាំងពីថ្ងៃទី៤ ខែកក្កដា ឆ្នាំ២០២២ ។

ជាមួយគ្នានេះ មានអ្នកស្លាប់ដោយសារជំងឺកូវីដបន្ថែមទៀតចំនួន៣០នាក់ ធ្វើឱ្យអ្នកស្លាប់សរុបស្មើ៣៣.៤២០នាក់ ។ រីឯអ្នកជំងឺធ្ងន់ធ្ងរស្មើ៤០២នាក់ វាបានធ្លាក់ចុះពីចំនួន៤២០នាក់កាលពីថ្ងៃមុន ។

ចំណែកនៅតាមសាលារៀននានា នៅមិនទាន់មានការផ្លាស់ប្តូរភ្លាមៗទេ គ្រូអាចឱ្យកូនសិស្សពាក់ម៉ាស់ក្នុងកំឡុងពេលរៀន ប៉ុន្តែពួកគេអាចដោះម៉ាស់ចេញបានពេលញ៉ាំអាហារ ៕

ប្រភព ៖ TNN World

ប្រទេសថៃ ៖ សារព័ត៌មាន Nikkei Asia រាយការណ៍ថា ក្រុមហ៊ុន Sony Group បានផ្លាស់ប្តូរទីតាំងផលិតកាមេរ៉ាថតរូបរបស់ខ្លួន ដែលផ្គត់ផ្គង់ទៅកាន់ទីផ្សារសហរដ្ឋអាមេរិក ជប៉ុន និងអឺរ៉ុប ចេញពីរោងចក្រក្នុងប្រទេសចិនមកកាន់ប្រទេសថៃវិញ ។

ក្រុមហ៊ុន Sony បានចាប់ផ្តើមផ្លាស់ប្តូរទីតាំងការផលិតកាមេរ៉ាពីប្រទេសចិនដែលផ្គត់ផ្គង់ទីផ្សារអាមេរិក ចាប់តាំងពីចិនមានជម្លោះពាណិជ្ជកម្មជាមួយអាមេរិក ។ កាលពីឆ្នាំ២០២២ កន្លងមក ក្រុមហ៊ុនក៏បានផ្លាស់ប្តូរទីតាំងផលិតទំនិញរបស់ខ្លួនផងដែរ ដែលបញ្ជូនទៅកាន់ទីផ្សារប្រទេសជប៉ុន និងអឺរ៉ុប ។

ចាប់ពីពេលនេះ រោងចក្រកាមេរ៉ារបស់ Sony នៅប្រទេសចិន នឹងផលិតដើម្បីផ្គត់ផ្គង់ទីផ្សារក្នុងប្រទេសចិនតែប៉ុណ្ណោះ ហើយរោងចក្រ Sony នៅប្រទេសថៃនឹងក្លាយជាមូលដ្ឋានផលិតចម្បងសម្រាប់ការនាំចេញតែមួយប៉ុណ្ណោះរបស់ Sony ។

គួរបញ្ជាក់ថា ក្រុមហ៊ុន Sony បានគ្រប់គ្រងចំណែកទីផ្សារនៃផលិតផលកាមេរ៉ាលំដាប់លេខ២ ក្នុងពិភពលោក ខណៈក្រុមហ៊ុន Canon ជាប់លំដាប់លេខ១ ។ កាលពីឆ្នាំ២០២២ Sony បានលក់កាមេរ៉ាចំនួន២,១លានគ្រឿងទូទាំងពិភពលោក ហើយកាមេរ៉ា១៥ម៉ឺនគ្រឿងបានលក់នៅប្រទេសចិន ។

បច្ចុប្បន្ន ក្រុមហ៊ុនជាច្រើនបានកាត់បន្ថយការពឹងផ្អែកប្រទេសចិន ដូច្នេះ តើអនាគតរបស់ចិនក្នុងឋានៈជាប្រទេសផលិតកម្មលំដាប់ពិភពលោក នឹងក្លាយទៅជាយ៉ាងណា ? ព្រោះ Sony ក៏មិនមែនជាក្រុមហ៊ុនដំបូងដែលបានផ្លាស់ប្តូរទីតាំងផលិតចេញពីចិនទេ ហើយក៏មិនមែនជាក្រុមហ៊ុនចុងក្រោយដែរ នឹងមានក្រុមហ៊ុនជាច្រើនទៀតត្រូវផ្លាស់ប្តូរទីតាំងផលិតចេញពីចិនដូចគ្នា ៕

