ប្រទេសថៃ ៖ ក្រុមកសិករដាំស្វាយនៅស្រុកវាំងថង ខេត្តពិស្នុលោក កំពុងជួបបញ្ហាធ្ងន់ធ្ងរដោយសារតម្លៃស្វាយណាមដកម៉ាយស្មើត្រឹមតែ១០បាតប៉ុណ្ណោះក្នុង១គីឡូក្រាម ។ តម្លៃធ្លាក់ចុះនេះ ដោយសារគ្មានអាជីវករមកទទួលទិញពីចម្ការ ។ ម្ចាស់ចម្ការនិយាយថា ពួកគេមិនអាចស៊ូទ្រាំនឹងតម្លៃស្វាយថោកបែបនេះទេ ហើយនៅពាក់កណ្តាលខែឧសភា បើនៅតែគ្មានទីផ្សារទៀត ពួកគេនឹងទុកឱ្យវាជ្រុះហើយ ។

អ្នកដាំស្វាយណាមដកម៉ាយនៅឃុំបានក្លាង ស្រុកវាំងថង ខេត្តពិស្នុលោក និយាយថា បច្ចុប្បន្ន ស្វាយរាប់រយដើមនឹងទុំដំណាលគ្នា ប៉ុន្តែរកអ្នកទិញមិនបានសោះ ។ ពួកគេបានស្នើទៅកាន់មន្ត្រីថ្នាក់ខេត្តឱ្យជួយ ដោយសារនៅពាក់កណ្តាលខែឧសភា ស្វាយណាមដកម៉ាយពណ៌មាសរាប់រយដើមដល់ពេលប្រមូលផលហើយ ។ បើគ្មានការជួយជ្រោមជ្រែងទេ វានឹងជ្រុះខូចទាំងអស់ ។

អ្នកស្រី Sornsiri Wongwanarat អាយុ៤៦ឆ្នាំ ជាម្ចាស់ចម្ការស្វាយនៅឃុំបានក្លាង ស្រុកវាំងថង ខេត្តពិស្នុលោក និយាយថា ឆ្នាំ២០២៣ អ្នកដាំស្វាយជាច្រើនហិកតាបានប្រឈមនឹងបញ្ហាស្វាយណាមដកម៉ាយពណ៌មាសមានតម្លៃថោក ហើយលក់មិនដាច់ ។ ម្ចាស់ចម្ការរកអាជីវករមកទិញស្វាយមិនបាន ខណៈស្វាយរាប់រយដើមដល់ពេលប្រមូលផល ។ រីឯស្វាយឈូកអាណាន់ ដែលគេនិយមហូបខ្ចី ឬយកទៅត្រាំ ក៏គ្មានអ្នកទិញដែរ បើទោះជាគាត់បានលក់តាមអនឡាញក្នុងតម្លៃតែ១បាតក្នុង១គីឡូក្រាមក្តី ។ អ្នកស្រីបន្តថា ពេលនេះ គាត់បានបេះវាមកគរទុកចំនួន៤តោន ក៏នៅតែលក់មិនដាច់ទៀត ។ តម្លៃស្វាយបានធ្លាក់ចុះជាខ្លាំង គាត់លក់ស្វាយតម្លៃត្រឹម១០បាតនេះ គឺសុខចិត្តខាតដើមទុន ប៉ុន្តែនៅតែគ្មានអ្នកទិញ ។

