ប្រទេសចិន ៖ កាលពីថ្ងៃទី៧ ខែមេសា លោកស្រី Zhu Fenglian អ្នកនាំពាក្យការិយាល័យកិច្ចការតៃវ៉ាន់របស់ចិនបានថ្លែងថា ការបង្រួបបង្រួមទឹកដីប្រទេសចិនតែមួយ នឹងទទួលបានជោគជ័យយ៉ាងពិតប្រាកដ ។ លោកស្រីបានដាស់តឿនគណបក្ស Democratic Progressive ឱ្យលុបចោលគោលការណ៍បែងចែកទឹកដី និងប្រឆាំងការប្រគល់ឯករាជ្យទៅឱ្យតៃវ៉ាន់ផងដែរ មិនថាក្នុងវិធីណាទេ ។

ប្រទេសចិនបានប្រើប្រាស់វិធានការដាច់ខាតដើម្បីជំទាស់ការលូកដៃពីប្រទេសខាងក្រៅ និងការទាមទារបំបែកខ្លួនរបស់តៃវ៉ាន់ ។ លើសពីនេះ ចិនបានអំពាវនាវឱ្យអាមេរិកអនុវត្តតាមគោលការណ៍ប្រទេសចិនតែមួយយ៉ាងពិតប្រាកដ ដោយអនុវត្តនូវបទប្បញ្ញត្តិសេចក្តីថ្លែងការណ៍រួមចំនួន៣ច្បាប់រវាងប្រទេសចិន និងអាមេរិក ព្រមទាំងដោះស្រាយបញ្ហាពាក់ព័ន្ធនឹងតៃវ៉ាន់យ៉ាងប្រុងប្រយ័ត្ន ។

ក្រោយពីអ្នកសារព័ត៌មានសួរពីករណីលោកស្រី Tsai Ing-wen មេដឹកនាំតៃវ៉ាន់បានធ្វើដំណើរត្រឡប់មកកាន់តៃវ៉ាន់វិញ តើប្រទេសចិនយល់ឃើញយ៉ាងណាអំពីការធ្វើដំណើរទស្សនកិច្ចទៅកាន់ទឹកដីអាមេរិករបស់មេដឹកនាំតៃវ៉ាន់រូបនេះ ? លោកស្រី Zhu Fenglian ឆ្លើយតបថា យើងបានបញ្ជាក់ច្រើនដងហើយអំពីគោលជំហរប្រទេសចិនតែមួយ ហើយការទៅកាន់ទឹកដីអាមេរិករបស់លោកស្រី Tsai Ing-wen អាចធ្វើឱ្យគ្រប់គ្នាមើលឃើញយ៉ាងច្បាស់ថា វាគ្រាន់តែជាលេសប៉ុណ្ណោះ ប៉ុន្តែការពិត តៃវ៉ាន់ចង់ពឹងពាក់អាមេរិកក្នុងការស្វែងរកឯករាជ្យ និងផ្តាច់ខ្លួនចេញពីប្រទេសចិន ។

កាលពីពេលកន្លងមក លោកស្រី Zhu Fenglian បានថ្លែងថា គណបក្ស Democratic Progressive តែងជំទាស់នឹងគោលការណ៍ប្រទេសចិនតែមួយរហូតមក ដោយពួកគេសុខចិត្តធ្វើជាអ្នកចាញ់ប្រៀបអាមេរិក ដើម្បីផលប្រយោជន៍ផ្ទាល់ខ្លួនផ្នែកនយោបាយ ។ ប៉ុន្តែជាចុងក្រោយ គណបក្សនេះបានត្រឹមតែជំរុញឱ្យតៃវ៉ាន់ធ្លាក់ក្នុងគ្រោះថ្នាក់នៃសង្គ្រាម និងនាំមកនូវគ្រោះថ្នាក់យ៉ាងធ្ងន់ធ្ងរដល់ពលរដ្ឋតៃវ៉ាន់ ៕

