ប្រទេសកម្ពុជា ៖ សារព័ត៌មានមួយរបស់ប្រទេសថៃបានចុះផ្សាយថា ពិធីបើកការប្រកួតកីឡាស៊ីហ្គេម លើកទី៣២ នៅទីក្រុងភ្នំពេញ ប្រទេសកម្ពុជា មានអ្នកមកចូលរួមទស្សនាយ៉ាងច្រើនកុះករ និងរំលេចឡើងនូវពន្លឺភ្លើងពណ៌ដ៏ស្រស់ស្អាត និងអស្ចារ្យ ។ លើសពីនេះ ប្រទេសកម្ពុជាបានរៀបចំទីលានប្រកួតដ៏ធំទូលាយឱ្យសមនឹងការរង់ចាំធ្វើជាម្ចាស់ផ្ទះប្រកួតកីឡាស៊ីហ្គេមអស់រយៈពេលជាច្រើនឆ្នាំផងដែរ ។

ទោះយ៉ាងណា សារព័ត៌មានថៃចុះផ្សាយទៀតថា មានឪពុកម្តាយខ្លះបណ្តោយឱ្យកូនរបស់ខ្លួនលេងទឹកយ៉ាងសប្បាយរីករាយនៅបរិវេណខាងមុខពហុកីឡដ្ឋានមរតកតេជោ ក្នុងអំឡុងពេលពួកគេមកទស្សនាពិធីបើកការប្រកួតកីឡាស៊ីហ្គេមជាផ្លូវការនេះ ។ សារព័ត៌មានរបស់ថៃបន្តថា ដោយសារតែអាកាសធាតុក្តៅខ្លាំងពេក ទើបធ្វើឱ្យក្មេងៗនាំគ្នាលេងទឹកដើម្បីកាត់បន្ថយកំដៅ ។

ក្រោយពីសារព័ត៌មានថៃចុះផ្សាយបែបនេះ មានអ្នកលេងបណ្តាញសង្គមថៃបញ្ចេញមតិថា ហេតុអ្វីបានជាឪពុកម្តាយពួកគេមិនស្លៀកខោឱ្យកូន ពីព្រោះនៅទីនេះជាទីក្រុង មិនមែននៅតាមស្រុកស្រែទេ ។ ពលរដ្ឋថៃម្នាក់ទៀតថា វាជាការចងចាំក្នុងវ័យកុមារ និងសុំឱ្យការប្រកួតកីឡាស៊ីហ្គេមលើកនេះជាការបំផុសគំនិតឱ្យក្មេងសម័យថ្មីរបស់កម្ពុជាអភិវឌ្ឍន៍បន្តទៀត ។

ដូចគ្នានេះ ពលរដ្ឋថៃម្នាក់ទៀតនិយាយថា វាជារូបភាពមួយដ៏ស្រស់ស្អាតសម្រាប់ការប្រកួតកីឡាស៊ីហ្គេមនៅប្រទេសកម្ពុជា ។ ចំណែកនារីម្នាក់ទៀតថា គួរឱ្យអាណិតណាស់ យូរៗទើបកម្ពុជាបានធ្វើជាម្ចាស់ផ្ទះម្តង អីចឹង ក្មេងៗក៏សប្បាយនឹងការលេងទឹកបែបនេះ ៕ ប្រភព ៖ PPTV HD 36

ក្រុមហ៊ុន Samsung Electronics បានហាមឃាត់បុគ្គលិករបស់ខ្លួនប្រើប្រាស់កម្មវិធី ChatGPT រួមទាំងកម្មវិធី Google Bard និង Bing ផងដែរ ក្រោយពីវិស្វកររបស់ក្រុមហ៊ុនបានធ្វើឱ្យបែកធ្លាយទិន្នន័យសំខាន់របស់ក្រុមហ៊ុនតាម ChatGPT កាលពីខែមេសា ឆ្នាំ២០២៣ ។

