ប្រទេសថៃ ៖ សារព័ត៌មានប្រទេសម៉ាឡេស៊ីមួយឈ្មោះ says ចុះផ្សាយថា ប្រទេសចិនអាចដាំដុះទុរេនដោយខ្លួនឯង ហើយចិនសង្ឃឹមថា នឹងអាចប្រមូលផលបានចំនួន២.៤៥០តោននៅខែមិថុនា ឆ្នាំ២០២៣ ។ គេសង្កេតឃើញថា ក្រោយពីការនាំចេញទុរេនទៅកាន់ទីផ្សារចិនពីតំបន់អាស៊ីអាគ្នេយ៍កើនឡើង ធ្វើឱ្យប្រទេសចិនចាប់ផ្តើមដាំដុះទុរេនដោយខ្លួនឯងក្នុងរយៈពេលប៉ុន្មានឆ្នាំនេះ ។

សារព័ត៌មានរបស់ម៉ាឡេស៊ីបានដកស្រង់វីដេអូឃ្លីបមួយពី China Press បានចុះផ្សាយកាលពីថ្ងៃទី១៥ ខែមីនា កន្លងមក ដែលបង្ហាញពីបុរសម្នាក់ទៅចម្ការទុរេនមួយកន្លែងស្ថិតនៅភាគខាងត្បូងប្រទេសចិន ហើយក្នុងវីដេអូឃ្លីបបញ្ជាក់ថា រូបគេមិនបាននៅប្រទេសម៉ាឡេស៊ី ឬថៃទេ ប៉ុន្តែគេនៅប្រទេសចិន ហើយនេះជាចម្ការទុរេនពូជម៉ន់ថង ហើយដើមឈើនៅជុំវិញគេនេះ សុទ្ធតែជាដើមទុរេនទាំងអស់ ហើយអ្នកថែទាំចម្ការទុរេន គឺជាជនជាតិចិន ។

លោក Chonlathee Noomnu អតីតប្រធានការិយាល័យស្រាវជ្រាវ និងអភិវឌ្ឍន៍កសិកម្មតំបន់៦ នៃនាយកដ្ឋានកសិកម្ម ហើយក៏ជាម្ចាស់ចម្ការទុរេននៅខេត្តត្រាត បានលើកឡើងថា ករណីប្រទេសចិនអាចដាំទុរេនសម្រាប់លក់ក្នុងប្រទេសរបស់ខ្លួនប្រមាណជាង២.០០០តោន គឺចាត់ទុកថា តិចតួចណាស់បើធៀបជាមួយទុរេនរបស់ថៃ ដែលបាននាំចេញទៅកាន់ទីផ្សារចិន ប្រមាណពី៥-៧សែនតោន ។ រីឯទិន្នផលផលិតទុរេនរបស់ចិនជាង២.០០០តោននោះ គឺស្មើនឹងចម្ការទុរេនរបស់ថៃដែលមានទំហំធំតែ១ចម្ការប៉ុណ្ណោះ ដូច្នេះ ថៃមិនចាំបាច់បារម្ភពេកទេ ។

លោក Chonlathee Noomnu ជឿជាក់ថា ផ្ទៃដីដាំទុរេននៅភាគខាងកើតប្រទេសថៃ គឺជាទីតាំងដ៏ល្អបំផុតនៅលើពិភពលោក ហើយបើតាមការពិនិត្យឃើញថា សណ្ឋានដី បរិយាកាស និងទឹកនៅទីនេះ គឺអំណោយផលបំផុត ។ ដូច្នេះ លោកសូមកុំឱ្យពលរដ្ឋថៃកុំបារម្លខ្លាំងពេក ប៉ុន្តែអ្វីត្រូវបារម្ភនោះ គឺគុណភាពទុរេន លោកថា ៖ «ថៃត្រូវតែពង្រឹងគុណភាពទុរេនរបស់ខ្លួន ដូចជា កុំនាំចេញទុរេនខ្ចីទៅលក់នៅចិន គឺវាធ្វើឱ្យថៃអាចនាំចេញទុរេនទៅចិនជារៀងរហូត និងបំពេញតម្រូវការទីផ្សារនៅក្រៅប្រទេសផងដែរ» ។

