យន្តហោះចម្បាំងប្រភេទ Su-22 នៃកងពលលេខ ៩២១ របស់កងទ័ពអាកាសបានជួបឧបទ្ទវហេតុពេលចុះចតនៅអាកាសយានដ្ឋាន Yen Bai ភាគខាងជើងប្រទេសវៀតណាម ដែលបណ្តាលឱ្យអ្នកបើកយន្តហោះបានបង់ជីវិត។

នៅម៉ោង១២និង០៩ នាទីថ្ងៃត្រង់ ថ្ងៃទី៣១ ខែមករា លោក Tran Ngoc Duy បានបើកយន្តហោះ ដែលជាវគ្គហ្វឹកហ្វឺន ហើយនៅម៉ោង១២និង២៧នាទីថ្ងៃត្រង់ ពេលចុះចតយន្តហោះបានជួបបញ្ហាតែម្តង។

អំឡុងពេលជួបបញ្ហា អ្នកបើកយន្តហោះត្រូវបានអគ្គបញ្ជាការ បញ្ជាឱ្យបើកឆ័ត្រយោងចេញពីយន្តហោះ ក៏ប៉ុន្តែ អ្នកបើកយន្តហោះ បានព្យាយាមជួសជុលវាជំនួសវិញ ហើយក៏បានជួបរឿងអកុសលបែបនេះ។

គួរបញ្ជាក់ផងដែរថាយន្តហោះចម្បាំង Su-22 ដែលបានធ្លាក់នេះ ត្រូវបានផលិតដោយសហភាពសូវៀត បានដំណើរការ តាំងពីទសវត្សរ៍ឆ្នាំ ១៩៧០ មកម្ល៉េះ៕

ប្រភព៖ VN Express

ប្រទេសជប៉ុន ៖ លោក Jens Stoltenberg អគ្គលេខាធិការនៃអង្គការសន្ធិសញ្ញាអាត្លង់ទិកខាងជើង (NATO) បានថ្លែងក្នុងអំឡុងពេលលោកធ្វើដំណើរមកកាន់ប្រទេសជប៉ុន និងចូលជួបនាយករដ្ឋមន្ត្រីជប៉ុន លោក ហ្វូមីអូ គីស៊ីដា ថា NATO នៅតែជាសម្ព័ន្ធមិត្តដ៏រឹងមាំជាមួយប្រទេសជប៉ុនបន្តទៀត ។
លោក Jens Stoltenberg បានធ្វើដំណើរទៅកាន់មូលដ្ឋានទ័ពអាកាស Iruma ក្នុងខេត្ត Saitama ដើម្បីជួបជាមួយកងកម្លាំងស្វ័យការពារអាកាស និងទស្សនាយន្តហោះចម្បាំង និងអាវុធយុទ្ធភណ្ឌផ្សេងៗរបស់ប្រទេសជប៉ុនផងដែរ ។

លោក Jens Stoltenberg ថ្លែងថា សង្គ្រាមនៅអ៊ុយក្រែន គឺជារឿងសំខាន់សម្រាប់ប្រទេសទាំងអស់ ដូច្នេះ NATO ស្នើសុំឱ្យមានការគាំទ្រពីជប៉ុន ។ លោកបានសរសើរជប៉ុនថា ជាមិត្តភក្តិចាស់ និងជាដៃគូដ៏មានប្រសិទ្ធភាពរបស់ NATO ។ ហេតុនេះ ការធ្វើដំណើរមកកាន់ប្រទេសជប៉ុនរបស់លោក គឺដើម្បីជំរុញសម្ព័ន្ធភាពដ៏រឹងមាំនេះបន្តទៀតរវាងប្រទេសជប៉ុន និង NATO ។

លោកអគ្គលេខាធិការរូបនេះបានធ្វើដំណើរមកកាន់អាស៊ីខាងជើង ដើម្បីជំរុញសម្ព័ន្ធភាពជាមួយប្រទេសសម្ព័ន្ធមិត្តរបស់សហរដ្ឋអាមេរិក ដែលប្រឈមមុខនឹងសង្គ្រាមនៅអ៊ុយក្រែន ។ ប្រទេសជប៉ុនបានថ្កោលទោសការឈ្លានពានរបស់រុស្ស៊ីមកលើអ៊ុយក្រែន ជាមួយគ្នានេះ ជប៉ុនក៏បានផ្តល់ជំនួយយោធា ជំនួយមនុស្សធម៌ និងហិរញ្ញវត្ថុដល់អ៊ុយក្រែនផងដែរ តាំងពីរុស្ស៊ីឈ្លានពានអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ ។ វាជាប្រតិបត្តិការពិសេសមួយដើម្បីលុបបំបាត់ការគំរាមកំហែងដល់សន្តិសុខដែលបង្កឡើងដោយរុស្ស៊ី ៕

