ប្រទេសន័រវេស ៖ ន័រវេសត្រូវបានគេចាត់ចំណាត់ថ្នាក់ស្ថិតក្នុងក្រុមប្រទេសអ្នកមានបំផុតនៅលើពិភពលោក ប៉ុន្តែកុមារជាច្រើនរស់នៅប្រទេសនេះបានធំធាត់ឡើងមកជាមួយភាពក្រីក្រ ។ តាមការរាយការណ៍ចុងក្រោយបញ្ជាក់ថា ប្រទេសន័រវេសមិនទទួលបានជោគជ័យក្នុងការកាត់បន្ថយគម្លាតផ្នែកសង្គមរបស់ពលរដ្ឋទេ ។

ក្នុងរយៈពេល១០ឆ្នាំកន្លងមក គម្លាតគ្នាផ្នែកសង្គមនៅប្រទេសន័រវេសបានកើនឡើងជារឿយៗ ដោយអ្នកមានទ្រព្យសម្បត្តិស្តុកស្តម្ភកាន់តែមានទ្រព្យសម្បត្តិច្រើនថែមទៀត រីឯពលរដ្ឋក្រីក្រកាន់តែក្រីក្រលើសដើម និងបានតស៊ូក្នុងជីវិតប្រចាំថ្ងៃរបស់ពួកគេ ។ ក្នុងរយៈពេលប៉ុន្មានឆ្នាំមកនេះ មានពលរដ្ឋន័រវេសជាច្រើននាក់បានមកតម្រង់ជួររង់ចាំគេចែកម្ហូបអាហារ និងរបស់របរផ្សេងៗជាជំនួយសប្បុរសធម៌ ។

សាស្ត្រាចារ្យ Ottar Ness មកពី NTNU បានថ្លែងថា បើទោះជាប្រទេសន័រវេសបានព្យាយាមកាត់បន្ថយគម្លាតគ្នាក្នុងសង្គម លើកកម្ពស់សុខភាព និងការរស់នៅប្រចាំថ្ងៃរបស់ពលរដ្ឋក្តី ប៉ុន្តែការមិនស្មើភាពគ្នារវាងអ្នកមាន និងអ្នកក្រ បានកើនឡើងជានិច្ច ។

រីឯសាស្ត្រាចារ្យ Dina von Heimburg មកពី NTNU បានថ្លែងដែរថា តាមការស្រាវជ្រាវបង្ហាញថា មនុស្សមួយចំនួនមានអារម្មណ៍ថា ពួកគេគ្មានតម្លៃ មិនសំខាន់ ហើយពួកគេគិតថា ខ្លួនគ្មានឱកាសមានជីវិតរស់នៅល្អប្រសើរជាងនេះទេ ។ បើយើងប្រៀបធៀបន័រវេសជាមួយប្រទេសផ្សេងៗ បើទោះមានជាភាពខុសគ្នាផ្នែកសង្គម សុខភាព និងគុណភាពជីវិតរបស់ពលរដ្ឋន័រវេសតិចជាងប្រទេសផ្សេងៗក្តី ប៉ុន្តែទោះយ៉ាងណា បើយើងសម្លឹងឱ្យបានវែងឆ្ងាយឃើញថា គម្លាតគ្នារបស់ពលរដ្ឋន័រវេសមានចន្លោះគ្នាដ៏ធំមិនគួរឱ្យជឿ ។

តាំងពីឆ្នាំ២០១០ មក ពលរដ្ឋន័រវេសដែលមានទ្រព្យសម្បត្តិច្រើនបំផុតបានកើនឡើង១០% ហើយជាមួយគ្នានេះ ពលរដ្ឋន័រវេសក្រីក្របំផុត គឺពួកគេកាន់តែក្រីក្រឡើង ហើយអ្នកក្រមានអាយុខី្លជាងអ្នកមាន ។ លើសពីនេះ យុវវ័យដែលមានឪពុកម្តាយមានបញ្ហាផ្នែកសេដ្ឋកិច្ច និងសង្គម ពួកគេត្រូវប្រឈមនឹងបញ្ហាផ្លូវចិត្តជាញឹកញាប់ ។

