«How about now?» ជាបទចម្រៀងល្បីមួយរបស់តារាចម្រៀង ជី ដេវីត ជាពិសេសបទនេះកាន់តែទទួលបានការគាំទ្រខ្លាំងពីសំណាក់មហាជនក្រោយពីមានក្រុមចម្រៀងអកកាដង់ បានយកទៅច្រៀងCover រហូត បទ «How about now?» ដណ្តើមពាននៅក្នុងកម្មវិធី PMA នាពេលកន្លងមក។

ទោះយ៉ាងណា មហាជនអ្នកលេងបណ្តាញសង្គម ផ្ទុះការរិះគន់ព្រាតទៅលើក្រុមអកកាដង់ ហាក់ខឹងជំនួស លោកជី ដេវីត ព្រោះតែអ្នក COVER ទាមទារសិទ្ធិឱ្យម្ចាស់ដើមផ្តល់ក្រេដីតឱ្យខ្លួន។

ដើមច្បមដំបូងនៃរឿងនេះ គឺកើតឡើងក្រោយពេលមានគណនីហ្វេកប៊ុកមួយឈ្មោះថា «Thik TK» ដែលត្រូវគេស្គាល់ថាម្ចាស់ក្រុមតន្ត្រី «សុទ្ធិ តន្រ្តីសម័យស្រុកសំឡូត» បានចែករំលែកព័ត៌មានមួយដោយភ្ជាប់ជាមួយចំណងជើងថា «ល្បីដែរ តែបងវីតមិនហៅសោះ បានត្រឹមអរគុណ! មានតែធ្វើបទខ្លួនឯងហើយមើលទៅ…»។ បន្ថែមពីលើនេះ គឺការឆ្លើយតបខំមិនមួយចំនួនហាក់អន់ចិត្តនិងម្ចាស់ដើម។

គួររម្លឹកថា លោក ជី ដេវីត បាននិយាយក្តែងៗនៅក្នុងកម្មវិធីប្រគល់ពានរង្វាន់កន្លងទៅនេះថា បទ «How about now?» របស់ខ្លួនទទួលបានពានក៏ជាការរួមចំណែកពីក្រុមអកកាដង់ខាងលើនេះដូចគ្នា ទើបធ្វើឱ្យបទចម្រៀងមួយបទនេះកាន់តែមានប្រជាប្រិយភាព។ ក្នុងនោះតារាចម្រៀងរូបនេះបាននិយាយលើកទឹកចិត្តឱ្យយកបទលោក Cover ជា version អកកេសឱ្យបានច្រើន បើសិនមានបញ្ហា Copy right លោកនឹងឱ្យក្រុមការងារលោកជួយសម្រួល។

អ្នកលេងបណ្តាញបានរិះគន់ទៅលើក្រុមអកកាដង់ខាងលើនេះថា ម្ចាស់ដើមខ្លះមានតែខឹងពេលយកបទគេ Cover ហើយល្បីព្រមទាំងឱ្យលុបចេញទៀត តែនេះ ជី ដេវីត បានអរគុណនៅមុខមហាជនហើយ បែរជាអ្នក Cover រូបនេះទាមទារឱ្យម្ចាស់ដើមផ្តល់ក្រេដីតឱ្យខ្លួនទៀត។ អ្នកខ្លះទៀតក៏បានលើកឡើងថា បុគ្គលដែលមានហ្វេកប៊ុកឈ្មោះ Thik TK នេះពិតជាមនុស្សមានអំណួតណាស់ បើសិនជាមិនច្រៀង Cover បទ «How about now?»របស់ ជី ដេវីត ទេ គេមិនស្គាល់ក្រុមរបស់លោកឡើយ។

គួរបញ្ជាក់ថា បទ «How about now?» អកកាដង់បកស្រាយឡើងវិញដោយ កញ្ញា សុខុម រចនា គិតត្រឹមថ្ងៃទី៣០ ខែមីនា មានអ្នកចូលទស្សនា ២៩លានដងនៅលើឆាណែលយូធូប ក្នុងរយៈពេលជាង៥ខែ ខណៈបទម្ចាស់ដើមរបស់លោក មានអ្នកចូលទស្សនា ជិត៧លានដងរយៈពេលជាង៨ខែ៕

@369sorng

#ម្ចាស់ដើមសុំទោសផងភ្លេចឲពាន???? #SORNG

♬ សំឡេងដើម – Ching sorng♥️???? – Ching sorng♥️????

