ក្រសួងអប់រំ យុវជន និងកីឡា បានចេញសេចក្តីថ្លែងការប្រកាសគាំទ្រដល់ឯកឧត្តមនាយឧត្តមសេនីយ៍ សៅ សុខា បន្តធ្វើជាប្រធានសហព័ន្ធកីឡាបាល់ទាត់កម្ពុជា ជាបន្តទៀត បន្ទាប់ពីប្រធាន FFC រូបនេះប្រកាសថាលោកនឹងលាលែងពីតំណែងប្រសិនបើក្រុមជម្រើសជាតិបាល់ទាត់បុរសកម្ពុជាអាយុក្រោម២២ឆ្នាំ មិនអាចឈានដល់វគ្គពាក់កណ្តាលផ្តាច់ព្រ័ត្របាន ខណៈកម្ពុជាធ្វើជាម្ចាស់ផ្ទះព្រឹត្តិការណ៍ស៊ីហ្គេមលើកទី៣២នេះ។

សេចក្តីថ្លែងការរបស់ក្រសួងអប់រំ នៅថ្ងៃទី៣ ខែឧសភា ឆ្នាំ២០២៣ បានឱ្យដឹងថា ក្រោមការដឹកនាំរបស់ ឯកឧត្តម នាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់ រយៈពេលជាង១០ឆ្នាំកន្លងមក បានធ្វើឱ្យ កីឡាបាល់ទាត់ នៅក្នុងព្រះរាជាណាចក្រកម្ពុជា មានការរីកចម្រើន ទាំងបរិមាណ និងគុណភាព ជាអាទិ៍ សមត្ថភាពកីឡាករ គ្រូបង្វឹក មន្ត្រី អាជ្ញាកណ្តាល និងក្លិបបាល់ទាត់អាជីព នានា មានសមត្ថភាព និងមានលទ្ធភាពចូលរួមការប្រកួតប្រជែងជាលក្ខណៈតំបន់ និងអន្តរជាតិ ជាពិសេស នៅក្នុងការប្រកួតនាពេលកន្លងមក ការខិតខំប្រកួត និងបច្ចេកទេសលេងបាល់របស់កីឡាករបាល់ទាត់កម្ពុជា បានទាក់ទាញទស្សនិកជនឱ្យចូលរួមទស្សនាផ្ទាល់ និងទស្សនាតាមអនឡាញ ភ្លូកទឹក ភ្លូកដី និងជឿជាក់ថា បាល់ទាត់កម្ពុជានឹងឈានទៅប្រកួតប្រជែងនៅកម្រិតតំបន់បាន។

បន្ថែមលើនេះទៀត ក្នុងស្មារតីកសាង និងប្រមូលនូវធនធានកីឡាករបាល់ទាត់ ឯកឧត្តម នាយឧត្ដម សេនីយ៍ ប្រធានសហព័ន្ធ បានរៀបចំឱ្យមាននូវទីលានបាល់ទាត់នៅតាមសាលាតម្រង់ទិសទាំង ២៥ រាជធានី ខេត្ត និងរៀបចំកម្មវិធីអភិវឌ្ឍកីឡាបាល់ទាត់នៅតាមសាលាបឋមសិក្សា និងអនុវិទ្យាល័យ ដែលកត្តាទាំងនេះ បានធ្វើឱ្យសិស្សានុសិស្ស និងយុវជនជាច្រើន ចូលរួមហ្វឹកហាត់ និងលេងកីឡាបាល់ទាត់។ ម្យ៉ាងវិញទៀត ក្រោមការដឹកនាំរបស់ ឯកឧត្តម នាយឧត្តមសេនីយ៍ ប្រធានសហព័ន្ធ ការលេងកីឡាបាល់ទាត់ មានសកម្មភាព យ៉ាងផុលផុសក្នុងស្រទាប់យុវវ័យ នៅគ្រប់ទីកន្លែង ក្នុងព្រះរាជាណាចក្រកម្ពុជា។
ក្រសួងអប់រំ យុវជន និងកីឡាសូមប្រកាសគាំទ្រ និងស្នើសុំ ឯកឧត្តម នាយឧត្តមសេនីយ៍ សៅ សុខា នៅបន្តធ្វើជាប្រធានសហព័ន្ធកីឡាបាល់ទាត់កម្ពុជាបន្តទៀត៕

