ប្រទេសវៀតណាម ៖ មានសេចក្តីរាយការណ៍ពីភ្នាក់ងារនានាថា រោងចក្រផលិតស្បែកជើងកីឡាធំបំផុតមួយនៅប្រទេសវៀតណាម ដែលបានផលិតទំនិញឱ្យម៉ាកល្បីៗដូចជា Nike និង Adidas នឹងត្រៀមកាត់បន្ថយបុគ្គលិករបស់ខ្លួនជាច្រើនពាន់នាក់នៅចុងខែកុម្ភៈនេះ បន្ទាប់ពីចំនួនការបញ្ជាទិញធ្លាក់ចុះខ្លាំង ។

សារព័ត៌មាន AFP បានទទួលឯកសារបញ្ជាក់ពីភ្នាក់ងារការងាររបស់ក្រុងហូជីមិញថា ក្រុមហ៊ុនវៀតណាម Baoyuan ដែលជាក្រុមហ៊ុនបុត្រសម្ព័ន្ធរបស់ Baochen Group របស់តៃវ៉ាន់ ប្រកាសថា នឹងបញ្ឈប់បុគ្គលិកចំនួន៣.០០០នាក់ ហើយនឹងមិនបន្តកិច្ចសន្យាការងារជាមួយបុគ្គលិកចំនួន៣.០០០នាក់ទៀត ដោយសារនៅឆ្នាំ២០២៣នេះ មានការបញ្ជាទិញទំនិញតិចតួចពេក ។ គួរបញ្ជាក់ថា រោងចក្រ Baoyuan នៅក្រុងហូជីមិញ មានបុគ្គលិកប្រមាណ៥ម៉ឺននាក់ ។

វៀតណាមជាប្រទេសមួយក្នុងចំណោមប្រទេសនាំចេញសម្លៀកបំពាក់ ស្បែកជើង និងគ្រឿងសង្ហារិមធំបំផុតរបស់ពិភពលោក ហើយវៀតណាមបានរងផលប៉ះពាល់ខ្លាំងពីការចាយវាយធ្លាក់ចុះរបស់អ្នកប្រើប្រាស់ទូទាំងពិភពលោក ដោយសារតែការចំណាយខ្ពស់ក្នុងជីវភាពប្រចាំថ្ងៃនៅអឺរ៉ុប និងអាមេរិក ។

សហជីពកម្មករវៀតណាមរាយការណ៍ថា នៅត្រីមាសទី៤ ឆ្នាំ២០២២ ការបញ្ជាទិញទំនិញពីអាមេរិកបានធ្លាក់ចុះពី៣០% ទៅ៤០% ហើយការបញ្ជាទិញពីតំបន់អឺរ៉ុបបានធ្លាក់ចុះរហូតដល់៦០% បើធៀបនឹងរយៈពេលដូចគ្នានៅឆ្នាំ២០២១ ៕

ប្រភព ៖ AECconnect

តៃវ៉ាន់ ៖ ប្រធានាធិបតីតៃវ៉ាន់ លោកស្រី Tsai Ing-wen បានជជែកពិភាក្សាជាមួយសមាជិកសភាតំណាងរាស្ត្រអាមេរិក ដែលបានធ្វើដំណើរមកកាន់ក្រុងតៃប៉ិ ដោយលោកស្រីបញ្ជាក់ថា តៃវ៉ាន់នឹងជំរុញការផ្លាស់ប្តូរផ្នែកកងទ័ពជាមួយអាមេរិក ដើម្បីគ្រប់គ្រងការពង្រីកអំណាចផ្តាច់ការ ។

លោកស្រី Tsai Ing-wen បានថ្លែងក្នុងកិច្ចពិភាក្សាជាមួយគណៈប្រតិភូអាមេរិកនៅការិយាល័យប្រធានាធិបតីនៅក្រុងតៃប៉ិថា តៃវ៉ាន់ និងអាមេរិកនៅតែបន្តជំរុញការផ្លាស់ប្តូរកងទ័ព ហើយតៃវ៉ាន់នឹងបង្កើនការសហការជាមួយអាមេរិក និងប្រទេសសម្ព័ន្ធមិត្តប្រជាធិបតេយ្យផ្សេងទៀត ដើម្បីប្រឈមមុខនឹងស្ថានការណ៍ពិភពលោក ទាំងការពង្រីកអំណាចផ្តាច់ការ និងការបម្រែបម្រួលអាកាសធាតុ ។

