ប្រទេសថៃ ៖ តំបន់ជាច្រើននៅស្រុកហាតយៃ ខេត្តសុងក្លា បានខូចខាតយ៉ាងធ្ងន់ធ្ងរក្រោយពីទឹកជំនន់លិចខ្លាំងអស់រយៈពេលជាច្រើនថ្ងៃ និងស្រកចុះជាង៨០% ដោយសារភ្លៀងធ្លាក់ខ្លាំងបំផុតក្នុងរយៈពេល៣០០ឆ្នាំ ។ ទោះជាទឹកជំនន់ស្រក ប៉ុន្តែបន្សល់នូវការខូចខាតយ៉ាងច្រើនមហាសាល ផ្ទះសម្បែង ផ្លូវធំៗ ស្ពាន អគារ មន្ទីរពេទ្យ សាលារៀន យានជំនិះ និងរបស់របរខូចខ្ទេចខ្ទី ថែមទាំងបាត់បង់ជីវិតមនុស្សរហូតដល់ជាង១០០នាក់ ។ នាយករដ្ឋមន្ត្រីថៃបានបង្ហាញការសោកស្តាយចំពោះការបាត់បង់ដ៏ធំធេងនេះ និងសូមទោសពលរដ្ឋហាតយៃ ដែលរដ្ឋាភិបាលជួយសង្គ្រោះយឺតយ៉ាវ ប៉ុន្តែពលរដ្ឋមិនលើកលែងទោសឱ្យទេ ថែមទាំងស្តីបន្ទោសពេលជួបនាយករដ្ឋមន្ត្រីចុះពិនិត្យមើលការខូចខាតដោយសារទឹកជំនន់ ។

សារព័ត៌មានថៃរាយការណ៍ថា កាលពីថ្ងៃទី២៨ ខែវិច្ឆិកា ឆ្នាំ២០២៥ នាយករដ្ឋមន្ត្រីថៃ លោក Anutin Charnvirakul ត្រូវបានពលរដ្ឋស្តីបន្ទោសយ៉ាងខ្លាំងនៅតាមផ្លូវពេលលោកជិះរថយន្តពិនិត្យមើលការខូចខាតដោយសារទឹកជំនន់នៅស្រុកហាតយៃ ខេត្តសុងក្លា ដោយពលរដ្ឋបន្ទោសថា ជួបទុក្ខលំបាកខ្លាំង បែរជានាយករដ្ឋមន្ត្រីអង្គុយស្រួលក្នុងរថយន្ត និងប្រាប់ឱ្យលោកចុះពីរថយន្តដើរមើលស្ថានការណ៍ ។ លោក Anutin មិនខឹងសម្បារទេ និងយល់ពីទុក្ខលំបាករបស់ពលរដ្ឋដែលខឹងរដ្ឋាភិបាលចាត់ការទឹកជំនន់យឺតយ៉ាវ លោកសូមទោស និងសន្យារៀបចំស្រុកហាតយៃឱ្យមានសភាពដូចដើមវិញឆាប់ៗ ។

នាវេលាម៉ោងជិត៤ល្ងាចថ្ងៃទី២៨ ខែវិច្ឆិកា លោកនាយករដ្ឋមន្ត្រី Anutin និងមន្ត្រីពាក់ព័ន្ធបានជិះរថយន្តកងទ័ពធ្វើដំណើរពីមន្ទីរពេទ្យទៅកាន់ជម្រកបណ្តោះអាសន្ននៅខេត្តសុងក្លា ប៉ុន្តែពេលកំពុងធ្វើដំណើរតាមផ្លូវ ស្រាប់តែមានពលរដ្ឋ២នាក់ជិះម៉ូតូមកចតនៅខក្រោយរថយន្តដែលលោក Anutin ជិះ រួចហើយក៏ចង្អុលមុខនិយាយថា ៖ «លោក Anutin កុំជិះរថយន្តអី ត្រូវចុះពីរថយន្តដើរមើលការខូចខាតដោយសារទឹកជំនន់ បើចុះដើរវាប្រសើរជាង ។ ពលរដ្ឋរងទុក្ខលំបាក ប៉ុន្តែនាយករដ្ឋមន្ត្រីជិះរថយន្ត ឆាប់ចុះដើរមក កុំឱ្យពលរដ្ឋជេរ ។ តើខ្លាចអ្វី លោកមានអំណាចស្រាប់ហើយ» ។

