ប្រទេសព័រទុយហ្គាល់ ៖ លោក Paul Wilkinson អាយុ៦៥ឆ្នាំ បានធ្វើដំណើរចេញពីទីក្រុង Faro ប្រទេសព័រទុយហ្គាល់ ទៅកាន់ទីក្រុង Belfast ប្រទេសអៀរឡង់ តាមជើងយន្តហោះលេខ Jet 2 ។ អ្វីដែលចម្លែក គឺក្នុងយន្តហោះនេះមានអ្នកដំណើរតែម្នាក់ប៉ុណ្ណោះ គឺលោក Paul Wilkinson ព្រមទាំងអ្នកបម្រើការនៅលើយន្តហោះ ។

ពេលឡើងលើយន្តហោះដំបូង លោក Paul Wilkinson មានការចម្លែកចិត្តជាខ្លាំង ហើយលោកគិតថា យន្តហោះនេះចេញដំណើរយឺតយ៉ាវ ឬត្រូវបានអ្នកដំណើរលុបចោលការធ្វើដំណើររបស់ពួកគេ ពីព្រោះគ្មានអ្នកដំណើរផ្សេងទៀតមកតម្រង់ជួរដើម្បីពិនិត្យសំបុត្រឡើងជិះយន្តហោះទេ ។ ក្រោយមក អ្នកបម្រើការលើយន្តហោះដើរមកប្រាប់ថា ថ្ងៃនេះ លោក Paul Wilkinson គឺជាអ្នកដំណើរវីអាយភី ហើយលោក Paul Wilkinson អាចធ្វើដំណើរតាមយន្តហោះនេះ ដូចគ្នានឹងការជិះយន្តហោះផ្ទាល់ខ្លួនដែរ ។

ការធ្វើដំណើររបស់លោក Paul Wilkinson គឺត្រូវចំណាយពេល៣ម៉ោង ។ ក្នុងអំឡុងពេលធ្វើដំណើរ អ្នកបម្រើការនៅលើយន្តហោះហៅលោក Paul Wilkinson ថា ព្រះអង្គម្ចាស់ Paul ហើយពួកគេបានផ្តល់សេវាកម្មនានាល្អឥតខ្ចោះចំពោះលោក សូម្បីតែវ៉ាលិសក្តី គឺមានតែវ៉ាលីសរបស់លោក Paul Wilkinson មួយប៉ុណ្ណោះនៅកន្លែងទទួលវ៉ាលីស ។ លើសពីនេះ អ្នកបម្រើការលើយន្តហោះបានថតរូបជាមួយលោកដើម្បីទុកជាអនុស្សាវរីយ៍ផងដែរ ។

លោក Paul Wilkinson និយាយថា វាគឺជាបទពិសោធន៍ថ្មីមួយក្នុងការធ្វើដំណើរតាមយន្តហោះរបស់លោកលើកនេះ ក្រោយពីលោកបានធ្វើដំណើរកម្សាន្ត និងវាយកូនហ្គោលនៅប្រទេសព័រទុយហ្គាល់ ៕ ប្រភព ៖ WorldForum

ប្រទេសចិន៖ ឧស្សាហកម្មអចលនទ្រព្យដែលមានប្រហែល ២៥% នៃផលិតផលក្នុងស្រុកសរុបរបស់ប្រទេសចិនកំពុងងើបឡើងវិញបន្ទាប់ពីទីក្រុងប៉េកាំងបានលុបចោលគោលនយោបាយប្រឆាំងការរីករាលដាលដ៏តឹងរ៉ឹង។
ទីក្រុងធំៗចំនួន ៥៥ ក្នុងចំណោមទីក្រុងចំនួន ៧០ ដែលតាមដានដោយរដ្ឋាភិបាលបានឃើញតម្លៃផ្ទះកើនឡើងក្នុងខែកុម្ភៈ បើធៀបនឹងខែធ្នូ។ ការស្ទង់មតិចុងក្រោយដោយធនាគារកណ្តាលរបស់ប្រទេសបង្ហាញពីភាគរយនៃគ្រួសារដែលមានផែនការទិញផ្ទះនៅត្រីមាសក្រោយបានកើនឡើងដល់ ១៧.៥% ដែលជាការកើនឡើងគួរឱ្យកត់សម្គាល់ជាលើកដំបូងក្នុងរយៈពេលបីឆ្នាំ។

