នារាត្រីថ្ងៃទី៥ ខែឧសភា ឆ្នាំ២០២៣ ជារាត្រីចងចាំជាប្រវត្តិសាស្រ្តសម្រាប់ប្រជាជនកម្ពុជាក្រោយរង់ចាំអស់រយៈពេល៦៤ឆ្នាំ ទើបមានឱកាសរៀបចំព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដោយប្រទេសកម្ពុជាមានឱកាសធ្វើជាម្ចាស់ផ្ទះ ព្រមទាំង បង្ហាញផ្ទាំងទស្សនីយ៍ភាពដ៏មហស្ចារ្យទៅកាន់ពិភពលោកថាកម្ពុជាអាចធ្វើបាន។

ការរៀបចំព្រឹត្តិការណ៍បើកស៊ីហ្គេម២០២៣នេះ មហាជនរួមទាំងតារាល្បីៗជាច្រើនរូបសុទ្ធតែបង្ហាញអារម្មណ៍ មោទកភាពទាំងអ្នកទៅទស្សនាផ្ទាល់នៅពហុកីឡដ្ឋានមរតកតេជោ និងអ្នកទស្សនាបន្តផ្ទាល់តាមតំបន់នានារំភើបចិត្តសឹងស្រក់ទឹកភ្នែកគ្រប់គ្នាព្រោះការបង្ហាញជូនរបស់កម្ពុជានៃការបើកព្រឹត្តិការណ៍នេះពិតជាមានភាពអស្ចារ្យណាស់។ ក្នុងនោះសិល្បករកម្ពុជាជាច្រើនរូបសុទ្ធតែបង្ហាញអារម្មណ៍ថាការមហាព្រឹត្តិការណ៍នេះរៀបចំបានល្អណាស់។

ទស្សនីយ៍ភាពនៃការបើកព្រឹត្តិការណ៍កីឡាអាស៊ីអាគ្នេយ៍ដ៏អស្ចារ្យរបស់កម្ពុជាមានច្រើនរូបភាពដែលឆ្លុះបញ្ចាំងការបង្ហាញពីប្រាសាទអង្គរ ល្ខោនខោល ល្ខោនស្បែក របាំ គោមហូល ក្បាច់គុនខ្មែរ យ័ន្ត ស្រូវ ឧបករណ៍តន្ត្រី ភាពរុងរឿងនៃអរិយធម៌ខ្មែរ និងផ្ទាំងទស្សនីយ៍ភាពជាច្រើនទៀតលើកយកមកបង្ហាញពិភពលោក។

តារាកំប្លែងល្បីឈ្មោះនាយពាក់មី បានបង្ហាញអារម្មណ៍ថា «រំភើប ហូរទឹកភ្នែក ឃើញការរៀបចំ ស៊ីហ្គេមថ្ងៃនេះខ្មែរយើងអស្ចារ្យ ខ្មែរធ្វើបាន កីឡារស់ក្នុងសន្តិភាព»។ «នាងខ្ញុំ ពេជ្រ វត្តីសារ៉ាវឌ្ឈី» ជានារីមគ្គុទេស៏តំណាងកម្ពុជា???????????? ???????????????? ជាទីមោទនកភាព ក្រោមរូបភាពគួរអោយចងចាំសម្រាប់ប្រជាជាតិកម្ពុជាគ្រប់រូប»។ នេះជាការលើកឡើងរបស់បវរកញ្ញារូបនេះ។ ងាកទៅកាន់តារាពហុជំនាញ ខាត់ សុឃីម វិញ បានលើកបង្ហាញអារម្មណ៍ថា «មិនដែលមានមោទកភាពដូចពេលនេះទេ អស្ចារ្យណាស់ដែនដីសុវណ្ណភូមិ… ពង្សាវតាខ្មែររុងរឿងក្រៃលែង»។ Youtuber ដ៏ល្បីលោក ហេង វិសាល បានសរសេរថា «អត់ទាន់បាត់មោទនភាពទេ Seagame Opening ពិតជាអស្ចារ្យខ្លាំងណាស់។ អរគុណដល់អ្នករៀបចំ បងៗអ្នកសំដែង និងក្រុមការងារទាំងអស់ អរគុណពួកយើងពិតជាអស្ចារ្យ ពាក្យថា”ខ្មែរធ្វើបាន” គឺសាកសមបំផុតជាមួយ កម្មវិធីម្សិលមិញ» ។ តារាចម្រៀង សុគន្ធនិសា វិញបានបង្ហាញថា «ក្នុងថ្ងៃម្សិលមិញនេះ ជាអ្នកសិល្បៈចូលរួមផង ហើយក៏ជាអ្នកទស្សនាមួយរូបដែរ ពិតជារំភើប សប្បាយរីករាយនិងមានកិត្តិយសដែលមានវត្តមានច្រៀងក្នុងឱកាសបើកសម្ភោធការប្រគួតកីឡាSEA GAME លើកទី32 ឆ្នាំ2023នៅកម្ពុជា កម្ពុជាធ្វើបាន មោទនភាព ប្រវត្តិសាស្រ្តថ្មីក្នុងឆ្នាំ2023ដែលកម្ពុជាបានក្លាយជាម្ចាស់ផ្ទះរៀបចំការប្រកួត SEA GAMES 32nd in Cambodia
មានសន្តិភាពទើបមានការអភិវឌ្ឍន៍ កីឡារស់ក្នុងសន្តិភាព អរគុណសន្តិភាព»។