ប្រភព ៖ TNN World

រដ្ឋធានីវ៉ាស៊ីនតោន៖ ដោយសារតែការខឹងសម្បានឹងរដ្ឋាភិបាលក្រុងស្ដុកខម (Stockholm) មិនព្រមធ្វើបត្យាប័ន បញ្ជូនអ្នកដែលរងការចោទប្រកាន់ ពីក្រុងអង់ការ៉ា មកកាន់ប្រទេសតួកគី ទើបធ្វើឲ្យសមាជិកព្រឹទ្ធសភាសហរដ្ឋអាមេរិក ស្ដីបន្ទោសដល់មេដឹកនាំប្រធានាធិបតី អេដូហ្គេន ហើយបានអំពាវនាវឲ្យមានការដាក់ទណ្ឌកម្មជាថ្មី និង ហាមឃាត់ការលក់យន្ដហោះចម្បាំង ប្រភេទ F-16 ទៅដល់ប្រទេសមួយនេះ ប្រសិនបើនៅតែរារាំងដល់ស៊ុយអែត និង ហ្វាំងឡង់ដ៍។

សារព័ត៌មាន Alarabiya News បានចេញផ្សាយ កាលពីព្រឹក ថ្ងៃពុធ ទី១ ខែកុម្ភៈ ថា លោក គ្រីស វ៉ាន់ ហូលឡែន (Chris Van Hollen) សមាជិកព្រឹទ្ធសភាសហរដ្ឋអាមេរិក កាលពីថ្ងៃអង្គារ បានស្ដីបន្ទោស ដល់លោក រេសេប តាយយីប អេដូហ្គេន (Recep Tayyip Erdogan) ប្រធានាធិបតីតួកគី ដោយសារតែរដ្ឋាភិបាលអង់ការ៉ារបស់គាត់ បានរារាំងដល់សមាជិកភាពរបស់អង្គការណាតូ សម្រាប់ប្រទេសស៊ុយអែត និង ហ្វាំងឡង់ដ៍ ហើយថែមទាំងបានអំពាវនាវឲ្យមានដាក់ទណ្ឌកម្មជាថ្មីបន្ថែមទៀត។

សមាជិកព្រឹទ្ធសភា មកពីគណបក្សប្រជាធិបតេយ្យ រូបនេះ ក៏បានរិះគន់ ដល់ប្រទេសតួកគី សម្រាប់តួនាទីអវិជ្ជមានរបស់ក្រុងអង់ការ៉ា នៅក្នុងការប្រយុទ្ធប្រឆាំងនឹងក្រុមរដ្ឋអ៊ិស្លាម (ISIS) ជាពិសេស នៅក្នុងប្រទេសស៊ីរី។

លោក Van Hollen បានបញ្ជាក់ ថា «ខ្ញុំជឿ ថា លោក Erdogan បានធ្វើឱ្យប្រទេសតួកគី ធ្លាក់ចុះយ៉ាងខ្លាំង ហើយយើងក៏កំពុងធ្វើជាសាក្សី អំពីរឿងនេះ ខណៈយើងកំពុងតែសម្លឹងមើលទៅលើការបោះឆ្នោត តាមអ្វីដែលគាត់បានអំពាវនាវឱ្យធ្វើឡើង នៅពាក់កណ្តាលខែឧសភា»។

ជាមួយគ្នានេះ លោក Van Hollen បានលើកឡើង អំពីការចោទប្រកាន់ ប្រឆាំងនឹងអភិបាលក្រុងអ៊ីស្ដង់ប៊ូល (Istanbul) និង ការបង្រ្កាបរបស់ប្រធានាធិបតីតួកគី លោក Erdogan ទៅលើគណបក្សប្រឆាំង។ ដូច្នេះ គាត់ច្បាស់ណាស់ ថា ប្រធានាធិបតីតួកគី មិនលេងតាមផ្លូវច្បាប់បោះឆ្នោត ដោយសេរី និង យុត្តិធម៌នោះឡើយ។