កាលពីល្ងាចថ្ងៃទី២៩ ខែមីនា ឆ្នាំ២០២៣ មានហេតុការណ៍ដ៏សែនរន្ធត់មួយ ដោយសារភ្លៀងធ្លាក់ខ្លាំងលាយឡំ ខ្យល់កន្រ្តាក់ បណ្តាលឱ្យមនុស្សម្នាក់បាត់បង់ជីវិត និងរបួសធ្ងន់ម្នាក់ និងប៉ើងបាក់វេទិកា គ្រឿងតុបតែងលម្អខូចខាតខ្ទេចគ្មានសល់។ ឧបទ្ទវហេតុខាងលើនេះបានកើតឡើងពីរទីតាំងផ្សេងគ្នានៅខេត្តសៀមរាប ដែលបន្សល់នូវការសោកស្តាយជាខ្លាំង។

បាតុភូមិគ្រោះធម្មជាតិបានឆក់យកជីវិតបុរសម្នាក់ឈ្មោះ ផេង ចន្ធូ អាយុ៤៤ឆ្នាំ និងបុរសម្នាក់ទៀតរងរបួសធ្ងន់ ដោយសារបង្គោលពាណិជ្ជកម្មដ៏ធំដួលរលំសង្កត់កិន។ ហេតុការណ៍នេះបានកើតឡើងនៅខាងកើតផ្សារលើធំថ្មី ត្រង់ចំណុចភ្លើងស្តុប ស្មាយលីង ភូមិចុងកៅស៊ូ សង្កាត់ស្លក្រាម ក្រុងសៀមរាប។

ទីតាំងទី២ ដែលបង្កដោយគ្រោះធម្មជាតិគឺបានកើតឡើងនៅតាំងលើស្ពានថ្ម ព្រះរាជដំណាក់មាត់ស្ទឹងសៀមរាប ក្នុងភូមិមណ្ឌលមួយ សង្កាត់ស្វាយបង្គំ ក្រុងសៀមរាប ដែលបណ្តាលឱ្យគ្រឿងតែងលម្អទៅដោយផ្កាភ្ញីភ្លើងចម្រុះពណ៌ត្រូវខូចខាត និងប៉ើងបាក់វេទិកាទិវាវប្បធម៌ដែលគ្រោងធ្វើនៅថ្ងៃទី៣១ ខាងមុខនេះ។

ហេតុការណ៍ដ៏សែនតក់ស្លុតនេះ មហាជនបង្ហាញនូវអារម្មណ៍សោកស្តាយជាពន់ពេក ក្នុងនោះឯកឧត្តម ហ៊ុន ម៉ានី និងលោកជំទាវ ភឿង សកុណា ក៏បានបង្ហោះសារចូលរួមរំលែកទុក្ខគ្រួសារនៃសព ដែលបានបាត់បង់ជីវិតដោយសារគ្រោះធម្មជាតិ និងសោកស្តាយបំផុតចំពោះការខូចខាតនានា៕

ក្រុម​បាល់ទះ​ជម្រើស​ជាតិ​បុរសកម្ពុជា ធ្លាប់បានសាងប្រវត្តិសាស្ត្រ ដ៏ត្រជះត្រចង់ឱ្យកម្ពុជា ដោយបាន​គ្រង​មេដាយ​មាស​ក្នុង​ព្រឹត្តិការណ៍​កីឡាឧបទ្វីបអាស៊ីអាគ្នេយ៍ (បច្ចុប្បន្នប្តូរឈ្មោះថាស៊ីហ្គេម) ឆ្នាំ១៩៦៥ ដែលប្រទេសម៉ាឡេស៊ី ធ្វើជាម្ចាស់ផ្ទះ គ្រានោះកម្ពុជា បានយកឈ្នះថៃ៣​សិត​ទល់​០ ​នៅវគ្គផ្តាច់ព្រ័ត្រ។

ចាប់តាំងពីពេលនោះក្រុមបាល់ទះកម្ពុជាមិនដែលស្គាល់រសជាតិមេដាយអ្វីនោះទេ លុះដល់ឆ្នាំ ២០២២ ព្រឹត្តិការណ៍កីឡាស៊ីហ្គេម លើកទី៣១ ដែលប្រទេសវៀតណាមធ្វើជាម្ចាស់ផ្ទះ ក្រុមបាល់ទះកម្ពុជា ​ក៏បានដណ្ដើម​បានចំណាត់ថ្នាក់​លេខ​៣ ជាមួយនឹងមេដាយសំរិទ្ធ​ ក្រោយយកឈ្នះ​ថៃ​ម្តងទៀត ក្នុង​លទ្ធផល​៣​សិត​ទល់​២។