លោកបន្ថែមថា ៖ «ប្រទេសចិនបានសាកល្បងដាំទុរេនអស់រយៈពេល៤០ឆ្នាំមកហើយ និងអភិវឌ្ឍន៍ពូជទុរេនឱ្យធន់នឹងបរិយាកាសនៅប្រទេសចិន តែបើធៀបនឹងប្រទេសថៃទៅលើកត្តាអាកាសធាតុ និងបរិស្ថានវិញឃើញថា ថៃអាចដាំទុរេនមានប្រៀបជាងប្រទេសណាៗទាំងអស់ ។ ដូច្នេះ បើថៃពង្រឹងគុណភាពទុរេនរបស់ខ្លួន ចៀសវាងការនាំចេញទុរេនខ្ចី គឺថៃនៅតែអាចរក្សាទីផ្សារនៅចិនបានជានិច្ច» ៕ ប្រភព ៖ springnews

កាលពីពេលថ្មីៗនេះ យោងតាមតាមការបង្ហោះរបស់គណនីហ្វេកប៊ុក ឈ្មោះចេង ច័ន្ទ បានឱ្យដឹងថា នៅភូមិថ្មី ឃុំតាសាល ស្រុកឱរ៉ាល់ ខេត្ត កំពង់ស្ពឺ គោងាប់មួយកន្លែង៧ក្បាលជិតចម្ការដំឡូងមីដោយមិនដឹងមូលហេតុ។

ដោយសាកសពគោទាំងអស់ មានសភាព ស្អុយរលួយ​ហាក់បីដូចជា បានងាប់ច្រើនថ្ងៃមកហើយ ក៏ប៉ុន្តែតាមការលើកឡើងម្ចាស់គណនីនោះ គោទើបតែបាត់មួយថ្ងៃ មិនគួរមានសភាពស្អុយរលួយដូច្នេះទេ។ ចំពោះគោទាំងនេះគឺមានអាចយកទទួលទានបាននោះទេ ព្រោះថាវាអាចនឹងផ្ទុកសារជាតិ ដែលធ្វើឱ្យមនុស្សពុលបាន។

តែយ៉ាងណាមិញ ជុំវិញករណីនេះ មន្រ្តីជំនាញពាក់ព័ន្ធមានទាន់ចេញសេចក្តីថ្លែងបញ្ជាក់អំពីមូលហេតុនៃការស្លាប់នេះ នៅឡើយនោះទេ រងចាំការធ្វើសកលវិឆ័យជាមុនសិន៕

ប្រទេសជប៉ុន ៖ អ្នកដែលធ្លាប់បានធ្វើដំណើរជាមួយកូនតូចតាមរថយន្តក្រុងសាធារណៈ នឹងយល់ច្បាស់ពីភាពរញ៉េរញ៉ៃនៅពេលក្មេងយំព្រោះឃ្លានទឹកដោះគោ ឬពេលផ្លាស់ប្តូរក្រណាត់កន្ទបជាដើម ជាពិសេស ការធ្វើដំណើរតាមរថភ្លើង បើទោះជាវាទាន់ពេលវេលា និងមានតម្លៃសមរម្យក្តី ប៉ុន្តែការស្វែងរកបន្ទប់ទឹកសម្រាប់ប្រើប្រាស់ជារឿងពិបាក ។ ហេតុនេះ ធ្វើឱ្យអ្នកផ្តល់សេវាកម្មរថភ្លើងនៅទីក្រុងតូក្យូបង្កើតគំនិតមួយឡើង ដោយធ្វើបន្ទប់ពិសេសសម្រាប់ថែទាំទារក ដើម្បីដោះស្រាយបញ្ហាការរញ៉េរញ៉ៃ និងគ្មានភាពផ្ទាល់ខ្លួន ។

បន្ទប់សម្រាប់ថែទាំទារកនេះមានឈ្មោះថា Mamaro ត្រូវបានរចនាឡើងដោយក្រុមហ៊ុន Trim ដែលមានជំនាញផ្នែកការថែទាំកុមារ ដើម្បីជួយឱ្យអ្នកមានកូនតូចៗមានបន្ទប់ផ្ទាល់ខ្លួនលើរថភ្លើង ខណៈការធ្វើដំណើរតាមរថភ្លើងនៅប្រទេសជប៉ុនមានសភាពអ៊ូអរ ។ នៅបន្ទប់នេះមានដាក់កៅអីអង្គុយ និងតុសម្រាប់ផ្លាស់ប្តូរក្រណាត់កន្ទបទារក ដើម្បីឱ្យឪពុកម្តាយអាចឱ្យទឹកដោះគោទៅកូនរបស់ពួកគេ និងបំបៅទឹកដោះកូន ។