មូលហេតុដែលបណ្តាលឱ្យអ្នកក្រីក្រកាន់តែមានអាយុខ្លីនោះ គឺភាគច្រើនពួកគេបានរស់នៅដោយមិនសូវបានគិតគូរពីការពិនិត្យសុខភាព ដូចជា ពួកគេមានភាពតានតឹងខ្ពស់គ្រប់ពេលវេលា, តម្លៃម្ហូបអាហារថ្លៃសម្រាប់សុខភាព ហើយពួកគេគ្មានប្រាក់ទិញ បញ្ហាទាំងអស់នេះហើយធ្វើឱ្យអ្នកក្រីក្រទាំងនេះមានបញ្ហាក្នុងការបរិភោគចំណីអាហារ និងបណ្តាលឱ្យមានជំងឺផ្សេងៗ ។

គេសង្កេតឃើញថា កុមារស្ទើរតែ១២% ក្នុងចំណោមកុមារទាំងអស់នៅប្រទេសន័រវេស បានធំឡើងមកជាមួយគ្រួសារក្រីក្រ ដែលធ្វើឱ្យពួកគេគ្មានឱកាសបានរៀនសូត្រខ្ពស់ មានបញ្ហាផ្លូវចិត្ត និងត្រូវគេធ្វើបាបជាដើម៕

ប្រភព ៖ Norway posts

បរទេស៖ អ្នកស្រាវជ្រាវរបស់ក្រុមហ៊ុន Citigroup បាននិយាយថា ប្រទេសរុស្ស៊ីអាចនឹងកាត់បន្ថយការនាំចេញវត្ថុធាតុដើមសំខាន់ៗដូចជាអាលុយមីញ៉ូម និងប៉ាឡាដ្យូម ដែលបណ្តាលឱ្យតម្លៃកើនឡើងយ៉ាងខ្លាំងនៅទូទាំងពិភពលោក។ ប្រទេសរុស្ស៊ីបានរឹតបន្តឹងការនាំចេញឧស្ម័នធម្មជាតិទៅកាន់អឺរ៉ុប និងបានប្រកាសកាត់បន្ថយផលិតកម្មប្រេងជាបណ្តោះអាសន្នក្នុងខែនេះដើម្បីឆ្លើយតបទៅនឹងទណ្ឌកម្មរបស់លោកខាងលិច។

ក្នុងសេចក្តីជូនដំណឹងដល់អតិថិជននៅថ្ងៃទី៦ ខែមីនា ក្រុមហ៊ុន Citigroup បាននិយាយថា ការកាត់បន្ថយការនាំចេញដែកទៅក្រៅប្រទេសនេះអាចធ្វើឲ្យតម្លៃទំនិញខាងលើឡើងថ្លៃ។ អ្នកវិភាគរបស់ក្រុមហ៊ុន Citi បាននិយាយបន្ថែមទៀតថា “ការរឹតបន្តឹងការនាំចេញអ្វីមួយអាចជះឥទ្ធិពលយ៉ាងសំខាន់ទៅលើទីផ្សារក្នុងរយៈពេលខ្លី”។
យោងតាមក្រុមហ៊ុន Citi ប្រហែល ១៥% នៃអាលុយមីញ៉ូមដែលត្រូវបានជួញដូរនៅលើពិភពលោកគឺមកពីប្រទេសរុស្ស៊ី។ លោហធាតុនេះត្រូវបានគេប្រើប្រាស់យ៉ាងទូលំទូលាយនៅក្នុងយន្តហោះ និងផលិតផលរាប់ចាប់ពីឧបករណ៍ប្រើប្រាស់ក្នុងផ្ទះ រហូតដល់ឧបករណ៍ផ្ទះបាយ។ ផលិតកម្ម palladium របស់រុស្ស៊ីក៏រួមចំណែកប្រហែល ២៥% នៃការផ្គត់ផ្គង់ពិភពលោកផងដែរ លោហៈនេះត្រូវបានប្រើនៅក្នុងឧបករណ៍ដែលកាត់បន្ថយការបំភាយឧស្ម័នពីរថយន្ត។

