នាយករដ្ឋមន្ត្រីថៃ លោកប្រាយុទ្ធ ចាន់អូចា (Prayut Chan-o-cha) បានសន្យាកាលពីថ្ងៃពុធថា៖ “លោកនឹងហាមឃាត់ការនាំចូលកាកសំណល់ប្លាស្ទិកចាប់ពីឆ្នាំ២០២៥ ប្រសិនបើគាត់ជាប់ឆ្នោតម្តងទៀត”។

លោកក៏បានសង្កត់ធ្ងន់ថែមទៀតថា ៖ “ថៃជាប្រទេសកំពុងអភិវឌ្ឍន៍ មិនមែនជាកន្លែងចាក់សំរាមសម្រាប់ប្រទេសដទៃនោះទេ”។

កាលពីឆ្នាំ២០២០ រដ្ឋាភិបាលបានកាត់បន្ថយការនាំចូលកាកសំណល់ប្លាស្ទិក ដើម្បីផ្គត់ផ្គង់រោងចក្រកែច្នៃឡើងវិញនៅខាងក្រៅតំបន់សេដ្ឋកិច្ចពិសេស។ ក៏ប៉ុន្តែមកដល់ឆ្នាំ២០២២ ការនាំចូលកាកសំណល់ប្លាស្ទិក ហាក់បីដូចជាមានកម្រិតខ្ពស់ ដែលធ្វើឱ្យប្រជាពលរដ្ឋមានការមិនពេញចិត្តជាខ្លាំង ហើយបានបន្ទោសរដ្ឋាភិបាល ដោយលើកឡើងថា៖ “យកកាកសំណល់បរទេសមកចោលក្នុងប្រទេសខ្លួន”។

តែយ៉ាងណាមិញ ការ​នាំ​ចូល​សំណល់​ប្លាស្ទិក​ក្នុង​ឆ្នាំ ២០២៣ និង​ឆ្នាំ ២០២៤ នឹងមានតែសម្រាប់​រោងចក្រ​កែច្នៃ​ចំនួន១៤ នៅ​តំបន់​សេដ្ឋកិច្ច​ តែប៉ុណ្ណោះ ពិសេស​នឹង​ត្រូវ​កំណត់​ត្រឹម ៣៧២ ៩៩៤ តោន​សម្រាប់​ឆ្នាំ​ទី ១ និង​ពាក់​កណ្ដាល​ឆ្នាំ​ទី ២។

លុះដល់ឆ្នាំ២០២៥ ថៃ នឹងមិននាំចូលកាកសំណល់ប្លាស្ទិករបស់បរទេសទៀតនោះទេ ដោយពួកគេនឹងយកកាកសំណល់ប្លាស្ទិកក្នុងស្រុក មកកែច្នៃជំនួសវិញ៕

ប្រភព៖ Nation Thailand

ហុងកុង ៖ លោក Paul Chan រដ្ឋមន្ត្រីក្រសួងហិរញ្ញវត្ថុហុងកុង បានប្រកាសអំពីថវិកាប្រចាំឆ្នាំ២០២៣-២០២៤ ថា ហុងកុងនឹងផ្តល់ប្រាក់ដល់ពលរដ្ឋរបស់ខ្លួនម្តងទៀត ដើម្បីគាំទ្រការងើបឡើងវិញនៃការធ្លាក់ចុះសេដ្ឋកិច្ចហុងកុង ដោយសារវិធានការទប់ស្កាត់ការឆ្លងរាលដាលនៃជំងឺកូវីដ-១៩ កន្លងមក ។

ហុងកុង គឺជាមជ្ឈមណ្ឌលកណ្តាលផ្នែកហិរញ្ញវត្ថុលើពិភពលោក នឹងចេញប័ណ្ណក្នុងតម្លៃ៥.០០០ដុល្លារហុងកុងដល់ពលរដ្ឋពេញវ័យគ្រប់រូបនៅឆ្នាំ២០២៣នេះ ប៉ុន្តែចំនួនប្រាក់ខាងលើនៅសល់ត្រឹមតែពាក់កណ្តាលប៉ុណ្ណោះ បើធៀបនឹងប្រាក់ដែលរដ្ឋាភិបាលហុងកុងធ្លាប់ផ្តល់ឱ្យពលរដ្ឋកាលពីឆ្នាំ២០២២ ។ រដ្ឋមន្ត្រីហិរញ្ញវត្ថុព្យាយាមកាត់បន្ថយការចំណាយនានា ខណៈហុងកុងបានចំណាយប្រាក់ជាច្រើនផ្តល់ឱ្យពលរដ្ឋខ្លួន ក្នុងអំឡុងពេលជំងឺកូវីដរាតត្បាតនៅហុងកុង ។

