ប្រទេសសិង្ហបុរី ៖ Changi International Airport ឬអាកាសយានដ្ឋាន Changi ស្ថិតនៅប្រទេសសិង្ហបុរី ត្រូវបានវែបសាយឈ្មោះ Skytrax បានចាត់ចំណាត់ថ្នាក់ថា ជាអាកាសយានដ្ឋានល្អបំផុតលើពិភពលោក ប្រចាំឆ្នាំ២០២៣ ។ មុននេះ អាកាសយានដ្ឋាន Changi បានគ្រប់គ្រងចំណាត់ថ្នាក់ទី១ ក្នុងរយៈពេល៨ឆ្នាំជាប់ៗគ្នាចាប់ពីឆ្នាំ២០១៣-២០២០ ប៉ុន្តែចាប់ពីឆ្នាំ២០២១-២០២២ ជាអំឡុងពេលផ្ទុះជំងឺកូវីដ អាកាសយានដ្ឋាននេះមិនបានជាប់ចំណាត់ថ្នាក់ទី១ទេ ។

មុននឹងទទួលបានចំណាត់ថ្នាក់ទី១ ក្នុងឆ្នាំ២០២៣នេះ Changi ជាអាកាសយានដ្ឋានមួយដែលបានបង្កលក្ខណៈងាយស្រួលបំផុតដល់អ្នកដំណើរទូទាំងពិភពលោក ។ អាកាសយានដ្ឋាននេះបានសាងសង់ឡើងតាំងពីឆ្នាំ១៩៨១ មកម៉្លេះ ដែលបានអភិវឌ្ឍន៍ កែលម្អ និងសាងសង់បន្ថែមទៀតជាបន្តបន្ទាប់រហូតដល់បច្ចុប្បន្ន ។ អាកាសយានដ្ឋាននេះមានទាំងអស់ 4 Terminal ហើយអាចទទួលអ្នកដំណើរប្រមាណ១៨ម៉ឺន៧ពាន់នាក់ក្នុង១ថ្ងៃ ។ កាលពីឆ្នាំ២០១៩ មុនពេលផ្ទុះជំងឺកូវីដ មានអ្នកដំណើរមកកាន់អាកាសយានដ្ឋាន Changi រហូតដល់៦៨លាននាក់ឯណោះ និងមានជើងហោះហើរយ៉ាងច្រើនក្នុងមួយថ្ងៃៗ ។

នេះជាមូលហេតុដែលធ្វើឱ្យអាកាសយានដ្ឋាន Changi បានជាប់ចំណាត់ថ្នាក់ទី១ ប្រចាំឆ្នាំ២០២៣ រួមមាន ៖

១-ការរចនាអាកាសយានដ្ឋានមានប្រសិទ្ធភាព ៖
នៅពេលឧស្សាហកម្មហោះហើរលូតលាស់ និងមានការប្រកួតប្រជែងគ្នាក្នុងតំបន់ ពិតណាស់ ប្រទេសសិង្ហបុរី ក៏ចង់ក្លាយជាមជ្ឈមណ្ឌលឧស្សាហកម្មហោះហើរក្នុងតំបន់អាស៊ីផងដែរ ។ ដូច្នេះ សិង្ហបុរីបានដាក់គោលដៅរចនាការសាងសង់អាកាសយានដ្ឋាន ដូចជា កសាងអគារ Terminal 3-4 ឱ្យមានភាពខុសប្លែកគ្នាពីអាកាសយានដ្ឋានផ្សេងទៀត ដោយបង្កើតភាពទាក់ទាញលេចធ្លោជាមួយនឹងរូបរាងទំនើប ផ្តោតលើភាពទូលាយ និងក្រោមគំនិតការពារបរិស្ថាន ។ ហេតុនេះហើយគេឃើញថា អាកាសយានដ្ឋាននេះមានទីធ្លាសម្បូររុក្ខជាតិបៃតងច្រើនបំផុត ។

