ប្រទេសហ្វីលីពីន ៖ កាលពីថ្ងៃទី២២ ខែមេសា កន្លងមក លោក Qin Kang រដ្ឋមន្ត្រីក្រសួងការបរទេសចិនបានជួបប្រជុំជាមួយប្រធានាធិបតីហ្វីលីពីន លោក Ferdinand Marcos Junior នៅប្រទេសហ្វីលីពីន ។ ប្រទេសទាំងពីរបានព្រមព្រៀងគ្នាជំរុញសម្ព័ន្ធភាពឱ្យកាន់តែស្អិតរមួត និងបង្កើនកិច្ចសហការគ្នាឱ្យកាន់តែខ្លាំងផងដែរ ។

មេដឹកនាំហ្វីលីពីន លោក Marcos Junior បានថ្លែងថា បញ្ហាតៃវ៉ាន់ គឺជាកិច្ចការផ្ទៃក្នុងរបស់ប្រទេសចិន ហើយហ្វីលីពីននឹងបន្តប្រកាន់ខ្ជាប់នូវគោលនយោបាយចិនតែមួយ ដូចដែលហ្វីលីពីនធ្លាប់គាំទ្រចិននាពេលកន្លងមក ។ លោក Marcos Junior បន្តថា ហ្វីលីពីននឹងរក្សានូវឯករាជ្យភាពរបស់ខ្លួនជាយុទ្ធសាស្ត្រ ។

ប្រទេសហ្វីលីពីនចង់បង្កើនទំនាក់ទំនង និងដោះស្រាយបញ្ហាដែនសមុទ្រឱ្យបានត្រឹមត្រូវ ព្រមទាំងការពារមិនឱ្យបំផ្លាញសម្ព័ន្ធភាពរវាងប្រទេសទាំងពីរ ។ លើសពីនេះ ហ្វីលីពីនត្រូវការរក្សាសន្តិភាព និងសន្តិសុខក្នុងតំបន់ផងដែរ ។

ចំណែករដ្ឋមន្ត្រីក្រសួងការបរទេសចិន លោក Qin Kang បានថ្លែងដែរថា ប្រទេសហ្វីលីពីន និងចិនបានរក្សាការផ្លាស់ប្តូរគ្នាយ៉ាងជិតស្និទ្ធ និងមានលទ្ធផលល្អក្នុងកិច្ចសហប្រតិបត្តិការ ។ លោកបន្តថា ការគោរពគ្នាទៅវិញទៅមក ចំណងមិត្តភាព ការរក្សាសន្យា ទំនុកចិត្ត និងកិច្ចសហការរួមគ្នាសម្រាប់ផលប្រយោជន៍ប្រទេសទាំងពីរ គឺអាស្រ័យលើចំណាប់អារម្មណ៍ផលប្រយោជន៍ជាមូលដ្ឋានរបស់ភាគីទាំងពីរ ។ លើសពីនេះ ប្រទេសហ្វីលីពីន និងចិន គួរតែរៀនសូត្រពីបទពិសោធន៍ និងមេរៀនផ្សេងៗក្នុងរយៈពេលកន្លងមក ៕ ប្រភព ៖ TNN World

អង្គការសហប្រជាជាតិបាននិយាយថា ប្រទេសឥណ្ឌានឹងវ៉ាដាច់ប្រទេសចិន ដើម្បីក្លាយជាប្រទេសដែលមានប្រជាជនច្រើនជាងគេនៅលើពិភពលោកនៅចុងសប្តាហ៍នេះ ដោយទិន្នន័យថ្មីបង្ហាញថា ប្រជាជនឥណ្ឌាត្រូវបានគេរំពឹងថានឹងកើនឡើងដល់ជិត ១.៤៣ ពាន់លាននាក់នៅចុងខែមេសា។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី២៤ ខែមេសា ។