លោក Paul Chan បានថ្លែងទៅកាន់សមាជិកសភាថា ហុងកុងកំពុងតែស្ថិតក្នុងដំណាក់កាលងើបឡើងវិញនៃសេដ្ឋកិច្ច ដោយហុងកុងមិនចាំបាច់រឹតបន្តឹងលើការត្រួតពិនិត្យជំងឺកូវីដទៀតទេ ហើយសង្ឃឹមថា សេដ្ឋកិច្ចនៅឆ្នាំ២០២៣នេះ នឹងរីកលូតលាស់រវាងពី៣,៥% ទៅ៥,៥% ក្រោយពីសេដ្ឋកិច្ចបានធ្លាក់ចុះ៣,៥% កាលពីឆ្នាំ២០២២ ។

គួរបញ្ជាក់ថា ហុងកុងបានបង្កើនទំនាក់ទំនងពាណិជ្ជកម្មឆ្លងព្រំដែនជាមួយចិន ក្រោយពីលុបចោលវិធានការរឹតបន្តឹងត្រួតពិនិត្យជំងឺកូវីដ ដោយហុងកុងបានចំណាយប្រាក់ប្រមាណជាង៦០ម៉ឺនលានដុល្លារហុងកុងសម្រាប់គម្រោងជំនួយសង្គ្រោះកូវីដក្នុងរយៈពេល៣ឆ្នាំកន្លងមក ធ្វើឱ្យហុងកុងប្រឈមនឹងឱនភាពថវិកា ៕

ប្រភព ៖ TNN World

រដ្ឋធានីកៀវ៖ នៅថ្ងៃទី២៤ ខែកុម្ភៈ ជាខួបគម្រប់១ឆ្នាំ នៃសង្គ្រាមឈ្លានពានរបស់ប្រធានាធិបតីរុស្ស៊ី លោក វ៉្លាឌីមៀ ពូទីន ខណៈការវាយប្រយុទ្ធគ្នា កំពុងតែបន្ដយ៉ាងសាហាវបំផុត ជាពិសេស នៅតំបន់ភាគខាងកើត ហើយជម្លោះនេះ បានធ្វើឲ្យជនស៊ីវិល កងទ័ពការពារទឹកដីរបស់អ៊ុយក្រែន និង ទាហានរបស់ក្រុងមូស្គូ រាប់ម៉ឺននាក់ បានបាត់បង់ជីវិល ប៉ុន្ដែបើតាមក្រុមអ្នកជំនាញជាច្រើន បានព្យាករ ថា សេណារីយ៉ូ អាចនឹងកើតមានលើង ដោយសារមិនថា ក្រុងមូស្គូ និង ក្រុងកៀវ បង្ហាញការរៀបចំខ្លួន សម្រាប់ចរចាបញ្ចប់សង្គ្រាម ដោយសន្ដិវិធី។

សារព័ត៌មាន Al Jazeera បានចេញផ្សាយ កាលពីថ្ងៃពុធ ទី២២ ខែកុម្ភៈ ថា លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី កាលពីថ្ងៃអង្គារ បានថ្លែងការពារ ចំពោះសង្គ្រាមឈ្លានពាននេះ ថា គាត់បានបញ្ជាឲ្យមានប្រតិបត្ដិការយោធាពិសេស នៅថ្ងៃទី២៤ ខែកុម្ភៈ ឆ្នាំ២០២២ ដោយសារតែសមភាគីសហរដ្ឋអាមេរិក លោក ចូ បៃដិន (Joe Biden) ស្ថិតក្នុងប្រទេសប៉ូឡូញ កំពុងតែប្រមូលផ្ដុំនូវការគាំទ្រ ជួយដល់ប្រទេសអ៊ុយក្រែន។

