តាមទ័ន្នន័យពីក្រសួងទេសចរណ៍បានឱ្យដឹងថារយៈពេល៣ថ្ងៃចាប់ពីថ្ងៃទី១៤-១៦ ខែមេសា នៃពិធីបុណ្យចូលឆ្នាំថ្មីប្រពៃណីជាតិ កម្ពុជាទទួលបានទេសចរសរុបជាង ១៣លាននាក់ ក្នុងនោះទេសចរអន្តរជាតិមានចំនួន ៥៥.៦៩១ នាក់ និងទេសចរជាតិ ១៣.១៣២.០៨០ នាក់។ តាមរបាយការណ៍បានឱ្យដឹងទៀតថា ចំនួនភ្ញៀវទេសចរជាង ក្នុងរយៈពេល៣ថ្ងៃនេះ គឺជាចំនួនមួយដ៏ច្រើនលើសលុបលើសពីការរំពឹងទុក និងច្រើនជាងពេលមុនវិបត្តិជំងឺកូវីដ-១៩ទៅទៀត។
ក្នុងនោះដែរ តួលេខប្រចាំថ្ងៃទី១៤ មានចំនួន ២.០៩៨.៥០១ នាក់។ ថ្ងៃទី១៥ មានចំនួន ៤.២៣៧.៧៨០ នាក់ និងថ្ងៃទី១៦ មានចំនួន ៦.៨៥១.៤៩០ នាក់។
គោលដៅទេសចរណ៍សំខាន់ៗរយៈពេល០៣ថ្ងៃនេះ ខេត្តសៀមរាបស្រូបភ្ញៀវទេសបានច្រើនជាងគេក្នុងចំណោមឯខេត្តឯទៀតដែលមានចំនួន ២.១២០.៣៧៣ នាក់ និងលេខ២បានទៅលើខេត្តបាត់ដំបងមានចំនួន ១.៥០០.១៦៨ នាក់ ខណៈរាជធានីភ្នំពេញឈរនៅលេខរៀងទី៤បន្ទាប់ពីខេត្តកំពង់ចាម ដែលមានទេសចរចំនួន១.០៨០.៥០៩ នាក់។
ក្រសួងទេសចរណ៍បានឱ្យដឹងទៀតថា ចំនួនភ្ញៀវទាំងជាង ១៣លាននាក់នេះ គឺរដ្ឋបាលរាជធានី ខេត្ត រាប់បញ្ចូលចំនួនភ្ញៀវទេសចរដែលធ្វើដំណើរកម្សាន្តនៅតាមរមណីយដ្ឋាន និងគោលដៅទេសចរណ៍ទូទាំងប្រទេស ចំនួនបងប្អូនប្រជាជនដែលបានចូលរួមលេងកម្សាន្តនៅតាមទីតាំងដែលមានការរៀបចំកម្មវិធីសង្រ្កាន្ត ព្រមជាមួយបងប្អូនប្រជាពលរដ្ឋដែលលេងកម្សាន្តនៅតាមភូមិស្រុក និងកន្លែងជួបជុំនានា៕