រីឯនៅឆ្នាំនេះ ដែលកម្ពុជាធ្វើជាម្ចាស់ផ្ទះសុីហ្គេមលើកទី៣២ វិញ្ញាសារបាល់ទះបុរសកម្ពុជា មានសង្ឃឹមខ្ពស់ថានឹងដណ្តើមមេដាយជូនជាតិឱ្យបាននៅលើទឹកដីខ្លួន៕

ប្រធានគ្រឹះស្ថានផលិតឱសថ គ្រឹះស្ថានផលិតវត្ថុធាតុដើម គ្រឹះស្ថានអាហរ័ណ នីហរ័ណឱសថ គ្រឹះស្ថានអាហរ័ណ នីហរ័ណផលិតផលគ្រឿងសម្អាង ក្រសួងសុខាភិបាលស្នើឱ្យ ការនាំចូល នាំចេញឱសថ ឧបករណ៍បរិក្ខារពេទ្យ និងផលិតផលសុខាភិបាលផ្សេងទៀតតាមអនឡាញ ប្រព័ន្ធបញ្ជរតែមួយជាតិ (National Single Window) ។ នេះបើតាមសេចក្តីប្រកាសរបស់ក្រសួងសុខាភិបាលនៅថ្ងៃទី២៩ ខែមីនា។

ក្រសួងសុខាភិបាលជំរុញឱ្យមានការស្នើសុំខាងលើ នោះអ្នកនាំចូល-ចេញ ឱសថ ឧបករណ៍បរិក្ខារពេទ្យ និងផលិតផលសុខាភិបាល បើប្រើប្រាស់តាមអនឡាញប្រព័ន្ធបញ្ជរតែមួយជាតិមានអត្ថប្រយោជន៍ចំនួន៥៖

-ធានាបាននូវតម្លាភាព និងប្រសិទ្ធភាពក្នុងការស្នើសុំនាំចូល នាំចេញ
-បង្កលក្ខណៈងាយស្រួល និងឆាប់រហ័សក្នុងការផ្តល់សេវា
-ផ្តល់ព័ត៌មានត្រឡប់ដល់អ្នកស្នើសុំបានឆាប់រហ័ស និងទាន់ពេលវេលា
-កាត់បន្ថយការចំណាយទាំងថវិកា និងពេលវេលា
-រក្សាការសំងាត់ និងឯកសារមានសុវត្ថិភាពខ្ពស់

បន្ថែមពីលើនេះ ដើម្បីពង្រឹង និងបង្កើនប្រសិទ្ធភាពក្នុងការនាំចូល នាំចេញ ឱសថ ប្រតិករ ឧបករណ៍បរិក្ខារពេទ្យ គ្រឿងសម្អាង ផលិតផលបំប៉នសុខភាព វត្ថុធាតុដើម វត្ថុធាតុផ្សំ សម្ភារវេចខ្ចប់ និង ផលិតផលសុខាភិបាលផ្សេងទៀតឱ្យកាន់តែល្អប្រសើរ ក្រសួងសុខាភិបាលស្នើឱ្យអ្នកមិនទាន់បានធ្វើការស្នើសុំនាំចូល នាំចេញតាមប្រព័ន្ធបញ្ជរតែមួយជាតិ ត្រូវ អនុវត្តចាប់ពីថ្ងៃជូនដំណឹងនេះ៕

ចាប់ពីថ្ងៃទី១-៣០ មេសា ឆ្នាំ២០២៣ កម្ពុជានឹងធ្វើជំរឿនកសិកម្ម តាមការប្រកាសរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។ ហើយនេះក៏ជាការជំរឿនកសិកម្មលើកទី២ផងដែរសម្រាប់ប្រទេសកម្ពុជា ខណៈប្រទេសជាច្រើនលើពិភពលោក ក្នុងនោះប្រទេសដែលមានសុខសន្តិភាព នយោបាយ សុទ្ធតែមានការជំរឿនកសិកម្ម។ បន្ថែមពីនេះ សម្តេច បានអំពាវនាវឱ្យម្ចាស់សហគ្រាស កសិដ្ឋាន កសិកម្ម ផ្តល់ព័ត៌មានពិត ស្មោះត្រង់ ដល់មន្រ្តីជំរឿនកសិកម្ម ដើម្បីទទួលបានស្ថិតិល្អ នឹងជួយជំរុញឱ្យប្រទេសមានការអភិវឌ្ឍន៍រីកចម្រើន។