ដោយឡែក លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានសម្ដែងនូវការសោកស្ដាយ ចំពោះការវាយប្រហាររបស់រុស្ស៊ី ទៅលើទីក្រុងខឺរសុន (Kherson) ខណៈ លោក ពូទីន ថ្លែងសុន្ទរកថា វាយកបទៅលើប្រធានាធិបតីសហរដ្ឋអាមេរិក ដែលបានបំពេញទស្សនកិច្ច នៅក្នុងរដ្ឋធានីកៀវ ដើម្បីបង្ហាញ អំពីការគាំទ្ររបស់ខ្លួន សម្រាប់ប្រទេសដែលកំពុងតែហែកហួរដោយសារសង្គ្រាមមួយនេះ។

នៅថ្ងៃសុក្រ ទី២៤ ខែកុម្ភៈ ជាខួបគម្រប់១ឆ្នាំ នៃសង្គ្រាមឈ្លានពានរបស់រុស្ស៊ី ដែលធ្វើឲ្យបិភពលោក កំពុងតែមានការព្រួយបារម្ភៈ។ ដោយឡែក សន្ដិភាព ហាក់បីដូចជានៅឆ្ងាយ លើសពីការរំពឹងទុក។

លោក នីកូឡាយ មីត្រូឃីន (Nikolay Mitrokhin) ជាប្រវត្ដិវិទូ នៃសាលាវិទ្យាល័យប៊្រីមែន (Bremen) ប្រទេសអាល្លឺម៉ង់ បានបញ្ជាក់ ថា «សេណារីយ៉ូជាមូលដ្ឋាន មិនថាតែ រុស្ស៊ី ឬ អ៊ុយក្រែន អាចសម្រេចបាននូវគោលដៅរបស់ពួកគេ នៅក្នុងសង្គ្រាម។ ចំណែរុស្ស៊ី នឹងស្ទើរតែមិនអាចគ្រប់គ្រងបាន សូម្បីតែការកាន់កាប់តំបន់ភាគអាគ្នេយ៍ ដូនបាស (Donbas) ទាំងមូល ដោយអនុញ្ញាតឱ្យរុស្ស៊ី បំផ្លាញអ៊ុយក្រែន ដែលជាប្រជាជាតិជិតខាង។ ចំណែកអ៊ុយក្រែន នឹងមិនអាចវិលត្រឡប់ ទៅកាន់ព្រំដែនរបស់ខ្លួន នៅខែមករា ឆ្នាំ២០១៤ មុនពេលក្រុងមូស្គូ បានដាក់បញ្ចូលឧបទ្វីគ្រីមៀ (Crimea) ជាទឹកដីរបស់រុស្ស៊ី ហើយការគាំទ្ររបស់រុស្ស៊ី ចំពោះក្រុមបំបែកខ្លួន នៅក្នុងតំបន់ដូនបាស»។

ប្រវត្ដិវិទូ រូបនេះ បានបន្ថែម ថា «សង្គ្រាមនេះ អាចនឹងអូសបន្លាយ រហូតដល់ចុងឆ្នាំ២០២៣ ឬ នៅក្នុងឆ្នាំ២០២៤ ដោយសារតែភាគីជម្លោះទាំង២ នឹងខ្សោះនូវធនធានរបស់ពួកគេ។ ចំណែកមូលហេតុដ៏ចម្បងនោះ ត្រង់ថា ទាំងអ៊ុយក្រែន និង រុស្ស៊ី មិនមានគ្រឿងសព្វាវុធ គ្រាប់រំសេវ និង កម្លាំងទាហានគ្រប់គ្រាន់ ដើម្បីសម្រេចតាមអ្វីដែលពួកគេចង់បាន»។

