រដ្ឋធានីវ៉ាស៊ីនតោន៖ ស្របពេលខួបមួយឆ្នាំ នៃសង្គ្រាមឈ្លានពានរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន នៅក្នុងប្រទេសអ៊ុយក្រែន នឹងមកដល់ នៅត្រឹមតែប៉ុន្មានថ្ងៃខាងមុខនេះ ប្រមុខការទូត សហរដ្ឋអាមេរិក បានចោទប្រកាន់ ដល់រដ្ឋាភិបាលក្រុងប៉េកាំង កំពុងតែពិចារណា លើការផ្ដល់គ្រឿងសព្វាវុធ ជួយដល់ប្រទេសរុស្ស៊ី ហើយសកម្មភាពបែបនេះ នឹងធ្វើឲ្យចិន ប្រឈមមុខនឹងផលវិបាកយ៉ាងធ្ងន់ធ្ងរ នឹកស្មានមិនដល់។

សារព័ត៌មាន Al Jazeera បានចេញផ្សាយ កាលពីថ្ងៃអាទិត្យ ទី១៩ ខែកុម្ភៈ ឆ្នាំ២០២៣ ថា លោក អេនតូនី ប៊ីលនខែន (Antony Blinken) រដ្ឋមន្រ្ដីក្រសួងការបរទេស សហរដ្ឋអាមេរិក បានចោទប្រកាន់ថា ចិន កំពុងតែពិចារណា ដល់ការផ្ដល់គ្រឿងយុទ្ធោបករណ៍របស់ខ្លួន ជួយដល់រុស្ស៊ី។ ជាមួយគ្នានេះ លោករដ្ឋមន្រ្ដី បានព្រមានដល់ក្រុងប៉េកាំង ថា ការផ្គត់ផ្គង់នូវគ្រឿងសឹកណាមួយ ជួយដល់ក្រុងមូស្គូ សម្រាប់ការធ្វើសង្គ្រាមឈ្លានពាន នៅលើទឹកដីរបស់អ៊ុយក្រេន នឹងបណ្ដាលឲ្យមានបញ្ហាធ្ងន់ធ្ងរ។

លោកប្រមុខការទូត សហរដ្ឋអាមេរិក រូបនេះ បានប្រាប់ដល់បណ្ដាញទូរទស្សន៍ និង វិទ្យុរបស់សហរដ្ឋអាមេរិក CBS ថា ចិន កំពុងតែពិចារណា លើកិច្ចគាំទ្រផ្ដល់អាវុធដ៏សាហាវរបស់ខ្លួន រាប់ចាប់តាំងពីគ្រាប់រំសេវ រហូតដល់គ្រឿងសព្វាវុធផ្សេងៗទៀត។

ដោយឡែក ការគាំទ្ររបស់សហរដ្ឋអាមេរិក កំពុងតែកសាង ទៅលើភាគីអាត្លង់ទិកទាំង២ ដើម្បីផ្ដល់ដល់អ៊ុយក្រែន ជាមួយនឹងយន្ដហោះចម្បាំងទំនើបៗ តាមមាត្រដ្ឋាន ឬ ស្ដង់ដាររបស់អង្គការណាតូ។ ជាមួយគ្នានេះដែរ ចក្រភពអង់គ្លេស បានបញ្ជាក់ ថា ក្រុងឡុងដ៍ នឹងផ្ដល់នូវការបណ្ដុះបណ្ដាល បើកយន្ដហោះចម្បាំង ដល់កងទ័ពអាកាសរបស់អ៊ុយក្រែន។

ទោះជាយ៉ាងណា ប្រទេសមហាអំណាចសហរដ្ឋអាមេរិក និង ចក្រភពអង់គ្លេស នៅតែស្ទាក់ស្ទើរ នៅក្នុងការប្រើប្រាស់កម្លាំងទ័ពអាកាសរបស់ពួកគេ តាមរបៀបដ៏សំខាន់មួយ ចាប់តាំងពីសង្គ្រាម នៅលើទឹកដីរបស់អ៊ុយក្រែន បានផ្ទុះឡើង កាលពីថ្ងៃទី២៤ ខែកុម្ភៈ ឆ្នាំ២០២២រហូតមក។

លោក លីនសេ ហ្ក្រាហាំ (Linsey Graham) សមាជិក ព្រឹទ្ធសភា សហរដ្ឋអាមេរិក បានបញ្ជាក់ ថា សមាជិកសភាអាមេរិក គាំទ្រយ៉ាងទូលំទូលាយ ដល់ការបណ្តុះបណ្តាលដល់កងទ័ពអាកាសរបស់អ៊ុយក្រែន ឲ្យចេះប្រើប្រាស់យន្ដហោះចម្បាំង F-16 ហើយគាត់ជឿ ថា រដ្ឋបាលរបស់លោកប្រធានាធិបតី ចូ បៃដិន (Joe Biden) នឹងយល់ព្រម នៅក្នុងពេលដ៏ឆាប់ៗខាងមុខនេះ។

