ប្រទេសថៃ ៖ ការធ្វើកសិកម្ម ការត្រៀមដីជារឿងសំខាន់ ព្រោះបើដីល្អ ដាំដុះអ្វីក៏ល្អដែរ និងងាយស្រួលថែទាំ ។ ប៉ុន្តែបើយើងដាំដុះលើដីនោះយូរទៅ វានឹងខ្សោះជីជាតិ ហើយបើមិនថែទាំដីទេ ការដាំដំណាំផ្សេងៗនឹងពិបាក មិនសូវល្អ ហើយមានមេរោគផងដែរ ។

តើយើងធ្លាប់សង្កេតទេថា កសិករជាច្រើននាក់បានយកកំបោរសមកបាចលើដំណាំ និងយកវាទៅផ្សំជាមួយដី ។ វាជាការបង្កើនគុណភាពដីដែលមានជាតិអាស៊ីតខ្ពស់ ប៉ុន្តែមិនមែនដីទាំងអស់ចាំបាច់ត្រូវតែប្រើកំបោរសទេ ។ បើយើងមិនចង់ខ្ជះខ្ជាយប្រាក់ច្រើន សូមពិនិត្យមើលដីជាមុនសិន កំបោរសអាចបន្សាបដីបានដើម្បីដាំដំណាំផ្សេងៗ ហើយពេលដាំ ក៏ត្រូវប្រយ័ត្នផងដែរ កុំឱ្យមានទឹកដក់ ពីព្រោះវាធ្វើឱ្យដំណាំស្អុយរលួយ ។

ចំណែកអ្នកដាំបន្លែ ត្រូវមានប្រភពទឹកគ្រប់គ្រាន់សម្រាប់បន្លែ ដោយសារវាចូលចិត្តសំណើមខ្ពស់ ប៉ុន្តែវាមិនចូលចិត្តទឹកដក់ទេ ។ មុនពេលដាំដុះ យើងត្រូវជីកដីហើយហាលថ្ងៃចោលប្រមាណ៧ថ្ងៃសិនដើម្បីកម្ចាត់ស្មៅ និងមេរោគផ្សេងៗ ហើយយកកំបោរសមកផ្សំគ្នាជាមួយដី ក្នុងករណីដីមានជាតិអាស៊ីតខ្លាំង ជាពិសេស ផ្ទៃដីស្រែមានទឹកដក់ មានកម្ទេចកម្ទីស្មៅឬសត្វ វានឹងធ្វើឱ្យដីនោះកាន់តែមានជាតិអាស៊ីតលើសដើម ដូច្នេះ កំបោរសអាចជួយបាន ។

ជាធម្មតា ដីមានជាតិអាស៊ីតតិចៗ ប៉ុន្តែយើងសម្លឹងដោយភ្នែកទទេមិនដឹងទេថា ដីបែបណាមានជាតិអាស៊ីតតិចឬច្រើន ប៉ុន្តែយើងអាចសង្កេតបានពីសភាពផ្ទៃដីថា មាន កម្ទេចរុក្ខជាតិឬសត្វច្រើនប៉ុនណា បើផ្ទៃដីដាំដំណាំនោះស្មើសាច់ហើយ យើងមិនចាំបាច់បាចកំបោរសទេ ។

ការដាំដំណាំជាទូទៅ បើយើងបានទទួលផលល្អហើយ គ្មានអ្វីត្រូវបារម្ភទេ ហើយមិនចាំបាច់ប្រើកំបោរសក៏បានដែរ ។ រឿងសំខាន់មួយដែលគួរធ្វើ គឺក្រៅពីមានដីល្អហើយ ត្រូវរករូបមន្តផ្សំជីសម្រាប់ដាក់ដំណាំឱ្យឆាប់លូតលាស់ ប៉ុន្តែបើដីនោះខ្សត់ជីជាតិខ្លាំងពេក យើងដាំអ្វីក៏មិនបានផលដែរ ដូច្នេះ មិនគួរមើលរំលងកំបោរសទេ ៕ ប្រភព ៖ ta.propernews