Sunac China Holdings ដែលជាក្រុមហ៊ុនមានបញ្ហានាពេលថ្មីៗនេះ បានសម្រេចផែនការរៀបចំរចនាសម្ព័ន្ធឡើងវិញរបស់ខ្លួន ខណៈដែលក្រុមហ៊ុនបានឃើញការកើនឡើងការលក់បន្ទាប់ពីការធ្លាក់ចុះមួយឆ្នាំ។ ទីក្រុងប៉េកាំងបានជួយអ្នកសាងសង់ចាប់ផ្តើមគម្រោងឡើងវិញ ដើម្បីផ្តល់ផ្ទះដល់អតិថិជន និងចូលរួមក្នុងការធ្វើពហិការលើការទូទាត់ប្រាក់កម្ចី។
ការងើបឡើងវិញនៃទីផ្សារធ្វើឱ្យយល់បានសម្រាប់អ្នកអភិវឌ្ឍន៍អចលនទ្រព្យនៅពេលវាឈានចូលរដូវកាលរកប្រាក់ចំណូលឆ្នាំ ២០២២ ក្រុមហ៊ុនអចលនទ្រព្យចំនួន ២១ ក្នុងចំណោម ៦៥ ក្រុមហ៊ុនដែលបានចុះបញ្ជីនៅហុងកុងបានកត់ត្រាការខាតបង់ ហើយ ១៣ ក្រុមហ៊ុនទៀតបានរាយការណ៍ថាការខាតបង់។

ដោយសារទីផ្សារមានភាពប្រសើរឡើង ក្រុមហ៊ុនអចលនទ្រព្យឥឡូវនេះអាចចរចាជាមួយអ្នកវិនិយោគលើការសងបំណុលបានប្រសើរជាងមុន។ ទោះជាយ៉ាងណា អ្នកវិនិយោគនៅតែមានការព្រួយបារម្ភ កាលពីខែមុន ក្រុមហ៊ុន Sino-Ocean Group Holding បានពន្យារពេលការទូទាត់ការប្រាក់សញ្ញាប័ណ្ណដោយមិនបានរំពឹងទុកដើម្បី “រក្សាទុកសាច់ប្រាក់” ។ ទោះបីជាការសម្រេចចិត្តត្រូវបានលុបចោលប៉ុន្មានថ្ងៃក្រោយមកក៏ដោយ វាក៏ជាការដាស់តឿនមួយដែលថាវិបត្តិបំណុលរបស់ក្រុមហ៊ុនអចលនទ្រព្យមិនទាន់ចប់នោះទេ៕ ប្រភព៖vnexpress

កម្មវិធី ChatGPT និង Bard គឺជាកម្មវិធីទំនើបមួយដែលធ្វើឱ្យយើងដឹងថា បច្ចេកវិទ្យា AI មានសមត្ថភាពកម្រិតណា ។ ទោះយ៉ាងណា បច្ចេកវិទ្យាទាំងឡាយអាចត្រូវគេយកទៅប្រើប្រាស់ក្នុងផ្លូវមិនល្អ ហើយបច្ចេកវិទ្យា AI ក៏ដូចគ្នាដែរ ។

ក្រុមហ៊ុនផ្នែកការពារសន្តិសុខអ៊ីនធើរណេត Home Security Heroes បានផ្សព្វផ្សាយលទ្ធផលនៃការសិក្សាមួយទាក់ទងនឹងការប្រើប្រាស់បច្ចេកវិទ្យា AI ដើម្បីស្វែងរកពាក្យសម្ងាត់ តាមរយៈឧបករណ៍ថ្មីមួយឈ្មោះថា PassGAN (password generative adversarial network) ដោយគេប្រើប្រាស់ AI ជាអ្នកស្វែងរក ។

អ្នកស្រាវជ្រាវបានប្រើប្រាស់ PassGAN ដើម្បីស្វែងរកពាក្យសម្ងាត់ជាង១៥លាន ហើយលទ្ធផលឃើញថា លេខសម្ងាត់ទូទៅជាង៥១% គឺគេអាចរកឃើញដោយប្រើពេលមិនដល់១នាទី ហើយ៦៥% គេបានប្រើពេលក្រោម១ម៉ោង ខណៈ៧១% គេប្រើពេលស្វែងរកតិចជាង១ថ្ងៃ និង៨១%ទៀត គេប្រើពេលស្វែងរកពាក្យសម្ងាត់រយៈពេលក្រោម១ខែ ។

