ការរៀបចំលំនៅឋានមានសារៈសំខាន់ណាស់ដែលមិនគួរមើលរំលង ពីព្រោះលំនៅឋានមានសណ្តាប់ធ្នាប់ល្អ មិនត្រឹមតែទាក់ទាញការចាប់អារម្មណ៍ពីអ្នករស់នៅប៉ុណ្ណោះទេ ប៉ុន្តែវាក៏ទាក់ទាញថាមពលល្អៗចូលក្នុងលំនៅឋានផងដែរ ។ ក្បួនហុងស៊ុយបានណែនាំឱ្យបោះចោលរបស់របរទាំង៧នេះចេញពីលំនៅឋានដើម្បីទាក់ទាញថាមពលល្អ កុំទុកវាឱ្យសោះ នាំតែថាមពលថយចុះ និងបណ្តាលឱ្យជួបហេតុការណ៍អាក្រក់ ។

បើតាមអ្នកជំនាញរៀបចំលំនៅឋានតាមហុងស៊ុយ ប្រសិនបើរក្សាទុករបស់របរទាំង៧នេះក្នុងលំនៅឋាន វានឹងធ្វើឱ្យថាមពលធ្លាក់ចុះ និងជួបតែហេតុការណ៍អាក្រក់ ។ អ្នកជំនាញណែនាំឱ្យបោះចោល ឬបរិច្ចាគរបស់របរទាំងនេះ ដើម្បីឱ្យលំនៅឋានមានទីធ្លាធំទូលាយ ជួយឱ្យអ្នករស់នៅមានសេចក្តីសុខ និងអាចផ្ចង់អារម្មណ៍បានល្អប្រសើរជាងមុន ។ ក្បួនហុងស៊ុយបញ្ជាក់ថា លំនៅឋានស្អាតមានពន្លឺ និងមានសណ្តាប់ធ្នាប់ល្អ អាចជួយដល់ផ្លូវចិត្ត ឬទទួលបានលាភសំណាង ខណៈលំនៅឋានមានរបស់របរបាក់បែក ឬរបស់របរមិនចាំបាច់ នឹងធ្វើឱ្យបរិយាកាសអាប់អួរ រារាំងថាមពលល្អ ។

ខាងក្រោមនេះជារបស់របរទាំង៧ក្នុងលំនៅឋានដែលគួរបោះចោលជាបន្ទាន់ ៖

១-សម្លៀកបំពាក់ចាស់ ៖ ទូរសម្លៀកបំពាក់ស្ទើរតែបិទទ្វារមិនជិតដោយសារមានសម្លៀកបំពាក់ចាស់ៗមិនបានស្លៀកពាក់អស់រយៈពេលពី២ឆ្នាំ ទៅ៣ឆ្នាំ ដែលការរក្សាទុកសម្លៀកបំពាក់ចាស់នេះ មិនត្រឹមតែធ្វើឱ្យចង្អៀតទូរប៉ុណ្ណោះទេ ថែមទាំងធ្វើឱ្យបន្ទប់សម្រាកគ្មានសណ្តាប់ធ្នាប់ ។ អ្នកជំនាញរៀបចំលំនៅឋានតាមហុងស៊ុយណែនាំឱ្យរក្សាទុកសម្លៀកបំពាក់ចាស់ចាប់ពី៣០% ទៅ៤០% សម្រាប់ស្លៀកពាក់ រីឯនៅសល់គួរបរិច្ចាគដើម្បីឱ្យទូរមានទីធ្លាយទូលាយ ។

២-ឯកសារ និងវិក្កយបត្រផុតកំណត់ ៖ មនុស្សភាគច្រើនចូលចិត្តរក្សាទុកឯកសារចាស់ វិក្កយបត្រផុតកំណត់ជាច្រើនឆ្នាំ និងក្រូណូឈប់ប្រើប្រាស់ពាសពេញទូរដាក់ឯកសារ ប៉ុន្តែអ្នកជំនាញណែនាំឱ្យរក្សាទុកតែឯកសារសំខាន់ប៉ុណ្ណោះ រួមមាន ៖ ឯកសារផ្ទេរកម្មសិទ្ធិ និងឯកសារហិរញ្ញវត្ថុ ហើយបែងចែកឯកសារតាមប្រភេទរបស់វារៀងរាល់៣ខែម្តង ។

