បរទេស៖ ទីប្រជុំជនអ៊ឺរ៉ុបមួយចំនួនកំពុងផ្តល់លុយឱ្យប្រជាជនដើម្បីរស់នៅដោយសារតែការព្រួយបារម្ភអំពីអនាគតសេដ្ឋកិច្ចនៅពេលដែលចំនួនប្រជាជនធ្លាក់ចុះ។ ភាគច្រើននៃតំបន់ជនបទនៅអឺរ៉ុបកំពុងប្រឈមមុខនឹងប្រជាជនវ័យចំណាស់នៅពេលដែលយុវជនផ្លាស់ទីទៅទីក្រុង ឬជ្រើសរើសមិនមានកូន។ ដើម្បីប្រយុទ្ធប្រឆាំងនឹងបញ្ហានេះ យោងតាមប្រភពព័ត៌មាន Euronews បានឱ្យដឹងថារដ្ឋាភិបាលក្នុងតំបន់មួយចំនួនកំពុងលើកទឹកចិត្តជនបរទេសឱ្យស្នាក់នៅទីនោះ។

១. Albinen ប្រទេសស្វីស៖ Albinen ស្ថិតនៅតំបន់ភ្នំអាល់ស្វីស ដែលមានប្រជាជនតិចជាង 250 នាក់។ រដ្ឋាភិបាលបានផ្តល់ប្រាក់ចំនួន20 ម៉ឺនដុល្លារសម្រាប់ពលរដ្ឋស្វីស ឬជនបរទេសណាដែលចង់រស់នៅក្នុងតំបន់នេះ ហើយត្រូវតែប្តេជ្ញាចិត្តក្នុងការរស់ នៅតំបន់ Albinen រយៈពេល 10 ឆ្នាំឡើង ឬមួយជីវិត។

២. Rubia ប្រទេសអេស្ប៉ាញ៖ ភូមិ Rubiá មានអ្នកស្រុកចំនួន 1,400 នាក់នៅភាគពាយ័ព្យ។ រដ្ឋាភិបាលបានផ្តល់ប្រាក់ជាង150 ដុល្លារជារៀងរាល់ខែទៅឱ្យប្រជាពលរដ្ឋឬជនបរទេសដែលស្ម័គ្ររស់នៅតំបន់នោះ។ លើសពីនេះទៀត Xesta គឺជាភូមិតូចមួយដែលមានអ្នករស់នៅតិចជាង 100 នាក់នៅភាគពាយព្យនៃប្រទេសអេស្ប៉ាញ នឹងមានអចលនទ្រព្យទំនេរប្រហែល 125 ដែលកំពុងស្វែងរកមនុស្សដើម្បីរស់នៅផងដែរ។

៣. Sardinia ប្រទេសអ៊ីតាលី៖ កោះ Sardinia ផ្តល់ប្រាក់ជាង1 ម៉ឺនដុល្លារដល់អ្នកដែលមានបំណងចង់ចូល ឬរស់នៅជាអចិន្ត្រៃយ៍។ កោះនេះត្រូវបានគេស្គាល់ថាមានឆ្នេរខ្សាច់ ផ្ទៃមេឃខៀវស្រងាត់ និងទឹកពណ៌ខៀវខ្ចី។ ដើម្បីទប់ស្កាត់ការថយចុះចំនួនប្រជាជន រដ្ឋាភិបាលបានកំណត់ថវិកាជាង 45 លានដុល្លារ សម្រាប់ផែនការទាក់ទាញអ្នកស្រុក និងចំណាយសម្រាប់ជនអន្តោប្រវេសន៍ចំនួន 3,000 នាក់។

៤. Antikythera ប្រទេសក្រិក៖ អ្នករស់នៅថ្មីនៃកោះនេះនឹងទទួលបានផ្ទះមួយ និងដីមួយដុំ រដ្ឋាភិបាលបានឧបត្ថមប្រាក់ជាង500 ដុល្លារក្នុងមួយខែសម្រាប់រយៈពេលបីឆ្នាំដំបូងនៃប្រជាជនដែលរស់នៅលើកោះនេះ។

៥. Candela ប្រទេសអ៊ីតាលី៖ Candela ជាទីក្រុងតូចមួយនៅក្នុងតំបន់ Puglia ដែលមានប្រជាជនប្រហែល 2,700 នាក់។ Candela កំពុងផ្តល់ជូនប្រាក់សម្រាប់អ្នកនៅលីវជាង 800 ដុល្លារ, គូស្វាមីភរិយាជាង 1,300 ដុល្លារ និងគ្រួសារជាង 2,000 ដុល្លារ ដើម្បីផ្លាស់ទីមករស់នៅក្នុងភូមិនេះ៕
ប្រភព៖vnexpress