ក្រោយពីស្តីបន្ទោសនាយករដ្ឋមន្ត្រីរួច ពលរដ្ឋទាំង២នាក់ក៏ជិះម៉ូតូចាកចេញ ហើយលោក Anutin និយាយមកកាន់សារព័ត៌មានថា មិនខឹងសម្បារទេ លោកព្រមទទួលស្គាល់កំហុសនេះ ពលរដ្ឋអាចទម្លាយអារម្មណ៍ឈឺចាប់របស់ខ្លួន ។ លោកសូមទោស ដោយយកមតិរិះគន់នេះមកដោះស្រាយបញ្ហាឱ្យក្លាយជាប្រយោជន៍ លោកនឹងចុះពិនិត្យមើលការខូចខាតដោយសារទឹកជំនន់តាមពលរដ្ឋប្រាប់ ។ ពលរដ្ឋតានតឹងផ្លូវចិត្តខ្លាំងដោយសាររងផលប៉ះពាល់ពីទឹកជំនន់ រដ្ឋាភិបាលត្រូវតែសូមទោសដែលធ្វើឱ្យពួកគេចាកចេញពីផ្ទះមករស់នៅជម្រកបណ្តោះអាសន្ន រដ្ឋាភិបាលនឹងរៀបចំស្រុកហាតយៃឱ្យដូចដើមវិញឆាប់ៗ ។

បន្ទាប់មក លោក Anutin ក៏ទៅសួរសុខទុក្ខពលរដ្ឋស្នាក់នៅក្នុងជម្រកបណ្តោះអាសន្ន និងពិនិត្យមើលអាហារហូបចុកគ្រប់គ្រាន់ឬអត់ ឃើញថា ពលរដ្ឋបានត្រឡប់ទៅផ្ទះវិញអស់មួយចំនួនហើយក្រោយពីទឹកជំនន់ស្រក ។ លោកមានអារម្មណ៍តានតឹងខ្លាំងពេលឃើញពលរដ្ឋជួបទុក្ខលំបាកបែបនេះ និងសន្យារៀបចំភូមិស្រុកឱ្យមានសភាពដូចដើមវិញលឿនបំផុត ។ ក្រៅពីនេះ រដ្ឋាភិបាលនឹងផ្តល់ប្រាក់សំណងឱ្យពលរដ្ឋរងផលប៉ះពាល់ដោយសារទឹកជំនន់ ព្រមទាំងផ្តល់ប្រាក់ឱ្យគ្រួសារសាកសព ចំនួន២លានបាតក្នុង១សាកសព (ឬជាង៦ម៉ឺនដុល្លារ) ព្រមទាំងពិចារណាជួយពលរដ្ឋផ្អាកសងបំណុលធនាគារ ។

គួរបញ្ជាក់ថា ថ្មីៗនេះ លោក Anutin ក៏ត្រូវបានស្ត្រីម្នាក់ស្រែកជេរនៅកណ្តាលហ្វូងមនុស្សដែរ ពេលចុះសួរសុខទុក្ខពលរដ្ឋស្នាក់នៅក្នុងជម្រកបណ្តោះអាសន្នភាគខាងត្បូង ដោយសារខ្វះសមត្ថភាពជួយជម្លៀសពលរដ្ឋពីទឹកជំនន់ ហើយលោកបានត្រឹមតែឈរញញឹមស្ងួត និងសូមទោសប៉ុណ្ណោះ ។ លោកថែមទាំងរងការស្ទីបន្ទោសពីគណបក្សនយោបាយរឿងចាត់ការទឹកជំនន់នៅភាគខាងត្បូងយឺតយ៉ាវ ខ្វះខាតឧបករណ៍ ភ្នាក់ងារសង្គ្រោះមិនគ្រប់គ្រាន់ បណ្តោយឱ្យមន្ត្រីថ្នាក់ក្រោមទទួលខុសត្រូវជំនួស រហូតដល់ពលរដ្ឋស្រុកហាតយៃស្លាប់ដល់ជាង១០០នាក់ ៕