បុរសម្ចាស់ចម្ការស្វាយម្នាក់ទៀតនិយាយថា ឈ្មួញកណ្តាលមកទិញស្វាយប្រាប់ថា តម្លៃស្វាយ១០បាតក្នុង១គីឡូក្រាមនេះមិនរួចខ្លួនទេ ហើយពួកគេបានតថ្លៃមកនៅត្រឹមតែ៥បាតក្នុង១គីឡូក្រាមសម្រាប់ផ្លែល្អៗ ឯផ្លែណាមិនសូវល្អមានតម្លៃតែ២-៣បាតប៉ុណ្ណោះ ។ បើគាត់លក់ក្នុងតម្លៃនេះ កាន់តែខាតដើមទុនថែមទៀត ខណៈស្វាយណាមដកម៉ាយពណ៌មាស គាត់បានចំណាយដើមទុនច្រើនសម្រាប់ថែទាំ ។ ជាក់ស្តែង ថង់រុំផ្លែស្វាយ១ផ្លែ គឺត្រូវចំណាយប្រាក់១,៣៥បាតទៅហើយ នេះមិនគិតថ្លៃជី និងថ្នាំទេ ហើយនៅឆ្នាំ២០២៣ ជីមានតម្លៃខ្ពស់ណាស់ ខណៈថ្លៃឈ្នួលកម្មករ១ថ្ងៃចាប់ពី២៥០បាត ទៅ៣០០បាតក្នុងម្នាក់ ។ បើគាត់លក់ស្វាយតម្លៃតែ២បាត, ៣បាត ឬ៥បាត គាត់ពិតជាមិនសល់អ្វីទេ ។

ចំណែកអ្នកស្រី Orawan Fuengkaew អាយុ៦៥ឆ្នាំ និងមានចម្ការនៅក្បែរគ្នាប្រាប់ថា គាត់សម្រេចចិត្តលក់ស្វាយចំនួន៣តោនដើម្បីនាំចេញទៅប្រទេសឡាវ ក្នុងតម្លៃត្រឹមតែ៨បាតក្នុង១គីឡូក្រាមសម្រាប់ផ្លែល្អ រីឯផ្លែមិនល្អ តម្លៃពី២-៣បាត ។ គាត់បន្តថា គាត់ខាតដើមទុន ប៉ុន្តែគាត់មិនដឹងធ្វើដូចម្តេច ព្រោះស្វាយទុំជារៀងរាល់ថ្ងៃ ហើយទុកយូរមិនបានទេ បើគាត់មិនលក់ មានតែបោះចោល ព្រោះបើយកវាទៅកែច្នៃ ក៏មិនទាន់ដែរ ។ កាលពីមុន គាត់ធ្លាប់លក់ក្នុងតម្លៃពី៣០-៤៥បាត ប៉ុន្តែតាំងពីលោក ប្រាយុទ្ធ ចាន់អូចា ធ្វើជានាយករដ្ឋមន្ត្រី តម្លៃស្វាយក៏បានធ្លាក់ចុះជាបន្តបន្ទាប់ ។

អ្នកស្រី Orawan Fuengkaew បន្តថា ពេលនេះ គាត់ចង់បាននាយករដ្ឋមន្ត្រីថ្មី ដែលជួយដល់កសិករដាំស្វាយ មិនមែនជួយតែជ័រកៅស៊ូទេ ។ ក្រុមអ្នកចៀរជ័រកៅស៊ូនាំគ្នាធ្វើបាតុកម្ម ជ័រកៅស៊ូក៏ឡើងថ្លៃ ហើយជ័រកៅស៊ូមិនខូចខាតទេ ព្រោះអាចទុកយូរបាន ប៉ុន្តែស្វាយរបស់គាត់ទុំហើយលក់មិនទាន់ វាក៏ខូចអស់ ហើយអ្នកស្រីមិនចេះទៅធ្វើបាតុកម្មដូចគេទេ ។ អ្នកស្រីបន្តថា ជ័រកៅស៊ូប្រៀបដូចជាកូនរបស់ប្រពន្ធដើម ឯស្វាយជាកូនប្រពន្ធចុង ហេតុនេះ គាត់សំណូមពរឱ្យមន្ត្រីខេត្ត-ស្រុក ឬភ្នាក់ងារពាក់ព័ន្ធជួយរកទីផ្សារឱ្យកសិករដាំស្វាយនៅស្រុកវាំងថង ខេត្តពិស្នុលោកផង ។

