ប្រទេសហូឡង់ ៖ ទីក្រុងអាំស្ទែដាំរបស់ហូឡង់បានបង្កើតចំណតកង់ធំមួយ ដែលអាចចតកង់បានចំនួន៧.០០០គ្រឿង បន្ទាប់ពីប្រទេសនេះបានប្រឈមនឹងបញ្ហាចំណតកង់មិនគ្រប់គ្រាន់ ដោយសារពលរដ្ឋហូឡង់និយមប្រើប្រាស់កង់ក្នុងការធ្វើដំណើរភាគច្រើន ។

ចំណតកង់មានទំហំធំបំផុតស្ថិតនៅស្ថានីយកណ្តាលនៃទីក្រុងអាំស្ទែដាំ ហើយការចតកង់នៅទីនេះ មិនចាំបាច់ចំណាយប្រាក់ទេ ក្នុងរយៈពេល២៤ម៉ោងដំបូង ប៉ុន្តែចាប់ពី២៤ម៉ោងឡើងទៅ គេគិតថ្លៃចតចំនួន១,៣៥យូរ៉ូក្នុង១ថ្ងៃ ដោយប្រើប្រាស់ប្រព័ន្ធឆ្លាតវៃ ។ ប្រព័ន្ធនេះនឹងយកកង់ដែលចតនៅទីនេះចេញក្រៅ បន្ទាប់ពីគ្រប់កំណត់២៨ថ្ងៃ ។ ចំណតកង់នេះស្ថិតនៅបរិវេណការចរាចររបស់នាវា មានន័យថា វាស្ថិតនៅក្រោមផ្ទៃទឹក ។

ទីក្រុងអាំស្ទែដាំមានគម្រោងបង្កើតចំណតបន្ថែមទៀត ដែលអាចចតកង់បានចំនួន៨.៥០០គ្រឿងក្នុងឆ្នាំ២០២៩ ។ មុននេះ ចំណតមិនគ្រប់គ្រាន់ជាបញ្ហាធំរបស់ទីក្រុង ខណៈមានចំណតសាធារណៈទូទាំងទីក្រុងអាចចតកង់បានចំនួន៤០ម៉ឺនគ្រឿង ហើយដើម្បីឱ្យពលរដ្ឋមានភាពងាយស្រួល ទីក្រុងក៏បានបង្កើតចំណតបន្ថែមទៀតនៅក្រោមទឹក ។

គួរបញ្ជាក់ថា ពលរដ្ឋហូឡង់ជាង៩០% និយមប្រើប្រាស់កង់សម្រាប់ធ្វើដំណើរក្នុងជីវិតប្រចាំថ្ងៃ ព្រោះរដ្ឋាភិបាលលើកទឹកចិត្តឱ្យពលរដ្ឋប្រើប្រាស់កង់ជាយានជំនិះ ដោយបង្កើតភាពងាយស្រួលដល់អ្នកជិះកង់ មិនថាធ្វើផ្លូវកង់ បំពាក់ភ្លើងសញ្ញាចរាចរណ៍សម្រាប់អ្នកជិះកង់ជាពិសេស និងបង្កើតទីធ្លាសាធារណៈជុំវិញទីក្រុងសម្រាប់ចំណតជាដើម ។ មុននេះ ទីក្រុង Utrecht ក៏បានបង្កើតចំណតកង់ធំបំផុតក្នុងពិភពលោកផងដែរ ដែលអាចចតរហូតដល់១.២៥០០គ្រឿងឯណោះ ៕

ប្រភព ៖ TNN EARTH

កាលពីថ្ងៃទី៥ ខែកុម្ភៈ កន្លងមក EU បានចាប់ផ្តើមអនុវត្តវិធានការហាមឃាត់ការនាំចូលប្រេងម៉ាស៊ូត និងផលិតផលពាក់ព័ន្ធផ្សេងៗរបស់រុស្ស៊ី ដើម្បីកាត់បន្ថយការពឹងផ្អែកប្រទេសរុស្ស៊ី និងកាត់ផ្តាច់ប្រភពចំណូលសំខាន់របស់រុស្ស៊ី តាមកិច្ចព្រមព្រៀងរួមគ្នាជាមួយក្រុមប្រទេស G7 រួមមាន អាមេរិក អង់គ្លេស អាល្លឺម៉ង់ បារាំង អ៊ីតាលី ជប៉ុន និងកាណាដា ។

