លោក James Cameron ជាអ្នកដឹកនាំផលិតខ្សែភាពយន្តដ៏ល្បីល្បាញមួយរូប ដូចជា រឿង Terminator, Avatar, Aliens និងរឿងជាច្រើនទៀតជឿថា បញ្ញាសិប្បនិម្មិត AI កំពុងតែកសាងថាមពលមនុស្សយន្តដូចក្នុងខ្សែភាពយន្តរឿង Terminator ដែរ ។ ដូច្នេះ បញ្ញាសិប្បនិម្មិត AI មានភារកិច្ចបំផ្លាញពូជមនុស្ស ហើយយើងកំពុងតែឈានទៅកាន់សម័យនោះហើយ ។

ក្នុងឋានៈជាអ្នកដឹកនាំខ្សែភាពយន្តដែលទទួលបានទាំងការសរសើរផង និងរិះគន់ផង ដូចជារឿង Aliens និង Avatar លោក James Cameron បានពិសោធន៍ឱ្យឃើញថា ពិភពលោករបស់យើងនៅមានអ្វីជាច្រើនទៀតដែលត្រូវស្វែងរកនាថ្ងៃអនាគត ដូចជា បច្ចេកវិទ្យា និងអាថ៌កំបាំងនានារបស់ពិភពលោកនេះ ។

លោក James Cameron បានផ្តល់បទសម្ភាសន៍ទៅកាន់កម្មវិធីមួយដោយលោកទទួលស្គាល់ថា លោកមិនខ្លាចថា បញ្ញាសិប្បនិម្មិតនឹងឆ្លាតដល់កម្រិតណាទេ ប៉ុន្តែលោកបារម្ភថា អាចនឹងមានមនុស្សខ្លះយកបច្ចេកវិទ្យារបស់ AI ទៅប្រើប្រាស់ក្នុងផ្លូវខុស ពីព្រោះ AI គឺជាបច្ចេកវិទ្យាដ៏អស្ចារ្យមួយ ប៉ុន្តែវាក៏អាចធ្វើឱ្យពិភពលោកឈានដល់ថ្ងៃអវសានដូចគ្នា ។

លោកបន្ថែមថា ៖ «ខ្ញុំគិតថា វាអាចទៅរួចដែលមានមនុស្សខ្លះនឹងប្រើប្រាស់បច្ចេកវិទ្យា AI ធ្វើជាអាវុធទុកបំផ្លាញអ្នកដទៃ ព្រោះនៅលើពិភពលោកនេះ គ្មានបច្ចេកវិទ្យាណាមួយដែលមិនធ្លាប់បង្កើតអាវុធនោះទេ ។ នៅថ្ងៃអនាគត មនុស្សយើងក៏ត្រូវតស៊ូជាមួយបច្ចេកវិទ្យាដែលឆ្លាតជាងយើងផងដែរ» ។

ការព្រួយបារម្ភអំពីបច្ចេកវិទ្យា AI បានក្លាយជាប្រធានបទមួយដែលមនុស្សជាច្រើនលើកយកមកនិយាយ ក្រោយពីមានការបង្ហាញកម្មវិធី ChatGPT ដែលជា Chatbots ឆ្លាតវៃមួយអាចឆ្លើយតបស្ទើរគ្រប់សំណួរទាំងអស់នៅលើពិភពលោកនេះ ៕ ប្រភព ៖ beartaiBRIEF

ថ្មីៗនេះបន្ទាប់ពីបញ្ចេញបទថ្មីដើម្បីអបអរសាទរពិធីបុណ្យចូលឆ្នាំខ្មែរ តារាចម្រៀង យក់ ថិតរដ្ឋា បានរងពាក្យមិនសមរម្យពីអ្នកលេងបណ្តាញសង្គម រហូតតារាចម្រៀងរូបនេះបានចេញមុខបង្ហោះសារយ៉ាងចាក់ដោតឆ្លើយទៅកាន់អ្នករិះគន់ខ្លួន។