មិនត្រឹមតែសិល្បករខាងលើនេះទេ មហាជននិងសិល្បករជាច្រើនទៀតសុទ្ធតែពេញចិត្តនៃការរៀបចំបើកព្រឹត្តិ្កការណ៍កីឡាអាស៊ីអាគ្នេយ៍ដែលប្រព្រឹត្តិទៅកាលពីថ្ងៃទី៥ម្សិលមិញនេះ៕

ក្រុមកំប្លែងនាយពាក់មី រួមមាននាយ ពាក់មី ,នាយគ្រឿន, នាយក្រាន់, ពូណុយ នីឡា បានសម្តែងរឿងកំប្លែងខ្លីមួយនៅក្នុងកម្មវិធី «បើកកីឡាស៊ីហ្គេមលើកទី៣២» នៅពហុកីឡាដ្ឋានជាតិមរតកតេជោកា បានផ្ទុះការកោតសរសើរយ៉ាងខ្លាំងពីសំណាក់មហាជនរួមទាំងរដ្ឋមន្រ្តីក្រសួងព័ត៌មានផង ដ្បិតថាជាកំប្លែងខ្លីមែនតែអាចឱ្យអ្នកជិតខាងកម្ពុជាពូកែខាងទើសស្ទើរគ្រប់រឿងកកឈា.មដុំៗបាន។

ទស្សនីយ៍ភាពជាច្រើននៅក្នុងកម្មវិធី «បើកកីឡាស៊ីហ្គេមលើកទី៣២» ក្រោមអធិបតីភាពដ៏ខ្ពង់ខ្ពស់ប្រមុខរាជរដ្ឋាភិបាលកម្ពុជា បានធ្វើឱ្យប្រជាពលរដ្ឋទូទាំងនគរ រួមទាំងពិភពលោកបង្ហាញពីអារម្មណ៍រំភើបអស្ចារ្យរំភើបចិត្ត ស្ងប់ស្ងែង គ្មានអ្វីប្រៀបផ្ទឹម នៅតែដក់ជាប់ក្នុងចិត្តទោះបីកម្មវិធីបានបញ្ចប់ហើយក្តីនៅយប់ថ្ងៃទី៥ ខែឧសភា ឆ្នាំ២០២៣។