លោក ហ្គូលណាស សារ៉ាហ្វូតឌីណូវ៉ា (Gulnaz Sharafutdinova) សាស្រ្ដាចារ្យ នយោបាយរុស្ស៊ី នៃមហាវិទ្យាល័យ King ក្រុងឡុងដ៍ បានបញ្ជាក់ ថា «គោលជំហររបស់លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី នៅតែមិនផ្លាស់ប្ដូរ ថ្វីបើកម្លាំងទាហានរបស់គាត់បានទទួលបរាជ័យជាបន្ដបន្ទាប់ និង ខកខាតមិនទទួលបានជ័យជម្នះ ចាប់តាំងពីការចាប់ផ្តើមសង្គ្រាម។ ចំណែកការដាក់ទណ្ឌកម្មរបស់បស្ចិមលោក ធ្វើឲ្យរុស្ស៊ី ខ្វះខាតបច្ចេកទេស មិនអាចមានសមត្ថភាព ផលិតសម្ភារយោធាឲ្យបានគ្រប់គ្រាន់៕

ប្រទេសរុស្ស៊ី ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្លែងថា ការដាក់ទណ្ឌកម្មរបស់ប្រទេសលោកខាងលិចប្រឆាំងនឹងរុស្ស៊ី ដើម្បីធ្វើឱ្យពលរដ្ឋរុស្ស៊ីជួបទុក្ខលំបាកនោះ មិនអាចយកឈ្នះលើសេដ្ឋកិច្ចរុស្ស៊ីបានទេ ប៉ុន្តែនឹងធ្វើឱ្យប្រទេសទាំងនេះជួបទុក្ខលំបាកខ្លួនឯង ។

កាលពីថ្ងៃទី២១ ខែកុម្ភៈ កន្លងមក លោក ពូទីន បានប្រកាសពីគោលការណ៍តាមទូរទស្សន៍ថា ប្រទេសដែលដាក់ទណ្ឌកម្មប្រឆាំងនឹងរុស្ស៊ី គឺដូចជាការដាក់ទោសខ្លួនឯងដែរ ដោយសារធ្វើឱ្យតម្លៃទំនិញកើនឡើង បង្កើនអត្រាគ្មានការងារធ្វើ បិទអាជីវកម្ម និងមានវិបត្តិថាមពលនៅក្នុងប្រទេសជាច្រើន ។ បន្ទាប់មក ពួកគេក៏ដាក់កំហុសលើរុស្ស៊ី ដោយប្រាប់ទៅកាន់ពលរដ្ឋរបស់ខ្លួនថា រុស្ស៊ីជាដើមហេតុធ្វើឱ្យកើតបញ្ហាផ្សេងៗ ។

ការិយាល័យស្ថិតិរបស់រដ្ឋាភិបាលសហព័ន្ធរុស្ស៊ី Rosstat បានប៉ាន់ស្មានកាលពីពេលថ្មីៗនេះថា ផលិតផលក្នុងស្រុកសរុប (GDP) នៅឆ្នាំ២០២២ របស់ប្រទេសរុស្ស៊ី បានធ្លាក់ចុះ២,១% ខណៈធនាគារកណ្តាលបង្ហាញថា បានធ្លាក់ចុះ២,៥% ។ ទោះយ៉ាងណា ការប៉ាន់ស្មានទាំងនេះនៅឆ្ងាយពីការបារម្ភដំបូងរបស់រុស្ស៊ីថា តួលេខសេដ្ឋកិច្ចនឹងធ្លាក់ចុះរហូតដល់២ខ្ទង់ ដោយសារការដាក់ទណ្ឌកម្មរបស់ប្រទេសលោកខាងលិច ។

ក្នុងការសន្ទនាជាមួយមេដឹកនាំនយោបាយ កងទ័ព និងក្រុមហ៊ុនអាជីវកម្មនានារបស់រុស្ស៊ី លោក ពូទីន បានកោតសរសើរពីសេដ្ឋកិច្ចរបស់រុស្ស៊ីកាលពីឆ្នាំ២០២២ ថា គឺជាភស្តុតាងបញ្ជាក់ឱ្យឃើញពីភាពបត់បែនរបស់ប្រទេស ។ លោក ពូទីន ថ្លែងថា ៖ «វាជាការឆ្លើយតបយ៉ាងឆាប់រហ័សចំពោះបញ្ហាប្រឈម និងកំពុងធ្វើឱ្យសេដ្ឋកិច្ចរុស្ស៊ីស្ថិតក្នុងស្ថានភាពមួយមានសក្តានុពលដ៏ធំធេង» ។

