ប្រទេសវៀតណាម ៖ តាមការចុះផ្សាយរបស់សារព័ត៌មានបរទេសកាលពីថ្ងៃទី៤ ខែធ្នូ ឆ្នាំ២០២៥ រដ្ឋាភិបាលវៀតណាមបានចាត់វិធានការបន្ទាន់ដើម្បីគ្រប់គ្រងការបំពុលខ្យល់ និងផ្សែងអ័ព្ទគ្របដណ្តប់លើទីក្រុងហាណូយ ដោយរឹតបន្តឹងការដុតសំរាម ចំបើង និងកាកសំណល់កសិកម្មខុសច្បាប់ រួមទាំងត្រួតពិនិត្យផ្សែងពុលចេញពីរោងចក្រឧស្សាហកម្ម ឬការដ្ឋានសំណង់ ។ ក្រៅពីនេះ នឹងប្រើប្រាស់ប្រព័ន្ធត្រួតពិនិត្យពីចម្ងាយ ដំឡើងកាមេរ៉ាសុវត្ថិភាពនៅតាមផ្លូវ និងកំណត់វិធានការលើយានជំនិះបញ្ចេញផ្សែងខ្មៅបំពុលបរិយាកាស ។

សេចក្តីថ្លែងការណ៍ក្នុងគេហទំព័ររបស់សាលាក្រុងហាណូយបញ្ជាក់ថា រដ្ឋាភិបាលវៀតណាមនឹងរឹតបន្តឹងការដុតសំរាម ចំបើង និងកាកសំណល់កសិកម្មដោយខុសច្បាប់ ។ ដូចគ្នានេះ នាយកដ្ឋានសុខាភិបាលក្រុងហាណូយបានណែនាំពលរដ្ឋ ជាពិសេស មនុស្សចាស់ កុមារ និងក្រុមប្រឈមនឹងផលប៉ះពាល់សុខភាព ត្រូវកាត់បន្ថយសកម្មភាពនៅខាងក្រៅ និងពាក់ម៉ាស់ការពារពេលមានខ្យល់ពុលខ្លាំង ។ ក្រៅពីនេះ នឹងត្រៀមព្យាបាលអ្នកជំងឺផ្លូវដង្ហើមកើនឡើងដោយសារខ្យល់ពុលផងដែរ ។

ខ្យល់ពុលនៅទីក្រុងហាណូយបានកើនឡើងនៅរដូវរងាជារៀងរាល់ឆ្នាំ ដោយសារការធ្វើចរាចរណ៍ណែនណាន់ ធូលីចេញពីរោងចក្រឧស្សាហកម្ម និងការដ្ឋានសំណង់ ក៏ដូចជាផ្សែងបណ្តាលមកពីការដុតកាកសំណល់កសិកម្មនៅបណ្តាខេត្តជុំវិញទីក្រុងហាណូយ ។

តាមទិន្នន័យត្រួតពិនិត្យខ្យល់ពុល គឺគុណភាពខ្យល់នៅទីក្រុងហាណូយ ស្ថិតក្នុងកម្រិតពណ៌ក្រហម ឬប៉ះពាល់សុខភាពពលរដ្ឋ ។ IQ Air បានបង្ហាញសន្ទស្សន៍ខ្យល់ គឺទីក្រុងហាណូយបានជាប់ចំណាត់ថ្នាក់ជាទីក្រុងមានខ្យល់ពុលខ្លាំងបំផុតលើពិភពលោកក្នុងចំណោម១០ទីក្រុង ហើយមានការសន្និដ្ឋានថា ទីក្រុងនេះនឹងមានខ្យល់ពុលកាន់តែខ្លាំងថែមទៀត ។

គួរបញ្ជាក់ថា ប្រទេសថៃក៏មានខ្យល់ពុលខ្លាំង និងផ្សែងអ័ព្ទគ្របដណ្តប់លើទីក្រុងបាងកក រួមទាំងខេត្តជាច្រើនផងដែរ ដូចជា ៖ ទីក្រុងប៉ាតាយ៉ា នៅខេត្តឈុនបុរី ប៉ាធុមថានី ណុនថាក់បុរី ណាខនប៉ាធុម សមុទ្រសាខន សមុទ្រប្រាកាន ឈៀងរ៉ៃ ឈៀងម៉ៃ ឡាំពូន សុខោទ័យ ពិស្នុលោក និងកាឡាក់ស៊ីន រហូតឈានទៅប្រកាសអាសន្នឱ្យអ្នករស់នៅខេត្ត-ក្រុងទាំងនេះថែទាំសុខភាព និងកាត់បន្ថយសកម្មភាពក្រោមកំដៅថ្ងៃ ។