លោក រេសេប តាយយីប អេដូហ្គេន (Recep Tayyip Erdogan) ប្រធានាធិបតីតួកគី កាលពីសប្ដាហ៍មុន បានបញ្ជាក់ ថា ការបោះឆ្នោតសភា និង ប្រធានាធិបតី នៅក្នុងប្រទេសរបស់គាត់ អាចនឹងធ្វើឡើង នៅក្នុងខែឧសភា។

លោក អេក្រែម អ៊ីម៉ាម៉ូហ្លូ (Ekrem Imamoglu) អភិបាលក្រុងអ៊ីស្ដង់ប៊ូល កាលពីឆ្នាំមុន ត្រូវបានហាមឃាត់មិនឱ្យធ្វើនយោបាយ ដោយសារតែការរិះគន់ ទៅលើក្រុមប្រឹក្សាបោះឆ្នោតកំពូលរបស់ប្រទេសតួកគី ក្រោយពេលគាត់បានអំពាវនាវឱ្យមានការបោះឆ្នោតមួយផ្សេងទៀត បន្ទាប់ពីទទួលបានជ័យជម្នះភ្លូកទឹកភ្លូកដី លើគណបក្សរបស់លោក Erdogan ។ ប៉ុន្តែអ្វីដែលកំពុងតែធ្វើឲ្យក្រុមមន្ត្រីសហរដ្ឋអាមេរិក និង សមាជិកសភា ផ្ទុះកំហឹងនោះ គឺតួកគី នៅតែបន្ដរារាំងដល់ស៊ុយអែត និង ហ្វាំងឡង់ដ៍ ចូលរួមជាមួយនឹងសម្ពន្ធមិត្តរបស់អង្គការណាតូ។

ចាប់តាំងពីការឈ្លានពានរបស់រុស្ស៊ី ទៅលើប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២នោះមក ប្រទេសលោកខាងលិច បានបញ្ចុះបញ្ចូលប្រទេសអឺរ៉ុបខាងជើងទាំងពីរនេះ ឱ្យដាក់ពាក្យសុំចូលជាសមាជិករបស់អង្គការណាតូ។ ប៉ុន្តែតួកគី នៅតែទាមទារនូវការផ្ដល់សម្បទាន ពីហ្វាំងឡង់ដ៍ និង ស៊ុយអែត រួមទាំងការប្រគល់មនុស្ស ដែលក្រុងអង់ការ៉ា អះអាង ថា ជាក្រុមភេរវករនោះ បញ្ជូនមកកាន់ប្រទេសតួកគី។

ប្រទេសតួកគីបានគំរាមកំហែង ថា ការឈ្លានពានចូលទៅលើទឹកដី នាភាគខាងជើង ប្រទេសស៊ីរី គឺជាការប្រឆាំងនឹងក្រុមយុទ្ធជនឃឺដ ដែលបានបង្ហាញ ថា ជាដៃគូដ៏សំខាន់ សម្រាប់សហរដ្ឋអាមេរិក នៅក្នុងការប្រយុទ្ធប្រឆាំងនឹងក្រុម ISIS ។ ប៉ុន្ដែការការគំរាមកំហែងរបស់តួកគី ត្រូវបានផ្អាកទៅ សម្រាប់ពេលនេះ ក្រោយមានការព្រមានម្តងហើយម្តងទៀត ពីរដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន និង មន្ទីរបញ្ចកោណ ប្រឆាំងនឹងការឆ្ពោះទៅមុខ ជាមួយនឹងប្រតិបត្តិការរបស់ក្រុងអង់ការ៉ា នៅតំបន់ភាគខាងជើង ប្រទេសស៊ីរី។

លោក គ្រីស វ៉ាន់ ហូលឡែន (Chris Van Hollen) ជាសមាជិកគណៈកម្មាធិការទំនាក់ទំនងកិច្ចការបរទេសរបស់ព្រឹទ្ធសភាសហរដ្ឋអាមេរិក មួយផងដែរនោះ បានសង្កត់ធ្ងន់ ថា «វាមានតម្រូវការចាំបាច់ ត្រូវសម្របសម្រួលជាមួយនឹងសហភាពអឺរ៉ុប ដើម្បីពិចារណា អំពីប្រភេទផ្សេងៗគ្នា នាពេលខាងមុខ ជាមួយនឹងលោក Erdogan ។ ប៉ុន្ដែប្រសិនបើប្រធានាធិបតីតួកគី នៅតែបន្ដរារាំង ដល់ប្រទេសស៊ុយអែត និង ហ្វាំងឡង់ដ៍ ចូលរួមជាមួយអង្គការណាតូ នោះ យើងចាំបាច់ត្រូវសម្លឹងមើល ទៅលើទណ្ឌកម្មជាច្រើនទៀត។ អ្នកបានដឹងច្បាស់ ថា សេដ្ឋកិច្ចរបស់តួកគី មិនស្ថិតនៅលើទម្រង់ដ៏អស្ចារ្យនោះឡើយ»។