បើទោះជាគោលដៅវិនិយោគនៅក្នុងប្រទេសបានផ្លាស់ប្តូរក្តី ប៉ុន្តែរុស្ស៊ីក៏បានសម្លឹងរកទីផ្សារថ្មីៗផងដែរ ដោយលោក ពូទីន បាននិយាយដល់តំបន់អាស៊ីប៉ាស៊ីហ្វិកថា គឺជាទីផ្សារថ្មីមួយមានអនាគតភ្លឺថ្លាលើពិភពលោក ៕

ប្រភព ៖ TNN World

ក្រោយតែពីបញ្ចេញ IOS 16.3 មិនទាន់បានមួយសប្តាហ៍ស្រួលបួលផល ពេលនេះ Apple បានបញ្ចេញ IOS 16.3.1 មួយថែមទៀត ដែលនឹងជួយសម្រួលបញ្ហា ខុសឆ្គង ជាច្រើនដែមាននៅលើ ISO 16.3។

សម្រាប់ IOS 16.3.1 នេះ នឹងនាំមកនូវ ការចាក់សោសុវត្ថិភាពសម្រាប់ Apple ID និងការគាំទ្រសម្រាប់ HomePod ជំនាន់ទីពីរផងដែរ។

ការអាប់ដេតចុងក្រោយនេះ នឹងជួយដោះស្រាយបញ្ហាមួយចំនួនថែមទៀត ដែលអ្នកប្រើប្រាស់ iPhone បានលើកឡើងថាពួកគេ ហាក់បីដូចជាកំពុងត្រូវបានតាមដាន និងកេងប្រវ័ញ្ចដោយមុខងារអ្វីម្យ៉ាងដែលមាននៅលើទូរសព្ទរបស់ពួកគេ។

អ្វីដែលពិសេសជាងនេះទៀតនោះ ការអាប់ដេត iOS version ចុងក្រោយនេះ ក៏នឹងកែបញ្ហាជាមួយ iCloud, Siri, Find My iPhone និង Crash detection ផងដែរ៕

ប្រភព៖ CNET

ទេសអង់គ្លេស ៖ តាមការសាកល្បងរបស់ក្រុមហ៊ុនអង់គ្លេស ដោយឱ្យបុគ្គលិកធ្វើការចំនួន៤ថ្ងៃក្នុង១សប្តាហ៍សម្រាប់រយៈពេល៦ខែឃើញថា អត្រាផ្លាស់ប្តូររបស់បុគ្គលិក និងអវត្តមានការងារបានធ្លាក់ចុះ ខណៈលទ្ធផលការងារភាគច្រើនរបស់ពួកគេនៅតែមានប្រសិទ្ធភាពដូចដើម ។

ក្រុមហ៊ុនចំនួន៦១ នៅប្រទេសអង់គ្លេស ក្នុងនោះមាន ធនាគារ ភោជនីយដ្ឋាន និងក្រុមហ៊ុនទីផ្សារ បានឱ្យបុគ្គលិករបស់ពួកគេចំនួន២.៩០០នាក់រួមគ្នាសាកល្បងធ្វើការ៤ថ្ងៃ/១សប្តាហ៍ រយៈពេល៦ខែឃើញថា ការលាឈប់ពីការងារ និងបុគ្គលិកចូលថ្មីបានធ្លាក់ចុះ ធ្វើឱ្យក្រុមហ៊ុនចំនួន៥៦ ក្នុងចំណោមក្រុមហ៊ុនទាំងអស់៦១ បានឱ្យបុគ្គលិកធ្វើការត្រឹមតែ៤ថ្ងៃ/១សប្តាហ៍ ហើយមានក្រុមហ៊ុនចំនួន១៨ បានប្រកាសគោលនយោបាយការងារធ្វើតែ៤ថ្ងៃ/១សប្តាហ៍ជាផ្លូវការ ។