នៅក្នុងកម្មវិធីមហាព្រឹត្តិការណ៍កីឡាអាស៊ីអាគ្នេយ៍លើកទី៣២ ដែលកម្ពុជាធ្វើជាម្ចាស់ផ្ទះ មុនបង្ហាញទស្សនីយ៍ភាពដ៏អស្ចារ្យសំខាន់ៗ សិល្បករជាច្រើនរូបមកពីបណ្តាផលិតកម្មនានាក្នុងប្រទេស បានធ្វើការសម្តែងនូវបទចម្រៀងផ្សេងៗដើម្បីញុំាំងកម្មវិធីឱ្យកាន់តែសប្បាយរីករាយ បង្កបរិយាកាសឱ្យកាន់តែអធិកអធមមុនកម្មវិធីផ្លូវការឈានមកដល់។ក្នុងនោះក៏មានការសម្តែងពិសេសពីក្រុមកំប្លែងនាយពាក់មី ក្រោយការដឹកនាំពីលោក លោកសុវណ្ណ ឬទ្ធី ហៅលោកតា វ៉ិចទ័រ បានផ្តល់សំណើចជូនមហាជន ដោយមានតួអង្គសនិ្តសុខ ជានាយ ពាក់មី តួអង្គយក្ស ជានាយគ្រឿន តួអង្គទេវតា ជានាយក្រាន់ និងមានតួអង្គផ្សេងទៀតដូចជា ពូណុយ និងនីឡា ជាដើម។ ដ្បិតថាជារឿងកំប្លែងមែនពិតតែបង្កប់អត្ថន័យស៊ីជម្រៅខ្លាំង ដែលមហាជនបានលើកឡើងថា រឿងខ្លីមួយនេះអាចឱ្យអ្នកជិតខាងកម្ពុជាដែលចូលចិត្តពូកែទើសស្ទើរគ្រប់រឿងចាប់តាំងពីកម្ពុជាមានឱកាសធ្វើជាម្ចាស់ផ្ទះរៀបចំព្រឹត្តិការណ៍ស៊ីហ្គេមលើកទី៣២ ដែលចូលចិត្តយកភាពមិនល្អតូចមួយមកធ្វើជាប្រធានបទទាំងរូបផ្សេងទៀតមានល្អៗជាច្រើនមិនយកមកបង្ហាញកកឈាមបាន។

សាច់រឿងកំប្លែងខាងលើនេះក៏ឆ្លុះបញ្ចាំងឱ្យយើងដឹងថា បើសិនជាតួអង្គយក្សព្រមលុបមុខជាយក្ស បើកភ្នែកបើកចិត្តនោះយើងនិងឃើញភាពស្រស់ស្អាតជាមិនខាន កុំយកកំហុសតូចមួយជាចំណុចអវិជ្ជមានគ្របដណ្តប់លើភាពល្អ ប្រៀបបដូចជាបើអ្នកជិតខាងកម្ពុជា ព្រមបើកចិត្តបើកបេះដូងឱ្យទូលាយ យើងនឹងឃើញភាពវិជ្ជមានច្រើនជាងអវិជ្ជមានមិនខាន៕

នាព្រឹកថ្ងៃទី៥ ខែឧសភា ឆ្នាំ២០២៣នេះ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជាអធិបតី ក្នុងពិធីសម្ពោធដាក់ឱ្យប្រើប្រាស់ជាផ្លូវការ អគាររដ្ឋបាលសាលាខេត្តព្រៃវែង និងរោងតម្កល់ទូក ង វែងជាងគេលើពិភពលោក។

អគាររដ្ឋបាលសាលាខេត្តព្រៃវែង សាងសង់លើផ្ទៃដីទំហំ ៣៥.០០០ម៉ែត្រការ៉េ ស្ថិតនៅភូមិ១ សង្កាត់កំពង់លាវ ក្រុងព្រៃវែង មាន៤ខ្នង កម្ពស់៤ជាន់ ស្មើ២២៣បន្ទប់ សាលប្រជុំ៦ ក្នុងនោះសាលធំ១ អាចផ្ទុកអ្នកចូលរួមប្រមាណ៥០០នាក់ សាលមធ្យម២ អាចផ្ទុកបានប្រមាណ១០០នាក់ និងសាលតូច៣ អាចផ្ទុកអ្នកចូលរួម២៥នាក់ ហើយក្រៅពីនោះ មានសាលប្រជុំសម្រាប់នាយករដ្ឋបាល នាយកទីចាត់ការអង្គភាពចំណុះសាលាខេត្ត បណ្ណសារ ១បន្ទប់ បន្ទប់ប្រជុំតាមប្រព័ន្ធបច្ចេកវិទ្យា ១បន្ទប់ បន្ទប់ទទួលភ្ញៀវ ២បន្ទប់ បន្ទប់រង់ចាំ ២បន្ទប់ បន្ទប់បច្ចេកទេស ១បន្ទប់ បន្ទប់ដាក់សម្ភារៈ ១២បន្ទប់ បន្ទប់តែកាហ្វេ ៤ បន្ទប់ បន្ទប់អគ្គិសនី ១បន្ទប់ បន្ទប់ម៉ូទ័រទឹក ១បន្ទប់ ឃ្លាំង ១បន្ទប់ និងបន្ទប់ទឹក ៧៦បន្ទប់។

