កាលពីម្សិលមិញ ការប្រកួតបើកឆាកដំបូងសម្រាប់វិញ្ញាសាបាល់ទះបុរស ក្រុមកម្ពុជាធ្វើបានយ៉ាងល្អ ដោយបានឈ្នះ សិង្ហបុរី ៣សិត០ នៅពហុកីឡាដ្ឋានជាតិអូឡាំពិក។

ដោយឡែកនៅក្នុងថ្ងៃនេះ​ កម្ពុជា ត្រូវតែឈ្នះដាច់ខាត ដើម្បីធានាកៅអីនៅវគ្គបន្ទាប់ ដោយត្រូវជួបក្រុមហ្វីលីពីន។ ប្រកួតដំបូងរបស់ហ្វីលីពីន ពួកគេបានបរាជ័យ៣សិត០ ទៅលើក្រុមឥណ្ឌូនេសុី ដូច្នេះវាហាក់មិនពិបាកទេ សម្រាប់ក្រុមកម្ពុជាឡើងទៅកាន់វគ្គបន្ទាប់។

សូមជម្រាបផងដែរ កម្ពុជា ស្ថិតនៅពូល A ជាមួយសិង្ហបុរី ហ្វីលីពីន និងឥណ្ឌូនេសុី ខណៈពូល B មានថៃ វៀតណាម មីយ៉ាន់ម៉ា និងម៉ាឡេសុី។

សម្រាប់នៅក្នុងថ្ងៃនេះផងដែរ ការប្រកួតនឹងចាប់ផ្តើមពីម៉ោង១២ថ្ងៃត្រង់តទៅ នៅពហុកីឡាដ្ឋានជាតិអូឡាំពិក ហេតុដូច្នេះសូមបងប្អូនអ្នកគាំទ្រចូលរួមឱ្យបានច្រើនកុះករ ដើម្បីជាកម្លាំងចិត្តដល់អត្តពលិករបស់យើង៕

ចំណងជើងអក្សរផ្កាប់ចុះក្រោមរបស់តារាចម្រៀង ជី ដេវីត បានបង្កឱ្យមានការជជែកវែកញែកមិនធម្មតានៅលើបណ្តាញសង្គមរហូតតារាចម្រៀងរូបនេះសុំការយោគជ័យ និងសុំពេលកែសម្រួល។ ទោះយ៉ាងណា រឿងអក្សរផ្កាប់ចុះក្រោមនេះលោកបណ្ឌិត វង់ សុធារ៉ា ប្រធានដេប៉ាតឺម៉ង់ប្រវត្តិវិទ្យានៃសាកលវិទ្យាល័យភូមិន្ទភ្នំពេញ ក៏បានបញ្ចេញប្រតិកម្មរឿងនេះនៅលើបណ្តាញសង្គមផងដែរថា ការធ្វើបែបនេះប្រៀបដូចជាការប្រមាថអក្សរសាស្រ្តខ្មែរ ខណៈអ្នកចេះដឹងខាងផ្នែកអក្សរសាស្រ្តនេះជនជាតិថៃច្រើនណាស់ទើបលោកលូកមាត់ក្នុងរឿងនេះ។

នៅយប់ថ្ងៃទី៣ ខែឧសភា អ្នកលេងបណ្តាញសង្គមមានការភ្ញាក់ផ្អើលយ៉ាងខ្លាំងក្រោយពីលោកបណ្ឌិត វង់ សុធារ៉ា ប្រធានដេប៉ាតឺម៉ង់ប្រវត្តិវិទ្យានៃសាកលវិទ្យាល័យភូមិន្ទភ្នំពេញ ហើយលោកក៏ជាសាស្ត្រាចារ្យផ្នែកសិលាចារឹកម្នាក់ ប្រតិកម្មទៅលើចំណងជើងបទចម្រៀងថ្មីរបស់លោក ជី ដេវីត មានចំណងជើងថា «មហានគរ» ដែលមានតួអក្សរខ្លះផ្កាប់ចុះក្រោម។

