កាល​ណាគេ​និយាយ​ពី​ខេត្តសៀមរាប គេ​តែងតែង​នឹក​ឃើញ​ដល់​ប្រាសាទក្នុងតំបន់​អង្គរ ជាពិសេសប្រាសាទ​អង្គរវត្ត។ ប៉ុន្តែមានតែមនុស្សមួយចំនួនតូចប៉ុណ្ណោះដែលដឹងពីវិសាលភាពធំទូលាយនៃខេត្តសៀមរាបថា ជាខេត្តមួយដែលសម្បូរទៅដោយតំបន់ទេសចរណ៍ជាច្រើន ទោះបីជាដើរមួយខែក៏មិនអស់ឡើយ។

ស្របពេលដែលថ្ងៃចូលឆ្នាំប្រពៃណីខ្មែរ ជិតមកដល់នោះ ភ្ញៀវទេសចរណ៍ដែលមានគម្រោងទៅសៀមរាប ក៏ប៉ុន្តែមិនដឹងថាទៅណាទៀតក្រៅពីទៅទស្សនាប្រាសាទអង្គរវត្តនោះ ថ្ងៃនេះគេហទំព័រ KBN សូមណែនាំកន្លែងដើរលេងមួយចំនួន ដែលលោកអ្នកមិនគួរមើលរំលងក្រៅពីប្រាសាទ។

+រមណីយដ្ឋានទឹកធ្លាក់ក្បាលស្ពាន
ក្បាលស្ពាន មានចម្ងាយ ៥០គីឡូម៉ែត្រ ពីសៀមរាប ដោយទិសដៅដូចគ្នានឹងទៅភ្នំគូលែនដែរ និងចម្ងាយ​ ១៨គម ពីបន្ទាយស្រី។ រមណីយដ្ឋានក្បាលស្ពានគឺជាន្លែងដែលគេស្គាល់ថាជា ជ្រលងនៃលិង្គ១០០០, ដែលមានចម្លាក់ធ្វើអំពីថ្មនៅក្នុង​ និងជុំវិញក្បាលស្ពាន ។

+កាហ្វេវប្បធម៌-សៀមរាប
ផ្ទះ​កាហ្វេ​វប្បធម៌​សៀមរាប​កសាង​ឡើង​ដើម្បី​ឲ្យ​ប្រជាជន​ខ្មែរ​ និង​ជនជាតិ​បរទេស​ បាន​ឃើញ​ពី​ការ​ថែ​រក្សា​ និង​ការពារ​មរតក​វប្បធម៌​ខ្មែរ​ដែល​មាន​តាំង​ពី​សម័យ​ដើម​រហូត​មក​ដល់​បច្ចុប្បន្ន​។ ភ្ញៀវ​ដែល​បាន​ទៅ​អាច​ភ្លក្ស​រសជាតិ​កាហ្វេ​ និង​តុប​តែង​ខ្លួន​ស្លៀក​សម្លៀក​បំពាក់​សម័យ​លង្វែក​ និង​ថត​រូប​ទុក​ជា​អនុស្សាវរីយ៍​​បាន​។​ តម្លៃ​ចាប់​ពី​ ២.៥ ដុល្លា​ឡើង​។​

+កន្លែងជិះស្គីលើផ្ទៃទឹក ICF Wake Park 
ICF Water Park ជា​ឧទ្យាន​ជិះ​ស្គី​លើ​ទឹក​មាន​តែ​មួយ​គត់​ក្នុង​ប្រទេស​កម្ពុជា​។​ ចំពោះ​តម្លៃ​គឺ​ចាប់​ពី​ ១៩ ដុល្លារ​ឡើង​ទៅ​ បើក​ដំណើរ​ការ​ពី​ថ្ងៃ​ចន្ទ​ ដល់​ សៅរ៍​។​ ចំពោះ​ក្មេង​ចាប់​ពី​អាយុ​ ១០ ឆ្នាំ​ឡើង​អាច​ជិះ​បាន​។