២-មានការគ្រប់គ្រង និងសេវាកម្មល្អ ៖
អាកាសយានដ្ឋាន Changi បានយកប្រព័ន្ធបច្ចេកវិទ្យាមកប្រើប្រាស់ក្នុងការគ្រប់គ្រងជាច្រើនផ្នែក ។ គេដាក់ឈ្មោះថា ជាអាកាសយានដ្ឋានទំនើបបំផុត ដែលអ្នកដំណើរអាច check in, បំពេញឯកសារចូលប្រទេសសិង្ហបុរី និងបានផ្តល់សេវាកម្មងាយស្រួលទៅកាន់អ្នកដំណើរ និងរហ័ស បើទោះជាមានអ្នកដំណើរច្រើនប៉ុនណាក៏ដោយ ។ ការផ្តល់សេវាកម្មរបស់មន្ត្រីអាកាសយានដ្ឋាននេះមានស្តង់ដារ សេវាកម្មល្អ រហូតដល់នៅឆ្នាំ២០២២ វែបសាយ Skytrax បានចាត់ចំណាត់ថ្នាក់ថា អាកាសយានដ្ឋាននេះមានបុគ្គលិកល្អបំផុតនៅលើពិភពលោកទៀតផង ។

៣-លើសពីអាកាសយានដ្ឋាន ខណៈបានបង្កលក្ខណៈងាយស្រួលគ្រប់យ៉ាង ៖
បើអ្នកដំណើរត្រូវផ្លាស់ប្តូរយន្តហោះនៅអាកាសយានដ្ឋាន Changi ដោយរង់ចាំជាច្រើនម៉ោង ពួកគេនឹងមិនធុញទ្រាន់ឡើយ ព្រោះក្នុងអាកាសយានដ្ឋាននេះមានអ្វីជាច្រើនទៀតដែលអ្នកដំណើរត្រូវធ្វើ ។ កាលពីឆ្នាំ២០១៩ អាកាសយានដ្ឋាននេះបានបើកផ្តល់សេវាកម្ម Jewel Changi Airport ជាអគារកញ្ចក់មានកម្ពស់១០ជាន់ ដែលសាងសង់ឡើងសម្រាប់ជាមជ្ឈមណ្ឌលហាងលក់ទំនិញផ្សេងៗ និងភោជនីយដ្ឋាន សរុបទាំងអស់២៨០ហាង ។

អាកាសយានដ្ឋាននេះមានបរិយាកាសស្រដៀងគ្នានឹងហាងទំនើបធំៗ ហើយមានកន្លែងទាក់ទាញមួយឈ្មោះ Rain Vortex ឬទឹកធ្លាក់ដ៏ធំកម្ពស់៤០ម៉ែត្រ ព្រមទាំងមានស្ពានអាកាសទៀតផង ។ ក្រៅពីនេះ មានកន្លែង check in និងកន្លែងកម្សាន្តជាច្រើនទៀត មិនថាសួនច្បារ cactus មានកន្លែងដើរទស្សនាធម្មជាតិតាមអាកាស សួនផ្កា និងសួនមេអំបៅ ។

លើសពីនេះ អាកាសយានដ្ឋាន Changi មានកន្លែងសម្រាប់កម្សាន្តផងដែរដូចជា រោងភាពយន្ត កន្លែងសម្រាកលំហែរកាយ កន្លែងម៉ាស្សា បន្ទប់លេងហ្គេម ព្រមទាំងមានផ្តល់ WiFi ដោយមិនគិតប្រាក់ដល់អ្នកដំណើរទូទាំងអាកាសយានដ្ឋាន ។ អ្វីគួរឱ្យចាប់អារម្មណ៍មួយទៀត គឺមានកន្លែងតាំងពិព័រណ៍ផងដែរ ជាក់ស្តែង នៅឆ្នាំ២០២៣ សិង្ហបុរីបានចាត់ពិធីបុណ្យ disney គម្រប់១០០ឆ្នាំ ។