សមាជិកព្រឹទ្ធសភារូបនេះ ក៏បានចង្អុលបង្ហាញ អំពីសំណើរបស់តួកគី នៅក្នុងការទទួលបានយន្តហោះចម្បាំង F-16 របស់អាមេរិក ផងដែរ។ កាលពីពេលមុន តួកគី ត្រូវបានលុបចេញពីកម្មវិធីយន្តហោះចម្បាំង F-35 របស់សហរដ្ឋអាមេរិក ដោយសារតែក្រុងអង់ការ៉ា បានទិញប្រព័ន្ធការពារដែនអាកាសពីរុស្ស៊ី ខណៈសម្ពន្ធមិត្តណាតូ បានបញ្ជាក់ ថា វានឹងគំរាមកំហែងដល់សន្តិសុខរបស់ពួកគេ។ ឥឡូវរដ្ឋបាលរបស់លោក បៃដិន បានគាំទ្រដល់ការលក់យន្ដហោះចម្បាំង F-16 មានតម្លៃ ប្រហែល២០ពាន់លានដុល្លារ។ សភាទាំង២ អាចនឹងជំទាស់ ប្រសិនបើតួកគី នៅតែបន្ដរារាំង ដល់ប្រទេសអឺរ៉ុបខាងជើងទាំង២នេះ៕

ប្រទេសអ៊ុយក្រែន ៖ ប្រទេសអ៊ុយក្រែនប្រកាសថា នឹងធ្វើពហិការកីឡាអូឡាំពិកឆ្នាំ២០២៤ នៅទីក្រុងប៉ារីស ប្រទេសបារាំង បើកីឡាកររុស្ស៊ីចូលរួមប្រកួតដែរ ។ អ៊ុយក្រែននិយាយថា បើរុស្ស៊ីចូលរួម គឺស្មើនឹងការយល់ព្រមទទួលការកាប់សម្លាប់ក្នុងសង្គ្រាម ។

បន្ទាប់ពីគណៈកម្មាធិការអូឡាំពិកអន្តរជាតិ International Olympic Committee (IOC) បង្ហាញថា កំពុងពិចារណាយល់ព្រមឱ្យកីឡាកររុស្ស៊ីចូលរួមប្រកួតកីឡាអូឡាំពិកឆ្នាំ២០២៤ នៅក្រុងប៉ារីស ធ្វើឱ្យប្រធានាធិបតីអ៊ុយក្រែន លោក Volodymy Zelensky ចេញមកជំទាស់ថា បើឱ្យប្រទេសរុស្ស៊ីចូលរួម គឺស្មើការព្រមទទួលការបង្កគ្រោះថ្នាក់ និងយល់ព្រមឱ្យរុស្ស៊ីប្រើជាឧបករណ៍ផ្សព្វផ្សាយ ។ លោកប្រធានាធិបតីអ៊ុយក្រែនថា នឹងយករឿងនេះទៅពិភាក្សាជាមួយប្រធានាធិបតីបារាំង លោក Emmanuel Macron ប៉ុន្តែបើរុស្ស៊ីចូលរួមប្រកួតមែននោះ អ៊ុយក្រែននឹងធ្វើពហិការមិនចូលរួមកីឡាអូឡាំពិកនេះទេ បើទោះជា IOC កំណត់ឱ្យកីឡាកររុស្ស៊ីប្រកួតក្នុងឋានៈកណ្តាលក្តី ព្រោះកីឡាករអ៊ុយក្រែនកំពុងពលីជីវិតក្នុងវិបត្តិ ។

មុននេះ មេដឹកនាំអ៊ុយក្រែនបង្ហើបថា លោកបានអញ្ជើញលោក ថូម៉ាស បាច (Thomas Bach) ប្រធានគណៈកម្មាធិការអូឡាំពិកអន្តរជាតិ ធ្វើដំណើរមកកាន់ប្រទេសអ៊ុយក្រែនផងដែរ ដើម្បីមើលឃើញទិដ្ឋភាពដ៏សាហាវឃោឃៅនៃសង្គ្រាមដោយខ្លួនឯង ។