អ្នកស្រីបន្ថែមថា ពួកយើងដាំស្វាយនេះ មិនមែនយើងមិនព្យាយាមរកផ្លូវចេញទេ ប៉ុន្តែមានអ្នកដាំស្វាយច្រើននាក់ ទើបធ្វើឱ្យរដូវប្រមូលផលមកដល់មានផ្លែស្វាយច្រើនលើសលប់ ហើយតម្លៃក៏ធ្លាក់ចុះ ។ គាត់បានថែទាំស្វាយណាមដកម៉ាយគ្រប់វិធី មិនថាដាក់ថ្នាំ ឬជី ប៉ុន្តែនៅឆ្នាំ២០២៣ អាកាសធាតុផ្លាស់ប្តូរដូចជា ភ្លៀងធ្លាក់ និងក្តៅខ្លាំងពេក ទើបធ្វើឱ្យស្វាយដែលជិតប្រមូលផលទៅហើយខូចខាតអស់ជាច្រើនហិកតា ៕ ប្រភព ៖ Thairath

អាឡឺម៉ង់៖ អត្តពលិក Medina Eisa អាយុ ១៨ ឆ្នាំ បានឈ្នះមេដាយមាសចម្ងាយ ៥ គីឡូម៉ែត្រក្នុងព្រឹត្តិការណ៍ Adizero Road to Records ដោយប្រើថិរវេលា ១៤ នាទី និង ៤៦ វិនាទី បង្កើតកំណត់ត្រា U២០ ។
Eisa គឺជាអ្នករត់ប្រណាំងដ៏មានសក្តានុពលរបស់ប្រទេសអេត្យូពី នៅថ្ងែទី២៩ ខែមេសា Eisa បានបញ្ចេញកម្លាំងខ្លួនឯង ហើយតាមទាន់អ្នករត់ប្រណាំងជាមួយមិត្តរួមក្រុម។ នាងបានបញ្ចប់ក្នុងរយៈពេល ១៤ នាទី ៤៦ វិនាទី ដោយជ័យជំនះត្រូវបានប្រគល់ជូន Medina Eisa ។

នៅខែមេសា ឆ្នាំ ២០២២ នាងបានបញ្ចប់នៅចំណាត់ថ្នាក់លេខ ៤ ក្នុងចម្ងាយ ៥ គីឡូម៉ែត្រក្នុងព្រឹត្តិការណ៍ Ethiopian Athletics Championships នៅ Hawassa ដោយប្រើថិរវេលា ១៥ នាទី ៥០ វិនាទី។ បួនខែក្រោយមក Eisa បានឈ្នះមេដាយមាសនៅក្នុងព្រឹត្តិការណ៍ U២០ World Championships នៅទីក្រុង Cali ប្រទេសកូឡុំប៊ីជាមួយនឹង ១៥ នាទី ២៩ វិនាទី ។
កាលពីខែតុលា Eisa បានឈ្នះការប្រណាំងអន្តរជាតិអៀរឡង់ខាងជើងចម្ងាយ ៦ គីឡូម៉ែត្រដែលធ្វើឡើងនៅទីក្រុង Dundoland និងទីក្រុង Belfast ក្នុងរយៈពេល ២១ នាទី និង ៧ វិនាទី។ ក្នុងខែកុម្ភៈ ឆ្នាំ ២០២៣ នាងក៏បានឈ្នះមេដាយប្រាក់ក្នុងការប្រណាំងនារីវ័យក្មេងក្នុងព្រឹត្តិការណ៍ World Cross Country Championships ដោយប្រើថិរវេលា ២១ នាទី និង ៧ វិនាទីតាមពីក្រោយមិត្តរួមជាតិ Senayet Getachew ។

ស្រដៀងគ្នានេះដែរ អ្នករត់ប្រណាំងជនជាតិអេត្យូពីអាយុ ១៨ ឆ្នាំកញ្ញា Bertukan Welde Sura បានធ្វើឱ្យមានការភ្ញាក់ផ្អើលនៅពេលដែលគាត់បានឈ្នះមេដាយមាសក្នុងពាក់កណ្តាលម៉ារ៉ាតុងស្ត្រី។ មិត្តរួមជាតិ Nigsti Haftu បានជាប់ក្នុងចំណាត់ថ្នាក់ទី ២ នៅពេលដែលនាងបានបញ្ចប់ការរត់ម៉ារ៉ាតុងក្នុងរយះពេល ២១ នាទី ១១ វិនាទី ៕ ប្រភព៖vnexpress

