ប្រទេសចិន ៖ Youon Technology ជាក្រុមហ៊ុនផលិតកង់មានទីតាំងនៅក្រុងឆាងចូវ ខេត្ត Jiangsu ភាគខាងកើតប្រទេសចិន បានបង្ហាញថា គំរូកង់ប្រភេទថ្មីរបស់ក្រុមហ៊ុន ដែលដើរដោយថាមពលអ៊ីដ្រូសែន និងអាចបត់បាន កំពុងតែចូលក្នុងសង្វាក់ផលិតកម្មនៅក្រុងឆាងចូវ ជាផ្លូវការហើយ ។

កង់ប្រភេទថ្មីនេះមានរូបរាងស្រដៀងគ្នានឹងកង់ទូទៅដែរ ប៉ុន្តែវាបានបំពាក់អ៊ីដ្រូសែន fuel cell និងឧបករណ៍ផ្ទុកអ៊ីដ្រូសែនមានសម្ពាធទាប ដោយវានឹងដើរតួនាទីបង្កើតថាមពលកម្លាំងសម្រាប់ជំរុញកង់ ។

បើប្រៀបធៀបជាមួយកង់អគ្គិសនីទូទៅដែលប្រើប្រាស់ថ្ម lithium គឺអ៊ីដ្រូសែន fuel cell មានគុណសម្បត្តិល្អជាង ដូចជា សុពលភាពនៃការប្រើប្រាស់មានរយៈពេលយូរជាង ហើយវាជាមិត្តជាមួយបរិយាកាសច្រើនជាង ដោយសារវាបង្កើតទឹកតែប៉ុណ្ណោះនៅពេលដំណើរការ ។

ក្រុមហ៊ុនផលិតកង់ប្រភេទថ្មីនេះបញ្ជាក់ថា កង់ប្រើប្រាស់អ៊ីដ្រូសែនជំនាន់ថ្មីនេះ ត្រូវការចំណាយថាមពលតាមកម្លាំងល្បឿនរបស់អ្នកជិះកង់ ហើយវានឹងបញ្ឈប់ការចំណាយថាមពលបន្ថែមនៅពេលកម្រិតល្បឿនស្មើ២៤គីឡូម៉ែត្រ/១ម៉ោង ។ កង់ជំនាន់ថ្មីអាចបត់បាននេះ ក្រុមហ៊ុននឹងដំណើរការផលិតនៅចុងខែមីនា ឆ្នាំ២០២៣ ហើយសង្ឃឹមថា នឹងអាចផលិតកង់បានចំនួន២០ម៉ឺនគ្រឿង/១ឆ្នាំ នៅត្រឹមឆ្នាំ២០២៥ ៕

ប្រភព ៖ beartaiBRIEF

ទីភ្នាក់ងារ TikTok ប្រចាំប្រទេសថៃបានព្រមានថា ខ្លួននឹងហាមឃាត់រាល់គណនីឃោសនារបស់គណបក្សនយោបាយទាំងអស់ ដើម្បីរក្សាសុវត្ថិភាពនៅអំឡុងពេលការបោះឆ្នោតរបស់ប្រទេសថៃនាពេលខាងមុខនេះ។

ប្រធានគោលនយោបាយសាធារណៈរបស់ថៃ លោក ស្រី Chanida Klyphun បានលើកឡើងថា៖
TikTok គឺជាវេទិកាកម្សាន្តដ៏ពេញនិយមនៅលើលោក ដូច្នេះវានឹងក្លាយជាកន្លែងឃោសនាគណបក្សណានយោបាយ ហើយវាក៏អាចជាបង្កជម្លោះតាមបណ្តាញអុីតធឺណេតរវាងអ្នកគាំទ្រគណបក្សណាមួយថែមទៀតផងដែរ”។

លោកស្រីបានសង្កត់ធ្ងន់ថា៖ “យើងនឹងរៀបចំនីតិវិធីឱ្យបានតឹងរឹងបំផុត ដើម្បីការពារគណបក្សនយោបាយពីការប្រើប្រាស់វេទិកាផ្សព្វផ្សាយព័ត៌មានក្លែងក្លាយ បង្កើតការគាំទ្រ ឬចំណេញពីការផ្សាយពាណិជ្ជកម្ម នៅលើបណ្តាញសង្គមមួយនេះ”។

ប្រទេសថៃ នឹងធ្វើការបោះឆ្នោតនាថ្ងៃទី៧ ខែឧសភា ខាងមុខនេះ ដោយលោក ប្រាយុទ្ធ នឹងត្រូវប្រឈមមុខជាមួយកូនស្រីលោកថាក់ សុីន សុីណាវ៉ាត់ត្រា អ្នកនាង ផាងតុងតាន សុីណាវ៉ាត់ត្រា (Paetongtarn Shinawatra) ដែលត្រូវបានគេព្យាករណ៍ថា ជាបេក្ខភាពមានភាគរយខ្ពស់ នឹងក្លាយជានាយករដ្ឋមន្រ្តីបន្ទាប់៕ប្រភព៖ Nation Thailand