សមាជិក ព្រឹទ្ធសភា មកពីគណបក្សសាធារណរដ្ឋ រូបនេះ បានថ្លែងទៅកាន់បណ្ដាញទូរទស្សន៍ ABC News ថា រូបគាត់ផ្ទាល់ មិនបានព្រួយបារម្ភ ថា យន្ដហោះចម្បាំង F-16 នឹងបង្កើនជម្លោះ ឲ្យកាន់តែរីករាលដាលធំឡើងនោះឡើយ។ ដូច្នេះ កុំខ្វល់ អំពីរឿងបង្កហេតុជាមួយប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin) ហើយក៏កុំខ្វល់ពីរឿងវាយពូទីន។

ការអំពាវនាវ ជំរុញឲ្យផ្គត់ផ្គង់យន្ដហោះចម្បាំងទំនើបៗរបស់លោកខាងលិច ជួយដល់ប្រទេសអ៊ុយក្រែន នោះ បានកើតឡើង ក្រោយពេលមានកិច្ចព្រមព្រៀង កាលពីខែមុន ដោយសារតែបារាំង ចក្រភពអង់គ្លេស សហរដ្ឋអាមេរិក និង អាល្លឺម៉ង់ បានសម្រេចផ្គត់ផ្គង់រថក្រោះប្រយុទ្ធធុនធ្ងន់ទំនើបៗរបស់ពួកគេ ជួយដល់ក្រុងកៀវ។

សហរដ្ឋអាមេរិក បានផ្ដល់ជំនួយយោធា មានទំហំទឹកប្រាក់ ប្រហែល៣០ពាន់លានដុល្លារ ជួយដល់ក្រុងកៀវ ចាប់តាំងពីការចាប់ផ្ដើមសង្គ្រាម កាលពីថ្ងៃទី២៤ ខែកុម្ភៈ ឆ្នាំ២០២២ តាមអ្វីដែលក្រុងមូស្គូ ហៅជា «ប្រតិបត្ដិការយោធាពិសេស» នៅលើទឹកដីរបស់អ៊ុយក្រែន។ ចំណែកក្រុមសម្ពន្ធមិត្តលោកខាងលិចមួយ ចំនួន បានបញ្ជាក់ ថា សម្ពន្ធមិត្តរបស់អ៊ុយក្រែន នឹងផ្ដោតលើយន្ដហោះចម្បាំងទំនើបៗតិច ជាងការផ្គត់ផ្គង់ភស្ដុភាជាមូលដ្ឋាន ដូចជា គ្រាប់កាំភ្លើងផ្ដោងជាដើម។

លោក ចូសេប ប័ររ៉ែល (Josep Borrell) ប្រធានគោលនយោបាយការបរទេសរបស់សហភាពអឺរ៉ុប បានចេញនូវការព្រមានយ៉ាងម៉ឺងម៉ាត់ អំពីការថយចុះនូវការផ្គត់ផ្គង់គ្រាប់កាំភ្លើង និង អាវុធស្រដៀងគ្នារបស់អ៊ុយក្រែន ខណៈក្រុងកៀវ កំពុងតែប្រយុទ្ធ ប្រឆាំងនឹងការឈ្លានពានរបស់រុស្ស៊ី។ បច្ចុប្បន្ន អ៊ុយក្រែនកំពុងតែស្ថិតក្នុងស្ថានភាពធ្ងន់ធ្ងរ ដោយសារតែកង្វះខាតគ្រាប់រំសេវ ដែលត្រូវតែដោះស្រាយឱ្យបានឆាប់ ហើយវាមានបញ្ហាជាច្រើន នៅប៉ុន្មានសប្តាហ៍ខាងមុខនេះ៕

