ប្រទេសចិន ៖ សារព័ត៌មានអនឡាញល្បីមួយនៅប្រទេសចិនឈ្មោះ Weibo បានចុះផ្សាយពីភ្ញៀវទេសចរចិនជាច្រើននាក់បានបញ្ចេញមតិអំពីការធ្វើដំណើរមកកម្សាន្តនៅប្រទេសថៃថា ពួកគេត្រូវចំណាយប្រាក់ច្រើនទៅលើម្ហូបអាហារ និងការស្នាក់នៅ ។ តាមរយៈទំព័រហ្វេសប៊ុកឈ្មោះ Sina Hotspot ក្នុងនោះមាននារីម្នាក់ឈ្មោះ Wang Xin បញ្ចេញមតិថា ពេលនាងមកលេងប្រទេសថៃកាលពីមុន ទឹកផ្លែឈើក្រឡុកលក់នៅតាមផ្លូវនៅក្រុងបាងកក ១កែវតម្លៃពី១០បាត-២០បាត ឬគិតជាប្រាក់យន់ ១កែវតម្លៃពី២យន់-៤យន់ប៉ុណ្ណោះ ប៉ុន្តែបច្ចុប្បន្ននេះ ១កែវតម្លៃ៦០បាត (ស្មើ១២យន់) គឺតម្លៃបានកើនឡើងដល់ទៅ៣ដង ។

នារីឈ្មោះ Wang Xin បន្តទៀតថា រីឯថ្លៃចាយវាយនៅតាមមាត់សមុទ្រប្រទេសថៃវិញ បានកើនឡើងរហូតដល់ទៅ២ដងឯណោះ ដោយកាលពីមុន នាងធ្លាប់ជួលទូកចេញទៅសមុទ្រ គឺមានតម្លៃត្រឹមតែ៦ពាន់យន់ប៉ុណ្ណោះ ប៉ុន្តែនៅឆ្នាំ២០២៣នេះ តម្លៃជួលទូកចេញទៅសមុទ្រកើនឡើងរហូតដល់២ម៉ឺនយន់ ។

នារីទេសចរណ៍ចិនរូបនេះបន្ថែមថា ពេលនេះ ការចំណាយលើសេវាកម្មនានាសម្រាប់មកកម្សាន្តនៅប្រទេសថៃ គឺថ្លៃជាងកាលពីមុនឆ្ងាយណាស់ មិនថាម្ហូបអាហារតាមផ្លូវ ឬសេវាកម្មផ្សេងៗ ហើយបើថៃមិនគិតគូរពីតម្លៃសេវាកម្មទាំងនេះឡើងវិញទេ នាងនឹងកាត់បន្ថយការធ្វើដំណើរមកទីនេះ ហើយនាងនឹងទៅលេងប្រទេសផ្សេងវិញ ។

ការបញ្ចេញមតិរបស់នារីឈ្មោះ Wang Xin បានធ្វើឱ្យគេចាប់អារម្មណ៍យ៉ាងខ្លាំងនៅប្រទេសចិន ហើយបើតាមសារព័ត៌មានអនឡាញល្បីនៅចិនឈ្មោះ Weibo បាននិយាយថា មានពលរដ្ឋចិនចូលមកអានការបញ្ចេញមតិខាងលើនេះជាង១០០លាន views ឯណោះ ហើយពួកគេបានបញ្ចេញយោបល់ជាច្រើនអំពីការមកកម្សាន្តនៅប្រទេសថៃថា មានតម្លៃថ្លៃខ្លាំង ដូចគ្នានឹងការធ្វើដំណើរទៅលេងទីក្រុងលំដាប់ទី១ និងទី២ នៅប្រទេសចិនដែរ ៕ ប្រភព ៖ BTimes

