ប្រទេសវៀតណាម ៖ រដ្ឋាភិបាលវៀតណាមបានប្រកាសថា នឹងដំឡើងប្រាក់ខែ និងប្រាក់ឈ្នួលអប្បបរមាដល់មន្ត្រីរាជការ និងកងទ័ពនៅទូទាំងប្រទេស គឺនឹងដំឡើងចាប់ពី១,៤៩លានដុងក្នុង១ខែ រហូតដល់១,៨លានដុងក្នុង១ខែ ។ ការដំឡើងប្រាក់ខែនេះ នឹងចាប់ផ្តើមអនុវត្តចាប់ពីថ្ងៃទី១ ខែកក្កដា ឆ្នាំ២០២៣ តទៅ ។

ទោះយ៉ាងណា នេះជាការប្រកាសដំឡើងប្រាក់ខែដល់មន្ត្រីរាជការលើកទី២ នៅប្រទេសវៀតណាម បើគិតចាប់តាំងពីថ្ងៃទី១ ខែកក្កដា ឆ្នាំ២០១៩ មក ក្រោយពីប្រទេសវៀតណាមយឺតយ៉ាវមិនបានដំឡើងប្រាក់ខែដល់មន្ត្រីរាជការរបស់ខ្លួនអស់រយៈពេល៣ឆ្នាំ ដោយសារការឆ្លងរាតត្បាតនៃជំងឺកូវីដ-១៩ ។ ការប្រកាសដំឡើងប្រាក់ខែដល់មន្ត្រីរាជការ ក៏បានលើកទឹកចិត្តដល់និស្សិតដែលទើបបញ្ចប់ការសិក្សាថ្មីៗផងដែរ ក្នុងការដាក់ពាក្យសុំបម្រើការងាររដ្ឋ ហើយពួកគេនឹងទទួលបានប្រាក់ខែសមរម្យ ។

គេចាត់ទុកថា ការប្រកាសដំឡើងប្រាក់ខែ និងប្រាក់ឈ្នួលអប្បបរមាដល់មន្ត្រីរាជការ គឺជាប្រធានបទក្តៅមួយនៅប្រទេសវៀតណាម ។ បើតាមទិន្នន័យបង្ហាញថា នៅថ្ងៃទី១ ខែមករា ឆ្នាំ២០២០ រហូតដល់ថ្ងៃទី៣០ ខែមិថុនា ឆ្នាំ២០២២ កន្លងមក មានមន្ត្រីរាជការក្នុងប្រទេសនេះប្រមាណ៤ម៉ឺននាក់បានលាឈប់ពីការងាររដ្ឋ ហើយក្នុងចំណោមនោះភាគច្រើនជាបុគ្គលិកធ្វើការក្នុងផ្នែកអប់រំ និងថែទាំសុខភាព ៕ ប្រភព ៖ AEC connect

ប្រទេសថៃ ៖ អតីតនាយករដ្ឋមន្ត្រីប្រទេសថៃ លោកស្រី យីងឡាក់ ស៊ីណាវ៉ាត្រា បានបង្ហោះអត្ថបទមួយនៅក្នុងបណ្តាញសង្គមថា លោកស្រីមានអារម្មណ៍មិនដូចមុនទៀតទេ ដោយសារលទ្ធផលការបោះឆ្នោតលើកនេះឆ្លុះបញ្ចាំងឱ្យឃើញថា ពលរដ្ឋថៃមិនស៊ូទ្រាំជាមួយអ្នករំលោភអំណាច ហើយពលរដ្ឋមិនចង់ឃើញរដ្ឋប្រហារនៅប្រទេសថៃទេ ខណៈពួកគេចង់បានរដ្ឋាភិបាលមួយដែលប្រកាន់នូវរបបប្រជាធិបតេយ្យ ។

