ប្រាសាទមេបុណ្យខាងលិច ត្រូវបានកសាងឡើងនាពាក់កណ្ដាលសតវត្សរ៍ទី១១ សោយស្នាមព្រះហ័សព្រះបាទឧទយាទិត្យវរ្ម័នទី២ ដើម្បីឧទ្ទិសថ្វាយព្រះវិស្ណុក្នុងព្រហ្មញ្ញសាសនា។

ប្រាសាទនេះ មានលក្ខណៈពិសេសប្លែកម្យ៉ាង ដោយសារសំណង់ប្រាសាទមានទំហំ១០០ ម៉ែត្របួនជ្រុង មានកំពែងមួយជាន់ និងមានសំណង់ថ្មភក់រាងមូល ប្រៀបដូចជាអណ្ដូងទឹកដែលមានអង្កត់ផ្ចិត៣ម៉ែត្រ ស្ថិតនៅចំកណ្ដាលស្រះទឹកក្នុងប្រាសាទ។ ឯកំពែងខាងកើត ស្ថាបត្យករបានរចនាជាថែវរំលេចដោយក្បាច់រចនាយ៉ាងស្អាត មានបង្អួចចំហ និងគោបុរៈចំនួន៣ ដែលធ្វើពីថ្មពណ៌ផ្កាឈូក។

ប្រាសាទមេបុណ្យខាងលិចនេះស្ថាបនា នៅចំកណ្ដាលបារាយណ៍ទឹកថ្លា ដោយយកលំនាំតាមដំណើររឿងកូរសមុទ្រទឹកដោះ នៃការបង្កើតភពថ្មី។ តាមដំណើររឿងថា ព្រះវិស្ណុទ្រង់ផ្ទំធ្វើសមាធិលើនាគអនន្តៈ បណ្ដែតខ្លួនលើផ្ទៃទឹកសមុទ្រដ៏ធំល្វឹងល្វើយអស់កាលយ៉ាងយូរ ដើម្បីបង្កើតឱ្យមានភពផែនដីថ្មីសម្រាប់សត្វលោករស់នៅ។

បន្ទាប់មក មានផ្កាឈូកមួយដើមដុះចេញពីផ្ចិតរបស់ព្រះអង្គ ហើយនៅលើផ្កាឈូកនោះមានលេចចេញនូវព្រះព្រហ្ម ដែលទ្រង់កំពុងគង់ធ្វើសមាធិដើម្បីបង្កើតភពថ្មីនោះឯង។ ហេតុនេះហើយទើបព្រះបាទឧទយាទិត្យវរ្ម័នទី២ ស្ថាបនាបដិមាព្រះវិស្ណុផ្ទំតម្កល់នៅកណ្ដាលប្រាសាទ ដើម្បីឱ្យស្របនឹងតម្រាទេវកថានេះ៕

ភ្នំពេញ៖ នាយកដ្ឋានព័ត៌មានវិទ្យា បានឱ្យដឹងថា កន្លងមកបងប្អូនប្រជាពលរដ្ឋមួយចំនួនបានសាកសួរអំពីឈ្មោះក្រុមហ៊ុន គេហទំព័រ ទំព័រហ្វេសប៊ុក ឬកម្មវិធី (App) ដែលផ្តល់ប្រាក់កម្ចីអនឡាញងាយស្រួល និងឆាប់រហ័ស។

ទន្ទឹមនេះដែរ នាយកដ្ឋានព័ត៌មានវិទ្យាធ្លាប់បានធ្វើការផ្សព្វផ្សាយនូវអត្តបទអប់រំស្តីពី “ហានិភ័យនៃកម្ចីអនឡាញខុសច្បាប់ (Loan Shark / Scam)” ដែលអត្ថបទនោះបានអធិប្បាយអំពីល្បិចកល ដែលជនខិលខូចបានប្រើប្រាស់ក្នុងការឆបោក ឬដាក់អន្ទាក់ទៅលើជនរងគ្រោះ ព្រមទាំងបរិយាយអំពីហានិភ័យពាក់ព័ន្ធមួយចំនួនផងដែរ។