ទោះយ៉ាងណា ប្រេងម៉ាស៊ូតរបស់រុស្ស៊ីនៅតែអាចចែកចាយទៅកាន់ប្រទេសផ្សេងទៀតដូចជា ចិន និងឥណ្ឌា ។ វិធានការហាមឃាត់របស់ EU នឹងទប់ស្កាត់តម្លៃប្រេងកើនឡើងភ្លាមៗ ដែលជះឥទ្ធិពលដល់អ្នកប្រើប្រាស់ទូទាំងពិភពលោក ហើយវិធានការនេះនឹងធ្វើឱ្យប្រាក់ចំណេញរុស្ស៊ីធ្លាក់ចុះ ហើយប៉ះពាល់ដល់ប្រាក់របស់រុស្ស៊ីសម្រាប់គ្រប់គ្រងប្រទេស និងធ្វើសង្គ្រាមផងដែរ ។

វិធានការដាក់ទណ្ឌកម្មថាមពលរុស្ស៊ីជាថ្មីនេះ នឹងធ្វើឱ្យតម្លៃប្រែប្រួល ខណៈប្រទេសជាសមាជិក EU អាចរកទិញប្រេងម៉ាស៊ូតពីអាមេរិក និងមជ្ឈិមបូព៌ា ជំនួសការទិញប្រេងម៉ាស៊ូតពីរុស្ស៊ី ។ កាលពីមុន រុស្ស៊ីធ្លាប់បាននាំចេញប្រេងម៉ាស៊ូតមកកាន់ EU ស្មើ១០% នៃតម្រូវការទាំងអស់ក្នុងតំបន់ ។

តាមទិន្នន័យពី EU បញ្ជាក់ថា តម្លៃប្រេងម៉ាស៊ូតនៅស្ថានីយប្រេងឥន្ធនៈស្មើ១,៨០យូរ៉ូ/១លីត្រ (សម្រាប់ថ្ងៃទី៣០ ខែមករា ឆ្នាំ២០២៣) ។ ក្រុមប្រទេស G7 បានកំណត់តម្លៃប្រេងឥន្ធនៈ និងប្រេងសាំងរបស់រុស្ស៊ីខ្ពស់បំផុតមិនលើសពី១០០ដុល្លារ/១បារ៉ែល ហើយហាមឃាត់ការដឹកជញ្ជូនប្រេងម៉ាស៊ូតដែលលក់ក្នុងតម្លៃខ្ពស់ជាងនេះ ។ EU ឱ្យដឹងថា អ្នកនាំចូលប្រេងមានពេលគ្រប់គ្រាន់ត្រៀមខ្លួន ។

គួរបញ្ជាក់ថា កន្លងមក ប្រទេសរុស្ស៊ីទទួលបានប្រាក់ចំណូលចំនួន២.០០០លានដុល្លារពីការនាំចេញប្រេងម៉ាស៊ូតទៅកាន់អឺរ៉ុបនៅខែធ្នូកន្លងមក (សម្រាប់តែខែធ្នូប៉ុណ្ណោះ) ដោយប្រទេសនាំចូលបានបង្កើនចំនួនស្តុកប្រេងរបស់ខ្លួន មុននឹងអនុវត្តវិធានការហាមឃាត់ការនាំចូលប្រេងពីរុស្ស៊ី ៕

ប្រភព ៖ NationWorldNews

Makeup remover oil ជួយកម្ចាត់ភាព កខ្វក់លើស្បែកមុខដោយការផាត់មុខក្រាស់ៗ លាងសម្អាតបានជ្រៅចូលរន្ធញើសឲ្យអស់កាកសំណល់ពីការលាបឡេការពារកម្ដៅថ្ងៃ និងខ្លាញ់លើស្បែកមុខ។

លើសពីនេះក៏ជួយឲ្យស្បែកមុខភ្លឺថ្លាទន់ និងទប់ស្កាត់ការកើតមុនផងដែរ។ ប៉ុន្តែបើអ្នកសាកល្បងប្រើទឹកជូត គ្រឿងសម្អាងហើយស្បែកមុខប្រែជាយ៉ាប់យឺនលើសដើម
អាចមកពីកំហុសមួយចំនួន។

១.ប្រើនៅពេលដៃ និងផ្ទៃមុខសើម

ទឹកជូតគ្រឿងសម្អាងប្រភេទនេះ នឹងអស់ប្រសិទ្ធភាពនៅពេលប៉ះផ្ទាល់ជាមួយទឹក ព្រោះធ្វើឲ្យសមាសធាតុដែល ស្រូបយកស្រទាប់ប្រេងនឹងរលាយ
មិនអាចលាងកាក សំណល់ផ្សេងៗបានជ្រៅតាមរន្ធរោមនោះទេ។ ដូច្នេះ នៅពេលអ្នកលាង សម្អាតមុខដោយទឹករួចគួរជូតមុខ និងដៃឲ្យស្ងួតសិនបន្ទាប់មកចាំយក Makeup remover oil មកជូតលើស្បែកមុខ។២.កុំជូតមុខយូរពេក ចំណាយពេលត្រឹម១នាទីបានហើយ