តាមទិន្នន័យឱ្យដឹងថា សម្រាប់លេខសម្ងាត់តិចជាង៦តួអក្សរ គឺគេអាចស្វែងរកឃើញយ៉ាងឆាប់រហ័ស ប៉ុន្តែបើលេខសម្ងាត់នោះមាន១៨តួអក្សរ ហើយក្នុងនោះមានអក្សរធំផង និងអក្សរតូចផងលាយឡំគ្នា គឺគេប្រើពេលយូរណាស់ក្នុងការស្វែងរកលេខសម្ងាត់ ។

នៅថ្ងៃអនាគត គេនឹងប្រើប្រាស់បច្ចេកវិទ្យានេះកាន់តែច្រើនដើម្បីស្វែងរកលេខសម្ងាត់របស់អ្នកណាម្នាក់ បើទោះជាវាពិបាកបន្តិចក្តី ។ ដូច្នេះ យើងគួរតែដាក់លេខសម្ងាត់ណាឱ្យមានភាពស្មុគស្មាញដើម្បីឱ្យបច្ចេកវិទ្យា AI ពិបាកស្វែងរក ៕ ប្រភព ៖ Beartai

រដ្ឋធានីប្រេស៊ីលៀ (Brasília)៖ ការលុកលុយរបស់ក្រុងមូស្គូ ទៅលើប្រទេសអ៊ុយក្រែន បានបង្កឲ្យមានការខឹងសម្បា ពីបណ្ដាប្រទេសលោកខាងលិច និង សម្ពន្ធមិត្ត ហើយចោមរោមគ្នាហ៊ុមព័ទ្ធសេដ្ឋកិច្ច ប្រឆាំងនឹងរុស្ស៊ី ខណៈទំនាក់ទំនងសេដ្ឋកិច្ចទ្វេភាគី ជាមួយនឹងប្រទេសប្រេស៊ីល មានទំហំទឹកប្រាក់ រហូតដល់៩,៨ពាន់លានដុល្លារ ហើយប្រធានាធិបតី នៃប្រទេសអាមេរិកខាងត្បូងមួយនេះ បានថ្កោលទោស ចំពោះកិច្ចខិតខំប្រឹងប្រែងរបស់ក្រុមមហាអំណាចបស្ចិមលោក ផ្គត់ផ្គង់គ្រឿងសព្វាវុធ ទៅជួយដល់ក្រុងកៀវ។សារព័ត៌មាន The Peninsula Qatar បានចេញផ្សាយ កាលពីថ្ងៃចន្ទ ទី១៧ ខែមេសា ឆ្នាំ២០២៣ ថា លោក ស៊ើរហ្គេ ឡាវរ៉ូវ (Sergey Lavrov) រដ្ឋមន្ត្រីក្រសួងការបរទេសរុស្ស៊ី បានធ្វើដំណើរទៅជួបប្រធានាធិបតីប្រេស៊ីល លោក លូអ៊ីស អ៊ីណាស្យូ លូឡា ដា ស៊ីលវ៉ា (Luiz Inacio Lula da Silva) ដោយចង់បង្ហាញ អំពីគោលជំហររបស់ក្រុងមូស្គូ លើការលុកលុយរបស់អ៊ុយក្រែន។ សកម្មភាពរបស់ក្រុងមូស្គូ បាននាំឲ្យមានការខឹងសម្បា ពីសហរដ្ឋអាមេរិក និង បណ្ដាប្រទេសលោកខាងលិចផ្សេងៗទៀត។