ដោយទទួលបានសេចក្តីរាយការណ៍ជាបន្តបន្ទាប់ពីមហាជន ក្រុមការងារបច្ចេកទេស សូមលើកយកនូវល្បិចកល និងបច្ចេកទេសថ្មី ដែលជនខិលខូចបានប្រើប្រាស់ក្នុងការបោកបញ្ឆោតប្រាក់ពីជនរងគ្រោះ ដោយសង្ខេបជូនដូចខាងក្រោម៖

១- ជនខិលខូចបានបង្កើត គេហទំព័រ ទំព័រហ្វេសប៊ុក ឬកម្មវិធី (App) ជាមួយនឹងឈ្មោះក្រុមហ៊ុនកម្ចីប្រាក់អនឡាញ

២- ជនខិលខូចធ្វើការផ្សព្វផ្សាយ (Advertising) គេហទំព័រ ទំព័រហ្វេសប៊ុក ឬកម្មវិធី (App) លើកម្មវិធីបណ្តាញសង្គម រួមមាន ហ្វេសប៊ុក (Facebook) តេឡេក្រាម (Telegram) សារអេឡិចត្រូនិក (Messenger) ដើម្បីធ្វើការអូសទាញជនរងគ្រោះទាក់ទងទទួលកម្ចី

៣- ពេលជនរងគ្រោះស្នើសុំកម្ចីពីជនខិលខូច ទាមទារគោរពលក្ខខណ្ឌមួយចំនួន ដូចជា៖ ត្រូវបង់កម្រៃសេវារដ្ឋបាល ថតរូបអត្តសញ្ញាណប័ណ្ណ រូបថតជនរងគ្រោះ (ពេលខ្លះទាមទាររូបភាពអាក្រាតកាយ) ។ល។

៤- បន្ទាប់ពីបំពេញនូវលក្ខខណ្ឌ កម្ចីខ្លះត្រូវបានផ្តល់ជូនដល់ជនរងគ្រោះ ជាមួយនិងការប្រាក់ដែលមានទំហំធំ បើប្រៀបធៀបនឹងចំនួនប្រាក់កម្ចី។ មានករណីមួយចំនួនផ្សេងទៀត ជនខិលខូចពុំបានផ្តល់កម្ចីដូចការសន្យា និងថែមទាំងឆបោកជនរងគ្រោះឱ្យសងប្រាក់ ដោយគម្រាមបង្ហោះរូបភាពអត្តសញ្ញាណប័ណ្ណ រូបថត ឬរូបអាក្រាតកាយរបស់ជនរងគ្រោះថែមទៀតផង។

នាពេលថ្មីៗនេះ ដោយសង្កេតឃើញមានសកម្មភាពផ្សព្វផ្សាយ និងផ្តល់សេវាហិរញ្ញវត្ថុក្រៅផ្លូវការ ជាពិសេសសេវាឥណទាន តាមរយៈទូរស័ព្ទ បណ្ដាញសង្គមនានា និងអនឡាញ យ៉ាងអនាធិបតេយ្យដោយគ្មានច្បាប់អនុញ្ញាតត្រឹមត្រូវពីធនាគារជាតិនៃកម្ពុជា បានធ្វើឱ្យសាធារណជនមានការភាន់ច្រឡំ និងបានបង្កផលវិបាកជាច្រើនមកលើសេដ្ឋកិច្ចនិងសង្គម តាមរយៈការយកអត្រាការប្រាក់ខ្ពស់ហួសហេតុ ការគំរាមកំហែងបំភិតបំភ័យ ការអនុវត្តកិច្ចសន្យាមិនសុចរិត ដោយបង្កប់នូវការកេងចំណេញហួសហេតុពីអ្នកខ្ចីប្រាក់ ដែលបណ្តាលឱ្យប៉ះពាល់ដល់ជីវភាពរស់នៅរបស់ប្រជាពលរដ្ឋ និងធ្វើឱ្យធ្លាក់ក្នុងបំណុលច្រើនលើសលប់។