លោកបណ្ឌិតបានរៀបរាប់ថា « នៅសម័យអង្គរ ខ្ញុំមិនដែលឃើញដូនតាហៅថា «មហានគរ»ទាល់តែសោះ។ សិលាចារឹកសរសេរត្រឹម «នគរឝ្រីយឝោធរបវ៌្វត» ឬ «នគរឝ្រីយឝោធរបុរ»។ មកដល់ចុងសតវត្សរ៍ទី១៥ គេហៅអតីតរាជធានី ស្រីយសោធរបុរ នេះថា «ព្រះនគរ» ។ សិលាចារឹកសតវត្សរ៍ទី១៦ ឆ្នាំ១៥៧៩ ទើបឃើញគេហៅថា «ព្រះមហានគរឥន្ទ្រប្រឞ្ដ/ប្រស្ដ» ដែលក្រោយមកត្រូវគេហៅរេលថា «មហានគរឥន្ទ្រប្រាស», «ឥន្ទិបថមហានគរ» ឬ «មហានគរឥន្ទបទ» ….។
ចំណែកអ្នកខំសរសេរឈ្មោះនេះដោយអក្សរសតវត្សរ៍ទី៩ គ្រាន់ជាការខំប្រឌិត។ ចំណែកអ្នកតុបតែងផ្សាយម៉ូតសម្លៀកអ្នកចម្បាំងបុរាណ និងសរសេរអក្សរដែលចង់ថា មហានគរ នោះទៀត រឹតតែ ប្រមាថអក្សរសាស្ត្រខ្មែរទៅទៀត។(បន្ថែម៖ ខ្ញុំគ្រាន់តែចង់ប្រាប់ថា ពាក្យ«មហានគរ» ជាពាក្យយើងហៅសំដៅ«សម័យអង្គរដ៏រុងរឿង» ដែលបានកន្លងផុតទៅនោះទេ ដូចឈ្មោះ«ដេវីត» មិនអាចមាននៅសម័យអង្គរអញ្ចឹង។
ខ្ញុំឥតទើសក្បាលជាមួយអ្នកណាហៅសម័យអង្គរថា «មហានគរ»ទេ។ ខ្ញុំថា «ប្រមាថអក្សរសាស្ត្រខ្មែរ» មកពីសរសេរតុបតែងព្យញ្ជនៈ «ម» និង «រ»ផ្កាប់ចុះក្រោម តែប៉ុណ្ណោះ។ បើគេសរសេរឈ្មោះអស់លោក ដោយផ្កាប់តួខ្លះ បានដែរទេ? បើទាំងអស់គ្នាយល់ព្រមបន្តធ្វើបែបហ្នឹងទៅ)»។

ភ្ជាប់ជាមួយការប្រតិកម្មនេះ លោកបណ្ឌិត វង់ សុធារ៉ា ក៏បានលើកឡើងទៀតថា «ចំណុចសំខាន់ មិនមែនត្រង់ហ្នឹងទេ។ សូមកុំច្រឡំតទៅទៀត។ ចំណុចខុសធ្ងន់ គឺសរសេរ ម និង រ ផ្កាប់។ តែចំណុចនេះ ម្ចាស់បានកែតម្រូវហើយ ដោយយកហ្វុងអក្សរបុរាណដែលខ្ញុំបានផ្តើមគូរតាំងពីឆ្នាំ១៩៩៨នោះ មកសរសេរ ជំនួសវិញ។ ទោះបី វាមិនឆ្លើយតបប្រវត្តិសាស្ត្រពិត ក៏យើងទទួលយកបាន ដោយចាត់ទុកជាការ ប្រឌិតមួយ។
សូមកុំភ្លេចថា មានអ្នកចេះដឹងខាងផ្នែកនេះជាជនជាតិថៃច្រើនណាស់ ទើបខ្ញុំលូកមាត់ ពន្យល់ខាងលើ។ នៅពេលឃើញcommentsទទឹងទទែងច្រើន ទើបខ្ញុំបញ្ជាក់បន្ថែម។
ម្យ៉ាងទៀត ប្អូនដេវីត ថាបទចម្រៀង «មហានគរ»នេះទុកច្រៀងអបអរសាទរមហាព្រឹត្តិការណ៍SEA Game32ផង ក៏នាំឱ្យវារិតតែសំខាន់ទៅទៀត»៕