កាលពីថ្ងៃទី២៦ ខែមីនា ផលិតកម្មថោន បានបញ្ចេញវីដេអូខ្លីជាបទចម្រៀងរបស់តារាចម្រៀង យក់ ថិតរដ្ឋា មានចំណងជើងថា «ស្រលាញ់ស្រីចាស់សំបូរលុយចាយ» ដើម្បីអបអរសាទរពិធីបុណ្យចូលឆ្នាំប្រពៃណីខ្មែរ។ ទន្ទឹមនឹងការបញ្ចេញវីដេអូខ្លីនេះ អ្នកលេងបណ្តាញសង្គមមួយចំនួនបានបញ្ចេញពាក្យរិះគន់ពីរូបរាងរបស់អ្នកនាង យក់ ថិតរដ្ឋា ដោយប្រើពាក្យមិនសមរម្យថា «ក្បាលពោះសុទ្ធតែគ្រឿងស្រវឹង» និង «សម្រកសិនទៅ ចាំច្រៀងកាជ្រូក»។

បន្ទាប់ពីមានការអ្នករិះគន់ដូចនេះ កាលពីយប់ថ្ងៃទី២៧ ខែមីនា តារាចម្រៀង យក់ ថិតរដ្ឋា បានបង្ហោះសារតបទៅអ្នករិះគន់ថា ខ្លួនមិនខឹងដែលគេថាមានមាឌម៉ាប់នោះទេ តែអ្នកនាងទទួលយកមិនបានចំពោះពាក្យប្រមាថដោយប្រើពាក្យ «មី»។

ម្ចាស់បទ «មួយណាក៏ដូចមួយណា» បានរៀបរាប់ថា «សម្រាប់ខ្ញុំមិនខឹងនិងគេថាយើងមិនស្អាតកាម៉ាប់ដូចជ្រូកអីទេព្រោះយើងវាម៉ាប់ពិតមែនតែមេត្តាកុំប្រើពាក្យដល់ថ្នាក់ ( មី ) អីព្រោះខ្ញុំមិនបានទៅធ្វើអីដាក់អ្នកអោយអ្នកមកក្តៅក្រហាយរឿងអីដែរ ដៀលខ្ញុំសុទ្ធតែមីកាជ្រូកចុះមីកាជ្រូកខ្ញុំនឹងបានទៅធ្វើអីដាក់អ្នកដែរបានដៀលខ្ញុំអីក៏សាហាវយ៉ាងនេះលោកអើយ»។

តារាចម្រៀង យក់ ថិតរដ្ឋា បន្តទៀតថា «ពេលនិយាយអ្វីទៅកាន់នរណាម្នាក់គួរតែរៀនយកចិត្តរបស់គេមកដាក់ចិត្តខ្លួនឯងខ្លះផង ខ្ញុំមិនខឹងទេអ្នកចង់អោយខ្ញុំល្អបាននិយាយ តែនេះមិនមែនចង់អោយល្អទេគឺឈ្នានីសច្រើនជាង តែគ្រាន់តែខ្ញុំតូចចិត្តថា ! ខ្ញុំបានធ្វើអីដាក់អ្នកឯង»៕

ប្រទេសឥណ្ឌូណេស៊ី ៖ លោក Teten Masduki រដ្ឋមន្ត្រីទទួលបន្ទុកផ្នែកសហគ្រាសធុនតូច និងមធ្យម (SMEs) របស់ឥណ្ឌូណេស៊ីបានប្រកាសថា ហាមនាំចូលសម្លៀកបំពាក់ជជុះគ្រប់ប្រភេទមកកាន់ប្រទេសឥណ្ឌូណេស៊ី ។ ការប្រកាសហាមឃាត់នេះក្នុងគោលបំណងការពារអាជីវកម្មរបស់សហគ្រាសធុនតូច និងមធ្យមនៅឥណ្ឌូណេស៊ីទាំងអស់ រួមទាំងការពារឧស្សាហកម្មវាយនភ័ណ្ឌ និងស្បែកជើងផងដែរ ។