រដ្ឋបាលរាជធានីភ្នំពេញ នាថ្ងៃទី៣ ខែឧសភា ឆ្នាំ២០២៣ បានប្រកាសពីទីតាំងមួយចំនួននៅរាជធានីភ្នំពេញដែលមានការផ្សាយបន្តផ្ទាល់ពិធីបើក និងបិទព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ នៅវិមានពហុកីឡដ្ឋានមរតកតេជោ ខណៈកម្មវិធីនេះពុំមានសំបុត្រចែកជូនពលរដ្ឋដើម្បីទស្សនាផ្ទាល់នោះទេ។

សាលារាជធានីភ្នំពេញ បានបង្ហាញទីតាំងចំនួន៧ទីតាំងដែលមានការផ្សាយបន្តផ្ទាល់ចាប់ពីម៉ោង ៦:៣០ នាទីយប់ រហូតដល់ចប់ពិធី ដែលរួមមាន៖
១-សួនច្បារមុខវត្តបទុមវតី ស្ថិតនៅក្នុងសង្កាត់ចតុមុខ ខណ្ឌដូនពេញ
២-សួនច្បារមាត់ទន្លេទល់មុខភោជនីយដ្ឋានមេត្រូ ស្ថិតនៅក្នុងសង្កាត់ផ្សារកណ្តាលទី១ ខណ្ឌដូនពេញ
៣-ក្នុងបុរីប៉េងហួតបឹងស្ទើរ ស្ថិតនៅក្នុងសង្កាតីនិរោធ ខណ្ឌច្បារអំពៅ
៤-សួនច្បារមិត្តភាពក្បែរក្រសួងការពារជាតិ ស្ថិតនៅក្នុងសង្កាត់មិត្តភាព ខណ្ឌ៧មករា
៥-សួនច្បារទល់វិទ្យាស្ថានស្រាវជ្រាវ និងអភិវឌ្ឍន៍ព្រៃឈើ-សត្វព្រៃ ស្ថិតនៅក្នុងសង្កាត់ គោកឃ្លាង ខណ្ឌសែនសុខ
៦-សួនច្បារព្រះនាងប្រាជ្ញាបារមី ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ
៧-ទីលានប្រជាធិបតេយ្យ ក្បែរស្ពានអាកាសឫស្សីកែវ ស្ថិតនៅក្នុងសង្កាត់ឫស្សីកែវ ខណ្ឌឫស្សីកែវ។

គួរបញ្ជាក់ផងដែរថា កម្ពុជានឹងរៀបចំពិធី បើក និងបិទព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ក្រោមអធិបតីភាពដ៏ខ្ពង់ខ្ពស់បំផុត សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលប្រព្រឹត្តទៅនាថ្ងៃទី០៥ ខែឧសភា ឆ្នាំ២០២៣ និងថ្ងៃទី១៧ ខែឧសភា ឆ្នាំ២០២៣៕

អាជ្ញាធរជាតិអប្សរាប្រកាសជូនដំណឹងដល់ពលរដ្ឋពីការការបិទចរាចរ និងការបង្វរទិសដៅទស្សនា ទៅតាមទីតាំងសំខាន់ៗមួយចំនួននៅ រមណីយដ្ឋានអង្គរ ដើម្បីរៀបចំព្រឹត្តិការណ៍ប្រកួតស៊ីហ្គេមលើកទី៣២ (32nd SEA Games) និងអាស៊ាន ប៉ារ៉ាហ្គេម លើកទី១២(12 ASEAN Para Games) ឆ្នាំ២០២៣។