កំពង់ផែអន្តរជាតិ​ខ្នាតធំ​ក្នុងតំបន់​ នៅខេត្តព្រះសីហនុ ត្រូវបានបើកការដ្ឋានសាងសង់​ហើយ​កាលពីថ្ងៃទី១ ខែឧសភា ឆ្នាំ​២០២៣ ក្រោមអធិបតីភាពសម្តេចតេជោ ហ៊ុន សែន។

ជាទូទៅ នៅពេលដែលយើងមានបញ្ហាដូចជា រលាកអញ្ចាញធ្មេញ ឬពងបែកមាត់ យើងមិនសូវជាចាប់អារម្មណ៍ប៉ុន្មានទេ ព្រោះគិតថាវាជាបញ្ហាទូទៅ ដែលមនុស្សភាគច្រើនកើតស្ទើរគ្រប់គ្នា។ ប៉ុន្តែមានដឹងអត់ថា មាត់របស់យើងក៏អាចកើតមានបញ្ហាគីសក្នុងមាត់បានដែរ។ ដូច្នេះហើយតើអ្វីទៅគឺជាគីសក្នុងមាត់?
គីសក្នុងមាត់គឺជាថង់ខ្យល់មួយដែលផ្ទុកសារធាតុរាវ ហើយលាយឡំនិងសារធាតុហ្គាស នឹងមានរាងជារង្វង់ឬពងក្រពើ ដែលស្ថិតនៅឆ្អឹងថ្គាមផ្នែកខាងក្រោម ឬផ្នែកខាងលើ។

មូលហេតុអ្វីបានជាមានគីសក្នុងមាត់?
គីសក្នុងមាត់ភាគច្រើនកើតឡើងដោយសារធ្មេញរបស់យើងងាប់សសៃ ឬរលាកដល់បណ្តូលធ្មេញ ដោយមិនមានការព្យាបាលត្រឹមត្រូវ។

តើគីសក្នុងមាត់មានផលប៉ះពាល់អ្វីខ្លះដល់សុខភាព?
គីសក្នុងមាត់មានផលប៉ះពាល់ជាច្រើនដល់សុខភាពដូចជា៖ បាត់បង់ធ្មេញ ខូចទម្រង់មុខ មានការឈឺចាប់ និងហើមជាដើម លើសពីនេះបើសិនមិនមានការព្យាបាលត្រឹមត្រូវនោះវាក៏អាចបណ្តាលឱ្យមានការប៉ះពាល់ដល់អាយុជីវិតបានទៀតផង។

តើធ្វើយ៉ាងម៉េចទើបព្យាបាលជំងឺនេះបាន?
គីសក្នុងមាត់មាន២ទំហំគឺគីសដុំតូច និងគីសដុំធំ។ គីសដុំតូចយើងអាចព្យាបាលតាមរយះការដាក់ថ្នាំនៅចន្លោះធ្មេញ និងស្ថិតនៅក្រោមការតាមដានរបស់ទន្តពេទ្យ។ គីសដុំធំគឺយើងអាចព្យាបាលដោយធ្វើការវះកាត់។ ទោះជាយ៉ាងណាក៏ដោយអ្នកជំងឺដែលមានគីសក្នុងមាត់ដាច់ខាតត្រូវតែទៅជួបនឹងទន្តពេទ្យដើម្បីធ្វើការវះកាត់ឱ្យបានត្រឹមត្រូវ ៕