លោក Michaelo Podolac ទីប្រឹក្សាមេដឹកនាំអ៊ុយក្រែន បានផ្ញើសារតាមប្រព័ន្ធអនឡាញស្តីបន្ទោសគណៈកម្មាធិការអូឡាំពិកអន្តរជាតិថា ជាអ្នកផ្សព្វផ្សាយសង្គ្រាម ឧក្រិដ្ឋកម្ម និងបំផ្លិចបំផ្លាញ ព្រោះគណៈកម្មាធិការអូឡាំពិកអន្តរជាតិដឹងហើយថា រុស្ស៊ីបានបំផ្លាញអ៊ុយក្រែន ប៉ុន្តែនៅតែស្នើឱ្យរុស្ស៊ីប្រើបណ្តាញផ្សព្វផ្សាយពីការប្រល័យពូជសាសន៍ និងកាប់សម្លាប់ ហើយលោកក៏បានចោទប្រកាន់ដែរថា ថវិការបស់រុស្ស៊ីអាចទិញអូឡាំពិកក្លែងក្លាយ ។

ចំណែកគណៈកម្មាធិការអូឡាំពិកអន្តរជាតិលើកហេតុផលថា កីឡាករគ្រប់រូបមិនគួរដកចេញពីការប្រកួតដោយសារតែសញ្ជាតិរបស់ពួកគេទេ ខណៈក្រុមប្រឹក្សាអូឡាំពិកអាស៊ីទើបស្នើឱ្យរុស្ស៊ីចូលរួមប្រកួតកីឡាអាស៊ីនៅឆ្នាំ២០២៣នេះ ដែលនឹងរៀបចំឡើងនៅក្រុងហាំងចូវ ប្រទេសចិន នៅខែកញ្ញាខាងមុខ ៕

ប្រភព ៖ TNN World

យោងតាមរដ្ឋបាលក្រុងបាងកក  បានឱ្យដឹងថា គុណភាពខ្យល់នៅទីក្រុងបាងកកបានឡើងដល់កម្រិតមិនល្អ និងអាចប៉ះពាល់ដល់សុខភាពផ្លូវដង្ហើម ចំពោះអ្នករស់នៅក្នុងរដ្ឋធានីនេះ និងខេត្តក្បែរៗនោះ។

គុណភាពនៃខ្យល់នៅក្នុងតំបន់ ចំនួន៣៦ជុំវិញទីក្រុងបាងកក បានធ្លាក់ចុះដល់កម្រិតគ្មានសុវត្ថិភាពនៅព្រឹកថ្ងៃអង្គារ ទី៣១ ខែមករា ហើយរបាយការណ៍នេះបង្ហាញដោយរដ្ឋបាលក្រុងបាងកក។ ខ្យល់ពុល PM2.5 (ភាគល្អិតតិចជាង 2.5 មីក្រូម៉ែត្រក្នុងអង្កត់ផ្ចិត) ស្ថិតនៅក្នុងចន្លោះពី ៤០ទៅ៦៩ មីក្រូក្រាមក្នុងមួយម៉ែត្រគូប នៅក្នុងតំបន់ភាគច្រើន។ស្តង់ដាររបស់ប្រទេសថៃសម្រាប់កម្រិតសុវត្ថិភាពនៃ PM2.5 គឺ ៥០មីក្រូក្រាមក្នុងមួយម៉ែត្រគូប ឬទាបជាងនេះ ខណៈពេលដែលអង្គការសុខភាពពិភពលោកដាក់វា នៅកម្រិត ១២មីក្រូក្រាមក្នុងមួយម៉ែត្រគូប ឬ ទាបជាងនេះ។

អជ្ញាឌរថៃបានអំពាវនាវដល់ពលរដ្ឋដែលរស់នៅក្នុងរាជធានី សូមបង្កើនការប្រុងប្រយ័ត្នខ្ពស់ និងសូមកុំចេញក្រៅ ប្រសិនបើមិនមានការចាំបាច់ខ្លាំង។

គួរបញ្ជាក់ផងដែរថា ខ្យល់ពុល PM2.5 នៅក្នុងទីក្រុងបាងកក ប្រទេសថៃ បានឈានដល់កម្រិតគ្រោះថ្នាក់ រហូតដល់ថ្ងៃទី ៤ ខែកុម្ភៈ ឆ្នាំ ២០២៣៕