តាមសេចក្តីជូនដំណឹងបានឱ្យដឹងថា ការបិទចរាចរ និងការបង្វែរទិសដៅទស្សនាទៅតាមទីតាំងសំខាន់ៗមួយចំនួននៅរមណីយដ្ឋានអង្គរ ដែលត្រូវរៀបចំប្រកួតកីឡាដូចខាងក្រោម៖
១- បិទការចេញចូលបរិវេណមុខប្រាសាទអង្គរវត្ត រហូតដល់ខ្លោងទ្វារដៃឆ្នាំង សម្រាប់ការប្រកួត កីឡារត់ម៉ារ៉ាតុន និងដើរប្រណាំង នៅថ្ងៃទី៦ ខែឧសភា ឆ្នាំ២០២៣ ចាប់ពីម៉ោង៥៖៣០នាទី ព្រឹក ដល់ម៉ោង១៨៖០០នាទីល្ងាច។

២- បិទការចូលទស្សនាប្រាសាទអង្គរវត្តតាមច្រកខាងលិច និងបិទការឆ្លងកាត់ទៅទស្សនាតំបន់ អង្គរធំ នៅថ្ងៃទី១១ ខែឧសភា ឆ្នាំ២០២៣ ចាប់ពីម៉ោង៦៖០០នាទីព្រឹក ដល់ម៉ោង១៣៖០០ នាទីរសៀល ដើម្បីរៀបចំការប្រកួតវិញ្ញាសាទោចក្រយានបុរស និងនារីចម្ងាយ៥០គ.ម ដែលនឹងប្រព្រឹត្តទៅនៅជុំវិញផ្លូវមុខអង្គរវត្ត ត្រពាំងសេស និងផ្លូវប៉ារីសអង្គរវត្ត។ ភ្ញៀវទេសចរអាចចូល ទស្សនាតាមច្រកខាងកើតប្រាសាទអង្គរវត្ត។

៣- បិទការឆ្លងកាត់បរិវេណវង់ធំ នៅថ្ងៃទី១២ និងថ្ងៃទី១៣ ខែឧសភា ឆ្នាំ២០២៣ ចាប់ពីម៉ោង ៦៖០០នាទីព្រឹក ដល់ម៉ោង១៥៖០០នាទីរសៀល ដើម្បីរៀបចំការប្រកួតវិញ្ញាសាកង់គួកបុរស និងនារីចម្ងាយ១៧១,៥គម និង៩៨គ.ម៕

កូរ៉េខាងត្បូង៖ រាជរដ្ឋាភិបាលកូរ៉េកំពុងប្រឈមមុខនឹងការខ្វះខាតកម្លាំងពលកម្មនិងបញ្ហាធនធានមនុស្ស នៅតាមកសិដ្ឋាន និងរោងចក្រ ខណៈដែលយុវជនកូរ៉េខាងត្បូងភាគច្រើនចាត់ទុកថាការងារនេះមានកម្រិតទាប ដោយកង្វះខាតនេះនឹងធ្វើឱ្យកសិដ្ឋាន និងរោងចក្រមួយចំនួនគ្មានកម្មករ។
បច្ចុប្បន្នក្រសួងការងារ កំពុងរៀបចំផែនការជ្រើសរើសពលករបរទេសប្រមាណ ១១ម៉ឺននាក់ ក្នុងកិច្ចខិតខំប្រឹងប្រែងដោះស្រាយរាល់បញ្ហាដែលកើតមាន ។ ប្រទេសកូរ៉េបានចាប់ផ្តើមមានគោលនយោបាយជាច្រើនដើម្បីទាក់ទាញពលករបរទេសដូចជាការបង្កើនកម្រិតទទួលទាន មុខរបរ ពេលវេលាធ្វើការ ប្រាក់បៀវត្សរ៍ និងរបបប្រាក់ខែ។ លើសពីនេះ និយោជកជាច្រើនក៏បានសាងសង់កន្លែងស្នាក់នៅប្រកបដោយផាសុខភាព និងបំពាក់ដោយសម្ភារៈល្អផងដែរ ។