រដ្ឋធានីកៀវ៖ ប្រធានាធិបតីរុស្ស៊ី លោក វ៉្លាឌីមៀ ពូទីន បាន និង កំពុងតែប្រើប្រាស់កម្លាំងទាហាន និង សម្ភារសឹកយ៉ាងច្រើនសម្បើម នៅក្នុងគោលបំណង ដណ្ដើមយកជ័យជម្នះឲ្យបានឆាប់រហ័សបំផុត ប៉ុន្ដែកម្លាំងប្រដាប់អាវុធរបស់គាត់ នៅតែមិនអាចធ្វើឲ្យសម្រេចបានតាមគោលបំណងរបស់គាត់ ខណៈការវាយប្រហារគ្នាយ៉ាងសាហាវ កំពុងតែបន្ដអូសបន្លាយ អស់រយៈពេលជាង១ឆ្នាំកន្លងមកហើយ ដោយបានឆក់យកអាយុជីវិតជនស៊ីវិល និង កងទ័ពទាំងសងខាង អស់ជាច្រើនម៉ឺននាក់ ប៉ុន្ដែឥឡូវក៏មានសេចក្ដីរាយការណ៍ អំពីការវាយប្រហារទៅលើទីបញ្ជាការយោធារបស់ក្រុងមូស្គូ ជាថ្មីបន្ដទៀត។

សារព័ត៌មាន Pravda (ប៉្រាវដា) បានចេញផ្សាយ កាលពីព្រឹក ថ្ងៃអង្គារ ទី២ ខែឧសភា ឆ្នាំ២០២៣ ថា ក្រុមចារកម្មរបស់អ៊ុយក្រែន បានឈ្លបយកការណ៍ កំណត់ទីតាំងបញ្ជាការដ្ឋានរបស់ទាហានរុស្ស៊ី ដែលកាន់កាប់ នៅក្នុងភូមិមីខៃលីវកា (Mykhailivka) ស្ថិតក្នុងតំបន់ហ្សាប៉ូរីហ្សា (Zaporizhzhia) ហើយបន្ទាប់មកកម្លាំងការពារទឹកដីរបស់អ៊ុយក្រែន ក៏បានវាយប្រហារទៅលើទីបញ្ជាការទាំងនោះ។

លោក អ៊ីវ៉ាន់ ហ្វេដូរ៉ូវ (Ivan Fedorov) ចៅហ្វាយក្រុងមីលីតូប៉ូល (Melitopol) បានបញ្ជាក់ នៅលើបណ្ដាញសង្គមតេឡេក្រាម ថា ការបំផ្ទុះដ៏កក្រើក នៅទីបញ្ជាការរបស់ទាហានរុស្ស៊ី នោះ បានកើតឡើង នៅវេលាម៉ោង ១៤ និង ៣០នាទី ថ្ងៃទី១ ខែឧសភា។

លោកចៅហ្វាយក្រុង បានពន្យល់ ថា ក្រុមមន្ត្រីស៊ើបការណ៍សម្ងាត់របស់អ៊ុយក្រែន បានកំណត់ទីតាំង នៃទីស្នាក់ការកណ្តាលរបស់ទាហានរុស្ស៊ី នៅក្នុងតំបន់នោះ រួចហើយបានប្រគល់កូអរដោណេ ទៅឱ្យអង្គភាពមួយផ្សេងទៀតរបស់កងទ័ពការពារទឹកដីរបស់ខ្លួន ខណៈបុគ្គលិកយោធារបស់រុស្ស៊ី កំពុងតែប្រមូលផ្តុំគ្នា នៅទីតាំងនោះ។បើទោះជាមានសេចក្ដីរាយការណ៍ អំពីការវាយប្រហារបែបនេះក្ដី ប៉ុន្ដែអ៊ុយក្រែន នៅតែមិនទាន់បានបញ្ជាក់ អំពីចំនួនទាហានរបស់រុស្ស៊ី បានរងការខូចខាតនៅឡើយ។ ចំណែករុស្ស៊ី ក៏មិនទាន់ប្រតិកម្មនឹងការអះអាងនេះដែរ។

