កំពូលតារាចម្រៀង មាស សុខសោភា ចេញសារសូមទោសថ្នាក់ដឹកនាំ និងមហាជនទាំងយប់ ចំពោះចម្រៀងមួយបទមានចំណងជើង «មរណៈភាពព្រះស្វាមី ជ័យវរ្ម័នទី៧» ថានាងគ្មានចេតនាបំភ្លៃប្រវត្តិសាស្រ្តខ្មែរឡើយគ្រាន់តែខ្វះចន្លោះការសិក្សាមួយពេល និងសន្យាមិនឱ្យរឿងនេះកើតឡើងជាថ្មី។
នៅយប់ថ្ងៃទី៤ ខែមិថុនា ឆ្នាំ២០២៣ នៅលើផេកផ្លូវការតារាចម្រៀង មាស សុខសោភា បានរៀបរាប់ថា« នាងខ្ញុំមាស សុខសោភា សូមគោរពសូមទោសសម្តេចពុក ក្រសួងវប្បធម៌ និងវិចិត្រសិល្បៈ ព្រមទាំងបងប្អូនប្រជាជនខ្មែរទាំងក្នុង និងក្រៅប្រទេស ចំពោះកំហុសឆ្គងលើខ្លឹមសារនៃបទចម្រៀង«មរណៈភាពព្រះស្វាមី ជ័យវរ្ម័នទី៧» ដែលបានបង្ហោះក្នុងហ្វេសបុកផេក និងឆាណែលយូធូប របស់នាងខ្ញុំ។ នាងខ្ញុំពិតជាមិនមានចេតនាណាមួយក្នុងការបំភ្លៃប្រវត្តិសាស្រ្តខ្មែរនោះទេ តែដោយសារតែការខ្វះចន្លោះក្នុងការសិក្សាស្វែងយល់អោយបានស៉ីជម្រៅពីប្រវត្តិសាស្រ្តខ្មែរមុននឹងផលិតបទនេះឡើង ទើបធ្វើអោយមានកំហុសឆ្គងកើតមានឡើងដោយអចេតនា»។
តារាចម្រៀងរូបនេះបន្តទៀតថា «នាងខ្ញុំ និងក្រុមការងារសង្ឃឹមថាសម្តេចពុក ក្រសួងពាក់ព័ន្ធនានា ព្រមទាំងបងប្អូនជនរួមជាតិ មេត្តាយោគយល់ និងអធ្យាស្រ័យដល់នាងខ្ញុំ។ មកដល់ពេលនេះ នាងខ្ញុំបានលុបទាំងស្រុងនូវវីដេអូចម្រៀងមួយបទនេះចេញពី ហ្វេសបុកផេក និងឆាណែលយូធូបរបស់នាងខ្ញុំជាស្ថាពរហើយ។នាងខ្ញុំសន្យាថាចាប់ពីថ្ងៃនេះតទៅ នាងខ្ញុំនឹងព្យាយាមសិក្សាស្វែងយល់បន្ថែមទៀតពីប្រវត្តិសាស្រ្តខ្មែរ ព្រមទាំងផលិតបទចម្រៀងដែលលើកស្ទួយវប្បធម៌ អរិយធម៌ខ្មែរ ជាបន្តទៀត ។ សូមគោរពជូនពរសម្តេចពុក និងក្រុមគ្រួសារ មានសុខភាពល្អ បរិបូរ កំលាំងពលាំមាំមួន ដើម្បីបន្តដឹកនាំប្រទេសកម្ពុជា អោយមានភាពរីកចំរើនបន្តទៀត និងសូមជូនពរបងប្អូនជនរួមជាតិទាំងក្នុង និងក្រៅប្រទេសជួបប្រទះតែសេចក្តីសុខចម្រើនកុំបីឃ្លាត។ ដោយក្តីគោរពយ៉ាងខ្ពងខ្ពស់ពីនាងខ្ញុំ មាស សុខសោភា »។
គួរបញ្ជាក់ផងដែរថា តារាចម្រៀងឯករាជ្យរូបនេះ បានទម្លាក់បទខាងលើកាលពីពេលកន្លងថ្មីៗទៅនេះគឺតបតាមការសំណូមពររបស់លោកតាសក់ស ភ្នំត្បែង ហើយក៏ជាស្នាដៃនិពន្ធនៅក្នុងបទចម្រៀង «មរណៈភាពព្រះស្វាមី ជ័យវរ្ម័នទី៧» ផងដែរ។ បន្ទាប់ពីទម្លាក់បទនេះរួចអ្នកលេងបណ្តាញសង្គមជាច្រើនបានប្រតិកម្មបទនេះរួមទាំងរដ្ឋលេខាធិការក្រសួងមហាផ្ទៃ , ក្រសួងវប្បធម៌ និងវិចិត្រសិល្បៈ រួមទាំងរាជរដ្ឋាភិបាលកម្ពុជា ក៏បានស្នើឱ្យតារាចម្រៀងរូបនេះលុបបទនេះចេញផងដែរ៕
.jpg)
