ក្រសួងធនធានទឹក និងឧតុនិយម បានចេញសេក្តីជូនដំណឹងស្តីពីស្ថានភាពធាតុអាកាសនៅព្រឹកថ្ងៃទី១១ ខែមេសា នេះថារយៈពេល១សប្តាហ៍ខាងមុខចាប់ពីថ្ងៃទី១២ ដល់ថ្ងៃទី១៨ ខែមេសា ឆ្នាំ២០២៣ កម្ពុជាទទួលឥទ្ធិពលពីជ្រលងសម្ពាធទាបក្នុងកម្រិតពីខ្សោយ ទៅមធ្យម គួបផ្សំនិងខ្យល់ប្រែប្រួល។ ស្ថានភាពបែបនេះនឹងធ្វើឱ្យតំបន់ខ្លះនៅកម្ពុជាឡើងកម្តៅខ្លាំងជិតដល់៤០អស្សា និងតំបន់ខ្លះទៀតអាចមានភ្លៀងលាយឡំដោយខ្យល់កន្រ្តាក់។

តាមសេចក្តីជូនដំណឹងដដែលបានបញ្ជាក់ថា តំបន់ទំនាបកណ្តាល មានសីតុណ្ហភាពអប្បបរមាពី ២៥-២៧ °C និង សីតុណ្ហភាពអតិបរមា មានពី ៣៥-៣៩ °C ។ ក្នុងនោះពីថ្ងៃទី១២-១៤ ខែមេសា អាចមានភ្លៀងក្នុងកម្រិតពីខ្សោយទៅតិចតួច បន្ទាប់ពីនោះបរិមាណភ្លៀង និងកើនឡើងក្នុងកម្រិតពីមធ្យមទៅបង្គួរ លាយឡំទៅដោយផ្គរ រន្ទះ និងខ្យល់កន្ត្រាក់ ។

ចំណែកឯ តំបន់ខ្ពង់រាប សីតុណ្ហភាពអប្បបរមា មានពី ២៥-២៧ °C និងសីតុណ្ហភាពអតិបរមា មានពី ៣៦- ៣៨ °C ពីថ្ងៃទី១២-១៤ ខែមេសា អាចមានភ្លៀងក្នុងកម្រិតពីខ្សោយទៅតិចតួច ។ បន្ទាប់ពីនោះបរិមាណភ្លៀង និងកើនឡើងក្នុងកម្រិតពីមធ្យមទៅបង្គួរ លាយឡំទៅដោយផ្គរ រន្ទះ និងខ្យល់កន្ត្រាក់ ។

សម្រាប់ តំបន់មាត់សមុទ្រ វិញសីតុណ្ហភាពអប្បបរមា មានពី ២៤-២៦ °C សីតុណ្ហភាពអតិបរមា មានពី ៣៤-៣៦ °C អាចមានភ្លៀងក្នុងកម្រិតពីខ្សោយទៅមធ្យម លាយឡំទៅដោយផ្គរ រន្ទះ និងខ្យល់កន្ត្រាក់៕

្រទេសចិន ៖ បុរសចិនម្នាក់ត្រូវជាប់ពន្ធនាគាររយៈពេល៦ខែ ក្រោយពីបុរសនេះធ្វើឱ្យសត្វមាន់ចិញ្ចឹមរបស់អ្នកជិតខាងចំនួនជាង១ពាន់ក្បាលភ្ញាក់ផ្អើល និងងាប់បន្តបន្ទាប់គ្នា ខណៈបុរសនេះចង់សងសឹកជាមួយអ្នកជិតខាងរបស់ខ្លួន ដែលធ្លាប់មានរឿងទំនាស់ជាមួយគ្នាពីមុន ។