សារព័ត៌មាន Bloomberg ចុះផ្សាយថា ក្រុមហ៊ុន Samsung បានជូនដំណឹងទៅកាន់បុគ្គលិកអំពីគោលការណ៍ថ្មីថា ទិន្នន័យដែលផ្ញើតាមរយៈ AI platform ទាំងនេះត្រូវបានគេរក្សាទុកនៅ server ខាងក្រៅ ។ ដូច្នេះ ពិបាកក្នុងការលុបចោលណាស់ ហើយព័ត៌មានអាចធ្លាយទៅដល់មនុស្សខាងក្រៅបាន ។

តាមការស្ទង់មតិទៅលើបុគ្គលិកក្រុមហ៊ុន Samsung អំពីការប្រើប្រាស់ឧបករណ៍ AI ឃើញថា អ្នកឆ្លើយតប៦៥% គិតថា បច្ចេកវិទ្យានេះគ្មានសុវត្ថិភាពសម្រាប់អ្នកប្រើប្រាស់ ខណៈកាលពីខែមេសា ឆ្នាំ២០២៣ មានក្រុមវិស្វកររបស់ Samsung បានបង្ហោះកូដក្រុមហ៊ុនដោយចៃដន្យទៅក្នុងកម្មវិធី ChatGPT ។ អ្នកតំណាងក្រុមហ៊ុន Samsung បញ្ជាក់ថា ក្រុមហ៊ុនបានហាមឃាត់បុគ្គលិកប្រើប្រាស់ឧបករណ៍ generative AI គ្រប់ប្រភេទ ។

ការចាប់អារម្មណ៍ប្រើប្រាស់កម្មវិធី ChatGPT បានកើនឡើងជាលំដាប់ទាំងផ្នែកខាងក្នុង និងខាងក្រៅក្រុមហ៊ុន ។ ក្រុមហ៊ុន Samsung បានប្រាប់បុគ្គលិកថា បើទោះជាចំណាប់អារម្មណ៍នេះផ្តោតលើផលប្រយោជន៍ និងសក្តានុពលក្តី ប៉ុន្តែក៏មានការបារម្ភអំពីគ្រោះថ្នាក់ដល់សុវត្ថិភាពអ្នកប្រើប្រាស់ផងដែរ ។

ក្រុមហ៊ុន Samsung បានហាមឃាត់បុគ្គលិកប្រើប្រាស់កម្មវិធី ChatGPT ក្នុងកុំព្យូទ័រ ថេបប្លេត ទូរស័ព្ទ និងបណ្តាញខាងក្នុងរបស់ក្រុមហ៊ុន ។ ជាមួយគ្នានេះ ក្រុមហ៊ុនក៏បានស្នើឱ្យបុគ្គលិកដែលប្រើប្រាស់ ChatGPT ឬឧបករណ៍ AI ផ្សេងៗនៅក្នុងឧបករណ៍ផ្ទាល់ខ្លួន ចៀសវាងបង្ហោះព័ត៌មានក្រុមហ៊ុន ឬព័ត៌មានផ្ទាល់ខ្លួនឱ្យសោះ ហើយអ្នកល្មើសនឹងបម្រាមនេះ នឹងត្រូវបានបណ្តេញចេញពីការងារ ។

បច្ចុប្បន្ន ក្រុមហ៊ុន Samsung កំពុងបង្កើតឧបករណ៍ AI របស់ក្រុមហ៊ុនផ្ទាល់សម្រាប់ជួយក្នុងការបកប្រែ និងសង្ខេបឯកសារផ្សេងៗ ។ លើសពីនេះ ក្រុមហ៊ុនក៏បានអភិវឌ្ឍន៍ software និងស្វែងរកវិធីធ្វើយ៉ាងណា កុំឱ្យមានការបង្ហោះទិន្នន័យសំខាន់របស់ក្រុមហ៊ុនទៅក្នុង server ខាងក្រៅ ៕