អាជ្ញាធរថៃបានណែនំាំឱ្យពលរដ្ឋទាំងអស់ពាក់ម៉ាស់ប្រភេទ N95 ឬម៉ាស់ការពារធូលីកខ្វក់គ្រប់ពេលចេញទៅខាងក្រៅ ចៀសវាងធ្វើសកម្មភាពក្រោមកំដៅថ្ងៃ បិទទ្វារ-បង្អួចដើម្បីកាត់បន្ថយការស្រូបធូលី ព្រមទាំងតាមដានព័ត៌មានអាកាសធាតុយ៉ាងដិតដល់ ៕

ប្រទេសថៃ ៖ ព្រឹត្តិការណ៍ស៊ីហ្គេម លើកទី៣៣ ជិតឈានដល់ថ្ងៃបើកជាផ្លូវការហើយ គឺនៅថ្ងៃទី៩ ខែធ្នូ ឆ្នាំ២០២៥ ប៉ុន្តែម្ចាស់ផ្ទះថៃបែរជារងការរិះគ.ន់យ៉ាងខ្លាំងពីការរៀបចំមិនល្អ មានកំហុសបច្ចេកទេស ខ្វះខាតមុខក្រោយ ជាពិសេស មិនទាន់រៀបចំអាងហែលទឹករួចរាល់ និងខុសគ្នាដាច់ពីការរៀបចំរបស់កម្ពុជាកន្លងមក ។ ពលរដ្ឋថៃធ្លាប់រិះគ.ន់កម្ពុជារៀបចំព្រឹត្តិការណ៍ស៊ីហ្គេមមិនបានល្អ ថែមទាំងរិះគ.ន់បន្ទប់ស្នាក់នៅ និងម្ហូបអាហាររបស់អត្តពលិក ប៉ុន្តែពេលថៃធ្វើជាម្ចាស់ផ្ទះ បែរជាថៃរៀបចំអន់យ៉ាងខ្លាំង ។

បន្ទាប់ពីពលរដ្ឋថៃរិះគ.ន់ខ្លាំងៗពីការរៀបចំព្រឹត្តិការណ៍ស៊ីហ្គេម លើកទី៣៣ ឆ្នាំ២០២៥ ដែលថៃធ្វើជាម្ចាស់ផ្ទះមានការធ្វេសប្រហែសច្រើន ខុសបច្ចេកទេស ខ្វះខាតមុខក្រោយ សូម្បីតែអំពូលភ្លើងនៅកីឡដ្ឋានក៏ភ្លឺមិនគ្រប់ ថែមទាំងចំណាយប្រាក់រៀបចំតិចតួច មិនល្អដូចការរៀបចំរបស់កម្ពុជា លោក Thamanat Prompow ឧបនាយករដ្ឋមន្ត្រី និងជាប្រធានគណៈកម្មការកីឡាថៃសន្យារៀបចំព្រឹត្តិការណ៍ស៊ីហ្គេមឱ្យល្អ ដោះស្រាយកំហុសបច្ចេកទេសផ្សេងៗ និងសំណូមពរពលរដ្ឋបញ្ឈប់ការរិះគ.ន់ កុំប្រៀបធៀបជាមួយកម្ពុជា ។