ប្រទេសថៃ ៖ កីឡាករថៃ បួ ខាវ អ្នកប្រដាល់ល្បីល្បាញរបស់ប្រទេសថៃ ដែលមានតួនាទីក្នុងផ្នែកកងទ័ពជាអនុសេនីយ៍ឯក សម្បត្តិ បញ្ឆាមេឃ មានកិត្តិយសត្រូវបានគេអញ្ជើញធ្វើជាគ្រូពិសេសសម្រាប់កីឡា Muay Thai ក្នុងវគ្គបណ្តុះបណ្តាល Cobra Gold 2023 ចាប់ពីថ្ងៃទី២៧ ខែកុម្ភៈ ដល់ថ្ងៃទី១០ ខែមីនា ឆ្នាំ២០២៣ ។ វគ្គបណ្តុះបណ្តាល Cobra Gold ជាការហ្វឹកហាត់កងទ័ពរួមគ្នា និងមានលក្ខណៈធំបំផុតនៅភូមិភាគអាស៊ីអាគ្នេយ៍ ដោយកងទ័ពថៃ និងអាមេរិកក្នុងតំបន់ឥណ្ឌូប៉ាស៊ីហ្វិកបានរួមគ្នាធ្វើជាម្ចាស់ផ្ទះរៀបចំការហ្វឹកហាត់នៅប្រទេសថៃជារៀងរាល់ឆ្នាំ ។

អ្នកប្រដាល់ Muay Thai មានវ័យ៤០ឆ្នាំ បួ ខាវ បានបង្ហោះសារមួយថា ៖ «Muay Thai មានភាពអស្ចារ្យ និងមានការទទួលស្គាល់ម្តងទៀត ខណៈកងទ័ពអាមេរិកដែលមានសព្វាវុធទំនើបៗ និងខ្លាំងក្លា ក៏បានទទួលស្គាល់ប្រាជ្ញារបស់បុព្វបុរសថៃ ដូចជា វិទ្យាសាស្ត្រ ដៃទទេ ជើងទទេ គឺកណ្តាប់ដៃ ជើង ជង្គង់ និងកែងដៃ» ។

នៅក្រោមការហ្វឹកហាត់ Cobra Gold នឹងមានការកត់ត្រាពីការហ្វឹកហាត់ Muay Thai ក្នុងផែនការបណ្តុះបណ្តាលលើកនេះផងដែរ ដោយកីឡាករ បួ ខាវ នឹងធ្វើជាគ្រូបង្វឹក និងចូលរួមការបណ្តុះបណ្តាលផ្នែកឆត្រយោងយុទ្ធសាស្ត្រ ។

កីឡាករ បួ ខាវ លើកឡើងថា ៖ «Muay Thai គឺជានិមិត្តរូបរបស់ជនជាតិថៃ ដែលបង្ហាញពីភាពរឹងមាំ និងប្រាជ្ញាដ៏មានតម្លៃ ហើយជាមរតកបន្តពីដូនតាថៃតាំងពីយូរយាណាស់មកហើយ ។ លើសពីនេះ វាជាក្បាច់គុនដ៏ល្អបំផុតរបស់ពិភពលោក និងមានការទទួលស្គាល់ពីបណ្តាប្រទេសនានា» ។

គួរបញ្ជាក់ថា បួ ខាវ គឺជាកីឡាករថៃល្បីល្បាញក្នុងពិភពលោកមួយរូប និងមានអ្នកគាំទ្រប្រដាប់បរទេសជាច្រើនបានស្គាល់ ពីព្រោះ បួ ខាវ ធ្លាប់ធ្វើដំណើរទៅប្រដាល់នៅប្រទេសជាច្រើននៅទ្វីបអឺរ៉ុប និងអាស៊ី ដោយទទួលបានខ្សែក្រវ៉ាត់ជើងឯកជាច្រើន ។ មិនតែប៉ុណ្ណោះ បួ ខាវ បានកសាងកេរ្តិ៍ឈ្មោះដល់ប្រទេសថៃ ខណៈដណ្តើមបានជើងឯក K-1 World MAX ចំនួន២ដងនៅឆ្នាំ២០០៤ និងឆ្នាំ២០០៦ ។

ក្រៅពីនេះ បួ ខាវ បានដឹកនាំផ្សព្វផ្សាយ Muay Thai ទៅកាន់កងទ័ពអាមេរិកផងដែរ ដោយការបង្រៀនពីឥរិយាបទនៃការថ្វាយបង្គំគ្រូ ការបំពាក់អាវុធ រួមទាំងចូលរួមទាក់ទាញកងទ័ពអាមេរិកក្នុងការហ្វឹកហាត់រវាងកងទ័ពអាមេរិក និងថៃ (Hanuman Guardian 22) កាលពីឆ្នាំ២០២២ ៕ ប្រភព ៖ MGR Infographics

ប្រទេសជប៉ុន ៖ រដ្ឋាភិបាលជប៉ុនបានប្រកាសត្រៀមបង្កើតវិធីសាស្ត្រថ្មី និងងាយស្រួលជាងមុនក្នុងការផ្តល់ទិដ្ឋាការ (visa) ពិសេសសម្រាប់អ្នកមានប្រាក់ចំណូលខ្ពស់ និងនិស្សិតបញ្ចប់ការសិក្សាពីមហាវិទ្យាល័យលំដាប់ខ្ពស់នៅក្រៅប្រទេស ស្របពេលមានការប្រកួតប្រជែងអ្នកមកជំនាញពីក្រៅប្រទេសមកធ្វើការនៅជប៉ុន ។

