ប្រទេសថៃ ៖ អ្នកបើកបររថយន្តតាក់ស៊ីថៃម្នាក់បានលក់មុខមាត់ប្រទេសជាខ្លាំង ខណៈមាននារីទេសចរបរទេសម្នាក់បាន live ពេលនាងមកកម្សាន្តនៅប្រទេសថៃក្នុងពេលចូលឆ្នាំ ។ បញ្ហា គឺអ្នកបើកបររថយន្តតាក់ស៊ីរូបនេះមិនព្រមចុច meter សោះ បើទោះជានាងស្នើឱ្យចុច meter ក្តី ប៉ុន្តែអ្នកបើកបរលើកហេតុផលនេះ ហេតុផលនោះរហូត ហើយនៅទីបំផុត គេបានទារប្រាក់ជិះតាក់ស៊ីពីនាងរហូតដល់៧០០បាត ។

កាលពីថ្ងៃទី១៥ ខែមេសា កន្លងមក ទំព័រហ្វេសប៊ុករបស់ប្រទេសថៃមួយបានបង្ហោះវីដេអូឃ្លីប ព្រមទាំងសរសេរថា បុគ្គលិករបស់ខ្លួនបានជួបហេតុការណ៍នេះ និងផ្តល់ដំណឹងមក ។ ទំព័រហ្វេសប៊ុកថៃនេះលើកឡើងថា នៅពេលចូលឆ្នាំថៃ តើជាពេលដែលបងៗអ្នកបើកតាក់ស៊ីខ្លះខំកើបប្រាក់ឬយ៉ាងណា ?

ទំព័រហ្វេសប៊ុកនេះសរសេរថា មាននារីទេសចរបរទេសម្នាក់បាន live នៅពេលនាងមកលេងប្រទេសថៃក្នុងថ្ងៃចូលឆ្នាំថ្មី ហើយនាងបានឡើងជិះរថយន្តតាក់ស៊ីមួយ ដែលបើកចេញពីខាងមុខ SO/ Bangkok តំបន់សាថន ទៅកាន់ Asiatique ។ នាងនិយាយថា ចម្ងាយផ្លូវធ្វើដំណើរ មិនគួរលើសពី១០គីឡូម៉ែត្រទេ ហើយអ្នកបើកតាក់ស៊ីបានទារប្រាក់ពីនាងដល់៧០០បាត គឺស្មើជិត១០ដង បើធៀបនឹងតម្លៃការចុច meter ក្នុងរថយន្តតាក់ស៊ី ។

ក្នុងវីដេអូនេះ គេឃើញថា នារីទេសចររូបនេះព្យាយាមប្រាប់ទៅកាន់អ្នកបើកតាក់ស៊ីឱ្យចុច meter ប៉ុន្តែអ្នកបើកតាក់ស៊ីមិនព្រមចុចសោះ ដោយនិយាយថា ស្ទះចរាចរណ៍ហើយផ្លូវឆ្ងាយទៀត ។ ការ live របស់នាងនៅពេលនោះ គឺមានអ្នកទស្សនាជាជនបរទេសរាប់ពាន់នាក់ ហើយវាបានធ្វើឱ្យប្រទេសថៃល្បីល្បាញផងដែរខាងកោភ្ញៀវបរទេស ។

ក្រោយពីវីដេអូឃ្លីបនេះបានផ្សព្វផ្សាយ មានអ្នកលេងបណ្តាញសង្គមថៃ និងបរទេសជាច្រើននាក់ចូលមកបញ្ចេញយោបល់ ព្រមទាំងចែកចាយវីដេអូនេះតៗគ្នា ដោយសារពួកគេមិនពេញចិត្តនឹងសេវាកម្មតាក់ស៊ីនៅប្រទេសថៃ ជាពិសេស រឿងតាក់ស៊ីទារប្រាក់ពីអ្នកដំណើរច្រើនជ្រុល ហើយមិនលើកលែង សូម្បីតែជនជាតិថៃដូចគ្នា ក៏ត្រូវបានពួកតាក់ស៊ីទាំងនេះទារប្រាក់ច្រើនដែរ ។ ពលរដ្ឋថៃបានសំណូមពរឱ្យច្បាប់ដាក់ទោសឱ្យច្រើនជាងនេះ ព្រោះខ្លាចខូចកេរ្តិ៍ឈ្មោះ និងមុខមាត់ប្រទេសជាតិ ៕ ប្រភព ៖ Sanook News