បរទេស៖ នាយកប្រតិបត្តិ Meta លោក Mark Zuckerberg បានបញ្ចប់ការរត់ចម្ងាយ ៥km នៅ Stanford Medicine MyHeart Counts នៅ Stanford រដ្ឋ California ក្នុងរយះពេល១៩នាទី។
Stanford Medicine MyHeart Counts គឺជាការរៃអង្គាសថវិកាប្រចាំឆ្នាំដើម្បីផ្តល់អត្ថប្រយោជន៍ដល់មជ្ឈមណ្ឌល Stanford សម្រាប់ជំងឺសរសៃឈាមបេះដូង ដែលមានទីតាំងនៅចម្ងាយពីរបីគីឡូម៉ែត្រភាគខាងត្បូងនៃទីស្នាក់ការកណ្តាលរបស់ក្រុមហ៊ុន Meta នៅ Menlo Park ។
លោកនាយក Zuckerberg បានបង្ហោះរូបថតមួយសន្លឹកជាមួយមិត្តភ័ក្តិបីនាក់ចូលរួមក្នុងកម្មវិធីប្រគល់រង្វាន់នៅ Stanford កាលពីថ្ងៃទី ៣០ ខែមេសា នៅលើទំព័រផ្ទាល់ខ្លួនរបស់គាត់ជាមួយនឹងសារថា “រត់ ៥km ជាមួយមិត្តភក្តិ” ។

លទ្ធផលដែលបានបង្ហោះនៅលើ គេហទំព័រ racerster.com បានបញ្ជាក់រយៈពេល ១៩ នាទី និង ៣៤ វិនាទី ខណៈដែលលោក Zuckerberg’s Stanford Medicine MyHeart រាប់ពេលវេលា។ នៅផ្នែកខាងក្រោមនៃសារបង្ហោះ ឆ្លើយតបនឹងការអធិប្បាយអបអរសាទរពីអ្នកតាមដានរបស់គាត់ អ្នកជំនួញវ័យ ៣៨ ឆ្នាំរូបនេះបានឆ្លើយតបថា “អរគុណ! ខ្ញុំមិនគិតថាខ្ញុំបានបញ្ចប់ ៥km ក្នុងរយៈពេលតិចជាង ២០ នាទីនោះទេ។
នៅក្នុងការអត្ថាធិប្បាយផ្សេងទៀត នាយកប្រតិបត្តិ Meta បានបង្ហាញថាគាត់បានសម្រាកពីការរត់ ហើយថ្មីៗនេះលំហាត់ប្រាណនៃការរត់បានជួយឱ្យគាត់ពង្រឹងកាយសម្បទា ដោយហេតុនេះអាចសម្រេចបាននូវគោលដៅរបស់គាត់នៅពេលចូលរួមកម្មវិធី Stanford Medicine MyHeart Counts ។ គាត់បានសរសេរថា “ខ្ញុំបានឈប់រត់មួយរយៈ ហើយកាន់តែរឹងមាំ អរគុណចំពោះ MMA ។ បន្ទាប់មកខ្ញុំនឹងចាប់ផ្តើមរត់ប្រហែលមួយខែមុនការប្រកួត ហើយខ្ញុំដឹងថាការរត់របស់ខ្ញុំលឿនជាងពីមុន”៕
ប្រភព៖vnexpress

សហរដ្ឋអាមេរិក ៖ បើតាមការវិភាគចុងក្រោយដោយសារការបញ្ជូនរលកវិទ្យុពីផែនដីទៅកាន់លំហរអវកាសបង្ហាញថា មនុស្សក្រៅភពនឹងទាក់ទងមកកាន់ផែនដីជាលើកដំបូងនៅឆ្នាំ២០២៩ ឬរយៈពេល៦ឆ្នាំខាងមុខ ។ គម្រោងនេះដំណើរការដោយអ្នកស្រាវជ្រាវមកពីវិទ្យាល័យ Berkeley និង Los Angeles ជាសាខានៃសាកលវិទ្យាល័យកាលីហ្វ័រញ៉ា សហរដ្ឋអាមេរិក ដែលបានចងក្រងឈ្មោះផ្កាយ និងភពផ្សេងៗ ។