៣-ឧបករណ៍អេឡិចត្រូនិកខូច ឬមិនប្រើប្រាស់ ៖ ការយកឧបករណ៍អេឡិចត្រូនិកខូចទៅជួសជុលឡើងវិញមិនខុសពីទិញថ្មីទេ ហើយខ្សែភ្លើងដោតឧបករណ៍អេឡិចត្រូនិកក៏ដូចគ្នាដែរ ពេលប្រើប្រាស់យូរទៅនឹងឡូកឡំគ្នា ។ គួរបោះចោលវា ឬបញ្ជូនទៅកន្លែងកែច្នៃ បើមិនប្រើប្រាស់វាចាប់ពី៦ខែឡើងទៅ ពីព្រោះក្រៅពីរញ៉េរញ៉ៃ វានឹងរារាំងថាមពលល្អចូលលំនៅឋាន ។

៤-គ្រឿងសម្អាង និងរបស់របរប្រើប្រាស់ផ្ទាល់ខ្លួនផុតកំណត់ ៖ ក្រែមលាមបបូរមាត់ ឡេការពារកំដៅថ្ងៃផុតកំណត់ ឬគ្រឿងសម្អាងបើកគំរបចោលយូរ នឹងរលាកស្បែក និងធ្វើឱ្យបន្ទប់ទឹករញ៉េរញ៉ៃ ។ គួររក្សាទុកតែគ្រឿងសម្អាងណាដែលចាំបាច់ប្រើប្រាស់ និងប្រើប្រាស់ញឹកញាប់ ។

៥-របស់តុបតែងលំនៅឋានហួសសម័យ ៖ ថូផ្កា រូបចម្លាក់ ឬស៊ុមរូបថតមិនស្អាត គួរតែយកចេញដើម្បីឱ្យបន្ទប់ទូលាយ ។ អ្នកជំនាញណែនាំថា បើទិញរបស់១ចូលលំនៅឋាន ត្រូវតែបោះចោលរបស់១ដែរ វានឹងជួយឱ្យលំនៅឋានលោកអ្នកស្រស់ស្អាត ។

៦-គ្រែសម្រាកចាស់ខ្លាំង ៖ ការសម្រាកលើគ្រែចាស់ខ្លាំង ខ្នើយមានក្លិនស្អុយ ឬកម្រាលពូកចាស់ វានឹងបង្កផលប៉ះពាល់ដល់ការសម្រាក និងសុខភាព ។ គួរសម្អាតរបស់របរទាំងនេះ ឬផ្លាស់ប្តូរថ្មីពេលខូចទ្រង់ទ្រាយដើម្បីឱ្យបន្ទប់សម្រាកក្លាយជាកន្លែងទាក់ទាញថាមពល ។

៧-ប្រអប់ផ្លាស្ទិក និងដបធំៗ ៖ របស់របរទាំងនេះធ្វើឱ្យផ្ទះបាយកខ្វក់ ជាពិសេស ប្រអប់ផ្លាស្ទិកដែលលាងមិនស្អាត ឬជាប់ស្នាមប្រឡាក់ ឬធុំក្លិន ។ យើងអាចទុកតែប្រអប់ផ្លាស្ទិកណាដែលអាចប្រើប្រាស់បាន រីឯនៅសល់ត្រូវយកទៅបោះចោល ទើបផ្ទះបាយមានសណ្តាប់ធ្នាប់ ។

អ្នកជំនាញហុងស៊ុយបញ្ជាក់ថា ការរៀបចំរបស់របរក្នុងលំនៅឋានឱ្យមានរបៀបរៀបរយមិនត្រឹមតែជួយឱ្យស្រស់ស្អាតប៉ុណ្ណោះទេ ប៉ុន្តែនឹងផ្តល់នូវថាមពលល្អ ការគិត និងគុណភាពជីវិតរបស់អ្នករស់នៅ ៕

ប្រឌិតរឿងច្រំដែលមិនចេះចប់! ភ្លាមៗក្រោយពីហេតុការណ៍ជាន់មីនផ្ទុះដា.ច់ជើងរបស់ជនជាតិចិនម្នាក់នៅបានណងចាន់ យោធាថៃបានរាយការណ៍ទៅស្ថានទូតចិន និងចោ.ទប្រកាន់កម្ពុជាជាសាធារណៈថា នៅតែបង្កើនការដាក់បបង្កប់មីនថ្មីៗជាបន្តបន្ទាប់។ នេះបើតាមការចុះផ្សាយរបស់សារព័ត៌មាន Khaosod ។

