ភាគច្រើននៅលើផ្ទៃផែនដីយើងនេះ គឺជាទឹកសមុទ្រ ដែលមានតួនាទីយ៉ាងច្រើននៅក្នុងតម្រូវការបរិស្ថានរបស់ផែនដី ។ ដូច្នេះហើយតើអ្នកដឹងទេថា ទឹកសមុទ្រកកើតឡើងតាំងពីពេលណា?

ប្រហែលជា៤,៥០០លានឆ្នាំមុន ផែនដីមានសណ្ឋានខុសពីបច្ចុប្បន្ន គឺពុំមានមហាសមុទ្រ និងសមុទ្រនោះទេ។ ភ្នំភ្លើងបានព្រួសកម្អែល ផេះ និងឧស្ម័នទៅលើភពផែនដីទាំងមូល ដែលនៅពេលនោះភពផែនដីរបស់យើងមានសីតុណ្ហភាពក្តៅជាងបច្ចុប្បន្នខ្លាំងណាស់។

ឧស្ម័នភ្នំភ្លើង គួបផ្សំនឹងឧស្ម័នផ្សេងៗ និងចំហាយទឹកបានចាប់ផ្តើមបង្កើតបរិយាកាសភពផែនដី។ នៅខណៈពេលបរិយាកាសបានវិវត្ត ផែនដីក៏បានចុះត្រជាក់ម្តងបន្តិចៗ។ ប្រហែលជា៤ពាន់លានឆ្នាំមុន ផែនដីបានចុះត្រជាក់ល្មមដែលធ្វើឱ្យចំហាយទឹកក្លាយជាកំណក ហើយធ្លាក់មកជាភ្លៀងយ៉ាងខ្លាំង។

ទឹកភ្លៀងបានចាប់ផ្តើមចាក់បំពេញតំបន់ទាប និងកំហូងនៃផ្ទៃរបស់ផែនដី ហើយមហាសមុទ្រដំបូងក៏បានកកើតឡើង។ ដូចនេះហើយមហាសមុទ្របានផ្លាស់ប្តូរជាច្រើនទៅតាមប្រវត្តិនៃភពផែនដី៕

ឯកឧត្តមនាយឧត្តមសេនីយ៍ សៅ សុខា បានធ្វើការឆ្លើយតបតាមការអំពាវនាវរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ដោយបន្តធ្វើជាប្រធានសហព័ន្ធកីឡាបាត់ទាល់កម្ពុជាដដែល។ ការឆ្លើយតបធ្វើឡើងនៅល្ងាចថ្ងៃទី៨ ខែឧសភា ក្រោយសម្តេចអំពាវនាវឱ្យ ឯកឧត្តមនាយឧត្តមសេនីយ៍ សៅ សុខា បន្តធ្វើជាប្រធានសហព័ន្ធកីឡាបាត់ទាល់ ខណៈលោកបានសុំលាលែងពីតំណែងនេះ។

ក្នុងលិខិតឆ្លើយតបរបស់ ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការរាជអាវុធហត្ថលើផ្ទៃប្រទេស និងជាប្រធានសហព័ន្ធកីឡាបាល់ទាត់កម្ពុជា បានឱ្យដឹងថា «ខ្ញុំសូមគោរពទទួលយក នូវការអំពាវនាវពី សម្តេចអគ្គមហាសេនាបតីតេជោ និងបងប្អូនអ្នកនិយមស្នេហាវិស័យកីឡាបាល់ទាត់ ព្រមទាំងក្រសួងអប់រំ យុវជន និងកីឡា ក្រុមហ៊ុនអ្នកឧបត្ថម្ភ បណ្តាញផ្សព្វផ្សាយ និងមិត្តភក្តិបរទេសទាំងអស់ដើម្បីបន្តដឹកនាំសហព័ន្ធកីឡាបាល់ទាត់កម្ពុជាទៅតាមអាណត្តិ នៃការបោះឆ្នោតរបស់ខ្លួន»។

ដើម្បីឆ្លើយតបទៅ នឹងទំនុកចិត្តរបស់សម្ដេចតេជោ និងអ្នកស្នេហាវិស័យកីឡាបាល់ទាត់កម្ពុជា ឯកឧត្តមនាយឧត្តមសេនីយ៍ សៅ សុខា អំពាវនាវ ចំពោះក្លិប សមាគមជាសមាជិកសហព័ន្ធកីឡាបាល់ទាត់កម្ពុជា មន្ត្រី បុគ្គលិក គ្រូបង្វឹក អាជ្ញាកណ្ដាល កីឡាករ ត្រូវបន្តធ្វើកំណែទម្រង់លើគ្រប់ផ្នែកដើម្បីភាពជឿនលឿនថ្មីសម្រាប់វិស័យបាល់ទាត់នៅកម្ពុជា ដើម្បីសុខភាព មិត្តភាព និងកិត្តិយសជាតិតាមរយៈការប្រកួតកីឡាបាល់ទាត់ជាលក្ខណៈអន្តរជាតិសម្រាប់អនាគតកាល៕

