ប្រទេសជប៉ុន ៖ រដ្ឋាភិបាលជប៉ុនបានប្រកាសត្រៀមបង្កើតវិធីសាស្ត្រថ្មី និងងាយស្រួលជាងមុនក្នុងការផ្តល់ទិដ្ឋាការ (visa) ពិសេសសម្រាប់អ្នកមានប្រាក់ចំណូលខ្ពស់ និងនិស្សិតបញ្ចប់ការសិក្សាពីមហាវិទ្យាល័យលំដាប់ខ្ពស់នៅក្រៅប្រទេស ស្របពេលមានការប្រកួតប្រជែងអ្នកមកជំនាញពីក្រៅប្រទេសមកធ្វើការនៅជប៉ុន ។

គោលការណ៍ថ្មីនេះនឹងគ្របដណ្តប់លើអ្នកស្រាវជ្រាវ និងវិស្វករអន្តរជាតិដែលមានប្រាក់ចំណូលយ៉ាងតិច២០លានយេនក្នុង១ឆ្នាំ រួមទាំងនិស្សិតបានបញ្ចប់ការសិក្សាថ្នាក់អនុបណ្ឌិត ឬមានបទពិសោធន៍ធ្វើការរយៈពេល១០ឆ្នាំ ។ ជប៉ុននឹងចាប់ផ្តើមអនុវត្តគោលការណ៍នេះចាប់ពីខែមេសា ឆ្នាំ២០២៣ តទៅ ។

បច្ចុប្បន្ន រដ្ឋាភិបាលជប៉ុនបានអនុម័តផ្តល់ទិដ្ឋាការពិសេសរយៈពេល៥ឆ្នាំតាមរយៈប្រព័ន្ធផ្តល់ពិន្ទុ ដោយពិន្ទុនឹងផ្តល់ឱ្យផ្អែកតាមលក្ខណៈវិនិច្ឆ័យផ្សេងៗ រួមទាំងប្រវត្តិការសិក្សា ការធ្វើការ និងប្រាក់ចំណូលក្នុង១ឆ្នាំ ប៉ុន្តែគេមើលឃើញថា ប្រព័ន្ធផ្តល់ពិន្ទុនេះស្មុគស្មាញពេក ស្របពេលពិភពលោកកំពុងប្រកួតប្រជែងគ្នាទាក់ទាញអ្នកមានជំនាញមកធ្វើការ ។ ក្រៅពីនេះ រដ្ឋាភិបាលជប៉ុនបានសម្រេចចិត្តបង្កលក្ខណៈងាយស្រួលដល់យុវជនដែលមានសក្តានុពលខ្លាំងអាចស្វែងរកការងារធ្វើនៅប្រទេសជប៉ុនដោយងាយផងដែរ ។

និស្សិតបរទេសដែលបានបញ្ចប់ការសិក្សាពីមហាវិទ្យាល័យកំពូលដំបូងចំនួន១០០ ដែលរៀបចំឡើងដោយការិយាល័យជនអន្តោប្រវេសន៍របស់ជប៉ុន ក្នុងរយៈពេល៥ឆ្នាំកន្លងមក នៅពេលពួកគេធ្វើដំណើរមកដល់ប្រទេសជប៉ុន ពួកគេនឹងទទួលបានទិដ្ឋាការ Designated Activities ដែលអាចរស់នៅប្រទេសជប៉ុនរយៈពេល២ឆ្នាំ ដើម្បីស្វែងរកការងារធ្វើ ។

នាយកខុទ្ទកាល័យ Hirokazu Matsuno បានថ្លែងថា ប្រព័ន្ធថ្មីនេះ គឺជាការពង្រីកសិទ្ធិពិសេសដែលអំណោយផលដល់អ្នកមានជំនាញខ្ពស់ពីបរទេសអាចមកធ្វើការ និងរស់នៅប្រទេសជប៉ុន ៕

ប្រភព ៖ The better

កាហ្វេជាភេសជ្ជៈដែលពេញនិយមសម្រាប់មនុស្សទូទៅ ព្រោះពេល ផឹកហើយមានស្មារតីផលិតការងារបានកាន់តែល្អ។ យ៉ាងណាក្តី ផឹកកាហ្វេច្រើនអាចបណ្តាលឲ្យគេងមិនលក់ញ័រដៃឬបញ្ហាផ្សេងៗ។ ហេតុនេះបើអ្នកមិនចង់ផឹកកាហ្វេទេអាចផឹកភេសជ្ជៈ ទាំងនេះជំនួសបាន។

១.តែ
តែបៃតង តែអ៊ូឡុងឬ ប្រភេទ MilkTea … មានប្រសីទ្ធភាពជួយឲ្យស្មារតីស្រស់ស្រាយ អាចជំនួសកាហ្វេបាន។ ក្រៅពីនេះ ផឹកតែក៏ជួយឲ្យអ្នកមានសុខភាពល្អល្អប្រសើរផងដែរ។ ប្រសិនបើអ្នកចង់បំបាត់ទម្លាប់ផឹកកាហ្វេហើយចង់ទទួលបានស្មារតីស្វាងចេសអាចជ្រើសរើសយកការផឹកតែបាន។