ប្រទេសចិន ៖ នៅថ្ងៃទី២៣ ខែកុម្ភៈ BBC រាយការណ៍ថា អណ្តូងរ៉ែធ្យូងថ្មរបស់ក្រុមហ៊ុន Xinjiang Cole Mining បានបាក់រលំបណ្តាលឱ្យសង្កត់កម្មករជាច្រើននាក់នៅទីក្រុងអាឡាសាន ស្ថិតនៅភាគខាងជើងប្រទេសចិន កាលពីថ្ងៃទី២២ ខែកុម្ភៈ កន្លងមក ដែលធ្វើឱ្យកម្មករស្លាប់យ៉ាងតិច២នាក់ ហើយគេបានជួយសង្គ្រោះកម្មករចំនួន៦នាក់ចេញមក ។ ប្រធានាធិបតីចិន លោក ស៊ី ជិនពីង បានបញ្ជាទៅកាន់ភ្នាក់ងារសង្គ្រោះជាង២០០នាក់ឱ្យស្វែងរកកម្មករ៥៣នាក់ទៀតដែលបានជាប់ក្នុងអណ្តូងនេះ ។

តំបន់ម៉ុងហ្គោលីខាងក្នុង គឺជាទីកន្លែងសំខាន់មួយសម្រាប់ជីកយកធ្យូងថ្ម និងរ៉ែផ្សេងៗរបស់ចិន ខណៈចិនបានពឹងពាក់លើថាមពលធ្យូងថ្ម ។ វាតែងកើតគ្រោះថ្នាក់ជាញឹកញាប់នៅទីនេះ ហើយជាមូលហេតុធ្វើឱ្យកម្មករជាច្រើននាក់ស្លាប់ដោយសារការផ្ទុះឧស្ម័នមេតាន និងធូលីរ៉ែ ឬកម្មករស្លាប់ដោយសារលង់ទឹកក្នុងអណ្តូងជាដើម ។

គួរបញ្ជាក់ថា ប្រទេសចិនបានកើតគ្រោះថ្នាក់នៅក្នុងអណ្តូងរ៉ែជាញឹកញាប់ ដោយសារតែច្បាប់ និងវិធានការការពារសុវត្ថិភាពក្នុងឧស្សាហកម្មរ៉ែមានភាពធូររលុង ។ បើទោះជាពេលកន្លងមក រដ្ឋាភិបាលចិនបានព្យាយាមគ្រប់គ្រងវិធានការការពារសុវត្ថិភាព និងបិទអណ្តូងរ៉ែទំហំតូចគ្មានស្តង់ដារអស់ជាច្រើនកន្លែងក្តី ប៉ុន្តែនៅតែកើតសោកនាដកម្មក្នុងអណ្តូងរ៉ែជាញឹកញាប់ ។ ជាក់ស្តែង កាលពីខែធ្នូ ឆ្នាំ២០២០ កន្លងមក មានហេតុការណ៍បែកធ្លាយកាបូនម៉ូណូអុកស៊ីតក្នុងអណ្តូងរ៉ែធ្យូងថ្ម បណ្តាលឱ្យកម្មករស្លាប់ចំនួន២៣នាក់ ។ លើសពីនេះ កាលពីខែមករា ឆ្នាំ២០២១ ក៏មានហេតុការណ៍ផ្ទុះក្នុងអណ្តូងរ៉ែមាសនៅខេត្តសានដុង ធ្វើឱ្យកម្មករស្លាប់អស់១០នាក់ផងដែរ ៕

ប្រភព ៖ khaosod

នាយករដ្ឋមន្ត្រីថៃ លោកប្រាយុទ្ធ ចាន់អូចា (Prayut Chan-o-cha) បានសន្យាកាលពីថ្ងៃពុធថា៖ “លោកនឹងហាមឃាត់ការនាំចូលកាកសំណល់ប្លាស្ទិកចាប់ពីឆ្នាំ២០២៥ ប្រសិនបើគាត់ជាប់ឆ្នោតម្តងទៀត”។

លោកក៏បានសង្កត់ធ្ងន់ថែមទៀតថា ៖ “ថៃជាប្រទេសកំពុងអភិវឌ្ឍន៍ មិនមែនជាកន្លែងចាក់សំរាមសម្រាប់ប្រទេសដទៃនោះទេ”។

កាលពីឆ្នាំ២០២០ រដ្ឋាភិបាលបានកាត់បន្ថយការនាំចូលកាកសំណល់ប្លាស្ទិក ដើម្បីផ្គត់ផ្គង់រោងចក្រកែច្នៃឡើងវិញនៅខាងក្រៅតំបន់សេដ្ឋកិច្ចពិសេស។ ក៏ប៉ុន្តែមកដល់ឆ្នាំ២០២២ ការនាំចូលកាកសំណល់ប្លាស្ទិក ហាក់បីដូចជាមានកម្រិតខ្ពស់ ដែលធ្វើឱ្យប្រជាពលរដ្ឋមានការមិនពេញចិត្តជាខ្លាំង ហើយបានបន្ទោសរដ្ឋាភិបាល ដោយលើកឡើងថា៖ “យកកាកសំណល់បរទេសមកចោលក្នុងប្រទេសខ្លួន”។

