កម្មវិធីប្រគល់ពានរង្វាន់ PMA ដែលរៀបចំឡើងដោយក្រុមហ៊ុនស្មាតបានបញ្ចប់កាលពីពេលថ្មីៗនេះដោយមានសិល្បករ សិល្បការិនីល្បីៗជាច្រើនចូលរួមព្រមបានតុបតែងខ្លួនយ៉ាងប្លែកភ្នែកប្រកួតប្រជែងគ្នាក្នុងវិស័យ Fashion។ ក្នុងនោះគេសង្កេតឃើញថា បណ្ឌិតច្នៃម៉ូត ឯម រៀម បានទទួលនូវពាក្យរិះគន់យ៉ាងច្រើនពីសំណាក់អ្នកលេងបណ្តាញសង្គមរួមទាំងប្រតិកម្មពីលោកជំទាវ ហ៊ុន ស៊ីណាត ផងដែរពីការស្លៀកពាក់របស់លោក។
នេះមិនមែនជាលើកទី១ទេ ដែលលោក ឯម រៀម អ្នកច្នៃម៉ូតដ៏ល្បីឈ្មោះរងពាក្យរិះគន់ពីអ្នកលេងបណ្តាញសង្គមដោយសារតែការស្លៀកពាក់របស់លោកស៊ិចស៊ី បញ្ចេញលើក្រោម។ ប៉ុន្តែអ្នកច្នៃម៉ូតរូបនេះនៅបន្តសកម្មភាពរបស់ខ្លួននិងស្លៀកពាក់បែបស៊ិចស៊ីដដែល ដោយលោកបានលើកឡើងថា នេះជាការច្នៃម៉ូតបែប Fashion មិនមានលក្ខណៈទាស់ខុសអ្វីនោះទេ។
ដោយឡែកនាពេលថ្មីៗនេះ ការបង្ហាញខ្លួនរបស់លោក ឯម រៀម នៅក្នុងកម្មវិធីប្រគល់ពានរង្វាន់ PMA ត្រូវមហាជនរិះគន់សាជាថ្មីពីសំលៀកបំពាក់របស់អ្នកច្នៃម៉ូតវ័យ ៥៣ឆ្នាំរូបនេះ ដោយលោកបានស្លៀករ៉ូបខ្លីបញ្ចេញល្វែងក្រោម និង បញ្ចេញសុដន់ផងដែរ។ ការណ៍នេះបានធ្វើឱ្យអ្នកលេងបណ្តាញសង្គមជាច្រើនផ្ទុះការមិនពេញចិត្តព្រមទាំងស្នើកុំឱ្យមានការច្នៃម៉ូតបែបនេះព្រោះវានាំឱ្យប៉ះពាល់ដល់រប្បធម៌ខ្មែរ។ និងអ្នកខ្លះទៀតក៏បានលើកឡើងថាគាត់ជាអ្នកច្នៃម៉ូត ដូច្នេះហើយគាត់ច្នៃអ្វីទៅតាមការងាររបស់គាត់។
ជុំរឿងរ៉ាវរកាំរកូសនេះ លោកជំទាវ ហ៊ុន ស៊ីណាត ក៏ផ្ទុះប្រតិកម្មមិនពេញចិត្តយ៉ាងខ្លាំងចំពោះលោកឯម រៀម ផងដែរដោយលោកជំទាវបានលើកឡើងថា វប្បធម៌ខ្មែរផូផង់មិនយកមកបង្ហាញទេ ចូលចិត្តយករបស់លោកខាងលិចមកបំពុលសង្គម។
ងាកទៅកាន់ទំព័រផេក ក្រុមព្រះសុរិយា វិញបានបង្ហាញការយល់ឃើញខុសហាក់ខុសពីមហាជន ដោយទំព័រផេកនេះបានលើកឡើងយ៉ាងដូច្នេះថា «តើគាត់ស្លៀកបែបនេះខុសមែនឬទេ? គាត់ជាសិល្បករច្នៃម៉ូត បើមិនយល់ពីសិល្បៈ មិនគួររិះគន់គាត់ទេ បើគាត់ស្លៀកពាក់ធម្មតាៗ ដូចពួកមនុស្សធម្មតា នោះគាត់មិនមែនជាសិល្បករបែបច្នៃម៉ូតទេ
បើនាំគ្នារឹតត្បិតសេរីភាពរបស់ពួកគាត់ នោះសិល្បៈនឹងមិនទៅមុខទេ!សិល្បៈគឺទូលំទូលាយណាស់»។
យ៉ាងណាមិញ ងាកទៅកាន់លោក ឯម រៀម វិញក៏បានបង្ហាញចំណាប់អារម្មណ៍របស់ខ្លួន បន្ទាប់ពីមហាជនរិះគន់ខ្លាំងក្លា ដោយបានលើកឡើងថា លោកស្លៀកពាក់ទៅតាមការដកស្រង់តាមអ្វីដែលខ្មែរមានពីមុន៕