រដ្ឋាភិបាលឥណ្ឌូណេស៊ីបានលើកឡើងថា ការនាំចូលផលិតផលដែលបានប្រើប្រាស់រួច និងផលិតផលខុសច្បាប់ គឺវាមិនស្របនឹងការព្យាយាមរបស់រដ្ឋាភិបាល ដែលបានលើកកម្ពស់ការប្រើប្រាស់ផលិតផលក្នុងស្រុក តាមផែនការការប្រើប្រាស់ផលិតផលជាតិរបស់ឥណ្ឌូណេស៊ី ។ ក្រៅពីនេះ ការនាំចូលសម្លៀកបំពាក់ជជុះមកលក់នៅប្រទេសឥណ្ឌូណេស៊ី គឺធ្វើឱ្យប៉ះពាល់ដល់ការជួលកម្លាំងពលកម្មនៅឥណ្ឌូណេស៊ី ខណៈឧស្សាហកម្មវាយនភ័ណ្ឌត្រូវការប្រើប្រាស់កម្លាំងពលកម្មច្រើន ហើយរដ្ឋាភិបាលមានគោលនយោបាយជំរុញឱ្យពលរដ្ឋជួយទិញផលិតផលក្នុងស្រុក ។

ការិយាល័យស្ថិតិជាតិឥណ្ឌូណេស៊ីប៉ាន់ស្មានថា តាមគោលនយោបាយនេះ កំណើនសេដ្ឋកិច្ចប្រទេសឥណ្ឌូណេស៊ីនឹងអាចឈានដល់១,៨៥% និងបង្កើតការងារក្នុងស្រុកចំនួន២លានការងារផងដែរ ដោយមិនចាំបាច់ពឹងផ្អែកលើការវិនិយោគថ្មីៗ ។ លើសពីនេះ ការប្រើប្រាស់ផលិតផលដែលផលិតនៅតាមសហគមន៍ នឹងធ្វើឱ្យសេដ្ឋកិច្ចឥណ្ឌូណេស៊ីរីកលូតលាស់ផងដែរ ។

លោក Teten Masduki ក៏បានអំពាវនាវឱ្យផ្នែកគយបង្កើនការរឹតបន្តឹង និងពិនិត្យមើលការនាំចូលសម្លៀកបំពាក់ជជុះដោយខុសច្បាប់ ដែលក្រសួងពាណិជ្ជកម្មបានចេញប្រកាសហាមឃាត់ការនាំចូលនៅឆ្នាំ២០២៣ ។ លើសពីនេះ ផ្នែកគយត្រូវតាមដានមើលថា តើគេយកសម្លៀកបំពាក់ជជុះទាំងនេះទៅលក់នៅកន្លែងណាខ្លះ ? ព្រោះកន្លងមក តាមការត្រួតពិនិត្យឃើញថា គេបានយកសម្លៀកបំពាក់ជជុះទៅលក់តាមបណ្តាញសង្គម និងទីកន្លែងផ្សេងៗ ៕ ប្រភព ៖ AECconnect

ប្រទេសថៃ ៖ និន្នាការក្តៅបំផុតមួយក្នុងឧស្សាហកម្មអចលនទ្រព្យថៃ គឺវិនិយោគិនចិនកំពុងទិញខុនដូទំនើបៗ និងផ្ទះវីឡាមានអាងហែលទឹកសម្រាប់វិនិយោគផង និងចូលនិវត្តន៍ផង ប៉ុន្តែអ្វីគួរឱ្យចាប់អារម្មណ៍ជាងនេះទៀត គឺវិនិយោគិនចិនបានទិញចម្ការទុរេនក្នុងតម្លៃខ្ពស់ទៀតផង ។