តែយ៉ាងណាមិញ ការ​នាំ​ចូល​សំណល់​ប្លាស្ទិក​ក្នុង​ឆ្នាំ ២០២៣ និង​ឆ្នាំ ២០២៤ នឹងមានតែសម្រាប់​រោងចក្រ​កែច្នៃ​ចំនួន១៤ នៅ​តំបន់​សេដ្ឋកិច្ច​ តែប៉ុណ្ណោះ ពិសេស​នឹង​ត្រូវ​កំណត់​ត្រឹម ៣៧២ ៩៩៤ តោន​សម្រាប់​ឆ្នាំ​ទី ១ និង​ពាក់​កណ្ដាល​ឆ្នាំ​ទី ២។

លុះដល់ឆ្នាំ២០២៥ ថៃ នឹងមិននាំចូលកាកសំណល់ប្លាស្ទិករបស់បរទេសទៀតនោះទេ ដោយពួកគេនឹងយកកាកសំណល់ប្លាស្ទិកក្នុងស្រុក មកកែច្នៃជំនួសវិញ៕

ប្រភព៖ Nation Thailand

ហុងកុង ៖ លោក Paul Chan រដ្ឋមន្ត្រីក្រសួងហិរញ្ញវត្ថុហុងកុង បានប្រកាសអំពីថវិកាប្រចាំឆ្នាំ២០២៣-២០២៤ ថា ហុងកុងនឹងផ្តល់ប្រាក់ដល់ពលរដ្ឋរបស់ខ្លួនម្តងទៀត ដើម្បីគាំទ្រការងើបឡើងវិញនៃការធ្លាក់ចុះសេដ្ឋកិច្ចហុងកុង ដោយសារវិធានការទប់ស្កាត់ការឆ្លងរាលដាលនៃជំងឺកូវីដ-១៩ កន្លងមក ។

ហុងកុង គឺជាមជ្ឈមណ្ឌលកណ្តាលផ្នែកហិរញ្ញវត្ថុលើពិភពលោក នឹងចេញប័ណ្ណក្នុងតម្លៃ៥.០០០ដុល្លារហុងកុងដល់ពលរដ្ឋពេញវ័យគ្រប់រូបនៅឆ្នាំ២០២៣នេះ ប៉ុន្តែចំនួនប្រាក់ខាងលើនៅសល់ត្រឹមតែពាក់កណ្តាលប៉ុណ្ណោះ បើធៀបនឹងប្រាក់ដែលរដ្ឋាភិបាលហុងកុងធ្លាប់ផ្តល់ឱ្យពលរដ្ឋកាលពីឆ្នាំ២០២២ ។ រដ្ឋមន្ត្រីហិរញ្ញវត្ថុព្យាយាមកាត់បន្ថយការចំណាយនានា ខណៈហុងកុងបានចំណាយប្រាក់ជាច្រើនផ្តល់ឱ្យពលរដ្ឋខ្លួន ក្នុងអំឡុងពេលជំងឺកូវីដរាតត្បាតនៅហុងកុង ។

លោក Paul Chan បានថ្លែងទៅកាន់សមាជិកសភាថា ហុងកុងកំពុងតែស្ថិតក្នុងដំណាក់កាលងើបឡើងវិញនៃសេដ្ឋកិច្ច ដោយហុងកុងមិនចាំបាច់រឹតបន្តឹងលើការត្រួតពិនិត្យជំងឺកូវីដទៀតទេ ហើយសង្ឃឹមថា សេដ្ឋកិច្ចនៅឆ្នាំ២០២៣នេះ នឹងរីកលូតលាស់រវាងពី៣,៥% ទៅ៥,៥% ក្រោយពីសេដ្ឋកិច្ចបានធ្លាក់ចុះ៣,៥% កាលពីឆ្នាំ២០២២ ។

គួរបញ្ជាក់ថា ហុងកុងបានបង្កើនទំនាក់ទំនងពាណិជ្ជកម្មឆ្លងព្រំដែនជាមួយចិន ក្រោយពីលុបចោលវិធានការរឹតបន្តឹងត្រួតពិនិត្យជំងឺកូវីដ ដោយហុងកុងបានចំណាយប្រាក់ប្រមាណជាង៦០ម៉ឺនលានដុល្លារហុងកុងសម្រាប់គម្រោងជំនួយសង្គ្រោះកូវីដក្នុងរយៈពេល៣ឆ្នាំកន្លងមក ធ្វើឱ្យហុងកុងប្រឈមនឹងឱនភាពថវិកា ៕

ប្រភព ៖ TNN World