ក្រៅពីបន្ទប់ពិសេស Mamaro នឹងជួយផ្តល់ភាពងាយស្រួលដល់ឪពុកម្តាយគ្រប់រូបហើយ បន្ទប់នេះក៏បានបំពាក់ទូរទស្សន៍ផងដែរដើម្បីទាក់ទាញចំណាប់អារម្មណ៍ក្មេងៗ (ជាកូនបង) ដែលត្រូវអង្គុយរង់ចាំ ខណៈឪពុកម្តាយពួកគេកំពុងថែទាំ និងបំបៅដោះប្អូន ។

បន្ទប់ពិសេស Mamaro បានចាប់ផ្តើមបង្កើតឡើងនៅលើរថភ្លើងឈ្មោះ Odakyu-line ចំនួន៧ស្ថានីយនៅក្នុងទីក្រុងតូក្យូ ។ លើសពីនេះ អ្នកមានកូនតូចអាចជិះរថភ្លើងនេះដោយមិនគិតប្រាក់ផងដែរ ក្នុងចន្លោះពីម៉ោង៧និង៣០នាទីព្រឹក រហូតដល់ម៉ោង៧យប់ ៕ ប្រភព ៖ beartaiBRIEF

ប្រទេសអូស្ត្រាលី ៖ គេបានឃើញត្រីរាប់សែនក្បាលងាប់បន្តកន្ទុយគ្នានៅមាត់ទន្លេរបស់ប្រទេសអូស្ត្រាលី ដោយសារតែបញ្ហាគុណភាពទឹកទន្លេ និងការផ្លាស់ប្តូរសីតុណ្ហភាពភ្លាមៗនៅក្នុងប្រទេសនេះ ។

តាមការថតរូបភាពពីលើអាកាសឃើញថា ត្រីជាច្រើនក្បាលបានងាប់បន្តកន្ទុយគ្នានៅមាត់ទន្លេមួយឈ្មោះ Darling ដែលជាទន្លេមានប្រវែងវែងជាងគេស្ថិតក្នុងលំដាប់ទី៣ របស់ប្រទេសអូស្ត្រាលី ហើយទន្លេនេះស្ថិតនៅជិតទីក្រុង Menindi រដ្ឋ New South Wales របស់អូស្ត្រាលី ។

នេះមិនមែនជាលើកដំបូងទេ ដែលប្រទេសអូស្ត្រាលីជួបហេតុការណ៍បែបនេះ កាលពីឆ្នាំ២០១៨ និងឆ្នាំ២០១៩ កន្លងមក ប្រទេសអូស្ត្រាលីក៏ធ្លាប់មានហេតុការណ៍ត្រីងាប់ដូចគ្នានេះដែរនៅមាត់ទន្លេ Darling ដោយសារគុណភាពទឹកកាន់តែអាក្រក់ រួមនឹងសីតុណ្ហភាពបានផ្លាស់ប្តូរភ្លាមៗ ។

ចំណែកមន្ត្រីផ្នែកគ្រប់គ្រងទឹកនៃការិយាល័យផែនការ និងបរិស្ថានប្រចាំរដ្ឋ New South Wales បញ្ជាក់តាម Twitter ថា កម្រិតបរិមាណអុកស៊ីសែនក្នុងទឹកបានធ្វើឱ្យគុណភាពទឹកនៅទន្លេនេះផ្លាស់ប្តូរ ។ លើសពីនេះ វាជាកត្តាសំខាន់ដែលធ្វើឱ្យត្រីរាប់សែនក្បាលងាប់ជាបន្តបន្ទាប់ ខណៈទីនេះ គឺជាចំណុចតភ្ជាប់រវាងបឹង Weatherell និងទីក្រុង Menindi ។

ជាមួយគ្នានេះ សារព័ត៌មានក្នុងស្រុកក៏បានចុះផ្សាយដែរថា ខាងមន្ត្រីអូស្ត្រាលីបានបញ្ជូនបុគ្គលិកការិយាល័យជលផលមកកាន់តំបន់នេះដើម្បីត្រួតពិនិត្យ និងវាយតម្លៃស្ថានការណ៍ហើយ ៕ ប្រភព ៖ TNN World