ប្រទេសថៃ ៖ នៅថ្ងៃទី១៧ ខែមីនា អ្នកនាង Manatnit Jirawat អគ្គនាយករងនៃអគ្គនាយកដ្ឋានពាណិជ្ជកម្មក្រៅប្រទេស បានថ្លែងថា ករណីមានព័ត៌មានរោងចក្រអង្ករនៅប្រទេសចិនបានបន្លំអង្ករផ្កាម្លិះរបស់ថៃ ដោយពួកគេបានដាំដុះស្រូវនៅប្រទេសចិន ហើយដាក់បញ្ចូលសារធាតុឱ្យអង្ករមានក្លិនក្រអូបដូចគ្នានឹងអង្ករផ្កាម្លិះរបស់ថៃនោះ គឺមិនពាក់ព័ន្ធនឹងប្រទេសថៃទេ ។ រោងចក្រនេះត្រូវបានគេបញ្ជាឱ្យបិទហើយ ដោយសាររោងចក្រនេះធ្វើខុសច្បាប់ ស្តីពីសុវត្ថិភាពចំណីអាហាររបស់ប្រទេសចិន ដែលចិនបានកំណត់ថា អង្ករជាផលិតផលមួយប្រភេទមិនអនុញ្ញាតឱ្យប្រើប្រាស់សារធាតុបន្ថែម ។

អ្នកនាង Manatnit Jirawat ថ្លែងថា អគ្គនាយកដ្ឋានពាណិជ្ជកម្មក្រៅប្រទេសរបស់ថៃ បានទំនាក់ទំនងទៅកាន់ការិយាល័យពាណិជ្ជកម្មក្រៅប្រទេសនៅក្រុងប៉េកាំង និងការិយាល័យផ្សព្វផ្សាយពាណិជ្ជកម្មក្រៅប្រទេសនៅក្រុងសៀងហៃ ឱ្យតាមដានព័ត៌មានពីការក្លែងបន្លំស្លាកសញ្ញាអង្ករផ្កាម្លិះថៃ ហើយតើវាអាចប៉ះពាល់ដល់អង្ករថៃនៅលើទីផ្សារចិនឬអត់ ។ លើសពីនេះ ខាងអគ្គនាយកដ្ឋានក៏បានពិភាក្សាជាមួយភ្នាក់ងាររដ្ឋាភិបាលចិនឱ្យតាមដាន និងការពារកុំឱ្យមានការក្លែងបន្លំអង្ករផ្កាម្លិះថៃនាថ្ងៃអនាគត ។ ជាដំបូង មានការជូនដំណឹងមកថា រដ្ឋាភិបាលចិននឹងដំណើរការតាមច្បាប់ជាមួយក្រុមហ៊ុនទាំងនោះ ប៉ុន្តែចិននៅមិនទាន់មានព័ត៌មានថា មានការក្លែងបន្លំស្លាកសញ្ញាអង្ករផ្កាម្លិះរបស់ថៃទេ ។

អ្នកនាង Manatnit Jirawat បន្តថា ដើម្បីកសាងទំនុកចិត្តដល់អ្នកបរិភោគអង្ករផ្កាមិ្លះថៃនៅប្រទេសចិន អគ្គនាយកដ្ឋាននឹងសហការជាមួយការិយាល័យពាណិជ្ជកម្មក្រៅប្រទេសនៅក្រុងប៉េកាំង និងការិយាល័យផ្សព្វផ្សាយពាណិជ្ជកម្មក្រៅប្រទេសនៅក្រុងសៀងហៃ ដើម្បីជំរុញការផ្សព្វផ្សាយស្លាកសញ្ញាការនាំចេញអង្ករផ្កាមិ្លះថៃដែលលក់នៅក្រៅប្រទេស តាមរយៈវែបសាយwww.thaihommaliricecertificationmark.dft.go.th ។ ការសហការគ្នារវាងប្រទេសថៃ និងចិន ក្នុងគោលបំណងបញ្ជាក់ពីប្រភពអង្កររបស់ថៃថា មានគុណភាពស្របតាមស្តង់ដារដែលក្រសួងពាណិជ្ជកម្មបានកំណត់ ដើម្បីឱ្យអតិថិជន ឬអ្នកនាំចូលអង្ករថៃនៅចិនអាចជ្រើសរើសទិញអង្ករផ្កាម្លិះថៃមានគុណភាពល្អ និងត្រឹមត្រូវបន្តទៀត ៕ ប្រភព ៖ khaosod