គោលការណ៍ថ្មីនេះនឹងគ្របដណ្តប់លើអ្នកស្រាវជ្រាវ និងវិស្វករអន្តរជាតិដែលមានប្រាក់ចំណូលយ៉ាងតិច២០លានយេនក្នុង១ឆ្នាំ រួមទាំងនិស្សិតបានបញ្ចប់ការសិក្សាថ្នាក់អនុបណ្ឌិត ឬមានបទពិសោធន៍ធ្វើការរយៈពេល១០ឆ្នាំ ។ ជប៉ុននឹងចាប់ផ្តើមអនុវត្តគោលការណ៍នេះចាប់ពីខែមេសា ឆ្នាំ២០២៣ តទៅ ។

បច្ចុប្បន្ន រដ្ឋាភិបាលជប៉ុនបានអនុម័តផ្តល់ទិដ្ឋាការពិសេសរយៈពេល៥ឆ្នាំតាមរយៈប្រព័ន្ធផ្តល់ពិន្ទុ ដោយពិន្ទុនឹងផ្តល់ឱ្យផ្អែកតាមលក្ខណៈវិនិច្ឆ័យផ្សេងៗ រួមទាំងប្រវត្តិការសិក្សា ការធ្វើការ និងប្រាក់ចំណូលក្នុង១ឆ្នាំ ប៉ុន្តែគេមើលឃើញថា ប្រព័ន្ធផ្តល់ពិន្ទុនេះស្មុគស្មាញពេក ស្របពេលពិភពលោកកំពុងប្រកួតប្រជែងគ្នាទាក់ទាញអ្នកមានជំនាញមកធ្វើការ ។ ក្រៅពីនេះ រដ្ឋាភិបាលជប៉ុនបានសម្រេចចិត្តបង្កលក្ខណៈងាយស្រួលដល់យុវជនដែលមានសក្តានុពលខ្លាំងអាចស្វែងរកការងារធ្វើនៅប្រទេសជប៉ុនដោយងាយផងដែរ ។

និស្សិតបរទេសដែលបានបញ្ចប់ការសិក្សាពីមហាវិទ្យាល័យកំពូលដំបូងចំនួន១០០ ដែលរៀបចំឡើងដោយការិយាល័យជនអន្តោប្រវេសន៍របស់ជប៉ុន ក្នុងរយៈពេល៥ឆ្នាំកន្លងមក នៅពេលពួកគេធ្វើដំណើរមកដល់ប្រទេសជប៉ុន ពួកគេនឹងទទួលបានទិដ្ឋាការ Designated Activities ដែលអាចរស់នៅប្រទេសជប៉ុនរយៈពេល២ឆ្នាំ ដើម្បីស្វែងរកការងារធ្វើ ។

នាយកខុទ្ទកាល័យ Hirokazu Matsuno បានថ្លែងថា ប្រព័ន្ធថ្មីនេះ គឺជាការពង្រីកសិទ្ធិពិសេសដែលអំណោយផលដល់អ្នកមានជំនាញខ្ពស់ពីបរទេសអាចមកធ្វើការ និងរស់នៅប្រទេសជប៉ុន ៕

ប្រភព ៖ The better

កាហ្វេជាភេសជ្ជៈដែលពេញនិយមសម្រាប់មនុស្សទូទៅ ព្រោះពេល ផឹកហើយមានស្មារតីផលិតការងារបានកាន់តែល្អ។ យ៉ាងណាក្តី ផឹកកាហ្វេច្រើនអាចបណ្តាលឲ្យគេងមិនលក់ញ័រដៃឬបញ្ហាផ្សេងៗ។ ហេតុនេះបើអ្នកមិនចង់ផឹកកាហ្វេទេអាចផឹកភេសជ្ជៈ ទាំងនេះជំនួសបាន។

១.តែ
តែបៃតង តែអ៊ូឡុងឬ ប្រភេទ MilkTea … មានប្រសីទ្ធភាពជួយឲ្យស្មារតីស្រស់ស្រាយ អាចជំនួសកាហ្វេបាន។ ក្រៅពីនេះ ផឹកតែក៏ជួយឲ្យអ្នកមានសុខភាពល្អល្អប្រសើរផងដែរ។ ប្រសិនបើអ្នកចង់បំបាត់ទម្លាប់ផឹកកាហ្វេហើយចង់ទទួលបានស្មារតីស្វាងចេសអាចជ្រើសរើសយកការផឹកតែបាន។