នៅរសៀលថ្ងៃសៅរិ៍ ទី២៩ ខែវិច្ឆិកា ឆ្នាំ២០២៥ អ្នកនាំពាក្យកងទ័ពភូមិន្ទថៃលោក វីនថៃ ស៊ូវ៉ារី បានធ្វើសេចក្ដីថ្លែងការណ៍នៅចំពោះមុខអ្នកសារព័ត៌មាន ពាក់ព័ន្ធនឹងករណីជនជាតិចិនម្នាក់បានលួ.ចឆ្លងដែនពីកម្ពុជាចូលទឹកដីថៃដោយខុសច្បាប់និងបានជាន់មីនផ្ទុះ ដោយធ្វើការរិះគន់កម្ពុជាថា មិនបានអើពើ និងមិនសហការជាមួយថៃក្នុងការដោះមីន ទើបនាំឲ្យប៉ះពាល់ដល់សុវត្ថិភាពសាធារណៈ។

បន្ថែមពីលើការអធិប្បាយរបស់ខ្លួន លោក វីនថៃ ស៊ូវ៉ារី បានអះអាងថា តំបន់ដែលកើតហេតុផ្ទុះមីនកាលពីព្រឹកមិញនេះ គឺស្ថិតនៅចំណុចព្រំដែនក្បែរភូមិណងចាន់ ខេត្តស្រះកែវ ប្រទេសថៃ ហើយលោកថែមទាំងសង្កត់ធ្ងន់ថា តំបន់នេះគឺជាតំបន់ដែលយោធាថៃកំពុងធ្វើការបោសសម្អាត។ មីនជាច្រើនត្រូវបានគេរកឃើញនៅទីនោះក្នុងប្រតិបត្តិការកន្លងមក។

អ្នកនាំពាក្យកងទ័ពថៃរូបនេះបានសន្មត់ថា ដូច្នេះវាច្បាស់ណាស់ថា កម្ពុជាបានដាក់មីនថ្មីជាបន្តបន្ទាប់តាមបណ្តោយព្រំដែន ដើម្បីរារាំងការងាររបស់អាជ្ញាធរថៃ និងធ្វើឲ្យប៉ះពាល់ដល់ជនស៊ីវិល មិនត្រឹមតែនៅទីតាំងនេះប៉ុណ្ណោះទេ ប៉ុន្តែតាមបណ្តោយព្រំដែនថៃ-កម្ពុជាទាំងមូលតែម្ដង។

ជាមួយគ្នានេះ ស្ថានទូតចិនប្រចាំនៅទីក្រុងបាងកក ប្រទេសថៃ មុននេះបន្តិចបានចេញសេក្ដីថ្លែងការណ៍បន្ទាន់មួយថា ទាក់ទងនឹងហេតុការណ៍ជនជាតិចិន បានជាន់មីនរងរបួសនៅតំបន់ព្រំដែនកម្ពុជា-ថៃ ដែលត្រូវបានរាយការណ៍នៅថ្ងៃទី២៩ ខែវិច្ឆិកា នេះថាចិននឹងធានាផ្ដល់ការថែទាំផ្នែកវេជ្ជសាស្រ្ត ព្រមទាំងសម្របសម្រួលជាមួយអាជ្ញាធរពាក់ព័ន្ធរបស់ថៃ ដើម្បីផ្ដល់ជំនួយចាំបាច់ដល់អ្នករងរបួស។

ទោះជាយ៉ាងណា រហូតមកទល់នឹងពេលនេះក្រសួងការពារជាតិកម្ពុជា នៅមិនទាន់ចេញសេចក្ដីថ្លែងការណ៍ណាមួយទាក់ទងនឹងឧបត្តិហេតុផ្ទុះមីនរបស់ជនជាតិចិននេះនៅឡើយទេ ប៉ុន្តែបើតាមការប្រកាសកន្លងមក កម្ពុជាធ្លាប់បានបញ្ជាក់ជាច្រើនដងមកហើយថា ក្នុងនាមជារដ្ឋភាគីនៃអនុសញ្ញាអូតាវ៉ា កម្ពុជាប្ដេជ្ញាបោសសម្អាត និងមិនប្រើប្រាស់មីនប្រឆាំងមនុស្សថ្មីៗជាដាច់ខាត។

ចំពោះការអះអាងថាមីននេះជាមីនដែលម្ពុជាទើបដាក់ដាំថ្មីរបស់យោធាថៃ គឺជាការចោ.ទប្រកាន់ដោយគ្មានមូលដ្ឋានមូលដ្ឋាន និងគ្មានភ័ស្តុតាងច្បាស់លាស់ទាល់តែសោះ ពោលវាគ្រាន់តែជាអះអាងដោយឯកតោភាគីប៉ុណ្ណោះ ពុំអាចយកជាការបានឡើយ៕