ថ្មីៗនេះ សហរដ្ឋអាមេរិកបានដាក់ពន្ធនាំចូល ២០០% លើអាលុយមីញ៉ូមរបស់រុស្ស៊ី ពន្ធនេះមានប្រសិទ្ធភាពចាប់ពីថ្ងៃនេះតទៅ។ កាលពីឆ្នាំមុន វាបានកាត់បន្ថយយ៉ាងខ្លាំងនូវការនាំចេញឧស្ម័នទៅកាន់អឺរ៉ុប ដែលជាអតិថិជនដ៏ធំបំផុតរបស់ខ្លួនមុនសង្គ្រាម នេះបានបង្ខំឱ្យរដ្ឋាភិបាលអឺរ៉ុបបង្កើនល្បឿនស្វែងរកការផ្គត់ផ្គង់ថ្មី។ រុស្សីក៏ត្រូវបានចោទប្រកាន់ពីបទប្រើប្រាស់សព្វាវុធដល់ការផ្គត់ផ្គង់ស្បៀងជាសាកល នៅពេលដែលខ្លួនបានបិទកំពង់ផែអ៊ុយក្រែននៅក្នុងសមុទ្រខ្មៅក្នុងអំឡុងពេលប៉ុន្មានខែដំបូងនៃអរិភាព ដោយធ្វើឱ្យរំខានដល់ខ្សែសង្វាក់ផ្គត់ផ្គង់គ្រាប់ធញ្ញជាតិ។ ពិភពលោកទាំងអស់ ក៏ត្រូវបានឃ្លាំមើលយ៉ាងដិតដល់ផងដែរ ព្រោះប្រទេសនេះជាប្រទេសនាំចេញឥន្ធនៈនុយក្លេអ៊ែរដ៏សំខាន់៕ ប្រភព៖ vnexpress

ប្រទេសចិន ៖ ទីក្រុងប៉េកាំងរបស់ចិនបានចាប់ផ្តើមអនុវត្តច្បាប់ថ្មី ដែលតម្រូវឱ្យពលរដ្ឋចិនចេះសន្សំសំចៃទឹកដើម្បីរក្សាធនធានទឹកឱ្យបានគ្រប់គ្រាន់ បន្ទាប់ពីទីក្រុងនេះប្រឈមនឹងបញ្ហាខ្វះខាតទឹកប្រើប្រាស់អស់រយៈពេលដ៏យូរ ។ ដូច្នេះ អាជ្ញាធរក្រុងប៉េកាំងនឹងពិន័យជាប្រាក់ទៅលើអ្នកប្រើទឹកខ្ជះខ្ជាយក្នុងទីក្រុង ។

នៅក្រុងប៉េកាំងមានពលរដ្ឋរស់នៅជាង២១លាននាក់ ហើយបានប្រឈមនឹងបញ្ហាខ្វះខាតទឹកប្រើប្រាស់ជាយូរមកហើយ ហេតុនេះ រដ្ឋាភិបាលក្រុងប៉េកាំងបានចេញច្បាប់ថ្មីមួយដើម្បីគ្រប់គ្រងការប្រើប្រាស់ទឹកទាំងអស់ក្នុងទីក្រុងនេះ និងឱ្យពលរដ្ឋប្រើប្រាស់ទឹកដោយសន្សំសំចៃ ។

សម្រាប់បុគ្គលណាប្រើប្រាស់ទឹកខ្ជះខ្ជាយ និងស្ថាប័នណាប្រើប្រាស់ទឹកពីប្រភពទឹកសាធារណៈដោយខុសច្បាប់ នឹងត្រូវបានពិន័យជាទឹកប្រាក់ខ្ពស់បំផុតចំនួន១ម៉ឺនយាន់ និង១០ម៉ឺនយន់ តាមលំដាប់ ។ ចំនួននេះចាត់ទុកថា គឺជាទឹកប្រាក់ពិន័យដ៏ច្រើន ដែលអាជ្ញាធរក្រុងប៉េកាំងបានចាត់វិធានការតឹងរ៉ឹង និងធ្វើឱ្យពលរដ្ឋរស់នៅទីក្រុងមិនហ៊ានប្រើប្រាស់ទឹកខ្ជះខ្ជាយ ។