ទោះយ៉ាងណា មេដឹកនាំតៃវ៉ាន់មិនបានថ្លែងលម្អិតទេថា ការផ្លាស់ប្តូរកងទ័ពនោះពាក់ព័ន្ធនឹងផ្នែកអ្វីខ្លះ ដោយលោកស្រីគ្រាន់តែថ្លែងថា បច្ចុប្បន្ននេះ ដល់ពេលវេលាស្វែងរកឱកាសក្នុងកិច្ចសហការគ្នាបន្ថែមទៀតរវាងតៃវ៉ាន់ និងអាមេរិក ហើយការសហការគ្នានេះនឹងអាចរក្សាតម្លៃប្រជាធិបតេយ្យ និងសេរីភាពបន្ត ។

ការធ្វើដំណើរមកកាន់តៃវ៉ាន់លើកនេះរបស់សមាជិកសភាអាមេរិក គឺមានរយៈពេល៥ថ្ងៃ បន្ទាប់ពីមានការរាយការណ៍ថា មន្ត្រីក្រសួងការពារជាតិអាមេរិកបានធ្វើដំណើរមកកាន់តៃវ៉ាន់ជាសម្ងាត់ ហើយមិនជាញឹកញាប់ទេ ខណៈមានស្ថានការណ៍តានតឹងខ្លាំងរវាងអាមេរិក និងចិន រឿងការបាញ់ទម្លាក់បាឡុងស៊ើបការណ៍របស់ចិន ៕

ប្រភព ៖ TNNWorld

្រទេសថៃ ៖ TasteAtlas ជាគេហទំព័រអាហារល្បីឈ្មោះមួយបានបង្ហាញចំណាត់ថ្នាក់ភេសជ្ជៈចំនួន១០ប្រភេទជាភេសជ្ជៈល្អបំផុតលើពិភពលោក ដែលគ្មានជាតិអាល់កុល ហើយក្នុងនោះ តែរបស់ថៃ ឬឆាយ៉េន បានជាប់ចំណាត់ថ្នាក់លេខ៧ ។ «ឆាយ៉េន» ជាតែដែលផ្សំឡើងពីរូបមន្តបុរាណ ហើយបានជាប់ចំណាត់ថ្នាក់នេះ ដោយសារតែវាទទួលបានការនិយមចូលចិត្តពីពលរដ្ឋថៃ ក៏ដូចជាជនបរទេស ។

ភេសជ្ជៈចំនួន១០ ដែលបានជាប់ចំណាត់ថ្នាក់រួមមាន ៖
១-Hong Kong-Style Milk Tea មកពីហុងកុង
២-Aguas Frescas មកពីប្រទេសម៉ិកស៊ិក
៣-Chai masala មកពីប្រទេសឥណ្ឌា
៤-Maghrebi Mint Tea មកពីប្រទេស Maghreb
៥-Horchata (Mexico) មកពីប្រទេសម៉ិកស៊ិក
៦-Salep មកពីប្រទេសតួកគី
៧-តែទឹកកកថៃ មកពីប្រទេសថៃ
៨-El submarino មកពីប្រទេសអាហ្សង់ទីន
៩-Ristretto មកពីប្រទេសអ៊ីតាលី
១០-Darjeeling មកពីប្រទេសឥណ្ឌា

សម្រាប់ពលរដ្ឋថៃដែលនិយមផឹកតែថៃនិយាយថា វាជាភេសជ្ជៈមានភាពទាក់ទាញ ក្លិនឈ្ងុយ មិនថាពណ៌ស្រស់ស្អាតទាក់ភ្នែក មើលទៅគួរឱ្យចង់ផឹកប៉ុណ្ណោះទេ លើសពីនេះ វាមានរសជាតិឆ្ងាញ់នៅពេលឆុងជាមួយទឹកដោះគោ ទើបធ្វើឱ្យតែរបស់ថៃបានជាប់ចំណាត់ថ្នាក់លេខ៧ លើពិភពលោក ៕

ប្រភព ៖ topnews

ប្រទេសមីយ៉ាន់ម៉ា ៖ កាលពីថ្ងៃទី២០ ខែកុម្ភៈ សហភាពអឺរ៉ុប (EU) បានប្រកាសដាក់ទណ្ឌកម្មជាថ្មីលើប្រទេសមីយ៉ាន់ម៉ា ដោយបង្កកទ្រព្យសម្បត្តិ និងហាមអ្នកពាក់ព័ន្ធនឹងការរំលោភសិទ្ធិមនុស្សនៅមីយ៉ាន់ម៉ាចំនួន១៦រូបធ្វើដំណើរមកកាន់ប្រទេសសមាជិកនៅអឺរ៉ុប ក្រោយពីហេតុការណ៍រដ្ឋប្រហារដោយកងទ័ពមីយ៉ាន់ម៉ាអស់រយៈពេលជាង២ឆ្នាំ ។