លោក ស៊ើរហ្គេ ឡាវរ៉ូវ ប្រមុខការទូតរុស្ស៊ី បានអញ្ជើញទៅដល់រដ្ឋធានីប្រេស៊ីលៀ កាលពីថ្ងៃចន្ទ ជាទីដែលគាត់ នឹងត្រូវពិភាក្សា លើបញ្ហាជាច្រើន ជាមួយនឹងរដ្ឋបាលរបស់លោកប្រធានាធិបតី លូឡា (Lula) លើបញ្ហាពាណិជ្ជកម្ម និង សង្គ្រាមរបស់ក្រុងមូស្គូ នៅលើទឹកដីរបស់អ៊ុយក្រែន។ ជាមួយគ្នានេះ មេដឹកនាំប្រេស៊ីល ចង់ជំរុញឲ្យមានការចរចាសន្ដិភាព នៅអ៊ុយក្រែន

ប្រមុខការទូតរុស្ស៊ី រូបនេះ បានបញ្ជាក់ ក្រោយកិច្ចប្រជុំ ជាមួយនឹងសមភាគីប្រេស៊ីល លោក មោរូ វីយេរ៉ា (Mauro Vieira) ថា «យើងសូមថ្លែងអំណរគុណ ចំពោះមិត្តប្រេស៊ីលរបស់យើង សម្រាប់ការឈ្វេងយល់យ៉ាងច្បាស់លាស់របស់ពួកគេ អំពីបុព្វហេតុ សម្រាប់ស្ថានភាព នៅអ៊ុយក្រែន។ យើងសូមអរគុណ ចំពោះបំណងប្រាថ្នារបស់ពួកគេ នៅក្នុងការចូលរួមចំណែក ស្វែងរកមធ្យោបាយ ដោះស្រាយស្ថានការណ៍នេះ»។

ដោយឡែក បណ្ដាប្រទេសលោកខាងលិច កាលពីប៉ុន្មានសប្តាហ៍កន្លងទៅថ្មីៗនេះ បានខឹងសម្បាយ៉ាងខ្លាំង ចំពោះលោក លូឡា ប្រធានាធិបតីប្រេស៊ីល ជុំវិញការលើកឡើង ថា ភាគីជាច្រើន មានកំហុសឆ្គង ចំពោះសង្រ្គាម នៅអ៊ុយក្រែន ហើយថា សហរដ្ឋអាមេរិក បានលើកទឹកចិត្ត ជំរុញឲ្យមានការបន្ដសង្រ្គាម តាមរយៈការបញ្ជូនគ្រឿងសព្វាវុធ ទៅជួយដល់រដ្ឋបាលរបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy)។

លោក ចន ឃើរប៊ី (John Kirby) អ្នកនាំពាក្យ សន្ដិសុខជាតិសេតវិមាន កាលពីថ្ងៃចន្ទ បានហៅការធ្វើអត្ថាធិប្បាយរបស់លោក លូឡា ប្រធានាធិបតីប្រេស៊ីល ថា ជាការយល់ខុស ខណៈនៅក្នុងរដ្ឋធានីប្រេស៊ីលៀ មានក្រុមបាតុករមួយក្រុម បានកាន់បដា បរិហារអំពីដំណើរទស្សនកិច្ចរបស់លោកប្រមុខការទូត ឡាវរ៉ូវ និង ការឈ្លានពានរបស់រុស្ស៊ី នៅក្នុងប្រទេសអ៊ុយក្រែន។

ក្រុមសេដ្ឋវិទូមួយចំនួន បានយល់ឃើញ ថា ការហ៊ុមព័ទ្ធសេដ្ឋកិច្ចរបស់រុស្ស៊ី ឲ្យស្ថិតនៅភាពឯកោ ក្រោមគំនាបទណ្ឌកម្មរបស់លោកខាងលិចននោះ នឹងក្លាយជាឱកាសដ៏សំខាន់ ធ្វើឲ្យទំនាក់ទំនងសេដ្ឋកិច្ច កាន់តែប្រសើរឡើង សម្រាប់ប្រេស៊ីល។ ប្រទេសប្រេស៊ីល មានទំនាក់ទំនងពាណិជ្ជកម្មទ្វេភាគី ជាមួយនឹងរុស្ស៊ី មានទំហំ៩,៨ពាន់លានដុល្លារ នៅក្នុងឆ្នាំ២០២២៕