២.កាកាវ
វាក៏ផ្ទុកជាតិកាហ្វេអ៊ីនដែរតែមិនច្រើនដូចកាហ្វេឡើយ។ សម្រាប់អ្នកមិនចង់ផឹកកាហ្វេចាស់អាចងាកមកសាកល្បងកាកាវបានព្រោះវាមានរសជាតិស្រាលផ្អែមសក្តិសមនឹងឲ្យអ្នកចូលចិត្តមិនខាន។ មើលមួយភ្លែតអាចច្រលំថាកាហ្វេតែបើនិយាយពីរសជាតិ វិញគឺឆ្ងាញ់មិនចាញ់កាហ្វេឡើយ។៣.សូដាលាយជាមួយទឹកផ្លែឈើ
ភេសជ្ជៈជួយឲ្យស្រស់ស្រាយបានលឿនបំផុតត្រូវបាននិយមតៗគ្នានោះគឺសូដា។ តែផឹកសូដាតែមួយមុខ
មិនធ្វើឲ្យទទួលបានរសជាតិឆ្ងាញ់ពិសារទេដូច្នេះហើយភាគច្រើនគេលាយជាមួយទឹកផ្លែឈើ។ លើសពីនេះអ្នកប្រាកដជាភ្ញាក់ផ្អើលមិនខានថាក្នុងសូដាក៏ផ្ទុកនូវកាហ្វេអ៊ីនផងដែរនិងគ្មា បរិមាណស្ករថែមទៀត។  ដូច្នេះអ្នកអាចផឹកបានយ៉ាងរីករាយជាមួយប្រភេទភេសជ្ជៈនេះ ។៤.ទឹកក្រូចឆ្មាត្រជាក់
ជាប្រភេទភេសជ្ជៈដែលមិនចាំបាច់ឲ្យអ្នកបារម្ភរឿងកាឡូរី។ ទឹកក្រូចឆ្មាជាមួយទឹកកកត្រជាក់ៗពិតជាផ្តល់នូវអារម្មណ៍ស្រស់ស្រាយនិងក្លិនប្រហើរពីក្រូចឆ្មាជួយសា្មរតីឲ្យបំពេញការងារបានយ៉ាងល្អ ។ ក្រៅពីនេះបើអ្នកកំពុងឈឺកឬមានអារម្មណ៍មិនសូវល្អគ្រាន់តែផឹកទឹកក្រូចឆ្មាមួយកែវច្បាស់ជាស្វារតីភ្លឺស្វាងមិនខាន៕

ស្លឹកឈូក គឺជារុក្ខជាតិម្យ៉ាងដែលនៅក្នុងទឹកបឹង ភាគច្រើននៃប្រជាជនកម្ពុជា ប្រើប្រាស់វាសម្រាប់ខ្ចប់ ឬវិច ឥវ៉ាន់ និងរុក្ខជាតិផ្សេងៗទៀត។

មិនទែប៉ុណ្ណោះ ដោយសារតែ​​ស្លឹក​ឈូប មិន​ជ្រាប​ទឹក​ ​អ្នក​ខ្លះអាច​ប្រើ​វា​សម្រាប់​ដាក់​ទឹក​ផឹកថែមទៀតផងដែរ។ ចុះមានដែលឆ្ងល់អត់ ​ហេតុអ្វី​បាន​ជា​វា​មិន​ជ្រាប​ទឹក​?

ស្លឹកឈូមមិនជ្រាបទឹក ដោយ​សារតែ​ស្រទាប់​ខាង​ក្រៅ​របស់វា មាន​បណ្ដុំ​កោសិកា​ដែល​មាន​ផ្ទុក​ដោយ​សារធាតុ​សែលុយឡូស។ សារធាតុនេះ មាន​ក្នុង​កោសិកា​នីមួយៗ​រួម​បញ្ចូល​គ្នា​ក្នុង​ទម្រង់​នៃ Kyulin (យូលីន)។  ស្រទាប់​នេះ​មាន​ជាតិ​អាស៊ីដ អាល់កុល និង​អាតូម​កាបូន​។

ពួក​វា​មិន​រលាយ​ក្នុង​ទឹក​នោះ​ទេ ដូច្នេះ​គ្មាន​ប្រតិកម្ម​គីមី​ដែល​កើត​ឡើង​លើ​ស្លឹក​ឈូក​ទេ​ ព្រោះ​​ស្រទាប់ Kyulin ​នឹង​ការពារ​ស្លឹក​ឈូក ​ពេល​អ្នក​បន្តក់​ទឹក​ចូល វា​នឹង​ទៅ​ជា​គ្រាប់ៗ​ទឹក រេ​ចុះ​ឡើង​លើ​ស្លឹក​ឈូក៕

