ប្រទេសជប៉ុន ៖ អ្នកដែលធ្លាប់បានធ្វើដំណើរជាមួយកូនតូចតាមរថយន្តក្រុងសាធារណៈ នឹងយល់ច្បាស់ពីភាពរញ៉េរញ៉ៃនៅពេលក្មេងយំព្រោះឃ្លានទឹកដោះគោ ឬពេលផ្លាស់ប្តូរក្រណាត់កន្ទបជាដើម ជាពិសេស ការធ្វើដំណើរតាមរថភ្លើង បើទោះជាវាទាន់ពេលវេលា និងមានតម្លៃសមរម្យក្តី ប៉ុន្តែការស្វែងរកបន្ទប់ទឹកសម្រាប់ប្រើប្រាស់ជារឿងពិបាក ។ ហេតុនេះ ធ្វើឱ្យអ្នកផ្តល់សេវាកម្មរថភ្លើងនៅទីក្រុងតូក្យូបង្កើតគំនិតមួយឡើង ដោយធ្វើបន្ទប់ពិសេសសម្រាប់ថែទាំទារក ដើម្បីដោះស្រាយបញ្ហាការរញ៉េរញ៉ៃ និងគ្មានភាពផ្ទាល់ខ្លួន ។

បន្ទប់សម្រាប់ថែទាំទារកនេះមានឈ្មោះថា Mamaro ត្រូវបានរចនាឡើងដោយក្រុមហ៊ុន Trim ដែលមានជំនាញផ្នែកការថែទាំកុមារ ដើម្បីជួយឱ្យអ្នកមានកូនតូចៗមានបន្ទប់ផ្ទាល់ខ្លួនលើរថភ្លើង ខណៈការធ្វើដំណើរតាមរថភ្លើងនៅប្រទេសជប៉ុនមានសភាពអ៊ូអរ ។ នៅបន្ទប់នេះមានដាក់កៅអីអង្គុយ និងតុសម្រាប់ផ្លាស់ប្តូរក្រណាត់កន្ទបទារក ដើម្បីឱ្យឪពុកម្តាយអាចឱ្យទឹកដោះគោទៅកូនរបស់ពួកគេ និងបំបៅទឹកដោះកូន ។

ក្រៅពីបន្ទប់ពិសេស Mamaro នឹងជួយផ្តល់ភាពងាយស្រួលដល់ឪពុកម្តាយគ្រប់រូបហើយ បន្ទប់នេះក៏បានបំពាក់ទូរទស្សន៍ផងដែរដើម្បីទាក់ទាញចំណាប់អារម្មណ៍ក្មេងៗ (ជាកូនបង) ដែលត្រូវអង្គុយរង់ចាំ ខណៈឪពុកម្តាយពួកគេកំពុងថែទាំ និងបំបៅដោះប្អូន ។

បន្ទប់ពិសេស Mamaro បានចាប់ផ្តើមបង្កើតឡើងនៅលើរថភ្លើងឈ្មោះ Odakyu-line ចំនួន៧ស្ថានីយនៅក្នុងទីក្រុងតូក្យូ ។ លើសពីនេះ អ្នកមានកូនតូចអាចជិះរថភ្លើងនេះដោយមិនគិតប្រាក់ផងដែរ ក្នុងចន្លោះពីម៉ោង៧និង៣០នាទីព្រឹក រហូតដល់ម៉ោង៧យប់ ៕ ប្រភព ៖ beartaiBRIEF

ប្រទេសអូស្ត្រាលី ៖ គេបានឃើញត្រីរាប់សែនក្បាលងាប់បន្តកន្ទុយគ្នានៅមាត់ទន្លេរបស់ប្រទេសអូស្ត្រាលី ដោយសារតែបញ្ហាគុណភាពទឹកទន្លេ និងការផ្លាស់ប្តូរសីតុណ្ហភាពភ្លាមៗនៅក្នុងប្រទេសនេះ ។