ប្រទេសក្រិក ៖ ចំនួនអ្នកស្លាប់ដោយសារហេតុការណ៍រថភ្លើងបុកគ្នានៅប្រទេសក្រិក កាលពីថ្ងៃទី២៨ ខែកុម្ភៈ កន្លងមក បានកើនឡើងដល់៤៣នាក់ហើយ រីឯអ្នករងរបួសមានចំនួន៨៥នាក់ ។ លោក Kyriakos Mitsotakis នាយករដ្ឋមន្ត្រីក្រិកថ្លែងថា មូលហេតុនៃគ្រោះថ្នាក់នេះអាចមកពីកំហុងឆ្គងរបស់មនុស្ស ប៉ុន្តែនៅមិនទាន់មានការបញ្ជាក់ពីមូលហេតុច្បាស់លាស់ទេ ដោយត្រូវរង់ចាំការស៊ើបអង្កេតបន្ថែមទៀត ។

កាលពីថ្ងៃទី២៨ ខែកុម្ភៈ មានហេតុការណ៍រថភ្លើងដឹកអ្នកដំណើរពីក្រុង Athens សំដៅទៅក្រុង Thessaloniki ស្ថិតនៅភាគខាងជើងប្រទេស បានបុកគ្នាជាមួយរថភ្លើងមួយខ្សែទៀតដែលដឹកទំនិញក្នុងផ្លូវដែកតែមួយនៅបរិវេណជាយក្រុង Larissa ភាគកណ្តាលប្រទេសក្រិក ខណៈរថភ្លើងទាំងពីរបើកបរក្នុងល្បឿនលឿន បណ្តាលឱ្យកើតភ្លើងឆេះទូររថភ្លើងជាច្រើន និងមានអ្នករងរបួសដោយសាររលាកភ្លើងផងដែរ ។ សារព័ត៌មានក្នុងស្រុករាយការណ៍ថា មានមនុស្សប្រមាណ៣៥០នាក់បានធ្វើដំណើរតាមរថភ្លើងនេះ ហើយភាគច្រើនជាសិស្ស ។

បន្ទាប់ពីមានគ្រោះថ្នាក់រថភ្លើងបុកគ្នានេះ រដ្ឋមន្ត្រីក្រសួងគមនាគមន៍ក្រិក លោក Kostas Karamanlis បានប្រកាសលាលែងពីតំណែងដើម្បីទទួលខុសត្រូវចំពោះហេតុការណ៍នេះ លោកបញ្ជាក់ថា ៖ «នៅពេលមានហេតុការណ៍សោកនាដកម្មកើតឡើងគួរឱ្យតក់ស្លុត យើងមិនអាចធ្វើការបន្តទៀត ហើយធ្វើពុធថា មិនដឹងរឿងនេះទេ» ។

ជាមួយគ្នានេះ អាជ្ញាធរបានចាប់ខ្លួនម្ចាស់ស្ថានីយរថភ្លើងដែលមានអាយុ៥៩ឆ្នាំ ខណៈម្ចាស់ស្ថានីយរូបនេះមានតួនាទីទទួលខុសត្រូវពិនិត្យមើលសញ្ញារថភ្លើង ករណីមិនប្រយ័ត្នក្នុងការងារបណ្តាលឱ្យកើតរថភ្លើងបុកគ្នាមានអ្នកស្លាប់ និងរបួសជាច្រើននាក់ ។ ទោះយ៉ាងណា បុរសរូបនេះបដិសេធថា ខ្លួនមិនបានធ្វើខុសទេ ហើយនិយាយថា គ្រោះថ្នាក់នេះកើតឡើងព្រោះកំហុសបច្ចេកទេស ។

មេដឹកនាំក្រិកបានថ្លែងក្រោយពីចុះទៅពិនិត្យមើលការខូចខាតក្នុងចំណុចកើតហេតុថា វាជាកំហុសឆ្គងរបស់មនុស្ស ហើយភាពយុត្តិធម៌នឹងធ្វើតួនាទីរបស់វា ។ អ្នកប្រព្រឹត្តខុសត្រូវតែទទួលខុសត្រូវ ហើយរដ្ឋាភិបាលនឹងនៅខាងពលរដ្ឋ ។