ប្រភព: Scientific American 

ប្រទេសថៃ ៖ កាលពីថ្ងៃទី១៨ ខែកុម្ភៈ កន្លងមក លោក Smith Srison វេជ្ជបណ្ឌិតនៅមន្ទីរពេទ្យរ៉ាម៉ាធិបតី ប្រទេសថៃ បានបង្ហោះសារនៅលើហ្វេសប៊ុកផេក Smith Fa Srisont ពីករណីរកឃើញក្មេងពុលដោយសារការហូបចាហួយផ្សំពីកញ្ឆា ។ លោកបញ្ជាក់ថា គេបានរកឃើញផលប៉ះពាល់ដោយសារកញ្ឆា គឺមានអ្នកជំងឺវ័យក្មេងម្នាក់បានហូបចាហួយធ្វើពីកញ្ឆា ហើយមានអាការៈញ័រដើមទ្រូងធ្ងន់ធ្ងរ រហូតធ្វើឱ្យបេះដូងលោតញាប់ខុសធម្មតា និងត្រូវបានបញ្ជូនទៅព្យាបាលនៅមន្ទីរពេទ្យ ហើយអ្នកជំងឺប្រាប់ថា បានទិញចាហួយនេះពីហាងមួយនៅជិតសាលារៀន ដោយគិតថា ជានំធម្មតា ។

លោកវេជ្ជបណ្ឌិតបញ្ជាក់ថា ផលប៉ះពាល់ដោយសារកញ្ឆា មិនមែនមានតែចាហួយតែមួយមុខទេ យោងតាមគ្រូពេទ្យធ្វើការនៅបន្ទប់សង្គ្រោះបន្ទាន់ ឬពេទ្យវិកលចរិតនានាបញ្ជាក់ថា បានជួបករណីនេះជាច្រើននាពេលកន្លងមក ។

លោក Smith Srison បន្តថា បើរដ្ឋាភិបាលថៃ និងមន្ត្រីពាក់ព័ន្ធនឹងច្បាប់កញ្ឆាមិនចេញច្បាប់គ្រប់គ្រងការប្រើប្រាស់កញ្ឆាឱ្យបានច្រើនជាងនេះទេ ហេតុការណ៍អាក្រក់ផ្សេងទៀតនឹងកើតឡើងចំពោះពលរដ្ឋគ្រប់រូប ហើយនៅថ្ងៃមុខ នឹងមានក្មេងៗហូបនំកញ្ឆា ហើយប៉ះពាល់សុខភាពរហូតដល់ស្លាប់ទៀតផង ។ លើសពីនេះ នឹងមានអ្នកស្រវឹងកញ្ឆាហើយបើកបររថយន្តទៅបុកពលរដ្ឋរហូតដល់ស្លាប់ ក៏ដូចជាជួបអ្នកមានបញ្ហាផ្លូវចិត្តដោយសារពួកគេប្រើប្រាស់កញ្ឆា ហើយធ្វើបាបមនុស្សក្នុងក្រុមគ្រួសារ ។ លោកថ្លែងថា ៖ «បច្ចុប្បន្ន នៅប្រទេសថៃ គេបានពិនិត្យឃើញកញ្ឆាក្នុងទឹកនោមរបស់មនុស្សអាក្រក់ដើរធ្វើបាបអ្នកដទៃ ។ ខ្ញុំសូមសំណូមពរទៅបុគ្គលគ្រប់រូបដែលពាក់ព័ន្ធនឹងច្បាប់កញ្ឆានាំគ្នាពិចារណា និងដាស់តឿនសតិថា ត្រូវគ្រប់គ្រងការអនុវត្បច្បាប់ឱ្យបានច្រើនជាងនេះ យ៉ាងតិចណាស់ ក៏ស្មើប្រទេសផ្សេងដែរ» ។

លោក Smith Srison បន្ថែមថា ៖ «មនុស្សមួយចំនួនសួរថា ហេតុអ្វីមិនប្តឹងប៉ូលិសថា មានហាងលក់កញ្ឆា ? ខ្ញុំសូមឆ្លើយថា យើងមិនអាចប្តឹងប៉ូលិសបានទេ គឺត្រូវបង្ក្រាបតាមរយៈរដ្ឋបាលចំណីអាហារ និងឱសថ ឬនាយកដ្ឋានសុខាភិបាល ឬនាយកដ្ឋានឱសថបុរាណថៃ ព្រោះគេចាត់ទុកថា កញ្ឆាមិនមែនជាថ្នាំញៀនទេ វាជាអាហារ ឬគ្រឿងផ្សំពីធម្មជាតិ» ៕ ប្រភព ៖ thestandard

រដ្ឋធានីសេអ៊ូល៖ ក្រោយពេលកូរ៉េខាងជើង បានបាញ់មីស៊ីលអន្ដរទ្វីប បង្កនូវការគំរាមកំហែង ដល់សន្ដិសុខនៅក្នុងតំបន់មិនបានប៉ុន្មានម៉ោងផង សហរដ្ឋអាមេរិក បានដាក់ពង្រាយយន្ដហោះទម្លាក់គ្រាប់បែកយុទ្ធសាស្រ្ដ មានល្បឿនលឿនជាងសំឡេង ដើម្បីប្រឆាំងនឹងការគំរាមកំហែង ដល់ប្រទេសជាសម្ពន្ធមិត្តរបស់ខ្លួន នៅតំបន់អាស៊ីបូព៌ា។