បើអ្នកមិនចង់ឲ្យស្បែកប្រែជាខូចខាតលើសដើម។ អ្វីដែលគួរចងចាំមួយទៀត កុំភ្លេចជូតត្រង់បរិវេណថ្ងាសច្រមុះនិងឆ្អឹងថ្គាម ដែលនារីភាគច្រើនតែ រំលងត្រង់បរិវេណទាំងនេះ។

៣.មិនម៉ាស្សាស្បែកមខបន្ថែម

រយៈពេល១នាទីពេលប្រើទឹកជូតសម្អាតអ្នកគួរជូត ដោយប្រុងប្រយ័ត្ន និងថ្នមៗ
ដើម្បីឲ្យសារធាតុពីទឹកជូតបានជ្រាបចូល ជ្រៅអាចលាងជម្រះបានល្អ។ ជាធម្មតាស្រទាប់ ប្រេងចេញពីទឹកសម្អាតនឹងប្តូរជាទឹកដោះគោអាចជួយជម្រះមុខបានប្រសើរមិនធ្វើឲ្យរន្ធរោមរីកធំនិងឆាប់កើតមុននោះទេ។
ដូច្នេះគួរម៉ាស្សាបន្ថែមថ្នមៗដើម្បីឲ្យស្បែកមុខអាចស្រូបបានសាធាតុទាំងនេះ។

៤.មិនប្រើហ្វូមលាងមុខ

ប្រើត្រឹមទឹកជូតសម្អាត មុខមិនទាន់គ្រប់គ្រាន់នោះទេ អ្នកគួរប្រើហ្វូមលាងមុខបន្ថែមទៀត ដើម្បីលាងជម្រះបានសព្វ និងស្អាតល្អ។ អ្នកគួរជ្រើសរើសហ្វូមណាដែល ជាតិស្រាលៗមិន ផ្ទុក ជាតិកាត់ខ្លាំងដូចសាប៊ូ
ដែលធ្វើឲ្យស្បែកមុខឆាប់រលាកនិងកាន់តែមុខឡើងខ្លាញ់ថែមទៀត៕

ប្រទេសវៀតណាម ៖ យោងតាមសារព័ត៌មានក្នុងស្រុករបស់វៀតណាមរាយការណ៍កាលពីថ្ងៃទី៦ ខែកុម្ភៈថា សព្វថ្ងៃនេះ ឥរិយាបថប្រើប្រាស់ផលិតផលរបស់ជនជាតិវៀតណាមកំពុងតែផ្លាស់ប្តូរ បន្ទាប់ពីមានការរាតត្បាតនៃជំងឺកូវីដ-១៩ ដោយមនុស្សភាគច្រើនងាកទៅទិញផលិតផលមួយទឹក ដើម្បីសន្សំសំចៃប្រាក់ និងលើកកម្ពស់និរន្តរភាព ។

ផលិតផលមួយទឹកទទួលបានការពេញនិយមបំផុត រួមមាន ឧបករណ៍អេឡិចត្រូនិក សម្ភារៈប្រើប្រាស់ក្នុងលំនៅឋាន គ្រឿងសង្ហារិម និងម៉ូតូ ។ ក្រៅពីនេះ គ្រឿងដំឡើងសំឡេង កុំព្យូទ័រយួរដៃ និងគ្រឿងទូរទស្សន៍ផងដែរ ។ បច្ចុប្បន្ន អ្នកប្រើប្រាស់ផលិតផលនៅវៀតណាមមានអាយុតិច ហើយពួកគេបារម្ភពីបរិស្ថាន និងការអភិវឌ្ឍប្រកបដោយនិរន្តរភាព ។

តាមរបាយការណ៍របស់ Cho Tot ជាភ្នាក់ងារលក់ផលិតផលមួយទឹកជាច្រើនប្រភេទក្នុងភូមិភាគអាស៊ានបង្ហាញថា អ្នកទិញផលិតផលមួយទឹកនេះ ពួកគេអាចសន្សំសំចៃប្រាក់ ហើយផលិតផលក៏អាចប្រើប្រាស់បានយូរអង្វែង ។ Cho Tot សង្ឃឹមថា តម្លៃនៃទីផ្សារផលិតផលមួយទឹក នឹងឡើងខ្ពស់ស្មើប្រមាណ៥,១ពាន់លានដុល្លារអាមេរិកក្នុងឆ្នាំ២០២៦ ។