បច្ចុប្បន្ន ពលរដ្ឋរស់នៅក្រុងប៉េកាំងភាគច្រើនបានប្រើប្រាស់ទឹកម៉ាស៊ីនដែលមានប្រភពពីភាគខាងត្បូងប្រទេសចិន ។ គម្រោងផ្គត់ផ្គង់ទឹកស្អាតពីភាគខាងត្បូងទៅកាន់ភាគខាងជើងរបស់ចិន គឺបានផ្គត់ផ្គង់ទឹកក្នុងបរិមាណជាង៨,៤ពាន់លានម៉ែត្រគូបចេញពីទន្លេធំមួយនៅភាគខាងត្បូងប្រទេសមកកាន់ទីក្រុងប៉េកាំង ដែលបណ្តាញចែកចាយទឹកនេះបានអនុវត្តតាំងពីឆ្នាំ២០១៤ មកម៉្លេះ ។

ពលរដ្ឋរស់នៅក្រុងប៉េកាំងបានជួបបញ្ហាខ្វះខាតទឹកប្រើប្រាស់ ដោយសារតែពួកគេប្រើប្រាស់ទឹកក្នុងបរិមាណច្រើន និងមិនចាប់អារម្មណ៍ពីការខ្វះខាតទឹក ដូចជា ការប្រើប្រាស់ទឹកនៅក្នុងចម្ការដំណាំ និងការស្រោចដើមឈើ ជាដើម ៕ ប្រភព ៖ Tnn earth

នាពេលកន្លងមក ប្រទេសជាច្រើនបានហាមឃាត់ពលរដ្ឋរបស់ខ្លួនប្រើ TikTok របស់ក្រុមហ៊ុនចិន ជាពិសេស អាមេរិក និងបណ្តាប្រទេសនៅអឺរ៉ុប ។ ការហាមប្រើ TikTok បានរាលដាលទៅដល់ប្រទេសកាណាដា និងតៃវ៉ាន់ ដោយពួកគេបានចេញច្បាប់ហាមឃាត់ការប្រើកម្មវិធីនេះដូចគ្នា ខណៈហូឡង់ និងដាណឺម៉ាក ក៏កំពុងពិភាក្សាពីការហាមឃាត់ប្រើ TikTok ផងដែរ ។ ហេតុអ្វីបានជាកម្មវិធីពេញនិយមមួយនេះ ដែលមានអ្នកប្រើប្រាស់ជាង១.០០០លាននាក់នៅទូទាំងពិភពលោក ក្លាយជាគោលដៅដែលប្រទេសនានាហាមឃាត់ទៅវិញ ?

មូលហេតុសំខាន់ដែលរដ្ឋាភិបាលប្រទេសនានាហាមឃាត់ការប្រើ TikTok ព្រោះបារម្ភពីសុវត្ថិភាព និងខ្លាច TikTok បញ្ជូនព័ត៌មានផ្សេងៗរបស់អ្នកប្រើប្រាស់ទៅឱ្យរដ្ឋាភិបាលចិន ហើយរដ្ឋាភិបាលចិនអាចគ្រប់គ្រងកម្មវិធីទាំងអស់នៅលើពិភពលោក ។

Christopher Wray ប្រធានការិយាល័យស៊ើបអង្កេតរបស់រដ្ឋាភិបាលអាមេរិកបានសម្តែងការបារម្ភថា រដ្ឋាភិបាលចិននឹងប្រើប្រាស់ព័ត៌មានដែល TikTok ប្រមូលបានពីអ្នកប្រើប្រាស់ ធ្វើជាអាវុធតាមអ៊ីនធើរណេតដើម្បីវាយប្រហារមកលើរដ្ឋាភិបាលអាមេរិក ។

ទោះយ៉ាងណា អ្នកវិភាគជាច្រើននាក់លើកឡើងថា ការហាមឃាត់ប្រើ TikTok នាពេលបច្ចុប្បន្ន គឺដោយសារចិនមានជម្លោះជាមួយអាមេរិក និងបណ្តាប្រទេសលោកខាងលិចកាន់តែខ្លាំងក្លាឡើង ។ ហេតុនេះ អាមេរិកបារម្ភថា ព័ត៌មានរបស់ពលរដ្ឋអាមេរិកនឹងត្រូវធ្លាក់ទៅក្នុងដៃរបស់សត្រូវ ។