កាលពីថ្ងៃទី៤ ខែធ្នូ ឆ្នាំ២០២៥ លោក Thamanat Prompow ឧបនាយករដ្ឋមន្ត្រី និងជាប្រធានគណៈកម្មការកីឡាថៃ បានធ្វើដំណើរមកពិនិត្យមើលទីតាំងព្រឹត្តិការណ៍ស៊ីហ្គេម ដូចជា មើលការរៀបចំអាងហែលទឹក និងផ្តល់កម្លាំងចិត្តដល់ក្រុមអត្តពលិកថៃដែលកំពុងហ្វឹកហាត់ត្រៀមខ្លួនប្រកួត ដោយមានមន្ត្រីពាក់ព័ន្ធជាច្រើនរូបទទទួលស្វាគមន៍ ។ លោក Thamanat បាននិយាយពីពលរដ្ឋថៃរិះគន់ការរៀបចំព្រឹត្តិការណ៍ស៊ីហ្គេមនៅថៃថា ការរៀបចំមានកំហុសបច្ចេកទេសច្រើន ពីព្រោះលោកជាប់ភារកិច្ចជួយសង្គ្រោះពលរដ្ឋរងគ្រោះដោយទឹកជំនន់នៅស្រុកហាតយៃ ខេត្តសុងក្លា ទើបប្រគល់តួនាទីឱ្យលោក Atthakorn Sirilatthayakorn រដ្ឋមន្ត្រីក្រសួងទេសចរណ៍ និងកីឡា មើលការខុសត្រូវជំនួស ។

ការរៀបចំព្រឹត្តិការណ៍ស៊ីហ្គេមមិនល្អ ដោយសាររដ្ឋាភិបាលថ្មីធ្វើការបន្តពីរដ្ឋាភិបាលចាស់ ដែលរដ្ឋាភិបាលចាស់មានបញ្ហាស្រាប់ហើយ ដូចជា ៖ ខ្វះខាតថវិកា ហើយលោកក៏បានដោះស្រាយបញ្ហារហូតមក ។ ទោះយ៉ាងណា លោកសង្ឃឹមថា នៅថ្ងៃទី៩ ខែធ្នូ គឺជាថ្ងៃបើកព្រឹត្តិការណ៍ស៊ីហ្គេម អ្វីៗនឹងដំណើរការល្អ គ្មានកំហុសឆ្គងទៀតទេ និងសូមឱ្យពលរដ្ឋថៃផ្តល់កម្លាំងចិត្តដល់អ្នករៀបចំព្រឹត្តិការណ៍ស៊ីហ្គេម ។ ពេលនេះ មិនទាន់ដល់ថ្ងៃបើកឆាកផង នាំគ្នារិះគន់អ្នករៀបចំព្រោងព្រាត ពួកយើងតាំងចិត្តរៀបចំឱ្យបានល្អក្រោយការផ្លាស់ប្តូររដ្ឋាភិបាល ។

លោកសំណូមពរពលរដ្ឋបញ្ឈប់ការប្រៀបធៀបការរៀបចំព្រឹតិ្តការណ៍ស៊ីហ្គេមរវាងថៃនិងកម្ពុជា ថាកម្ពុជាបានរៀបចំព្រឹត្តិការណ៍ស៊ីហ្គេមយ៉ាងអធិកអធម មានសំឡេង និងពន្លឺភ្លើងពណ៌ចាំងគួរឱ្យទាក់ទាញ ខណៈថៃរៀបចំអន់ ហុសបច្ចេកទេស ថែមទាំងចំណាយថវិការៀបចំតិចជាងកម្ពុជា ។ លោកនឹងព្យាយាមរៀបចំព្រឹត្តិការណ៍ស៊ីហ្គេមឱ្យល្អ និងប្រើប្រាស់អ្នកជំនាញ ហើយក៏សំណូមពរទៅសារព័ត៌មាននានាកុំផ្សាយរិះគន់ថៃគ្នាឯង ។

ចំណែកលោក Gongsak Yodmani ប្រធានអាជ្ញាធរកីឡាថៃព្រមទទួលស្គាល់កំហុសបច្ចេកទេស ដូចជា ឧបករណ៍បំពងសំឡេងមិនឮខ្លាំង ដោយត្រៀមឧបករណ៍បំពងសំឡេងបន្ថែមទៀតកុំឱ្យមានបញ្ហា ក៏ដូចជាត្រួតពិនិត្យការបំពាក់អំពូលភ្លើង ។ លោកថា ថវិការៀបចំព្រឹត្តិការណ៍ស៊ីហ្គេមរបស់ថៃ ស្មើត្រឹមតែជាង២ពាន់លានបាតប៉ុណ្ណោះ (ឬជាង៦២លានដុល្លារ) ដែលថវិកានេះតិចជាងថវិការបស់កម្ពុជា ដោយសាររដ្ឋាភិបាលថៃផ្តល់ថវិកាឱ្យតិចតួច និងការចំណាយថវិកាបន្ថែមជាង១៦០លានបាតទៀត ដើម្បីប្តូរទីតាំងព្រឹត្តិការណ៍ស៊ីហ្គេមពីខេត្តសុងក្លា មកទីក្រុងបាងកក និងខេត្តឈុនបុរីវិញ ដោយសារខ្លាចខេត្តសុងក្លាមានទឹកជំនន់ជាថ្មី ។