ដល់ពេលដែលត្រូវរករឿង ចោ.ទប្រកា.ន់កម្ពុជាទៀតហើយ! នៅមុននេះបន្តិចកងទ័ពបូព៌ារបស់ថៃបានចេញសេចក្ដីប្រកាសថា មានជនជាតិចិនម្នាក់បានជាន់មីនផ្ទុះរងរបួស នៅខណៈពេលគេព្យាយាមឆ្លងចូលទឹកដីថៃដោយខុសច្បាប់ ត្រង់ចំណុចព្រំដែនក្បែរភូមិជោគជ័យរបស់កម្ពុជា និង បានណងចាន់របស់ថៃ ។ បច្ចុប្បន្នអាជ្ញាធរខេត្តស្រះកែវកំពុងធ្វើការស៊ើបអង្កេតលើរឿងនេះ។

យោងតាមសារព័ត៌មាន Khaosod នៅវេលាថ្ងៃត្រង់ ថ្ងៃទី២៩ ខែវិច្ឆិកា ឆ្នាំ២០២៥ បានចេញផ្សាយអំពីរបាយការណ៍របស់កងទ័ពភូមិភាគ១ថៃ ដែលទទួលបានពីកងកម្លាំងបូរ៉ាផាថា កាលពីម៉ោងប្រមាណ ០៥:៥០ព្រឹក ពួកគេបានឮសម្លេងផ្ទុះដ៏ខ្លាំងមួយចេញពីក្នុងព្រៃ ដែលមានចម្ងាយប្រហែល ៨០-៩០ ម៉ែត្រពីផ្លូវស៊ីផេន ហើយក៏បាននាំគ្នាស្ទុះទៅពិនិត្យមើល និងបានរកឃើញថា បុរសម្នាក់បានរងរបួសធ្ងន់ធ្ងរ ដោយសារតែការផ្ទុះនោះ។

តាមការត្រួតពិនិត្យលិខិតឆ្លងដែនបន្ថែមទៀតបានរកឃើញថា ជនរងគ្រោះខាងលើគឺជាជនជាតិចិនអាយុ ២៦ ឆ្នាំមកពីខេត្តយូណាន បានរងរបួសធ្ងន់ធ្ងរដោយសារជើងស្តាំដាច់។ កងកម្លាំងថៃសង្ស័យថា ហេតុការណ៍នេះបានកើតឡើងក្នុងអំឡុងពេលដែលគាត់បានព្យាយាមឆ្លងដែនខុសច្បាប់ពីកម្ពុជាចូលទៅក្នុងទឹកដីថៃ។

តាមការបញ្ចាក់របស់មន្រ្តីព្រំដែនថៃបានអះអាងថា តំបន់កើតហេតុនៃការផ្ទុះមីនលើជនជាតិចិននេះ គឺជាតំបន់ដែលមានមីននៅ Ban Nong Chan (ក្បែរភូមិជោគជ័យរបស់កម្ពុជា) ជាកន្លែងដែលប្រតិបត្តិការដោះមីនរបស់ភាគីថៃនៅតែបន្ត។

យោធា និងមន្ត្រីនគរបាលព្រំដែនរបស់ថៃ ក៏បានធ្វើអន្តរាគមន៍បញ្ជូនបុរសជនជាតិចិននោះទៅសង្រ្គោះនៅមន្ទីពេទ្យរួចរាល់ ហើយឥឡូវនេះពួកគេកំពុងរឹតបន្តឹងការត្រួតពិនិត្យនៅចំណុចនោះ ដើម្បីធានាសុវត្ថិភាព ចៀសវាងមានការផ្ទុះជាបន្តបន្ទាប់ទៀត។

ទោះជាយ៉ាងណា យើងមានតែរង់ចាំមើលជាបន្តទៀតថា តើលទ្ធផលនៃការស៊ើបអង្កេតរបស់អាជ្ញាធរមីនរបស់ថៃនឹងបង្ហាញអំពីមីននេះថាជាមីនថ្មីទៀត ឬមួយយ៉ាងណា? ព្រោះតាមការសង្កេតពីហេតុការណ៍ផ្ទុះមីនទាំងអស់កន្លងមកនេះ យោធាថៃតែងលើកយកសេណារីយ៉ូផ្ទុះមីនជាលេសដើម្បីចោ.ទប្រកាន់ និងទម្លាក់កំហុសលើកម្ពុជាជានិច្ច៕