ការស្ទង់មតិរបស់សកម្មជន និងកម្មករនៅឆ្នាំ ២០២១ បានរកឃើញថា ជនអន្តោប្រវេសន៍នៅ Pocheon ត្រូវធ្វើការពី ១០ ទៅ ១៥ ម៉ោងក្នុងមួយថ្ងៃ ដោយមានការឈប់សម្រាកថ្ងៃសៅរ៍រៀងរាល់ខែ។ ក្នុងមួយខែៗ ទទួលបានប្រាក់ខែពី ១,៣០០-១,៦០០ ដុល្លារ ដែលទាបជាងប្រាក់បៀវត្សរ៍អប្បបរមាដែលបានកំណត់។
លោក Kim Dal-sung ដែលគ្រប់គ្រងមជ្ឈមណ្ឌលពលករអន្តោប្រវេសន៍នៅទីក្រុង Pocheon បាននិយាយថា ខណៈពេលដែលរដ្ឋាភិបាលកំពុងធ្វើការដើម្បីកែលម្អស្ថានភាពនេះ លក្ខខណ្ឌការងារសម្រាប់ពលករចំណាកស្រុកជាច្រើននៅតែមានសភាពធ្ងន់ធ្ងរនៅឡើយ។

ប្រការនេះបាននាំឱ្យក្រុមការងាររបស់លោក Kim-suk ត្រួតពិនិត្យលំនៅដ្ឋាន និងកន្លែងធ្វើការរបស់ពលករបរទេសឱ្យបានទៀងទាត់ យ៉ាងហោចណាស់ពីរដងក្នុងមួយសប្តាហ៍ និងរក្សាទំនាក់ទំនងតាមទូរស័ព្ទ ដើម្បីឱ្យពួកយើងអាចជួយក្នុងករណីមានអាសន្ន។

ចំណែកឯកសិដ្ឋានរបស់លោក Kim-wing លោកបានសាងសង់បន្ទប់ស្នាក់នៅយ៉ាងទូលាយសម្រាប់កម្មករកាលពី៤ឆ្នាំមុន មុនពេលដែលគោលនយោបាយរបស់រដ្ឋាភិបាលត្រូវបានអនុវត្ត។ ក្រៅពីការផ្តល់លក្ខខណ្ឌរស់នៅដ៏សម្បូរបែបនេះ និយោជកគិតថានេះគឺជាមធ្យោបាយដ៏ល្អបំផុតក្នុងការរក្សាកម្មករបរទេស៕
ប្រភព៖vnexpress

កីឡាគុនល្បុក្កតោ និងកីឡាគុនខ្មែរ ត្រូវបានដាក់បញ្ចូលជាផ្លូវការក្នុងធម្មនុញ្ញ នៃសហព័ន្ធកីឡាអាស៊ីអាគ្នេយ៍ ដែលនាំឱ្យកម្ពុជាមានលទ្ធភាពរៀបចំការប្រកួតកីឡាទាំងពីរក្នុងព្រឹត្តិការណ៍ស៊ីហ្គេមជាបន្ដបន្ទាប់ទៀតនៅបណ្ដាប្រទេសម្ចាស់ផ្ទះក្រោយ។ នេះបើតាមប្រសាសន៍របស់ឯកឧត្តម វ៉ាត់ ចំរើន អគ្គលេខាធិការ NOCC និងជាអគ្គលេខាធិការ CAMSOC ។
ការសម្រេចនេះបានធ្វើឡើងក្នុងកិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍ (SEAGF) នៅថ្ងៃទី៤ ខែឧសភា ក្រោមអធិបតីភាពឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) ដោយមានអ្នកចូលរួមពីគណៈកម្មាធិការអូឡាំពិកនៃសមាជិកអាស៊ាន។

បន្ថែមពីលើនេះ ឯកឧត្តម វ៉ាត់ ចំរើន មានប្រសាសន៍ប្រាប់អ្នកសារព័ត៌មានថា កិច្ចព្រមព្រៀងពីប្រទេសជាសមាជិកគឺឆ្លើយតបទៅនឹងកិច្ចខិតខំប្រឹងប្រែងរបស់កម្ពុជាក្នុងការរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ២០២៣ បានយ៉ាងល្អ ដែលទទួលបានការចាប់អារម្មណ៍ពីពិភពលោក ក្រោមបដា “កម្ពុជា ២០២៣” និងជាមួយពាក្យស្លោក “កីឡា៖ រស់ក្នុងសន្តិភាព”។