ដោយឡែក អភិបាលក្រុងបាងកក លោក Chadchart Sittipunt បានបង្ហាញក្តីបារម្ភពីបរិមាណធូលីកខ្វក់ PM 2.5 នឹងកើនឡើងខ្លាំងនៅទីក្រុងបាងកក ក្នុងអំឡុងពេលថៃធ្វើជាម្ចាស់ផ្ទះព្រឹត្តិការណ៍ស៊ីហ្គេម លើកទី៣៣ ចាប់ពីថ្ងៃទី៩ ដល់ថ្ងៃទី២០ ខែធ្នូ ឆ្នាំ២០២៥ ពីព្រោះកាលពីថ្ងៃទី៤ ខែធ្នូ កន្លងមក ទីក្រុងបាងកកមានធូលីកខ្វក់ខ្លាំងប៉ះពាល់ផ្លូវដង្ហើម ហើយលោកសំណូមពរឱ្យពលរដ្ឋធ្វើការពីផ្ទះ (Work from Home) ៕

ប្រទេសថៃ ៖ អស់រយៈពេលជាច្រើនថ្ងៃហើយដែលមានការប្រយុ.ទ្ធគ្នារវាងកងទ័ពមីយ៉ាន់ម៉ា និងកងកម្លាំងសហភាពជាតិការ៉េន (KNU) នៅប្រទេសមីយ៉ាន់ម៉ា ដែលបណ្តាលឱ្យគ្រាប់កាំភ្លើ.ងតូច កាំភ្លើ.ងធំធ្លាក់មកលើទឹកដីថៃជាបន្តបន្ទាប់ ខូចខាតផ្ទះសម្បែង ពលរដ្ឋថៃរងរបួសជាច្រើននាក់ រហូតដល់សាលារៀនថៃនៅព្រំដែនមីយ៉ាន់ម៉ា ត្រូវបង្ខំចិត្តបិទទ្វារដើម្បីសុវត្ថិភាព ។ ទោះជាថៃរងផលប៉ះពាល់ពីការប្រយុទ្ធគ្នានេះ ប៉ុន្តែរដ្ឋាភិបាល និងកងទ័ពថៃខ្លា.ចមិនហ៊ានក្អក មិនហ៊ានតបត ឬថ្កោលទោសមីយ៉ាន់ម៉ាទេ បានត្រឹមតែជូនដំណឹងប៉ុណ្ណោះ ។

ពលរដ្ឋថៃនៅខេត្តតាកជាប់ព្រំដែនមីយ៉ាន់ម៉ា ប្រាប់ថា ពួកគេបានសម្ងំលាក់ខ្លួនតែក្នុងផ្ទះ មិនហ៊ានចេញក្រៅ ក្រោយពីមានការប្រយុទ្ធគ្នារវាងកងទ័ពរមីយ៉ាន់ម៉ា និងកងកម្លាំងសហភាពជាតិការ៉េន (KNU) បណ្តាលឱ្យគ្រាប់កាំភ្លើងធ្លាក់ចូលទឹកដីថៃ ពលរដ្ឋថៃរងរបួសជាបន្តបន្ទាប់ និងខូចខាតផ្ទះអស់ជាច្រើនខ្នង ។