២.កាកាវ
វាក៏ផ្ទុកជាតិកាហ្វេអ៊ីនដែរតែមិនច្រើនដូចកាហ្វេឡើយ។ សម្រាប់អ្នកមិនចង់ផឹកកាហ្វេចាស់អាចងាកមកសាកល្បងកាកាវបានព្រោះវាមានរសជាតិស្រាលផ្អែមសក្តិសមនឹងឲ្យអ្នកចូលចិត្តមិនខាន។ មើលមួយភ្លែតអាចច្រលំថាកាហ្វេតែបើនិយាយពីរសជាតិ វិញគឺឆ្ងាញ់មិនចាញ់កាហ្វេឡើយ។៣.សូដាលាយជាមួយទឹកផ្លែឈើ
ភេសជ្ជៈជួយឲ្យស្រស់ស្រាយបានលឿនបំផុតត្រូវបាននិយមតៗគ្នានោះគឺសូដា។ តែផឹកសូដាតែមួយមុខ
មិនធ្វើឲ្យទទួលបានរសជាតិឆ្ងាញ់ពិសារទេដូច្នេះហើយភាគច្រើនគេលាយជាមួយទឹកផ្លែឈើ។ លើសពីនេះអ្នកប្រាកដជាភ្ញាក់ផ្អើលមិនខានថាក្នុងសូដាក៏ផ្ទុកនូវកាហ្វេអ៊ីនផងដែរនិងគ្មា បរិមាណស្ករថែមទៀត។  ដូច្នេះអ្នកអាចផឹកបានយ៉ាងរីករាយជាមួយប្រភេទភេសជ្ជៈនេះ ។៤.ទឹកក្រូចឆ្មាត្រជាក់
ជាប្រភេទភេសជ្ជៈដែលមិនចាំបាច់ឲ្យអ្នកបារម្ភរឿងកាឡូរី។ ទឹកក្រូចឆ្មាជាមួយទឹកកកត្រជាក់ៗពិតជាផ្តល់នូវអារម្មណ៍ស្រស់ស្រាយនិងក្លិនប្រហើរពីក្រូចឆ្មាជួយសា្មរតីឲ្យបំពេញការងារបានយ៉ាងល្អ ។ ក្រៅពីនេះបើអ្នកកំពុងឈឺកឬមានអារម្មណ៍មិនសូវល្អគ្រាន់តែផឹកទឹកក្រូចឆ្មាមួយកែវច្បាស់ជាស្វារតីភ្លឺស្វាងមិនខាន៕

ស្លឹកឈូក គឺជារុក្ខជាតិម្យ៉ាងដែលនៅក្នុងទឹកបឹង ភាគច្រើននៃប្រជាជនកម្ពុជា ប្រើប្រាស់វាសម្រាប់ខ្ចប់ ឬវិច ឥវ៉ាន់ និងរុក្ខជាតិផ្សេងៗទៀត។

មិនទែប៉ុណ្ណោះ ដោយសារតែ​​ស្លឹក​ឈូប មិន​ជ្រាប​ទឹក​ ​អ្នក​ខ្លះអាច​ប្រើ​វា​សម្រាប់​ដាក់​ទឹក​ផឹកថែមទៀតផងដែរ។ ចុះមានដែលឆ្ងល់អត់ ​ហេតុអ្វី​បាន​ជា​វា​មិន​ជ្រាប​ទឹក​?

ស្លឹកឈូមមិនជ្រាបទឹក ដោយ​សារតែ​ស្រទាប់​ខាង​ក្រៅ​របស់វា មាន​បណ្ដុំ​កោសិកា​ដែល​មាន​ផ្ទុក​ដោយ​សារធាតុ​សែលុយឡូស។ សារធាតុនេះ មាន​ក្នុង​កោសិកា​នីមួយៗ​រួម​បញ្ចូល​គ្នា​ក្នុង​ទម្រង់​នៃ Kyulin (យូលីន)។  ស្រទាប់​នេះ​មាន​ជាតិ​អាស៊ីដ អាល់កុល និង​អាតូម​កាបូន​។

ពួក​វា​មិន​រលាយ​ក្នុង​ទឹក​នោះ​ទេ ដូច្នេះ​គ្មាន​ប្រតិកម្ម​គីមី​ដែល​កើត​ឡើង​លើ​ស្លឹក​ឈូក​ទេ​ ព្រោះ​​ស្រទាប់ Kyulin ​នឹង​ការពារ​ស្លឹក​ឈូក ​ពេល​អ្នក​បន្តក់​ទឹក​ចូល វា​នឹង​ទៅ​ជា​គ្រាប់ៗ​ទឹក រេ​ចុះ​ឡើង​លើ​ស្លឹក​ឈូក៕