ប្រភព ៖ BillionMoney

រដ្ឋធានីតេអ៊ីរ៉ង់៖ ការវាយប្រហារទៅលើរោងចក្រយោធារបស់អ៊ីរ៉ង់ បានកើតឡើង ស្របគ្នានឹងការធ្វើឲ្យសមយុទ្ធកងទ័ពអាកាសទ្រង់ទ្រាយធំ រវាងសហរដ្ឋអាមេរិក និង អ៊ីស្រាអែល ដោយមានការចូលរួម ពីយន្ដហោះចម្បាំង ចំនួន១៤០គ្រឿង ហើយសកម្មភាពទាំងនេះ ធ្វើឲ្យក្រុងតេអ៊ីរ៉ង់ ដាក់ការសង័្សយ ទៅលើអ៊ីស្រាអែល ឬ សហរដ្ឋអាមេរិក ជាអ្នកនៅក្រោយខ្នង។

សារព័ត៌មាន NBC News បានចេញផ្សាយ កាលពីរាត្រី ថ្ងៃចន្ទ ទី៣០ ខែមករា ថា ឧបទ្ទវហេតុនេះ បានកើតឡើង ចំពេលមានភាពតានតឹង កាន់តែខ្លាំងឡើង រវាងអ៊ីរ៉ង់ ជាមួយអ៊ីស្រាអែល និង លោកខាងលិច ជុំវិញកម្មវិធីនុយក្លេអ៊ែររបស់ក្រុងតេអ៊ីរ៉ង់ និង ការផ្គត់ផ្គង់យន្តហោះគ្មានមនុស្សបើក ឬ ដ្រូន ជួយដល់ប្រទេសរុស្ស៊ី នៅក្នុងសង្គ្រាម នៅអ៊ុយក្រែន។

អាជ្ញាធរអ៊ីរ៉ង់ បានបញ្ជាក់ កាលពីថ្ងៃអាទិត្យ ថា ដ្រូន បានផ្ទុកគ្រាប់បែក ដោយបានកំណត់គោលដៅ ទៅលើរោងចក្រយោធា នៅក្នុងទីក្រុងអ៊ីសហ្វាហាន (Isfahan) នាភាគកណ្ដាលប្រទេសអ៊ីរ៉ង់។ ការបំផ្ទុះដ៏មានកម្លាំងខ្លាំងនេះ បានធ្វើឲ្យខូចខាតសម្ភារមួយចំនួន នៅក្នុងរោងចក្រនោះ។

ទោះជាយ៉ាងណា អាជ្ញាធរអ៊ីរ៉ង់ មិនទាន់បញ្ចេញប្រតិកម្មភ្លាមៗ ថា តើអ្នកណាជាអ្នកវាយប្រហារនោះឡើយ។ ប៉ុន្តែការផ្តោតអារម្មណ៍យ៉ាងឆាប់រហ័ស បានសំដៅទៅរកប្រទេសអ៊ីស្រាអែល ដែលបានចូលរួម នៅក្នុងសង្រ្គាមស្រមោល ប្រឆាំងនឹងសាធារណរដ្ឋអ៊ិស្លាមអ៊ីរ៉ង់ ហើយគេបានសង្ស័យ ថា មានអ្នកនៅពីក្រោយការវាយប្រហារស្រដៀងគ្នា ជាច្រើនករណី នៅក្នុងរយៈពេលប៉ុន្មានឆ្នាំកន្លងទៅថ្មីៗនេះ។