នៅព្រឹកថ្ងៃទី៩ ខែឧសភា ឆ្នាំ២០២៣នេះ ក្រសួងសុខាភិបាលបានចេញមកអំពាវនាវដល់ប្រជាពលរដ្ឋសូមបញ្ឈប់ចែកចាយការផ្សាយ ដែលបកស្រាយខុសពីបច្ចេកទេស ដោយនិយាយពីអង្គការសុខភាពពិភពលោក (WHO) បានលើកឡើងថា «មនុស្សពេញវ័យ មានសុខភាពល្អ មិនបាច់ចាក់វ៉ាក់សាំងកូវីដបន្ថែម» ដែលជាការបកស្រាយខុសបច្ចេកទេសមានគោលបំណងមិនល្អសម្រាប់ប្រទេសកម្ពុជា ។

ក្រសួងសុខាភិបាលបានលើកឡើងថា «សូមមេត្តាបញ្ឈប់ចែកចាយការផ្សាយ ដែលបកស្រាយខុសពីបច្ចេកទេសនេះ ដោយ WHO មិននិយាយបែបនេះទេ អ្នកដែលបកស្រាយនេះ មានបំណងមិនល្អសម្រាប់ប្រទេសកម្ពុជាឡើយ។ សូមអរគុណ ! ថ្ងៃទី០៩ ខែឧសភា ឆ្នាំ២០២៣»។

គួរបញ្ជាក់ផងដែរថា កម្ពុជាកំពុងបន្តយុទ្ធនាការចាក់វ៉ាក់សាំងដូសជំរុញដល់ប្រជាពលរដ្ឋ។ គិតត្រឹមយប់ថ្ងៃទី០៨ ខែឧសភា ឆ្នាំ២០២៣ ប្រជាពលរដ្ឋចំនួន ១៥,២៨៥,៩៧២នាក់ បានចាក់វ៉ាក់សាំងបង្ការជំងឺកូវីដ អ្នកបានចាក់ដូសទី៣ចំនួន ១០,៦៣៣,២១១នាក់, ចាក់ដូសទី៤ចំនួន ៥,១៨៤,៦២៧នាក់, ចាក់ដូសទី៥ចំនួន ១,៨៣២,១២៧នាក់ និងចាក់ដូសទី៦ចំនួន ៣៨៥,៥៤១នាក់៕

កំពូល YouTuber ដ៏ល្បី លោក Mr Beast បានបង្ហោះវីដេអូមួយនៅលើ channel របស់គាត់មួយដែលមានឈ្មោះថា Beast Philanthropy ដែលក្នុងវីដេអូនោះលោកបានជួយប្រជាជនពិការកម្ពុជា ប្រមាណជាង ២២០០ នាក់ ឱ្យដើរបានវិញ។

លើសពីនេះទៅទៀត លោក Mr Beast ថែមទាំងបំពេញបំណងអោយបងស្រីម្នាក់ឈ្មោះ Sam ដែលជាជនពិការម្នាក់ដែរ ដោយបងស្រីចង់បន្តរៀនបញ្ចប់ថ្នាក់អនុបណ្ឌិត និងមានក្ដីស្រម៉ៃចង់ធ្វើដំណើរកំសាន្តទៅក្រៅប្រទេសយ៉ាងហោចណាស់អោយបានម្ដងក្នុងជីវិត, Mr Beast នឹងរ៉ាប់រងរាល់ការចំណាយទាំងអស់តែម្ដងជូនបងស្រី ទាំងថ្លៃសិក្សានិងដំណើរកម្សាន្ត។

មិនតែប៉ុណ្ណោះ Mr Beast ក៏បានផ្តល់ជាជំនួយ និងគ្រឿងបរិក្ខាជាច្រើនដល់គ្លីនិកចំនួន ២ដែលមានបំណងចង់បិទ ដោយសារតែខ្វះខាតថវិការ ឱ្យបន្តបើក និងជួយជីវិតជនមានពិការភាពជាបន្តទៀតផងដែរ។