ប្រទេស​ថៃ ៖ ទើបរួចពីស្លា.ប់ ​ស្រុកហាតយៃ ខេត្តសុងក្លា ភាគខាងត្បូងប្រទេសថៃ​ បានក្លាយជាតំបន់អសន្តិសុខ ចោ.រកម្ម និងតាមផ្ទះ ផ្លូវពេញដោយសំរាម សាកសពសត្វស្លា.ប់ដោយសារលង់ទឹក មនុស្សស្រេកឃ្លានព្រោះគ្មានអាហារបរិភោគច្រើនថ្ងៃ អ្នកដែលរស់នៅតំបន់រងគ្រោះភាគច្រើនបានក្លាយជាចោ.រលួ.ចទំនិញដោយមិនខ្លាចសមត្ថកិច្ច ដែលទង្វើនេះ បានផ្ទុយស្រឡះពីពេលមិនទាន់លិចទឹក ។ ពេលនេះ អស់ពីលួ.ចរបស់របរលក់ក្នុងហាងទំនិញស្ទើរគ្មានសល់ ពលរដ្ឋស្រុកហាតយៃជាច្រើនបានបន្តលួ.ចស្រាបៀរដែលដឹកស្តុកនៅក្នុងទូរកុងតឺន័រដោយមិនញញើត ក្រោយទឹកជំនន់ស្រកតែបន្តិច នេះហើយជាលទ្ធផលវិនា.សកម្មក្រោយថៃរងផលប៉ះពាល់ដោយគ្រោះធម្មជាតិ ។

កាលពីថ្ងៃទី២៨ ខែវិច្ឆិកា ឆ្នាំ២០២៥ សារព័ត៌មានថៃរាយការណ៍ថា ទោះជាទឹកជំនន់នៅស្រុកហាតយៃ ខេត្តសុងក្លា ស្រកចុះតាំងពីថ្ងៃទី២៧ ខែវិច្ឆិកា ប៉ុន្តែបន្សល់នូវអគារបាក់បែក ហេដ្ឋារចនាសម្ព័ន្ធខូចខ្ទិចខ្ទី កាកសំណល់សំរាមពាសពេញទីក្រុង មនុស្សម្នាស្រេកឃ្លានអាហារខ្លាំងក្រោយពីគ្មានអ្វីបរិភោគជាច្រើនថ្ងៃ ។ ពេលទឹកស្រក ជនឆ្លៀតឱកាសមួយចំនួននៅស្រុកហាតយៃ បានសម្រុកលួ.ចអាហារ ភេសជ្ជៈ និងរបស់របរយ៉ាងអាណាធិបតេយ្យក្នុងហាងទំនិញដោយគ្មានញញើត រហូតដល់សមត្ថកិច្ចប្រកាសចាត់វិធានការតាមច្បាប់ ។ អ្វីគួរឱ្យហួសចិត្តបំផុត គឺជនឆ្លៀតឱកាសជាច្រើនក្រុមបន្តលួ.ចស្រាបៀរក្នុងទូរកុងតឺន័រនៅផ្លូវរថភ្លើងទាំងថ្ងៃ ដោយមិនខ្លាចសមត្ថកិច្ច ។

ហ្វេសប៊ុកផេក «Army Military Force» បានបង្ហោះវីដេអូពលរដ្ឋស្រុកហាតយៃសម្រុកលួចស្រាបៀរក្នុងទូរកុងតឺន័រយ៉ាងអាណាធិបតេយ្យ និងសរសេរថា ៖ «កាលពីថ្ងៃទី២៨ ខែវិច្ឆិកា ពលរដ្ឋស្រុកហាតយៃនៅតំបន់៨ បាននាំគ្នាគាស់ទូរកុងតឺន័រលើផ្លូវរថភ្លើងដើម្បីលួចស្រាបៀររូបដំរីរបស់ក្រុមហ៊ុននៅស្ថានីយរថភ្លើងហាតយៃ ។ ជនឆ្លៀតឱកាសមួយចំនួនលើកគ្នាមកទាំងគ្រួសារ ខ្លះបបួលមិត្តភក្តិមកជួយលួច ថែមទាំងបែងចែកតួនាទីគ្នា ដូចជា ៖ ម្នាក់ជាអ្នកដឹកជញ្ជូនស្រាបៀរ ម្នាក់ទៀតឈរចាំមើលផ្លូវ រីឯជនឆ្លៀតឱកាសខ្លះយកម៉ូតូកង់៣ មកដឹកស្រាបៀរទាំងកេសៗចេញពីទូរកុងតឺន័រ» ។