ពលរដ្ឋនៅភូមិមេកូនគេន ឃុំមហាវ៉ាន់ ស្រុកមេស៊ត ខេត្តតាក បានបង្កើនការប្រុងប្រយ័ត្ន និងតាមដានស្ថានការណ៍ប្រយុទ្ធគ្នានៅមីយ៉ាន់ម៉ា បន្ទាប់ពីរយៈពេលពី២ថ្ងៃ ទៅ៣ថ្ងៃនេះ ស្ថានការណ៍ប្រយុទ្ធក្នុងភូមិមិនឡាប៉ាំង ខេត្តការៀង ប្រទេសមីយ៉ាន់ម៉ា កាន់តែធ្ងន់ធ្ងរខ្លាំងឡើងរវាងកងទ័ពមីយ៉ាន់ម៉ា និងកងកម្លាំងសហភាពជាតិការ៉េន (KNU) ។ ភាគីទាំងពីរបានប្រយុទ្ធគ្នាទាំងថ្ងៃទាំងយប់ ដោយប្រើប្រាស់យន្តហោះចម្បាំង គ្រាប់បែក កាំភ្លើងតូច កាំភ្លើងធំ ហើយខ្ទាតគ្រាប់កាំភ្លើងចូលទឹកដីថៃ ។

ពលរដ្ឋថៃនៅខេត្តតាកប្រាប់ថា ពួកគេចាំបាច់ត្រូវតែតាមដានស្ថានការណ៍ប្រយុទ្ធនៅមីយ៉ាន់ម៉ាគ្រប់ពេលវេលា បើទោះជាមានទម្លាប់នឹងការប៉ះទង្គិចដោយអាវុធនេះក៏ដោយ ប៉ុន្តែបានប្រយ័ត្នខ្លួនជានិច្ច ដោយសង្កេតមើលការប្រយុទ្ធនៅមីយ៉ាន់ម៉ាពីចម្ងាយ និងតាមដានព័ត៌មាន ។ រីឯពលរដ្ឋមីយ៉ាន់ម៉ាជាច្រើនគ្រួសារបានបង្ខំចិត្តរស់នៅក្នុងជម្រកបណ្តោះអាសន្នតាមមាត់ទន្លេមេយ ដោយសារផ្ទះគ្មានសុវត្ថិភាព ។

ទោះជាការប្រយុទ្ធគ្នានៅមីយ៉ាន់ម៉ាកាន់តែខ្លាំងក្លា និងបង្កផលប៉ះពាល់ដល់ប្រទេសថៃក្តី ប៉ុន្តែរហូតមកដល់ថ្ងៃទី៤ ខែធ្នូ រដ្ឋាភិបាលថៃញញើតមិនហ៊ានតបតជាមួយមីយ៉ាន់ម៉ាវិញទេ គឺបានត្រឹមតែជូនដំណឹងប៉ុណ្ណោះ ។ ដូចគ្នានេះ កងទ័ពថៃក៏មិនហ៊ានក្អក ឬថ្កោលទោសមីយ៉ាន់ម៉ាទេ ប៉ុន្តែបើជាមួយប្រទេសជិតខាងផ្សេងវិញ ទាំងរដ្ឋាភិបាល និងកងទ័ពថៃ រករឿងចោទប្រកាន់ លាបពណ៌ ទម្លាក់កំហុស និយាយមួលបង្កាច់មិនចេះអស់មិនចេះហើយ ។

កាលពីថ្ងៃទី៣ ខែធ្នូ រដ្ឋមន្ត្រីក្រសួងការពារជាតិថៃ លោក Natthaphon Narkphanit ថា ស្ថានការណ៍ព្រំដែនខេត្តតាកជាប់មីយ៉ាន់ម៉ា មិនគួរឱ្យបារម្ភដូចនៅព្រំដែនផ្សេងទេ ពីព្រោះគ្មានការល្មើសអធិបតេយ្យ គ្រាន់តែកន្លងមក ការប្រយុទ្ធគ្នារវាងកងទ័ពមីយ៉ាន់ម៉ា និងកងកម្លាំងសហភាពជាតិការ៉េន (KNU) បណ្តាលឱ្យគ្រាប់កាំភ្លើងធ្លាក់ចូលទឹកដីថៃ ។ មិនដឹងថា តើគ្រាប់កាំភ្លើងទាំងនេះជារបស់ភាគីណា កងទ័ពថៃក៏បាញ់ជូនដំណឹងទៅមីយ៉ាន់ម៉ាវិញ និងត្រៀមជម្លៀសពលរដ្ឋ ។ មីយ៉ាន់ម៉ាគ្មានចេតនាបាញ់ចូលទឹកដីថៃទេ ពីព្រោះជាការប្រយុទ្ធគ្នាឯងលើទឹកដីមីយ៉ាន់ម៉ា ។