សារព័ត៌មាន China Daily បានចុះផ្សាយថា បុរសម្នាក់ឈ្មោះ គូ ត្រូវបានតុលាការកាត់ទោសឱ្យជាប់ពន្ធនាគារ ក្រោយពីបុរសរូបនេះធ្វើឱ្យមាន់របស់អ្នកជិតខាងភ្ញាក់ផ្អើល និងងាប់ជាង១ពាន់ក្បាល ។ មូលហេតុដែលឈានដល់មាន់ងាប់នេះ គឺដោយសារលោក គូ ធ្លាប់មានទំនាស់ជាមួយអ្នកជិតខាងកាលពីខែមេសា ឆ្នាំ២០២២ កន្លងមក ។ កាលនោះ អ្នកជិតខាងឈ្មោះ ចង និងជាម្ចាស់មាន់ បានចូលមកកាត់ដើមឈើក្នុងផ្ទះរបស់លោក គូ ដោយមិនបានសុំការអនុញ្ញាតជាមុន ។

សារព័ត៌មានចុះផ្សាយទៀតថា នៅយប់មួយ លោក គូ បានលួចចូលទៅក្នុងបរិវេណផ្ទះរបស់អ្នកជិតខាងឈ្មោះលោក ចង រួចយកពិលបញ្ចាំងទៅកាន់កសិដ្ឋានចិញ្ចឹមមាន់ រហូតធ្វើឱ្យមាន់ប្រមាណ៥០០ក្បាលភ្ញាក់ផ្អើលជាខ្លាំង ហើយរត់គេចជាន់គ្នាវាងាប់ ។

លោក គូ ត្រូវបានប៉ូលិសចាប់ខ្លួន និងបង្ខំឱ្យលោកបង់ប្រាក់សំណងចំនួន៣.០០០យន់ ដោយសារធ្វើឱ្យមាន់អ្នកជិតខាងភ្ញាក់ផ្អើល និងជាន់គ្នាងាប់ ។ ក្រោយពីលោក គូ ត្រូវបានគេឱ្យបង់ប្រាក់សងជំងឺចិត្តចំនួន៣.០០០យន់មក បានធ្វើឱ្យលោកកាន់តែខឹងសម្បារខ្លាំងឡើង ។ ដូច្នេះ លោកក៏បានលួចចូលក្នុងផ្ទះអ្នកជិតខាងម្តងទៀត និងបញ្ចាំងពិលទៅលើមាន់ដូចដែលលោកធ្លាប់ធ្វើ ហើយលើកនេះ មាន់របស់លោក ចង បានងាប់ចំនួន៦៤០ក្បាលបន្ថែមទៀត ។

អាជ្ញាធរក្នុងតំបន់នេះប៉ាន់ស្មានថា សត្វមាន់ចំនួនជាង១ពាន់ក្បាលដែលងាប់នេះ គិតជាទឹកប្រាក់ស្មើនឹងប្រមាណ១៣.៨៤០យន់ ។ តុលាការនៅក្រុង Hengyang ខេត្តខេត្ត Hunan បានកាត់ក្តីឱ្យលោក គូ មានទោសពីបទបំផ្លាញទ្រព្យសម្បត្តិអ្នកដទៃដោយចេតនា និងជាប់ពន្ធនាគាររយៈពេល៦ខែ និងព្យួរទោស១ឆ្នាំ ខណៈលោក គូ ក៏បានសារភាពពីកំហុសរបស់ខ្លួនផងដែរ ៕ ប្រភព ៖ Around the World

ដើម្បីជៀសវាងការរងចាំយូរនៅច្រកទ្វារព្រំដែនអន្តរជាតិ ក៏ដូចជាសម្រួលដល់ការធ្វើដំណើរត្រឡប់មកលេងស្រុកកំណើតនៅពេលបុណ្យចូលឆ្នាំថ្មីប្រពៃណីជាតិ ស្ថានអគ្គកុងស៊ុលនៃប្រទេសកម្ពុជា ប្រចាំខេត្តសាកែវនៃប្រទេសថៃបានចេញសេចក្តីជូនដំណឹងដល់ពលករចំណាកស្រុកដើម្បីសម្របសម្រួលលើបញ្ហានេះ។