តាមការថតរូបភាពពីលើអាកាសឃើញថា ត្រីជាច្រើនក្បាលបានងាប់បន្តកន្ទុយគ្នានៅមាត់ទន្លេមួយឈ្មោះ Darling ដែលជាទន្លេមានប្រវែងវែងជាងគេស្ថិតក្នុងលំដាប់ទី៣ របស់ប្រទេសអូស្ត្រាលី ហើយទន្លេនេះស្ថិតនៅជិតទីក្រុង Menindi រដ្ឋ New South Wales របស់អូស្ត្រាលី ។

នេះមិនមែនជាលើកដំបូងទេ ដែលប្រទេសអូស្ត្រាលីជួបហេតុការណ៍បែបនេះ កាលពីឆ្នាំ២០១៨ និងឆ្នាំ២០១៩ កន្លងមក ប្រទេសអូស្ត្រាលីក៏ធ្លាប់មានហេតុការណ៍ត្រីងាប់ដូចគ្នានេះដែរនៅមាត់ទន្លេ Darling ដោយសារគុណភាពទឹកកាន់តែអាក្រក់ រួមនឹងសីតុណ្ហភាពបានផ្លាស់ប្តូរភ្លាមៗ ។

ចំណែកមន្ត្រីផ្នែកគ្រប់គ្រងទឹកនៃការិយាល័យផែនការ និងបរិស្ថានប្រចាំរដ្ឋ New South Wales បញ្ជាក់តាម Twitter ថា កម្រិតបរិមាណអុកស៊ីសែនក្នុងទឹកបានធ្វើឱ្យគុណភាពទឹកនៅទន្លេនេះផ្លាស់ប្តូរ ។ លើសពីនេះ វាជាកត្តាសំខាន់ដែលធ្វើឱ្យត្រីរាប់សែនក្បាលងាប់ជាបន្តបន្ទាប់ ខណៈទីនេះ គឺជាចំណុចតភ្ជាប់រវាងបឹង Weatherell និងទីក្រុង Menindi ។

ជាមួយគ្នានេះ សារព័ត៌មានក្នុងស្រុកក៏បានចុះផ្សាយដែរថា ខាងមន្ត្រីអូស្ត្រាលីបានបញ្ជូនបុគ្គលិកការិយាល័យជលផលមកកាន់តំបន់នេះដើម្បីត្រួតពិនិត្យ និងវាយតម្លៃស្ថានការណ៍ហើយ ៕ ប្រភព ៖ TNN World

ប្រទេសកូរ៉េខាងជើង ៖ កាសែតរបស់កូរ៉េខាងជើងឈ្មោះ Rodong Sinmun បានរាយការណ៍កាលពីថ្ងៃទី១៨ ខែមីនាថា ត្រឹមតែ១ថ្ងៃប៉ុណ្ណោះ គឺថ្ងៃទី១៧ ខែកុម្ភៈ មាននិស្សិត និងពលរដ្ឋកូរ៉េខាងជើងប្រមាណ៨០ម៉ឺននាក់នៅទូទាំងប្រទេស បាននាំគ្នាមកស្ម័គ្រចិត្តធ្វើកងទ័ពដើម្បីត្រៀមកម្លាំងទប់ទល់នឹងអាមេរិក ។ កូរ៉េខាងជើងបានអះអាងបែបនេះ ក្រោយពីកូរ៉េខាងជើងបានបាញ់មីស៊ីលឆ្លងទ្វីប ឬ ICBM «Hwasong-17» កាលពីថ្ងៃ១៦ ខែកុម្ភៈ កន្លងមក ដើម្បីឆ្លើយតបនឹងការធ្វើសមយុទ្ធរួមគ្នារវាងអាមេរិក និងកូរ៉េខាងត្បូង ។