ធនាគារជាតិនៃកម្ពុជា និងអគ្គស្នងការដ្ឋាននគរបាលជាតិ បានចេញប្រកាសរួមគ្នាដើម្បីចាត់វិធានការតឹងរ៉ឹងតាមផ្លូវច្បាប់ដល់ការផ្តល់ឥណទានខុសច្បាប់ និងការផ្សព្វផ្សាយនានាតាមគ្រប់រូបភាពពាក់ព័ន្ធនឹងការផ្តល់សេវាហិរញ្ញវត្ថុដោយគ្មានច្បាប់អនុញ្ញាត។

ដើម្បីឱ្យអាជ្ញាធរពាក់ព័ន្ធអាចចាត់វិធានការផ្លូវច្បាប់ទាន់ពេលវេលា សូមប្រជាពលរដ្ឋដែលមានព័ត៌មានពាក់ព័ន្ធនឹងសកម្មភាពផ្តល់ឥណទានខុសច្បាប់ សូមរាយការណ៍មកធនាគារជាតិនៃកម្ពុជា តាមរយៈលេខទូរស័ព្ទចំនួន ៥ ខ្សែ៖ ០៨៥ ៦០០ ០០២, ០៨៥ ៦០០ ០០៣, ០៩៨ ២២០ ០០១, ០៩៨ ២២០ ០០២ និង ០៩៧ ២៧៨ ៣០៣០។

បន្ថែមពីនេះ ប្រជាពលរដ្ឋក៏អាចប្រឹក្សា/សាកសួរអំពីចម្ងល់និងបញ្ហាពាក់ព័ន្ធនឹងការប្រើប្រាស់សេវាហិរញ្ញវត្ថុមកធនាគារជាតិនៃកម្ពុជា តាមរយៈលេខទូរស័ព្ទខាងលើផងដែរ៕

រុក្ខជាតិជាគឺជាភាវៈមានជីវិត ហេតុដូចន្នេះវាទាមទារការផលិតថាមពលដើម្បីរស់។ ដើម្បីផលិតថាមពលបាន រុក្ខជាតិផ្ទុកសារធាតុក្លរ៉ូភីល។ ក្លរ៉ូភីល ជាអ្នកបម្លែងថាមពល ទៅឱ្យរុក្ខជាតិដោយប្រើប្រាស់ពន្លឺព្រះអាទិត្យ ក្រោមលំនាំរស្មីសំយោគ។ ក្លរ៉ូភីលនេះហើយ ដែលជាសារធាតុធ្វើឱ្យរុក្ខជាតិ មានពណ៌បៃតង មកកាន់ចក្ខុវិញ្ញាណរបស់មនុស្ស។ ក្លរ៉ូភីល ស្រូបយករលកពន្លឺពណ៌ខៀវ និងក្រហមនៅក្នុងតារាងអេឡិចត្រូម៉ាញេទិច និងផ្លាតរលកពន្លឺពណ៌បៃតង ចេញក្រៅវិញ។ ហេតុដូច្នេះហើយ ទើបមនុស្សមើលរុក្ខជាតិថាមានពណ៌បៃតង។