នៅថ្ងៃទី២២ ខែឧសភា លោកស្រី យីងឡាក់ ស៊ីណាវ៉ាត្រា (Yingluck Shinawatra) អតីតនាយករដ្ឋមន្ត្រីប្រទេសថៃបានបង្ហោះអត្ថបទមួយក្នុងហ្វេសប៊ុករបស់ខ្លួនឈ្មោះ Yingluck Shinawatra ថា ថ្ងៃនេះ (ថ្ងៃទី២២ ខែឧសភា) គឺជាថ្ងៃគម្រប់ខួបរយៈពេល៩ឆ្នាំ នៃការធ្វើរដ្ឋប្រហារនៅប្រទេសថៃ ។ ខ្ញុំមានអារម្មណ៍មិនដូចមុនទៀតទេ ក្នុងឋានៈខ្ញុំជាអតីតនាយករដ្ឋមន្ត្រីរបស់ប្រទេសថៃ ដែលធ្លាប់ត្រូវរបបផ្តាច់ការបណ្តេញចេញ ។ លទ្ធផលនៃការបោះឆ្នោតកាលពីថ្ងៃទី១៤ ខែឧសភា កន្លងមក គឺឆ្លុះបញ្ចាំងឱ្យឃើញថា ពលរដ្ឋមិនស៊ូទ្រាំជាមួយក្រុមមនុស្សដែលបានប្រើអំណាចផ្តាច់ការ និងគ្មានការពេញចិត្តពីពលរដ្ឋ ។

លោកស្រីបន្តថា ក្នុងរយៈពេល៩ឆ្នាំកន្លងមកនេះ ប្រទេសថៃបានស្ថិតនៅក្រោមស្រមោលរបស់របបផ្តាច់ការ ត្រូវបានគេបណ្តេញចេញ ភាពអស់សង្ឃឹមរបស់ពលរដ្ឋដែលជួបបញ្ហាក្នុងសង្គម បញ្ហាការរស់នៅ ការពិបាកប្រកបមុខរបរ ប្រទេសផ្លាស់ទីដោយគ្មានចក្ខុវិស័យ និងគ្មានការយល់ដឹងក្នុងការដឹកនាំប្រទេស ដើម្បីអភិវឌ្ឍន៍សេដ្ឋកិច្ចជាតិឱ្យរីកចម្រើនទៅមុខ ។ នេះជាលទ្ធផលនៃការធ្វើរដ្ឋប្រហារដណ្តើមអំណាចពីរដ្ឋាភិបាលដែលកើតឡើងដោយសារការបោះឆ្នោត ។ ចាប់ពីថ្ងៃនេះ (ថ្ងៃទី២២ ខែឧសភា) តទៅ នាងខ្ញុំសង្ឃឹមថា យើងនឹងមិនឃើញការធ្វើរដ្ឋប្រហារទៀតទេ ។ ចុងបញ្ចប់នេះ នាងខ្ញុំសូមឱ្យយើងទាំងអស់គ្នាទទួលបានរដ្ឋាភិបាលប្រជាធិបតេយ្យដើម្បីពលរដ្ឋ និងឈប់មានការធ្វើរដ្ឋប្រហារនៅប្រទេសថៃទៀត ៕

ប្រភព ៖ TV Pool

ប្រទេសអែលសាល់វ៉ាឌ័រ ៖ កាលពីថ្ងៃទី២១ ខែឧសភា កន្លងមក សារព័ត៌មាន CNN រាយការណ៍ថា មានអ្នកគាំទ្របាល់ទាត់ស្លា.ប់យ៉ាងតិចចំនួន១២នាក់ និងរងរបួសជាង៥០០នាក់ទៀត ហើយក្នុងចំនួននេះមានអ្នករងរបួសធ្ងន់យ៉ាងតិច២នាក់ ។ ហេតុការណ៍បណ្តាលឱ្យឈានដល់ការស្លា.ប់នេះ ដោយសារពួកគេបានដណ្តើមគ្នាចូលក្នុងកីឡដ្ឋានឈ្មោះ Cuscatlan Stadium ស្ថិតនៅទីក្រុង San Salvador ប្រទេសអែលសាល់វ៉ាឌ័រ (El Salvador) ជាប្រទេសនៅអាមេរិកកណ្តាល ។