ជាមួយគ្នានេះ ក្នុងនាមជាប្រទេសម្ចាស់ផ្ទះដែលកម្ពុជាទើបមានឱកាសបានធ្វើជាលើកដំបូង គ្រប់ប្រតិភូកីឡាមកចូលរួមព្រឹត្តការណ៍កីឡាស៊ីហ្គេមក៏កម្ពុជា សម្រេចមិនគិតថ្លៃសេវាអាហារ និងកន្លែងស្នាក់ផងដែរ។
គូសបញ្ជាក់ថា ការប្រកួតកីឡាស៊ីហ្គេមចាប់ផ្តើមពីថ្ងៃទី០៥-១៧ ខែឧសភា ឆ្នាំ២០២៣ និង អាស៊ានប៉ារ៉ាហ្គេម ២០២៣ ចាប់ផ្តើមពីថ្ងៃទី០៣-០៩ ខែមិថុនា ឆ្នាំ២០២៣។ ការប្រកួតកីឡាស៊ីហ្គេម មានសរុបចំនួន ៣៧ប្រភេទកីឡា ត្រូវនឹងវិញ្ញាសារហូតដល់ ៥៨៦វិញ្ញាសា ដែលធ្វើឡើងនៅក្នុងរាជធានីភ្នំពេញ និងខេត្តចំនួន៤ រួមមាន៖ ព្រះសីហនុ, កែប, កំពត និងសៀមរាប៕

ការទន្ទឹងរងចាំអស់រយៈពេលជាយូរ ថ្ងៃនេះបានមកដល់ គឺព្រឹត្តិការណ៍ជាប្រវត្តិសាស្ត្រនៃប្រទេសកម្ពុជា ដោយការបើកព្រឹត្តិការណ៍សុីហ្គេមជាផ្លូវការនឹងធ្វើឡើងនៅក្នុងយប់នេះ។

ទន្ទឹមគ្នាផងដែរថា រដ្ឋបាលខេត្តជ្រផយចង្វារ បានចេញសេចក្តីប្រកាស និងអំពាវនាវដល់មហាជន ដែលបានចូលរួមទស្សនាពិធីបើក ទាំងអស់ ហាមដាច់ខាតប៉ះពាល់ឧបករណ៍ដែលបានតម្លើងក្នុងពហុកីឡាដ្ឋានមរតកតេជោ ជាពិសេសអំពូលភ្លើង (Light Stick) ព្រោះវាសម្រាប់បង្ហាញផ្ទាំងទស្សនីយភាពផ្សេងៗសម្រាប់កម្មវិធីបើក និងកម្មវិធីបិទ។

សូមបញ្ជាក់ដែរថាព្រឹត្តិការណ៍៍សុីហ្គេមលើកទី៣២ ដែលកម្ពុជាធ្វើជាម្ចាស់ផ្ទះនេះ នឹងប្រព្រឹត្តិទៅពីថ្ងៃទី៥ ខែឧសភា ដល់ថ្ងៃទី១៧ ខែឧសភា ឆ្នាំ២០២៣៕

ក្រោយពីផ្តួលកីឡាករិនីសិង្ហបុរី វៀតណាម និងថៃ នៅក្នុងប្រភេទកីឡា​ជូជឺតស៊ូ លើវិញ្ញាសា Ne-Waza ទម្ងន់ ៥២គីឡូក្រាម ហើយនោះ ពេលនេះកីឡាការិនី ខាន់ ចេសា  កំពុងតែសម្រាកយកកម្លាំង ត្រៀមប្រកួតដណ្តើមមេដាយមាសនៅរសៀល៤នេះ។

៣ប្រកួតរបស់ខាន់ ចេសានៅក្នុងថ្ងៃនេះ គឺបិទគូប្រកួតសូន្យពិន្ទុទាំងអស់ ដោយក្នុងនោះ ពេលប៉ះកីឡាការិនីវៀតណាម ពួកគេបានបោះបង់ចោលការប្រកួតថែមទៀត។

តែយ៉ាងណាមិញ នេះជាប៉ុន្មានប្រកួតដំបូងប៉ុណ្ណោះ យើងមានតែសង្ឃឹម និងរងចាំមើលតទៅទៀត ហើយរំពឹងថានាងនឹងធ្វើបានកាន់តែល្អទៀត នៅវេលាម៉ោង៤នេះ៕