ចំណែកសហជីពការងារនិយាយថា មូលហេតុនៃការបុកគ្នាបណ្តាលមកពីកត្តាជាច្រើន ហើយសំខាន់ គឺគ្រោះថ្នាក់នេះបានបង្ហាញឱ្យឃើញពីភាពសាំញ៉ាំក្នុងវិស័យដឹកជញ្ជូនតាមផ្លូវដែក មិនថាការខ្វះខាតបុគ្គលិក សញ្ញារថភ្លើងមិនទៀងទាត់ និងឧបករណ៍ហួសសម័យ ។ មន្ត្រីក្រិកបានប្រកាសកាន់ទុក្ខទូទាំងប្រទេសរយៈពេល៣ថ្ងៃ សម្រាប់អ្នកស្លាប់ គឺចាប់ពីថ្ងៃទី១ ខែមីនា តទៅ ៕

ប្រភព ៖ thestandard

ប្រទេសឥណ្ឌា ៖ នាយកដ្ឋានឧតុនិយមឥណ្ឌាព្យាករណ៍ថា រដូវក្តៅនេះនឹងមានរយៈពេលរហូតដល់ខែឧសភា ហើយអាចជារដូវក្តៅខ្លាំងបំផុតសម្រាប់ឥណ្ឌា តាំងពីខែកុម្ភៈ ឆ្នាំ២០២៣ កន្លងមក ។ ឥណ្ឌាបានកត់ត្រាថា កុម្ភៈ គឺជាខែមានសីតុណ្ហភាពខ្ពស់បំផុតចាប់តាំងពីឆ្នាំ១៩០១ ខណៈសីតុណ្ហភាពជាមធ្យមខ្ពស់បំផុតស្មើ២៩,៥អង្សារសេ ។

នាយកដ្ឋានឧតុនិយមបានព្យាករណ៍ថា ចាប់ពីខែមីនា ដល់ខែឧសភា ឆ្នាំ២០២៣នេះ វាអាចទៅរួចដែលឥណ្ឌានឹងមានអាកាសធាតុក្តៅខ្លាំង ជាពិសេស នៅភាគឦសាន ភាគខាងកើត និងភាគកណ្តាល ។ ដូច្នេះ ឥណ្ឌាត្រូវបង្កើនកម្លាំងផលិតអគ្គិសនីឱ្យបានគ្រប់គ្រាន់ ដោយសារពលរដ្ឋមានតម្រូវការប្រើប្រាស់អគ្គិសនីខ្ពស់ ។

វាជាបម្រែបម្រួលអាកាសធាតុ ខណៈឥណ្ឌាកំពុងជួបប្រទះនឹងសីតុណ្ហភាពក្តៅខ្លាំងស្រាប់ទៅហើយ ជាពិសេស ចាប់ពីខែឧសភា ដល់ខែមិថុនា ប៉ុន្តែកាលពីឆ្នាំ២០២២ រដូវក្តៅក្នុងប្រទេសនេះចាប់ផ្តើមលឿនជាងមុន ខណៈខែមីនា ឆ្នាំ២០២២ ក៏មានការកត់ត្រាទុកដូចគ្នាដែរថា ជាខែក្តៅបំផុតចាប់តាំងពីឆ្នាំ១៩០១ ។

អ្នកជំនាញនិយាយថា បច្ចុប្បន្ន ឥណ្ឌាកំពុងប្រឈមមុខនឹងរលកកំដៅកាន់តែខ្លាំងក្លា ញឹកញាប់ និងយូរជាងមុន ។ សីតុណ្ហភាពកើនឡើងខ្ពស់ខុសធម្មតានេះ ធ្វើឱ្យតម្រូវការប្រើប្រាស់អគ្គិសនីរបស់ពលរដ្ឋកើនឡើង រហូតធ្វើឱ្យដាច់ចរន្តអគ្គិសនីនៅតាមរដ្ឋជាច្រើនកាលពីឆ្នាំ២០២២ ។

