Cecilia Cheung បង្ហាញទង្វើមួយទៅកាន់ ទិនហ្វី ក្នុងថ្ងៃកំណើតឈានចូលអាយុ៦៤ឆ្នាំ

ក្នុងឱកាសខួបកំណើតគម្រប់ ៦៤ ឆ្នាំរបស់លោក Stephen Chow ហៅ ទិនហ្វី នៅថ្ងៃទី ២២ ខែមិថុនា តារាសម្តែង Cecilia Cheung បានបង្ហោះនៅលើបណ្តាញសង្គម ដោយចែករំលែករូបថតពិសេសមួយសន្លឹករបស់អ្នកទាំងពីរជាមួយគ្នាពីខ្សែភាពយន្ត «ជីវិតស្ដេចកំប្លែងទិនហ្វី» (King of Comedy) ឆ្នាំ ១៩៩៩ រួមជាមួយនឹងវីដេអូរបស់នាងកាន់នំខួបកំណើតដើម្បីជូនពរអតីតតារាសម្តែងនិងជាអ្នកផលិតខ្សែភាពយន្តរូបនេះ។

នេះជាឆ្នាំទី៨ជាប់ៗគ្នាដែល Cecilia Cheung បានផ្ញើសារជូនពរថ្ងៃកំណើតជាសាធារណៈដល់លោក Stephen ។ ចាប់តាំងពីចូលរួមក្នុងវេទិកាប្រព័ន្ធផ្សព្វផ្សាយសង្គមនេះក្នុងឆ្នាំ ២០១៨ នាងស្ទើរតែមិនដែលខកខានថ្ងៃពិសេសរបស់ ទិនហ្វី ឡើយ។ នៅក្នុងរូបថតនោះ Cecilia Cheung ដែលពេលនោះមានអាយុ ១៨ឆ្នាំ នៅតែមានទឹកមុខស្លូតបូតខណៈពេលដែល ទិនហ្វី ឈរក្បែរនាងដោយស្នាមញញឹម។ រូបថតនេះបានធ្វើឱ្យទស្សនិកជននឹករម្លឹកទៅកាន់រឿង «ជីវិតស្ដេចកំប្លែងទិនហ្វី» កាលពី ២៦ ឆ្នាំមុន។ ឈុតដែលតួអង្គទិនហ្វី និយាយថា «ខ្ញុំនឹងមើលថែអ្នក» ហើយ Cecilia Cheung អង្គុយយំក្នុងតាក់ស៊ី នៅតែត្រូវបានអ្នកទស្សនាជាច្រើនចងចាំ។

Cecilia ធ្លាប់បានចែករំលែកនៅក្នុងព្រឹត្តិការណ៍នានាថាបើគ្មាន Stephen Chow ទេក៏គ្មាន នាងដូចសព្វថ្ងៃដែរ។ នៅឆ្នាំនេះបំណងប្រាថ្នារបស់តារាសម្តែងវ័យ ៤៦ឆ្នាំរូបនេះក៏រួមបញ្ចូលការជូនពរឱ្យរឿង «Shaolin Women’s Soccer» ទទួលបានជោគជ័យដ៏អស្ចារ្យនៅក្នុងការិយាល័យលក់សំបុត្រ» ដែលជាការលើកទឹកចិត្តដោយផ្ទាល់ដល់ខ្សែភាពយន្តថ្មីដែលសរសេរ និងដឹកនាំរឿងដោយលោក Stephen Chow ដែលគ្រោងនឹងចេញផ្សាយនៅខែកក្កដា។

យោងតាមប្រព័ន្ធផ្សព្វផ្សាយរឿង «Shaolin Women’s Soccer» សម្តែងដោយ Zhang Xiaofei រួមជាមួយ Dilraba Dilmurat, Lay Zhang, Sisley Choi អតីតកីឡាការិនីបាល់ទាត់នារីជម្រើសជាតិ Zhao Lina និង Li Jiayue ព្រមទាំងការបង្ហាញខ្លួនពិសេសដោយតារាសម្តែងកូរ៉េខាងត្បូង Song Kang-ho ក្នុងនាមជាអាជ្ញាកណ្តាល៕