ប្រទេសឡាវ ៖ ប្រទេសឡាវបានរាយការណ៍ពីចំនួនការនាំចូលរថយន្តអគ្គិសនីកើនឡើងនៅឆ្នាំ២០២២ កន្លងមក បន្ទាប់ពីតម្លៃប្រេងឥន្ធនៈបានកើនឡើងជាច្រើនលើក ។ តាមរបាយការណ៍ពីក្រុមហ៊ុនប្រេងឥន្ធនៈឡាវ (Lao State Fuel Company) បង្ហាញថា នៅខែកុម្ភៈ ឆ្នាំ២០២៣នេះ តម្លៃប្រេងសាំងស្មើប្រមាណ២១.០៥០គីបក្នុង១លីត្រ និងតម្លៃប្រេងម៉ាស៊ូតស្មើ១៩.៨២០គីបក្នុង១លីត្រ ។

លោក Thongphat Inthavong អនុរដ្ឋមន្ត្រីក្រសួងថាមពល និងរ៉ែ បានថ្លែងក្នុងកិច្ចប្រជុំកាលពីដើមខែកុម្ភៈថា ប្រជាពលរដ្ឋឡាវចាប់ផ្តើមងាកមកប្រើប្រាប់រថយន្តអគ្គិសនីកាន់តែច្រើន បន្ទាប់ពីឡាវជួបបញ្ហាការខ្វះខាតប្រេងឥន្ធនៈ និងតម្លៃកើនឡើងជាបន្តបន្ទាប់ ។

បច្ចុប្បន្ន ប្រទេសឡាវមានរថយន្តអគ្គិសនីចំនួន១.៤២៨គ្រឿង និងម៉ូតូអគ្គិសនីចំនួន១.៧៧៣គ្រឿង ដែលបាននាំចូលដោយជំនួយពីអន្តរជាតិ និងផ្នែកឯកជន ។ ប្រទេសឡាវមានកន្លែងសាកអគ្គិសនីទាំងអស់ចំនួន២០កន្លែងនៅទូទាំងប្រទេស និងមានក្រុមហ៊ុនលក់រថយន្តចំនួន១៨ បាននាំចូលរថយន្តអគ្គិសនីមកលក់នៅឡាវ ។

ក្រៅពីនេះ រដ្ឋាភិបាលឡាវតាំងចិត្តថា នឹងផ្លាស់ប្តូរប្រព័ន្ធដឹកជញ្ជូនក្នុងប្រទេសមកប្រើរថយន្តអគ្គិសនីនៅត្រឹមឆ្នាំ២០២៥ ដើម្បីកាត់បន្ថយការនាំចូលប្រេងឥន្ធនៈ រួមទាំងបានចេញគោលនយោបាយគាំទ្រការប្រើប្រាស់រថយន្តអគ្គិសនីផងដែរ ។ លោក ផាន់ខាំ វិផាវ៉ាន់ អតីតនាយករដ្ឋមន្ត្រីឡាវ បានកំណត់គោលដៅថា ប្រទេសឡាវនឹងប្រើប្រាស់រថយន្តអគ្គិសនីជាង៣០% នៅត្រឹមឆ្នាំ២០៣០ ៕

ប្រភព ៖ AECconnect

ប្រទេសក្រូអាត ៖ កាលពីថ្ងៃទី១៣ ខែកុម្ភៈ ប្រទេសក្រូអាតបានប្រកាសលក់កោះរាងបេះដូងដ៏ល្បីល្បាញលើពិភពលោក សម្រាប់ថ្ងៃក្តីស្រឡាញ់ដល់អ្នកចាប់អារម្មណ៍ធ្វើជាកម្មសិទ្ធិរបស់ខ្លួន ដែលត្រូវបានភ្ញៀវទេសចរដាក់ឈ្មោះថា «កោះក្តីស្រឡាញ់» ។