តាមសារព័ត៌មានរបស់វៀតណាម Tuoi Tre បានបង្ហាញរបាយការណ៍របស់ Redseer Strategy Consultants ថា ទីផ្សារផលិតផលមួយទឹករបស់វៀតណាមមានតម្លៃ១,១ពាន់លានដុល្លារអាមេរិក ហើយតម្រូវការប្រើប្រាស់ផលិតផលទាំងនេះក្នុងប្រទេសវៀតណាម ក៏កើនឡើងផងដែរ ។ ក្រៅពីនេះ ជនជាតិវៀតណាមដែលជ្រើសរើសទិញផលិតផលមួយទឹក កាន់តែមានចំនួនច្រើនឡើង ៕

ប្រភព ៖ AEC Connect

រដ្ឋធានីប៉ារីស៖ រហូតមកដល់ពេលនេះ នៅតែមានទស្សនកិច្ច លើកឡើងខុសៗគ្នា ជុំវិញសង្គ្រាម នៅក្នុងប្រទេសអ៊ុយក្រែន ខណៈក្រុមមន្រ្ដីរុស្ស៊ី បានចាត់ទុកការពង្រីកខ្លួនរបស់អង្គការសន្ធិសញ្ញាអាត្លង់ទិកខាងជើង ហៅកាត់ ណាតូ ជាដើមចម នៃជម្លោះ នៅក្នុងប្រទេសអ៊ុយក្រែន ហើយបណ្ដាប្រទេសបស្ចិមលោក បានចាត់ទុកសកម្មភាពយោធារបស់ក្រុងមូស្គូ ជាការលេបត្របាក់ទឹកដីរបស់ប្រទេសជិតខាង ប៉ុន្ដែសម្រាប់ប្រេសិតចិន វិញ ដែលមានទំនោរទៅរករុស្ស៊ី បានចោទប្រកាន់ ដល់បណ្ដាប្រទេសលោកខាងលិច មិនបានស្វែងរកវិធីសាស្រ្ដណាមួយ សម្រាប់ការបញ្ចប់នូវការប៉ះទង្គិចគ្នា ដោយយោធានេះ ឲ្យបានឆាប់នោះឡើយ។

សារព័ត៌មាន គ្រប់គ្រង ដោយរដ្ឋរុស្ស៊ី Tass បានចេញផ្សាយ កាលពីព្រឹក ថ្ងៃអង្គារ ទី៧ ខែកុម្ភៈ ថា លោក លូ សាយេ (Lu Shaye) ឯកអគ្គរដ្ឋទូតចិន ប្រចាំនៅប្រទេសបារាំង បានបង្ហាញអំពីទស្សនៈផ្ទាល់ខ្លួនមួយ ចាក់ផ្សាយតាមបណ្ដាញទូរទស្សន៍ LCI TV របស់បារាំង ថា សកម្មភាពរបស់បស្ចិមលោក មិនបានចូលរួមចំណែក ដើម្បីបញ្ចប់ជម្លោះ នៅក្នុងប្រទេសអ៊ុយក្រែន ឲ្យបានឆាប់បំផុតនោះទេ។លោកឯកអគ្គរដ្ឋទូតចិន រូបនេះ បានបញ្ជាក់ នៅតាមបណ្ដាញទូរទស្សន៍ LCI TV កាលពីថ្ងៃចន្ទ ថា ចិន នៅតែប្រកាន់គោលជំហរអព្យាក្រឹត ចំពោះជម្លោះនៅអ៊ុយក្រែន។ ប៉ុន្តែក្រុងប៉េកាំង យល់អំពីការព្រួយបារម្ភរបស់រុស្ស៊ី ចំពោះការពង្រីកខ្លួនរបស់អង្គការណាតូ ឆ្ពោះទៅទិសខាងកើត និង ផែនការនានា ដាក់បញ្ចូលអ៊ុយក្រែន ចូលទៅក្នុងសម្ពន្ធភាព ដែលនាំឲ្យក្លាយជាដើមចម នៃជម្លោះ នាពេលបច្ចុប្បន្ននេះ។

លោក Lu Shaye បានសង្កត់ធ្ងន់ ដោយឆ្លើយនឹងសំណួរមួយ អំពីហេតុផលជាច្រើន នៅពីខាងក្រោយជម្លោះ នៅអ៊ុយក្រែន នាពេលបច្ចុប្បន្ននេះ ថា «អង្គការណាតូ បាន និង កំពុងតែគំរាមកំហែង ដល់សន្តិសុខរបស់រុស្ស៊ី អស់រយៈពេលជាច្រើនទសវត្សរ៍កន្លងមកហើយ … នៅក្នុងការពង្រីកខ្លួនជុំទី៥ឆ្ពោះទៅទិសខាងកើតរបស់អង្គការណាតូ បង្កនូវការគំរាមកំហែងយ៉ាងខ្លាំង ដល់សន្តិសុខរបស់រុស្ស៊ី។ នេះជាអ្វីដែលប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) កំពុងតែនិយាយអំពីបញ្ហានេះ។ គាត់ប្រឆាំងយ៉ាងខ្លាំងនឹងសកម្មភាពរបស់អង្គការណាតូ។