ប្រទេសវៀតណាម ៖ ប្រទេសវៀតណាមបានពន្លឿនការងើបឡើងវិញនៃឧស្សាហកម្មទេសចរណ៍ ក្រោយពីរងផលប៉ះពាល់ដោយសារការរាតត្បាតនៃជំងឺកូវីត-១៩ ដោយវៀតណាមមានគម្រោងសម្រួលទិដ្ឋាការលើចំណុចខ្លះ ដើម្បីទាក់ទាញភ្ញៀវទេសចរបរទេសមកកម្សាន្តនៅប្រទេសរបស់ខ្លួនឡើងវិញ ។

សារព័ត៌មានបរទេសរាយការណ៍ថា នាយករដ្ឋមន្ត្រីវៀតណាម លោក Pham Minh Chinh បានបញ្ជាឱ្យមន្ត្រីពាក់ព័ន្ធនឹងវិស័យទេសចរណ៍បន្ធូរបន្ថយតម្រូវការទិដ្ឋាការមួយចំនួន ដើម្បីឱ្យប្រទេសនៅតំបន់អាស៊ីអាគ្នេយ៍មួយនេះអាចទាក់ទាញភ្ញៀវទេសចរកាន់តែច្រើន ក្រោយពីគេសង្កេតឃើញថា ឧបសគ្គធំបំផុតក្នុងការងើបឡើងវិញនៃវិស័យទេសចរណ៍របស់វៀតណាម គឺការលំបាកស្នើសុំទិដ្ឋាការទេសចរណ៍ ។

កាលពីឆ្នាំ២០២២ កន្លងមក ចំនួនភ្ញៀវទេសចរបរទេសធ្វើដំណើរចូលមកប្រទេសវៀតណាម គឺតិចជាង៣,៧លាននាក់ បើទោះជាម្ហូបអាហារវៀតណាមជាច្រើនមុខបានជាប់ចំណាត់ថ្នាក់លើពិភពលោក ហើយវៀតណាមមានឆ្នេរសមុទ្រស្រស់ស្អាតទាក់ទាញភ្ញៀវទេសចរមកកម្សាន្ត ដូចជា ឆ្នេរសមុទ្រហាឡុង ដែលអង្គការយូណេស្កូបានចុះបញ្ជីជាបេតិកភណ្ឌពិភពលោកក្តី ប៉ុន្តែភ្ញៀវទេសចរបរទេសនៅមានបញ្ហាក្នុងប្រទេសវៀតណាមដូចជា បង្គន់សាធារណៈមិនស្អាត និងធុំក្លិន ។

កាលពីថ្ងៃទី១៥ ខែមីនា កន្លងមក នាយករដ្ឋមន្ត្រីវៀតណាម លោក Pham Minh Chinh បានបញ្ជាទៅកាន់គណៈរដ្ឋមន្ត្រីឱ្យដោះស្រាយគោលការណ៍ពិនិត្យលើជនបរទេសចូលប្រទេសវៀតណាម ដូចជា ស្នើឱ្យលើកលែងទិដ្ឋាការបន្ថែមទៀត បន្ថែមរយៈពេលស្នាក់នៅសម្រាប់ភ្ញៀវទេសចរបរទេស យកថ្លៃសេវាផ្សេងៗសមរម្យ និងពង្រីកការស្នើសុំទិដ្ឋាការតាមអេឡិចត្រូនិកផងដែរ ។

នាយកដ្ឋានអន្តោប្រវេសន៍វៀតណាមបញ្ជាក់ថា វៀតណាមបានលើកលែងទិដ្ឋាការដល់ភ្ញៀវទេសចរមកពី១៣ប្រទេស (ក្នុងនោះ១១ប្រទេសនៅអឺរ៉ុប និង២ប្រទេសនៅអាស៊ី) ដែលភ្ញៀវទេសចរមកពីប្រទេសទាំងនេះអាចស្នាក់នៅវៀតណាមបានរយៈពេល១៥ថ្ងៃ ។ ចំណែកភ្ញៀវទេសចរមកពី៩ប្រទេសក្នុងតំបន់អាស៊ានអាចស្នាក់នៅវៀតណាមរហូតដល់៣០ថ្ងៃ ដោយមិនចាំបាច់ស្នើសុំទិដ្ឋាការ ។ បច្ចុប្បន្ន ប្រទេសវៀតណាមបានផ្តល់សេវាកម្មទិដ្ឋាការអេឡិចត្រូនិកទៅកាន់៨០ប្រទេស ។