កោះរាងបេះដូង ឬកោះក្តីស្រឡាញ់ គឺជាកោះមួយស្ថិតក្នុងចំណោមកោះ Galesniak ។ វាស្ថិតនៅក្រៅឆ្នេរសមុទ្រ Adriatic ជាប្រជុំកោះដែលគេស្គាល់ច្រើននៅប្រទេសក្រូអាត ហើយបច្ចុប្បន្ន ក្រូអាតបានបើកឱកាសដល់អ្នកចាប់អារម្មណ៍អាចទិញវាបាន ។

Silvestro Cardum ជាឈ្មួញកណ្តាលប្រាប់ថា កោះនេះមានមនុស្សម្នា និងភ្ញៀវទេសចរនាំគ្នាមកថតរូបទុកជាអនុស្សាវរីយ៍រាប់លានរូបក្នុង១ឆ្នាំៗ ។ វាបង្ហាញឱ្យឃើញថា កោះនេះជាទីកន្លែងនិយមចូលចិត្តរបស់មនុស្សជាច្រើនទូទាំងពិភពលោក បើទោះជានៅលើកោះ និងបណ្តាកោះផ្សេងទៀតគ្មានមនុស្សរស់នៅ គ្មានសណ្ឋាគារ គ្មានភូមិគ្រឹះ ឬសូម្បីតែភោជនីយដ្ឋាន ក៏គ្មានដែរ ។ ប៉ុន្តែមានអ្នកល្បីល្បាញយកទូករបស់ពួកគេមកចតនៅទីនេះ ដើម្បីគយគន់ទេសភាពស្រស់ស្អាត និងសម្រាកលំហែរកាយជាប្រចាំនៅរដូវក្តៅ ដូចជា Beyoncé ម្ចាស់ភ្លេង R&B ជនជាតិអាមេរិក ក៏ធ្លាប់មកប្រារព្ធខួបកំណើតគម្រប់៣៩ឆ្នាំនៅលើកោះនេះដែរ ។ លើសពីនេះ Michael Jordan ក៏បានមកលេងទីនេះកាលពីឆ្នាំ២០២២ រួមទាំងលោក Jeff Bezos ម្ចាស់ក្រុមហ៊ុន Amazon ក៏មកលេងទីនេះដូចគ្នា ។

ឈ្មួញកណ្តាលប្រាប់ថា គេនឹងលក់ផ្នែកខ្លះនៃកោះដល់អ្នកចាប់អារម្មណ៍ក្នុងតម្លៃត្រឹមតែ១៣លានយូរ៉ូប៉ុណ្ណោះ ហើយកន្លងមក មានអ្នកទាក់ទងសាកសួរជាបន្តបន្ទាប់ស្ទើររាល់ថ្ងៃ ។ គួរបញ្ជាក់ថា កាលពីឆ្នាំ២០១៩ អ្នកវិទ្យាសាស្ត្របុរាណវិទ្យានៅសាកលវិទ្យាល័យ Zadar ប្រទេសក្រូអាត បានរកឃើញស្នាមដានថា ធ្លាប់មានមនុស្សរស់នៅទីនេះកាលពីជាង៧.០០០ឆ្នាំមុន ៕

ប្រភព ៖ tnnthailand

ប្រទេសសិង្ហបុរី ៖ សិង្ហបុរីបានអនុញ្ញាតឱ្យភ្ញៀវទេសចរអន្តរជាតិដែលចាក់វ៉ាក់សាំងការពារកូវីដមិនគ្រប់ដុស អាចធ្វើដំណើរមកកម្សាន្តនៅប្រទេសខ្លួនបាន ដោយពួកគេមិនចាំបាច់មានលទ្ធផលពិនិត្យជំងឺកូវីដអវិជ្ជមាន និងគ្មានការឃុំខ្លួន ។ លើសពីនេះ សិង្ហបុរីក៏បានអនុញ្ញាតឱ្យភ្ញៀវទេសចរអាចដោះម៉ាស់ចេញផងដែរ នៅពេលពួកគេជិះរថយន្តសាធារណៈ ដោយអនុវត្តចាប់ពីថ្ងៃទី១៣ ខែកុម្ភៈ តទៅ ដោយសារសិង្ហបុរីចង់ចាកចេញពីការឆ្លងរាតត្បាតនៃជំងឺកូវីដក្នុងដំណាក់កាលធ្ងន់ធ្ងរ ។