ដោយឡែក ប្រព័ន្ធការពារដែនអាកាសរបស់រុស្ស៊ី កាលពីថ្ងៃទី១ ខែឧសភា ឆ្នាំ២០២៣ បានធ្វើឱ្យសកម្ម នៅជិតទីក្រុងយ៉ែវប៉ាតូរីយ៉ា (Yevpatoria) និង ទីក្រុងសេវ៉ាស្ដូប៉ូល (Sevastopol) ស្ថិតក្នុងតំបន់គ្រីមៀ (Crimea) របស់អ៊ុយក្រែន ដែលរុស្ស៊ីបានរឹបអូសយក កាលពីឆ្នាំ២០១៤។ ស្របគ្នានេះ អាជ្ញាធរលើកបន្តុប ដោយក្រុងមូស្គូ នៅក្នុងតំបន់នោះ ក៏បានត្អូញត្អែរ អំពីការវាយប្រហារ ដោយដ្រូន បណ្ដាលឲ្យឆេះឃ្លាំងស្ដុកប្រេងឥន្ធនៈមួយកន្លែង។

សូមជម្រាប ថា មូលដ្ឋានកងទ័ពបស់រុស្ស៊ី រូមទាំងមូលដ្ឋានកងទ័ពអាកាស និង មូលដ្ឋានយោធា នៅលើឧបទ្វីបគ្រីមៀ កាលពីឆ្នាំ២០២២កន្លងទៅ ក៏ធ្លាប់រងការវាយប្រហារជាបន្ដបន្ទាប់រួចមកហើយ ដោយបានបំផ្លិចបំផ្លាញហេដ្ឋារចនាសម្ព័ន្ធព្រលានយន្ដហោះយោធាមួយចំនួនផងដែរ៕

ប្រទេស ឡាវ ៖ រដ្ឋាភិបាលឡាវនឹងដំឡើងថ្លៃឈ្នួលកម្លាំងពលកម្មកម្រិតទាបចាប់ពីពេល បច្ចុប្បន្នស្មើនឹង១,២ លានគីបទៅ ១,៣លានគីបហើយអនុវត្តចាប់ពី ថ្ងៃទី១ ខែ ឧសភា ឆ្នាំ២០២៣តទៅ ។ ការប្រកាសនេះស្រប នឹង ថ្ងៃទិវាពលកម្មអន្តរជាតិហើយសំណើ នេះត្រូវបានចុះហត្ថលេខា ក្នុងកិច្ចប្រជុំគណៈរដ្ឋមន្ត្រី ។

បើទោះជារដ្ឋាភិបាលនឹងពិភាក្សាអំពីការដំឡើងថ្លៃកម្លាំងពលកម្មបន្ថែមទៀត ប៉ុន្តែបានប្រគល់ការងារនេះទៅ ឲ្យក្រសួង ការងារ និង ផ្នែកសង្គមទំនាក់ទំនងទៅក្រសួងហិរញ្ញវត្ថុ និងក្រសួងពាក់ព័ន្ធ ផ្សេងៗបន្ត ទៀត ដើម្បីដំណើរការស្រាវជ្រាវឱ្យបានគ្រប់ជ្រុងជ្រោយអំពី ការដំឡើងថ្លៃកម្លាំង ពលកម្មកម្រិតទាបជាងគេ ឱ្យ បាន សម ស្រប ។

លើសពីនេះត្រូវមាន ទិន្នន័យស៊ីជម្រៅឱ្យបានច្រើនអំពីរឿងនេះផងដែរ ។ រដ្ឋាភិបាលឡាវសង្ឃឹមថានឹងអាចដំឡើងតម្លៃកម្លាំងពលកម្មកម្រិតទាបនៅត្រីមាស ទី៣ ឆ្នាំ ២០២៣ ដើម្បីជាប្រយោជន៍ដល់ អ្នកធ្វើការងារជាច្រើននាក់នៅទូទាំងប្រទេសឡាវ ។

ក្រៅពីការអនុម័តដំឡើងថ្លៃ កម្លាំងពលកម្មកម្រិតទាបហើយនៅក្នុងកិច្ចប្រជុំក៏បានពិភាក្សាអំពី ប្រធានបទផ្សេងៗផងដែរ ដូចជាការធ្វើឱ្យរថភ្លើង ប្រទេសឡាវ-ចិន កាន់ តែងាយស្រួលជាងមុន សម្រាប់អ្នកធ្វើដំណើរ , ការដោះស្រាយការបំពុលលើបរិយាកាស និងការគ្រប់គ្រងអតិផរណាកើនឡើង ។