ប្រភព ៖ China face

ប្រទេសចិន ៖ អ្នកលេងបណ្តាញសង្គមនៅចិនបានចែកចាយវីដេអូមួយនៅទីក្រុង Chengdu ខេត្ត Sichuan ដែលមានស្ត្រីម្នាក់ពាក់អាវឆ្នូតពណ៌ផ្កាឈូក ពាក់ស្បែកជើងកវែង ព្រមទាំងមានក្រណាត់ចងចង្កេះការពារភាពកខ្វក់ ប៉ុន្តែស្ត្រីរូបនេះបានចុះពីរថយន្ត Bentley ជារថយន្តទំនើបមានតម្លៃថ្លៃ ។

កាលពីថ្ងៃទី៤ ខែមេសា កន្លងមក គេបានចែកចាយវីដេអូមួយបង្ហោះនៅក្នុង Weibo និងមានការចុចទស្សនាជាង៨,៤លានដង ហើយការបង្ហោះនេះបានសរសេរថា ៖ «អ្វីដែលស្ត្រីរូបនេះខ្វះ មិនមែនប្រាក់ទេ ប៉ុន្តែគាត់ចង់ធ្វើការដើម្បីបំពេញពេលវេលារបស់ខ្លួន» ។

តាមការចុះផ្សាយរបស់សារព័ត៌មានចិន Oriental Daily News និង The China Times ថា ស្ត្រីរូបនេះជាអ្នកមានទ្រព្យសម្បត្តិច្រើន ប៉ុន្តែបានមកលាងចានឱ្យគេនៅក្នុងហាងមួយ ព្រោះមិនចង់ចំណាយពេលវេលាឥតប្រយោជន៍ប៉ុណ្ណោះ ។

ស្ត្រីរូបនេះទទួលស្គាល់ថា ការតាំងចិត្តរបស់ខ្លួនមកធ្វើការក្នុងហាងលក់អាហារនេះ គឺមិនមែនចង់រកប្រាក់នោះទេ ប៉ុន្តែខ្លួនធ្វើដើម្បីកុំឱ្យពេលវេលាកន្លងផុតទៅឥតប្រយោជន៍ ព្រោះការនៅផ្ទះគួរឱ្យធុញទ្រាន់ណាស់ ហើយមានអារម្មណ៍ថា មិនសប្បាយចិត្តទេ បើថ្ងៃណាមិនបានលាងចាន ។ ចំណែកកូនស្រីរបស់ស្ត្រីនេះនិយាយថា នាងមិនអាចហាមឃាត់ម្តាយរបស់នាងមិនឱ្យធ្វើការទេ ដូច្នេះ នាងក៏យល់ព្រមបើករថយន្តជូនម្តាយទៅធ្វើការ និងជូនមកផ្ទះវិញ ។

អ្នកលេងបណ្តាញសង្គមចិនមួយចំនួនបានសរសើរស្ត្រីនេះពីការព្យាយាមធ្វើការ និងប្រើប្រាស់ពេលវេលាយ៉ាងមានអត្ថន័យ ក្នុងនោះអ្នកលេងបណ្តាញសង្គមម្នាក់និយាយថា ៖ «នៅពេលអ្នកមិនខ្វះប្រាក់ចាយ អ្នកនឹងមានក្តីសុខនូវអ្វីដែលអ្នកបានធ្វើ» ៕

ប្រភព ៖ The standard wealth

ប្រទេសវៀតណាម ៖ សារព័ត៌មានរ៉យទ័របានរាយការណ៍ថា រដ្ឋាភិបាលវៀតណាមនិយាយថា នឹងស៊ើបអង្កេតប្រតិបត្តិការរបស់ TikTok ក្នុងប្រទេសរបស់ខ្លួន ចាប់ពីខែឧសភា ឆ្នាំ២០២៣ តទៅ ដើម្បីឱ្យប្រាកដចិត្តថា កម្មវិធីនេះអនុវត្តតាមការគ្រប់គ្រងខ្លឹមសារ ការបង់ពន្ធ និងគោលនយោបាយពាណិជ្ជកម្ម ។