Bloomberg រាយការណ៍ថា នៅឆ្នាំ២០២៣ តម្រូវការប្រើប្រាស់អគ្គិសនីរបស់ពលរដ្ឋបានកើនឡើងខ្ពស់ ហើយធ្វើឱ្យអ្នកជំនាញជាច្រើននាក់បង្ហាញការបារម្ភអំពីផលប៉ះពាល់ខ្លាំងដល់ពលរដ្ឋក្រីក្រ ដោយសារពួកគេត្រូវធ្វើការក្រោមកំដៅថ្ងៃ ។

នៅឆ្នាំ២០២២ កន្លងមក Jandani Singh អ្នកវិទ្យាសាស្ត្រផ្នែកបរិស្ថានធ្លាប់បានដាស់តឿនដោយផ្តល់បទសម្ភាសន៍ជាមួយ BBC ថា រលកកំដៅធ្វើឱ្យប៉ះពាល់ដល់សុខភាពយ៉ាងខ្លាំងក្លាពេលសីតុណ្ហភាពកើនឡើងជាបន្តបន្ទាប់ បើទោះជានៅពេលយប់ក្តី ដោយសាររាងកាយមិនបានសម្រាកគ្រប់គ្រាន់ធ្វើឱ្យពួកគេងាយឈឺ និងត្រូវចំណាយប្រាក់ក្នុងការព្យាបាល ។

តាមទិន្នន័យស្រាវជ្រាវរបស់ Lancet ដែលបានចេញផ្សាយកាលពីឆ្នាំ២០២២ បញ្ជាក់ថា ឥណ្ឌាមានអ្នកស្លាប់ដោយសារអាកាសធាតុក្តៅខ្លាំងកើនឡើងដល់៥៥% នៅចន្លោះពីឆ្នាំ២០០០-២០០៤ និងពីឆ្នាំ២០១៧-២០២១ ៕ ប្រភព ៖ thestandard

ប្រទេសម៉ាឡេស៊ី ៖ ការិយាល័យប្រឆាំងគ្រឿងញៀនម៉ាឡេស៊ីបានណែនាំពលរដ្ឋ ដែលចូលចិត្តធ្វើដំណើរមកកម្សាន្តនៅប្រទេសថៃ ត្រូវបង្កើនការប្រយ័ត្នឱ្យបានខ្ពស់ក្នុងការទិញម្ហូបអាហារថៃបរិភោគ ព្រោះភោជនីយដ្ឋាន ឬហាងនានានៅថៃប្រើប្រាស់កញ្ឆាធ្វើជាធាតុផ្សំសម្រាប់ចម្អិនម្ហូប ដើម្បីឱ្យភ្ញៀវទេសចរញៀនចង់បរិភោគអាហារទាំងនេះ ។

វែបសាយរបស់ម៉ាឡេស៊ីឈ្មោះ world of buzz រាយការណ៍ថា ចាប់តាំងពីថៃបានក្លាយជាប្រទេសដំបូងគេក្នុងភូមិភាគអាស៊ីអាគ្នេយ៍ ដែលអនុញ្ញាតឱ្យមានការប្រើកញ្ឆាស្របច្បាប់ បណ្តាភ្ញៀវទេសចរនៅលើពិភពលោក រួមទាំងម៉ាឡេស៊ីផងដែរនាំគ្នាមកកម្សាន្តនៅប្រទេសថៃ ។