ប្រទេសថៃ ៖ កងទ័ពថៃបានបញ្ជូនអាវុធ រថក្រោះ និងកងកម្លាំងមកកាន់ព្រំដែនកម្ពុជា-ថៃឡើងវិញ ក្រោយពីនាយករដ្ឋមន្ត្រីថៃប្រកាសផ្អាកកិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខានៅទីក្រុងគូឡាឡាំពួរ ប្រទេសម៉ាឡេស៊ី ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ដោយថៃចោទប្រកាន់កម្ពុជាបង្កប់មីនថ្មីធ្វើឱ្យកងទ័ពខ្លួនរងរបួសនៅព្រំដែនខេត្តស៊ីសាកេត ។ បន្ទាប់ពីថៃផ្អាកកិច្ចព្រមព្រៀងសន្តិភាពជាឯកតោភាគី អាមេរិកក៏ផ្អាកចរចាពន្ធទំនិញជាមួយថៃ រហូតដល់ថៃគោរពកិច្ចព្រមព្រៀងសន្តិភាព ដែលធ្វើឱ្យថៃអន់ចិត្តខ្លាំងជាមួយអាមេរិក ។

ទោះជាលោកប្រធានាធិបតី Trump អំពាវនាវឱ្យរដ្ឋាភិបាលថៃគោរពកិច្ចព្រមព្រៀងសន្តិភាពក៏ដោយ ប៉ុន្តែកងទ័ពថៃនៅតែចិញ្ចឹមចិត្តចង់បង្កសង្គ្រាមឈ្លានពានកម្ពុជាម្តងទៀតតាមការញុះញង់របស់ក្រុមជ្រុលនិយម និងពលរដ្ឋថៃមួយចំនួន ។ កាលពីថ្ងៃទី២៨ ខែវិច្ឆិកា ពលរដ្ឋខេត្តស៊ីសាកេតបានញាប់ដៃញាប់ជើងច្រូតស្រូវ និងប្រមូលផលដំណាំរៀងៗខ្លួនព្រោះបារម្ភកើតសង្គ្រាមជាថ្មី បន្ទាប់ពីអាជ្ញាធរប្រកាសឱ្យត្រៀមខ្លួនជម្លៀសចេញពីលំនៅឋាន ។

តាមការចុះផ្សាយរបស់សារព័ត៌មាន Daily News កាលពីថ្ងៃទី២៨ ខែវិច្ឆិកា មេភូមិណូនឌូ ឃុំបឹងម៉ាលូ ស្រុកកាន់ថាឡាក់ ខេត្តស៊ីសាកេត (នៅទល់មុខប្រាសាទព្រះវិហារ និងភ្នំទ្រព្យ) បានប្រកាសឱ្យពលរដ្ឋត្រៀមខ្លួនឱ្យរួចរាល់ ដោយសារមិនទុកចិត្តស្ថានការណ៍ព្រំដែនកម្ពុជា-ថៃ ។ ការប្រកាសនេះធ្វើឱ្យពលរដ្ឋខេត្តស៊ីសាកេតបារម្ភខ្លាចកើតសង្គ្រាមជាថ្មី ក៏ប្រញាប់ច្រូតស្រូវ និងប្រមូលផលដំណាំលក់យកប្រាក់ដាក់តាមខ្លួន ប្រសិនបើមានការជម្លៀសចេញពីលំនៅឋាន ។

កាលពីថ្ងៃទី២៨ ខែវិច្ឆិកា ពលរដ្ឋនៅភូមិណូនឌូ បានរូតរះច្រូតស្រូវ និងប្រមូលផលដំណាំផ្សេងៗ ដូចជា ៖ បេះផ្លែម្ទេសលក់ដើម្បីប្រមូលប្រាក់ ដោយសារបារម្ភពីស្ថានការណ៍តឹងតាននៅព្រំដែនកម្ពុជា-ថៃដែលបង្កឡើងដោយកងទ័ពថៃ ។ ពួកគេជឿថា អាចនឹងមានសង្គ្រាមកើតឡើងម្តងទៀតក្រោយពីមេភូមិប្រកាសកាលពីព្រឹកថ្ងៃទី២៨ ខែវិច្ឆិកា ឱ្យពលរដ្ឋត្រៀមខ្លួនជម្លៀសចេញពីលំនៅឋាន ដោយសារមិនទុកចិត្តស្ថានការណ៍ ជាពិសេស នៅតំបន់ប្រាសាទព្រះវិហារ និងភ្នំទ្រព្យ ។ ក្រៅពីនេះ មេភូមិក៏បានត្រៀមជម្រកបណ្តោះអាសន្ននៅស្រុកកាន់ថាឡាក់ ក៏ដូចជាឱ្យពលរដ្ឋសម្អាតលេណដ្ឋាន ។