នាយកដ្ឋានកិច្ចការសេដ្ឋកិច្ច និងសង្គមរបស់អង្គការសហប្រជាជាតិ ហៅកាត់ (DESA) បាននិយាយនៅក្នុងសេចក្តីថ្លែងការណ៍មួយថា “ឆាប់ៗនេះ ប្រទេសចិននឹងរបូតតំណែងរបស់ខ្លួនជាប្រទេសដែលមានប្រជាជនច្រើនបំផុតនៅលើពិភពលោក” ។ ប្រភពដដែលបានបន្ថែមថា “ដោយសារតែភាពមិនច្បាស់លាស់ដែលទាក់ទងនឹងការធ្វើជំរឿន កាលបរិច្ឆេទជាក់លាក់ដែលឥណ្ឌាមិនបានធ្វើជំរឿន ដូចនេះ ឥណ្ឌា ត្រូវបានគេរំពឹងថានឹងលើសប្រទេសចិនពេលដែលប្រទេសនេះធ្វើជំរឿនបន្ទាប់របស់ខ្លួន»។មូលនិធិប្រជាជនអង្គការសហប្រជាជាតិបាននិយាយកាលពីសប្តាហ៍មុនថា ប្រទេសឥណ្ឌានឹងមានប្រជាជនចំនួន ២.៩ លាននាក់ច្រើនជាងប្រទេសចិននៅពាក់កណ្តាលឆ្នាំ ២០២៣ ។
គួរបញ្ជាក់ថា អត្រាកំណើតរបស់ប្រទេសចិនបានធ្លាក់ចុះនាពេលថ្មីៗនេះ ដោយចំនួនប្រជាជនរបស់ខ្លួនបានធ្លាក់ចុះកាលពីឆ្នាំមុនជាលើកដំបូងចាប់តាំងពីឆ្នាំ ១៩៦១។ ទោះជាយ៉ាងណា បច្ចុប្បន្នអត្រាកំណើតក្នុងប្រទេសឥណ្ឌាកំពុងធ្លាក់ចុះផងដែរ៕

ការិយាល័យបរិស្ថានអឺរ៉ុប (EEA) បានចេញផ្សាយរបាយការណ៍មួយគួរឱ្យភ្ញាក់ផ្អើលថា បរិយាកាសកខ្វក់ជាមូលហេតុធ្វើឱ្យក្មេងៗស្លាប់មុនអាយុ គឺយ៉ាងតិចណាស់ចំនួន១.២០០នាក់ក្នុង១ឆ្នាំ ជាពិសេស នៅតំបន់អឺរ៉ុប ខណៈមានក្មេងរាប់ពាន់នាក់ទៀតត្រូវប្រឈមនឹងបញ្ហាសុខភាពផ្លូវកាយ និងចិត្ត ។ ដូច្នេះ វានឹងប៉ះពាល់ដល់ការរស់នៅរបស់ពួកគេអស់មួយជីវិត ។

អ្នកជំនាញផ្នែកបរិស្ថាន និងសុខភាពរបស់ការិយាល័យបរិស្ថានអឺរ៉ុបនិយាយថា ការបំពុលក្នុងបរិយាកាសមានគ្រោះថ្នាក់ដល់ក្មេងៗច្រើនជាងមនុស្សចាស់ ព្រោះរាងកាយរបស់ក្មេងនឹងទទួលជាតិពុលច្រើនជាង ។ លើសពីនេះ បច្ចុប្បន្ន ក្មេងៗបានទទួលជាតិពុលតាំងពីពួកគេនៅក្នុងផ្ទៃម្តាយមកម៉្លេះ ហើយជាតិពុលនេះបានសន្សំទុករហូតមកនៅពេលពួកគេធំដឹងក្តី ។

របាយការណ៍បញ្ជាក់ថា ក្មេងៗងាយរងគ្រោះដោយសារអាកាសធាតុកខ្វក់ ដោយសារពួកគេអាចស្រូបចូលខ្យល់កខ្វក់ទៅក្នុងខ្លួនច្រើនជាងមនុស្សចាស់ ព្រោះការដកដង្ហើមញាប់ជាងមនុស្សចាស់ ខណៈពួកគេធ្វើកិច្ចការក្រោមកំដៅថ្ងៃច្រើនជាងមនុស្សចាស់ផងដែរ ។ តាមការសិក្សារបស់ការិយាល័យបរិស្ថានអឺរ៉ុបបញ្ជាក់ថា ចំនួនអ្នកស្លាប់នៅតំបន់អឺរ៉ុបដែលមានអាយុក្រោម១៨ឆ្នាំ គឺស្មើ១១ម៉ឺននាក់ក្នុង១ឆ្នាំ ។