គួរបញ្ជាក់ថា កាលពីថ្ងៃទី៤ ខែធ្នូ ឆ្នាំ២០២៥ កងទ័ពមីយ៉ាន់ម៉ាសហការជាមួយកងកម្លាំង BGF បានបំផ្ទុះគ្រាប់បែកកំទេចអគារកម្ពស់១៣ជាន់នៅតំបន់សេដ្ឋកិច្ចពិសេសយ៉ាងតៃ ឬសាវ៉េកូកកូ ក្នុងស្រុកមៀវឌី ខេត្តមៀវឌី នៅទល់មុខភូមិវាំងកែវ ឃុំមេប៉ាក់ ស្រុកមេស៊ត ខេត្តតាក ប្រទេសថៃ ។ ការបំផ្ទុះអគារនេះអនុវត្តតាមគោលនយោបាយរបស់រដ្ឋាភិបាលមីយ៉ាន់ម៉ាដើម្បីបង្ក្រាប និងបំផ្លាញទីតាំងក្រុមឆបោកតាមប្រព័ន្ធអនឡាញ (Online Scam) មកពីប្រទេសចិន ។

វាជាការបំផ្ទុះគ្រាប់បែកប្រឆាំងទីតាំងរបស់ក្រុមឆបោកតាមប្រព័ន្ធអនឡាញជាលើកដំបូងនៅតំបន់សាវ៉េកូកកូ បន្ទាប់ពីកងទ័ពមីយ៉ាន់ម៉ាបំផ្លាញអគារមួយកន្លែងនៅតំបន់ខេខេប៉ាក ជាច្រើនលើក ។ អាជ្ញាធរថៃអះអាងថា ការបំផ្ទុះគ្រាប់បែកនេះមិនប៉ះពាល់ប្រទេសថៃ និងគ្មានជនណាម្នាក់រងរបួស ឬស្លាប់ទេ ៕

ប្រទេសថៃ ៖ កាលពីថ្ងៃទី៣ ខែធ្នូ ឆ្នាំ២០២៥ នាយករដ្ឋមន្ត្រីថៃ លោក Anutin Charnvirakul បានបដិសេធព័ត៌មានពលរដ្ឋភាគខាងត្បូងស្លា.ប់ដោយសារទឹកជំនន់កើនឡើងរហូតដល់ជាង១ពាន់នាក់ ដោយលោកថា គ្មានការលាក់បាំងចំនួនមនុស្សស្លា.ប់ទេ រដ្ឋាភិបាលបង្ហាញចំនួនពិតប្រាកដផ្អែកតាមទិន្នន័យរបស់ក្រសួងសុខាភិបាល ។ ការបដិសេធរបស់នាយករដ្ឋមន្ត្រីថៃបន្ទាប់ពីពលរដ្ឋចោទប្រកាន់ថា រដ្ឋាភិបាលលាក់បាំងចំនួនមនុស្សស្លា.ប់ដោយសារទឹកជំនន់ ដើម្បីកុំឱ្យរងការស្ទីបន្ទោសពីដំណោះស្រាយទឹកជំនន់យឺតយ៉ាវ ព្រមទាំងខ្វះខាតភ្នាក់ងារសង្គ្រោះ និងឧបករណ៍ ។

នៅវិមានរដ្ឋាភិបាល លោកនាយករដ្ឋមន្ត្រី Anutin និយាយថា រដ្ឋាភិបាលមិនអាចលាក់បាំងចំនួនមនុស្សស្លា.ប់ដោយសារទឹកជំនន់នៅភាគខាងត្បូងទេ រដ្ឋាភិបាលបង្ហាញចំនួនពិតប្រាកដផ្អែកតាមទិន្នន័យរបស់ក្រសួងសុខាភិបាល មនុស្សស្លាប់ដោយសារទឹកជំនន់ត្រឹមតែខ្ទង់រយប៉ុណ្ណោះ មិនដល់ខ្ទង់ពាន់ទេ ។ មតិជាច្រើនថា មនុស្សស្លាប់ដោយសារទឹកជំនន់នៅភាគខាងត្បូងរហូតដល់ជាង១ពាន់នាក់ ប៉ុន្តែរដ្ឋាភិបាលលាក់បាំងព័ត៌មាន សូមបញ្ជាក់ថា រដ្ឋាភិបាលបានបង្ហាញចំនួនមនុស្សស្លាប់ពិតប្រាកដ ។ រីឯអ្នកចោទប្រកាន់ចំនួនអ្នកស្លាប់ស្មើជាង១ពាន់នាក់ គឺពួកគេអាចនិយាយបានដើម្បីឱ្យមានការផ្ទៀងផ្ទាត់ទិន្នន័យ ។