​+កន្លែងបាញ់ធ្នូបន្ទាយជ័យ ៨០២
ក្លឹប​កីឡា​បាញ់​ធ្នូ​ភូមិ​កម្ពុជា​ ជា​កន្លែង​បាញ់​ធ្នូ​មួយ​ត្រូវ​បាន​បង្កើត​ឡើង​​ក្នុង​គោល​បំណង​លើក​ស្ទួយ​ ក៏​ដូច​ជា​ផ្សព្វ​ផ្សាយ​មរតក​ដូន​តា​ខ្មែរ​ទៅ​ដល់​ភ្ញៀវ​ទេស​ចរ​ជាតិ​ និង​អន្តរជាតិ​ ជា​ពិសេស​កូន​ចៅ​ខ្មែរ​ជំនាន់​ក្រោយ​ឲ្យ​បាន​ស្គាល់​ដោយ​ការ​ដាក់​តាំង​បង្ហាញ​វត្ថុ​បុរាណ​ជា​ច្រើន​ដែល​បាន​បន្សល់​ទុក​តាំង​ពី​សម័យ​អង្គរ​មក​ម្ល៉េះ​។​

+ខ្នងបារាយណ៍
ខ្នងបារាយណ៍មានទីតាំងស្ថិតនៅ ខាងជើងព្រលានយន្តហោះសៀមរាប ខាងក្រោយវត្តស្វាយរមៀត។សម្រាប់អ្នកទាំងអស់គ្នាដែលចង់ទៅកម្សាន្តនៅខ្នងបារាយណ៍ លោកអ្នកគួរតែទៅនាពេលរសៀលថ្ងៃជ្រេរបន្តិច ដើម្បីអាចផ្ដិតយកនូវរូបភាពដ៏ស្រស់ស្អាត

+សហគមន៍ បាគងភូមិខ្ញុំ 
តំបន់សហគមន៍ ទេសចរណ៍បាគងភូមិខ្ញុំ ជាតំបន់កម្សាន្តមួយដ៏ល្អសម្រាប់ជាលក្ខណៈគ្រួសារ និងមកជាមួយមនុស្សជាទីស្រលាញ់ ដោយសារកន្លែងនេះ មានភាពស្ងប់ស្ងាត់ល្អ ទេសភាពបៃតងស្រស់បំព្រង ខ្យល់បរិសុទ្ធ ជាពិសេសនោះមានកន្លែងជិះទូកលេងសប្បាយ រួមជាមួយកន្លែងកម្សាន្តជាច្រើនទៀត ដូចជាការបោះតង់ ស្ទូចត្រីជាដើម

+ភូមិលិចទឹកកំពង់ផ្លុក

កន្លែងនេះគឺជាភូមិធម្មជាតិមួយនៅលើទឹក  ដែលអាចឱ្យអ្នកទេសចរជិះទូក ​ឬកាណូតទេសចរណ៍លើផ្ទៃទឹក ទស្សនាទេសភាពលើផ្ទៃទន្លេសាបដែលមានព្រៃលិចទឹក សាលារៀន វត្ត​​អារាម ជម្រកសត្វបក្សី និងកន្លែងបែបធម្មជាតិពិសេសជាច្រើនទៀតលើផ្លូវទឹក៕

ភ្នំពេញ ៖ អគារមន្ទីរពេទ្យតេជោសែនកោះធំ ឋិតនៅស្រុកកោះធំ សម្រេចបានប្រមាណ ៨០.៥១% ហើយ នឹងលេចរូបរាងឡើងឆាប់ៗនេះ។

កាលពីថ្ងៃទី៣១ ខែមករា ឆ្នាំ២០២៣ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះជួយស្រុកកោះធំ បានអញ្ជើញចុះពិនិត្យអគារមន្ទីរពេទ្យតេជោសែនកោះធំ នៅក្នុងស្រុកធំ ខេត្តកណ្ដាល ដោយមានការចូលរួមពីថ្នាក់ដឹកនាំក្រសួង លោកសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត និងរួមដំណើពីលោកអភិបាល អភិបាលរងស្រុក លោកប្រធានក្រុមប្រឹក្សាភិបាលស្រុក សមាជិកក្រុមការងាររាជរដ្ឋាភិបាលចុះជួយស្រុកកោះធំ។