សារព័ត៌មាន WJA បានចេញផ្សាយ កាលពីព្រឹក ថ្ងៃចន្ទ ទី២០ ខែកុម្ភៈ ឆ្នាំ២០២៣ ថា កូរ៉េខាងជើង បានបញ្ជាក់ កាលពីថ្ងៃអាទិត្យ ថា ការបាញ់សាកល្បងមីស៊ីលបាល្លិស្ទីកអន្ដរទ្វីបចុងក្រោយរបស់ខ្លួន សំដៅបង្កើនសមត្ថភាពវាយប្រហារ ដោយអាវុធនុយក្លេអ៊ែរដ៏គ្រោះថ្នាក់ និង បានគំរាមកំហែង ដល់ការបោះជំហានដ៏មានកម្លាំងខ្លាំងបន្ថែមទៀត ប្រឆាំងនឹងការធ្វើសមយុទ្ធយោធា រវាងកងទ័ពសហរដ្ឋអាមេរិក និង កូរ៉េខាងត្បូង នាពេលខាងមុខនេះ។

ជាការឆ្លើយតបវិញនោះ កងទ័ពសហរដ្ឋអាមេរិក កាលពីល្ងាច ថ្ងៃអាទិត្យ បានហោះហើរកងយន្ដហោះទម្លាក់គ្រាប់បែក មានល្បឿនលឿនជាងសំឡេងយ៉ាងវែង នៅក្នុងការបង្ហាញ អំពីការធ្វើសមយុទ្ធយោធារួចគ្នាដាច់ដោយឡែក ជាមួយនឹងយន្ដហោះចម្បាំងរបស់សម្ពន្ធមិត្ដកូរ៉េខាងត្បូង និង ជប៉ុន។

ការបាញ់សាកល្បងមីស៊ីលបាល្លិស្ទីកអន្ដរទ្វីប (ICBM) កាលពីថ្ងៃសៅរ៍សប្ដាហ៍មុននេះ ក៏ជាការបាញ់មីស៊ីលលើកទី១របស់កូរ៉េខាងជើង ចាប់តាំងពីថ្ងៃទី១ ខែមករា មក។ សកម្មភាពបែបនេះ បានបង្ហាញ ថា មេដឹកនាំរបស់កូរ៉េខាងជើង លោក គីម ជុងអ៊ុន (Kim Jong Un) កំពុងតែប្រើប្រាស់សមយុទ្ធរបស់គូប្រជែងរបស់គាត់ សម្រាប់ជាឱកាស ពង្រីកឃ្លាំងអាវុធនុយក្លេអ៊ែររបស់ក្រុងព្យុងយ៉ាង ដើម្បីស្វែងរកដំណោះស្រាយឲ្យមានទម្ងន់ នាពេលអនាគតជាមួយសហរដ្ឋអាមេរិក។

ជាមួយគ្នានេះ អ្នកជំនាញយោធាម្នាក់ បានអះអាង ថា កូរ៉េខាងជើង អាចនឹងព្យាយាម ធ្វើសមយុទ្ធប្រតិបត្តិការជាប្រចាំ ពាក់ព័ន្ធនឹងមីស៊ីលបាល្លិស្ទីកអន្ដរទ្វីបរបស់ក្រុងព្យុងយ៉ាង។ ចំណែកការបាញ់មីស៊ីលរបស់កូរ៉េខាងជើង ក៏ជាការបង្ហាញនូវការគំរាមកំហែង ដោយផ្ទាល់ ដល់សហរដ្ឋអាមេរិក ដោយសារតែសម្ពន្ធមិត្តនៅក្នុងតំបន់ កំពុងតែរៀបចំធ្វើសមយុទ្ធយោធា នៅក្នុងប្រទេសកូរ៉េខាងត្បូង។

ទីភ្នាក់ងារមជ្ឈមណ្ឌលសារព័ត៌មានផ្លូវការកូរ៉េ (KCNA) របស់ប្រទេសកូរ៉េខាងជើង បានបញ្ជាក់ ថា ក្រុងព្យុងយ៉ាង បានបាញ់មីស៊ីលបាល្លិស្ទីកអន្ដរទ្វីប Hwasong-15 (វ៉ាសុង-១៥) ហើយត្រូវបានរៀបចំភ្លាមៗ តាមបញ្ជាផ្ទាល់របស់លោក គីម ជុងអ៊ុន មេដឹកនាំកូរ៉េខាងជើង ដោយគ្មានការជូនដំណឹង ជាមុននោះឡើយ។ មីស៊ីល បានហោះ នៅក្នុងរយៈកម្ពស់ ៥ ៧៧០គីឡូម៉ែត្រ ដោយវាហោះបានចម្ងាយ ៩៩០គីឡូម៉ែត្រ នៅក្នុងរយៈពេល៦៧នាទី ខណៈវាបានវាយប្រហារ ទៅលើតំបន់ដែលបានកំណត់ទុក នៅក្នុងដែនទឹក រវាងឧបទ្វីបកូរ៉េ និង ជប៉ុន។