ក្នុងសេចក្តីជូនដំណឹងនាថ្ងៃទី១០ ខែមេសា ឆ្នាំ២០២៣ ស្ថានអគ្គកុងស៊ុលបានស្នើដល់ ពលករចំណាកស្រុកជួយធ្វើទិដ្ឋាការចេញ-ចូល (Re-entry Visa) នៅតាមការិយាល័យអន្តោប្រវេសន៍ថៃ(ត.ម) ក្នុងស្រុកដែលពលករខ្មែរកំពុងធ្វើការឱ្យហើយជាមុនសិន មុនពេលធ្វើដំណើរមកកាន់ច្រកទ្វារព្រំដែនអន្តរជាតិកម្ពុជា-ថៃ។ បន្ថែមពីលើនេះ ក្នុងករណីដែលពលករមិនបានធ្វើទិដ្ឋាការចេញ-ចូល (Re-entry Visa) នៅកន្លែងដែលធ្វើការទេ ពលករត្រូវមកធ្វើទិដ្ឋាការចេញ-ចូល (Re-entry Visa) នៅការិយាល័យអន្តោប្រវេសន៍ថៃ(ត.ម) ក្នុងស្រុកអារញ្ញប្រាថេត ខេត្តសាកែវ ឱ្យហើយមុនពេលធ្វើដំណើរមកកាន់ច្រកទ្វារព្រំដែនអន្តរជាតិថ្លឹងលឹក-ប៉ោយប៉ែត។

គូសបញ្ជាក់ថា មុនពេលស្ថានអគ្គកុងស៊ុលចេញសេចក្តីជូនដំណឹងមានការចែកចាយព័ត៌មានពីពលករខ្មែរមួយចំនួនដែលមកលេងស្រុកកំណើតបានត្អូញត្អែយ៉ាងខ្លាំងពីការកកស្ទះនៅតាមច្រកព្រំដែនគឺពួកគេត្រូវរង់ចាំជាច្រើនម៉ោង៕

ប្រទេម៉ាឡេស៊ី ៖ ប្រទេសម៉ាឡេស៊ីមានគម្រោងពង្រីកការនាំចេញដូងប្រេងទៅកាន់ទីផ្សារអាហ្វ្រិក និងមជ្ឈិមបូព៌ា ដោយបង្កើតជាមជ្ឈមណ្ឌលកណ្តាលថ្មីមួយសម្រាប់ការនាំចេញទៅកាន់ប្រទេសអេហ្ស៊ីប និងអារ៉ាប៊ីសាអូឌីត ។

លោក Fadillah Yusof ឧបនាយករដ្ឋមន្ត្រីម៉ាឡេស៊ី និងជារដ្ឋមន្ត្រីក្រសួងកសិ-ឧស្សាហកម្ម និងផលិតផល បានថ្លែងថា ក្រសួង និងក្រុមផលិតដូងប្រេងរបស់ម៉ាឡេស៊ីបានព្យាយាមស្វែងរកទីផ្សារថ្មីៗ ក្រោយពីម៉ាឡេស៊ីបាននាំចេញដូងប្រេងទៅកាន់ទីផ្សារនៅក្រៅប្រទេសកើនឡើង ។ ហេតុនេះ ម៉ាឡេស៊ីជាប្រទេសនាំចេញដូងប្រេងដ៏ធំមួយស្ថិតក្នុងលំដាប់ទី២ លើពិភពលោក បន្ទាប់ពីប្រទេសឥណ្ឌូណេស៊ី ។ ចំណែកប្រទេសនាំចូលដូងប្រេងពីម៉ាឡេស៊ី រួមមាន ឥណ្ឌា ចិន និងហ្វីលីពីន ។