តាមការរៀបរាប់មកនេះ ធ្វើឱ្យអ្នកដំណើរទាំងអស់ដែលបានមកដល់អាកាសយានដ្ឋាន Changi ពេញចិត្តដិតអារម្មណ៍ជាខ្លាំង ។ ការអភិវឌ្ឍអាកាសយានដ្ឋានឱ្យល្អ និងមានគុណភាពបែបនេះធ្វើឱ្យអាកាសយានដ្ឋាន Changi បានប្រមូលប្រាក់ចំណូលមហាសាលចូលប្រទេសសិង្ហបុរី ។ មិនតែប៉ុណ្ណោះ អាកាសយានដ្ឋាននេះមានគម្រោងពង្រីកអគារអ្នកដំណើរនៅថ្ងៃអនាគតផងដែរ ៕ ប្រភព ៖ Today bizview

ប្រទេសឡាវ ៖ ធនាគារអភិវឌ្ឍន៍អាស៊ី (ADB) និងក្រុមហ៊ុន Monsoon Wind Power បានចុះហត្ថលេខាលើកិច្ចព្រមព្រៀងប្រាក់កម្ចីជាង៦៩២លានដុល្លារអាមេរិក ដើម្បីសាងសង់រោងចក្រអគ្គិសនីពីថាមពលខ្យល់ដ៏ធំបំផុតនៅតំបន់អាស៊ាន និងជារោងចក្រដំបូងគេនៅប្រទេសឡាវផងដែរ ។

រោងចក្រនេះនឹងដំឡើងកង្ហារខ្យល់ចំនួន១៣៣ ដែលមានកម្លាំងផលិតស្មើ៦០០មេហ្គាវ៉ាត់ ។ គេនឹងសាងសង់រោងចក្រនេះឡើងនៅភាគខាងត្បូងប្រទេសឡាវ ហើយអគ្គិសនីដែលផលិតបាននឹងត្រូវបញ្ជូនទៅលក់ឱ្យអគ្គិសនីប្រទេសវៀតណាម ។

គេចាត់ទុកថា ប្រភពផ្គត់ផ្គង់អគ្គិសនីឆ្លងកាត់ព្រំដែន គឺជាបង្អែករឹងមាំមួយសម្រាប់ការលូតលាស់សេដ្ឋកិច្ចរបស់ឡាវ ដោយសារការប្រើប្រាស់ប្រយោជន៍ពីធនធានខ្យល់ក្នុងប្រទេស ខណៈប្រទេសឡាវមានទីតាំងមិនជាប់សមុទ្រ ប៉ុន្តែឡាវអាចបង្កើតបានថាមពលជាច្រើន ។ លើសពីនេះ ឡាវក៏បានផលិតថាមពលវារីអគ្គិសនីផងដែរ ។

តាមសេចក្តីរាយការណ៍របស់ ADB បញ្ជាក់ថា គម្រោងនេះនឹងជួយជំរុញការកាត់បន្ថយកាបូន និងកំណើនរុក្ខជាតិបៃតងគួរឱ្យកត់សម្គាល់ ។ លើសពីនេះ វានឹងជួយកាត់បន្ថយការបញ្ចេញកាបូនឌីអុកស៊ីតយ៉ាងតិចជាង៧៤៨តោនក្នុង១ឆ្នាំ ។ ADB បន្តថា ក្រុមប្រទេសកំពុងអភិវឌ្ឍន៍ក្នុងតំបន់អាស៊ីប៉ាស៊ីហ្វិកបានប្រឈមនឹងការខ្វះខាតប្រាក់វិនិយោគលើអាកាសធាតុ ដូច្នេះ គេចាត់ទុកថា វាចាំបាច់សម្រាប់ការឆ្ពោះទៅកាន់ការលូតលាស់របស់រុក្ខជាតិបៃតង ។

ក្រៅពីនេះ ប្រាក់វិនិយោគពី ADB និងប្រទេសជាមិត្ត នឹងជួយដោះស្រាយប្រភពថាមពលខ្យល់ដែលមិនទាន់បានប្រើប្រាស់របស់ឡាវ ។ ម្យ៉ាងទៀត វាក៏ជាមូលដ្ឋានសម្រាប់ការផ្លាស់ប្តូរទៅជាថាមពលស្អាត និងកំណើនរុក្ខជាតិបៃតង ដែលនឹងផ្តល់ប្រយោជន៍ដល់សេដ្ឋកិច្ចឡាវប្រកបដោយនិរន្តរភាព ៕