លោកឯកអគ្គរដ្ឋទូតចិន រូបនេះ បានបន្ថែម ថា «តើអ្នកជឿ ថា ការពង្រីកខ្លួនរបស់អង្គការណាតូ មិនគំរាមកំហែងដល់រុស្ស៊ី ទេឬ? ប៉ុន្តែនៅពេលមេដឹកនាំសហភាពសូវៀត លោក នីគីតា គ្រូសឆែវ (Nikita Khruschev) បានសម្រេចចិត្តដាក់ពង្រាយអាវុធនុយក្លេអ៊ែរ នៅក្នុងប្រទេសគុយបា តើប្រធានាធិបតីសហរដ្ឋអាមេរិក លោក ចន ខែនណេឌី (John Kennedy មានប្រតិកម្មយ៉ាងណាខ្លះដែរ? ជាការកត់សម្គាល់ គឺនៅមុនពេលមានប្រតិបត្តិការយោធាពិសេសនោះ មានការចោទប្រកាន់ ថា មិនមានគម្រោង ដាក់បញ្ចូលអ៊ុយក្រែន ចូលទៅក្នុងសម្ពន្ធភាព និង ដាក់ពង្រាយខែលការពាររបស់អង្គការណាតូ នៅលើទឹកដីរបស់ខ្លួននោះទេ តែវាអាចកើតមានឡើង នាពេលអនាគត។

លោកឯកអគ្គរដ្ឋទូតចិន បានសង្កត់ធ្ងន់ទៀត ថា «ប្រសិនបើអង្គការណាតូ រុញច្រានព្រំដែនរបស់ខ្លួន ទៅដល់កម្រិតព្រំដែនជាប់ជាមួយនឹងរុស្ស៊ី នោះ អង្គការសម្ពន្ធមិត្ដយោធាដ៏ខ្លាំងក្លាមួយនេះ នឹងដាក់ខែលការពារ នៅលើដែនដីរបស់ពួកគេ។ ដោយឡែក ចិននៅតែប្រកាន់គោលជំហរអព្យាក្រឹត ហើយក្រុងប៉េកាំង មិនបញ្ជូនគ្រឿងសព្វាវុធ ទៅឲ្យរុស្ស៊ី និង មិនបានធ្វើអ្វី ប្រឆាំងនឹងការសម្របសម្រួលជម្លោះ ដោយសន្ដិវិធីនោះដែរ។

ប្រេសិតចិនរូបនេះ បានបង្ហាញនូវការកត់សម្គាល់របស់គាត់ ថា «អស់រយៈពេលជាច្រើនខែកន្លងមកហើយ បណ្ដាប្រទេសអឺរ៉ុប បានបដិសេធ បញ្ជូនរថក្រោះប្រយុទ្ធធុនធ្ងន់របស់លោកខាងលិច ទៅកាន់ប្រទេសអ៊ុយក្រែន។ ឥឡូវ ពួកគេបានសម្រេចចិត្ត បញ្ជូនទៅជួយប្រទេសអឺរ៉ុបខាងកើតមួយនេះ។ ថ្ងៃនេះ ពួកគេបដិសេធ ដឹកជញ្ជូនយន្ដហោះចម្បាំង ប៉ុន្ដែ អាចនឹងបញ្ជូន នៅក្នុងរយៈពេលប៉ុន្មានខែខាងមុខនេះ។

ចាប់តាំងពីការផ្ទុះសង្គ្រាម នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតមកដល់ពេលនេះ សហរដ្ឋអាមេរិក ក្លាយជាប្រទេសផ្ដល់ជំនួយយោធាច្រើនជាងគេបំផុត ជួយដល់ប្រទេសអ៊ុយក្រែន ដែលមានទឹកប្រាក់ ប្រហែលជាជាង២៧ពាន់លានដុល្លារ។ ដោយឡែក ប្រធានាធិបតីអ៊ុយក្រែន ធ្លាប់ថ្លែងទៅកាន់សភារបស់សហរដ្ឋអាមេរិក នៅក្នុងដំណើរទៅកាន់រដ្ឋធានីវ៉ាស៊ីនតោន ថា ជំនួយរបស់សហរដ្ឋអាមេរិក និង សម្ពន្ធមិត្ត មានទំហំទឹកប្រាក់ រាប់សិបពាន់លានដុល្លារនេះ មិនមែនជាជំនួយមនុស្សធម៌នោះឡើយ។ ប៉ុន្ដែវាជាការវិនិយោគ សម្រាប់សិទ្ធិ សេរីភាព និង លទ្ធិប្រជាធិបតេយ្យ នៅលើពិភពលោកតែប៉ុណ្ណោះ៕