ប្រទេសឥណ្ឌូណេស៊ី ៖ ផ្លូវរថភ្លើងល្បឿនលឿនរបស់ឥណ្ឌូណេស៊ីដែលបានអភិវឌ្ឍន៍បច្ចេកវិទ្យាពីប្រទេសចិន បានត្រៀមខ្លួនផ្តល់សេវាកម្មនៅខែសីហា ឆ្នាំ២០២៣នេះ ។ លោក Luhut Binsar Pandjaitan រដ្ឋមន្ត្រីសម្របសម្រួលកិច្ចការសមុទ្រឥណ្ឌូណេស៊ី បានថ្លែងថា ផ្លូវរថភ្លើងល្បឿនលឿនចេញពីក្រុង Karta ទៅកាន់ក្រុង Bandung ដែលមានចម្ងាយផ្លូវ១៤០គីឡូម៉ែត្រ នឹងអាចផ្តល់សេវាកម្មដល់ពលរដ្ឋក្នុងថ្ងៃបុណ្យជាតិឥណ្ឌូណេស៊ី គឺនៅថ្ងៃទី១៨ ខែសីហា ។

គេចាត់ទុកថា ការផ្តល់សេវាកម្មរថភ្លើងល្បឿនលឿន គឺជាការផ្តល់អំណោយមួយដល់ពលរដ្ឋសម្រាប់ខួបលើកទី៧៨ឆ្នាំ ដែលប្រទេសឥណ្ឌូណេស៊ីទទួលបានឯករាជ្យ ហើយគេនឹងសាកល្បងដំណើរការរថភ្លើងល្បឿនលឿននេះនៅខែឧសភា ឆ្នាំ២០២៣ ។ ការប្រើប្រាស់រថភ្លើងល្បឿនលឿននឹងអាចជួយកាត់បន្ថយពេលវេលាធ្វើដំណើររវាងទីក្រុងទាំងពីរឱ្យសល់ត្រឹមតែ៤០នាទីប៉ុណ្ណោះ ខណៈកាលពីមុន ការធ្វើដំណើរចំណាយពេលដល់៣ម៉ោងឯណោះ ។

គម្រោងផ្លូវរថភ្លើងល្បឿនលឿននេះ គឺក្រុមហ៊ុន PT Kereta Cepat Indonesia China ជាក្រុមហ៊ុនម៉ៅការសំខាន់ ហើយបានដាក់ផែនការលើកដំបូងថា គម្រោងនឹងរួចរាល់នៅឆ្នាំ២០១៩ ប៉ុន្តែគម្រោងនេះត្រូវប្រឈមនឹងការយឺតយ៉ាវជាច្រើនលើក និងមានបញ្ហាការចំណាយដើមទុនទៀតផង ។

ទោះយ៉ាងណា ការចំណាយដើមទុននេះ គឺតិចជាងផែនការដែលបានដាក់លើកដំបូង ខណៈប្រទេសឥណ្ឌូណេស៊ី និងចិន បានទូទាត់ប្រាក់លើសចំនួន១.២០០លានដុល្លារអាមេរិក ប៉ុន្តែរដ្ឋាភិបាលចិនក៏បានទទូចឱ្យរក្សាអត្រាការប្រាក់កម្ចីសម្រាប់គម្រោងនេះស្មើ៣,៤% បើទោះជាឥណ្ឌូណេស៊ីស្នើសុំឱ្យបន្ថយមកត្រឹមតែ២% ។ ទោះយ៉ាងណា រដ្ឋាភិបាលឥណ្ឌូណេស៊ីជឿជាក់ថា នឹងអាចសងប្រាក់កម្ចីបាននៅពេលសេដ្ឋកិច្ចឥណ្ឌូណេស៊ីល្អប្រសើរឡើង និងប្រាក់ចំណូលពន្ធកើនឡើងផងដែរ ៕ ប្រភព ៖ AEC connect