ក្រៅពីនេះ ក្រុមការងារទទួលបន្ទុកជំងឺកូវីដដែលបានបង្កើតឡើងកាលពីខែមករា ឆ្នាំ២០២០ ក៏នឹងត្រូវរំសាយផងដែរ ។ ប្រទេសសិង្ហបុរីបានបន្ធូរបន្ថយវិធានការពិនិត្យរកជំងឺកូវីដមុនពេលធ្វើដំណើរ និងការពាក់ម៉ាស់ ដែលគេចាត់ទុកថា គឺជាជំហានសំខាន់ក្នុងការធ្វើឱ្យជំងឺកូវីដក្លាយជាជំងឺក្នុងតំបន់ និងអនុញ្ញាតឱ្យពលរដ្ឋសិង្ហបុរីប្រើជីវិតប្រចាំថ្ងៃតាមធម្មតាឡើងវិញ ។

ជាមួយគ្នានេះ សិង្ហបុរីមិនបង្ខំឱ្យពលរដ្ឋ និងភ្ញៀវទេសចរត្រូវតែពាក់ម៉ាស់ក្នុងរថយន្តសាធារណៈ និងទីកន្លែងនានាទៀតទេ ។ លោក Lawrence Wong ឧបនាយករដ្ឋមន្ត្រីប្រទេសសិង្ហបុរី បានណែនាំថា គួរតែពាក់ម៉ាស់ក្នុងពេលឆ្លងជំងឺកូវីដប៉ុណ្ណោះ ។

ទោះយ៉ាងណា ក្រសួងសុខាភិបាលបញ្ជាក់ថា ការពាក់ម៉ាស់នៅតែចាំបាច់សម្រាប់ទីកន្លែងមួយចំនួន ដូចជា បន្ទប់អ្នកជំងឺក្នុងមន្ទីរពេទ្យ គ្លីនិក និងផ្ទះថែទាំមនុស្សចាស់ ដែលទីកន្លែងទាំងនេះនឹងមានការប៉ះពាល់ជាមួយអ្នកជំងឺ ព្រមទាំងទីកន្លែងបិទជិតផងដែរ ៕

ប្រភព ៖ AECconnect

ប្រទេសចិន ៖ ចិនបានប្រកាសបើកបវសនកាលថ្មីនៅតាមសាលារៀនក្នុងតំបន់នីមួយៗនៅទូទាំងប្រទេស ដោយមានគ្រូបង្រៀន និងកូនសិស្សប្រមាណ៣០០លាននាក់បានត្រឡប់មកកាន់សាលារៀនរបស់ពួកគេវិញ ។ វាជាការបើកបវសនកាលលើកដំបូងក្រោយពីប្រទេសចិនបន្ធូរបន្ថយការរឹតបន្តឹងលើជំងឺកូវីដ-១៩ ពូជថ្មី ពីកម្រិត A ទៅកម្រិត B កាលពីថ្ងៃទី៨ ខែមករា កន្លងមក ។

កាលពីថ្ងៃទី៦ ខែកុម្ភៈ លោកស្រី ស៊ុន ឈុនឡាន ឧបនាយករដ្ឋមន្ត្រីចិន បានជំរុញឱ្យនាយកសាលារៀននីមួយៗគ្រប់គ្រងសាលារៀនរបស់ខ្លួន និងចូលរួមទប់ស្កាត់ការឆ្លងរាលដាលនៃជំងឺកូវីដ ដើម្បីឱ្យសាលារៀនក្លាយជាកន្លែងមានសុវត្ថិភាពដូចធម្មតាឡើងវិញ ។ តាមរបាយការណ៍បញ្ជាក់ថា សិស្សបឋមសិក្សា និងអនុវិទ្យាល័យនៅក្នុងទីក្រុងប៉េកាំង បានចូលរៀនវិញជាង១លាននាក់កាលពីថ្ងៃទី១៣ ខែកុម្ភៈ កន្លងមក ។