លោក អេខិត ផានដា (Ankit Panda) អ្នកជំនាញ មកពីអង្គការ Carnegie Endowment (កាណេហ្គី អែនឌូមែន) សម្រាប់សន្ដិភាពអន្ដរជាតិ មានមូលដ្ឋាន នៅក្នុងរដ្ឋធានីវ៉ាស៊ីនតោន សហរដ្ឋអាមេរិក បានអះអាង ថា លោក គីម ជុងអ៊ុន ទំនងជាបានកំណត់ ថា ភាពជឿជាក់ខាងបច្ចេកទេស នៃកងកម្លាំងមីស៊ីលបាល្លិស្ទីកអន្ដរទ្វីប នឹងជំរុញឲ្យសាកល្បង និង វាយតម្លៃគ្រប់គ្រាន់ ដើម្បីអនុញ្ញាតឱ្យមានសមយុទ្ធប្រតិបត្តិការជាប្រចាំ សម្រាប់មីស៊ីលប្រភេទនេះ»។

ជាការឆ្លើយតបយ៉ាងគឃ្លើនរបស់កូរ៉េខាងជើង នោះ កងទ័ពសហរដ្ឋអាមេរិក កាលពីល្ងាច ថ្ងៃអាទិត្យ បានបញ្ជូនយន្ដហោះទម្លាក់គ្រាប់បែក B-1B និង យន្ដហោះចម្បាំង ជាច្រើនប្រភេទផ្សេងទៀត ធ្វើសមយុទ្ធជាមួយនឹងយន្ដហោះចម្បាំងដ៏ទំនើបរបស់កូរ៉េខាងត្បូង និង ជប៉ុន នៅពីលើ និង ជិតឧបទ្វីបកូរ៉េ។ ទន្ទឹមគ្នានេះ កងទ័ពកូរ៉េខាងត្បូង ក៏បានបញ្ជាក់ នៅក្នុងសេចក្ដីថ្លែងការណ៍ កាលពីថ្ងៃអាទិត្យ ថា ការធ្វើសមយុទ្ធរបស់កងទ័ពអាកាសនេះ ចង់បញ្ជាក់ឡើងវិញ អំពីការប្ដេជ្ញាចិត្តរបស់ក្រុងវ៉ាស៊ីនតោន សម្រាបការធានាដល់សន្ដិសុខរបស់កូរ៉េខាងត្បូង។

ដោយឡែក កូរ៉េខាងជើង មានភាពរសើបយ៉ាងខ្លាំង ចំពោះការដាក់ពង្រាយយន្តហោះទម្លាក់គ្រាប់បែក B-1B របស់សហរដ្ឋអាមេរិក ព្រោះវាមានសមត្ថភាព ផ្ទុកអាវុធធម្មតាយ៉ាងច្រើន។ ស្របគ្នានេះ ក្រុងព្យុងយ៉ាង បានប្រឆាំងយ៉ាងខ្លាំងក្លា ចំពោះការធ្វើសមយុទ្ធយោធាជាបន្ដបន្ទាប់ ខណៈក្រុងសេអ៊ូល និង ក្រុងវ៉ាស៊ីនតោន មានផែនការធ្វើ នៅក្នុងរយៈពេលប៉ុន្មានសប្ដាហ៍ខាងមុខនេះ៕

ប្រទេសកូរ៉េខាងជើង ៖ ប្រទេសកូរ៉េខាងជើងបង្ហើបថា ខ្លួនបានបាញ់មីស៊ីលកាលពីថ្ងៃមុនដើម្បីជាការដាស់តឿនអាមេរិក និងកូរ៉េខាងត្បូង ព្រមទាំងបង្ហាញពីសក្តានុពលនៃការវាយបកវិញដោយអាវុធនុយក្លេអ៊ែររបស់កូរ៉េខាងជើង ។ កូរ៉េខាងជើងនិយាយថា មីស៊ីលដែលខ្លួនបានបាញ់នេះប្រភេទ Hwaseong-15 និងសាកល្បងបាញ់ដោយភ្នាក់ងារថ្មីមួយហៅថា ភ្នាក់ងារមីស៊ីល ។

មន្ត្រីកូរ៉េខាងជើងបានបញ្ជាក់ថា កូរ៉េខាងជើងបានបាញ់មីស៊ីលកាលពីរសៀលថ្ងៃទី១៨ ខែកុម្ភៈ កន្លងមក ដែលវាជាមីស៊ីលឆ្លងទ្វីប (ICBM) ប្រភេទ Hwaseong-15 ។ មេដឹកនាំកំពូលរបស់កូរ៉េខាងជើង លោក គីម ជុងអ៊ុន ជាអ្នកបញ្ជាឱ្យសាកល្បងបាញ់មីស៊ីលនេះ ដើម្បីដាស់តឿនអាមេរិក និងកូរ៉េខាងត្បូងឱ្យឃើញពីសក្តានុពលនៃការវាយប្រហារវិញដោយអាវុធនុយក្លេអ៊ែររបស់កូរ៉េខាងជើង និងដំណើរការសាកល្បងបាញ់ដោយភ្នាក់ងារមីស៊ីល ប៉ុន្តែព័ត៌មានមិនបានបញ្ជាក់លម្អិតអំពីភ្នាក់ងារថ្មីរបស់កូរ៉េខាងជើងទេ ។