កាលពីថ្ងៃ១៦ ខែកុម្ភៈ ប្រទេសកូរ៉េខាងជើងបានបាញ់មីស៊ីល ICBM ធ្លាក់នៅក្នុងសមុទ្ររវាងឧបទ្វីបកូរ៉េ និងជប៉ុន ក្រោយពីប្រធានាធិបតីកូរ៉េខាងត្បូង លោក Yoon Seok Yeol ប្រកាសថា នឹងធ្វើដំណើរទៅកាន់ប្រទេសជប៉ុន ដើម្បីចូលរួមកិច្ចប្រជុំកំពូលជាមួយនាយករដ្ឋមន្ត្រីជប៉ុន លោក Fumio Kishida អំពីវិធីទប់ទល់ជាមួយកូរ៉េខាងជើង ដែលគ្រប់គ្រងអាវុធនុយក្លេអ៊ែរ ។

គួរបញ្ជាក់ថា កូរ៉េខាងជើងត្រូវបានក្រុមប្រឹក្សាសន្តិសុខអង្គការសហប្រជាជាតិហាមឃាត់ការអភិវឌ្ឍគម្រោងមីស៊ីល និងការសាកល្បងមីស៊ីល ដែលរដ្ឋាភិបាលកូរ៉េខាងត្បូង អាមេរិក និងជប៉ុន បាននាំគ្នាថ្កោលទោស ។

ចំណែកកូរ៉េខាងត្បូង និងអាមេរិក បានធ្វើសមយុទ្ធកងទ័ពរួមគ្នារយៈពេល១១ថ្ងៃ ក្រោមឈ្មោះថា «Freedom Shield 23» កាលពីថ្ងៃទី១៣ ខែកុម្ភៈ កន្លងមក ។ ការធ្វើសមយុទ្ធរួមគ្នានេះ គឺជាការធ្វើសមយុទ្ធដ៏ធំបំផុតចាប់តាំងពីឆ្នាំ២០១៧ ដើម្បីទប់ទល់នឹងការគំរាមកំហែងកាន់តែកើនឡើងពីកូរ៉េខាងជើង ។ មេដឹកនាំកំពូលរបស់កូរ៉េខាងជើង លោក គឹម ជុងអ៊ុន បានចោទប្រកាន់អាមេរិក និងកូរ៉េខាងត្បូងថា ប្រទេសទាំងពីរធ្វើឱ្យស្ថានការណ៍កាន់តែតានតឹង ។ កូរ៉េខាងជើងតែងតែឆ្លើយតបភ្លាមៗនឹងអ្វីដែលខ្លួនមើលឃើញថា អាមេរិកបង្កឱ្យកើតជម្លោះ និងគំរាមកំហែងកូរ៉េខាងជើង ។

បណ្តាអ្នកជំនាញលើកឡើងថា ក្រៅពីការធ្វើសមយុទ្ធកងទ័ពរួមគ្នា និងកិច្ចប្រជុំកំពូលនាពេលខាងមុខរវាងប្រធានាធិបតីកូរ៉េខាងត្បូង និងនាយករដ្ឋមន្ត្រីជប៉ុន កូរ៉េខាងជើងក៏បានជំទាស់នឹងគម្រោងរបស់ប្រធានាធិបតីអាមេរិក លោក ចូ បៃដិន ផងដែរ ដែលនឹងទទួលស្វាគមន៍ប្រធានាធិបតីកូរ៉េខាងត្បូង និងភរិយា នៅសេតវិមាននៅខែមេសា ឆ្នាំ២០២៣ ៕ ប្រភព ៖ TNN World

សហរដ្ឋអាមេរិក ៖ បច្ចុប្បន្ន អាមេរិកកំពុងតាមឃ្លាំមើលប្រទេសចិនថា តើចិននឹងបញ្ជូនអាវុធជួយរុស្ស៊ីឬអត់ ក្នុងអំឡុងពេលកិច្ចប្រជុំកំពូលរវាងមេដឹកនាំចិន លោក ស៊ី ជិនពីង ជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន នារយៈពេលខាងមុខនេះ ។

មន្ត្រីអាមេរិកថ្លែងថា អាមេរិកនឹងរង់ចាំឃ្លាំមើលសកម្មភាពរបស់ចិនថា តើចិននឹងបញ្ជូនអាវុធឱ្យរុស្ស៊ីក្នុងអំឡុងកិច្ចប្រជុំកំពូលរវាងប្រធានាធិបតីចិន លោក ស៊ី ជិនពីង និងប្រធានាធិបតីរុស្ស៊ី លោក វ៉្លាឌីមៀរ ពូទីន នាពេលខាងមុខនេះ ។

