កូរ៉េខាងត្បូង ចាប់ផ្ដើម«បន្ធូបន្ថយ»ការហាមឃាត់ពលរដ្ឋមិនឲ្យធ្វើដំណើរមកកម្ពុជា

ទីក្រុងសេអ៊ូល៖ រដ្ឋាភិបាលទីក្រុងសេអអ៊ូល សម្រេច«បន្ធូរបន្ថយ»ការរឹតបន្តឹងពលរដ្ឋមិនឲ្យធ្វើដំណើរមកកាន់ប្រទេសកម្ពុជា ដោយកែសម្រួលពីការហាមប្រាមដាច់ខាត មកជាអាចធ្វើដំណើរទៅបានប៉ុន្តែគួរប្រុងប្រយ័ត្ន ខណៈខេត្តមួយចំនួនរបស់កម្ពុជាដែលកូរ៉េធ្លាប់ដៅជាតំបន់គ្រោះថ្នាក់ខ្ពស់ ត្រូវបានទម្លាក់ទៅតំបន់ដែលមានគ្រោះថ្នាក់កម្រិតទាបវិញ។ នេះបើយោងតាមការចុះផ្សាយរបស់បណ្ដាញសារព័ត៌មានក្នុងស្រុករបស់កូរ៉េខាងត្បូង។

នៅថ្ងៃទី៤ ខែធ្នូ ឆ្នាំ២០២៥ ក្រសួងការបរទេសកូរ៉េខាងត្បូង បានចេញសេចក្ដីប្រកាសមួយទាក់ទងនឹងការកែសម្រួលកម្រិតនៃការជូនដំណឹងអំពីការធ្វើដំណើរមកកម្ពុជាសម្រាប់តំបន់មួយចំនួន ដែលពីមុនចាត់ទុកថាជាតំបន់មានបទឧក្រិដ្ឋផ្ដោតលើជនជាតិកូរ៉េជាខ្លាំងក្លា ត្រូវបានបន្ទាបកម្រិតទៅកម្រិតមធ្យម ឬកម្រិតទាបវិញ។ ការកំណត់ថ្មីនេះ នឹងត្រូវបានអនុវត្តឲ្យមានប្រសិទ្ធភាពចាប់ពីថ្ងៃទី៥ ខែធ្នូ ឆ្នាំ២០២៥ នេះតទៅ។

យោងតាមការប្រកាសនេះ ក្រសួងការបរទេសកូរ៉េខាងត្បូងបានសម្រេចទម្លាក់កម្រិតហានិភ័យសម្រាប់រាជធានីភ្នំពេញ ដែលពីមុនស្ថិតនៅក្រោមការណែនាំពិសេសអំពីការធ្វើដំណើរ (កម្រិត ២.៥) ត្រូវបានបន្ទាបកម្រិតទៅជាកម្រិត ២ ខណៈដែលទីក្រុងសៀមរាប ដែលពីមុនស្ថិតនៅកម្រិត ២ ‘ហាមធ្វើដំណើរ’ មកជាកម្រិត ១ ឲ្យ’ប្រុងប្រយ័ត្ន’វិញ។

ទោះជាយ៉ាងណា កម្រិតជូនដំណឹងសម្រាប់តំបន់ភ្នំបូកគោ ក្រុងបាវិត និងប៉ោយប៉ែត ក្នុងខេត្តកំពត ដែលបច្ចុប្បន្នស្ថិតនៅក្រោមកម្រិត 4 (ការធ្វើដំណើរមិនអនុវត្ត) នៅតែមិនផ្លាស់ប្តូរ។ ចំណែកខេត្តព្រះសីហនុ ដែលស្ថិតនៅកម្រិត 3 នៅតែជាកម្រិត 3 (ការជូនដំណឹងអំពីការធ្វើដំណើរ) ដោយកូរ៉េខាងត្បូងរង់ចាំតាមដានជាបន្តទៀតសិន។

គួរជម្រាបថា ការកែសម្រួលការជូនដំណឹងអំពីការធ្វើដំណើរមកកម្ពុជានេះ ឆ្លុះបញ្ចាំងពីកិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការបង្ក្រាបបទល្មើសឆបោកនៅក្នុងប្រទេស និងកិច្ចសហប្រតិបត្តិការដែលកម្ពុជាបានចូលរួមយ៉ាងជិតស្និតជាមួយកូរ៉េខាងត្បូង រួមទាំងការបើកដំណើរការ “ក្រុមការងាររួមកូរ៉េ-កម្ពុជាសម្រាប់ជនជាតិកូរ៉េ” ដែលផ្ដល់នូវទំនុកចិត្តបន្ថែមសម្រាប់រដ្ឋាភិបាលកូរ៉េ។

បន្ថែមលើនេះ វាបាននាំឱ្យមានការថយចុះនៃករណីឆបោកដែលបានរាយការណ៍នៅក្នុងប្រទេសកម្ពុជា និងការកែលម្អគួរឱ្យកត់សម្គាល់នៅក្នុងស្ថានភាព ជាពិសេសនៅទីក្រុងភ្នំពេញ និងសៀមរាប។ យ៉ាងណាក៏ដោយ ក្រសួងការបរទេសកូរ៉េនឹងនៅតែតាមដានស្ថានភាពនៅក្នុងប្រទេសកម្ពុជា និងបន្តពិនិត្យឡើងវិញឲ្យបានដិតដល់ នូវតម្រូវការសម្រាប់ការកែតម្រូវបន្ថែមទៀតចំពោះការណែនាំអំពីការធ្វើដំណើររបស់ប្រជាជនខ្លួនមកកាន់កម្ពុជា៕