មន្ត្រីវៀតណាមបញ្ជាក់ថា កម្មវិធីពេញនិយមរបស់ចិនដែលផ្តល់សេវាកម្មវីដេអូខ្លីៗនេះ បានចែកចាយវីដេអូមិនសមរម្យជាច្រើន ។ មន្ត្រីរូបនេះនិយាយថា ៖ «TikTok, Facebook និង YouTube ជាបណ្តាញសង្គមគ្មានព្រំដែន និងមានស្តង់ដារអន្តរជាតិ ប៉ុន្តែបណ្តាញសង្គមទាំងនេះត្រូវតែអនុវត្តតាមច្បាប់ក្នុងស្រុករបស់វៀតណាម ទាំងផ្នែកខ្លឹមសារ និងការបង់ពន្ធ» ។

កាលពីខែកុម្ភៈ ឆ្នាំ២០២៣ កន្លងមក ក្រុមហ៊ុន TikTok និយាយថា ភ្នាក់ងារផ្សព្វផ្សាយព័ត៌មានអេឡិចត្រូនិកវៀតណាមបានជូនដំណឹងមកកាន់ក្រុមហ៊ុនថា នៅត្រីមាសទី២ ឆ្នាំ២០២៣ គណៈប្រតិភូរដ្ឋាភិបាលនឹងមកពិនិត្យមើលការិយាល័យរបស់ក្រុមហ៊ុន ។ ក្រុមហ៊ុន TikTok នៅវៀតណាមបានបញ្ជាក់តាមអ៊ីម៉ែលថា ៖ «វាជាការស៊ើបអង្កេតរបស់រដ្ឋាភិបាលវៀតណាមតាមការគ្រោងទុក និងស្របតាមច្បាប់វៀតណាមទៅលើក្រុមហ៊ុនទាំងអស់ដែលធ្វើការនៅប្រទេសនេះ មិនមែនមានតែ TikTok មួយទេ» ។

ក្រុមហ៊ុនបញ្ជាក់ថា TikTok បានលុបវីដេអូចំនួន១,៧លានកាលពីត្រីមាសទី៤ ឆ្នាំ២០២២ តាមការស្នើសុំរបស់រដ្ឋាភិបាលវៀតណាម ដោយសារត្រូវគេមើលឃើញថា វីដេអូទាំងនេះបំពានគោលនយោបាយរបស់រដ្ឋាភិបាល ។ ក្រុមហ៊ុនបញ្ជាក់ទៀតថា ខ្លួនបានកែប្រែគោលការណ៍ណែនាំ ហើយសង្ឃឹមថា នឹងអនុវត្តចាប់ពីថ្ងៃទី២៤ ខែមេសា ដើម្បីឱ្យកាន់តែមានតម្លាភាពផ្នែកច្បាប់ ។

បើតាមទិន្នន័យរបស់ក្រុមហ៊ុនស្រាវជ្រាវលើកឡើងថា មានពលរដ្ឋវៀតណាមអាយុចាប់ពី១៨ឆ្នាំឡើងទៅបានប្រើប្រាស់កម្មវិធី TikTok ប្រមាណ៥០លាននាក់ ៕

ប្រភព ៖ mgronline

ប្រទេសទុយនេស៊ី ៖ ទុយនេស៊ី ជាប្រទេសស្ថិតនៅអាហ្វ្រិកខាងជើងបានជួបគ្រោះមហន្តរាយធ្ងន់ធ្ងរបំផុត ដោយសារបរិមាណទឹកក្នុងទំនប់ធំៗក្នុងប្រទេសបានរីងស្ងួតទាំងអស់ ។ រដ្ឋាភិបាលបានប្រកាសផ្តល់ទឹកស្អាតដល់ពលរដ្ឋ រួមទាំងហាមពលរដ្ឋយកទឹកទៅប្រើប្រាស់ក្នុងចម្ការទៀតផង ។