ការធ្វើជំរឿនកសិកម្ម គឺធ្វើឡើងស្របតាមច្បាប់ ស្តីពី ស្ថិតិ ដែលបានកំណត់នូវកាតព្វកិច្ចរបស់ម្ចាស់អង្គភាពកសិកម្មទាំងអស់ មានជាអាទិ៍ សហគ្រាសកសិដ្ឋានកសិកម្ម និងគ្រួសារកាន់កាប់កសិកម្មនីមួយៗ។

ក្នុងសារអំពាវនាវរបស់នាយករដ្ឋមន្ត្រី ការធ្វើជំរឿនកសិកម្មមានគោលបំណងដើម្បីទទួលបាននូវព័ត៌មានសំខាន់ៗ ក្នុងវិស័យកសិកម្ម ស្តីពី ស្ថានភាពកសិកម្ម ដើម្បីធ្វើជាមូលដ្ឋានទិន្នន័យគ្រឹះ សម្រាប់រៀបចំគោលនយោបាយយុទ្ធសាស្ត្រផែនការ សកម្មភាព និងគម្រោងកម្មវិធីនានា ដើម្បីជំរុញកិច្ចអភិវឌ្ឍវិស័យកសិកម្ម សេដ្ឋកិច្ច សង្គមកិច្ច និងសុខុមាលភាពប្រជាជន។ ក្នុងនោះផងដែរ លទ្ធផលទ័ន្នន័យកសិកម្មនឹងត្រូវបានប្រើប្រាស់យ៉ាងទូលំទូលាយក្នុងវិស័យសាធារណៈ និងវិស័យឯកជន។

គួរបញ្ជាក់ថា កម្ពុជា បានធ្វើជំរឿនកសិកម្មលើកដំបូងនៅក្នុងឆ្នាំ២០១៣ លទ្ធផលជំរឿនកសិកម្ម លើកទី១ ត្រូវបានប្រកាសនៅថ្ងៃទី២០ ខែសីហា ឆ្នាំ២០១៤ បានរកឃើញថា ប្រជាពលរដ្ឋខ្មែរ ១គ្រួសារ កាន់កាប់ផ្ទៃដីកសិកម្ម ១,៦៤ហិកតា៕

មនុស្សភាគច្រើនមិនដឹងថា មិនគួរទុកវត្ថុទាំងនេះក្នុងរថយន្តទេ ព្រោះវានឹងធ្វើឱ្យរាំងស្ទះផ្នែកលុយកាក់ ឬបែកបាក់គ្រួសារ ។ ជំនឿដែលយើងបានអនុវត្តតៗគ្នា មិនថា ហុងស៊ុយក្នុងផ្ទះ និងជំនឿរបស់ចាស់ៗដែលបង្រៀនកូនចៅនោះ បើអនុវត្តហើយសប្បាយចិត្ត យើងអាចអនុវត្តបន្តទៀតបាន ។

ក្រៅពីរឿងហុងស៊ុយក្នុងផ្ទះ រឿងមួយទៀតក៏សំខាន់ដែរ គឺរថយន្ត ព្រោះវាជាយានជំនិះដែលយើងប្រើប្រាស់រាល់ថ្ងៃ ហើយអ្នកខ្លះនៅក្នុងរថយន្តច្រើនជាងផ្ទះទៀត ។ ចំណុចខាងក្រោមនេះសម្រាប់ជាការដាស់តឿនថា កុំទុកវត្ថុទាំងនេះក្នុងរថយន្តឱ្យសោះ ព្រោះវានឹងធ្វើឱ្យលាភសំណាង និងលុយកាក់របស់យើងរាំងស្ទះ ។