ប្រភព៖ CNA

រដ្ឋធានីវ៉ាស៊ីនតោន៖ បណ្ដាប្រទេសបស្ចិមលោក បានចោទប្រកាន់ ដល់រដ្ឋាភិបាលក្រុងតេអ៊ីរ៉ង់ ជាអ្នកផ្គត់ផ្គង់ដ្រូន ទៅឲ្យក្រុងមូស្គូ សម្រាប់យកញទៅធ្វើសង្គ្រាម វាយប្រហារប្រឆាំងនឹងហេដ្ឋារចនាសម្ព័ន្ធស៊ីវិលសំខាន់ៗ នៅលើទឹកដីរបស់អ៊ុយក្រែន ហើយឥឡូវនេះ សហរដ្ឋអាមេរិក បានដាក់អង្គភាពចំនួន៧របស់អ៊ីរ៉ង់ បញ្ចូលទៅក្នុងបញ្ជីខ្មៅពាណិជ្ជកម្មរបស់ខ្លួន សម្រាប់សកម្មភាពជួយដល់រុស្ស៊ី។

សារព័ត៌មានអារ៉ាប់អន្ដរជាតិ Alarabiya News បានចេញផ្សាយ កាលពីរាត្រី ថ្ងៃអង្គារ ទី៣១ ខែមករា ថា បើតាមការចេញផ្សាយរបស់ក្រសួងពាណិជ្ជកម្មសហរដ្ឋអាមេរិក បានឲ្យដឹង ថា ក្រុងវ៉ាស៊ីនតោន កាលពីថ្ងៃអង្គារ បានបន្ថែមអង្គភាពចំនួន៧របស់អ៊ីរ៉ង់ ចូលទៅក្នុងបញ្ជីខ្មៅពាណិជ្ជកម្មរបស់ខ្លួន សម្រាប់ការផលិតដ្រូន នាំទៅជួយដល់រុស្ស៊ី សម្រាប់យកទៅប្រើប្រាស់ វាយប្រហារ ប្រឆាំងនឹងប្រទេសអ៊ុយក្រែន។

ការលុកលុយរបស់រុស្ស៊ី ទៅលើប្រទេសអ៊ុយក្រែន អស់រយៈពេលជិត១ឆ្នាំកន្លងមកនេះ ធ្វើឲ្យសម្ពន្ធមិត្ដលោកខាងលិច ព្យាយាមប្រមូលផ្តុំ និង ដាក់ពង្រាយនូវប្រព័ន្ធការពារដែនអាកាស សម្រាប់ស្ទាក់កម្ចាត់មីស៊ីល និង ដ្រូនអត្ដឃាតដែលផលិតដោយអ៊ីរ៉ង់ ត្រូវបានរុស្ស៊ី យកមកប្រើប្រាស់ សម្រាប់វាយប្រហារ ទៅលើគោលដៅហេដ្ឋារចនាសម្ព័ន្ធថាមពលនានា នៅក្នុងរដូវរងានេះ។

កាណាដា កាលពីដើមខែមករា បានប្រកាស ថា ក្រុងអូតតាវ៉ា (Ottawa) នឹងទិញប្រព័ន្ធការពារដែនអាកាសណាសាមស៍ (NASAMS) ដ៏ទំនើប ផលិតដោយសហរដ្ឋអាមេរិក សម្រាប់ជួយដល់ប្រទេសអ៊ុយក្រែន។ NASAMS នេះ ជាប្រព័ន្ធការពារមីស៊ីល បាញ់ពីលើដីទៅលើអាកាស រយៈចម្ងាយមធ្យម អាចការពារ ប្រឆាំងនឹងដ្រូន មីស៊ីល និង យន្ដហោះចម្បាំង យ៉ាងមានប្រសិទ្ធភាព។ ចំណែកសហរដ្ឋអាមេរិក ក៏បានផ្ដល់ប្រព័ន្ធការពារដែនអាកាស NASAMS ចំនួន២គ្រឿង ជួយទៅដល់ប្រទេសអ៊ុយក្រែន ជាមួយនឹងមធ្យោបាយជាច្រើនទៀត។

ដោយឡែក ប្រព័ន្ធការពារដែនអាកាស មានមូលដ្ឋាន បាញ់ទីលើដីទៅលើអាកាសផ្សេងទៀត ដូចជា Patriot (ប៉ាទ្រីយ៉ូត) របស់ក្រុមហ៊ុន Raytheon Technology Corp ត្រូវបានចក្រភពអង់គ្លេស សហរដ្ឋអាមេរិក និង ហូល្លង់ដ៍ សន្យាផ្ដល់ឲ្យអ៊ុយក្រែន ខណៈប្រទេសជាសម្ពន្ធមិត្តផ្សេងៗទៀត សង្ឃឹម ថា វានឹងអាចទប់ស្កាត់នូវការរារាំងដល់ការវាយប្រហារបន្ថែមទៀត ប្រឆាំងនឹងហេដ្ឋារចនាសម្ព័ន្ធថាមពលរបស់ប្រទេសអឺរ៉ុបខាងកើតមួយនេះ។