ប្រភព: Scientific American 

ប្រទេសថៃ ៖ កាលពីថ្ងៃទី១៨ ខែកុម្ភៈ កន្លងមក លោក Smith Srison វេជ្ជបណ្ឌិតនៅមន្ទីរពេទ្យរ៉ាម៉ាធិបតី ប្រទេសថៃ បានបង្ហោះសារនៅលើហ្វេសប៊ុកផេក Smith Fa Srisont ពីករណីរកឃើញក្មេងពុលដោយសារការហូបចាហួយផ្សំពីកញ្ឆា ។ លោកបញ្ជាក់ថា គេបានរកឃើញផលប៉ះពាល់ដោយសារកញ្ឆា គឺមានអ្នកជំងឺវ័យក្មេងម្នាក់បានហូបចាហួយធ្វើពីកញ្ឆា ហើយមានអាការៈញ័រដើមទ្រូងធ្ងន់ធ្ងរ រហូតធ្វើឱ្យបេះដូងលោតញាប់ខុសធម្មតា និងត្រូវបានបញ្ជូនទៅព្យាបាលនៅមន្ទីរពេទ្យ ហើយអ្នកជំងឺប្រាប់ថា បានទិញចាហួយនេះពីហាងមួយនៅជិតសាលារៀន ដោយគិតថា ជានំធម្មតា ។

លោកវេជ្ជបណ្ឌិតបញ្ជាក់ថា ផលប៉ះពាល់ដោយសារកញ្ឆា មិនមែនមានតែចាហួយតែមួយមុខទេ យោងតាមគ្រូពេទ្យធ្វើការនៅបន្ទប់សង្គ្រោះបន្ទាន់ ឬពេទ្យវិកលចរិតនានាបញ្ជាក់ថា បានជួបករណីនេះជាច្រើននាពេលកន្លងមក ។

លោក Smith Srison បន្តថា បើរដ្ឋាភិបាលថៃ និងមន្ត្រីពាក់ព័ន្ធនឹងច្បាប់កញ្ឆាមិនចេញច្បាប់គ្រប់គ្រងការប្រើប្រាស់កញ្ឆាឱ្យបានច្រើនជាងនេះទេ ហេតុការណ៍អាក្រក់ផ្សេងទៀតនឹងកើតឡើងចំពោះពលរដ្ឋគ្រប់រូប ហើយនៅថ្ងៃមុខ នឹងមានក្មេងៗហូបនំកញ្ឆា ហើយប៉ះពាល់សុខភាពរហូតដល់ស្លាប់ទៀតផង ។ លើសពីនេះ នឹងមានអ្នកស្រវឹងកញ្ឆាហើយបើកបររថយន្តទៅបុកពលរដ្ឋរហូតដល់ស្លាប់ ក៏ដូចជាជួបអ្នកមានបញ្ហាផ្លូវចិត្តដោយសារពួកគេប្រើប្រាស់កញ្ឆា ហើយធ្វើបាបមនុស្សក្នុងក្រុមគ្រួសារ ។ លោកថ្លែងថា ៖ «បច្ចុប្បន្ន នៅប្រទេសថៃ គេបានពិនិត្យឃើញកញ្ឆាក្នុងទឹកនោមរបស់មនុស្សអាក្រក់ដើរធ្វើបាបអ្នកដទៃ ។ ខ្ញុំសូមសំណូមពរទៅបុគ្គលគ្រប់រូបដែលពាក់ព័ន្ធនឹងច្បាប់កញ្ឆានាំគ្នាពិចារណា និងដាស់តឿនសតិថា ត្រូវគ្រប់គ្រងការអនុវត្បច្បាប់ឱ្យបានច្រើនជាងនេះ យ៉ាងតិចណាស់ ក៏ស្មើប្រទេសផ្សេងដែរ» ។

លោក Smith Srison បន្ថែមថា ៖ «មនុស្សមួយចំនួនសួរថា ហេតុអ្វីមិនប្តឹងប៉ូលិសថា មានហាងលក់កញ្ឆា ? ខ្ញុំសូមឆ្លើយថា យើងមិនអាចប្តឹងប៉ូលិសបានទេ គឺត្រូវបង្ក្រាបតាមរយៈរដ្ឋបាលចំណីអាហារ និងឱសថ ឬនាយកដ្ឋានសុខាភិបាល ឬនាយកដ្ឋានឱសថបុរាណថៃ ព្រោះគេចាត់ទុកថា កញ្ឆាមិនមែនជាថ្នាំញៀនទេ វាជាអាហារ ឬគ្រឿងផ្សំពីធម្មជាតិ» ៕ ប្រភព ៖ thestandard

