នៅមិនទាន់ថមថយកម្តៅនៅឡើយទេជុំវិញរឿងសំលៀកបំពាក់របស់បណ្ឌិតច្នៃម៉ូត ឯម រៀម បង្ហាញខ្លួននៅលើកម្រាលព្រំក្រហមក្នុងកម្មវិធីនាពេលកន្លងមកនេះ ដោយមានទាំងអ្នករិះគន់ និងមានទាំងអ្នកលើកទឹកចិត្ត។ ក្នុងនោះសាមីខ្លួនផ្ទាល់គឺលោក ឯម រៀម បានលើកឡើងថា ការស្លៀកពាក់របស់លោកដែលបញ្ចេញដើមទ្រូងនោះមិនខុសឆ្គងទេ គឺធ្វើដូចជាបុរសទូទៅ។ ការលើកឡើងបែបនេះ ក៏ធ្វើឱ្យតារាចម្រៀង អ៊ាម វន្នី នៅមិនសុខបានបង្ហាញយោបល់របស់ខ្លួនទៅកាន់រៀមច្បង ឯម រៀម ភ្លាមលើករណីនេះ។
ម្ចាស់បទ «រៀបការពេលណាអូន?» បានលើកឡើងថា «បងប្រុសធ្វើល្អបានច្រើនហើយ តែការខុសឆ្គងគង់គេចមិនផុតឡើយ ព្រោះយើងធ្វើឱ្យមហាជនមើល។ រូបប្រុសបីនាក់ខាងស្តាំ គេបញ្ចេញដើមទ្រូងដោយភាពអង់អាចជាបុរស មើលទៅមិនទាស់ភ្នែកទេ តែបងខុសប្លែកពីគេ ដោយបង្ហាញដើមទ្រូង តែព្រលែងខោ ពាក់ស្រោមបា និងស្រោមជើងបែបមនុស្សស្រី ទើបមើលទៅមហាជនទាស់ភ្នែក ព្រោះបើខាងក្រោមបែបទំនោរស្ទីលមនុស្សស្រី ខាងលើមិនគួរបង្ហាញទ្រូងទេ នេះជាមូលហេតុនៃបញ្ហា។ សង្ឃឹមថាការរិះគន់ទាំងឡាយដើម្បីការស្ថាបនា គឺមិនមែនជាន់ពន្លិចក្នុងនាមប្រជាជនខ្មែរតែមួយដូចគ្នា»។
គួរបញ្ជាក់ផងដែរថា ដ្បិតលោក ឯម រៀម និយមលេងស្ទីលខ្លួនស៊ិចស៊ី ពាក់ស្បែកជើងកែងដូចមនុស្សស្រីមែនពិត ប៉ុន្តែបណ្ឌិតច្នៃម៉ូតដែលបញ្ចប់ការសិក្សានៅប្រទេសបារាំងវ័យ៥៣ឆ្នាំរូបនេះ មានភរិយា២នាក់ និងកូនចំនួនពីរផងដែរ តែកន្លងមកលោកពុំសូវបញ្ចេញរឿងឯកជនឱ្យមហាជនដឹងច្រើនឡើយ៕