ស្ត្រីម្ចាស់ចម្ការម្ទេសនៅខេត្តស៊ីសាកេត ប្រាប់ថា បន្ទាប់ពីមេភូមិប្រកាសឱ្យពលរដ្ឋត្រៀមជម្លៀសទៅជម្រកបណ្តោះអាសន្ន ខ្លួនក៏ប្រញាប់បេះផ្លែម្ទេសលក់ ពីព្រោះអាចនឹងមានសង្គ្រាមម្តងទៀត ។ ប្រាក់បានពីការលក់ម្ទេសនឹងទុកចាយវាយពេលជម្លៀស បើទោះជាបេះផ្លែម្ទេសបានតិចក្តី ។ ស្ត្រីរូបនេះចង់ឱ្យកងទ័ពថៃបង្កសង្គ្រាមជាមួយកម្ពុជាឱ្យដឹងឈ្នះ-ចាញ់ ដើម្បីឱ្យខ្លួនងាយស្រួលរកស៊ីចិញ្ចឹមជីវិត ពីព្រោះសព្វថ្ងៃ មិនហ៊ានបណ្តាក់ទុនរកស៊ីអ្វីទេ ។

ដូចគ្នានេះ ម្ចាស់ចម្ការម្ទេសមួយកន្លែងទៀតថា ចង់ឱ្យកងទ័ពថៃធ្វើសង្គ្រាមឈ្លានពានកម្ពុជា ដោយសារបានត្រៀមខ្លួនរួចហើយ បើអាជ្ញាធរប្រកាសឱ្យជម្លៀស ខ្លួននឹងជម្លៀសតែម្តង ។ កសិករថៃរូបនេះបានផ្តល់កម្លាំងចិត្តឱ្យកងទ័ពរបស់ខ្លួនបង្កសង្គ្រាម បើទោះជាកសិករជួបការលំបាក ប៉ុន្តែបារម្ភពីកងទ័ព ។

បច្ចុប្បន្ន ប្រទេសថៃបានរងប៉ះពាល់យ៉ាងធ្ងន់ធ្ងរដោយសារទឹកជំនន់តាមបណ្តាខេត្ត ជាពិសេស នៅភាគខាងត្បូង ដែលរដ្ឋាភិបាលថៃអំពាវនាវឱ្យពិភពលោក ជួយដោះស្រាយបញ្ហាទឹកជំនន់ ដោយសារលោកនាយករដ្ឋមន្ត្រី Anutin Charnvirakul គ្មានសមត្ថភាពសង្គ្រោះពលរដ្ឋរងគ្រោះ ។ បើទោះជាសេដ្ឋកិច្ចថៃពេលនេះដុនដាបខ្លាំង ពលរដ្ឋភាគខាងត្បូងអត់ឃ្លាន ហ៊ានលួចចំណីអាហារ ប៉ុន្តែបែរជាពលរដ្ឋខេត្តស៊ីសាកេតញុះញង់ឱ្យកងទ័ពថៃធ្វើសង្គ្រាមឈ្លានពានកម្ពុជាទៅវិញ ពលរដ្ឋស៊ីសាកេត និងសុរិន្ទមួយចំនួនហៅខ្លួនឯងថា «សៀមសុរិន្ទ» និងប្រកាសគាំទ្រកងទ័ពថៃ ។

គួរបញ្ជាក់ថា ថៃបានល្មើសកិច្ចព្រមព្រៀងសន្តិភាព និងមិនព្រមដោះលែងវីរៈកងទ័ពកម្ពុជាទាំង១៨រូបត្រឡប់មកប្រទេសកម្ពុជាវិញទេ បើទោះជាកម្ពុជាអំពាវនាវឱ្យដោះលែងក្តី ។ បើគិតត្រឹមថ្ងៃទី២៩ ខែវិច្ឆិកា ឆ្នាំ២០២៥ គឺជាថ្ងៃទី១២៣ហើយ ដែលវីរកងទ័ពកម្ពុជាចំនួន១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់កងទ័ពថៃ ។