ប្រភព ៖ Around the World

ប្រទេសកម្ពុជា ៖ កាលពីវេលាម៉ោង២និង៤០នាទីរសៀល ពលរដ្ឋកម្ពុជាបាននាំគ្នាធ្វើដំណើរមកកាន់ពហុកីឡដ្ឋានមរតកតេជោ ជាបន្តបន្ទាប់ ដើម្បីចូលរួមទស្សនាពិធីបើកការប្រកួតកីឡាស៊ីហ្គេម ឆ្នាំ២០២៣ ។ ពលរដ្ឋខ្មែរធ្វើដំណើរមកចូលរួមទស្សនាពិធីបើកការប្រកួតកីឡានេះ បានធ្វើឱ្យបរិយាកាសនៅបរិវេណខាងមុខទីលានប្រកួតមានសភាពអ៊ូអរ ខណៈមន្ត្រីបានរៀបចំបរិវេណនៅក្បែរទីលានប្រកួតសម្រាប់ធ្វើជាចំណតរថយន្ត និងម៉ូតូ ។

ការប្រកួតកីឡាស៊ីហ្គេម លើកទី៣២ បានចាប់ផ្តើមជាផ្លូវការនៅម៉ោង៧យប់ថ្ងៃទី៥ ខែឧសភា ក្នុងពហុកីឡដ្ឋានមរតកតេជោ នាទីក្រុងភ្នំពេញ ប្រទេសកម្ពុជា ដោយមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាធ្វើជាប្រធាន ព្រមទាំងមានពលរដ្ឋខ្មែរ និងភ្ញៀវទេសចរអន្តរជាតិជាច្រើននាក់បានមកចូលរួមទស្សនាផងដែរ ។

សារព័ត៌មានថៃឈ្មោះ PPTV HD 36 បានចុះផ្សាយថា ពិធីបើកការប្រកួតកីឡាស៊ីហ្គេមនៅប្រទេសកម្ពុជា គឺបានរំលេចទៅដោយពន្លឺភ្លើងពណ៌ដ៏ស្រស់ស្អាត និងអស្ចារ្យ ព្រមជាមួយអ្នកចូលរួមទស្សនាយ៉ាងច្រើនកុះករ ខណៈទីលានប្រកួតកីឡាមានកៅអីសម្រាប់អង្គុយទស្សនាចំនួន៧៥.០០០កៅអី ។ លោក Pipat Ratchakitprakarn រដ្ឋមន្ត្រីក្រសួងទេសចរណ៍ និងកីឡាប្រទេសថៃ បានចាត់តាំងឱ្យលោក Kongsak Yodmanee អាជ្ញាធរកីឡាប្រទេសថៃ ធ្វើជាមន្ត្រីតំណាងរដ្ឋាភិបាល ព្រមទាំងលោក Cherdkiat Atthakon ឯកអគ្គរាជទូតថៃប្រចាំទីក្រុងភ្នំពេញ មកចូលរួមក្នុងពិធីបើកការប្រកួតកីឡាស៊ីហ្គេមនៅកម្ពុជា ។

ក្នុងពិធីបើកការប្រកួតនេះ មានក្បួនដង្ហែរកីឡាករក្នុងទីលានប្រកួតចំនួន១១ប្រទេស ដូចជា ព្រុយណេ, ឥណ្ឌូណេស៊ី, ឡាវ, ម៉ាឡេស៊ី, មីយ៉ាន់ម៉ា, ហ្វីលីពីន, សិង្ហបុរី, ថៃ, ទីម័រខាងកើត, វៀតណាម និងកម្ពុជា ជាម្ចាស់ផ្ទះ ។ ក្រុមកីឡាករថៃបានដើរជាក្បួនក្នុងលេខរៀងទី៨ នាថ្ងៃបើកការប្រកួតកីឡាស៊ីហ្គេម ដោយមានលោក Chanathip Chakwan ជាក្រុមកីឡាបាល់បោះជម្រើសជាតិថៃ មានអាយុ២៦ឆ្នាំ ជាអ្នកកាន់ទង់ជាតិថៃ បានដឹកនាំក្រុមកីឡាករដើរក្នុងទីលានប្រកួត ព្រមទាំងលោក Thana Chaiprasit ជាប្រធានអត្តពលិកថៃ ៕ ប្រភព ៖ PPTV HD 36