ការចុះត្រួតពិនិត្យ អគារមន្ទីរពេទ្យតេជោសែនកោះធំ នាពេលនេះ គឺដើម្បីតាមដានលើវឌ្ឍនភាព កិច្ចការងារសាងសង់ ធ្វើយ៉ាងណាឱ្យសម្រេចទៅតាមផែនកាគ្រោងទុក ប្រកបដោយចីរភាព នឹងឈានដល់ការដាក់ដំណើជាផ្លូវការនាពេលឆាប់ៗខាងមុខនេះ ។

សូមបញ្ជាក់ជូនថា មន្ទីរពេទ្យនេះសាងសង់ឡើងដោយថវិកាបានមកពីការចូលរួមវិភាគទានរបស់សប្បុរសជនក្នុងស្រុកទាំងអស់ ដោយរួមសហការជាមួយនឹងមន្ទីរពេទ្យកាល់ម៉ែត្រ គ្រោងចំណាយថវិកាសរុបទាំងអស់ប្រមាណ១០លានដុល្លារសហរដ្ឋអាមេរិកក្នុងនោះការសាងសង់រចនាសម្ព័ន្ធអគារមន្ទីរពេទ្យគ្រោងចំណាយទឹកប្រាក់ប្រមាណ៦លាន២សែនដុល្លារសហរដ្ឋអាមេរិក និងការបំពាក់សម្ភារបរិក្ខារពេទ្យគ្រោងចំណាយទឹកប្រាក់ពី៤ ទៅ ៥លានដុល្លារសហរដ្ឋអាមេរិកថែមទៀត។ បន្ថែមពីលើនោះមន្ទីរពេទ្យនេះត្រូវប្រសិទ្ធនាមថាមន្ទីរពេទ្យតេជោសែនកោះធំ និងក្លាយជាមន្ទីរពេទ្យមានទីតាំងផ្តល់សេវាសុខាភិបាលសាធារណៈជូនដល់ប្រជាពលរដ្ឋប្រមាណជាង ៦០ម៉ឺននាក់ដែលរស់នៅក្នុងស្រុកស្អាង ស្រុកកោះធំ ស្រុកលើកដែក នៃខេត្តកណ្តាល និងស្រុកព្រៃកប្បាស នៃខេត្តតាកែវ។ ជាពិសេសចំពោះពលរដ្ឋអ្នកស្រុកកោះលែងមានផលលំបាកក្នុងការធ្វើដំណើឆ្ងាយឡើងមកពិនិត្យ ឬព្យាបាលសុខភាពនៅភ្នំពេញទៀតផង។

សូមជម្រាបជូនថា គម្រោងសាងសង់អគារថ្មីនៃមន្ទីរពេទ្យតេជោសែនកោះធំនេះ រៀបចំឡើងក្រោមគំនិតផ្តួចផ្តើមរបស់ទេសរដ្ឋមន្ត្រី ស៊ុន ចាន់ថុល ដើម្បីឆ្លើយតបទៅនឹងតម្រូវការជាក់ស្តែង និងសមស្របតាមកម្មវិធីនយោបាយរបស់រាជរដ្ឋាភិបាល និងចក្ខុវិស័យសម្រាប់អភិវឌ្ឍជាតិរបស់សម្តេចតេជោ នាយករដ្ឋមន្ត្រី ដែលបានគិតគូរយកចិត្តទុកដាក់លើសុខទុក្ខ សុខមាលភាពរបស់ប្រជាពលរដ្ឋ។

គម្រោងសាងសង់មន្ទីរពេទ្យនេះរួមមាន៖ ការសាងសង់អគារថ្មីចំនួន០៣ខ្នង ១)អគារមន្ទីរពេទ្យ ចំនួន ០១ខ្នង មាន០៣ជាន់ ដែលជាន់ផ្ទាល់ដីមានទំហំ ៣.៥១៤,៨ ម៉ែត្រការ៉េ ជាន់ទី១មានទំហំ ៣.៥១៤,៨ ម៉ែត្រការ៉េ និងជាន់ទី២ មានទំហំ ៣.៥១៤,៨ ម៉ែត្រការ៉េ ស្មើនឹងទំហំសរុប ១០.៥៤៤,៤ ម៉ែត្រការ៉េ ២) អគារខាងឆ្វេង ចំនួន ០១ខ្នង មាន០២ជាន់ ដែលជាន់ផ្ទាល់ដីមានទំហំ ៥០០ម៉ែត្រការ៉េ និងជាន់ទី១មានទំហំ ៥០០ ម៉ែត្រការ៉េ ស្មើនឹងទំហំសរុប ១០០០ ម៉ែត្រការ៉េ ៣) អគារខាងស្តាំចំនួន០១ខ្នង មាន០២ជាន់ ដែលជាន់ផ្ទាល់ដីមានទំហំ៥០០ម៉ែត្រការ៉េ និងជាន់ទី១ មានទំហំ៥០០ម៉ែត្រការ៉េ ស្មើនឹងទំហំសរុប ១០០០ ម៉ែត្រការ៉េ។