ម្យ៉ាងវិញទៀតសម្រាប់រុក្ខជាតិដែលមានស្លឹកខុសពីពណ៌បៃតង ដូចជាលឿង ក្រហមជាដើមនោះ មិនមែនមានន័យថាពួកវាគ្មានផ្ទុកសារធាតុក្លរ៉ូភីលនោះទេ។ ពេលខ្លះ សារ​ធាតុគីមី​មួយចំនួនផ្សេងទៀជាអ្នកគ្របដណ្តប់​លើ​ស្រទាប់ របស់​សារធាតុ​ក្លរ៉ូភីល ដែល​ធ្វើ​ឱ្យ​រុក្ខជាតិ​នោះ មាន​ពណ៌​ខុសពី​បៃតង​។ ទោះបីជា​យ៉ាងនេះ​ក្តី រុក្ខជាតិ​ទាំងនោះ ក៏​នៅតែ​ប្រើប្រាស់​សារធាតុ​ក្លរ៉ូភីល ក្នុង​ការផលិត​ថាមពល​ដដែល​ទេ​៕

ប្រភព៖ JIC

នៅថ្ងៃទី១៧ ខែមីនា ឆ្នាំ២០២៣ យោងតាមព្រះរាជក្រឹត្យរបស់ ព្រះករុណា ព្រះបាទ សម្តេចព្រះ បរមនាថ ន​រោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យ​ដំឡើងឋានន្តរស័ក្តិថ្នាក់ នាយឧត្តមសេនីយ៍ ដល់លោកបណ្ឌិត ហ៊ុន ម៉ាណែត «ផ្កាយ ៤ »។

ព្រះមហាក្សត្រ ដំឡើងឋានន្តរស័ក្តិ នាយឧត្តមសេនីយ៍ ដល់ ឧត្តមសេនីយ៍ឯក ហ៊ុន ម៉ាណែត អត្តលេខ ០៣៣៨៨៣ នាយទាហាន ថ្នាក់ឧត្ដមសេនីយ៍ នៃកងយោធពលខេមរភូមិន្ទ។

ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ត្រូវទទួលបន្ទុកអនុវត្ត ព្រះរាជក្រឹត្យនេះ ចាប់ពីថ្ងៃឡាយព្រះហស្តលេខាតទៅ ៕

ជនជាតិជប៉ុនមានជំនឿថារបស់៤យ៉ាងនេះគឺគេមិនអោយយកចូលផ្ទះនោះទេ ពីព្រោះថាវាអាយនាំសយឬមានរឿងចង្រៃនៅក្នុងផ្ទះបាន។ ដូច្នេះហើយចង់ដឹងថាវត្ថុទាំងបួនយ៉ាងនោះគឺជាអ្វីខ្លះ? តោះចូលរួមស្វែងយល់ទាំងអស់គ្នា៖

១.កញ្ចក់ប្រេះ៖ ជំនឿមួយនេះមានស្ទើរគ្រប់ប្រទេសទាំងអស់នៅក្នុងអាស៊ីរបស់យើង ដែលគេជឿថាកញ្ចក់ប្រេះអាចនាំអោយគ្រួសាររបស់យើងបែកបាក់គ្នាបាន។

២.គ្រឿងអលង្ការចាស់ៗ៖ ខ្សែក ខ្សែដៃ ដែលធ្វើអំពីដែកឬថ្មដែលនៅថ្មីៗគឺអាចលើករាសីអ្នកបាន ប៉ុន្តែជនជាតិជប៉ុនមានជំនឿថា បើអ្នកប្រើគ្រឿងអលង្ការទាំងនេះដល់វាចាស់ឬច្រែះ វាអាចនាំទុក្ខភ័យដល់គ្រួសារអ្នកបាន។

៣.ថ្មរទន្លេ៖ ជនជាតិជប៉ុនហាមមិនអោយយកថ្មរពីទន្លេចូលទៅក្នុងផ្ទះទេ ព្រោះគេជឿថាថ្មរទាំងនោះគឺមានវិញ្ញាណអាក្រក់។

៤.រូបថតមនុស្សមិនស្គាល់៖ ជនជាតិជប៉ុនជឿថាការយករូបថតមនុស្សមិនស្គាល់ចូលផ្ទះ អាចនាំរឿងចង្រៃៗ និងធ្វើអោយគ្រួសារមានជម្លោះទាស់ទែងគ្នា។