ក្នុងបញ្ជីឈ្មោះបុគ្គលទាំង១៦រូបរបស់ EU រួមមាន ម៉ី ម៉ាយិនអូ រដ្ឋមន្ត្រីក្រសួងថាមពលមីយ៉ាន់ម៉ា, លោកឧត្តមសេនីយ៍ ម៉ុង អេ ប្រមុខកងកម្លាំងប្រដាប់អាវុធកងទ័ពមីយ៉ាន់ម៉ា រួមទាំង ម៉ូ អុង មេបញ្ជាការកងទ័ពជើងទឹក ព្រមទាំងបណ្តាប្រធានអង្គភាពនានាដែលស្វែងរកអាវុធផ្តល់ឱ្យកងទ័ពមីយ៉ាន់ម៉ា ក៏ត្រូវបានហាមឃាត់ និងបង្កកទ្រព្យសម្បត្តិផងដែរ ។

ក្រៅពីនេះ លោក កូកូ ម៉ុង មេបញ្ជាការកងទ័ពនៅរដ្ឋកាឈីន និងអ្នកពាក់ព័ន្ធនឹងការរំលោភសិទ្ធិមនុស្សយ៉ាងខ្លាំងក្លាក្នុងហេតុការណ៍វាយប្រហារផ្លូវអាកាស ការសម្លាប់រង្គាល ការប្រើអំពើហិង្សា និងការគប់ភ្លើងទៅលើក្រុមប្រឆាំងនៅរដ្ឋកាឈីន រួមទាំង មយ ម៉ាយិន ធ្លាប់កាន់តំណែងជាចៅក្រមនៃតុលាការយោធាមីយ៉ាន់ម៉ា ហើយពាក់ព័ន្ធនឹងការកាត់ទោសប្រហារជីវិតបណ្តាសកម្មជនប្រជាធិបតេយ្យ កាលពីខែកក្កដា ឆ្នាំ២០២២ ក៏មានឈ្មោះក្នុងបញ្ជីរបស់ EU ដែរ ។

EU បញ្ជាក់ថា បុគ្គល និងភ្នាក់ងារទាំងនេះបានពាក់ព័ន្ធនឹងការធ្វើរដ្ឋប្រហារ ការប្រើប្រាស់ហិង្សា និងការរំលោភសិទ្ធិមនុស្សលើពលរដ្ឋមីយ៉ាន់ម៉ាយ៉ាងធ្ងន់ធ្ងរ គួរតែត្រូវដាក់ទោស ។ ក្រៅពីនេះ EU ក៏បានថ្កោលទោសការបៀតបៀនផ្លូវភេទ ការធ្វើទុក្ខបុកម្នេញលើបុគ្គលិកក្នុងសង្គមស៊ីវិល សកម្មជនសិទ្ធិមនុស្ស អ្នកសារព័ត៌មាន និងជនស៊ីវិលមីយ៉ាន់ម៉ា រហូតដល់ការវាយប្រហារផ្លូវអាកាសលើសាលារៀន និងមន្ទីរពេទ្យ ។ អំពើទាំងអស់នេះត្រូវបានចាត់ទុកថា មិនអាចទទួលយកបានទេ ហើយវាកើតឡើងកាន់តែញឹកញាប់ ចាប់តាំងពីកងទ័ពមីយ៉ាន់ម៉ាសម្រេចចិត្តធ្វើរដ្ឋប្រហារដណ្តើមអំណាចពីរដ្ឋាភិបាល ដែលកើតឡើងពីការបោះឆ្នោតកាលពីដើមឆ្នាំ២០២១ ។

ជាមួយគ្នានេះ EU ក៏បានអំពាវនាវឱ្យភាគីទាំងអស់បង្កើនវិធានការការពារជាអន្តរជាតិ ដោយបញ្ឈប់ការទិញ-លក់អាវុធជាមួយកងទ័ពមីយ៉ាន់ម៉ា ដើម្បីកាត់ផ្តាច់ទំនាក់ទំនង និងកាត់បន្ថយការនាំចូលអាវុធទាំងនេះមកសម្លាប់ជីវិតពលរដ្ឋស្លូតត្រង់ ។

Anna Roberts នាយកក្រុម Burma Campaign UK បង្ហាញថា ការដាក់ទណ្ឌកម្មជាថ្មីរបស់ EU មកលើមីយ៉ាន់ម៉ា ចាត់ទុកថាចំក្រុមគោលដៅ ដើម្បីកាត់បន្ថយការវាយប្រហារផ្លូវអាកាស និងការស្វែងរកអាវុធរបស់កងទ័ពមីយ៉ាន់ម៉ា ប៉ុន្តែការដាក់ទណ្ឌកម្មនេះយឺតយ៉ាវពេក ខណៈមានមនុស្សជាច្រើនបានស្លាប់ ហើយរយៈពេល២ឆ្នាំកន្លងមក បុគ្គល និងភ្នាក់ងារជាច្រើនមិនទាន់បានទទួលទោសដោយសារការប្រព្រឹត្តកំហុសរបស់ពួកគេទេ ៕

ប្រភព ៖ thestandard