លោក ឈីន សេង នាយករងអនុវិទ្យាល័យនៅទីក្រុងប៉េកាំង បានប្រកាសបើកបវសនកាលសម្រាប់សិស្សអនុវិទ្យាល័យក្នុងឆមាសនេះ ក្រោយពីសាលារបស់លោកបានពន្យារពេលបើកបវសនកាលនៅឆមាសមុន ដោយសារការរាតត្បាតនៃជំងឺកូវីដ ។ សាលារៀនក៏បានអញ្ជើញអាណាព្យាបាល មាតាបិតាសិស្សមកជាភ្ញៀវកិតិ្តយសក្នុងពិធីនេះផងដែរ ។

គួរបញ្ជាក់ថា កាលពីរយៈពេល៣ឆ្នាំកន្លងមកនេះ កូនសិស្សចិនទាំងអស់ត្រូវនៅតែក្នុងផ្ទះរបស់ខ្លួន និងរៀនសូត្រតាមប្រព័ន្ធអនឡាញ ខណៈគេបារម្ភពីការរាតត្បាតនៃជំងឺកូវីដក្នុងប្រទេសចិន ហើយកូនសិស្សនឹងគ្មានសុវត្ថិភាព បើពួកគេទៅរៀននៅសាលា ៕ ប្រភព ៖ newpapertoday

រដ្ឋធានីហ្សាការតា៖ ក្រុងប៉េកាំង តែងតែអះអាង អំពីដែនទឹកនៅសមុទ្រចិនខាងត្បូង ស្ទើរតែទាំងស្រុង ជាដែនអធិបតេយ្យភាពរបស់ប្រទេសចិន ហើយសកម្មភាពបែបនេះ បង្កឲ្យមានជម្លោះ ជាមួយនឹងបណ្ដាប្រទេសមួយចំនួន នៅក្នុងតំបន់អាស៊ាន ទើបកាលពីពេលថ្មីៗនេះ វៀតណាម បានចុះកិច្ចព្រមព្រៀងមួយ ជាមួយនឹងឥណ្ឌូណេស៊ី ស្ដីអំពីព្រំដែនទឹករបស់ប្រទេសទាំង២។

សារព័ត៌មាន Defense News បានចេញផ្សាយ កាលពីថ្ងៃចន្ទ ទី១៣ ខែកុម្ភៈ ថា កិច្ចព្រមព្រៀង កាលពីពេលថ្មីៗ រវាងឥណ្ឌូណេស៊ី និង វៀតណាម ទៅលើព្រំដែនសមុទ្រ នៅក្នុងសមុទ្រចិនខាងត្បូង ទំនងជានឹងប្រព្រឹត្ដទៅ ដោយរលូន ជុំវិញទំនាក់ទំនងដ៏តានតឹងម្តងម្កាល រវាងប្រជាជាតិអាស៊ីភាគអាគ្នេយ៍ទាំងពីរនេះ។

កិច្ចព្រមព្រៀង ដែលបានចុះហត្ថលេខា កាលពីថ្ងៃទី២២ ខែធ្នូ ឆ្នាំ២០២២ បានកើតឡើង ក្រោយការចរចាគ្នា អស់រយៈពេល១២ឆ្នាំមក ហើយវាបានកើតឡើង អស់រយៈពេល១៩ឆ្នាំមកហើយ បន្ទាប់ពីប្រទេសទាំងពីរ បានអនុម័តនូវការកំណត់ព្រំដែនទឹក រវាងប្រទេសទាំង២។ ទោះជាយ៉ាងណា កិច្ចព្រមព្រៀម និង ការកំណត់ព្រំដែនទឹកនោះ ក្រសួងការពារជាតិវៀតណាម និង ឥណ្ឌូណេស៊ី មិនបានឆ្លើយតបនឹងសំណើ សុំការអត្ថាធិប្បាយនោះឡើយ។