សារព័ត៌មាន CNN រាយការណ៍បន្តថា អ្នកគាំទ្របាល់ទាត់ជាច្រើននាក់បានទិញសំបុត្រចូលទស្សនាការប្រកួតបាល់ទាត់រវាងក្រុមម្ចាស់ផ្ទះ Alianza club និង Fast club ជាក្រុមបាល់ទាត់មកពីទីក្រុង Santa Ana ។ ប៉ុន្តែការប្រកួតបែរជាត្រូវផ្អាកភ្លាមៗ ពីព្រោះមានអ្នកគាំទ្របាល់ទាត់ជាច្រើននាក់ព្យាយាមចូលមកក្នុងទីលានប្រកួត បើទោះជាគេបានបិទទ្វាររួចហើយក្តី ។ ដូច្នេះ ពួកគេក៏ប្រជ្រៀតគ្នាចូលមកក្នុងទីលានប្រកួត រហូតដល់មានអ្នកខ្លះសន្លប់ ហើយអ្នកខ្លះទៀតត្រូវគេជាន់រហូតដល់ស្លា.ប់ ។

តាមការស៊ើបអង្កេតបឋម ប៉ូលិសលើកឡើងថា ហេតុការណ៍ជាន់គ្នាស្លា.ប់នេះ គឺដោយសារមានការលក់សំបុត្រចូលទស្សនាបាល់ទាត់ក្លែងក្លាយ ដែលធ្វើឱ្យមនុស្សជាច្រើននាក់មិនអាចចូលមើលការប្រកួតបាល់ទាត់ក្នុងទីលានបាន ។

ប្រធានាធិបតីប្រទេសអែលសាល់វ៉ាឌ័រ លោក Nayib Bukele បានបង្ហាញនូវការសោកស្តាយជាមួយសោកនាដកម្មនេះ ហើយលោកចាត់ទុកថា ការជាន់គ្នាស្លា.ប់នេះ គឺជាហេតុការណ៍មួយដែលមិនធ្លាប់កើតមាននៅប្រទេសអែលសាល់វ៉ាឌ័រ ។ លោកបានបញ្ជាឱ្យអាជ្ញាធរស៊ើបអង្កេតរឿងនេះឱ្យបានលម្អិត និងឆាប់រហ័សផងដែរ ។

លោក Nayib Bukele ថ្លែងថា ៖ «ខ្ញុំសោកស្តាយខ្លាំងណាស់ដែលមានហេតុការណ៍បែបនេះកើតឡើង ។ អ្នកដែលត្រូវស៊ើបអង្កេតរួមមាន អ្នកគ្រប់គ្រងក្រុមបាល់ទាត់, អ្នកគ្រប់គ្រងទីលានប្រកួត និងការិយាល័យលក់សំបុត្របាល់ទាត់ ហើយអ្នកណាក៏ដោយដែលបានធ្វើខុស ពួកគេនឹងត្រូវជាប់ទោស» ៕ ប្រភព ៖ beartaiBRIEF

អាមេរិក៖ យោងតាមប្រភពព័ត៌មាន Bloomberg Billionaires Index កាលថ្ងៃទី១៩ ខែឧសភា បានឱ្យដឹងថា ចាប់តាំងពីដើមឆ្នាំមក ភាគហ៊ុន Meta បានកើនឡើងចំនួន ៤៤ ពាន់លានដុល្លារ ដែលនេះធ្វើឱ្យលោក Zuckerberg ក្លាយជាមហាសេដ្ឋីដែលមានជាងគេបំផុតទីមួយនៅលើពិភពលោកក្នុងឆ្នាំនេះ។
កាលពីឆ្នាំមុនលោក Mark Zuckerberg គឺជាអ្នកមានជាងគេបំផុតទីបីនៅលើពិភពលោក។ ដោយសារតែលោក ផ្តោតលើកម្មវិធី metaverse (សកលនិម្មិត) ដោយយុទ្ធសាស្ត្រនេះធ្វើឱ្យលោកខាតបង់ទឹកប្រាក់ជាង ១០០ ពាន់លានដុល្លារ ។