តាមសេចក្តីរាយការណ៍ថា ភោជនីយដ្ឋាន ឬហាងលក់ម្ហូបជាច្រើននៅថៃចាប់ផ្តើមលក់ផលិតផល និងអាហារផ្សេងៗមានធាតុផ្សំពីកញ្ឆា ។ Kosmo កាសែតរបស់ម៉ាឡេស៊ីផ្សាយថា តាមមតិរបស់ភ្នាក់ងារជាតិប្រឆាំងគ្រឿងញៀននៅរដ្ឋ Perlis បង្ហាញថា មានម្ហូបអាហារនានាដូចជា សម្លតុមយ៉ាំបង្គា និងសម្លផ្សេងទៀត គេបានយកស្លឹកកញ្ឆាមកធ្វើជាគ្រឿងផ្សំដើម្បីបន្ថែមរសជាតិឱ្យឆ្ងាញ់ ។ ការិយាល័យប្រឆាំងគ្រឿងញៀនម៉ាឡេស៊ីលើកឡើងថា ការប្រើប្រាស់កញ្ឆាធ្វើជាគ្រឿងផ្សំ គឺជាការព្យាយាមធ្វើឱ្យភ្ញៀវទេសចរញៀននឹងអាហារទាំងនេះ ។

លោក Kairul Anwar Ahmed នាយកការិយាល័យប្រឆាំងគ្រឿងញៀននៅរដ្ឋ Perlis ថ្លែងថា សម្រាប់ពលរដ្ឋម៉ាឡេស៊ីដែលចូលចិត្តធ្វើដំណើរទៅប្រទេសថៃ សូមឱ្យប្រយ័ត្នប្រយែងជាងមុន នៅពេលទិញផលិតផលផ្សេងៗ ឬម្ហូបអាហារថៃ ដោយសារម្ហូបជាច្រើនមុខ គេអាចយកកញ្ឆាក្នុងកម្រិតខ្ពស់មកធ្វើគ្រឿងផ្សំ ។ លោកថ្លែងថា ៖ «ដូច្នេះ សូមឱ្យពលរដ្ឋម៉ាឡេស៊ីដែលធ្វើដំណើរទៅទីនោះ ចូរប្រយ័ត្នខ្លួនជាងមុនក្នុងការទិញផលិតផល ឬម្ហូបទាំងនេះ» ៕ ប្រភព ៖ mgronline

រថយន្តមួយគ្រឿងដែលឆាបឆេះជាអគ្គិភយ័លើផ្លូវល្បឿនលឿនភ្នំពេញ-ព្រះសីហនុ ម្តុំគីឡូម៉ែត្រ១៦១ ក្នុងភូមិសាស្ត្រខេត្តព្រះសីហនុ កាលពីម៉ោងជាង៥ល្ងាចថ្ងៃ០១មិនា២០២៣ បានរងការខូចខាតទាំងស្រុង។

រថយន្តនេះមានម៉ាក MERCEDES BENZ C300 ពណ៍ស ត្រូវឆេះដោយសារឡើងកម្ដៅធុងទឹក ហើយឆ្លងប្រព័ន្ធភ្លើង។ករណីនេះ កើតឡើងនៅល្ងាចថ្ងៃទី១ ខែមីនា ឆ្នាំ២០២៣ ស្ថិតក្នុងស្រុកស្ទឹងហាវ ខេត្តព្រះសីហនុ ទិសដៅព្រះសីហនុ ភ្នំពេញ ដែលមានអ្នកបើកបរជាជនជាតិចិន។

គិតមកទល់នឹងពេលនេះ មិនទាន់មានរបាយការណ៏ពីមនុស្សរងគ្រោះថ្នាក់ធ្ងន់ធ្ងរនៅឡើយទេ។ ក្រោយកើតហេតុ សមត្ថកិច្ចនិងផ្នែកពាក់ពន្ធ័ផ្លូវល្បឿនលឿនបានចុះអន្តរាគមន៌និងដោះស្រាយតាមនិតិវិធី និងថា ភ្លាមៗនៅមិនទាន់មានរបាយការណ៏លម្អិតពីសមត្ថកិច្ចអំពីដើមហេតុបែបណានៅឡើយ៕