បើតាមលោក ប៊ិច ត្រាន (Bich Tran) ជាអ្នកសរសេរ នៅក្នុងការបោះពុម្ពផ្សាយរបស់វិទ្យាស្ថាន ISEAS-Yusof Ishak នៅក្នុងប្រទេសសិង្ហបុរី បានឲ្យដឹង ថា «ជាការពិតណាស់ ការបោះបង្គោលព្រំដែនទឹក រវាងឥណ្ឌូណេស៊ី-វៀតណាម ជាតំបន់សេដ្ឋកិច្ចផ្តាច់មុខ បានប្រព្រឹត្ដទៅប្រកបដោយជោគជ័យ ហើយវានឹងជួយដល់ប្រទេសទាំងពីរ នៅក្នុងការដោះស្រាយនូវការនេសាទខុសច្បាប់ និង កិច្ចការពាក់ព័ន្ធជាច្រើនទៀត ដែលជាបញ្ហាទ្វេភាគីយ៉ាងធ្ងន់ធ្ងរ ហើយជាបញ្ហាយ៉ាងទូលំទូលាយ ពាក់ព័ន្ធនឹងប្រទេសភាគីទីបី រួមទាំង ចិន និង ថៃ ផងដែរ។

កិច្ចព្រមព្រៀងនេះ ក៏ផ្តល់ក្តីសង្ឃឹម សម្រាប់ការពង្រឹងនូវការប្តេជ្ញាចិត្តនៅក្នុងតំបន់ ចំពោះបទដ្ឋាន និង គោលការណ៍ដែនសមុទ្រអន្តរជាតិ ដូចបានចែង នៅក្នុងអនុសញ្ញារបស់អង្គការសហប្រជាជាតិ ស្តីពីច្បាប់សមុទ្រ នាឆ្នាំ១៩៨២ ដោយអនុញ្ញាតឱ្យប្រទេសទាំងពីរ អះអាងនូវដែនសមុទ្រអន្តរជាតិរៀងៗខ្លួន។ សិទ្ធិ និង អនុវត្តនូវផលប្រយោជន៍នៅក្នុងដែនសមុទ្ររបស់ប្រទេសទាំងនេះ។

បើតាមច្បាប់អន្តរជាតិ តំបន់សេដ្ឋកិច្ចផ្តាច់មុខ រួមមាន ដែនទឹកដែលលាតសន្ធឹង រហូតដល់២០០ម៉ៃល៍ ឬស្មើនឹង ប្រហែល៣២១គីឡូម៉ែត្រ ពីឆ្នេរសមុទ្ររបស់ប្រទេស ដែលប្រទេសនោះ មានសិទ្ធិផ្តាច់មុខ នៅក្នុងការរុករក និង ទាញយកធនធានធម្មជាតិ នៅក្នុងសមុទ្រនោះ។

កិច្ចព្រមព្រៀងថ្មីនេះ បានបិទបញ្ចប់ដោយដំណើរបំពេញទស្សនកិច្ច រវាងមេដឹកនាំកំពូលរបស់វៀតណាម និង ឥណ្ឌូណេស៊ី បានធ្វើដំណើរទៅវិញទៅមក ទៅកាន់ប្រទេសរបស់ពួកគេ កាលពីឆ្នាំកន្លងទៅ។ ចំណែករដ្ឋមន្រ្ដីការពារជាតិឥណ្ឌូណេស៊ី លោក ប្រាប៉ូវ៉ូ ស៊ូប៊ៀនតូ (Prabowo Subianto) ក៏បានទៅជួបសមភាគីវៀតណាម លោកឧត្ដមសេនីយ៍ ផាន់ វ៉ាន់យ៉ាង (Phan Văn Giang) ។ ដំណើរទស្សនកិច្ចរបស់មេដឹកនាំទាំង២ បានព្រមព្រៀង បង្កើតកិច្ចសហប្រតិបត្ដិការ ទៅលើសន្ដិសុខ និង ការពារជាតិរៀងៗខ្លួន រួមទាំង ការបង្កើននូវទំនាក់ទំនងទ្វេភាគី ការបណ្តុះបណ្តាល និង ការពិគ្រោះយោបល់។ ទន្ទឹមគ្នានេះ មេដឹកនាំវៀតណាម និង ឥណ្ឌូណេស៊ី ក៏បានព្រមព្រៀងគ្នា ទៅលើតំបន់សេដ្ឋកិច្ចផ្ដាច់មុខរៀងៗខ្លួនផងដែរ។