ក្រុមអ្នកស្រាវជ្រាវប៉ាន់ស្មានថា រយៈពេល៦ឆ្នាំទៀត មនុស្សក្រៅភពនឹងបញ្ជូនសញ្ញាមកកាន់ផែនដីវិញ គឺបានពីការគណនាដោយប្រើច្បាប់របស់ physics មកវិភាគ ។ លើសពីនេះ មានព័ត៌មានស៊ីជម្រៅពាក់ព័ន្ធនឹងរយៈពេលធ្វើដំណើរថា សញ្ញាបញ្ជូនពីប្រព័ន្ធ Deep Space របស់អង្គការ Nasa នឹងអាចបញ្ជូនសញ្ញាមកកាន់ផែនដីវិញលឿនកម្រិតណា ។

កាលពីឆ្នាំ១៩៧៣ យានអវកាស Pioneer 10 បានហោះឆ្លងកាត់ភពព្រហស្បតិ៍ និងបញ្ជូនរលកវិទ្យុទៅកាន់ Dead White Dwarf ហើយក្រុមអ្នកស្រាវជ្រាវរំពឹងថា មនុស្សក្រៅភពនឹងបញ្ជូនសញ្ញាមកកាន់ផែនដីនៅឆ្នាំ២០២៩ ។ ក្រៅពីនេះ ចាប់ពីឆ្នាំ១៩៨០-១៩៨៣ ក៏មានការបញ្ជូនសញ្ញាស្រដៀងគ្នានេះពីយានអវកាស Voyager 2 ផងដែរ ដែលបានបញ្ជូនសញ្ញាទៅកាន់ Brown dwarf star ។ ដូច្នេះ គេគួរតែទទួលបានការឆ្លើយតបវិញនៅឆ្នាំ២០០៧ ហើយការឆ្លើយតបនេះនឹងមកដល់ផែនដីនៅឆ្នាំ២០៣០ ។

តារាវិទូមកពីសាកលវិទ្យាល័យ Penn និយាយថា បច្ចុប្បន្ន គេគួរតែទទួលបានការបញ្ជូនសញ្ញាមកកាន់ផែនដីហើយ ។ ប៉ុន្តែក៏អាស្រ័យលើសមត្ថភាពរបស់យើងផងដែរក្នុងការចាប់បានសញ្ញាទាំងនេះ ។ ដូច្នេះ វាផ្អែកលើកត្តាជាច្រើនដូចជា ការរង់ចាំចាប់សញ្ញា និងយូរកម្រិតណា ហើយមនុស្សក្រៅភពបានបញ្ជូនសញ្ញាមកផែនដីញឹកញាប់កម្រិតណា ។ ចំណែកតារាវិទូម្នាក់ទៀតមកពីសាកលវិទ្យាល័យកាលីហ្វ័រញ៉ា ដែលជាមនុស្សម្នាក់មិនជឿរឿងបែបនេះនិយាយថា សញ្ញាបញ្ជូនពីផែនដីទៅកាន់លំហរអវកាសខ្សោយពេក ទើបធ្វើឱ្យមនុស្សរស់នៅក្រៅភពចាប់មិនបាន ៕ ប្រភព ៖ beartai BRIEF