ក្រសួងទេសចរណ៍វៀតណាមឱ្យដឹងថា ការបន្ធូរបន្ថយគោលនយោបាយទិដ្ឋាការនេះ គឺជាកូនសោរសំខាន់ដើម្បីទាក់ទាញភ្ញៀវទេសចរបរទេសឱ្យកាន់តែច្រើន ។ តាមការប្រជុំផ្នែកទេសចរណ៍រវាងរដ្ឋ និងផ្នែកឯកជន កាលពីថ្ងៃទី១៥ ខែមីនា កន្លងមក ក្រុមហ៊ុនទេសចរណ៍ក្នុងស្រុកបានស្នើឱ្យបន្ថែមរយៈពេលស្នាក់នៅដល់ភ្ញៀវទេសចររហូតដល់៤៥ថ្ងៃ ។

វៀតណាមបានដាក់គោលដៅទទួលភ្ញៀវទេសចរបរទេសចំនួន៨លាននាក់នៅឆ្នាំ២០២៣ ខណៈកាលពីឆ្នាំ២០១៩ ជាពេលមុនផ្ទុះជំងឺកូវីដ វៀតណាមរាយការណ៍ថា មានភ្ញៀវទេសចរបរទេសមកកម្សាន្តនៅប្រទេសនេះចំនួន១៨លាននាក់ឯណោះ ៕ ប្រភព ៖ The standard wealth

កាល់ស្យូម គឺជាសមាសធាតុរ៉ែដល់សំខាន់នៅក្នុងឆ្អឹងនិងធ្មេញ លើសពីនេះទៅទៀតវាមានអត្ថប្រយោជន៍ច្រើនដល់រាងកាយផងដែរ។ ប៉ុន្តែនៅអាយុនីមួយៗរាងកាយរបស់យើងបានលូតលាស់ជាបន្តបន្ទាប់ ដូច្នេះហើយតើយើងត្រូវការកាល់ស្យូមប៉ុន្មានក្នុង១ថ្ងៃ?

១.ស្ត្រីមានផ្ទៃពោះ៖ អ្នកគួរតែទទួលបានជាតិកាល់ស្យូម ១៥០០មីលីក្រាមក្នុងមួយថ្ងៃ ដែលលើសពីមនុស្សធម្មតា ដោយសារតែសារធាតុរ៉ែបែបនេះត្រូវបានបញ្ជូនទៅកុមារសម្រាប់ការអភិវឌ្ឍនៃរចនាសម្ព័ន្ធរាងកាយរបស់ទារក។
២.កុមារភាព(អាយុ១-១០ឆ្នាំ)៖ គួរទទួលបានកាល់ស្យូម ៨០០ – ១០០០ មីលីក្រាមក្នុងមួយថ្ងៃ ប្រើសម្រាប់ពង្រឹងឆ្អឹង និងធ្មេញ និងផ្នែកផ្សេងៗទៀត ដើម្បីប្រើប្រាស់ជារចនាសម្ព័ន្ធនៃរាងកាយ។
៣.មនុស្សពេញវ័យ៖ អ្នកគួរតែទទួលបានជាតិកាល់ស្យូម ១៥០០មីលីក្រាមក្នុងមួយថ្ងៃ។
៤.ស្ត្រីបំបៅដោះ៖ គួរទទួលបានជាតិកាល់ស្យូម ១៥០០ – ២០០០ មីលីក្រាមក្នុងមួយថ្ងៃ។
៥.មនុស្សចាស់៖ គួរតែទទួលបានជាតិកាល់ស្យូម ១០០០-១៥០០ មីលីក្រាម / ថ្ងៃ ដែលលើសពីមនុស្សធម្មតា ព្រោះក្រោយអាយុជាង ៣០ឆ្នាំ រាងកាយនឹងស្រូបជាតិកាល់ស្យូមតិច បណ្តាលឱ្យមានបញ្ហាឆ្អឹង ព្រោះមិនបានទទួលជាតិកាល់ស្យូមគ្រប់គ្រាន់ និងធ្វើឱ្យឆ្អឹងផុយ prune និងមិនមានសុខភាពល្អ៕ ប្រភព៖ sanook