អង្គការសហប្រជាជាតិ (UN) បានព្រមានពីការកើតបាតុភូតអេលនីណូក្នុងរយៈពេលប៉ុន្មានខែខាងមុខ ហើយវានឹងធ្វើឱ្យសីតុណ្ហភាពកាន់តែខ្ពស់នៅទូទាំងពិភពលោក និងអាចធ្វើឱ្យអាកាសធាតុក្តៅខ្លាំងផងដែរ ។ អង្គការឧតុនិយមពិភពលោករបស់អង្គការសហប្រជាជាតិប៉ាន់ស្មានថា មានឱកាស៦០% នឹងកើតបាតុភូតអេលនីណូនៅខែកក្កដា ឆ្នាំ២០២៣ ហើយមានឱកាស៨០% នឹងកើតបាតុភូតអេលនីណូនៅខែកញ្ញា ឆ្នាំ២០២៣ ។

បាតុភូតអេលនីណូនឹងកើតឡើងតាមធម្មជាតិ និងធ្វើឱ្យអាកាសធាតុក្តៅខ្លាំងនៅទូទាំងពិភពលោក ។ ជាមួយគ្នានេះ វានឹងបង្កឱ្យកើតគ្រោះរាំងស្ងួតនៅតំបន់ខ្លះនៃពិភពលោកផងដែរ ហើយតំបន់ខ្លះទៀតមានភ្លៀងធ្លាក់ខ្លាំង ។ បាតុភូតអេលនីណូបានកើតឡើងលើកចុងក្រោយចាប់ពីឆ្នាំ២០១៨-២០១៩ ហើយចាប់ពីឆ្នាំ២០២០ មក ពិភពលោកបានប្រឈមនឹងបាតុភូតឡានីណាអស់រយៈពេលជាយូរ ។ បាតុភូតឡានីណាដែលផ្ទុយគ្នានឹងបាតុភូតអេលនីណូ ទើបតែបញ្ចប់នៅដើមឆ្នាំ២០២៣ នេះ ។

អង្គការសហប្រជាជាតិបញ្ជាក់ថា រយៈពេល៨ឆ្នាំកន្លងមក គឺជាពេលមួយដែលមានអាកាសធាតុក្តៅបំផុតចាប់តាំងពីគេបានកត់ត្រាមក បើទោះជាមានបាតុភូតឡានីណាដែលធ្វើឱ្យអាកាសធាតុត្រជាក់ស្ទើរពាក់កណ្តាលនៃរយៈពេលនេះក្តី ។ ដូច្នេះ បើគ្មានបាតុភូតឡានីណា ពិភពលោកអាចប្រឈមនឹងអាកាសធាតុក្តៅខ្លាំងជាងនេះ ។

ប្រធានអង្គការ World Meteorological Organization លោក Petrie Talas បានលើកឡើងក្នុងសេចក្តីថ្លែងការណ៍មួយថា បាតុភូតឡានីណាបានដើរតួនាទីបញ្ឈប់ការកើនឡើងនូវសីតុណ្ហភាពពិភពលោកជាបណ្តោះអាសន្ន ។ ប៉ុន្តែបាតុភូតអេលនីណូនឹងធ្វើឱ្យសីតុណ្ហភាពលើពិភពលោកកើនឡើងជាថ្មី ប៉ុន្តែពេលនេះ មិនទាន់មានការអះអាងពីផលប៉ះពាល់ខ្លាំង ឬរយៈពេលរបស់បាតុភូតអេលនីណូទេ ។ បាតុភូតអេលនីណូធ្លាប់បានកើតឡើងនៅចន្លោះឆ្នាំ២០១៤ និងឆ្នាំ២០១៦ ។ នៅឆ្នាំ២០១៦ ត្រូវបានគេចាត់ទុកជាឆ្នាំក្តៅខ្លាំងបំផុត ដោយសារបាតុភូតអេលនីណូមានកម្លាំងខ្លាំងក្លា និងការបំភាយឧស្ម័នផ្ទះកញ្ចក់ ។