ត្រឹមរយៈពេល២ខែ ដើមឆ្នាំ២០២៣ កម្ពុជាទទួលបានទេសចរជប៉ុនចំនួន ១១,៤៦៥នាក់ មានការកើនឡើង ១១៧៦.៧% ធៀបនឹងរយៈពេលដូចគ្នាឆ្នាំ២០២២ ខណៈក្នុងឆ្នាំ២០២៣នេះ កម្ពុជារំពឹងថានឹងទទួលបានទេសចរជប៉ុនប្រមាណ ៧ម៉ឺននាក់។ នេះបើតាមការឱ្យដឹងពីក្រសួងទេសចរណ៍ស្តីពីពិព័រណ៍កម្ពុជា Cambodia Festival 2023 នៅទីក្រុងតូក្យូ ប្រទេសជប៉ុន។

ប្រទេសជប៉ុនជាទីផ្សារគោលដៅសំខាន់សម្រាប់កម្ពុជា បើយោងតាមស្ថិតិទេសចរណ៍ប្រចាំឆ្នាំ២០២២ កម្ពុជាទទួលបានទេសចរចំនួន២,២៧៦,៦២៦ នាក់ កើនឡើង១០៥៨.៦% ធៀបនឹងឆ្នាំ២០២១ ដែលក្នុងនោះទេសចរជប៉ុនមានចំនួន២៩,៧៣៣នាក់ មានការកើនឡើង ១៣៧៨.៥% បើធៀបនឹងឆ្នាំ២០២១។

ដោយឡែក ក្នុងឆ្នាំ២០២៣នេះ កម្ពុជារំពឹងថានឹងទទួលបានទេសចរជប៉ុនប្រមាណ៧ម៉ឺននាក់ក្នុងឆ្នាំ២០២៣។ ការរំពឹងនេះធ្វើឡើងនាឱកាស កម្ពុជាជំរុញការផ្សព្វផ្សាយសក្តានុពលទេសចរណ៍កម្ពុជានៅលើទីផ្សារជប៉ុន ក្នុងពិព័រណ៍កម្ពុជា Cambodia Festival 2023 នៅទីក្រុងតូក្យូ ប្រទេសជប៉ុនថ្ងៃទី៣-៤ ខែឧសភា ឆ្នាំ២០២៣។

គួរបញ្ជាក់ថា កម្មវិធីពិព័រណ៍កម្ពុជាឆ្នាំ២០២៣មានការតាំងបង្ហាញផលិតផល ម្ហូបអាហារ ភេសជ្ជៈ និងវត្ថុអនុស្សាវរីយ៍របស់ខ្មែរ និងការបង្ហាញផ្សព្វផ្សាយពីសិល្បៈ វប្បធម៌ ប្រពៃណី តាមរយៈការសម្តែងសិល្បៈជូនភ្ញៀវទស្សនាកម្សាន្ត ដោយមានស្តង់សរុបប្រមាណ១០០ស្តង់។ ឆ្នាំនេះផងដែរ ពិព័រណ៍កម្ពុជារំពឹងថានឹងមានអ្នកចូលរួមទស្សនាពីសំណាក់ភ្ញៀវបរទេស និងជនជាតិខ្មែរប្រមាណជា៥ម៉ឺននាក់។នៅក្នុងកម្មវិធីខាងលើនេះ មានការចូលរួមជាអធិបតីពីសំណាក់ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន ឯកឧត្តម ឈួន ដារា រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងពាណិជ្ជកម្ម ឯកឧត្តម IMAMURA Masahiro សមាជិកសភាតំណាងរាស្ត្រជប៉ុន និងជាប្រធានសម្ព័ន្ធមិត្តភាពសភាជប៉ុន-កម្ពុជា ឯកឧត្តម TAKAGI Kei អនុរដ្ឋមន្ត្រីទំនាក់ទំនងការបរទេសនៃប្រទេសជប៉ុន និងកញ្ញា MINAMINO Yoko ទូតសុឆន្ទៈនៃខួបលើកទី៧០នៃការបង្កើតទំនាក់ទំនងការទូតកម្ពុជា-ជប៉ុន អមដោយពិធីកាត់ខ្សែបូ ការសម្តែងសិល្បៈ របាំអប្សរា និងការដើរទស្សនាតាមស្តង់ពិព័រណ៍នានារបស់គណៈអធិបតី៕