ប្រទេសថៃ៖ យោងតាមស្ថិតិក្នុងឱកាសបុណ្យសង្ក្រាន្តក្នុងប្រទេសថៃ មានគ្រោះថ្នាក់ចរាចរណ៍ជាង ២.០០០ លើក មនុស្សជាង ២.០០០ នាក់បានរងរបួស និងស្លាប់ ២៣៦ នាក់ រួមទាំងភ្ញៀវទេសចរ និងប្រជាជនក្នុងស្រុកផងដែរ។ ទីក្រុងបាងកកជាកន្លែងដែលមានអ្នកស្លាប់និងរបួសច្រើនជាងគេក្នុងប្រទេស។ ខេត្តដែលមានគ្រោះថ្នាក់ចរាចរណ៍ច្រើនជាងគេគឺខេត្ត Kanchanaburi និងខេត្ត Chumphon មានអ្នករបួសច្រើនជាងគេ។
ចំនួនអ្នករងរបួសកើនឡើង១៨% ចំនួនគ្រោះថ្នាក់កើនឡើង១៦% បើធៀបនឹងឆ្នាំមុន។ ទោះយ៉ាងណាក៏ដោយចំនួនអ្នកស្លាប់បានថយចុះ ៤.៤៥% ។ ចំនួនអ្នកស្លាប់ក្នុងឱកាសនេះក្នុងឆ្នាំ ២០១៩ មានចំនួន ៣៨៦ នាក់ និងគ្រោះថ្នាក់ចរាចរណ៍ជាង ៣,៣០០ នាក់។

នេះជាឱកាសមួយដែលមានគ្រោះថ្នាក់ចរាចរណ៍ច្រើនជាងគេក្នុងប្រទេស ព្រោះប្រជាពលរដ្ឋ ភ្ញៀវទេសចរណ៍ស្រវឹងហើយបើកបរនាំឱ្យមានឧបទ្ទវហេតុកើតឡើង។ ប្រព័ន្ធផ្សព្វផ្សាយក៏បានហៅប្រទេសថៃក្នុងឱកាសបុណ្យសង្ក្រាន្តថាជា “កន្លែងគ្រោះថ្នាក់បំផុតនៅលើផែនដីក្នុងការបើកបរ”។
អាជ្ញាធរបានបង្កើតប៉ុស្តិ៍ត្រួតពិនិត្យជិត១.៩០០កន្លែង និងមានមនុស្សជាង៥៤.០០០នាក់ដែលបំពេញភារកិច្ចសម្របសម្រួលចរាចរណ៍ ដើម្បីទប់ស្កាត់គ្រោះថ្នាក់ ។ យានយន្តជាង ៣២២.០០០ គ្រឿងត្រូវបានដោះស្រាយ និង៤៨.០០០ ករណីទៀតត្រូវបានកាត់ទោស។ មនុស្សជាង ១៤.១០០នាក់ ត្រូវបានផាកពិន័យ ដោយសារមិនមានប័ណ្ណបើកបរ និងមនុស្សជាង ១៣.០០០នាក់ មិនបានពាក់មួកសុវត្ថិភាព។

គួរបញ្ជាក់ផងដែរថា៖ ពិធីបុណ្យឆ្នាំនេះបានជួយប្រទេសថៃទាក់ទាញភ្ញៀវអន្តរជាតិជាង ៣០០,០០០ នាក់ និងរកចំណូលបានជាង ១៨ ពាន់លានបាត (ជិត ៥៣៧ លានដុល្លារ) នេះបើយោងតាមអាជ្ញាធរទេសចរណ៍ថៃ (TAT) ។ ចំនួននេះបានកើនឡើង ៥២៥% ធៀបនឹងរយៈពេលដូចគ្នាកាលពីឆ្នាំមុន ស្មើនឹង ៥៨% បើប្រៀបធៀបទៅនឹងមុនការរាតត្បាត ដែលមានអ្នកមកដល់អន្តរជាតិជិត ៦០០,០០០ នាក់។ ឆ្នាំនេះ ប្រទេសថៃត្រូវបានគេរំពឹងថានឹងទទួលភ្ញៀវអន្តរជាតិចំនួន ២៥ លាននាក់ កើនឡើងជាង ៦០% បើធៀបនឹងឆ្នាំ ២០១៩៕
ប្រភព៖vnexpress