អង្គភាពរបស់អ៊ីរ៉ង់ ត្រូវបានដាក់បញ្ចូលទៅក្នុងបញ្ជីខ្មៅនោះ រួមមាន អង្គភាពរចនានិងផលិតម៉ាស៊ីនយន្ដហោះ, អង្គភាពទ័ពអាកាសឆ្មាំបដិវត្ដន៍អ៊ិស្លាមអ៊ីរ៉ង់, អង្គភាពស្រាវជ្រាវរបស់ឆ្មាំបដិវត្តន៍អ៊ិស្លាម និង អង្គការជីហាត, ក្រុមហ៊ុនអូជេ ប៉ាវ៉ាស ម៉ាដូ ណាហ្វា (Oje Parvaz Mado Nafar), ក្រុមហ៊ុនប៉ារ៉ាវ៉ា ប៉ាស (Paravar Pars), ក្រុមហ៊ុនឧស្សាហកម្មអាកាសចរណ៍ខ្យូត (Qods) និង ក្រុមហ៊ុនឧស្សាហកម្មអាកាសចរណ៍ Shahed (សាហេដ)។

ការចេញផ្សាយរបស់ក្រសួងពាណិជ្ជកម្មសហរដ្ឋអាមេរិក បានបញ្ជាក់ ថា ដ្រូនរបស់អ៊ីរ៉ង់ កំពុងតែផ្ទេរទៅកាន់ប្រទេសរុស្ស៊ី ដើម្បីប្រើប្រាស់ នៅក្នុងសង្គ្រាម នៅអ៊ុយក្រែន។ សកម្មភាពបែបនេះ គឺផ្ទុយគ្នាស្រឡះ ទៅនឹងគោលការណ៍សន្ដិសុខជាតិ និង ផលប្រយោជន៍គោលនយោបាយការបរទេសរបស់សហរដ្ឋអាមេរិក។

ដោយឡែក អ៊ីស្រាអែល វិញ កំពុងតែព្យាយាម ទប់ស្កាត់ ឬ រារាំងដល់អ៊ីរ៉ង់ នៅក្នុងការបញ្ជូនដ្រូនអត្ដឃាត ទៅកាន់ប្រទេសរុស្ស៊ី ក៏ដូចជា ទប់ទល់ប្រឆាំងនឹងកម្មវិធីនុយក្លេអ៊ែររបស់ក្រុងតេអ៊ីរ៉ង់ ផងដែរ។ អ៊ីស្រាអែល តែងតែចាត់ទុកកម្មវិធីផលិតនុយក្លេអ៊ែររបស់ប្រទេសមជ្ឈិមបូព៌ាមួយនេះ ជាការគំរាមកំហែងយ៉ាងខ្លាំង ដល់សន្ដិសុខរបស់ខ្លួន ហើយក្រុងជេរូសាឡឹម (Jerusalem) នឹងកំណត់គោលដៅ វាយប្រហារទៅលើរោងចក្រទាំងនោះ៕

ក្នុងមួយឆ្នាំៗ សំរាមផ្លាស្ទិកក្នុងសមុទ្រជាច្រើនលានដុំបានអណ្តែតគ្មានគោលដៅ ដោយសារការប្រើប្រាស់ផ្លាស្ទិកគ្មានការទទួលខុសត្រូវរបស់មនុស្ស ។ ផ្លាស្ទិកភាគច្រើនមកពីដីគោក ហើយការដោះស្រាយរឿងនេះ គឺកាត់បន្ថយការប្រើប្រាស់ផ្លាស្ទិកឱ្យបានច្រើនបំផុត ។

ហាងអាហារ Fast food ជាទីកន្លែងផលិតសំរាមផ្លាស្ទិកចំនួនច្រើនក្នុងមួយថ្ងៃៗ ដោយសារវាស្រួលប្រើប្រាស់ ហើយបំពេញតម្រូវការបរិភោគរហ័ស ប៉ុន្តែលទ្ធផល គឺមានសំរាមផ្លាស្ទិកដ៏ច្រើនសន្ធឹកសន្ធាប់ ។ ហាងធំៗបានចាប់ផ្តើមកែតម្រូវ ដូចជា Starbucks, Tim Hortons និង Tesco Lotus បានប្រកាសហាមឃាត់ប្រើផ្លាស្ទិក ហើយក្លាយជាច្បាប់សម្រាប់ប្រទេសជាច្រើនចាប់ផ្តើមអនុវត្តក្នុងឆ្នាំ២០២៣ នេះ ។