ក្រសួងការពារជាតិអ៊ីរ៉ង់ បានអះអាង ថា អគារសិក្ខាសាលាមួយរបស់ខ្លួន បានរងការវាយប្រហារ ពីដ្រូនធុនតូច (MAVs) ជាច្រើនគ្រឿង កាលពីថ្ងៃសៅរ៍ ។ ប៉ុន្តែក្រសួងការពារជាតិ បានបញ្ជាក់ ថា កងការពារដែនអាកាស បានបាញ់ទម្លាក់ដ្រូនទាំងនោះ ប្រកបដោយជោគជ័យ។

បណ្ដាញផ្សព្វផ្សាយ គ្រប់គ្រងដោយរដ្ឋអ៊ីរ៉ង់ IRIB បានសរសេរ នៅលើគេហទំព័ររបស់ខ្លួន កាលពីថ្ងៃអាទិត្យ ថា ការបំផ្ទុះមានកម្លាំងខ្លាំងនេះ បានលាន់ឮពាសពេញរោងចក្រយោធា នៅក្នុងទីក្រុង Isfahan ។ ប៉ុន្ដែមន្រ្ដីសន្ដិសុខម្នាក់ បានអះអាង ថា មិនមានអ្នកណាម្នាក់រងគ្រោះថ្នាក់នោះឡើយ។ ការបំផ្ទុះនេះ បានកើតឡើង នៅចំកណ្ដាលរោងចក្រផលិតគ្រាប់រំសេវមួយកន្លែងរបស់ក្រសួងការពារជាតិ។

ក្រសួងការពារជាតិអ៊ីរ៉ង់ បានបញ្ជាក់ នៅក្នុងសេចក្ដីថ្លែងការណ៍មួយ ដែលត្រូវបានចែកចាយ ដោយ IRIB ថា ដ្រូនខ្នាតតូច ចំនួន៣គ្រឿង បំពាក់ដោយគ្រឿងបំផ្ទុះ ត្រូវបានគេប្រើប្រាស់ សម្រាប់ការវាយប្រហារនេះ។ ប៉ុន្ដែនៅក្នុងចំណោមដ្រូនទាំង៣នោះ គឺដ្រូនមួយ ត្រូវបានបាញ់ទម្លាក់ ដោយប្រព័ន្ធការពារ និង ២ផ្សេងទៀត ត្រូវបានចាប់ ដោយឧបករណ៍ស្ទាក់ចាប់ ហើយវាបានផ្ទុះ។ ចំណែកការវាយប្រហារនេះ មិនបានជោគជ័យ ហើយក៏មិនបានធ្វើឲ្យមនុស្សណាម្នាក់បាត់បង់ជីវិត និង ខូចខាតអ្វីធំដុំនោះដែរ។

អ៊ីស្រាអែល ត្រូវបានគេជឿជាក់ ថា ជាអ្នកនៅពីក្រោយឧបទ្ទវហេតុវាយប្រហារ ដោយយន្តហោះគ្មានមនុស្សបើក ឬ ដ្រូន ដោយបានកំណត់ទៅលើគោលដៅយោធា និង នុយក្លេអ៊ែររបស់អ៊ីរ៉ង់ នៅក្នុងរយៈពេលប៉ុន្មានឆ្នាំកន្លងទៅថ្មីៗនេះ។

ជាមួយគ្នានេះ លោក បែនចាមីន ណែតាន់យ៉ាហ៊ូ (Benjamin Netanyahu) ទើបនឹងវិលត្រឡប់ មកកាន់តំណែងជានាយករដ្ឋមន្ត្រីអ៊ីស្រាអែល ជាថ្មីនោះ បានចាត់ទុកអ៊ីរ៉ង់ ជាការគំរាមកំហែងយ៉ាងធ្ងន់ធ្ងរ ដល់ប្រទេសរបស់គាត់។ អ៊ីស្រាអ៊ែល តែងតែកំណត់គោលដៅ ទៅលើសកម្មភាពនុយក្លេអ៊ែររបស់ក្រុងតេអ៊ីរ៉ង់ ហើយរារាំងដល់ប្រទេសមួយនេះ មិនឲ្យសម្រេចគោលបំណង នៅក្នុងការផលិតគ្រាប់បែកមហាប្រល័យលោកនោះឡើយ។