រដ្ឋធានីសេអ៊ូល៖ ក្រោយពេលកូរ៉េខាងជើង បានបាញ់មីស៊ីលអន្ដរទ្វីប បង្កនូវការគំរាមកំហែង ដល់សន្ដិសុខនៅក្នុងតំបន់មិនបានប៉ុន្មានម៉ោងផង សហរដ្ឋអាមេរិក បានដាក់ពង្រាយយន្ដហោះទម្លាក់គ្រាប់បែកយុទ្ធសាស្រ្ដ មានល្បឿនលឿនជាងសំឡេង ដើម្បីប្រឆាំងនឹងការគំរាមកំហែង ដល់ប្រទេសជាសម្ពន្ធមិត្តរបស់ខ្លួន នៅតំបន់អាស៊ីបូព៌ា។

សារព័ត៌មាន WJA បានចេញផ្សាយ កាលពីព្រឹក ថ្ងៃចន្ទ ទី២០ ខែកុម្ភៈ ឆ្នាំ២០២៣ ថា កូរ៉េខាងជើង បានបញ្ជាក់ កាលពីថ្ងៃអាទិត្យ ថា ការបាញ់សាកល្បងមីស៊ីលបាល្លិស្ទីកអន្ដរទ្វីបចុងក្រោយរបស់ខ្លួន សំដៅបង្កើនសមត្ថភាពវាយប្រហារ ដោយអាវុធនុយក្លេអ៊ែរដ៏គ្រោះថ្នាក់ និង បានគំរាមកំហែង ដល់ការបោះជំហានដ៏មានកម្លាំងខ្លាំងបន្ថែមទៀត ប្រឆាំងនឹងការធ្វើសមយុទ្ធយោធា រវាងកងទ័ពសហរដ្ឋអាមេរិក និង កូរ៉េខាងត្បូង នាពេលខាងមុខនេះ។

ជាការឆ្លើយតបវិញនោះ កងទ័ពសហរដ្ឋអាមេរិក កាលពីល្ងាច ថ្ងៃអាទិត្យ បានហោះហើរកងយន្ដហោះទម្លាក់គ្រាប់បែក មានល្បឿនលឿនជាងសំឡេងយ៉ាងវែង នៅក្នុងការបង្ហាញ អំពីការធ្វើសមយុទ្ធយោធារួចគ្នាដាច់ដោយឡែក ជាមួយនឹងយន្ដហោះចម្បាំងរបស់សម្ពន្ធមិត្ដកូរ៉េខាងត្បូង និង ជប៉ុន។

ការបាញ់សាកល្បងមីស៊ីលបាល្លិស្ទីកអន្ដរទ្វីប (ICBM) កាលពីថ្ងៃសៅរ៍សប្ដាហ៍មុននេះ ក៏ជាការបាញ់មីស៊ីលលើកទី១របស់កូរ៉េខាងជើង ចាប់តាំងពីថ្ងៃទី១ ខែមករា មក។ សកម្មភាពបែបនេះ បានបង្ហាញ ថា មេដឹកនាំរបស់កូរ៉េខាងជើង លោក គីម ជុងអ៊ុន (Kim Jong Un) កំពុងតែប្រើប្រាស់សមយុទ្ធរបស់គូប្រជែងរបស់គាត់ សម្រាប់ជាឱកាស ពង្រីកឃ្លាំងអាវុធនុយក្លេអ៊ែររបស់ក្រុងព្យុងយ៉ាង ដើម្បីស្វែងរកដំណោះស្រាយឲ្យមានទម្ងន់ នាពេលអនាគតជាមួយសហរដ្ឋអាមេរិក។

ជាមួយគ្នានេះ អ្នកជំនាញយោធាម្នាក់ បានអះអាង ថា កូរ៉េខាងជើង អាចនឹងព្យាយាម ធ្វើសមយុទ្ធប្រតិបត្តិការជាប្រចាំ ពាក់ព័ន្ធនឹងមីស៊ីលបាល្លិស្ទីកអន្ដរទ្វីបរបស់ក្រុងព្យុងយ៉ាង។ ចំណែកការបាញ់មីស៊ីលរបស់កូរ៉េខាងជើង ក៏ជាការបង្ហាញនូវការគំរាមកំហែង ដោយផ្ទាល់ ដល់សហរដ្ឋអាមេរិក ដោយសារតែសម្ពន្ធមិត្តនៅក្នុងតំបន់ កំពុងតែរៀបចំធ្វើសមយុទ្ធយោធា នៅក្នុងប្រទេសកូរ៉េខាងត្បូង។