បាតុភូតអេលនីណូកើតឡើងរៀងរាល់២-៧ឆ្នាំម្តង និងមានរយៈពេល៩-១២ខែ ហើយវានឹងធ្វើឱ្យសីតុណ្ហភាពផ្ទៃទឹកផ្នែកកណ្តាល និងខាងកើតមហាសមុទ្រប៉ាស៊ីហ្វិកកាន់តែក្តៅជាងមុន ។ ជាទូទៅ នឹងមានភ្លៀងធ្លាក់ខ្លាំងនៅតំបន់ភាគខាងត្បូងរបស់អាមេរិកខាងត្បូង, ទ្វីបអាហ្វ្រិក និងអាស៊ីកណ្តាល ។ ជាមួយគ្នានេះ វានឹងបណ្តាលឱ្យកើតគ្រោះរាំងស្ងួតនៅប្រទេសអូស្ត្រាលី, ឥណ្ឌូណេស៊ី និងតំបន់ជាច្រើនរបស់អាស៊ីខាងត្បូង ៕ ប្រភព ៖ TNN Earth

ពស់ គឺជាពពួកសត្វល្មូនដែលភាគច្រើនមានពិស នឹងអាចបង្កគ្រោះថ្នាក់ទៅដល់មនុស្សបានយ៉ាងងាយ ដែលធ្វើឱ្យមនុស្សគ្រប់គ្នាមានភាពខ្លាចរអានឹងសត្វប្រភេទនេះណាស់។ សត្វពស់មានច្រើនប្រភេទនឹងមានទំហំខុសៗគ្នាផងដែរ ។ ដូច្នេះហើយតើពស់ណាខ្លះ ដែលមានទំហំធំជាងគេនៅលើពិភពលោក?

១.Titanoboa៖ ពស់ថ្លាន់ប្រភេទនេះមានដើមកំណើតនៅអាមេរិកខាងត្បូង ដែលមានអាយុកាល ៦០ លានឆ្នាំមុន នឹងមានប្រវែង ១៣ ម៉ែត្រ មានទម្ងន់ ១,១៣០ គីឡូក្រាម។

២.Palaeophis colossaeus៖ គឺជាពស់សមុទ្របុរាណដែលគ្របដណ្តប់ភាគច្រើននៃអាហ្វ្រិកខាងជើងកាលពី ១០០ លានឆ្នាំមុន និងមានប្រវែង ១២ ម៉ែត្រ។

៣.Gigantophis Garstini៖ Gigarstini គឺជាសត្វចម្លែកដ៏ធំមួយដែលរស់នៅ ៤០ លានឆ្នាំមុន។ អ្នកស្រាវជ្រាវប៉ាន់ស្មានថាវាមានប្រវែងរាងកាយពី ៧ ទៅ ១០ ម៉ែត្រ។ អ្នកវិទ្យាសាស្ត្របានរកឃើញថា Gigantophis មានទំនាក់ទំនងជាមួយពស់យក្សផុតពូជមួយទៀតគឺ Madtsoia នៅក្នុងប្រទេសឥណ្ឌា ដែលបង្ហាញថាពស់យក្សនេះធ្លាប់ត្រូវបានចែកចាយយ៉ាងទូលំទូលាយនៅទូទាំងអាស៊ី។

៤.Anacondas៖ យោងតាមសួនសត្វជាតិ និងវិទ្យាស្ថាន Smithsonian Institute of Conservation Biology បានឱ្យដឹងថា ពស់ថ្លាន់Anacondas ត្រូវបានគេប្រទះឃើញនៅក្នុងព្រៃអាម៉ាហ្សូន ដែលមានប្រវែង៩ម៉ែត្រ និងមានទម្ងន់ ៣៩៩ គីឡូក្រាម ៕

ប្រភព៖vnexpress