លោក Fadillah Yusof បានពិភាក្សាជាមួយឯកអគ្គរដ្ឋទូតប្រទេសអេហ្ស៊ីបប្រចាំម៉ាឡេស៊ីថា អេហ្ស៊ីបក៏ចង់ក្លាយជាមជ្ឈមណ្ឌលកណ្តាលក្នុងតំបន់ផងដែរ ក្នុងការនាំចេញដូងប្រេងទៅកាន់ទីផ្សារទ្វីបអាហ្វ្រិក ។ ដូច្នេះ អេហ្ស៊ីបត្រូវការនាំចូលប្រេងដូងបន្ថែមទៀតពីម៉ាឡេស៊ីដូចគ្នា ។

ទោះយ៉ាងណា ការនាំចេញដូងប្រេងរបស់ម៉ាឡេស៊ីទៅកាន់តំបន់មជ្ឈឹមបូព៌ាបានកើនឡើង៣២% នៅក្នុង២០២២ កន្លងមក ហើយការនាំចេញទៅកាន់ទ្វីបអាហ្វ្រិកខាងជើងបានកើនឡើង៥១% ។

ក្រៅពីនេះ លោក Fadillah Yusof គិតថា ប្រទេសចិនក៏ចាប់អារម្មណ៍នាំចូលដូងប្រេងផងដែរ ដូច្នេះ គេចាត់ទុកថា ដូងប្រេងគឺជាទំនិញមួយមានស្ថេរភាព និងអាចបង្កើនផលិតផលក្នុងស្រុកសរុប (GDP) ដល់ប្រទេសម៉ាឡេស៊ីបានយ៉ាងច្រើនមហាសាល បើទោះជាពិភពលោកកំពុងប្រឈមនឹងវិបត្តិផ្សេងៗ រួមទាំងការរំខាននៃខ្សែសង្វាក់ផ្គត់ផ្គង់ក្តី ៕ ប្រភព ៖ AEC Connect

ប្រទេសចិន ៖ យោងតាមសារព័ត៌មានស៊ីនហួររបស់រដ្ឋាភិបាលចិនបានបង្ហាញនូវរបាយការណ៍របស់វិទ្យាស្ថានស្រាវជ្រាវ Hurun ដែលបានប្រមូលផ្តុំចំនួនមហាសេដ្ឋីនៅប្រទេសនានាទូទាំងពិភពលោក ដែលមានអាយុមិនលើសពី៤០ឆ្នាំ និងបង្កើតទ្រព្យសម្បត្តិដោយខ្លួនឯង ។

របាយការណ៍នេះបញ្ជាក់ថា តាមការប្រមូលផ្តុំទិន្នន័យរហូតដល់ថ្ងៃទី១៦ ខែមករា ឆ្នាំ២០២៣ រកឃើញថា ប្រទេសនៅទូទាំងពិភពលោកមានមហាសេដ្ឋីអាយុមិនលើសពី៤០ឆ្នាំ ចំនួន៥៩នាក់ ហើយក្នុងចំណោមនេះ មានមហាសេដ្ឋីជនជាតិចិនចំនួន១៨នាក់ ។ ដូច្នេះ ប្រទេសចិនមានមហាសេដ្ឋីអាយុតិចក្នុងប្រទេសស្ថិតនៅលំដាប់ទី២ បន្ទាប់ពីអាមេរិក ដែលមានមហាសេដ្ឋីអាយុតិចចំនួន២៣នាក់ ។

ក្នុងចំណោមមហាសេដ្ឋីជនជាតិចិនមានអាយុតិច រួមមាន លោក Zhang Yiming អ្នកបង្កើតក្រុមហ៊ុន ByteDance ជាក្រុមហ៊ុនមេរបស់ TikTok ស្ថិតក្នុងលំដាប់ទី២ ដែលមានទឹកប្រាក់ចំនួន២,៥សែនលានយន់ បន្ទាប់ពីលោក Mark Zuckerberg ជា CEO របស់ក្រុមហ៊ុន Meta ។