ទីភ្នាក់ងារមជ្ឈមណ្ឌលសារព័ត៌មានផ្លូវការកូរ៉េ (KCNA) របស់ប្រទេសកូរ៉េខាងជើង បានបញ្ជាក់ ថា ក្រុងព្យុងយ៉ាង បានបាញ់មីស៊ីលបាល្លិស្ទីកអន្ដរទ្វីប Hwasong-15 (វ៉ាសុង-១៥) ហើយត្រូវបានរៀបចំភ្លាមៗ តាមបញ្ជាផ្ទាល់របស់លោក គីម ជុងអ៊ុន មេដឹកនាំកូរ៉េខាងជើង ដោយគ្មានការជូនដំណឹង ជាមុននោះឡើយ។ មីស៊ីល បានហោះ នៅក្នុងរយៈកម្ពស់ ៥ ៧៧០គីឡូម៉ែត្រ ដោយវាហោះបានចម្ងាយ ៩៩០គីឡូម៉ែត្រ នៅក្នុងរយៈពេល៦៧នាទី ខណៈវាបានវាយប្រហារ ទៅលើតំបន់ដែលបានកំណត់ទុក នៅក្នុងដែនទឹក រវាងឧបទ្វីបកូរ៉េ និង ជប៉ុន។

លោក អេខិត ផានដា (Ankit Panda) អ្នកជំនាញ មកពីអង្គការ Carnegie Endowment (កាណេហ្គី អែនឌូមែន) សម្រាប់សន្ដិភាពអន្ដរជាតិ មានមូលដ្ឋាន នៅក្នុងរដ្ឋធានីវ៉ាស៊ីនតោន សហរដ្ឋអាមេរិក បានអះអាង ថា លោក គីម ជុងអ៊ុន ទំនងជាបានកំណត់ ថា ភាពជឿជាក់ខាងបច្ចេកទេស នៃកងកម្លាំងមីស៊ីលបាល្លិស្ទីកអន្ដរទ្វីប នឹងជំរុញឲ្យសាកល្បង និង វាយតម្លៃគ្រប់គ្រាន់ ដើម្បីអនុញ្ញាតឱ្យមានសមយុទ្ធប្រតិបត្តិការជាប្រចាំ សម្រាប់មីស៊ីលប្រភេទនេះ»។

ជាការឆ្លើយតបយ៉ាងគឃ្លើនរបស់កូរ៉េខាងជើង នោះ កងទ័ពសហរដ្ឋអាមេរិក កាលពីល្ងាច ថ្ងៃអាទិត្យ បានបញ្ជូនយន្ដហោះទម្លាក់គ្រាប់បែក B-1B និង យន្ដហោះចម្បាំង ជាច្រើនប្រភេទផ្សេងទៀត ធ្វើសមយុទ្ធជាមួយនឹងយន្ដហោះចម្បាំងដ៏ទំនើបរបស់កូរ៉េខាងត្បូង និង ជប៉ុន នៅពីលើ និង ជិតឧបទ្វីបកូរ៉េ។ ទន្ទឹមគ្នានេះ កងទ័ពកូរ៉េខាងត្បូង ក៏បានបញ្ជាក់ នៅក្នុងសេចក្ដីថ្លែងការណ៍ កាលពីថ្ងៃអាទិត្យ ថា ការធ្វើសមយុទ្ធរបស់កងទ័ពអាកាសនេះ ចង់បញ្ជាក់ឡើងវិញ អំពីការប្ដេជ្ញាចិត្តរបស់ក្រុងវ៉ាស៊ីនតោន សម្រាបការធានាដល់សន្ដិសុខរបស់កូរ៉េខាងត្បូង។

ដោយឡែក កូរ៉េខាងជើង មានភាពរសើបយ៉ាងខ្លាំង ចំពោះការដាក់ពង្រាយយន្តហោះទម្លាក់គ្រាប់បែក B-1B របស់សហរដ្ឋអាមេរិក ព្រោះវាមានសមត្ថភាព ផ្ទុកអាវុធធម្មតាយ៉ាងច្រើន។ ស្របគ្នានេះ ក្រុងព្យុងយ៉ាង បានប្រឆាំងយ៉ាងខ្លាំងក្លា ចំពោះការធ្វើសមយុទ្ធយោធាជាបន្ដបន្ទាប់ ខណៈក្រុងសេអ៊ូល និង ក្រុងវ៉ាស៊ីនតោន មានផែនការធ្វើ នៅក្នុងរយៈពេលប៉ុន្មានសប្ដាហ៍ខាងមុខនេះ៕