រដ្ឋធានីកៀវ៖ ដោយសារតែកម្លាំងការពារទឹកដីរបស់អ៊ុយក្រែន និង ទាហានរុស្ស៊ី កំពុងតែវាយប្រយុទ្ធយ៉ាងស៊ីសាច់ហុតឈាមគ្នា នៅលើសមរភូមិបាកមូត អស់រយៈពេលជាង៧ខែមកនេះ ក្រុមមន្រ្ដីជាន់ខ្ពស់របស់ក្រុងកៀវ បានអះអាង អំពីការសម្លាប់ទាហានរបស់ក្រុងមូស្គូ រហូតដល់១០៤០នាក់ នៅក្នុងរយៈពេល២៤ម៉ោង។

សារព័ត៌មាន Ukrinform បានចេញផ្សាយ កាលពីថ្ងៃព្រហស្បតិ៍ ទី១៦ ខែមីនា ឆ្នាំ២០២៣ ថា បើតាមអគ្គសេនាធិការ កងទ័ពអ៊ុយក្រែន បានសរសេរបង្ហោះ នៅលើបណ្ដាញសង្គមហ្វេសប៊ុក កាលពីថ្ងៃទី១៦ ខែមីនា ថា នៅក្នុងរយៈពេល២៤ម៉ោងកន្លងមកនេះ រុស្ស៊ី បានបាត់បង់ទាហាន ចំនួន ១០៤០នាក់។ ជាមួយនឹងតួលេខថ្មីនេះ ធ្វើឲ្យរុស្ស៊ី បាត់បង់ទាហាន ១៦២ ៥៦០នាក់ តាំងពីការផ្ទុះសង្គ្រាមដំបូង នៅថ្ងៃទី២៤ ខែកុម្ភៈ ឆ្នាំ២០២២ រហូតមកដល់ថ្ងៃទី១៦ ខែមីនា ឆ្នាំ២០២៣។

ប្រភពព័ត៌មានដដែល បានបន្ដ ថា ក្រៅពីរុស្ស៊ី បានបាត់បង់ទាហាន នៅលើសមរភូមិអស់រាប់ម៉ឺននាក់នោះ កងទ័ពអ៊ុយក្រែន ក៏បានវាយប្រហារកម្ទេចគ្រឿងយុទ្ធោបករណ៍របស់សត្រូវ អស់ជាច្រើន និង មានតម្លៃរាប់សិបពាន់លានដុល្លារ រួមមាន យន្ដហោះចម្បាំង ចំនួន ៣០៥គ្រឿង, ឧទ្ធម្ភាគច្រក ចំនួន២៨៩គ្រឿង, នាវាចម្បាំងតូចធំ ១៨គ្រឿង, រថក្រោះ ចំនួន ៣ ៥០៤គ្រឿង, រថពាសដែក ចំនួន ៦ ៨១០គ្រឿង, ប្រព័ន្ធកាំភ្លើងធំ ចំនួន ២ ៥៣៩គ្រឿង, ប្រព័ន្ធបាញ់គ្រប់រ៉ុក្កែតចម្រុះ ចំនួន ៥០៣គ្រឿង, ប្រព័ន្ធកាំភ្លើងប្រឆាំងនឹងយន្ដហោះ ចំនួន ២៦៥គ្រឿង, ដ្រូន ចំនួន ២ ១៤៥គ្រឿង និង គ្រឿងសឹកជាច្រើនទៀត…។