កន្លងមក TikTok បានបដិសេធរហូតថា ខ្លួនមិនបានពាក់ព័ន្ធជាមួយរដ្ឋាភិបាលចិនទេ ហើយប្រទេសផ្សេងៗក៏គ្មានភស្តុតាងបង្ហាញថា TikTok បានបញ្ជូនព័ត៌មានទៅឱ្យរដ្ឋាភិបាលចិនដែរ ។

គួរបញ្ជាក់ថា TikTok គឺជាកម្មវិធីមួយទទួលបានការពេញនិយមយ៉ាងខ្លាំង និងកាន់តែពេញនិយមថែមទៀតពីបណ្តាអ្នកប្រើប្រាស់ រហូតដល់វាបានក្លាយជាផ្នែកសំខាន់មួយក្នុងជីវិតប្រចាំថ្ងៃរបស់មនុស្សនៅទូទាំងពិភពលោក ៕ ប្រភព ៖ beartai

ប្រទេសថៃ ៖ លោក Poonpong Naiyanapakorn ប្រធានការិយាល័យគោលនយោបាយ និងយុទ្ធសាស្ត្រពាណិជ្ជកម្មបានបង្ហាញថា លោកបានតាមដានពីតម្រូវការប្រើប្រាស់ផលិតផលថៃនៅទីផ្សារចិនពីវែបសាយ http://xn--g4c.com/ ជាវែបសាយមួយផ្សព្វផ្សាយពីព័ត៌មានសេដ្ឋកិច្ច និងពាណិជ្ជកម្ម សម្រាប់ឱ្យអ្នកប្រកបអាជីវកម្ម អ្នកវិភាគ និងពលរដ្ឋ ដែលចាប់អារម្មណ៍អាចយកព័ត៌មានទាំងនេះទៅប្រើប្រាស់បាន ។

នៅឆ្នាំ២០២២ កន្លងមក ថៃបានក្លាយជាប្រទេសដៃគូពាណិជ្ជកម្មលំដាប់ទី១៤ របស់ចិន ហើយចិនបាននាំចូលផលិតផលពីថៃនៅឆ្នាំ២០២២ ស្មើទឹកប្រាក់៥៦.៥២៧លានដុល្លារអាមេរិក ខណៈប្រទេសនាំចេញផលិតផលទៅកាន់ចិន លំដាប់ទី១ គឺតៃវ៉ាន់ បន្ទាប់មកកូរ៉េខាងត្បូង និងជប៉ុន ។

ក្នុងចំណោមផលិតផលទាំងអស់ដែលថៃបាននាំចេញទៅចិន រួមមាន ម្សៅដំណើបស្មើ៩៩%, ពោតកំប៉ុង៧៩% និងនំបុ័ងស្រួយ៧៣% ។ លើសពីនេះ ផលិតផលរបស់ថៃដែលកំពុងលូតលាស់ក្នុងទីផ្សារចិន រួមមាន គ្រឿងអេឡិចត្រូនិក និងម៉ាស៊ីនថតរូប ។

លោក Poonpong បន្តថា ៖ «ម្សៅដំណើប គឺជាផលិតផលរបស់ថៃមួយប្រភេទដែលអាចប្រកួតប្រជែងក្នុងទីផ្សារចិនរហូតដល់៩៩% ។ វាត្រូវបានគេចាត់ទុកថា ជាផលិតផលដែលចិនមានតម្រូវការខ្លាំងពីថៃ ហើយថៃគួរតែរក្សាការមានប្រៀបក្នុងការប្រកួតប្រជែងនេះបន្តទៀត ។ ទោះយ៉ាងណា តម្រូវការផលិតផលថៃមួយចំនួនបានធ្លាក់ចុះនៅទីផ្សារចិន ដូចជា សាច់មាន់ ផ្លែឈើ និងជ័រកៅស៊ូ ដោយសារមានគូប្រជែងដណ្តើមទីផ្សារពីថៃ ហើយថៃត្រូវតែធ្វើយុទ្ធសាស្ត្របង្កើនទីផ្សាររបស់ខ្លួន និងបង្កើនការផ្តោតទៅលើអតិថិជនឱ្យបានច្រើន តាមរយៈប្រព័ន្ធអនឡាញ និងបណ្តាញសង្គម» ៕

ប្រភព ៖ agrinewsthai