ការវាយប្រហារដោយដ្រូន បានកើតឡើង ស្របពេលនឹងរដ្ឋមន្ត្រីការបរទេសសហរដ្ឋអាមេរិក លោក អេនតូនី ប៊ីនខែន (Antony Blinken) បានចាប់ផ្តើម ធ្វើដំណើរបំពេញទស្សនកិច្ច រយៈពេល៣ថ្ងៃ ទៅកាន់មជ្ឈិមបូព៌ា ដោយសារមានការព្រួយបារម្ភ អំពីសក្តានុពល នៃការកើនឡើង ក្រោយមានអំពើហិង្សាកើនឡើង នៅក្នុងតំបន់វេស្ដបែង (West Bank) និង ជេរូសាឡឹម (Jerusalem)។ ជាមួយគ្នានេះ កងទ័ពសហរដ្ឋអាមេរិក និង អ៊ីស្រាអែល ក៏បានធ្វើសមយុទ្ធយោធារួមគ្នាទ្រង់ទ្រាយធំមួយ កាលពីសប្តាហ៍មុន៕

សហរដ្ឋអាមេរិក ៖ សារព័ត៌មានរ៉យទ័ររាយការណ៍ថា គណៈកម្មការធិការកិច្ចការបរទេសនៃសភាតំណាងរាស្ត្រអាមេរិកបានត្រៀមពិចារណាហាមប្រើប្រាស់កម្មវិធីល្បីឈ្មោះ គឺ TikTok នៅអាមេរិកក្នុងខែកុម្ភៈ ។ អាមេរិកមានហេតុផលថា TikTok លួចយកទិន្នន័យពីអ្នកប្រើប្រាស់នៅអាមេរិក ហើយទិន្នន័យទាំងនេះអាចធ្លាក់ទៅក្នុងដៃរបស់រដ្ឋាភិបាលចិន ធ្វើឱ្យកើតគ្រោះថ្នាក់ដល់សន្តិសុខអាមេរិក ។

នៅខែធ្នូ ឆ្នាំ២០២២ ប្រធានាធិបតីអាមេរិក លោក ចូ បៃដិន (Joe Biden) បានចេញច្បាប់ហាមមន្ត្រីរដ្ឋាភិបាលអាមេរិកដោនឡូត ឬប្រើប្រាស់កម្មវិធី TikTok ក្នុងឧបករណ៍របស់រដ្ឋាភិបាលដាច់ខាត ។

កាលពីឆ្នាំ២០២០ អតីតប្រធានាធិបតីអាមេរិក លោក ដូណាល់ ត្រាំ (Donald Trump) ក៏ធ្លាប់ហាមឃាត់ពលរដ្ឋអាមេរិកប្រើប្រាស់ TikTok ផងដែរ ។ ប៉ុន្តែក្រោយមក តុលាការអាមេរិកបានសម្រេចថា ការហាមឃាត់នេះខុសច្បាប់របស់ TikTok ដូច្នេះ គេអាចប្រើប្រាស់នៅអាមេរិកបន្តទៀត ។

ហេតុនេះ ការហាមប្រើ TikTok នៅអាមេរិកមិនងាយស្រួលប៉ុន្មានទេ ព្រោះ TikTok អាចនឹងប្តឹងទៅតុលាការដើម្បីដាក់បម្រាមម្តងទៀត ។ វិធានការនេះនឹងបោះឆ្នោតនៅសភាថ្នាក់ក្រោមនៅខែកុម្ភៈ ហើយត្រូវទទួលបានសំឡេងឆ្នោតពីព្រឹទ្ធសភាចំនួន៦០សំឡេង ទើបអាចយកជាការបាន ។

ទោះយ៉ាងណា បើរដ្ឋាភិបាលអាមេរិកអាចហាមឃាត់ TikTok ពិតមែននោះ នឹងធ្វើឱ្យប៉ះពាល់អាជីវកម្មរបស់ក្រុមហ៊ុន ByteDance យ៉ាងខ្លាំង ព្រោះអ្នកប្រើប្រាស់ TikTok នៅអាមេរិកមានច្រើនជាង១០០លាននាក់ឯណោះ ៕