ដោយឡែក តួលេខទាំងនេះ គ្រាន់តែជាការអះអាង ចេញតែពីភាគីអ៊ុយក្រែន ប៉ុណ្ណោះ។ បើទោះជាយ៉ាងណាក៏ដោយ ទាំងភាគីរុស្ស៊ី និង អ៊ុយក្រែន មិនបានបង្ហាញតួលេខពិតប្រាកដ អំពីកម្លាំងទាហានរបស់ខ្លួន រងការខូចខាត ស្លាប់ ឬ របួសនោះដែរ ហើយក៏មិនទាន់មានប្រភពឯករាជ្យណាមួយបញ្ជាក់នោះដែរ។ បើតាម ក្រុមមន្រ្ដីលោកខាងលិច បានអះអាង កាលពីប៉ុន្មានថ្ងៃមុននេះ ថា ទាហានរបស់រុស្ស៊ី បានរងការខូចខាត ស្លាប់ និង របួស នៅលើសមរភូមិបាកមូត នាភាគខាងកើត ប្រទេសអ៊ុយក្រែន ចន្លោះពី២០ ០០០នាក់ ទៅ៣០ ០០០នាក់៕

នៅគ្រប់បណ្តាប្រទេសនៃពិភពលោកភាគច្រើនប្រទេសនីមួយៗគឺសំបូរទៅដោយទាហានដែលជាបុរសៗ ដោយឡែកប្រទេសទាំង៧នេះគឺសំបូរទៅដោយទាហានដែលជានារីៗច្រើនជាងគេទៅវិញ ។ ដូច្នេះហើយតើប្រទេសណាខ្លះដែលសំបូរទៅដោយទាហានស្រីច្រើនជាងគេ? តោះចូលរួមតាមដានទាំងអស់គ្នា៖

១.ប្រទេសចិន៖ យោងតាមរបាយការណ៍សិក្សាក្នុងសភាអាមេរិក កងទ័ពចិនសរុបមានជាង ២ លាននាក់ក្នុងឆ្នាំ២០២២ ដែលកងទ័ពនារីមានចំនួនជាង១សែននាក់ នេះបង្ហាញថាចិនជាប្រទេសដែលមានកងទ័ពច្រើនជាងគេបង្អស់ក្នុងពិភពលោក។២.ប្រទេសឥណ្ឌា៖ យោងតាមរបាយការណ៍របស់ប្រភពThe Indian express ប្រទេសនេះមានយោធាសរុបជាង១,២លាននាក់ក្នុងឆ្នាំ២០២២ ដែលមានកងទ័ពនារីមានចំនួន៣៦០០០នាក់។៣.ប្រទេសកូរ៉េខាងជើង៖ យោងតាមរបាយការណ៍របស់កាសែត fous net worth បានអោយដឹងថាកូរ៉េខាងជើងមានយោធាសរុបជាង៩០ម៉ឺននាក់ក្នុងឆ្នាំ២០២២ ដែលកងទ័ពនារីមានចំនួន៣៨ម៉ឺននាក់។៤.ប្រទេសប៉ាគីស្ថាន៖ យោងតាមវិទ្យាស្ថានអន្តរជាតិយុទ្ធសាស្រ្ត ប៉ាគីស្ថានមានទាហានយោធាសរុបជាង៦៥ម៉ឺននាក់ក្នុងឆ្នាំ២០២២ ដែលកងទ័ពនារីមានចំនួនជាង៤០០០នាក់។៥.ប្រទេសកូរ៉េខាងត្បូង៖ យោងតាមរបាយការណ៍របស់ប្រភព Security Women បានអោយដឹងថាកូរ៉េខាងត្បូងមានយោធាសរុបជាង៣លាននាក់ក្នុងឆ្នាំ២០២២ ដែលមានទាហានជានារីសរុបជាង៦០០០នាក់។៦.ប្រទេសអាមេរិក៖ យោងតាមរបាយការណ៍របស់កាសែតCNN អាមេរិកមានកងទ័ពសរុបជាង៤៨ម៉ឺននាក់ក្នុងឆ្នាំ២០២២ ដែលមានទាហានជានារីចំនួន៧៤០០០នាក់។៧.ប្រទេសរុស្សី៖ យោងតាមរបាយការណ៍របស់វិទ្យាស្ថានអរន្តជាតិIISS ប្រទេសរុស្សីមានទាហានសរុបជាង៣០ម៉ឺនក្នុងឆ្នាំ២០២២ ដែលមានទាហានជានារីចំនួន៣៥០០០នាក់៕