សារព័ត៌មានរបស់កូរ៉េខាងជើង KCNA បានរាយការណ៍ថា ការសាកល្បងបាញ់កាំជ្រួចនេះ ជាការបាញ់ពីអាកាសយានដ្ឋានអន្តរជាតិស្ថិតនៅក្រុងព្យុងយ៉ាង ។ កាំជ្រួចបានហោះឡើងលើមេឃក្នុងកម្ពស់៥.៧៦៨គីឡូម៉ែត្រ ដោយប្រើរយៈពេល៤.០១៥នាទី មុននឹងវាទៅដល់គោលដៅដែលបានកំណត់ក្នុងបរិវេណដែនទឹកសមុទ្រកូរ៉េខាងកើត ។

មុននេះ កូរ៉េខាងជើងបានប្រកាសគំរាមពីការធ្វើសមយុទ្ធរួមគ្នារវាងកូរ៉េខាងត្បូង និងអាមេរិក និងក្រោយពីកូរ៉េខាងជើងសាកល្បងបាញ់កាំជ្រួចរបស់ខ្លួនធ្លាក់នៅតំបន់សេដ្ឋកិច្ចរបស់ប្រទេសជប៉ុន ដែលធ្វើឱ្យរដ្ឋាភិបាលជប៉ុន និងកូរ៉េខាងត្បូងចេញមកថ្កោលទោសការសាកល្បងបាញ់មីស៊ីលរបស់កូរ៉េខាងជើង ។ ជប៉ុនលើកឡើងថា មីស៊ីលរបស់កូរ៉េខាងជើងនឹងមានសមត្ថភាពបាញ់បានចម្ងាយឆ្ងាយរហូតដល់១ម៉ឺន៤ពាន់គីឡូម៉ែត្រ មានន័យថា វាអាចវាយប្រហារគ្រប់ទីកន្លែងទាំងអស់នៅលើទឹកដីអាមេរិក ៕

ប្រភព ៖ TNN World

ប្រទេសកូរ៉េខាងត្បូង ៖ កាលពីថ្ងៃទី១៩ ខែកុម្ភៈ កន្លងមក ប្រទេសកូរ៉េខាងត្បូង និងអាមេរិកបានធ្វើសមយុទ្ធផ្លូវអាកាសរួមគ្នា ដោយមានយន្តហោះទម្លាក់គ្រាប់បែករបស់អាមេរិកចូលរួមហ្វឹកហាត់ផងដែរ ។ ការធ្វើសមយុទ្ធនេះ គឺរៀបចំឡើងមួយថ្ងៃក្រោយបន្ទាប់ពីកូរ៉េខាងជើងសាកល្បងបាញ់កាំជ្រួចឆ្លងទ្វីប ICBM របស់ខ្លួន ។

អគ្គលេខាធិការចម្រុះកូរ៉េខាងត្បូងបានថ្លែងកាលពីថ្ងៃទី១៩ ខែកុម្ភៈថា កូរ៉េខាងត្បូង និងអាមេរិកបានធ្វើសមយុទ្ធផ្លូវអាកាសរួមគ្នា ដោយមានយន្តហោះចម្បាំង Stealth F-35A និងយន្តហោះបណ្តេញ F-15K របស់កូរ៉េខាងត្បូង រួមជាមួយយន្តហោះបណ្តេញ F-16 របស់អាមេរិក ដើម្បីនាំយន្តហោះទម្លាក់គ្រាប់បែក B-1B របស់អាមេរិកមកកាន់តំបន់ការពារដែនអាកាសរបស់កូរ៉េខាងត្បូង បន្ទាប់មក យន្តហោះចម្បាំងចំនួន១០គ្រឿងបានហោះជាក្រុមនៅលើសមុទ្រលឿង សមុទ្រខាងកើត និងខាងត្បូងរបស់កូរ៉េខាងត្បូង ។

អគ្គលេខាធិការចម្រុះកូរ៉េខាងត្បូងបញ្ជាក់ថា ការធ្វើសមយុទ្ធរួមគ្នានៅពេលនេះ គឺជាការបង្ហាញពីសក្តានុពលការពារប្រទេសកូរ៉េខាងត្បូង និងអាមេរិក តាមរយៈការដាក់ពង្រាយបន្ថែមនូវឧបករណ៍យោធាអាមេរិក ដើម្បីទប់ស្កាត់ឱ្យបានទាន់ពេលវេលា និងបញ្ជាក់ថា អាមេរិកប្តេជ្ញាការពារឧបទ្វីបកូរ៉េ និងអនុវត្តតាមកិច្ចសន្យាពង្រីកជំនួយទប់ស្កាត់ ដែលអាមេរិកនឹងប្រើប្រាស់សក្តានុពលយោធាទាំងអស់របស់ខ្លួន រួមទាំងអាវុធនុយក្លេអ៊ែរដើម្បីការពារសម្ព័ន្ធមិត្ត ។