អគារនេះក៏មានបណ្ដាទឹកស្អាត បណ្ដាញទឹកកខ្វក់ បណ្ដាញអគ្គិភ័យ បណ្ដាញអគ្គិសនី ម៉ាស៊ីនត្រជាក់ បណ្ដាញអេឡិចត្រូនិក ហេដ្ឋារចនាសម្ព័ន្ធខាងក្នុង និងខាងក្រៅ ខ្លោងទ្វារច្រកចេញចូល ប៉ុស្តិ៍យាម អគារកីឡា បន្ទប់ទឹកសាធារណៈ ចំណតថយន្ត សួនច្បារសាលាខេត្ត និងរបងព័ទ្ធជុំវិញប្រវែងជាង ៦៣៩ម៉ែត្រ។ សម្រាប់ការចំណាយសាងសង់ទាំងមូល ឯកឧត្តមបានបញ្ជាក់ជូនសម្ដេច និងអង្គពិធីថា មានចំនួនទឹកប្រាក់ ៥១.០០០.០០០.០០០ រៀល (ហាសិបមួយប៊ីលានរៀល)។ ក្រៅពីនេះ ក៏មានការគាំទ្រជាជំនួយសម្ភារៈបរិក្ខាផ្សេងៗទៀតពីសម្ដេចក្រឡាហោម ស ខេង និងលោកជំទាវ ព្រមទាំងថ្នាក់ដឹកនាំ និងសប្បុរសជន៕

ផលិតកម្មទីក្រុងភាពយន្ត (ថោន) បានចេញលិខិតសូមទោសជាសាធារណៈ និងសុំការអនុគ្រោះពីសំណាក់ប្រជាពលរដ្ឋប្រទេស ឥណ្ឌូនេស៊ី វៀតណាម និងមីយ៉ាន់ម៉ា ក្រោយពីធ្វេសប្រហែលកាន់ទង់ជាតិប្រទេសទាំង៣នេះបញ្ច្រាសក្នុងអំឡុងពេលសម្តែងក្នុងកម្មវិធី «បើកកីឡាស៊ីហ្គេមលើកទី៣២» នៅពហុកីឡាដ្ឋានជាតិមរតកតេជោកាលពីល្ងាចថ្ងៃទី០៥ខែឧសភា ឆ្នាំ២០២៣។

ក្នុងលិខិតសូមទោសនៅព្រឹកថ្ងៃទី៦ ខែឧសភា ឆ្នាំ២០២៣ ផលិតថោន បានរៀបរាប់ថា«លិខិតសុំទោសជាសាធារណៈ សូមគោរពជូន ពលរដ្ឋឥណ្ឌូនេស៊ី ពលរដ្ឋវៀតណាម ពលរដ្ឋមីយ៉ាន់ម៉ា (ភូមា) ផលិតកម្មទីក្រុងភាពយន្ត សូមធ្វើការសុំទោសជាសាធារណៈ និងសុំការអនុគ្រោះជាទីបំផុតពី សំណាក់ ពលរដ្ឋឥណ្ឌូនេស៊ី ពលរដ្ឋវៀតណាម ពលរដ្ឋមីយ៉ាន់ម៉ា (ភូមា) ដោយខ្វះស្មារតីប្រុងប្រយ័ត្ននៃ ក្រុមការងារបានធ្វេសប្រហែសកាន់ទង់ជាតិបញ្ច្រាសក្នុងព្រឹត្តិការណ៍ «បើកកីឡាស៊ីហ្គេមលើកទី៣២» នៅពហុកីឡាដ្ឋានជាតិមរតកតេជោកាលពីល្ងាចថ្ងៃទី០៥ ខែឧសភា ឆ្នាំ២០២៣ ។

ក្រោយពីបានពិនិត្យឡើងវិញទើបដឹងថាក្រុមការងារបានកាន់ទង់ជាតិន
ប្រទេសឥណ្ឌូនេស៊ី ប្រទេសវៀតណាម ប្រទេសមីយ៉ាន់ម៉ា (ភូមា) បញ្ច្រាសដោយអចេតនាជាហេតុនាំឱ្យប៉ះពាល់ដល់កិត្តិនាមនៃប្រជាជាតិខាងលើ។
ផលិតកម្មទីក្រុងភាពយន្ត សូមធ្វើការសុំទោសជាសាធារណៈ និងសុំក្ដីអនុគ្រោះបំផុតពីប្រមុខរាជ រដ្ឋាភិបាលកម្ពុជា ប្រជាពលរដ្ឋខ្មែរ និងពលរដ្ឋបរទេសបានទស្សនាផ្សាយផ្ទាល់ពីព្រឹត្តិការណ៍ «បើកកីឡា ស៊ីហ្គេមលើកទី៣២» នៅពហុកីឡាដ្ឋានជាតិមរតកតេជោ។
ជាថ្មីម្តងទៀត ផលិតកម្មទីក្រុងភាពយន្ត ក្រោយចេញលិខិតសុំទោសជាសាធារណៈនេះរួច និងធ្វើ លិខិតសុំទោសដល់ប្រមុខរាជរដ្ឋាភិបាលកម្ពុជា ប្រជាពលរដ្ឋខ្មែរ និងដាក់លិខិតសុំទោសជូនដល់បណ្តាស្ថានទូតនៃប្រទេសខាងលើបន្ថែមទៀត។