កុម្ភៈ នេះ មានក្មេងស្រីម្នាក់ជនជាតិមីយ៉ាន់ម៉ា អាយុមិនដល់២ខួបផង ត្រូវបានម្តាយនិងឪពុករបស់នាងយកទៅតាម ពេលពួកគេទៅស៊ីឈ្នួលជីកដំឡូងមីឱ្យគេ ហើយធ្លាក់ទៅក្នុងអណ្តូង ពេលនេះ អាជ្ញាធរថៃបានជួយសង្គ្រោះហើយ ដោយអាជ្ញាធរនិយាយថា ពួកគេប្រើពេលវេលាយូរណាស់ទម្រាំជួយជីវិតនាងបាន ។

កាលពីវេលាម៉ោង១០គត់ថ្ងៃនេះ លោក សាន់យ៉ា ពេជ្រសេត អភិបាលស្រុកភពព្រះ ព្រមទាំងអាជ្ញាធរក្នុងឃុំសង្កាត់បានបញ្ជូនកម្លាំងទៅកាន់កន្លែងកើតហេតុ និងនាំគ្នាដុតធូបបន់ស្រន់សុំឱ្យយកនាងតូចឡើងមកលើបានយ៉ាងមានសុវត្ថិភាព ។

រហូតមកដល់ម៉ោង១០និង៤៤នាទីថ្ងៃនេះ ខាងអាជ្ញាធរអាចយកនាងឡើងពីរណ្តៅបានដោយជោគជ័យ ។ ពេលនាំនាងឡើងមកដំបូង នាងមានសុវត្ថិភាព ប៉ុន្តែអាការៈទន់ខ្សោយ ហើយត្រូវបានគេបញ្ជូនទៅកាន់មន្ទីរពេទ្យស្រុកភពព្រះ ដើម្បីព្យាបាលរបួស ។

សូមដាស់តឿនផងដែរទៅកាន់ម្តាយឪពុកដែលមានកូនតូចៗ ត្រូវតែប្រយ័ត្នប្រយែងបំផុតក្នុងការមើលថែកូនរបស់ខ្លួន ព្រោះគ្រោះថ្នាក់អាចកើតឡើងគ្រប់ពេល មិនថានៅក្នុងផ្ទះ ឬនៅក្រៅផ្ទះទេ ៕

ប្រភព ៖ news.ch7

ប្រទេសតួកគី ៖ WHO និយាយថា ចំនួនអ្នកស្លាប់ដោយសាររញ្ជួយដីកើតឡើងនៅប្រទេសតួកគី ជិតព្រំដែនប្រទេសស៊ីរី អាចកើនឡើងដល់ទៅ៨ដងឯណោះ ពីតួលេខបច្ចុប្បន្នដែលរកឃើញអ្នកស្លាប់ជាង៣.០០០នាក់ ។

ហេតុការណ៍គ្រោះរញ្ជួយដីនៅភាគខាងត្បូងប្រទេសតួកគីនេះ កើតឡើងកាលពីថ្ងៃទី៦ ខែកុម្ភៈ ពេលនេះ ចំនួនអ្នកស្លាប់កើនឡើងបន្ថែមទៀតយ៉ាងតិច៣.៤០០នាក់ ។ ចំនួនអ្នកស្លាប់ជាងពាក់កណ្តាលជាពលរដ្ឋតួកគី និងជិតពាក់កណ្តាលទៀតជាពលរដ្ឋស៊ីរី ។ ក្រុមជួយសង្គ្រោះកំពុងស្វែងរកអ្នកនៅមានជីវិត ដែលអាចជាប់នៅក្រោមអគារផ្សេងៗក្រោមអាកាសធាតុត្រជាក់ខ្លាំង និងមានព្រិលធ្លាក់ ។