បន្ទាប់ពីហ្វេសប៊ុកផេកនេះបង្ហាញវីដេអូជនឆ្លៀតឱកាសលួចស្រាបៀរនៅស្រុកហាតយៃ សារព័ត៌មានថៃក៏យកព័ត៌មាននេះទៅផ្សព្វផ្សាយ ដូចជា ៖ សារព័ត៌មាន Thairath ផ្សាយថា វិបត្តិធ្ងន់ធ្ងរពេលពេលទឹកជំនន់ស្រក ពលរដ្ឋស្រុកហាតយៃឆ្លៀតឱកាសសម្រុកប្ល.ន់ស្រាបៀរក្នុងទូរកុងតឺន័រនៅស្ថានីយរថភ្លើងទាំងកណ្តាលថ្ងៃ ។ ហេតុការណ៍នេះធ្វើឱ្យពលរដ្ឋថៃហួសចិត្តយ៉ាងខ្លាំង ដែលអ្នកស្រុកហាតយៃគិតតែពីប្រយោជន៍ផ្ទាល់ខ្លួន មិនខ្វល់ពីការខាតបង់របស់ក្រុមហ៊ុនស្រាបៀរ ឬទុក្ខលំបាករបស់ម្ចាស់ហាងទំនិញ ។

នៅថ្ងៃទី២៨ ខែវិច្ឆិកា ស្នងការនគរបាល លោក Kitrat Panphet បានបញ្ជាឱ្យសមត្ថកិច្ចចុះពិនិត្យមើលទីតាំងផ្លូវរថភ្លើងស្រុកហាតយៃជាបន្ទាន់ ក្រោយមានការបង្ហោះវីដេអូជនឆ្លៀតឱកាសជាច្រើនក្រុមលួចស្រាបៀរដំរីពេលទឹកជំនន់ស្រក បន្ទាប់ពីសម្រុកលួចរបស់របរក្នុងហាងទំនិញយ៉ាងអាណាធិបតេយ្យ ។ លោកថា ត្រូវរង់ចាំពិនិត្យមើលថា តើម្ចាស់ហាងទំនិញ ឬក្រុមហ៊ុនស្រាបៀរ នឹងដាក់ពាក្យប្តឹងដែរឬអត់? បើមានការប្តឹងផ្តល់ គឺជនទាំងនេះខុសច្បាប់ព្រហ្មទណ្ឌ សមត្ថកិច្ចនឹងកោះហៅមកសួរនាំចាត់វិធានការតាមផ្លូវច្បាប់ ។

ស្រាបៀរដែលជនឆ្លៀតឱកាសជាច្រើនក្រុមសម្រុកចូលលួចនេះ គឺមានទាំងអស់ចំនួន៤ទូរកុងតឺន័ រស្ថិតនៅលើផ្លូវរថភ្លើងស្រុកហាតយៃ និងនៅមិនឆ្ងាយពីស្ថានីយប៉ូលិស ។ ក្រុមឆ្លៀតឱកាសទាំងនេះបានលួចស្រាបៀរជាច្រើនកេះដឹកជញ្ជូនមកផ្ទះ ថែមទាំងបង្ហោះរូបភាពក្នុងបណ្តាញសង្គម ។

តាមការចុះផ្សាយរបស់សារព័ត៌មាន Amarin News នៅថ្ងៃទី២៩ ខែវិច្ឆិកា សមត្ថកិច្ចបានចាប់ខ្លួនជនឆ្លៀតឱកាសចំនួន៦នាក់ ដែលគាស់ទូរកុងទឺន័រតាមផ្លូវរថភ្លើងលួចស្រាបៀរ ហើយសមត្ថកិច្ចរឹបអូសស្រាបៀរពីចោរសរុបចំនួន៦៥កេស ។ សមត្ថកិច្ចបញ្ជាក់ថា មានអ្នកជាប់ពាក់ព័ន្ធជាច្រើនទៀត ព្រមទាំងចាប់ខ្លួនជនបាញ់គំរាមផងដែរ រហូតធ្វើឱ្យភ្នាក់ងារសង្គ្រោះជិះទូក Jet Ski ដែលយកអំណោយមកចែកពលរដ្ឋរងគ្រោះដោយសារទឹកជំនន់ដកថយវិញ ។