ទំនប់ទឹកជាច្រើនកន្លែងនៅប្រទេសនេះបានរីងស្ងួតទឹកអស់ ហើយពលរដ្ឋត្រូវចំណាយប្រាក់ដើម្បីទិញទឹកប្រើប្រាស់ ដោយសាររដ្ឋាភិបាលប្រកាសផ្អាកការផ្គត់ផ្គង់ទឹក៧ម៉ោងក្នុង១យប់ ។ ប្រទេសទុយនេស៊ីបានប្រឈមនឹងគ្រោះរាំងស្ងួតខ្លាំងក្លាបំផុតក្នុងប្រវត្តិសាស្ត្រអស់រយៈពេល៤ឆ្នាំមកហើយ រហូតធ្វើឱ្យខ្វះខាតទឹកប្រើប្រាស់ទូទាំងប្រទេសតែម្តង ។ ជាមួយគ្នានេះ រដ្ឋាភិបាលបានប្រើប្រាស់វិធានការផ្គត់ផ្គង់ទឹកស្អាតនៅខែមីនា ឆ្នាំ២០២៣ និងហាមពលរដ្ឋប្រើប្រាស់ទឹកក្នុងផ្នែកកសិកម្ម រហូតដល់ថ្ងៃទី៣០ ខែកញ្ញា ។

ពលរដ្ឋភាគច្រើនបានយកទឹកពីអណ្តូងក្នុងភូមិទៅប្រើប្រាស់ ប៉ុន្តែត្រូវត្រងវាឱ្យស្អាតសិន មុននឹងយកមកផឹក និងប្រើប្រាស់ក្នុងផ្ទះបាយ ។ ពលរដ្ឋក្នុងភូមិបានជួបបញ្ហាលំបាកជាខ្លាំង ដោយសារខ្វះខាតទឹកប្រើប្រាស់ជាញឹកញាប់ ។ ពួកគេនិយាយថា គ្មានទឹកសម្រាប់បោកគក់ខោអាវទេ ហើយពួកគេត្រូវរស់នៅកខ្វក់បែបនេះជាច្រើនខែទៀត ហើយត្រូវប្រើប្រាស់ទឹកដោយសន្សំសំចៃបំផុត ។

ក្រសួងកសិកម្មបានប្រកាសថា ហាមពលរដ្ឋយកទឹកស្អាតទៅលាងរថយន្ត ស្រោចដើមឈើ និងលាងផ្លូវ ហើយបើអ្នកណាល្មើសនឹងបម្រាមនេះ នឹងត្រូវពិន័យជាប្រាក់ ព្រមទាំងដាក់ពន្ធនាគារចាប់ពី៦ថ្ងៃ ដល់៦ខែ ។

គេបានកាត់បន្ថយការផ្គត់ផ្គង់ទឹកស្អាតពេលយប់ក្នុងតំបន់មួយចំនួននៅក្រុងទុយនីស និងទីក្រុងផ្សេងៗអស់រយៈពេលជាង២សប្តាហ៍មកហើយ ។ វិធានការនេះបានធ្វើឱ្យពលរដ្ឋមិនពេញចិត្តជាខ្លាំង ដោយសារត្រូវរស់នៅដោយគ្មានទឹកប្រើប្រាស់ ខណៈពួកគេកំពុងរងផលប៉ះពាល់ដោយសារអតិផរណា និងសេដ្ឋកិច្ចធ្លាក់ចុះស្រាប់ទៅហើយ ។

ជាមួយគ្នានេះ មានការរាយការណ៍ថា ទំនប់ទឹក Sidi Salem ស្ថិតនៅភាគខាងជើងប្រទេស ដែលគេចាត់ទុកថា ជាកន្លែងផលិតទឹកស្អាតសំខាន់មួយសម្រាប់ចែកចាយទៅកាន់តំបន់ជាច្រើន ពេលនេះ បរិមាណទឹកក្នុងទំនប់បានស្រកចុះនៅសល់ត្រឹម១៦%ប៉ុណ្ណោះ ។ ទំនប់ទឹកនេះអាចផ្ទុកទឹកបានចំនួន៥៨០លានម៉ែត្រគូប ៕

ប្រភព ៖ Tnn earth