សូមជម្រាបផងដែរថា  Mr Beast គឺជា YouTuber ដ៏ល្បីមួយរូបនៅលើពិភពលោក ដោយលោកមានចំនួននាក់ subscribe ដល់ទៅ ១៣៣លាននាក់ឯណោះ។ នៅក្នុងផងដែរ លោក ក៏មានជា Channel បែបកម្សាន្តផ្សេងជាច្រើនទៀតផងដែរក្នុងនោះរួមមាន៖ Mr Beast (Channel គោល), Beast Philanthropy, Mr Beast 2, MrBeast Gaming និង Beast Reaction ដែល Channel ទាំងអស់នេះ គឺស្របតាមចំណង់ចំណូលចិត្តរបស់មនុស្ស ដែលចង់ទស្សនាវីដេអូរបស់លោក៕

បន្ទាប់ពីប្រកួតយ៉ាងស្វិតស្វាញក្នុងវគ្គផ្តាច់ព្រ័ត្រទីបំផុតកីឡាការិនីតំណាងកម្ពុជា ស្រួង ភារី បានឈ្នះមេដាយមាស បន្ទាប់ពីយកឈ្នះកីឡាការិនី វៀតណាម នៃលំដាប់ពិន្ទុ ២៥-២០ នៅ នៃវិញ្ញសាកីឡាប៊ីយ៉ាការ៉ុម ក្នុងព្រឹត្តិការណ៍កីឡាស៊ីហ្គេម២០២៣ នៅយប់ថ្ងៃទី៨ ខែឧសភា ឆ្នាំ២០២៣ នៅផ្សារទំនើបអ៉ីអន សែន សុខ ជាន់ទី៣។ ការឈ្នះមេដាយមាសនេះកីឡាការិនីរូបនេះ បានបង្ហាញអារម្មណ៍សប្បាយរីករាយពន់ពេក ព្រោះបានសម្រេចក្តីស្រមៃរបស់ខ្លួនក្នុងរយៈពេល១០ឆ្នាំមកនេះមានឱកាសរកមេដាយមាសជូនជាតិលើទឹកដីកំណើត។

ក្នុងបទសម្ភាសជាមួយអ្នកសារព័ត៌មានក្រោយពីទទួលបានមេដាយមាស កីឡាការិនី ស្រួងភារី បានបង្ហាញចំណាប់អារម្មណ៍របស់ខ្លួនថា ទោះបីជានាងបានឈ្នះមេដាយនៅប្រទេសកូរ៉េ ឬនៅប្រទេសផ្សេងទៀតលំដាប់ពិភពលោកយ៉ាងណាក៏ដោយ មិនដូចបានឈ្នះមេដាយនៅលើទឹកដីកម្ពុជា ជូនបងប្អូនប្រជាពលរដ្ឋកម្ពុជាឡើយ ហើយក្តីស្រមៃរបស់ខ្លួនរយៈពេល១០ឆ្នាំស្វែងរកមេដាយមាសក្នុងជាតិមាតុភូមិគឺទទួលបានជោគជ័យហើយ។

ជាមួយគ្នានេះ វីរៈនារី ស្រួង ភារី មានស្រុកកំណើតនៅខេត្តត្បូងឃ្មុំ បានអំពាវនាវឱ្យបងប្អូនជនរួមជាតិចូលរួមជាមួយវិស័យកីឡាឱ្យបានច្រើនមិនថាប្រភេទកីឡាណានោះទេ ដោយលោកស្រីបានលើកឡើងថា វិស័យកីឡាមិនមែនធម្មតាទេ កីឡាមានឥទ្ធិពលខ្លាំង ហើយកីឡានេះហើយធ្វើឱ្យប្រទេសជាតិមានភាពល្បីល្បាញ៕

ក្រសួងធនធានទឹក និងឧតុនិយម បានចេញសេចក្តីជូនដំណឹងថា ចាប់ពីថ្ងៃ១០-១៦ ខែឧសភា ឆ្នាំ២០២៣ រយៈពេល១សប្តាហ៍នេះកម្ពុជានឹងទទួលនូវឥទ្ធិពលជ្រលងសម្ពាធទាបពីភាគខាង ជើងប្រទេស និងខ្យល់មូសុងនិរតី ក្នុងកម្រិតខ្សោយ។

ស្ថានភាពនេះនឹងធ្វើឱ្យតំបន់ទំនាបកណ្តាល មានសីតុណ្ហភាពអប្បបរមាពី ២៥-២៧ °C សីតុណ្ហភាពអតិបរមា មានពី ៣៤-៣៦ °C ដែលអាចមានភ្លៀងធ្លាក់រាយប៉ាយក្នុងកម្រិតពីតិចទៅបង្គួរ និងអាចច្រើនដោយផ្នែកខ្លះ លាយឡំដោយផ្គរ រន្ទះ និងខ្យល់កន្ត្រាក់ ។