រដ្ឋាភិបាលឡាវមានគោលដៅជំរុញវិស័យទេសចរណ៍ជាពិសេសនៅ តាមបណ្តោយផ្លូវ រថភ្លើង ឡាវ-ចិន និងយកមតិយោបល់របស់ពលរដ្ឋមកពិចារណា ដើម្បីកែលម្អផ្តល់ភាពងាយស្រួលតាមខ្សែរថភ្លើង ល្បឿន លឿន ។

ចំណែកការដោះស្រាយបញ្ហាបរិយាកាសកខ្វក់រដ្ឋាភិបាលកណ្តាលនិងតំបន់នឹងតាម ដានស្ថានការណ៍ភ្លើងឆេះព្រៃ និងពន្លត់ភ្លើងឱ្យបានទាន់ពេលវេលា។ ក្រៅពីនេះភ្នាក់ងារក្នុងតំបន់បានផ្តល់ចំណេះដឹងដល់ពលរដ្ឋផងដែរដើម្បីចៀសវាងការដុតព្រៃដោយប្រមាថ និងអនុវត្តប្រើច្បាប់ ពាក់ព័ន្ធនឹងការទន្ទ្រាផ្ទៃដីព្រៃអនុរក្ស ។

រដ្ឋាភិបាលបានបង្កើត ក្រុមការងារ មួយដើម្បី ពិនិត្យ អតិផរណាកើនឡើង តម្លៃទំនិញ និងការប្តូរ ប្រាក់ផងដែរ ។ ក្រុមការងារនេះនឹងសហការការងារជាមួយផ្នែកពាក់ព័ន្ធ ដើម្បីសិក្សាស្រាវជ្រាវឱ្យបានគ្រប់ផ្នែក , អភិវឌ្ឍន៍វិធានការរយៈពេលវែង និងយកលទ្ធផលការស្រាវជ្រាវទៅឱ្យរដ្ឋាភិបាល ដើម្បីពិចារណា៕ ប្រភព៖ 3Plus News

ជាទូទៅ មនុស្សភាគច្រើនប្រហែលជាដឹងច្បាស់ហើយថារុស្សុីជាប្រទេសដែលធំជាងគេបង្អស់នៅក្នុងពិភពលោក ចុះមានដែរដឹងអត់ថាប្រទេសណាដែលធំជាងគេនៅតំបន់អាស៊ានយើង?

ប្រទេសឥណ្ឌូណេស៊ី មានឈ្មោះជាផ្លូវការថា សាធារណរដ្ឋឥណ្ឌូណេស៊ី គឺជាប្រទេសមួយស្ថិតនៅប៉ែកខាងត្បូងនៃតំបន់អាសុីអាគ្នេយ៍ ស្ថិតនៅចន្លោះចន្លោះរវាងមហាសមុទ្រឥណ្ឌា និងប៉ាសុីហ្វិក។

លាតសន្ធឹងលើផ្ទៃក្រឡា ១ ៩០៤ ៥៦៩គីឡូម៉ែត្រការ៉េ បានធ្វើឱ្យប្រទេសដែនកោះមួយនេះ ជាប្រទេសដែលធំជាងគេនៅតំបន់អាសុីអាគ្នេយ៍។ អ្វីដែលពិសេសនោះ ឥណ្ឌូនេសុី គឺជាប្រទេសដែនកោះធំជាងគេបំផុតនៅលើពិភពលោក ដោយមានកោះទៅជាង១៧០០០កោះឯណោះ។

ដោយមានប្រជាជនសរុប ២៧០ លាននាក់ ឥណ្ឌូណេស៊ីគឺជាប្រទេសដែលមានចំនួនប្រជាជនច្រើនបំផុតទី ១៤ និងជាប្រទេសមានប្រជាជនកាន់សាសនាឥស្លាមច្រើនបំផុតលើលោក។

ប្រជាជនឥណ្ឌូណេស៊ីជាងពាក់កណ្តាលមានទីលំនៅលើកោះជ្វា ហើយបានធ្វើឱ្យកោះនេះ ក្លាយជាកោះដែលមានប្រជាជនរស់នៅច្រើនបំផុតផងដែរបើប្រៀបធៀបទៅនឹងកោះផ្សេងៗនៅលើពិភពលោក។

ដោយឡែកប្រទេសដែលតូចជាងគេ គឺសិង្ហបុរី ដោយមានផ្ទៃក្រឡាត្រឹមតែ ៧២៨.៦ គីឡូម៉ែត្រការ៉េប៉ុណ្ណោះ៕