ការលក់កាំភ្លើងជ័របាញ់ទឹកនៅក្នុងប្រទេសថៃកំពុងមានការកើនឡើងយ៉ាងខ្លាំងនារដូវកាលចូលឆ្នាំ បន្ទាប់ពីប្រទេសនេះខកខានប្រារព្ធកម្មវិធីសង្រ្កាន្តរយៈពេល៣ឆ្នាំដោយសារជំងឺកូវីត១៩។ បន្ថែមពីលើនេះអាជ្ញាធរទេសចរណ៍នៃប្រទេសថៃរំពឹងថាថ្ងៃឈប់សម្រាកនេះនឹងអាចទទួលបានប្រាក់ចំណូលចំនួន ១៣.៥ ពាន់លានបាតពីវិស័យទេសចរណ៍ក្នុងស្រុក។ នេះបើយោងតាមការចុះផ្សាយរបស់សារព័ត៌មាន The Nation Thailand ថ្ងៃទី១១ ខែមេសា នេះ។

តាមប្រភពដដែលបានឱ្យដឹងទៀតថា ប្រជាជនក្នុងស្រុក និងអ្នកទេសចររាប់លាននាក់ត្រូវបានគេរំពឹងថានឹងប្រារព្ធពិធីចូលឆ្នាំប្រពៃណីថៃដោយការបាញ់ទឹកដាក់គ្នាទៅវិញទៅមកដើម្បីត្រជាក់ក្នុងអំឡុងខែក្តៅក្នុងឆ្នាំនេះ ដោយពិធីបុណ្យសង្ក្រាន្តមានរយៈពេល៥ថ្ងៃចាប់ផ្តើមនៅថ្ងៃព្រហស្បតិ៍ និងបញ្ចប់នៅថ្ងៃចន្ទ ខែមេសា។ នេះក៏នឹងជាឆ្នាំដំបូងចាប់តាំងពីមានជំងឺរាតត្បាត ដែលប្រទេសថៃប្រារព្ធ ពិធីបុណ្យចូលឆ្នាំថ្មីប្រពៃណីដោយគ្មានការរឹតត្បិត ខណៈដែលស្ថានភាពជំងឺកូវីដបានល្អប្រសើរមនុស្សបានវិលត្រឡប់មករកជីវិតធម្មតាវិញបន្តិចម្តងៗ។

កាសែត The Nation បានលើកឡើងទៀតថាតាមការស្រង់មតិពីអាជីវកករ ក្នុងសង្កាត់ Wiset Chai Chan នៃខេត្ត Ang Thong ចម្ងាយ ១០០គីឡូម៉ែត្រភាគខាងជើងនៃទីក្រុងបាងកក បានរកឃើញថា អាជីវករជាច្រើនបានស្តុកទុកនូវកាំភ្លើងជ័របាញ់ទឹក ធុងទឹក និងចានគោមជាច្រើន ដោយមានអតិថិជនជាច្រើនកំពុងសាកសួរទិញកាំភ្លើងជ័រ ដោយតម្លៃកាំភ្លើងនេះមានតម្លៃចាប់ពី ៥៩ បាតឡើងទៅអាស្រ័យលើទំហំ និងលក្ខណៈពិសេសរបស់វា។ ចំណែកឯសម្ភារៈមួយចំនួនសម្រាប់ត្រៀមទទួលទេវតាឆ្នាំថ្មីការលក់ដាច់ខ្លាំងផងដែរ។

គួរបញ្ជាក់ថា អាជ្ញាធរទេសចរណ៍នៃប្រទេសថៃរំពឹងថានឹងអាចទទួលបានប្រាក់ចំណូលចំនួន ១៣.៥ពាន់លានបាតពីវិស័យទេសចរណ៍ក្នុងស្រុកក្នុងអំឡុងពេលថ្ងៃឈប់សម្រាក Songkran ឆ្នាំនេះ ដែលអាចកើនឡើង ២២% ពីឆ្នាំមុនដែលរកចំណូលបាន ១១ ពាន់លានបាតកាលពីឆ្នាំ២០១៩។ ទីភ្នាក់ងារទេសចរណ៍បានប៉ាន់ប្រមាណថា ប្រជាជនថៃនឹងដើរកម្សាន្តរហូតដល់ ៣.៨ លាននាក់ទៅកាន់កន្លែងទាក់ទាញក្នុងស្រុកក្នុងពិធីបុណ្យសង្ក្រាន្តនេះ កើនឡើង ១៤% ពីចំនួន ៣.៣៤ លាននាក់កាលពីឆ្នាំមុន៕