គួរបញ្ជាក់ថា ការធ្វើសមយុទ្ធលើកនេះកើតឡើងមួយថ្ងៃបន្ទាប់ពីកូរ៉េខាងជើងសាកល្បងបាញ់មីស៊ីលឆ្លងទ្វីប ICBM ប្រភេទ Hwaseong-15 ហើយក៏ជាការធ្វើសមយុទ្ធភ្លាមៗដើម្បីបង្ហាញពីសក្តានុពលរបស់ប្រព័ន្ធការពារដោយអាវុធនុយក្លេអ៊ែរ ដែលអាចបាញ់បានយ៉ាងឆាប់រហ័ស ។ កូរ៉េខាងជើងបានគំរាមកាលពីថ្ងៃទី១៨ ខែកុម្ភៈថា នឹងតបតវិញយ៉ាងចាស់ដៃ និងបន្តបន្ទាប់ដែលមិនធ្លាប់ធ្វើពីមុនមក បើកូរ៉េខាងត្បូង និងអាមេរិកនៅតែនាំមុខធ្វើសមយុទ្ធរួមគ្នា ៕ ប្រភព ៖ NationWorldNews

រដ្ឋធានីមូស្គូ៖ រុស្ស៊ី បានចោទប្រកាន់ជាថ្មី ប្រឆាំងនឹងក្រុងកៀវ អំពីការរៀបចំនូវផែនការ វាយប្រហារទៅលើរោងចក្រនុយក្លេអ៊ែរដ៏ធំបំផុតរបស់អឺរ៉ុប នៅក្នុងប្រទេសអ៊ុយក្រែន ប៉ុន្ដែបណ្ដាប្រទេសសម្ពន្ធមិត្ត និង ក្រុងកៀវ បានទាត់ចោលនូវការចោទប្រកាន់ទាំងនោះ ដោយចាត់ទុក ជាការប៉ុនប៉ងដ៏ឃោរឃៅ នៅក្នុងការផ្សព្វផ្សាយព័ត៌មានមិនពិត ហើយក៏បានចោទប្រកាន់ ត្រឡប់ទៅក្រុងមូស្គូ វិញ អំពីការរៀបចំឧបទ្ទវហេតុ បង្កើឡើង ដោយខ្លួនឯង នៅក្នុងគោលបំណងបន្ទោស មកលើប្រទេសអ៊ុយក្រែន។

សារព័ត៌មាន Al Jazeera បានចេញផ្សាយ កាលពីថ្ងៃអាទិត្យ ទី១៩ ខែកុម្ភៈ ឆ្នាំ២០២៣ ថា រុស្សី កំពុងតែចោទប្រកាន់ ដោយមិនបានផ្ដល់ភស្ដុតាង ថា អ៊ុយក្រែន កំពុងតែមានផែនការ បង្កឲ្យមានឧបទ្ទវហេតុ នៅលើទឹកដីរបស់ខ្លួន នៅក្នុងចេតនាស្ដីបន្ទោស មកលើរដ្ឋាភិបាលក្រុងមូស្គូ នៅមុនកិច្ចប្រជុំកំពូលរបស់អង្គការសហប្រជាជាតិ។

ក្រសួងការពារជាតិរុស្ស៊ី បានបញ្ជាក់ នៅក្នុងសេចក្ដីថ្លែងការណ៍មួយ កាលពីថ្ងៃអាទិត្យ ថា សារធាតុវិទ្យុសកម្ម ត្រូវបានគេដឹក ចេញពីបណ្ដាប្រទេសអឺរ៉ុបមួយ ដែលមិនស្គាល់ឈ្មោះ ជញ្ជូនទៅកាន់ប្រទេសអ៊ុយក្រែន។ ចំណែករដ្ឋាភិបាលក្រុងកៀវ ក៏កំពុងតែរៀបចំនូវផែនការបង្កហេតុ ទ្រង់ទ្រាយធំ។ សកម្មភាពទាំងនេះ មានគោលបំណង បង្កនូវការញុះញង់ ដើម្បីចោទប្រកាន់ មកលើកម្លាំងទាហានរុស្ស៊ី ថា បានវាយប្រហារ ដោយមិនរើសអើង ទៅលើទីតាំងរោងចក្រវិទ្យុសកម្មដ៏ធំបំផុតរបស់អឺរ៉ុប ស្ថិតក្នុងប្រទេសអ៊ុយក្រែន ដែលនាំឱ្យមានការលេចធ្លាយសារធាតុវិទ្យុសកម្ម និង ការបំពុលយ៉ាងខ្លាំង នៅក្នុងតំបន់ ហើយវាជាទង្វើប្រកបដោយគ្រោះថ្នាក់ខ្លាំង។

រុស្ស៊ី តែងតែចោទប្រកាន់ជាដដែលៗ ប្រឆាំងនឹងក្រុងកៀវ អំពីការរៀបចំនូវផែនការ ធ្វើប្រតិបត្ដិការ ក្រោមទង់ក្លែងក្លាយ ដោយជាមួយនឹងអាវុធមិនធម្មតា ដោយការប្រើសារធាតុជីវសាស្ត្រ ឬ វិទ្យុសកម្ម។ ដូច្នេះ ការវាយប្រហារបែបនេះ មិនត្រូវឲ្យកើតឡើងនោះឡើយ។