ប្រទេសអាហ្សង់ទីន ៖ អគ្គិសនីបានដាច់នៅទីក្រុងធំ និងទីក្រុងផ្សេងទៀតរបស់ប្រទេសអាហ្សង់ទីន ហើយវាក៏មិនមែនជាលើកដំបូងដែរ ដោយសារប្រព័ន្ធផ្គត់ផ្គង់អគ្គិសនីដំណើរការខុសប្រក្រតី ខណៈប្រទេសនេះជួបអាកាសធាតុក្តៅ ។ លើសពីនេះ វាបានប៉ះពាល់ដល់ការធ្វើដំណើរក្នុងទីក្រុង រថភ្លើង និងរថភ្លើងក្រោមដីត្រូវផ្អាកដំណើរការភ្លាមៗធ្វើឱ្យអ្នកដំណើរជាប់ក្នុងស្ថានីយរថភ្លើង និងតាមចំណតរថយន្តក្រុង ។

ក្រសួងថាមពលរាយការណ៍ថា នៅថ្ងៃទី១ ខែមីនា មានការដាច់ចរន្តអគ្គិសនីក្នុងក្រុង Buenos Aires និងទីក្រុងជាច្រើនទៀតនៅផ្នែកកណ្តាលនៃប្រទេស ដោយសារមានភ្លើងឆេះបណ្តាញចែកចាយអគ្គិសនីជាតិ រហូតដល់មិនអាចផ្គត់ផ្គង់អគ្គិសនីបាន ហើយការដាច់អគ្គិសនីលើកនេះកើតឡើងក្នុងពេលអាហ្សង់ទីនមានអាកាសធាតុក្តៅខ្លាំង ។ រីឯទីក្រុងផ្សេងទៀត មិនត្រឹមតែដាច់អគ្គិសនីទេ ប៉ុន្តែរដ្ឋាករទឹករាយការណ៍ថា បណ្តាញចែកចាយទឹកក៏មានបញ្ហាដែរ ដោយសារគ្មានអគ្គិសនី ។

សារព័ត៌មានក្នុងស្រុកបានរាយការណ៍ពីការដាច់ចរន្តអគ្គិសនីបណ្តាលឱ្យប៉ះពាល់ដល់រថភ្លើង និងរថភ្លើងក្រោមដីក្នុងក្រុង Buenos Aires ។ ស្ថានីយរថភ្លើងជាច្រើនកន្លែងក្នុងទីក្រុងនេះត្រូវផ្អាកដំណើរការភ្លាមៗ ឬផ្អាកការធ្វើដំណើរ ហើយមានអ្នកដំណើរជាច្រើននាក់តម្រង់ជួររង់ចាំឡើងរថភ្លើង ហើយពួកគេបានជាប់ក្នុងស្ថានីយរថភ្លើងយ៉ាងតិច២កន្លែងក្នុងក្រុងនេះ ។

ទោះយ៉ាងណា រថភ្លើងបានដំណើរការឡើងវិញក្រោយពីបានផ្អាកអស់រយៈពេលយូរ ហើយអ្នកដំណើរតាមរថភ្លើងជាច្រើននាក់បានប្តូរទៅជិះរថយន្តក្រុងវិញ ប៉ុន្តែនៅតាមចំណតរថយន្តក្រុង ក៏មានមនុស្សរង់ចាំច្រើនដូចគ្នា ។ ក្រសួងថាមពលរាយការណ៍បន្ថែមថា មានភ្លើងឆេះប្រព័ន្ធផ្គត់ផ្គង់អគ្គិសនី ទើបបណ្តាលឱ្យបណ្តាញចែកចាយអគ្គិសនីត្រូវផ្អាកការចែកចាយចំនួន១ម៉ឺនមេហ្គាវ៉ាត់ ។

គួរបញ្ជាក់ថា ការដាច់ចរន្តអគ្គិសនីនេះ មិនមែនជាលើកដំបូងទេ កន្លងមក អាហ្សង់ទីនក៏ជួបបញ្ហាដាច់ចរន្តអគ្គិសនីជាច្រើនលើកតាំងពីខែមករា ឆ្នាំ២០២៣ ខណៈប្រទេសនេះជួបអាកាសធាតុក្តៅ ធ្វើឱ្យការប្រើប្រាស់អគ្គិសនីកើនឡើង ៕

ប្រភព ៖ TNN World