ដោយឡែក នៅឆ្នាំនេះគាត់បានផ្លាស់ប្តូរ ដោយផ្តោតអារម្មណ៍របស់គាត់ជាមួយតែ Meta Platforms ដែលជា ក្រុមហ៊ុនមេរបស់ Facebook ហើយឥឡូវនេះ Meta ក៏កំពុងស្វែងរកការកសាងបណ្តាញសង្គមប្រឆាំងនឹង Twitter ផងដែរ។ យុទ្ធសាស្ត្រទាំងនេះហាក់ដូចជាបានដំណើរការឡើងវិញ ដែលបច្ចុប្បន្ន ទ្រព្យសម្បត្តិរបស់លោក Zuckerberg គឺ ៨៩.៩ ពាន់លានដុល្លារ ។

កាលពីថ្ងៃទី២០ ខែឧសភា Bloomberg បានរាយការណ៍ថាបណ្តាញសង្គម Instagram នឹងចាប់ផ្តើមប្រកួតប្រជែងជាមួយបណ្តាញសង្គម Twitter ភ្លាមៗនៅខែក្រោយ។ កម្មវិធីនេះកំពុងសាកល្បងជាមួយតារាល្បីៗ និងអ្នកមានឥទ្ធិពលលើប្រព័ន្ធផ្សព្វផ្សាយសង្គម។ទស្សនវិស័យអាជីវកម្មរបស់ Meta ក៏ត្រូវបានព្យាករណ៍ថានឹងមានសុទិដ្ឋិនិយមផងដែរ។ នៅត្រីមាសចុងក្រោយ ប្រាក់ចំណូល Meta បានកើនឡើង ៣% លើសពីការរំពឹងទុករបស់ Wall Street និងបញ្ច្រាសការធ្លាក់ចុះបីត្រីមាស។

នៅក្នុងរបាយការណ៍ហិរញ្ញវត្ថុរបស់ខ្លួន Meta ក៏បាននិយាយថា ក្នុងត្រីមាសថ្មីៗនេះកំណើនអ្នកប្រើប្រាស់គឺខ្លាំង។ ចំនួនអ្នកប្រើប្រាស់សកម្មប្រចាំខែនៅលើកម្មវិធីបានកើនឡើង ៥% ពីមួយឆ្នាំទៅមួយឆ្នាំដល់ជាង ៣.៨ ពាន់លាននាក់។ អ្នកប្រើប្រាស់ Facebook ប្រចាំថ្ងៃបានកើនឡើង ៤% ដល់ជាង ២ ពាន់លាននាក់៕ ប្រភព៖vnexpress

ប្រទេសថៃ ៖ អ្នកនាំពាក្យរដ្ឋាភិបាលឱ្យដឹងថា លោកនាយករដ្ឋមន្ត្រីថៃរីករាយនឹងព័ត៌មានថា ក្រមាទទួលបានការចាប់អារម្មណ៍ពីជនបរទេសនៅក្នុងកម្មវិធី World Dance Day 2023 នៅប្រទេសឥណ្ឌូណេស៊ី ហើយលោកនាយករដ្ឋមន្ត្រីសន្យាថា នឹងជំរុញក្រម៉ាចុះក្នុងបញ្ជីជាបេតិកភណ្ឌវប្បធម៌មនុស្សជាតិទៅកាន់អង្គការយូណេស្កូ ឱ្យបានឆាប់រហ័ស ។