ដោយឡែក អ៊ុយក្រែន និង សម្ពន្ធមិត្តលោកខាងលិច វិញ បានច្រានចោលនូវការចោទប្រកាន់របស់រុស្ស៊ី ដោយចាត់ទុកការលើកឡើងរបស់ក្រុងមូស្គូ មានចេតនាដ៏អាក្រក់បំផុត ពង្រីកនូវព័ត៌មានមិនពិត។ ជាមួយគ្នានេះ បណ្ដាប្រទេសលោកខាងលិច និង រដ្ឋាភិបាលក្រុងកៀវ ក៏បានចោទប្រកាន់ ទៅលើក្រុងមូស្គូ អំពីការរៀបចំនូវផែនការ បង្កឧបទ្ទវហេតុបំផ្ទុះរោងចក្រនុយក្លេអ៊ែរដ៏ធំរបស់អឺរ៉ុប ស្ថិតក្នុងប្រទេសអ៊ុយក្រែន ដើម្បីស្ដីបន្ទោស មកលើប្រទេសអ៊ុយក្រែន។

ការចោទប្រកាន់របស់រុស្ស៊ី បានកើតឡើង ស្របពេលក្រុមមន្រ្ដីអ៊ុយក្រែន បានជំរុញឲ្យក្រុមអ្នកនយោបាយរបស់សហរដ្ឋអាមេរិក បង្កើននូវការដាក់សម្ពាធ ដល់រដ្ឋបាលរបស់លោកប្រធានាធិបតី ចូ បៃដិន (Joe Biden) ដើម្បីបញ្ជូនយន្ដហោះចម្បាំង ប្រភេទ F-16 មកជួយដល់កម្លាំងការពារទឹកដីរបស់ក្រុងកៀវ។ យន្ដហោះចម្បាំងដ៏ទំនើបរបស់សហរដ្ឋអាមេរិក ប្រភេទនេះ នឹងជួយង្កើនសមត្ថភាពរបស់កងទ័ពអាកាស អ៊ុយក្រែន ដើម្បីវាយប្រហារទប់ទល់ ប្រឆាំងនឹងកងមីស៊ីលរបស់រុស្ស៊ី។

ការបញ្ចុះបញ្ជូលដល់ក្រុមអ្នកនយោបាយសហរដ្ឋអាមេរិក បានកើតឡើង កាលពីចុងសប្ដាហ៍កន្លងទៅនេះ នៅខាងក្រៅសន្និសីទ នៃសន្ដិសុខមូនិច នៅក្នុងកិច្ចពិភាក្សា រវាងក្រុមមន្រ្ដីអ៊ុយក្រែន រួមមាន លោករដ្ឋមន្រ្ដីក្រសួងការបរទេស ឌីមីត្រូ គូឡេបា (Dmytro Kuleba) ហើយសមាជិកព្រឹទ្ធសភា និង រដ្ឋសភារបស់សហរដ្ឋអាមេរិក មកពីគណបក្សប្រជាធិបតេយ្យ និង សាធារណរដ្ឋ។

លោក ម៉ាក ខែលលី (Mark Kelly) សមាជិកព្រឹទ្ធសភា និង ជាអតីតអវកាសយានិក ដែលធ្លាប់បើកយន្តហោះចម្បាំងរបស់កងទ័ពជើងទឹករបស់សហរដ្ឋអាមេរិក បានបញ្ជាក់ ថា «ក្រុមមន្រ្ដីអ៊ុយក្រែន បានប្រាប់យើង ថា ពួកគេចង់បានយន្ដហោះចម្បាំងដ៏ទំនើប ប្រភេទ F-16 ដើម្បីបង្ក្រាបទៅលើកិច្ចការពារដែនអាកាសរបស់សត្រូវ ដូច្នេះពួកគេអាចទទួលបានយន្តហោះគ្មានមនុស្សបើក ឬ ដ្រូន សម្រាប់សមរភូមិរបស់រុស្ស៊ី។ ចំណែកបញ្ហាយន្ដហោះនេះ ត្រូវការបណ្តុះបណ្តាលយ៉ាងហោចណាស់មួយឆ្នាំ សម្រាប់គ្រប់គ្រងសមត្ថភាពទាំងអស់របស់ F-16។ ប៉ុន្ដែកងទ័ពអាកាសរបស់អ៊ុយក្រែន អាចត្រូវបង្រៀន ឱ្យចេះបើកបរ នៅក្នុងចំនួនកំណត់ … រយៈពេល ចន្លោះពីពីរទៅបីខែ»។

ដោយឡែក លោក ចូ បៃដិន ប្រធានាធិបតីសហរដ្ឋអាមេរិក កាលពីខែមុន បានបញ្ជាក់ ថា «គាត់មិនយល់ព្រម ផ្ដល់យន្ដហោះចម្បាំង ប្រភេទ F-16 តាមសំណើរបស់អ៊ុយក្រែន នោះឡើយ»។

ជាមួយគ្នានេះដែរ ក្រុមមន្រ្ដីរដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន កាលពីថ្ងៃអាទិត្យ បានបញ្ជាក់ ថា សហរដ្ឋអាមេរិក នឹងផ្ដោតទៅលើការផ្គត់ផ្គង់គ្រឿងយុទ្ធោបករណ៍ ដែលអាចប្រើប្រាស់ជាបន្ទាន់ នៅលើសមរភូមិ ច្រើនជាងការផ្គត់ផ្គង់យន្ហហោះចម្បាំង ព្រោះវាត្រូវការចំណាយពេល ទៅលើការហ្វឹកហ្វឺនបន្ថែមទៀត៕