McDonald’s ក៏បានសហការកាត់បន្ថយសំរាមផ្លាស្ទិកដែរ ដោយប្រកាសសាកល្បងការប្រើគំរបជ័របែបទាញចេញ ហើយផឹកតែម្តង ដោយមិនត្រូវការប្រើទុយោបឺតភេសជ្ជៈបន្តទៀតទេនៅតាមហាងនៅអាមេរិក ។ តាមទិន្នន័យពី CNN Business ឱ្យដឹងថា នយោបាយនេះស្រដៀងគ្នានឹងគំរបជ័រដែល Starbucks ប្រើកាលពីឆ្នាំ២០២០ ព្រោះគេវាយតម្លៃថា ការប្រើគំរបជ័របែបទាញចេញនេះធ្វើឱ្យអ្នកបរិភោគ ឬអតិថិជនប្រើប្រាស់ទុយោកាន់តែតិចក្នុងមួយឆ្នាំៗ ។

បច្ចុប្បន្ន ពិភពលោកកំពុងព្យាយាមធ្វើឱ្យការរស់នៅកាន់តែល្អប្រសើរ ដោយប្រទេសជាច្រើនបានកាត់បន្ថយការប្រើផ្លាស្ទិកតែម្តងបោះចោល ខណៈវាពិបាករលាយក្នុងដី ។ ការបំពុលដោយកាកសំណល់ប្លាស្ទិកចាប់ផ្តើមកើនឡើងខ្លាំង ក្នុងប៉ុន្មានឆ្នាំមកនេះ មានច្បាប់ហាមឃាត់ការប្រើផ្លាស្ទិកតែម្តងបោះចោលតាមហាងអាហារនានា ដូចជា នៅឆ្នាំ២០២០ ប្រទេសអង់គ្លេសបានកាត់បន្ថយការប្រើទុយោផ្លាស្ទិក ហើយកាលពីដើមឆ្នាំ២០២៣ បារាំងក៏បានប្រកាសហាមប្រើផ្លាស្ទិកតែម្តងបោះចោលក្នុងហាងអាហារផងដែរ ។ លើសពីនេះ ប្រទេសជាច្រើនក៏រកវិធីកាត់បន្ថយការប្រើផ្លាស្ទិកដូចគ្នា ដូចជា ហាង Tim Hortons ក៏ចាប់ផ្តើមសាកល្បងប្រើគំរប ស្លាបព្រា និងសមធ្វើពីឈើ ដើម្បីងាយស្រួលរលាយ ។

Restaurant Business Online បង្ហាញថា គំរបថ្មីនេះជាវិធីចម្បងដើម្បីកាត់បន្ថយសំរាមផ្លាស្ទិករបស់ McDonald’s ។ McDonald’s ថា គំរបទាំងនេះនឹងជួយបំពេញប្រសិទ្ធភាពការវេចខ្ចប់ កាត់បន្ថយការប្រើផ្លាស្ទិកទំហំតូច ហើយនេះគ្រាន់តែជាឧទាហរណ៍មួយក្នុងដំណោះស្រាយជាច្រើន ។ វាជាផ្នែកមួយនៃការប្តេជ្ញាចិត្តដើម្បីកាត់បន្ថយសំរាមក្នុងភោជនីយដ្ឋាន ។

មុននេះ McDonald’s បានសាកល្បងហាមប្រើទុយោបឺតនៅប្រទេសចិនចំនួន១.០០០កន្លែង ហើយក្រុមហ៊ុនថា វាអាចកាត់បន្ថយកាកសំណល់ផ្លាស្ទិកដល់៤០០តោន ។ ទោះយ៉ាងណា នៅមិនទាន់ច្បាស់ទេថា McDonald’s តាំងចិត្តកម្ចាត់ទុយោផ្លាស្ទិកឬអត់ បើទោះជាមានគំរបមិនត្រូវការទុយោក្តី ប៉ុន្តែពួកគេនៅតែផ្តល់ទុយោបឺតឱ្យអតិថិជនដដែល ៕

ប្រភព ៖ springnews