ប្រទេសអាល្លឺម៉ង់ ៖ កាលពីថ្ងៃទី១៦ ខែមេសា ប្រធានាធិបតីឥណ្ឌូណេស៊ី លោក Joko Widodo បានសហការជាមួយនាយករដ្ឋមន្ត្រីអាល្លឺម៉ង់ លោក Olaf Scholz បើកការតាំងពិព័រណ៍ពាណិជ្ជកម្មឈ្មោះថា «Hannover» លើកទី៧៥ ។ ការតាំងពិព័រណ៍នេះ គឺជាការតាំងពិព័រណ៍ដ៏ធំបំផុតក្នុងពិភពលោក ហើយប្រទេសទាំងពីរបានយកឱកាសនេះប្រកាសពង្រីកកិច្ចសហការផ្នែកសេដ្ឋកិច្ចរួមគ្នានាថ្ងៃអនាគត ។

នាយករដ្ឋមន្ត្រីអាល្លឺម៉ង់ លោក Olaf Scholz បានថ្លែងថា ពេលតំបន់អាស៊ានបានដើរតួនាទីសំខាន់នៅលើពិភពលោក ប្រទេសឥណ្ឌូណេស៊ីក៏បានដើរតួនាទីសំខាន់នៅលើពិភពលោកកាន់តែខ្លាំង ។ ប្រទេសអាល្លឺម៉ង់មានគោលដៅផ្តល់ជំនួយដល់ក្រុមប្រទេសមានរ៉ែសំខាន់ៗដូចជា Chile, Namibia ក្នុងនោះរួមទាំងឥណ្ឌូណេស៊ីផងដែរ ដើម្បីជួយឱ្យប្រទេសទាំងនេះមានហេដ្ឋារចនាសម្ព័ន្ធល្អប្រសើរ ហើយពុំចាំបាច់ទទួលជំនួយពីប្រទេសចិន ។

មេដឹកនាំអាល្លឺម៉ង់ គឺជាមេដឹកនាំម្នាក់ក្នុងចំណោមមេដឹកនាំដែលគាំទ្រកិច្ចព្រមព្រៀងពាណិជ្ជកម្មសេរីរវាងសហភាពអឺរ៉ុប និងឥណ្ឌូណេស៊ី ។ ប្រទេសអាល្លឺម៉ង់ និងឥណ្ឌូណេស៊ីបានចរចារឿងនេះជាមួយគ្នាតាំងពីឆ្នាំ២០១៦ មកម៉្លេះ ។ ហេតុនេះ មេដឹកនាំអាល្លឺម៉ង់បានសន្យាថា កិច្ចព្រមព្រៀងនេះនឹងទទួលបានជោគជ័យ ។

ការពិព័រណ៍ពាណិជ្ជកម្ម «Hannover» ប្រចាំឆ្នាំ២០២៣ បានរៀបចំឡើងនៅក្រោមគំនិត «ការផ្លាស់ប្តូរផ្នែកឧស្សាហកម្ម និងបង្កើតភាពខុសប្លែកគ្នា» ដោយមានក្រុមហ៊ុនវិស្វកម្ម, ឧស្សាហកម្មអគ្គិសនី និងឌីជីថល រួមទាំងឧស្សាហកម្មថាមពលប្រមាណ៤.០០០ក្រុមហ៊ុនបានមកចូលរួមការតាំងបង្ហាញនូវបច្ចេកវិទ្យាថ្មីៗ ។ ចំណែកប្រធានបទសំខាន់ៗក្នុងឆ្នាំ២០២៣នេះ រួមមាន កាត់បន្ថយការបញ្ចេញកាបូន, សុវត្ថិភាពបច្ចេកវិទ្យា, បញ្ញាសិប្បនិម្មិត និងកម្មវិធីសិក្សាដោយខ្លួនឯង ៕ ប្រភព ៖ TNN World