កម្ពុជាអំពាវនាវឱ្យថៃគោរពឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ នូវសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា-ថៃ ត្រង់កថាខណ្ឌទី៥ គូសបញ្ជាក់ថា «ភាគីថៃត្រូវដោះលែងយោធិនទាំង១៨នាក់របស់កម្ពុជា ជាបន្ទាន់ដោយមិនបង្អែបង្អង់» ព្រមទាំងគោរព និងអនុវត្តនូវរាល់កាតព្វកិច្ចទាំងឡាយនៅក្រោមច្បាប់អន្តរជាតិ ជាពិសេស ច្បាប់មនុស្សធម៌អន្តរជាតិ ដោយដោះលែងវីរកងទ័ពកម្ពុជាឱ្យបានឆាប់រហ័សបំផុត ដើម្បីអាចវិលត្រឡប់មកជួបជុំក្រុមគ្រួសារវិញប្រកបដោយសុខសុវត្ថិភាព ៕

ប្រទេសថៃ ៖ ពលរដ្ឋភាគខាងត្បូងប្រទេសថៃដែលរងគ្រោះដោយសារទឹកជំនន់វាយប្រ.ហារជាច្រើនថ្ងៃ ត្រូវបានភ្នាក់ងារសង្គ្រោះជម្លៀសចេញពីតំបន់គ្រោះថ្នា.ក់មកកាន់ជម្រកស្នាក់នៅបណ្តោះអាសន្នដែលរៀបចំដោយអាជ្ញាធរ ។ ពលរដ្ឋរងគ្រោះទាំងនេះទទួលបានការថែទាំយ៉ាងដិតដល់ ទាំងការស្នាក់នៅ ផ្តល់ថ្នាំពេទ្យ របស់របរប្រើប្រាស់ និងចំណីអាហារ ។ ប៉ុន្តែមហាជនហួសចិត្តនឹងមនុស្សខ្លះដែលស្នាក់នៅក្នុងជម្រកបណ្តោះអាសន្នមួយកន្លែងនៅខេត្តសាទូន លោ.ភលន់ប្រមូលអាហារជាច្រើនប្រអប់ដែលគេចែកឱ្យ ប៉ុន្តែមិនបរិភោគក៏បោះចោលក្នុងធុងសំរាម ទាំងដែលអាហារនៅក្នុងប្រអប់ពេញៗ ។

តាមការចុះផ្សាយរបស់សារព័ត៌មាន Khaosod កាលពីថ្ងៃទី២៨ ខែវិច្ឆិកា ឆ្នាំ២០២៥ ពលរដ្ឋភាគខាងត្បូងដែលរងគ្រោះដោយសារទឹកជំនន់ និងត្រូវបានក្រុមសង្គ្រោះជួយជម្លៀសមកស្នាក់នៅជម្រកបណ្តោះអាសន្នមួយកន្លែងនៅខេត្តសាទូន បានយកអាហារដែលខាងជម្រកផ្តល់ឱ្យជាច្រើនប្រអប់ ប៉ុន្តែបែរជាមិនបរិភោគក៏បោះចោលក្នុងធុងសំរាម ។ បើតាមវីដេអូក្នុងបណ្តាញសង្គម គឺពួកគេមិនបានបរិភោគអាហារក្នុងប្រអប់ទេ អាហារនៅពេញៗ ដែលធ្វើឱ្យមហាជនហួសចិត្តយ៉ាងខ្លាំងនិយាយថា ប្រមូលអាហារច្រើនប្រអប់លោភលន់តែឯង បើបរិភោគមិនអស់ គួរតែប្រគល់ឱ្យអ្នកចែកវិញ ដើម្បីផ្តល់ឱ្យអ្នកអត់ឃ្លាន ឬគ្មានអាហារបរិភោគ ។

ស្ថានការណ៍ទឹកជំនន់តាមបណ្តាខេត្តភាគខាងត្បូងប្រទេសថៃនៅតែគួរឱ្យបារម្ភ បើទោះជាតំបន់ខ្លះទឹកជំនន់ស្រកចុះក៏ដោយ ប៉ុន្តែតំបន់ជាច្រើននៅតែលិចលង់ ដែលធ្វើឱ្យពលរដ្ឋត្រូវជម្លៀសចេញពីលំនៅឋានមកស្នាក់នៅជម្រកបណ្តោះអាសន្នដែលរៀបចំដោយអាជ្ញាធរ ។ ជាច្រើនថ្ងៃមកនេះ រដ្ឋាភិបាលថៃ ក្រុមហ៊ុនឯកជន និងស្ថាប័នជាច្រើន បានសហការគ្នាជួយពលរដ្ឋរងគ្រោះដោយសារទឹកជំនន់ភាគខាងត្បូង ដោយបញ្ជូនទឹក អាហារ ថ្នាំពេទ្យ សំឡីអនាម័យ និងរបស់របរប្រើប្រាស់ចាំបាច់ជាច្រើន ។