ប្រទេសចិន៖ ជារៀងរាល់ចុងសប្តាហ៍ វត្តអារាមនានា គឺមានមនុស្សម្នាច្រើនកុះករ ដើម្បីបន់ស្រន់សុំសេចក្តីសុខ នឹងជាពិសេសពួកគេសង្ឃឹមថានឹងមានឳកាសក្នុងការស្វែងរកការងារធ្វើនៅក្នុងក្រុង ក្នុងបរិបទដែលសេដ្ឋកិច្ចងើបឡើងវិញបន្តិចម្តងៗពីជំងឺរាតត្បាត។
សេដ្ឋកិច្ចកំពុងងើបឡើងវិញចាប់តាំងពីការរឹតបន្តឹង Covid-១៩ ត្រូវបានដកចេញនៅក្នុងខែធ្នូ ប៉ុន្តែឧស្សាហកម្មដែលមានតម្រូវការខ្ពស់ដូចជាសេវាកម្មម្ហូបអាហារ និងទេសចរណ៍មានប្រាក់ឈ្នួល និងគុណវុឌ្ឍិទាប។ ជាលើកដំបូងដែលចំនួនថ្នាក់អនុបណ្ឌិត និងបណ្ឌិតបញ្ចប់ការសិក្សានៅទីក្រុងប៉េកាំងលើសនិស្សិតថ្នាក់បរិញ្ញាបត្រ។ លោក Zhang បាននិយាយថា “ទោះជាយ៉ាងណាក៏ដោយ យុវជនទាំងអស់ពិតជាដាក់ក្តីសង្ឃឹមរបស់ពួកគេទៅលើព្រះពុទ្ធ នៅពេលដែលពួកគេស្ថិតនៅក្រោមសម្ពាធ នឹងវង្វេងផងដែរ។

យោងតាមវេទិកានៃការកក់ធ្វើដំណើរ Trip.com ការទស្សនាប្រាសាទមានការកើនឡើង ៣១០% នៅឆ្នាំនេះ បើធៀបនឹងឆ្នាំ ២០២២។ លោក Wang Xiaoning អាយុ ២២ ឆ្នាំបាននិយាយថា “ខ្ញុំបួងសួងចំពោះមុខព្រះ ហើយសង្ឃឹមថាខ្ញុំអាចស្វែងរកការងារបាន ” លោក Wang ស្ថិតក្នុងចំណោមនិស្សិតបញ្ចប់ការសិក្សានៅសកលវិទ្យាល័យចំនួន ១១.៦ លាននាក់ដែលកំពុងប្រឈមមុខនឹងទីផ្សារការងារដ៏អាក្រក់នៅក្នុងប្រទេស។

បច្ចុប្បន្នយុវជនចិនចំនួន២០%កំពុងជួបប្រទះនឹងស្ថានភាពអាក្រក់ នឹងភាពអត់ការងារធ្វើ ។ លោក Zhang Qidi អ្នកស្រាវជ្រាវនៅមជ្ឈមណ្ឌលហិរញ្ញវត្ថុអន្តរជាតិបាននិយាយថា “មានការផ្គត់ផ្គង់លើសកម្រិតធ្ងន់ធ្ងរសម្រាប់និស្សិតបញ្ចប់ការសិក្សានៅសាកលវិទ្យាល័យ” ។ ក្មេងស្រីអាយុ ២៥ ឆ្នាំមកពីខេត្ត Zhejiang ដែលទើបតែបញ្ចប់បរិញ្ញាបត្រជាន់ខ្ពស់បាននិយាយថា ចាប់តាំងពីខែកុម្ភៈមក នាងបានដាក់ពាក្យសុំការងារប្រហែល ១០ ក្នុងមួយថ្ងៃ ប៉ុន្តែមិនទាន់ទទួលបានលទ្ធផលអ្វីនៅឡើយទេ។ នាងបាននិយាយថានាងមានអារម្មណ៍ថាចំណេះដឹងនិងការអប់រំរបស់នាងនៅមានកម្រិត។ នាងក៏បាននិយាយទៀតថា ខ្ញុំបានជួបអ្នកចិត្តសាស្រ្តពីរបីដង ដោយសារការថប់បារម្ភ និងការធ្លាក់ទឹកចិត្ត ហើយខ្ញុំទៅប្រាសាទដើម្បីបួងសួង ព្រោះខ្ញុំជឿថាព្រះពុទ្ធអាចជួយខ្ញុំបាន៕ ប្រភព៖vnexpress