រីឯអ្នករងរបួសស្មើប្រមាណ១២.០០០នាក់ ក្នុងនោះមានពលរដ្ឋតួកគី៩.៧០០នាក់ និង២.០០០នាក់ទៀតជាពលរដ្ឋស៊ីរី ហើយភាគច្រើនជាអ្នករស់នៅភាគខាងជើងប្រទេស ។ ប្រទេសជាច្រើនដូចជា អាមេរិក សហភាពអឺរ៉ុប រុស្ស៊ី ឥណ្ឌា ចិន អ៊ីរ៉ាក់ និងអ៊ីរ៉ង់ បានប្រកាសជួយឧបត្ថម្ភក្រុមសង្គ្រោះដើម្បីរកអ្នកនៅមានជីវិត ក្នុងនោះមានអ្នកជំនាញសង្គ្រោះ ឆ្កែហិតក្លិន និងឧបករណ៍ផ្សេងៗ ខណៈរដ្ឋាភិបាលតួកគីបានស្នើសុំជំនួយជាផ្លូវការពីអង្គការសន្ធិសញ្ញាខាងជើង (NATO) ។

អ្នកជំនាញផ្នែករញ្ជួយដីបញ្ជាក់ថា គ្រោះរញ្ជួយដីពេលនេះខ្លាំងក្លាបំផុតដែលគេធ្លាប់កត់ត្រាទុកនៅប្រទេសតួកគី ចំណែកអ្នកនៅមានជីវិតនិយាយថា កម្លាំងញ័រមានរយៈពេល២នាទី ។ លើសពីនេះ កម្លាំងញ័របានធ្វើឱ្យប្រាសាទបុរាណដែលមានអាយុកាលជាង២.០០០ឆ្នាំ ដែលជាទីកន្លែងសំខាន់របស់ក្រុងហ្គាហ្សីនថេប បានដួលរលំធ្លាក់មក ហើយលំនៅឋានពលរដ្ឋ និងអគារនានាជាង៥.៦០០កន្លែងទៀតក៏ដួលរលំផងដែរ ។

ចំណែករញ្ជួយដីលើកទី២ កើតឡើងរយៈពេល១២ម៉ោងក្រោយទៀតនៅតំបន់ Elbistan ខេត្ត Kahramanmaras នៅក្បែរក្រុងហ្គាហ្សីនថេប ។ ទោះយ៉ាងណា ការិយាល័យគ្រប់គ្រងគ្រោះមហន្តរាយ និងស្ថានការណ៍បន្ទាន់របស់ប្រទេសតួកគីបញ្ជាក់ថា គ្រោះរញ្ជួយដីនេះមានកម្លាំងញ័រទៅដល់ប្រទេសលីបង់ អ៊ីស្រាអែល និងស៊ីប្រាស ៕

ប្រភព ៖ pptvhd36

បុរីញូវយ៉ក៖ ស្របពេលការវាយប្រយុទ្ធគ្នា កាន់តែខ្លាំងឡើង រវាងកងទ័ពការពារទឹកដីរបស់អ៊ុយក្រែន និង កម្លាំងទាហានរុស្ស៊ី នោះ ប្រមុខអង្គការសហប្រជាជាតិ មានសម្ដែងនូវការព្រួយបារម្ភយ៉ាងខ្លាំង ដោយសារតែមានការរំពឹងទុក អំពីការកើនឡើង នៃជម្លោះ និង ការបង្ហូរឈាមបន្ថែមទៀត នៅក្នុងសង្គ្រាមរបស់ក្រុងមូស្កូ ដែលកំពុងតែបន្ត។

សារព័ត៌មាន Aljazeera បានចេញផ្សាយ កាលពីថ្ងៃចន្ទ ទី៦ ខែកុម្ភៈ ថា លោក អង់តូនីញ៉ូ ហ្គូទែររ៉េស (General Antonio Guterres) អគ្គលេខាធិការ អង្គការសហប្រជាជាតិ (UN) បានព្រមានទៅដល់ពិភពលោក ថា សង្គ្រាមអាចនឹងរីករាលដាល កាន់តែធំឡើង ដោយសារហានិភ័យ នៃជម្លោះ រវាងរុស្ស៊ី និង អ៊ុយក្រែន កំពុងតែមានសភាពខ្លាំងក្លាឡើង។

នៅក្នុងសុន្ទរកថា ថ្លែងទៅកាន់មហាសន្និបាត អង្គការសហប្រជាជាតិ ដែលមានសមាជិក ចំនួន១៩៣ប្រទេស កាលពីថ្ងៃចន្ទ ដោយបង្ហាញពីអាទិភាព សម្រាប់ឆ្នាំ២០២៣នោះ លោក Guterres បានរិះគន់ដល់ការឈ្លានពានរបស់រុស្ស៊ី ទៅលើប្រទេសអ៊ុយក្រែន ដោយនិយាយថា សង្រ្គាមបាននាំមកនូវការឈឺចាប់ ដែលមិនអាចនិយាយបាន ដល់ប្រជាជនអ៊ុយក្រែន ជាមួយនឹងផលប៉ះពាល់ ជាសកលយ៉ាងជ្រាលជ្រៅបំផុត។