លោក Nattha Kahapana នាយកគ្រប់គ្រងក្រុមហ៊ុន Knight Frank ផ្នែកប្រឹក្សាយោបល់អចលនទ្រព្យបានថ្លែងថា ជនជាតិចិនបានទិញអចលនទ្រព្យនៅខេត្តភូកេតស្ទើរគ្រប់ប្រភេទដូចជា ខុនដូ ផ្ទះវីឡា ផ្ទះល្វែង ហើយរយៈពេលចុងក្រោយនេះ ពួកគេនាំគ្នាទិញចម្ការទុរេន ។ លោកថ្លែងថា ៖ «ជនជាតិចិនដែលទិញអចលនទ្រព្យទាំងនេះ ចាប់ផ្តើមដំបូង គឺការមកកម្សាន្តនៅប្រទេសថៃសិន បន្ទាប់មកទើបទិញអចលនទ្រព្យ ។ ពួកគេបានទិញផ្ទះល្វែងដើម្បីប្រកបអាជីវកម្មលក់ដូរឱ្យជនជាតិចិនគ្នាឯង រីឯខុនដូ និងផ្ទះវីឡា ទិញទុកជួលឱ្យជនជាតិចិន ហើយបច្ចុប្បន្ននេះ ពួកគេកំពុងស្វែងរកទិញចម្ការទុរេនដើម្បីនាំភ្ញៀវទេសចរចិនមកកម្សាន្តក្នុងចម្ការផងដែរ» ។

គួរបញ្ជាក់ថា ជនជាតិចិននាំគ្នាទិញចម្ការទុរេននៅប្រទេសថៃ មិនមែនទើបតែកើតឡើងទេ គឺពួកគេបានទិញចម្ការទុរេនតាំងពីមុនពេលផ្ទុះជំងឺកូវីដម៉្លេះ ហើយពេលនេះ ពួកគេចាប់អារម្មណ៍ទិញចម្ការទុរេនម្តងទៀត បន្ទាប់ពីចិនបានបើកប្រទេសឱ្យពលរដ្ឋខ្លួនអាចធ្វើដំណើរចេញទៅក្រៅប្រទេស ។ អាជ្ញាធរទេសចរណ៍ថៃប៉ាន់ស្មានថា នៅឆ្នាំ២០២៣នេះ ភ្ញៀវទេសចរចិននឹងមកកម្សាន្តនៅប្រទេសថៃ ស្មើប្រមាណពី៧លាន ទៅ៨លាននាក់ ។

កន្លងមក វិនិយោគិនចិនតែងទិញអាជីវកម្មពាក់ព័ន្ធនឹងផ្នែកទេសចរណ៍ ដូចជា ការជួលរថយន្ត ជួលទូក និងភោជនីយដ្ឋាន ប៉ុន្តែពេលនេះ ពួកគេហ៊ានទិញចម្ការទុរេនក្នុងតម្លៃខ្ពស់ចាប់ពី៣លាន ទៅ៥លានបាត/១រ៉ៃ ហើយមានទីតាំងនៅមិនឆ្ងាយពីខេត្តកូកេត ។

លោក Nattha Kahapana បន្តថា ៖ «ជនជាតិចិនទិញចម្ការទុរេនដែលគេបានដាំដុះរយៈពេលពី៤ ទៅ៥ឆ្នាំ ឬទិញចម្ការណាដែលអាចប្រមូលផលបានតែម្តង គឺពួកគេមិនទិញចម្ការទើបតែដាំទេ» ។

តាមទិន្នន័យរបស់សភាពាណិជ្ជកម្មចិនបង្ហាញថា ទុរេន គឺជាផ្លែឈើនាំចូលលំដាប់ទី១ របស់ចិន ក្នុងទឹកប្រាក់៤,០៣ពាន់លានដុល្លារអាមេរិកនៅឆ្នាំ២០២២ ហើយប្រទេសចិនបាននាំចូលទុរេនចំនួន៨,២៥សែនតោន ក្នុងនោះនាំចូលទុរេនពីថៃស្មើ៩៦% ។ ចិនកំពុងត្រៀមប្រមូលផលទុរេនជាលើកដំបូងក្នុងរដូវក្តៅនេះ ក្រោយពីបានដាំអស់រយៈពេល៤ឆ្នាំនៅកោះហៃណាន និងតំបន់ភាគខាងត្បូងប្រទេសចិន ។ បើទោះជាការប្រមូលផលទុរេនលើកដំបូងនេះមិនច្រើនប៉ុន្មាន ប៉ុន្តែគេសង្ឃឹមថា ក្នុងរយៈពេល៣-៥ឆ្នាំខាងមុខ ចិននឹងពង្រីកផ្ទៃដីដាំដុះបន្ថែមទៀត និងអាចទទួលបានប្រាក់ចំណូលចំនួន៥ពាន់លានយាន់នៅឆ្នាំ២០២៨ ៕ ប្រភព ៖ The standard wealth