តំបន់ខ្ពង់រាបសីតុណ្ហភាពអប្បបរមាមានពី ២៤-២៦ °C និងសីតុណ្ហភាពអតិបរមា មានពី ៣៤- ៣៦ °C អាចមានភ្លៀងធ្លាក់ក្នុងកម្រិតពីតិចទៅបង្គួរ និងអាចច្រើនដោយផ្នែកខ្លះ លាយឡំដោយផ្គរ រន្ទះ និងខ្យល់កន្ត្រាក់ ។

សម្រាប់តំបន់សមុទ្រវិញសីតុណ្ហភាពអប្បបរមា មានពី ២៤-២៦ °C និងសីតុណ្ហភាពអតិបរមា មានពី ៣៣-៣៥°C អាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំដោយផ្គរ រន្ទះ និងខ្យល់កន្ត្រាក់។
ក្នងនោះក្រសួងធនធានទឹកក៏បានអំពាវនាវដល់សាធារណជនប្រុងប្រយ័ត្នចំពោះបាតុភូមិធម្មជាតិដែលអាចកើតមានឡើងជាយថាហេតុ៕

កីឡាការិនីរត់ប្រណាំង បូ សំណាង កំពុងតែធ្វើឱ្យសារព័ត៍មានក្នុងតំបន់ចាប់អារម្មណ៍លើរូបនាងជាខ្លាំង ដោយ កីឡាការីនីរូបនេះ បានព្យាយាមរត់ ៥គីឡូម៉ែត្រ ទាំងមេឃភ្លៀងនិងខ្យល់ខ្លាំង ហើយថែមទាំងទៀតដឹងទៀតថាគ្មានសង្ឃឹមឈ្នះជូនមេដាយជូនជាតិ តែនាងនៅតែរត់រហូតដល់ទីបញ្ចប់។

ការសែតរបស់ថៃ MainStand បានចុះផ្សាយពីការតស៊ូរបស់សំណាង ហើយនាងទទួលបានការចាប់អារម្មណ៍ជាខ្លាំងពីបណ្តាអ្នកលេងបណ្តាញសង្គមនៅក្នុងប្រទេសថៃ ដោយពួកគេបានសរសេរថា៖” គ្រាន់តែការប្រកួតរត់ប្រណាំងចាប់ផ្តើមភ្លាម ព្រះភិរុនក៏បង្អុរចុះមក។ កីឡាការីនីរត់ប្រណាំង បូ សំណាង សំណាងត្រូវបានគូប្រកួតដទៃទៀត រត់លឿនជាងជិតដល់ទីមុននាង ប៉ុន្តែនាង សម្រេចចិត្តថាមិនបោះបង់ ហើយនៅតែបន្តរត់ទៅមុខតាមតែអាចធ្វើទៅបាន។ នៅប្រមាណជា ៧នាទីចុងក្រោយនៃការប្រកួត មេឃភ្លៀងធ្លាក់មកកាន់តែខ្លាំង អត្តពលិកផ្សេងទៀតបានចូលជ្រក ប៉ុន្តែនាងនៅតែបន្តរត់រហូតដល់ទីបញ្ចប់ អ្នកទោះបីនាងជាអ្នកចុងក្រោយក៏ដោយ”។

“នៅចុងបញ្ចប់នៅលើចម្ងាយផ្លូវ ៥០០០ម៉ែត្រ ជាមួយនឹងពេលវេលា ២២.៥៤នាទី ដែលគាត់អាចធ្វើបាន ការទះដៃអបអរសាទរពីអ្នកគាំទ្រក៏បានបន្លឺឡើងនៅពាសពេញពហុកីឡដ្ឋានមរតកតេជោ”។

បើយើងក្រឡេកមកមើលជីវិតវិញ រឿងរបស់កីឡាការីនី បូ សំណាង បានបង្ហាញឱ្យយើងឃើញថានៅក្នុងជីវិតពិត ជំហានដែលអ្នកដើរ គោលដៅដែលអ្នកកំពុងតែឆ្ពោះទៅរក និងទីបញ្ចប់របស់វា គឺមិនមែនកំណត់ដោយពេលវេលានោះទេ អ្នកអាចទៅដល់ក្រោយគេ ក៏ប៉ុន្តែអ្នកក៏អាចនឹងជោគជ័យ និងសម្រេចគោលបំណងបានដូចគ្នាផងដែរ៕