អគារទាំង ០៣ ខាងលើមានទំហំសរុបស្មើនឹង ១២.៥៤៤,៤ ម៉ែត្រការ៉េ ដែលអាចផ្ទុកគ្រែអ្នកជំងឺបានចំនួន ១៥០ គ្រែ បំពាក់ដោយម៉ាស៊ីនត្រជាក់ សម្ភារបរិក្ខារពេទ្យ និងឧបករណ៍បច្ចេកទេសទំនើបៗបម្រើឱ្យការព្យាបាល ហើយបានចាប់ផ្តើមពីខែមករា ឆ្នាំ២០២២ និងគ្រោងសម្រេចតាមផែនការ ឈានដល់ការសម្ពោធដាក់ដំណើការនាពេលឆាប់ៗខាងមុខនេះ៕

បងប្អូនប្រជាពលរដ្ឋនៅក្នងខេត្តព្រះសីហនុ ដែលជាខេត្តដ៏មានសក្តានុពលមួយនៅក្នុងប្រទេសកម្ពុជា បានលើកឡើងពីបញ្ហា អ្នកលក់មួយចំនួន មិនទទួលយកក្រដាសប្រាក់ ១០០រៀល ដោយស្នើឱ្យក្រសួងពាក់ព័ន្ធជួយត្រួតពិនិត្យ។

បើតាមការបង្ហោះរបស់គណនីហ្វេកប៊ុកមួយបានឱ្យដឹងថា “អ្នកលក់មួយចំនួន មិនទទួលយកក្រដាសប្រាក់ ១០០រៀល ពីផ្ញៀវដែលទិញទំនិញរបស់ខ្លួនទេ ប៉ុន្ដែពេលអាប់លុយឱ្យភ្ញៀវ អាចមានក្រដាស ១០០រៀលបាន ការធ្វើទង្វើរនេះហាក់មិនសមរម្យសោះ ព្រោះថាក្រដាសប្រាក់១០០រៀល ត្បិតតិចតួចក្ដីប៉ុន្តែក៏ជាក្រដាសប្រាក់របស់ជាតិ ដែលដាក់ឱ្យដំណើរការទូទាំងប្រទេស ការដែលមិនទទួលយកក្រដាសប្រាក់ប្រភេទនេះ គឺដូចជាការមិនឱ្យតម្លៃ ដល់ប្រាក់រៀលរបស់ជាតិដូច្នេះដែរ សូមអាជ្ញាធរ និងស្ថាប័នជំនាញពាក់ព័ន្ធត្រួតពិនិត្យ ចំពោះករណីនេះ”។

ទន្ទឹមនេះដែរ ស្ថាប័នពាក់ព័ន្ធបានជម្រាបដល់ពលរដ្ឋនៅខេត្តព្រះសីហនុ ដែលជួបប្រទះផ្ទាល់ ករណីមានហាង ឬ អ្នកលក់ ដែលមិនទទួលក្រដាសប្រាក់ ១០០រៀល សូមថតរូប ទីតាំង រួចផ្ញើរចូលមក តេលេក្រាម ឬ ផេក ប្រជាជន ខេត្តព្រះសីហនុ ដើម្បីបញ្ជូនព័ត៌មានទាំងនេះ ទៅកាន់ អាជ្ញាធរ ស្ថាប័នជំនាញ ចាត់វិធានការតាមនីតិវិធីច្បាប់៕