ប្រភព ៖ BillionMoney

ផ្កាយដុះកន្ទុយ ដ៏កម្របំផុត បាននឹងកំពុងខិតចូលមកជិតនៅក្នុងប្រព័ន្ធព្រះអាទិត្យយើងហើយ ដោយវានឹងហោះកាតផែនដីយើង នៅអំឡុងខែកុម្ភៈខាងមុខនេះ។

ផ្កាយដុះកន្ទុយនេះត្រូវបានគេដាក់ឈ្មោះថា C/2022 E3 (ZTF) ឬក៏ផ្កាយដុះកន្ទុយពណ៌បៃតង ដែលវាត្រូវបានគេរកឃើញនៅក្នុងខែមីនា ឆ្នាំ ២០២២ នៅមន្ទីពិសោធន៍ Zwicky Transient Facility ក្នុងរដ្ឋកាលីហ្វ័រញ៉ា សហរដ្ឋអាមេរិក។

ផ្កាយដុះកន្ទុយពណ៌បៃតងដ៏កម្រនេះ បានខិតជិតចំណុចជិតបំផុតរបស់វាពីព្រះអាទិត្យ  កាលពីថ្ងៃទី១២ ខែមករា កន្លងទៅ ហើយវាត្រូវបានគេរំពឹងថានឹងទៅដល់ចំណុចជិតបំផុតនៃផែនដីនៅថ្ងៃទី២ខែកុម្ភៈ។ ក្រោយតែពេលវាមដល់ចំណុចជិតបំផុតនៃផែនដី ផ្កាយដុះកន្ទុយនេះនឹងមានចម្ងាយត្រឹមតែ ៤២លានគីឡូម៉ែត្រពីភពផែនដីរបស់យើង។

បាតុភូតនេះកើតឡើងក្នុងរយៈពេល ៥ម៉ឺនឆ្នាំម្ដង ដោយតាមអបិយជំនឿរបស់មនុស្សម្នាក់ៗសឹងតែ ៨០% បានបង្ហាញថា បាតុភូតផ្កាយដុះកន្ទុយគឺជា សញ្ញានៃគ្រោះភ័យ ឬ គ្រោះមហន្តរាយ គ្រោះទុរភិក្ស ជំងឺរាតត្បាតផ្សេងៗ។

គួរបញ្ជាក់ផងដែរថា ប្រទេសដែលអាចមើលឃើញផ្កាយដុះកន្ទុយច្បាស់មានដូចជា ប្រទេសរុស្ស៊ី អឺរ៉ុប អាមេរិក អង់គ្លេស ចិន និង ឥណ្ឌា ក្រៅពីនេះក៏មានតំបន់ជាច្រើនទៀតអាចមើលឃើញបាតុភូតនេះដែរ ដោយអ្នកវិទ្យាសាស្រ្តក៏ពិបាកព្យាករណ៍ពីពន្លឺរបស់វាដែរ៕

ប្រភព៖ Lifestyle Asia

រដ្ឋធានីវ៉ាស៊ីនតោន៖ ក្រោយពេលលោកអធិការបតីអាល្លឺម៉ង់ បានច្រានចោលនូវការផ្គត់ផ្គង់យន្ដហោះចម្បាំងរបស់លោកខាងលិច ទៅកាន់ប្រទេសអ៊ុយក្រែន នោះមក ប្រធានាធិបតីសហរដ្ឋអាមេរិក ក៏បានសម្រេច មិនបញ្ជូនយន្ដហោះចម្បាំង ប្រភេទ F-16 ទៅជួយដល់ក្រុងកៀវ ក្រោយពេលមេដឹកនាំ នៃប្រទេសមហាអំណាចសេដ្ឋកិច្ចបស្ចិមលោកទាំង២នេះ បានអនុញ្ញាត ផ្ដល់រថក្រោះប្រយុទ្ធធុនធ្ងន់របស់ខ្លួន ជួយដល់ប្រទេសអឺរ៉ុបខាងកើត ដែលកំពុងតែហែកហួរដោយសារសង្គ្រាមរបស់ក្រុងមូស្គូ។