គួរបញ្ជាក់ថា កាលពីថ្ងៃទី២៧ ខែវិច្ឆិកា ពលរដ្ឋស្រុកហាតយៃបានដណ្តើមគ្នាយកចំណីអាហារ និងរបស់របរផ្សេងៗដែលភ្នាក់ងារសង្គ្រោះដឹកតាមរថយន្តយកមកចែក ដោយសារពួកគេស្រេកឃ្លានខ្លាំងពេកអស់រយៈពេលជាច្រើនថ្ងៃ ខណៈនៅក្បែរនោះមានសាកសពស្លាប់ដោយសារទឹកជំនន់មិនទាន់ត្រូវប្រមូល និងគំរាមសំរាមពាសពេញ ។ សភាពបែបនេះ គឺដូចគ្នានឹងស្រុកហាតយៃ រងគ្រោះដោយរលកយក្សស៊ូណាមិ មនុស្សម្នាទើបរួចពីសេចក្តីស្លាប់ ៕

ប្រទេសឥណ្ឌូណេស៊ី ៖ ស្របពេលទឹកជំនន់វាយប្រ.ហារយ៉ាងធ្ងន់ធ្ងរនៅប្រទេសនានាក្នុងតំបន់អាស៊ាន រួមមាន ៖ ថៃ វៀតណាម និងម៉ាឡេស៊ី ធ្វើឱ្យប្រទេសទាំងនេះរងផលប៉ះពាល់ខ្លាំង ទាំងការខូចខាតផ្ទះសម្បែង អគារ ស្ពាន ផ្លូវ សាលារៀន មន្ទីរពេទ្យ និងផ្ទៃដីកសិកម្ម ដែលជាការខាតបង់សេដ្ឋកិច្ចយ៉ាងច្រើនមហាសាលនោះ កោះស៊ូម៉ាត្រា និងតំបន់មួយចំនួនរបស់ឥណ្ឌូណេស៊ីក៏រងផលប៉ះពាល់ធ្ងន់ធ្ងរដោយទឹកជំនន់ដែរ រីឯពលរដ្ឋឥណ្ឌូណេស៊ីបាត់បង់ជីវិ.តដោយសារទឹកជំនន់រហូតដល់៨៤នាក់ និងបាត់ខ្លួនជាច្រើននាក់ ។

តាមការចុះផ្សាយរបស់សារព័ត៌មានបរទេសនៅថ្ងៃទី២៨ ខែវិច្ឆិកា ឆ្នាំ២០២៥ ប្រទេសឥណ្ឌូណេស៊ីបានរងផលប៉ះពាល់យ៉ាងធ្ងន់ធ្ងរដោយសារទឹកជំនន់ និងការបាក់ដី ដែលធ្វើឱ្យពលរដ្ឋបាត់បង់ជីវិតរហូតដល់៨៤នាក់ និងបាត់ខ្លួនជាច្រើននាក់ ។ មន្ត្រីកាត់បន្ថយគ្រោះមហន្តរាយឥណ្ឌូណេស៊ីឱ្យដឹងថា នៅកោះស៊ូម៉ាត្រាមានការវាយប្រហារដោយទឹកជំនន់ និងបាក់ដីខ្លាំងធ្វើឱ្យពលរដ្ឋបាត់បង់ជីវិតចំនួន៨៤នាក់ និងបាត់ខ្លួនជាច្រើន ជាពិសេស នៅខេត្តស៊ូម៉ាត្រាខាងជើង និងខេត្តស៊ូម៉ាត្រាខាងលិច រងផលប៉ះពាល់ធ្ងន់ធ្ងរជាងគេ ។