ប្រភព៖ ប្រជាជន ខេត្តព្រះសីហនុ

មុននិងស្ថាបនានូវសំណង់ប្រាសាទណាមួយបុព្វបុរសយើងតែងតែបា្ររព្ធឡើងតាមលំដាប់លំដោយដូចខាងក្រោម ៖

• ការជ្រើសរើសទីតាំង
ការជ្រើរើសទីតាំងពិតជាមានសារៈសំខាន់ណាស់ បុព្វបុរសយើងធ្វើដោយមានការសិក្សាយ៉ាងត្រឹមត្រូវ តាមក្បួនហោរាសាស្រ្ត និងមានលក្ខណះបច្ចេកទេសស្ថាបត្យកម្មយ៉ាងម៉ត់ចត់។

ការជ្រើសរើសទីតំាងប្រាសាទ ច្រើនស្ថិតនៅលើទីតាំងអំណោយផលល្អប្រសើរ ទាំងផ្នែក គមនាគមន៏ កសិកម្ម និងការការពារ។ កាលពីសម័យនោះ ខ្មែរយើងមានជំនឿ និងឥទ្ធិពលដ៏ខ្លាំងក្លា ទៅលើសាសនា រហូតដល់សវត្សទី ៩ ឬដើមសវត្សទី១០ ទីតំាងរបស់ប្រាសាទ ច្រើនជ្រើសរើសនៅ លើកំពូលភ្នំ ព្រោះគេចាត់ទុកថា ភ្នំជាទីខ្ពស់ ជាកន្លែងដ៏ពិសិដ្ឋសំរាប់បូជាដល់អាទិទេព។ តែសម័យ ក្រោយមកមានការវិវត្តន៏មកកាន់តំបន់ទំនាបដោយរក្សាលំនាំដើម ដោយប្រាសាទត្រូវសាងសង់លើ ខឿនខ្ពស់ ដែលតំណាងឲ្យភ្នំ។

• ទិសប្រាសាទ
ជាទូទៅទិសប្រាសាទបុរាណខ្មែរ តែងតែបែរទៅទិសខាងកើត។ បា្រសាទមានទិលដៅពីកើតទៅលិច យោងទៅតាមដំណើរវិលជុំវិញព្រះអាទិត្យ ធៀបនិងផែនដី។ ទន្ទឹមនិងនេះ ក៏មានប្រាសាទមួយចំនួនដែលកសាងឡើងដោយមិនគោរពទៅតាមក្បួនខ្នាត ខាងលើដែរដូចជា ប្រាសាទព្រះខ័ន្ធ នៅកំពង់ស្វាយដែលបែរមុខទៅទិសឥសាន្ត ប្រាសាទអង្គរវត្ត បែរមុខទៅទិសខាងលិច និងប្រាសាទព្រះវិហារ បែរមុខទៅទិសខាងជើង ។

ក្នុងករណីលើកលែងខាងលើ គេបានពន្យល់ដោយលើកយកហេតុផល ដែលកើតមានឡើង ក្នុងការខុសឆ្គងទៅលើការវាស់វែង ឬក៏មួយផ្នែកទៀត ពុំមានការពាក់ពន្ធ័ផងដែរជាមួយនិងទីតាំងភូមិសាស្រ្ត និងសណ្ឋានដី។

ចំពោះទិសប្រាសាទអង្គរវត្ត ដែលបែរមុខទៅទិសខាងលិច វាពុំមានការទាក់ទងទៅនឹងសណ្ឋានដី ដែលមានលក្ខណះរាប ហើយក៏គា្មនភាពចៃដន្យណាមួយដែរ គឺវាពិតជាទាក់ទង់ទៅនឹង និមិ្មត្តកម្មមរណភាព ជាផ្លូវសំរាប់តំកល់សព។

ម្យ៉ាងទៀតនៅក្នុងស្ថាបត្យកម្មខ្មែរការកំនត់ទិសប្រាសាទដោយយោងទៅលើហេតុផលជាច្រើននៅក្នុងគំនិតខាងសាសនា ខាងក្បួនច្បាប់នៃភពផែនដីឬក៏ស្ថិតនៅក្នុងច្បាប់នៃ ការពិនិត្យដំណើរផ្កាយ គឺពុំស្មើរករណីដែលអាចកើតឡើងផ្នែកឋានលេខា នោះទេ។