គួរបញ្ជាក់ថា កាលពីឆ្នាំ២០១៧ ប្រទេសម៉ាឡេស៊ី បានធ្វើការសូមទោសទៅដល់ប្រទេសឥណ្ឌូណេស៊ីក្រោយពីដាក់ទង់ជាតិប្រទេសនេះបញ្ច្រាស ព្រោះការរៀបចំនីមួយៗប្រទេសជាម្ចាស់ផ្ទះពិតជាមិនចង់ឱ្យរឿងនេះកើតឡើងឡើយ៕

គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ និង គណៈកម្មការព័ត៌មាន និងផ្សព្វផ្សាយ បានចេញសេចក្តីប្រកាសជាផ្លូវការនៅថ្ងៃទី៥ ខែឧសភានេះ ស្តីពីការថតរូបក្នុងពិធីបើក-បិទ នៃព្រឹត្តិការណ៍ស៊ីហ្គេម២០២៣ និងការផ្តល់សិទ្ធិប្រើប្រាស់ និងចែកចាយរូបភាព ខណៈមានមតិរិះគន់ក្រោយអ្នកថតរូបសារព័ត៌មានក្នុងស្រុកពុំមានឱកាសផ្តិតរូបភាពព្រឹត្តិការណ៍បើកស៊ីហ្គេម។

តាមសេចក្តីជូនដំណឹងពី CAMSOC បានឱ្យដឹងថាដោយបរិមាណអ្នកសារព័ត៌មាន មានចំនួនច្រើន និងកន្លែងមានកំណត់ គណៈកម្មការ ព័ត៌មាន និងផ្សព្វផ្សាយ នៃគណៈកម្មាធិការជាតិ CAMSOC បានអនុញ្ញាតិឱ្យការីថតផ្លូវការ (Host Photographer) និងអ្នកសារព័ត៌មានផ្លូវការ នៃបណ្ដាប្រទេសសមាជិកដែលចូលរួម ចុះយកព័ត៌មាន និងធ្វើ ការផ្ដិតយករូបភាព ពិធីបើក-បិទ នៃព្រឹត្តិការណ៍ស៊ីហ្គេម២០២៣។

ទន្ទឹមនេះ គណៈកម្មការព័ត៌មាន និង ផ្សព្វផ្សាយ អនុញ្ញាតឱ្យអ្នកសារព័ត៌មានជាតិ និងអន្តរជាតិប្រើប្រាស់រូបភាពផ្សេងៗ របស់គណៈកម្មការ ព័ត៌មាន និងផ្សព្វផ្សាយ ក្នុងព្រឹត្តិការណ៍ស៊ីហ្គេម២០២៣ ក្នុងគោលដៅផ្សព្វផ្សាយអំពីកីឡា និងជម្រុញ លើកកម្ពស់វិស័យកីឡា និងទេសចរណ៍ ឱ្យកាន់តែទូលំទូលាយ ដល់សាធារណៈជនទូទាំងព្រះរាជាណាចក កម្ពុជា និងលើឆាកអន្តរជាតិ។ ក្នុងករណីអ្នកសារព័ត៌មានជាតិ និងអន្តរជាតិ ប្រើប្រាស់ខុសគោលដៅ សូមសាម៉ីអង្គភាពទទួលខុសត្រូវដោយខ្លួនឯង។ ក្នុងនោះ
អ្នកសារព័ត៌មានអាចទាញយករូបថត នៃពិធីបើក-បិទ នៃព្រឹត្តិការណ៍ស៊ីហ្គេម២០២៣ និងការ ប្រកួតដទៃទៀតតាមរយៈ QR Code ៕