ជាមួយគ្នានេះ ក៏មានក្រុមអ្នកបង្កើត miHoYo ជាកម្មវិធីហ្គេម Genshin Impact ដ៏ល្បីល្បាញមួយនៅលើពិភពលោក ដែលមានទីតាំងនៅក្រុងសៀងហៃភាគខាងកើតប្រទេសចិន ចំនួន៣នាក់ ដែលបានជាប់ឈ្មោះជាមហាសេដ្ឋីថ្មីក្នុងឆ្នាំ២០២៣ ផងដែរ ។

ក្រៅពីនេះ វិទ្យាស្ថានស្រាវជ្រាវ Hurun ក៏បានបញ្ជាក់ក្នុងរបាយការណ៍ដែរថា ការប្រមូលផ្តុំនូវទិន្នន័យមហាសេដ្ឋីមានអាយុតិចនៅទូទាំងពិភពលោកលើកនេះ ចង្អុលបង្ហាញថា មហាសេដ្ឋីទាំងនេះមានអាយុតិចជាង៤០ឆ្នាំ ដោយពួកគេទទួលបានជោគជ័យច្រើនបំផុត និងអាចបង្កើតទ្រព្យសម្បត្តិរាប់លានដុល្លារអាមេរិកជាលើកដំបូង ដោយប្រើរយៈពេលត្រឹមតែ៦ឆ្នាំប៉ុណ្ណោះ ៕ ប្រភព ៖ TODAY

អាមេរិកខាងជើង៖ យោងតាមប្រភព Variety បានឱ្យដឹងថា ខ្សែភាពយន្តរបស់ Illumination រកចំណូលបាន ២០៤.៦ លានដុល្លារនៅអាមេរិកខាងជើង បូកនឹង ១៧៣ លានដុល្លារនៅក្នុងទីផ្សារអន្តរជាតិ The Super Mario Bros. ភាពយន្តនេះ ក៏ជាគម្រោងគំនូរជីវចលដែលទទួលបានជោគជ័យបំផុតផងដែរ ។

ជាមួយនឹងថវិកាជាង ១០០ លានដុល្លារ ដែលជាខ្សែភាពយន្តរឿង The Super Mario Bros. ភាពយន្តនេះ ទទួលបានប្រាក់ចំណេញភ្លាមៗពីសប្តាហ៍ដំបូងនៃការចេញផ្សាយរបស់ខ្លួន។ ខ្សែភាពយន្តនេះពង្រីកភាពជោគជ័យរបស់ Illumination បន្ទាប់ពីគម្រោងជាច្រើនដូចជា Despicable Me , Minions , Sing ឬ The Secret Life of Pets ។ លោក Jim Orr នាយកផ្នែកចែកចាយភាពយន្តរបស់ Universal បានប្រាប់ប្រភពព័ត៌មាន Variety ថា “លទ្ធផលនេះបង្ហាញពីសេចក្តីស្រឡាញ់របស់ទស្សនិកជនចំពោះតួអង្គវីដេអូហ្គេម Nintendo និងការនិទានរឿងដែលបង្ហាញដោយ Illumination” ។

បន្ទាប់ពីចុងសប្តាហ៍ដំបូងរបស់ខ្លួន ខ្សែភាពយន្តរបស់ Illumination បានវ៉ាដាច់ខ្សែភាពយន្ត Ant-Man and the Wasp: Quantumania (១០៦ លានដុល្លារ) ដែលនេះបានធ្វើឱ្យខ្សែភាពយន្ត The Super Mario Bros ក្លាយជាភាពយន្តទី២ដែលរកចំណូលបានខ្ពស់បំផុតនៅក្នុងទីផ្សារអាមេរិក បន្ទាប់ពីខ្សែភាពយន្ត Illumination៕

ប្រភព៖vnexpress