ប្រមុខអង្គការសហប្រជាជាតិ បានបញ្ជាក់ ថា «ការរំពឹងទុកទៅលើសន្ដិភាព កំពុងតែថយចុះ ខណៈឱកាសបង្កើនជម្លោះ និង ការបង្ហូរឈាម កំពុងតែកើនឡើង។ ខ្ញុំបារម្ភ ថា ពិភពលោកមិនអាចដេកលក់ នៅក្នុងសង្រ្គាមកាន់តែធំ។ ខ្ញុំខ្លាច ថា វាកំពុងតែបើកភ្នែករបស់ធំៗឡើង»។

ជម្លោះ អស់រយៈពេលជិតមួយឆ្នាំមកនេះ បាននិងកំពុងតែ បង្កឲ្យមានភាពតានតឹងខ្លាំងឡើង ហើយកាលពីប៉ុន្មានសប្តាហ៍កន្លងទៅថ្មីៗនេះ មានការវាយប្រយុទ្ធគ្នាយ៉ាងខ្លាំង រវាងកងកម្លាំងអ៊ុយក្រែន និង រុស្ស៊ី ដើម្បីគ្រប់គ្រងទីប្រជុំជន នៅភាគខាងកើត ប្រទេសអ៊ុយក្រែន។

លោក ប៉ាវឡូ គីរីឡែនកូ (Pavlo Kyrylenko) អភិបាលខេត្តដូណែតស្ក៍ (Donetsk) បានថ្លែង កាលពីថ្ងៃចន្ទ ថា «សមរភូមិ នៅតំបន់ភាគខាងកើត ប្រទេសអ៊ុយក្រែន កំពុងតែឡើងកម្ដៅខ្លាំង ដោយការវាយប្រយុទ្ធគ្នាជាមួយនឹងកងកម្លាំងរុស្ស៊ី ខណៈក្រុងមូស្គូ បានបោះកម្លាំងទើបនឹងកេណ្ឌថ្មី មកចូលនៅក្នុងសមរភូមិ ហើយលុបបំបាត់ទីក្រុង និងភូមិរបស់យើង»។

រុស្ស៊ី បានចូលឈ្លានពាន ទៅលើប្រទេសអ៊ុយក្រែន កាលពីថ្ងៃទី ២៤ ខែកុម្ភៈ ឆ្នាំ២០២២ ក្រោយពេលក្រុងមូស្គូ បានប្រមូលផ្ដុំកងទ័ព នៅជិតព្រំដែនអ៊ុយក្រែន ខណៈលោក វ៉្លាឌីមៀ ពូទីន បានទាមទារឲ្យបញ្ចប់នូវការពង្រីកខ្លួនរបស់អង្គការណាតូ មកកាន់ទឹកដីរបស់អតីតសហភាពសូវៀត។ យុទ្ធនាការយោធារបស់ក្រុងមូស្គូ បានរងនូវបរាជ័យជាច្រើនលើក ខណៈមហាអំណាចលោកខាងលិច បានផ្តល់ជំនួយផ្នែកហិរញ្ញវត្ថុ និង យោធា ជួយដល់ក្រុងកៀវ។

ដោយឡែក ក្រុមមន្រ្ដីរុស្ស៊ី បានលើកឡើង ថា ការបញ្ជូនគ្រឿងសព្វាវុធ ទៅកាន់ប្រទេសអ៊ុយក្រែន កំពុងតែពន្យារពេល និង ធ្វើឲ្យជម្លោះនេះ កាន់តែផ្ទុះខ្លាំងឡើង។ ចំណែកសហរដ្ឋអាមេរិក និង សម្ពន្ធមិត្ត បានបញ្ជាក់ ថា ពួកគេ មិនចង់ឲ្យមានការប្រឈមមុខ ដោយផ្ទាល់ជាមួយនឹងរុស្ស៊ី នៅលើទឹកដីរបស់អ៊ុយក្រែន។ ប៉ុន្ដែលោក ចូ បៃដិន ប្រធានាធិបតីសហរដ្ឋអាមេរិក បានព្រមានម្ដងហើយម្ដងទៀត ដល់ក្រុងមូស្គូ ប្រឆាំងនឹងការពង្រីកជម្លោះ ដោយប្ដេជ្ញា ថា មិនឲ្យរុស្ស៊ី ប៉ះលើទឹកដីរបស់អង្គការណាតូ សូម្បីតែមួយមិល្លីម៉ែត្រ៕