១-រូបថត ឬវត្ថុប្រើប្រាស់របស់អ្នកស្លាប់ ៖
មិនថារូបថតរបស់ជីដូនជីតា ឬវត្ថុអ្វីមួយដែលតំណាងឱ្យអ្នកស្លាប់ទៅហើយ យើងមិនគួរយកវត្ថុទាំងនេះមកទុកក្នុងរថយន្តទេ ព្រោះជាញឹកញាប់ នៅពេលចតរថយន្តនៅក្រោមកំដៅថ្ងៃក្តៅខ្លាំង ធ្វើឱ្យរថយន្ត និងវត្ថុរបស់អ្នកស្លាប់ត្រូវនៅក្រោមកំដៅថ្ងៃដូចគ្នា មានន័យថា វានឹងមិនធ្វើឱ្យជីវិតរបស់យើងមិនស្រស់ថ្លាឡើយ គឺជួបតែរឿងក្តៅក្រហាយគ្រប់ពេលវេលា ។ ដូច្នេះ គួរតែយករូបថត ឬវត្ថុទាំងនេះទៅទុកគោរពបូជានៅផ្ទះវិញប្រសើរជាង ព្រោះនៅផ្ទះមានម្លប់ត្រជាក់ និងជាការយកភាពក្តៅក្រហាយចេញពីខ្លួនយើងផងដែរ ។

២-វត្ថុប្រេះស្រាំ ឬបែកបាក់ ៖
មិនថាកញ្ចក់ កែវ ឬអ្វីក៏ដោយដែលវាបែកបាក់ហើយ មិនគួរយកវាមកទុកក្នុងរថយន្តទេ ។ វត្ថុណាអាចកែច្នៃយកទៅប្រើប្រាស់បាន យើងទុកវាប្រើប្រាស់ ហើយវត្ថុណាជួសជុលមិនបានទេ បោះវាចោលទៅ ព្រោះការទុកវត្ថុបែកក្នុងរថយន្តនឹងធ្វើឱ្យក្រុមគ្រួសាររបស់យើងបែកបាក់ ហើយនាំយកតែសំណាងអាក្រក់មកឱ្យយើង ។ ដូចគ្នានេះ យើងក៏មិនត្រូវទុកវត្ថុបែកបាក់ក្នុងផ្ទះទេ នេះបើតាមក្បួនហុងស៊ុយ គឺហាមដាច់ខាត ។

៣-នាឡិកាងាប់ ៖
មិនថានាឡិកានោះងាប់ ឬអស់ថ្ម ក៏មិនគួរទុកវាក្នុងរថយន្ត និងផ្ទះដូចគ្នា ។ បើនាឡិកាខូច យើងអាចយកវាទៅជួសជុល ហើយបើជួសជុលមិនបានទេ បោះវាចោលទៅ ។ ចំណែកនាឡិកាណាអស់ថ្ម ត្រូវយកវាទៅដាក់ថ្មដើម្បីឱ្យដំណើរការធម្មតាវិញ ព្រោះគេជឿថា បើនៅតែទុកនាឡិកាងាប់ ឬនាឡិកាអស់ថ្មក្នុងរថយន្តនោះ នឹងធ្វើឱ្យយើងព្រាត់ប្រាស់គ្រួសារនៅថ្ងៃខាងមុខ ។ ដូច្នេះ ត្រូវតែយកនាឡិកាទាំងនេះចេញពីរថយន្ត កុំឱ្យសល់សូម្បីតែ១គ្រឿង ។

៤-ផ្កា ឬកម្រងផ្កាក្រៀមស្វិត ៖
ស្ទើរតែគ្រប់រថយន្តទាំងអស់ ភាគច្រើននឹងមានការគោរពបូជា ដូចជា ការព្យួរកម្រងផ្កានៅបរិវេណមុខកញ្ចក់ក្នុងរថយន្ត បើយើងចង់គោរពបូជាក្នុងរថយន្តនោះ គឺត្រូវយកផ្កាស្រស់ៗ និងថ្មីជានិច្ច ។ ប៉ុន្តែបើបណ្តោយឱ្យផ្កាក្រៀមស្វិត វានឹងធ្វើឱ្យយើងជួបរឿងមិនល្អ និងមានគ្រោះថ្នាក់បាន ហើយបើគ្មានផ្កាស្រស់មកព្យួរក្នុងរថយន្តទេ យើងអាចយកផ្កាក្រៀមនោះបោះចោលសិនក៏បានដែរ ។

យើងអាចពិនិត្យមើលក្នុងរថយន្តថា តើមានវត្ថុទាំងនេះនៅក្នុងរថយន្តឬអត់ ? បើមាន ត្រូវចាត់ការជាមួយវាឱ្យបានរៀបរយ មិនថាយកវាទៅបោះចោល ជួសជុល ឬទុកដាក់វានៅកន្លែងណាមួយដើម្បីសុវត្ថិភាព និងនាំមកនូវលាភសំណាងដល់យើង ៕ ប្រភព ៖ postsod