សហរដ្ឋអាមេរិក ៖ គណនី Twitter ជាផ្លូវការរបស់ការិយាល័យស៊ើបអង្កេតកណ្តាលអាមេរិក (FBI) នៅទីក្រុង Denver បានជូនដំណឹងទៅកាន់ពលរដ្ឋទាំងអស់ ចៀសវាងការប្រើប្រាស់កន្លែងសាកថ្មីហ្វ្រីនៅតាមទីកន្លែងសាធារណៈ ព្រោះអាចមានជនខិលខូចឆ្លៀតឱកាសនេះបញ្ចេញមេរោគផ្សេងៗ ឬដំឡើងកម្មវិធីចូលក្នុងទូរស័ព្ទដៃ ។ ពួកគេអាចចូលទៅកាន់ទូរស័ព្ទនានាដែលកំពុងសាកថ្ម មិនថាទូរស័ព្ទស្មាតហ្វូន ថេបប្លេត និងកុំព្យូទ័រ ។

ការដាស់តឿនរបស់ការិយាល័យស៊ើបអង្កេតកណ្តាល ដោយសារខ្លាចមានជនខិលខូចបង្កើតការប្រើប្រាស់រន្ធ USB នៅកន្លែងសាធារណៈដើម្បីបញ្ចេញមេរោគ និងដំឡើងកម្មវិធីទៅក្នុងឧបករណ៍ប្រើប្រាស់ផ្សេងៗ ។ ដូច្នេះ ការិយាល័យស៊ើបអង្កេតកណ្តាលបានដាស់តឿនថា ដើម្បីសុវត្ថិភាព អ្នកប្រើប្រាស់ឧបករណ៍ទាំងអស់គួរតែយកខ្សែ USB ដាក់តាមខ្លួន និងដោតវាជាមួយឌុយភ្លើង ជាជាងដោតវាចូលទៅក្នុងរន្ធ USB នៅតាមកន្លែងសាកថ្មសាធារណៈដូចជា ព្រលានយន្តហោះ សណ្ឋាគារ ឬហាងលក់ទំនិញនានា ។

ក្រៅពីការិយាល័យស៊ើបអង្កេតកណ្តាលបានជូនដំណឹងពីការសាកថ្មរបស់ឧបករណ៍ក្នុងបញ្ជី Twitter ហើយ នៅក្នុងវែបសាយរបស់ការិយាល័យនេះ ក៏បានណែនាំស្រដៀងគ្នាផងដែរ ក្នុងគោលបំណងហាមឃាត់អ្នកប្រើប្រាស់សាកថ្មទូរស័ព្ទហ្វ្រីនៅតាមកន្លែងសាធារណៈ ។ ទោះយ៉ាងណា ការជូនដំណឹងរបស់ការិយាល័យស៊ើបអង្កេតកណ្តាល មិនមែនដោយសារមានករណីលួចយកទិន្នន័យ ឬការដោនឡូតកម្មវិធីមេរោគណាមួយទេ ប៉ុន្តែវាគ្រាន់តែជាការណែនាំដើម្បីប្រើប្រាស់ឧបករណ៍ឱ្យមានសុវត្ថិភាពប៉ុណ្ណោះ ។

ការិយាល័យស៊ើបអង្កេតកណ្តាលអាមេរិកធ្លាប់បានដាស់តឿនស្រដៀងគ្នានេះដែរកាលពីឆ្នាំ២០២១ ដោយហៅការលួចយកទិន្នន័យតាមរយៈ USB សាធារណៈថា Juice Jacking មានន័យថា សាកថ្មឧបករណ៍ភ្លាម មេរោគចូលភ្លែត ៕ ប្រភព ៖ beartaiBRIEF