ថ្មីៗនេះក្នុងវិស័យអនឡាញលោកស្រី ទ្រី ដាណា បានធ្វើឱ្យមនុស្សជាច្រើនអាណិតអាសូរ និងបង្ហាញការយល់ចិត្តបន្ទាប់ពីលោកស្រីនិយាយទាំងទឹកភ្នែកពីការខកចិត្តរបស់ខ្លួនមនុស្សដែលលោកស្រីជួយបែរទៅប្រម៉ូតផលិតផលក្រុមហ៊ុនដែលជាសត្រូវរបស់ខ្លួន។ ស្របពេលដែលថៅកែពេជ្ររូបនេះជួបនូវរឿងខកចិត្ត គីម យ៉ាយ៉ា និងទ្រិញ ផល្លា ដែលធ្លាប់ធ្វើការជាមួយលោកស្រី ទ្រី ដាណា បានទម្លាយអត្តចរិតរបស់អ្នកជំនួញរូបនេះ។
គីម យ៉ាយ៉ា បានរៀបរាប់នៅក្នុងវីដេអូថា នាងធ្លាប់ប្រម៉ូតផលិតផលរបស់លោកស្រី ទ្រី ដាណា ចំនួន២ឆ្នាំ ដោយអះអាងថាអតីតមេរបស់ខ្លួនមិនមែនសម្តែងតែនៅក្នុងកាមេរ៉ា ឃើញជួបអ្នកនេះ ជួយអ្នកនោះនោះទេ ប៉ុន្តែទឹកចិត្តក្តីស្រលាញ់របស់គាត់គឺមានចំពោះមនុស្សគ្រប់រូបតែម្តង។ យ៉ាយ៉ា បន្តទៀតថាពីដើមមកនាងប្រម៉ូតផលិតផលតែនៅខេត្តបាត់ដំបងទេ ហើយលោកស្រី ទ្រី ដាណា ជាមនុស្សដំបូងបំផុតហៅនាងមកធ្វើការនៅភ្នំពេញដោយមានការធានាហូបចុកការស្នាក់នៅមួយកំផ្លេឱ្យនាង។ ជាមួយគ្នានេះ យ៉ាយ៉ា ក៏បានសរសើរពីទឹកចិត្តដៃទូលាយរបស់លោកស្រី ទ្រី ដាណា តែងតែផ្តល់ថវិកាឱ្យនាងជារឿយៗ។
អ្នកប្រម៉ូតផលិតផលនិងធ្លាប់ចូលរួមប្រកួតវិស័យបវរកញ្ញារូបនេះថា ទោះបីជាពេលនេះនាងលែងធ្វើការឱ្យលោកស្រី ទ្រី ដាណា ក្តីប៉ុន្តែនៅក្នុងចិត្តនាងនៅតែគិតថាលោកស្រី ទ្រី ដាណា ជាមនុស្សម្នាក់ដែលមានគុណចំពោះខ្លួន។ ការចេញមកនិយាយនេះ យ៉ាយ៉ា ហ៊ានស្បថថាមិនទទួលបានលុយពីអតីតមេរបស់ខ្លួននោះទេប៉ុន្តែនាងនិយាយអ្វីដែលជាការពិត។
ងាកមកកាន់អ្នកនាង ទ្រិញ ផល្លា វិញក៏បានចេញមកទម្លាយអត្តចរិតរបស់ថៅកែ ពេជ្រ ទ្រី ដាណា ដូចគ្នាដោយសង្កត់ធ្ងន់ថានាងមានការដឹងគុណដល់ដង្ហើមចុងក្រោយ។ អ្នកនាងបាននិយាយថាកាលពីឆ្នាំ២០២២ ខ្លួនជាប់កុងត្រាជាអ្នកផ្សព្វផ្សាយផលិតផលរបស់លោកស្រី ទ្រី ដាណា រយៈពេល១ឆ្នាំជាមួយនឹងតម្លៃខ្លួនរាប់ម៉ឺនដុល្លារ។ អ្នកលក់អនឡាញរូបនេះថា លោកស្រី ទ្រី ដាណា ជាមនុស្សម្នាក់ដែលមានព្រហ្មវិហារធម៌ មានទឹកចិត្តបេះដូងល្អខ្លាំង។
អ្នកនាង ទ្រិញ ផល្លា ថានាងនៅតែមានការក្រែងចិត្តលោកស្រី ទ្រី ដាណា ដល់សព្វថ្ងៃព្រោះអំឡុងពេលឆ្នាំ២០២២មានរឿងផ្ទុះខ្លាំងនៅលើបណ្តាញសង្គម មិនបានបំពេញការងារឱ្យល្អជូនម្ចាស់ផលិតផលនោះទេទាំងទទួលលុយហើយ ប៉ុន្តែលោកស្រី ទ្រី ដាណាមិនប្រកាន់ខឹងហើយមានតែការលើកទឹកចិត្ត អាណិតអាសូរនាងថែមទៀត៕