ខ្យល់ពុលក្នុងបរិយាកាសអាចធ្វើឱ្យប៉ះពាល់ដល់ការលូតលាស់របស់ក្មេងជារៀងរហូត ។ កន្លងមក មានការស្រាវជ្រាវជាច្រើនបញ្ជាក់ដូចគ្នាថា ខ្យល់ពុលក្នុងបរិយាកាសមានចំណែកធ្វើឱ្យទារកស្លាប់នៅក្នុងផ្ទៃម្តាយ ខណៈអ្នកវិទ្យាសាស្ត្របានពិនិត្យឃើញមានជាតិពុលក្នុងសួត និងខួរក្បាលរបស់ទារកក្នុងផ្ទៃ ។ បើយើងទទួលបានជាតិពុលពីបរិយាកាសច្រើនតាំងពីក្មេងមក វានឹងប៉ះពាល់ដល់សួត ។ ដូច្នេះ ធ្វើឱ្យយើងកើតជំងឺហឺត ជំងឺផ្លូវដង្ហើម ជំងឺក្នុងត្រចៀក និងប៉ះពាល់ដល់ការអភិវឌ្ឍរបស់ខួរក្បាលទៀតផង ។

អ្នកជំនាញបានអំពាវនាវឱ្យសហភាពអឺរ៉ុបចេញវិធានការគ្រប់គ្រងជាតិពុលក្នុងបរិយាកាសតឹងរ៉ឹងជាងមុនដើម្បីការពារពលរដ្ឋ ជាពិសេស ក្មេងៗដែលជាក្រុមងាយរងគ្រោះជាងគេ ។ លើសពីនេះ អ្នកជំនាញបានស្នើឱ្យកាត់បន្ថយប្រភពនៃការបំពុលខ្យល់ដូចជា ការធ្វើចរាចរណ៍នៅតាមផ្លូវ ការដុតធ្យូងថ្ម និងឥន្ធនៈរឹង រួមទាំងការបញ្ចេញឧស្ម័នផ្ទះកញ្ចក់ពីផ្នែកឧស្សាហកម្មផងដែរ ។ ក្រៅពីនេះ គួររៀបចំកន្លែងបរិយាកាសស្អាតនៅជុំវិញសាលារៀន និងដាំដើមឈើបន្ថែម ។

ជាមួយគ្នានេះ អ្នកជំនាញបានសំណូមពរឱ្យក្មេងៗដើរទៅសាលារៀនសម្រាប់សាលារៀននៅជិតផ្ទះ ព្រមទាំងរៀបចំសាលារៀន និងកន្លែងថែទាំក្មេងតូចឡើងវិញ ដោយត្រូវកែលម្អឱ្យទីកន្លែងទាំងនេះមានខ្យល់អាកាសចេញ-ចូលល្អ និងមានតម្រងខ្យល់ដើម្បីកាត់បន្ថយការស្រូបជាតិពុលរបស់ក្មេងៗ ៕ ប្រភព ៖ The standard

សហរដ្ឋអាមេរិក ៖ លោក Bill Gates ជាសហស្ថាបនិកក្រុមហ៊ុន Microsoft បានចូលរួមវគ្គជជែកកម្សាន្ត Fireside Chat ពាក់ព័ន្ធនឹង EdTech ឬបច្ចេកវិទ្យាការសិក្សានៅទីក្រុងសាន់ឌីអាហ្គោ រដ្ឋកាលីហ្វ័រញ៉ា សហរដ្ឋអាមេរិក លើកឡើងថា ក្នុងរយៈពេល១៨ខែខាងមុខ កម្មវិធី AI Chatbot (បញ្ញាសិប្បនិម្មិត) នឹងអាចឆ្លើយតបសំណួររបស់មនុស្ស និងជួយបង្ហាត់ការអាន និងសរសេរដល់កូនសិស្សផងដែរ ។