សារព័ត៌មាន Alarabiya News បានចេញផ្សាយ កាលពីព្រឹក ថ្ងៃអង្គារ ទី៣១ ខែមករា ថា លោក ចូ បៃដិន (Joe Biden) ប្រធានាធិបតីសហរដ្ឋអាមេរិក កាលពីថ្ងៃចន្ទ បានបញ្ជាក់ ថា គាត់ នឹងមិនបញ្ជូនយន្ដហោះ F-16 ផលិតនៅសហរដ្ឋអាមេរិក នាំទៅកាន់ប្រទេសអ៊ុយក្រែន ដើម្បីធ្វើសង្គ្រាម ប្រឆាំងនឹងការឈ្លានពានរបស់រុស្ស៊ី នោះឡើយ។ ប៉ុន្ដែលោកប្រធានាធិបតី បានអះអាង ថា គាត់នឹងទៅបំពេញទស្សនកិច្ច នៅក្នុងប្រទេសប៉ូឡូញ ដែលជាសម្ពន្ធមិត្តអឺរ៉ុបខាងកើតដ៏សំខាន់មួយរបស់ក្រុងវ៉ាស៊ីនតោន។

ស្របពេល ក្រុមអ្នកកាសែត បានសាកសួរ នៅឯសេតវិមាន ថាតើលោកប្រធានាធិបតី ពេញចិត្ត នៅក្នុងការបញ្ជូនយន្តហោះចម្បាំង ដែលមេដឹកនាំអ៊ុយក្រែន បាននិយាយ ថា ស្ថិតនៅកំពូលបញ្ជីអាវុធចុងក្រោយបំផុតរបស់ពួកគេដែរឬទេ? ប៉ុន្ដែលោក ចូ បៃដិន បានឆ្លើយ ថា «អត់ទេ! គ្មានការបញ្ជូនយន្ដហោះចម្បាំងនោះឡើយ»។

បណ្ដាប្រទេសបស្ចិមលោក បានព្រមព្រៀងគ្នាដ៏លំបាកមួយ នៅខែមករា នេះ ដើម្បីសម្រេចលើការបញ្ជូនរថក្រោះដ៏ទំនើប ផលិតតាមស្ដង់ដាររបស់អង្គការណាតូ ដែលជាអាវុធដ៏មានអានុភាពខ្លាំងក្លាបំផុត នៅក្នុងជួរកងទ័ពនៅក្នុងទ្វីបរបស់ពួកគេ។

ការធ្វើឱ្យប្រសើរឡើង ចំពោះកិច្ចគាំទ្រ បានជំរុញឱ្យមានក្តីសង្ឃឹម សម្រាប់ក្រុងកៀវ (Kyiv) ថា អ៊ុយក្រែន នឹងទទួលបានយន្តហោះចម្បាំង F-16 នៅក្នុងពេលដ៏ឆាប់ៗនេះ ដើម្បីបង្កើនសមត្ថភាពរបស់ទ័ពអាកាសរបស់ខ្លួន ដែលបានបាត់បង់។ ប៉ុន្តែបញ្ហាទាំងនេះ នៅតែស្ថិតក្រោមការជជែកវែកញែកយ៉ាងខ្លាំង នៅក្នុងចំណោមបណ្ដាប្រទេសលោកខាងលិច។