តាមរយៈផេក មូលនិធិគន្ធបុផ្ផាកម្ពុជាបានឱ្យដឹងនៅព្រឹកថ្ងៃទី២៨ ខែមីនា ឆ្នាំ២០២៣ នេះថា ក្រុមគ្រូពេទ្យឯកទេសផ្នែកបេះដូងនៃមន្ទីរពេទ្យគន្ធបុប្ផា បានជួយសង្រ្គោះក្មេងប្រុសម្នាក់បានដោយជោគជ័យ ដោយការព្យាបាលបាញ់ភ្ជិតបេះដូង។

តាមការបញ្ជាក់បន្ថែមបានឱ្យដឹងថា ក្មេងប្រុសរូបនោះមានអាយុ ១៣ឆ្នាំ មកពីស្រុកជើងព្រៃ ខេត្តកំពង់ចាម បានចូលមកសង្រ្គោះបន្ទាន់ បន្ទាប់ពីបានចុកទ្រូងខ្លាំងរយៈពេល ៥ថ្ងៃ។

ក្មេងប្រុសខាងលើត្រូវបានជួយសង្រោះជាបន្ទាន់ដោយក្រុមគ្រូពេទ្យឯកទេសផ្នែកបេះដូងនៃមន្ទីរពេទ្យគន្ធបុប្ផាសៀមរាប ដោយរៀបចំដាក់កម្មវិធីបាញ់ភ្ជិតបេះដូង ដោយបច្ចេកទេសទំនើបបំផុត catheterization to close RCA fistula to RA by vascular plug ប្រកបដោយភាពជោគជ័យ។

សូមជម្រាបជូនថា មន្ទីរពេទ្យគន្ធបុប្ផាទាំង ៥ទីតាំង នៅទូទាំងប្រទេសកម្ពុជាទទួលពិនិត្យ និងព្យាបាលទារក និងកុមារ ដោយឥតគិតថ្លៃ និងមិនមានការរើសអើង ហើយបងប្អូនប្រជាបលរដ្ឋទាំងអស់អាចចូលរួមបរិច្ចាគថវិកាទៅដល់មន្ទីរពេទ្យផងដែរ ដើម្បីរួចចំណែកជួយសង្គមជាតិ ជួយសង្គ្រោះជីវិតកុមារនៅកម្ពុជា៕

រាជធានីបាងកក៖ ការបោះឆ្នោត នៅក្នុងប្រទេសថៃ នាខែឧសភា ខាងមុខនេះ ត្រូវគេរំពឹង ថា នឹងក្លាយជាការប្រកួតប្រជែងយ៉ាងស្វិតស្វាញបំផុត ខណៈគណបក្សប្រឆាំងដ៏ធំបំផុតរបស់រាជាណាចក្រអាស៊ានមួយនេះ ហាក់បីដូចជានាំមុខ នៅក្នុងការស្ទង់មតិមួយ លើគណបក្សចម្រុះ កំពុងតែគ្រប់គ្រងអំណាច។

សារព័ត៌មាន Channel News Asia បានចេញផ្សាយ កាលពីថ្ងៃចន្ទ ទី២៧ ខែមីនា ឆ្នាំ២០២៣ ថា ថៃ រៀបចំបោះឆ្នោតសកល នៅថ្ងៃទី១៤ ខែឧសភា ឆ្នាំ២០២៣ ហើយវានឹងក្លាយជាការបោះឆ្នោតប្រកួតប្រជែងដ៏ស្វិតស្វាញបំផុតមួយ រវាងគណបក្ស គាំទ្រ ដោយយោធា ក្រោមការដឹកនាំរបស់លោកនាយករដ្ឋមន្ត្រី ប្រាយុទ្ធ ចាន់អូចា (Prayut Chan-o-cha) វ័យ៦៩ឆ្នាំ និង គណបក្សភឿថៃ គាំទ្រដោយគ្រួសារមហាសេដ្ឋី ស៊ីណាវ៉ាត្រា (Shinawatra) បច្ចុប្បន្ន ដឹកនាំដោយលោកស្រី ភើថុងថាន (Paetongtarn) វ័យ៣៦ឆ្នាំ ត្រូវជាកូនស្រីរបស់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្រ្ដី និង ជាក្មួយស្រីរបស់លោកស្រី យីងឡាក់ ស៊ីណាវ៉ាត្រា អតីតនាយករដ្ឋមន្ត្រីថៃ។

