តារាកំប្លែង ពាក់មី បានរម្លឹកពីគុណបំណាច់ក្រុមហ៊ុន៣ធំៗដែលផ្តល់ឱកាសឱ្យលោកក្លាយជាអ្នកកំប្លែង អ្នកចម្រៀង និងអ្នកសម្តែងកុនរួមទាំងអ្នកដឹកនាំរឿង។ ងាកមកកាន់ ថមមី ប្តីរបស់តារាចម្រៀង សួស វីសា វិញបានបង្ហាញថាអាជីពសិល្បៈលោកមានថ្ងៃនេះគឺមានការរួមចំណែកមកពីស្ថាប័នជាច្រើន។
នៅថ្ងៃទី២៨ ខែវិច្ឆិកា លោក ចែម ចាន់រ៉ា ហៅ នាយពាក់មី បានបង្ហាញការដឹងគុណមកកាន់កន្លែងដែលធ្វើឱ្យអាចឈរជើងលើអាជីពសិល្បៈបញ្ចេញទេពកោសល្យបានជាច្រើនទម្រង់។ តារាកំប្លែងមានដើមកំណើតមកពីខេត្តស្វាយរៀងជាអតីតអ្នកធ្វើសំណង់បានបង្ហោះថា «CTN . អ្នកផ្តល់ឱកាសឱ្យខ្ញុំបានក្លាយជាអ្នកកំប្លែង TOWN. អ្នកផ្តល់ឱកាសឱ្យ ខ្ញុំក្លាយជាអ្នកចម្រៀង LD. អ្នកផ្តល់ឱកាសឱ្យខ្ញុំក្លាយជាអ្នកសំដែងកុន និង អ្នកដឹកនាំរឿង»។
ការបោះជំហានចូលក្នុងអាជីពសិល្បៈបានធ្វើឱ្យតារាកំប្លែងពាក់មី ផ្លាស់ប្តូរវាសនាខ្លួនឯងយ៉ាងខ្លាំង។ លើសពីនេះលោកក៏បានជួយយិតយោងប្អូនប្រឡូកក្នុងអាជីពសិល្បៈដូចគ្នា ខណៈបងប្អូនរបស់តារាកំប្លែងពាក់មី ទទួលបានការស្រលាញ់ចូលចិត្តពីទស្សនិកជនជាច្រើន។
មិនត្រឹមតែតារាកំប្លែងពាក់មី ប៉ុណ្ណោះទេដែលរម្លឹកពីគុណបំណាច់ក្រុមហ៊ុនដែលផ្តល់ឱកាសឱ្យលោកបញ្ចេញសមត្ថភាព ងាកមកកាន់ ថមមី ជាស្វាមីរបស់តារាចម្រៀង សួស វីសា ដែលបច្ចុប្បន្នប្តីប្រពន្ធមួយគូនេះកំពុងកាន់កាប់ជំនួញក្នុងដៃក៏ចេញមករៀបរាប់កន្លែងដំបូងដែលធ្វើឱ្យលោកអាចបញ្ចេញសមត្ថភាពក្លាយជាអ្នកសិល្បៈដូចសព្វថ្ងៃនេះ។
ថមមី បាននិយាយថាលោកជាអ្នកមកពីស្រុកកោះធំ ខេត្តកណ្តាល អាចមានថ្ងៃនេះនៃអាជីពសិល្បៈគឺនឹកដល់កម្មវិធី Freshie Boy ដែលផ្តល់ឱកាសឱ្យលោកក្លាយជាតារាជាប់ជ័យលាភី 1st Winner ទី២គឺ កម្មវិធី Tv11 អប្សរា ដែលផ្តល់ឱកាសបង្វឹកលោកក្លាយជាតារាចេះគ្រប់ទ្រង់ ទទួលពានរង្វាន់ Super Star។ ទី៣ ថមមី ដឹងគុណទៅកាន់ Tv5 ផ្តល់ឱកាសលោកក្លាយជាពិធីករ ចំណែកឯស្ថានីយទូរទស្សន៍ CTN & MyTV ផ្តល់ឱកាសលោកក្លាយជាតារាកិត្តិយស។ សម្រាប់ស្ថានីយហង្សមាសបានផ្តល់ឱកាសលោកក្លាយជាតារាសម្តែង និង KMF ខ្មែរផ្តល់ឱកាសលោកក្លាយជាតួកុន៕