កិច្ចប្រជុំកំពូលរវាងមេដឹកនាំប្រទេសទាំងពីរមិនបានធ្វើឱ្យសេតវិមានអាមេរិកភ្ញាក់ផ្អើលទេ ក្រោយពីមានសេចក្តីរាយការណ៍មុននេះថា កិច្ចប្រជុំកំពូលអាចកើតឡើងក្នុងរយៈពេលប៉ុន្មានសប្តាហ៍ខាងមុខទៀត ។ ប៉ុន្តែអាមេរិកបារម្ភថា សម្ព័ន្ធភាពគ្មានព្រំដែនរវាងលោក ស៊ី ជិនពីង និងលោក ពូទីន ក្នុងកិច្ចប្រជុំនាពេលខាងមុខ មេដឹកនាំទាំងពីរអាចនឹងពិភាក្សាគ្នាស៊ីជម្រៅជាងមុន ។

មន្ត្រីអាមេរិកថ្លែងថា រហូតមកដល់ពេលនេះ នៅមិនទាន់មានព័ត៌មានផ្សេងៗចង្អុលបង្ហាញថា ចិនបានសម្រេចចិត្តបញ្ជូនអាវុធធុនធ្ងន់ជួយរុស្ស៊ីក្នុងសង្គ្រាមនៅប្រទេសអ៊ុយក្រែនទេ ប៉ុន្តែពួកគេកំពុងពិភាក្សាគ្នាពីបញ្ហានេះ ។ មន្ត្រីអាមេរិកបន្តថា អាមេរិកកំពុងតាមដានព័ត៌មានជារៀងរាល់ថ្ងៃ អំពីឥរិយាបថនានាទាក់ទងនឹងការបញ្ជូនអាវុធរបស់មេដឹកនាំចិន ។

ក្តីបារម្ភក្នុងចំណោមមន្ត្រីរដ្ឋាភិបាលអាមេរិក គឺមិនមែនរឿងអាវុធរបស់ចិននឹងជួយឱ្យរុស្ស៊ីទទួលបានជោគជ័យក្នុងសង្គ្រាមនៅអ៊ុយក្រែនទេ ប៉ុន្តែអ្វីគួរឱ្យបារម្ភនោះ គឺជំនួយពីចិនអាចធ្វើឱ្យជម្លោះរវាងរុស្ស៊ី និងអ៊ុយក្រែន កាន់តែអូសបន្លាយជាងនេះ ។ ដូច្នេះ មន្ត្រីអាមេរិកជឿថា ចិនពិតជាឈរនៅខាងលោក ពូទីន ។ ក្រៅពីនេះ សង្គ្រាមអូសបន្លាយអាចក្លាយជាប្រយោជន៍ដល់ចិនផងដែរ ខណៈអាមេរិកបានចំណាយធនធានរបស់ខ្លួនក្នុងសង្គ្រាមនៅអ៊ុយក្រែនជំនួសឱ្យតំបន់អាស៊ី ដូច្នេះ ចិននឹងក្លាយជាប្រទេសមានឥទ្ធិពលផ្នែកកងទ័ពកាន់តែខ្លាំង ។

ជាមួយគ្នានេះ មន្ត្រីអាមេរិកបន្តថា ពួកគេកំពុងជំរុញឱ្យមានការជជែកគ្នាតាមទូរស័ព្ទរវាងមេដឹកនាំចិន លោក ស៊ី ជិនពីង និងមេដឹកនាំអ៊ុយក្រែន លោក Volodymyr Zelensky ហើយមន្ត្រីអាមេរិកជឿថា ការស្តាប់ពីស្ថានការណ៍នានាដោយផ្ទាល់ពីលោក Zelensky អាចជាប្រយោជន៍ច្រើនជាង ៕ ប្រភព ៖ TNN World