គណបក្សភឿថៃ បានឈ្នះ នៅក្នុងការបោះឆ្នោត ចាប់តាំងពីឆ្នាំ២០០១រហូតមក ប៉ុន្ដែរដ្ឋាភិបាលរបស់គណបក្សនេះ មិនបានគ្រប់គ្រងអំណាចនោះឡើយ ដោយសារតែការសម្រេចចិត្តរបស់តុលាការ ឬ រដ្ឋប្រហារយោធា។ គណបក្សជាច្រើន នឹងប្រជែងយកអាសនៈរបស់រដ្ឋសភា នៅថ្ងៃទី១៤ ខែឧសភា ឆ្នាំ២០២៣។ សមាជិកសភា ទើបជាប់ឆ្នោតថ្មី និងព្រឹទ្ធសភា ដែលត្រូវតែងតាំង រំពឹង ថា នឹងសម្រេចចិត្តជ្រើសរើសនាយករដ្ឋមន្ត្រីមួយ នៅចុងខែកក្កដា ឆ្នាំ២០២៣។

ការស្ទង់មតិមួយ កាលពីចុងសប្ដាហ៍កន្លងទៅនេះ បានបង្ហាញ ថា គណបក្សភឿថៃ ដែលបច្ចុប្បន្ន ដឹកនាំដោយក្មួយស្រីរបស់លោកស្រី យីងឡាក់ អតីតនាយករដ្ឋមន្រ្ដីថៃ មានសំឡេងគាំទ្រ ចំនួន៣៧ភាគរយ ហើយនឹងធ្វើឲ្យគណបក្សមួយនេះ ទទួលបានជ័យជម្នះ នៅក្នុងការបោះឆ្នោត នាពេលខាងមុខ។ ដោយឡែកគណបក្សធំចំនួន៤ផ្សេងទៀត នៅក្នុងរដ្ឋាភិបាលចម្រុះ និង គណបក្សជាសម្ពន្ធមិត្ត មានសំឡេងគាំទ្រ ត្រឹមតែជាងពាក់កណ្តាលប៉ុណ្ណោះ។

ការស្ទង់មតិរបស់ Suan Dusit Poll បានដឹងដែរ ថា គណបក្សភឿថៃ នាំមុខ ៤៦ ភាគរយ ហើយគណបក្សកាន់អំណាចធំៗទាំងបួន ទទួលបានសំឡេងគាំទ្រ ចំនួន៣៥ភាគរយ។ លោក ប្រាយុទ្ធ ចាន់អូចា ជាអតីតមេទ័ពកំពូលរបស់ថៃ កាលពី២០១៤ បានធ្វើរដ្ឋប្រហារយោធា បណ្តេញរដ្ឋាភិបាលរបស់លោកស្រី យីងឡាក់ ត្រូវជាម្ដាយមីងរបស់លោកស្រី Paetongtarn ក៏បានឈរឈ្មោះបោះឆ្នោតជាថ្មី ជាមួយនឹងគណបក្សរួបរួមជាតិថៃ។ បើតាមការស្ទង់មតិ កាលពីពេលថ្មីៗនេះ បង្ហាញ ថា សំឡេងគាំទ្ររបស់លោក ប្រាយុទ្ធ បានធ្លាក់ចុះ ចំពេលគួប្រជែងដ៏សំខាន់របស់គាត់ គឺលោកស្រី Paetongtarn កំពុងតែនាំមុខ៕