ក្រុមហ៊ុន Rivelyn Robotics ស្ថិតនៅក្រុង Sheffield ប្រទេសអង់គ្លេស ជាក្រុមហ៊ុនមួយក្នុងចំណោមក្រុមហ៊ុននឹងប្រើប្រាស់គោលនយោបាយធ្វើការ៤ថ្ងៃ/១សប្តាហ៍ ។ ប្រធានផ្នែកផលិតផល លោក David Mason សង្ឃឹមថា ការធ្វើការក្នុងរយៈពេលខ្លីនឹងជួយក្នុងការជ្រើសរើសបុគ្គលិកនាថ្ងៃអនាគត ព្រោះក្រុមហ៊ុនលោកខុសពីក្រុមហ៊ុនផ្សេង ។ ចំណែកប្រធានផ្នែកបច្ចេកវិទ្យា David Alatorre បញ្ជាក់ថា យើងចង់ផ្តោតលើការផ្តល់សារសំខាន់ដំបូងជាមួយគុណភាពជីវិតបុគ្គលិកក្នុងក្រុមហ៊ុន ដើម្បីឱ្យប្រាកដចិត្តថា គ្រប់គ្នានឹងបានសម្រាក មានតុល្យភាពក្នុងការងារ និងការរស់នៅ ។

លទ្ធផលសាកល្បងនេះបានស្នើទៅកាន់សមាជិកសភា កាលពីថ្ងៃទី២១ ខែកុម្ភៈ ដើម្បីជំរុញឱ្យកម្លាំងពលកម្មទាំងអស់នៅប្រទេសអង់គ្លេស ធ្វើការចំនួន៣២ម៉ោង/១សប្តាហ៍ ហើយការឈប់សម្រាក៣ថ្ងៃ/១សប្តាហ៍ នៅតែទទួលបានប្រាក់ខែដូចដើម ។

ក្រៅពីអង់គ្លេស ក្រុមហ៊ុនមួយចំនួនក៏បានសាកល្បងធ្វើការត្រឹមតែ៤ថ្ងៃ/១សប្តាហ៍ផងដែរ ដូចជា ក្រុមហ៊ុននៅអាមេរិក កាណាដា អូស្ត្រាលី ប្រេស៊ីល នូវែលសេឡង់ អ៊ីស្លង់ និងប្រទេសផ្សេងទៀត ហើយលទ្ធផលការសាកល្បងរបស់ប្រទេសអ៊ីស្លង់បញ្ជាក់ថា ភាពតានតឹងរបស់បុគ្គលិកធ្លាក់ចុះ ហើយការងារនៅតែមានប្រសិទ្ធភាពដូចដើម ឬល្អលើសដើម ។

អ្នកសាកល្បងឱ្យបុគ្គលិកធ្វើការចំនួន៤ថ្ងៃក្នុង១សប្តាហ៍ រួមមាន Autonomy ជាអង្គការឯករាជ្យសិក្សាពីអាកាសធាតុ និងអនាគតនៃការបំពេញការងារនៅអង់គ្លេស និងអង្គការមិនស្វែងរកប្រាក់ចំណេញ រួមជាមួយអ្នកស្រាវជ្រាវមកពីសាកលវិទ្យាល័យ Cambridge, Oxford និង Boston ។

ទោះយ៉ាងណា គំនិតនៃការបំពេញការងារតិចជាង៤០ម៉ោង/១សប្តាហ៍ បានជជែកវែកញែកគ្នាអស់រយៈពេលជាច្រើនឆ្នាំហើយ ប៉ុន្តែគំនិតនេះបានទទួលការគាំទ្រម្តងទៀត ក្រោយពីនិយោជក និងនិយោជិត ស្វែងរកវិធីល្អជាងក្នុងការធ្វើការជាថ្មី ។ ម្យ៉ាងទៀត ការរាតត្បាតនៃជំងឺកូវីដ-១៩ ធ្វើឱ្យការបំពេញការងារពីផ្ទះ និងធ្វើការរួមគ្នាត្រូវបានគេទទួលស្គាល់ ។ បច្ចុប្បន្ន បណ្តានិយោជក និងអ្នកចេញច្បាប់ការងារកំពុងពិនិត្យថា រយៈពេលធ្វើការក្នុង១សប្តាហ៍ដែលតិចជាងមុន តើអាចជួយអភិវឌ្ឍន៍គុណភាពជីវិត និងភក្តីភាពរបស់បុគ្គលិកចំពោះក្រុមហ៊ុនឬអត់ ៕

ប្រភព ៖ TNN World