កាលពីថ្ងៃទី២៨ ខែវិច្ឆិកា ហ្វេសប៊ុកផេក «Army Military Force» បានបង្ហោះវីដេអូពលរដ្ឋរងគ្រោះដោយទឹកជំនន់នៅភាគខាងត្បូងយកអាហារមកបោះចោលជាច្រើនប្រអប់ និងសរសេរថា ៖ «ខេត្តសាទូនមានរឿងអាស្រូវទៀតហើយ! ពលរដ្ឋខេត្តសាទូនដែលរងគ្រោះដោយទឹកជំនន់ និងត្រូវបានបញ្ជូនមកស្នាក់នៅជម្រកបណ្តោះអាសន្ន បានប្រមូលអាហារដែលគេចែកឱ្យជាច្រើនប្រអប់ ប៉ុន្តែបែរជាបោះចោលក្នុងធុងសំរាមទៅវិញ ។ គួរណាស់ផ្តល់អាហារទាំងនេះឱ្យអ្នកចែកវិញដើម្បីផ្តល់ទៅឱ្យអ្នកត្រូវការ ឬអ្នកមិនទាន់បរិភោគ» ។

វីដេអូនេះថតដោយអ្នកស្នាក់នៅក្នុងជម្រកបណ្តោះអាសន្ន និយាយថា ៖ «មើលចុះ បាយក្នុងប្រអប់នៅពេញទាំងអស់ ប៉ុន្តែគេយកមកបោះចោល អ្នកដទៃមិនទាន់បានបរិភោគផង ។ រីឯប្រអប់បាយមិនទាន់បើកទេ វាយ៉ាងម៉េចទៅវិញ តើមិនចូលចិត្តអាហារនេះឬយ៉ាងណា» ។

អ្នកលេងបណ្តាញសង្គមថៃឃើញវីដេអូនេះហើយហួសចិត្តខ្លាំង ដោយសារពលរដ្ឋថៃទូទាំងប្រទេសអាណិតអាសូរពលរដ្ឋភាគខាងត្បូងរងគ្រោះដោយសារទឹកជំនន់ធ្ងន់ធ្ងរ គ្មានអាហារបរិភោគ ដាច់ពោះស្លាប់លើដំបូលផ្ទះ ក៏នាំគ្នាបរិច្ចាគថវិកាដើម្បីទិញអាហារចែកឱ្យអ្នករងគ្រោះ ប៉ុន្តែបែរជាអ្នករងគ្រោះខ្ជះខ្ជាយយកអាហារមកបោះចោលបែបនេះ ។ អ្នកលេងបណ្តាញសង្គមស្នើឱ្យហ្វេសប៊ុកផេក «Army Military Force» បញ្ជាក់ឱ្យច្បាស់លាស់ តើជម្រកបណ្តោះដែលមានអ្នកបោះចោលអាហារនេះស្ថិតនៅទីតាំងណារបស់ខេត្តសាទូន ។

គួរបញ្ជាក់ថា ពេលទឹកជំនន់មិនទាន់ស្រក ពលរដ្ឋភាគខាងត្បូងបានបាញ់កាំភ្លើងជាច្រើនគ្រាប់គំរាមភ្នាក់ងារសង្គ្រោះក្នុងអំឡុងពេលយកអាហារទៅចែកឱ្យ រហូតដល់ភ្នាក់ងារសង្គ្រោះភ័យរត់ត្រឡប់ទៅវិញ ហើយការបាញ់គំរាមនេះ មិនមែនមានតែមួយករណីទេ ។ ពេលទឹកជំនន់ស្រក ក៏កើតស្ថានការណ៍អសន្តិសុខ ដូចជា ៖ មានក្រុមឆ្លៀតឱកាសចូលលួចរបស់របរក្នុងហាងលក់ទំនិញ និងលួចស្រាបៀរក្នុងទូរកុងតឺន័រតាមផ្លូវរថភ្លើងនៅស្រុកហាតយៃ យ៉ាងអាណាធិបតេយ្យដោយគ្មានខ្លាចសមត្ថកិច្ច ៕