ជាមួយនឹងខួបលើកទី១ នៃការលុកលុយរបស់រុស្ស៊ី ទៅលើប្រទេសអ៊ុយក្រែន នាថ្ងៃទី២៤ ខែកុម្ភៈ នោះ មានការរំពឹងទុក កាន់តែច្រើនឡើង ថា ប្រធានាធិបតីសហរដ្ឋអាមេរិក លោក ចូ បៃដិន អាចនឹងធ្វើដំណើរទៅកាន់ទ្វីបអឺរ៉ុប។ នេះក៏ជាការបង្ហាញ អំពីការលើកទឹកចិត្ត សម្រាប់សម្ពន្ធមិត្តរបស់ក្រុងវ៉ាស៊ីនតោន ដែលកំពុងតែរួបរួមគ្នា ជួយគាំទ្រដល់ប្រទេសអ៊ុយក្រែន។ ប៉ូឡូញ ក្លាយជាចំណុចស្នូល នៃកិច្ចខិតខំប្រឹងប្រែង ជាមជ្ឈមណ្ឌលដឹកជញ្ជូន ឬផ្គត់ផ្គង់គ្រឿងសព្វាវុធ ហើយក៏ជាសម្ពន្ធមិត្តដ៏សំខាន់បំផុតរបស់សហរដ្ឋអាមេរិក នៅតំបន់អឺរ៉ុបខាងកើត។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានប្រាប់ដល់ក្រុមអ្នកសារព័ត៌មាន អំពីដំណើរទស្សនកិច្ចរបស់គាត់ ថា «ខ្ញុំនឹងធ្វើដំណើរទៅកាន់ប្រទេសប៉ូឡូញ ប៉ុន្ដែខ្ញុំមិនទាន់បានកំណត់ពេលវេលាច្បាស់លាស់នៅឡើយ»។

ក្រោយពេលប្រធានាធិបតីសហរដ្ឋអាមេរិក បានសម្រេចផ្ដល់រថក្រោះប្រយុទ្ធធុនធ្ងន់ ប្រភេទ M1 Abrams ចំនួន៣១គ្រឿង ខណៈលោក អូឡាហ្វ សូលហ្ស៍ (Olaf Scholz) អធិការបតីអាល្លឺម៉ង់ បានសម្រេចផ្ដល់រថក្រោះរបស់ខ្លួន ប្រភេទ Leopard 2 ចំនួន១៤គ្រឿង កាលពីថ្ងៃពុធសប្ដាហ៍មុននោះមក បណ្ដាសម្ពន្ធមិត្តជាច្រើនប្រទេស ក៏បានផ្គត់ផ្គង់រថក្រោះរបស់ពួកគេផងដែរ រហូតធ្វើឲ្យចំនួនរថក្រោះ ត្រូវផ្ដល់ទៅឲ្យអ៊ុយក្រែន កើនដល់៣២១គ្រឿង។ ប៉ុន្ដែរដ្ឋាភិបាលក្រុងកៀវ នៅតែទទូច ចង់បានយន្ដហោះចម្បាំងរបស់បស្ចិមលោក រួមមាន F-15 ឬ F-16, Eurofighter, Rafale របស់បារាំង…ជាដើម សម្រាប់យកមកទប់ទល់ ឬ កាត់បន្ថយសមត្ថភាពវាយលុកពីគ្រឿងសព្វាវុធរបស់រុស្ស៊ី។

លោក ចន ឃើរប៊ី (John Kirby) ទីប្រឹក្សាសន្ដិសុខជាតិរបស់សហរដ្ឋអាមេរិក បានប្រាប់ដល់ក្រុមអ្នករាយការណ៍ព័ត៌មាន កាលពីថ្ងៃពុធ សប្ដាហ៍មុន ថា «សហរដ្ឋអាមេរិក កំពុងតែពិភាក្សាគ្នា ឥតឈប់ឈរជាមួយនឹងក្រុមមន្រ្ដីជាន់ខ្ពស់របស់អ៊ុយក្រែន ហើយយើងនឹងប្រែប្រួលតាមស្ថានការណ៍ផ្លាស់ប្ដូរ។ បញ្ហានេះ យើងក៏មិនអាចស្ដីបន្ទោស ដល់អ៊ុយក្រែន អំពីការស្នើសុំប្រព័ន្ធការពារផ្សេងៗនោះដែរ ហើយក៏មិនមែនជាលើកដំបូង ដែលពួកគេនិយាយ អំពីយន្ដហោះចម្បាំងរបស់លោកខាងលិចនោះឡើយ។ ប៉ុន្ដែខ្ញុំមិនបានប្រកាសណាមួយ ចំពោះកិច្ចការ នៅខាងមុខនោះទេ»៕