ប្រភព ៖ AEC connect

ប្រទេសចិន ៖ សារព័ត៌មានអនឡាញល្បីមួយនៅប្រទេសចិនឈ្មោះ Weibo បានចុះផ្សាយពីភ្ញៀវទេសចរចិនជាច្រើននាក់បានបញ្ចេញមតិអំពីការធ្វើដំណើរមកកម្សាន្តនៅប្រទេសថៃថា ពួកគេត្រូវចំណាយប្រាក់ច្រើនទៅលើម្ហូបអាហារ និងការស្នាក់នៅ ។ តាមរយៈទំព័រហ្វេសប៊ុកឈ្មោះ Sina Hotspot ក្នុងនោះមាននារីម្នាក់ឈ្មោះ Wang Xin បញ្ចេញមតិថា ពេលនាងមកលេងប្រទេសថៃកាលពីមុន ទឹកផ្លែឈើក្រឡុកលក់នៅតាមផ្លូវនៅក្រុងបាងកក ១កែវតម្លៃពី១០បាត-២០បាត ឬគិតជាប្រាក់យន់ ១កែវតម្លៃពី២យន់-៤យន់ប៉ុណ្ណោះ ប៉ុន្តែបច្ចុប្បន្ននេះ ១កែវតម្លៃ៦០បាត (ស្មើ១២យន់) គឺតម្លៃបានកើនឡើងដល់ទៅ៣ដង ។

នារីឈ្មោះ Wang Xin បន្តទៀតថា រីឯថ្លៃចាយវាយនៅតាមមាត់សមុទ្រប្រទេសថៃវិញ បានកើនឡើងរហូតដល់ទៅ២ដងឯណោះ ដោយកាលពីមុន នាងធ្លាប់ជួលទូកចេញទៅសមុទ្រ គឺមានតម្លៃត្រឹមតែ៦ពាន់យន់ប៉ុណ្ណោះ ប៉ុន្តែនៅឆ្នាំ២០២៣នេះ តម្លៃជួលទូកចេញទៅសមុទ្រកើនឡើងរហូតដល់២ម៉ឺនយន់ ។

នារីទេសចរណ៍ចិនរូបនេះបន្ថែមថា ពេលនេះ ការចំណាយលើសេវាកម្មនានាសម្រាប់មកកម្សាន្តនៅប្រទេសថៃ គឺថ្លៃជាងកាលពីមុនឆ្ងាយណាស់ មិនថាម្ហូបអាហារតាមផ្លូវ ឬសេវាកម្មផ្សេងៗ ហើយបើថៃមិនគិតគូរពីតម្លៃសេវាកម្មទាំងនេះឡើងវិញទេ នាងនឹងកាត់បន្ថយការធ្វើដំណើរមកទីនេះ ហើយនាងនឹងទៅលេងប្រទេសផ្សេងវិញ ។

ការបញ្ចេញមតិរបស់នារីឈ្មោះ Wang Xin បានធ្វើឱ្យគេចាប់អារម្មណ៍យ៉ាងខ្លាំងនៅប្រទេសចិន ហើយបើតាមសារព័ត៌មានអនឡាញល្បីនៅចិនឈ្មោះ Weibo បាននិយាយថា មានពលរដ្ឋចិនចូលមកអានការបញ្ចេញមតិខាងលើនេះជាង១០០លាន views ឯណោះ ហើយពួកគេបានបញ្ចេញយោបល់ជាច្រើនអំពីការមកកម្សាន្តនៅប្រទេសថៃថា មានតម្លៃថ្លៃខ្លាំង ដូចគ្នានឹងការធ្វើដំណើរទៅលេងទីក្រុងលំដាប់ទី១ និងទី២ នៅប្រទេសចិនដែរ ៕ ប្រភព ៖ BTimes