• ប្លង់ប្រាសាទ
នៅក្នុងចំណោមប្រាសាទទាំងអស់ ដែលបានសង់ឡើងនៅក្នុងព្រះរាជាណាចក្រកម្ពុជា ប្រាសាទខ្លះសង់ដាច់តែឯង ដែលគេហៅថាប្រាសាទទោល ឬប្រាសាទឯកោរ ដូចជាប្រាសាទបក្សីចំាក្រុង និង ប្រាសាទខ្លះទៀតសង់នៅជិតគ្នាជាក្រុម មានដូចជាប្រាសាទព្រះខ័ន្ធ ជាដើម។ ទោះបីជាសង់ ដាច់តែឯង ឬសង់ជាក្រុមក៏ដោយ ក៏ប្រាសាទទាំងនោះជានិច្ចជាកាលតែងតែមានប្រាសាទសក្ការះនៅ ចំកណ្តាល ជាទីតំកល់ព្រះ ឬអាទិទេពដែលតំនាងឲ្យស្នូលកណ្តាលនៃផែនដី។

• ប្លង់ស្ថាបត្យកម្មមុនសម័យអង្គរ

នៅមុនសម័យអង្គរ ស្ថាបត្យកម្មខ្មែរបានជ្រើសរើសយកប្លង់ ៣ជាមូលដ្ឋានគឺ
– ប្លង់ការេ
– ប្លង់ការេបន្ថែមភ្ជាប់ដោយបន្ទប់ផ្នែកខាងមុខ
– ប្លង់ចតុកោណកែង

• ប្លង់ស្ថាបត្យកម្មសម័យអង្គរ

នៅក្នុងការជ្រើសរើសប្លង់សំរាប់សាងសង់ប្រាសាទ បុព្វបុរសខ្មេរយើងតែងតែផ្លាស់ប្តូរ ទៅតាមចំនង់ចំនូលចិត្ត ឬតាមការនិយមដូចជា ៖
– នៅចុងស.វទី៩គេបានបោះបង់ចោលប្លង់ចតុកោណកែងហើយងាក មកយកប្លង់រាងការេវិញ
– នៅស.វទី១០គេបានច្នៃប្រឌិតបាតធម្មតាហើយថែមក្បាច់សារពើសូត្រតាមជ្រុង ដូចជា ប្រាសាទបក្សីចំាក្រុង
– នាពាក់កណ្តាលទីមួយស.វទី១០ចាស់បុរាណបានបង្កើតប្លង់មួយបែបទៀតសំរាប់លំអនិងបន្ថែមទំហំប្រាសាទគឺការបន្ថែមមុខនិងបន្ទប់រាងចតុកោណកែងមួយទៀតនៅផ្នែកខាងមុខ ហៅថា មណ្ឌល ។
– នៅដើមស.វទី១១ ការវិលទៅរកប្លង់រាងការេវិញដោយបន្ថែមយ៉ មួយទិស ដែលជាប្រភពនៃប្លងកាកបាទ ។
– នៅដើមស.វទី១២ ប្លង់កាកបាទ គេបានបន្ថែមតាមជ្រុងទាំងបួន និង បន្ថែមបន្ទប់រាងចតុ កោណកែង។
– នៅក្នុងស.វទី១៣ក្នុងរជ្ជកាលព្រះបាទជ័យវរ្ម័នទី៧ប្លង់ប្រាសាទថ្មីមួយទៀតត្រូវបានបង្កើតឡើងនោះគឺប្លង់រាងមូលចែកជា៨កំាហ៊ុមពទ្ធ័បន្ទប់ កណ្តាលសំរាប់តំកល់ព្រះពុទ្ធបដិមាករ(ប្រាសាទសក្ការៈនៃប្រាសាទ បាយ័ន)
សរុបមក យើងសង្កេតឃើញថា ប្លង់ស្ថាបត្យកម្មខ្មែរមានការវិវត្តន៏ ពីប្លង់រាងការេ ចតុកោណកែង និង ប្លង់រាងមូល៕

ប្រភពអត្ថបទ៖ សោ ប៊ុនថា