សមត្ថកិច្ចខេត្តស៊ូម៉ាត្រាខាងជើងអះអាងថា ខេត្តស៊ូម៉ាត្រាខាងជើង មានមនុស្សស្លាប់ដោយសារទឹកជំនន់ យ៉ាងហោចណាស់៦២នាក់, រងរបួស៩៥នាក់ និងបាត់ខ្លួន៦៥នាក់ រីឯខេត្តស៊ូម៉ាត្រាខាងលិច មានមនុស្សស្លាប់២២នាក់ និងបាត់ខ្លួន១២នាក់ សរុបនៅខេត្តទាំង២ មានមនុស្សស្លាប់ចំនួន៨៤នាក់ ។ ខ្យល់ព្យុះស៊ីក្លូនត្រូពិចដែលបក់កាត់តាមតំបន់ខាងលិចបំផុតនៃប្រជុំកោះឥណ្ឌូណេស៊ី បង្កឱ្យមានទឹកជំនន់ បាក់ដីភ្លាមៗ និងមានទឹកលាយភក់ហូរចូលផ្ទះអ្នកស្រុកធ្វើឱ្យក្រឡប់រថយន្ត ខណៈពលរដ្ឋជាច្រើននាក់ជាប់ក្នុងផ្ទះ ។

ភ្នាក់ងារសង្គ្រោះត្រូវប្រើប្រាស់ឧទ្ធម្ភាគចក្រដើម្បីដឹកជញ្ជូនអាហារផ្តល់ឱ្យជនរងគ្រោះ ដោយសារផ្លូវជាច្រើនកន្លែងត្រូវទឹកហូរកាត់ផ្តាច់ខូចខាត, ប្រព័ន្ធទំនាក់ទំនងត្រូវបំផ្លាញ និងដាច់ចរន្តអគ្គិសនីគ្រប់ទីកន្លែង ។ ពលរដ្ឋជាង១ម៉ឺន២ពាន់នាក់បានជម្លៀសចេញពីតំបន់គ្រោះថ្នាក់ និងពលរដ្ឋជាច្រើននាក់ទៀតរង់ចាំការជួយសង្គ្រោះជាបន្ទាន់ ។

យោងតាមរបាយការណ៍ក្នុងតំបន់ គឺសហគមន៍ជាច្រើនធ្លាក់ក្នុងស្ថានភាពធ្ងន់ធ្ងរ រថយន្តជាច្រើនគ្រឿងហូរអណ្តែតតាមទឹក មនុស្សជាប់ក្នុងផ្ទះ ខណៈពលរដ្ឋប្រាប់ថា ទឹកជំនន់ហូរមកភ្លាមៗដោយពុំបានត្រៀមខ្លួន ។ អាជ្ញាធរបានរៀបចំជម្រកបណ្តោះអាសន្នសម្រាប់ឱ្យពលរដ្ឋរងគ្រោះស្នាក់នៅ និងជម្លៀសពលរដ្ឋចេញពីតំបន់គ្រោះថ្នាក់ ពីព្រោះភ្លៀងធ្លាក់មិនឈប់ឈរកាន់តែធ្វើឱ្យកម្ពស់ទឹកជំនន់កើនឡើង និងបាក់ដីបន្ថែមទៀត ។

អាជ្ញាធរបានដាស់តឿនពីចំនួនមនុស្សស្លាប់ដោយសារទឹកជំនន់ និងការបាក់ដីអាចនឹងកើនឡើងបន្ថែម ដោយសារមានតំបន់គ្រោះថ្នាក់ជាច្រើនដែលភ្នាក់ងារសង្គ្រោះពុំអាចចូលដល់ និងភ្លៀងធ្លាក់ជាបន្តបន្ទាប់ ។ ការកាប់ព្រៃឈើខុសច្បាប់ និងការពង្រីកផ្ទៃដីដាំដូងប្រេង ធ្វើឱ្យស្ថានការណ៍ទឹកជំនន់ និងការបាក់ដីបង្កផលប៉ះពាល់កាន់តែខ្លាំង ដោយបង្កផលវិបាកដល់ពលរដ្ឋ ប្រព័ន្ធអេកូឡូស៊ី និងសត្វស្វានៅកោះស៊ូម៉ាត្រា ៕