ជម្លោះនៅលើដែនទឹក បានក្លាយជារឿងធម្មតា នៅក្នុងសមុទ្រចិនខាងត្បូង ដែលវៀតណាម និង ឥណ្ឌូណេស៊ី ស្ថិតក្នុងចំណោមប្រទេស នៅក្នុងតំបន់យ៉ាងតិច ចំនួន៥ផ្សេងទៀត តែងតែអះអាង អំពីដែនអធិបតេយ្យភាពរបស់ខ្លួន ពាក់ព័ន្ធនឹងលក្ខណៈភូមិសាស្ត្រ នៅក្នុងតំបន់។

កិច្ចព្រមព្រៀងចុងក្រោយនេះ បានដោះស្រាយជម្លោះដ៏យូរអង្វែង ទៅលើការទាមទារតំបន់សេដ្ឋកិច្ចផ្ដាច់មុខ (EEZ) ត្រួតស៊ីគ្នារបស់ឥណ្ឌូណេស៊ី និង វៀតណាម ដែលកំណត់ ដោយការចាប់ខ្លួន និង ការប៉ះទង្គិចគ្នា រវាងអ្នកនេសាទ និង ទីភ្នាក់ងារឆ្មាំសមុទ្រ នៃប្រទេសទាំងពីរ។ ទោះជាយ៉ាងណាក៏ដោយ ឥឡូវនេះ ឥណ្ឌូណេស៊ី ទំនងជានឹងប្រឆាំងយ៉ាងខ្លាំង ចំពោះការការអះអាងរបស់ចិន នៅក្នុងសមុទ្រចិនខាងត្បូង។

ឥណ្ឌូណេស៊ី ជារឿយៗ តែងតែនិយាយថា ខ្លួនមិនមែនជាភាគីជម្លោះ នៅសមុទ្រចិនខាងត្បូង នោះទេ បើទោះជាខ្សែបន្ទាត់ចំនួន៩របស់ចិន ទាមទារកម្មសិទ្ធិ នៅលើដែនទឹក នៅក្នុងតំបន់ត្រួតស៊ីគ្នា ជាមួយតំបន់សេដ្ឋកិច្ចផ្ដាច់មុខរបស់ឥណ្ឌូណេស៊ី ទាមទារនៅភាគខាងជើង និង ខាងកើត ប្រជុំកោះណាទូណា (Natuna) យ៉ាងណាក៏ដោយ។

ឥណ្ឌូណេស៊ី និង វៀតណាម ជាប្រទេសមានកម្លាំងយោធាដ៏ខ្លាំងក្លា នៅក្នុងតំបន់អាស៊ាន តែងតែមានការព្រួយបារម្ភ អំពីជម្លោះ នៅក្នុងសមុទ្រចិនខាងត្បូង ខណៈក្រុងប៉េកាំង កំពុងតែបង្កើននូវឥទ្ធិពលយោធា នៅក្នុងតំបន់។ ជាមួយនឹងការភ័យខ្លាចចិន នោះ ហ្វីលីពិន បានរត់ទៅចាប់ដៃជាមួយនឹងជប៉ុន ដើម្បីបង្កើនចំណងទំនាក់ទំនងយោធា ឲ្យកាន់តែរឹងមាំ។

ស្របតាមទំនោររបស់ឥណ្ឌូណេស៊ី នៅក្នុងការដោះស្រាយជម្លោះជាមួយចិននោះ ប្រទេសដែនកោះមួយនេះ តែងតែពឹងផ្អែកយ៉ាងខ្លាំង ទៅលើការធ្វើពាណិជ្ជកម្មជាមួយចិន ហើយក៏ជាប្រភពវិនិយោគបរទេសដ៏ធំបំផុតរបស់ក្រុងហ្សាការតា ផងដែរ។ បើយោងតាមទីភ្នាក់ងារគយរបស់ចិន បានឲ្យដឹង ថា ទំហំពាណិជ្ជកម្ម នៅក្នុងឆ្នាំ២០២០ រវាងប្រទេសឥណ្ឌូណេស៊ី និង ចិន មានទំហំទឹកប្រាក់ ៧៨,៥ ពាន់លានដុល្លារ៕