លោក Bill Gates និយាយថា ៖ «បច្ចេកវិទ្យា AI មានសមត្ថភាពជួយដល់កុមារឱ្យហ្វឹកហាត់អាន និងសរសេរ ហើយវានឹងធ្វើជាគ្រូដ៏ល្អម្នាក់ដូចមនុស្សយើងដែរ» ។ លោកបន្តថា បច្ចេកវិទ្យា Chatbot នាពេលបច្ចុប្បន្ននេះមានភាពឆ្លាត និងរហ័សរហួនមិនគួរឱ្យជឿផ្នែកការអាន និងសរសេរ ។ ដូច្នេះ បច្ចេកវិទ្យានេះមានគុណសម្បត្តិអាចបង្រៀនកូនសិស្ស ខណៈបច្ចេកវិទ្យាផ្សេងៗមិនអាចធ្វើបានពីមុន ។ យើងនឹងឃើញថា បច្ចុប្បន្ន អ្នកប្រើប្រាស់កម្មវិធី Chatbot ជាច្រើននាក់បានប្រើប្រាស់ AI ដើម្បីជួយពិនិត្យលើការសរសេររបស់ពួកគេ មិនថាការពិនិត្យអក្ខរាវិរុទ្ធ ឬការណែនាំប្រធានបទយកមកសរសេរ ។

អ្នកសរសេរអត្ថបទបច្ចេកវិទ្យារបស់ New York Times ព្រមទទួលស្គាល់ថា គាត់បានប្រើប្រាស់ ChatGPT ដើម្បីជួយពិនិត្យការសរសេររបស់គាត់ ។ ដូចគ្នានេះ អ្នកស្រាវជ្រាវមួយចំនួនក៏ពេញចិត្តនូវការសរុបខ្លឹមសារអត្ថបទរបស់ AI និងផ្តល់មតិលើការសរសេរ រួមទាំងការសរសេរអត្ថបទកម្រិតខ្ពស់ផងដែរ ។

បើទោះជាមនុស្សភាគច្រើនពេញចិត្តនឹងសមត្ថភាពរបស់វាក្តី ប៉ុន្តែក្រុមអ្នកស្រាវជ្រាវក៏បានដាស់តឿនថា បច្ចេកវិទ្យាថ្មីរបស់ AI មិនទាន់គ្រប់ជ្រុងជ្រោយទេ ហើយវាអាចផ្តល់ទិន្នន័យខុសបាន ។ លោក Bill Gates បញ្ជាក់ថា AI ត្រូវកែលម្អបច្ចេកវិទ្យាការអាន និងអភិវឌ្ឍន៍ភាសាមនុស្សឱ្យកាន់តែប្រសើរឡើង មុននឹងវាក្លាយជាបច្ចេកវិទ្យាល្អឥតខ្ចោះ ។

លោក Bill Gates បន្ថែមថា ក្រៅពីការអាន និងសរសេរហើយ សមត្ថភាពផ្នែកគណិតវិទ្យាក៏ជាជំនាញមួយដែល AI អាចជួយបង្រៀនកូនសិស្សនាថ្ងៃអនាគត ។ ប៉ុន្តែពេលនេះ វាមានកំហុសឆ្គងច្រើន និងកំពុងតែអភិវឌ្ឍ ។ ដូច្នេះ គេអាចត្រូវចំណាយពេលវេលាបន្តិចទៀតដើម្បីអភិវឌ្ឍន៍វាបន្ត ហើយនៅថ្ងៃអនាគត វានឹងក្លាយជាជម្រើសមួយសម្រាប់អ្នកគ្មានលទ្ធភាពជួលគ្រូផ្ទាល់ខ្លួនមកបង្រៀនបាន ខណៈគ្រូទាំងនោះយកថ្លៃឈ្នួលខ្ពស់ ។ AI នឹងក្លាយជាឧបករណ៍សំខាន់មួយក្នុងការកាត់បន្ថយវិសមភាពការសិក្សាផងដែរ ៕ ប្រភព ៖ Techsauce