ការបង្ហាញចំនួនមនុស្សស្លាប់ត្រូវតែផ្អែកតាមទិន្នន័យរបស់ក្រសួងសុខាភិបាល និងបង្ហាញពីសាច់ញាតិសាកសព ពីព្រោះវាមិនចាំបាច់ដែលរដ្ឋាភិបាលត្រូវលាក់បាំងព័ត៌មានពលរដ្ឋទេ ។ នេះជាបញ្ហាគ្រោះធម្មជាតិ បើមានគ្រោះថ្នាក់អ្វីត្រូវតែបង្ហាញជាសាធារណៈដើម្បីទទួលបានមតិណែនាំពីពលរដ្ឋ រដ្ឋាភិបាលស្តាប់គ្រប់មតិណែនាំ បើមតិល្អនឹងអនុវត្តតាមដើម្បីបង្កើនកិច្ចសហការ ។

ដូចគ្នានេះ កាលពីថ្ងៃទី២ ខែធ្នូ រដ្ឋមន្ត្រីក្រសួងសុខាភិបាល លោក ផាត់តាណា ប្រមផាន់ បានបដិសេធព័ត៌មានពលរដ្ឋភាគខាងត្បូងស្លាប់ដោយសារទឹកជំនន់រហូតដល់ជាង១ពាន់នាក់ ដោយលោកថា មិនមែនជាការពិតទេ ការលើកឡើងបែបនេះគ្មានភស្តុតាង ។ ចំនួនអ្នកស្លាប់ដោយទឹកជំនន់ពិតប្រាកដស្មើត្រឹមខ្ទង់រយប៉ុណ្ណោះ ហើយមានតែទិន្នន័យរបស់ក្រសួងសុខាភិបាលទេដែលពិតប្រាកដ និងអាចជឿជាក់ ។

បើទោះជាលោកនាយករដ្ឋមន្ត្រី Anutin និងរដ្ឋមន្ត្រីក្រសួងសុខាភិបាលបញ្ជាក់ពីចំនួនពលរដ្ឋភាគខាងត្បូងស្លាប់ដោយសារទឹកជំនន់មិនដល់ជាង១ពាន់នាក់ក៏ដោយ ប៉ុន្តែចំនួនពលរដ្ឋស្លាប់នេះកំពុងតែចម្រូងចម្រាស់ខ្លាំងណាស់នៅប្រទេសថៃ ដោយពលរដ្ឋចោទប្រកាន់រដ្ឋាភិបាលថា លាក់បាំងការពិតពីចំនួនមនុស្សស្លាប់ ។

គួរបញ្ជាក់ថា កាលពីថ្ងៃទី២ ខែធ្នូ សភាពាណិជ្ជកម្មថៃបានលើកឡើងពីទឹកជំនន់នៅភាគខាងត្បូងបង្កផលប៉ះពាល់យ៉ាងធ្ងន់ធ្ងរ ប្រហាក់ប្រហែលនឹងទឹកជំនន់កាលពីឆ្នាំ២០១១ ដោយសភាពាណិជ្ជកម្មវាយតម្លៃថា ថៃខាតបង់ថវិកាជាតិរហូតដល់ជាង៤ម៉ឺនលានបាត (ឬជាង១,២៥០លានដុល្លារ) ក្នុង១ខែ ដោយសារទឹកជំនន់ ខណៈវិស័យទេសចរណ៍ និងសេវាកម្មប៉ះពាល់ខ្លាំងបំផុត ។ ពលរដ្ឋ និងម្ចាស់អាជីវកម្មភាគខាងត្បូងត្រូវការប្រាក់សំណងជាបន្ទាន់ពីរដ្ឋាភិបាល និងចំណាយពេលរហូតដល់ជាង១ខែក្នុងការរៀបចំផ្ទះ ឬអាជីវកម្មឡើងវិញ ៕