សហរដ្ឋអាមេរិក ៖ កងទ័ពអាកាសអាមេរិកបានសហការជាមួយក្រុមហ៊ុន Reliable Robotics ដើម្បីកែលម្អយន្តហោះដឹកជញ្ជូនកងទ័ព ដោយដំឡើងប្រព័ន្ធការហោះហើរស្វ័យប្រវត្តិក្នុងចម្ងាយឆ្ងាយ និងអាចចុះចតខ្លួនវាបានដោយមិនចាំបាច់មានមនុស្សបញ្ជា ។

គម្រោងនេះមានគោលដៅកាត់បន្ថយការប្រើកម្លាំងមនុស្ស ដោយប្រើប្រាស់បច្ចេកវិទ្យាទំនើបជំនួសវិញ ខណៈវាអាចបំពេញភារកិច្ចឆាប់រហ័ស មានប្រសិទ្ធភាព និងគ្រប់ជ្រុងជ្រោយ ។ យន្តហោះបើកបរដោយស្វ័យប្រវត្តិអាចកាត់បន្ថយការស្លាប់របស់កងទ័ពក្នុងករណីយន្តហោះត្រូវសត្រូវវាយប្រហារលើអាកាស និងកាត់បន្ថយការចំណាយប្រាក់យ៉ាងច្រើនលើការហ្វឹកហាត់អ្នកបើកយន្តហោះផងដែរ ។

លោក David O’Brien អតីតឧត្តមសេនីយ៍ឯក និងជាអនុប្រធានជាន់ខ្ពស់ផ្នែកបច្ចេកវិទ្យាអាកាសចរណ៍នៃក្រុមហ៊ុន Reliable Robotics ថ្លែងថា ៖ «ទស្សនវិស័យរបស់យើង គឺការស្វែងរកប្រព័ន្ធបើកបរក្នុងចម្ងាយឆ្ងាយសម្រាប់យន្តហោះគ្រប់ប្រភេទ ។ កិច្ចសហការជាមួយកងទ័ពអាកាសអាមេរិក គឺផ្តោតលើប្រព័ន្ធបើកបរស្វ័យប្រវត្តិរបស់យន្តហោះ Jet ទំហំធំ ហើយវាជាដំណាក់កាលសំខាន់ក្នុងផែនការអភិវឌ្ឍរបស់យើង» ។

បច្ចុប្បន្ន យន្តហោះដឹកជញ្ជូនកងទ័ពដែលអាមេរិកប្រើប្រាស់ជាប្រចាំ និងមានការបញ្ជាពីមនុស្ស គឺ Lockheed Martin C-5 Galaxy និង Boeing C-17 Globemaster III ដែលអាចហោះហើរក្នុងចម្ងាយឆ្ងាយសម្រាប់ដឹកជញ្ជូនកងទ័ពអាមេរិកទៅកាន់សមរភូមិ ។ ការកែលម្អយន្តហោះដឹកជញ្ជូនកងទ័ព ដែលបំពាក់ដោយប្រព័ន្ធហោះហើរទំនើប មិនមែនជាគំនិតថ្មីទេ ប៉ុន្តែជាការយកបច្ចេកវិទ្យាការបើកបរដោយស្វ័យប្រវត្តិមកអនុវត្តជាមួយយន្តហោះកងទ័ព រួមទាំងបន្ថែមប្រសិទ្ធភាពពេលយន្តហោះត្រូវហោះឡើង និងចុះចតខ្លួនវា ដោយគ្មានការបញ្ជាពីមនុស្ស ។

ក្រៅពីការប្រើបច្ចេកវិទ្យាហោះហើរស្វ័យប្រវត្តិ កងទ័ពអាកាសអាមេរិកក៏បានត្រៀមយកបច្ចេកវិទ្យាបញ្ញាសិប្បនិម្មិត (AI) មកប្រើប្រាស់ដើម្បីអភិវឌ្ឍន៍ការហោះហើររបស់ខ្លួនឱ្យកាន់តែមានប្រសិទ្ធភាព និងសុវត្ថិភាពផងដែរ ៕ ប្រភព ៖ TNN Tech