កាលពីថ្ងៃទី២១ ខែឧសភា លោក Anucha Burapachaisri អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងជាអ្នកនាំពាក្យការិយាល័យនាយករដ្ឋមន្ត្រី បានថ្លែងថា លោក ប្រាយុទ្ធ ចាន់អូចា នាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានសរសើរភ្នាក់ងារពាក់ព័ន្ធដែលបានយកក្រម៉ាទៅបង្ហាញក្នុងកម្មវិធី World Dance Day 2023 នៅទីក្រុងហ្សាកាតា ប្រទេសឥណ្ឌូណេស៊ី ហើយទទួលបានការចាប់អារម្មណ៍យ៉ាងខ្លាំងពីជនបរទេសចូលទស្សនាកម្មវិធីនេះ ។ ពេលនេះ ប្រទេសថៃកំពុងស្នើចុះបញ្ជីក្រមាជាបេតិកភណ្ឌវប្បធម៌ (Intangible cultural heritage) ទៅកាន់អង្គការយូណេស្កូ (UNESCO) ផងដែរ ។

លោក Anucha Burapachaisri ថ្លែងថា នាយកដ្ឋានផ្សព្វផ្សាយវប្បធម៌ នៃក្រសួងវប្បធម៌ បានយកក្រមាដែលមានអត្តសញ្ញាណថៃទៅបង្ហាញក្នុងកម្មវិធី World Dance Day 2023 ដែលបានបើកឱកាសឱ្យយុវជនអាចបង្ហាញសមត្ថភាពសិល្បៈវប្បធម៌ជាតិ ហើយយុវជនថៃបានបង្ហាញក្រមាដើម្បីឱ្យជនបរទេសដឹងថា ក្រមាត្រូវបានពលរដ្ឋថៃប្រើប្រាស់ក្នុងជីវភាពប្រចាំថ្ងៃ រហូតក្លាយជាអត្តសញ្ញាណរបស់ថៃ ។

លោកបន្ថែមថា កាលពីខែកុម្ភៈ ឆ្នាំ២០២៣ ក្នុងប្រជុំគណៈរដ្ឋមន្ត្រីបានឯកភាពគ្នាស្នើចុះក្រមាក្នុងបញ្ជីតំណាងបេតិកភណ្ឌវប្បធម៌ទៅកាន់អង្គការយូណេស្កូ ។ ការស្នើចុះឈ្មោះនេះ ដោយសារប្រទេសថៃបានពិចារណាពីគុណតម្លៃរបស់ក្រមាថា ត្រូវបានគេប្រើប្រាស់យ៉ាងទូលំទូលាយនៅគ្រប់វិស័យ និងសហគមន៍ ហើយបានបង្ហាញនូវអត្តសញ្ញាណថៃផងដែរ ។ លើសពីនេះ ក្រម៉ាអាចប្រើជាប្រយោជន៍បានច្រើន និងចងភ្ជាប់ជាមួយជីវភាពរស់នៅរបស់ពលរដ្ឋថៃ ដូចជា ការប្រើប្រាស់ក្នុងគ្រួសារ ការផ្លាស់ប្តូរក្រម៉ាក្នុងភូមិ និងទីប្រជុំជន រហូតដល់គេយកក្រមាធ្វើជារង្វាន់ និងប្រើប្រាស់ក្នុងកម្មវិធីនានា ។

ប្រទេសថៃលើកឡើងថា ខ្លួនមានភស្តុតាងផ្នែកប្រវត្តិសាស្ត្រដែលចង្អុលបង្ហាញថា ប្រទេសថៃបានប្រើក្រម៉ាតាំងពីសម័យឈៀងសានមកម្ល៉េះ ហើយក្រោយមក ប្រទេសថៃបានកែលម្អ និងអភិវឌ្ឍន៍គុណភាពក្រម៉ាបន្ថែមទៀត ដើម្បីអាចប្រើជាប្រយោជន៍បានច្រើនរហូតដល់បច្ចុប្បន្ននេះ ។

លោក Anucha Burapachaisri បញ្ជាក់ថា ៖ «លោកនាយករដ្ឋមន្ត្រីថៃបានសុំកិច្ចសហការជាមួយភ្នាក់ងារពាក់ព័ន្ធ ដើម្បីរួមគ្នាជំរុញក្រម៉ារបស់ថៃទៅកាន់ពិភពលោក ។ លើសពីនេះ លោកនាយករដ្ឋមន្ត្រីក៏បានសរសើរយុវជនថៃផងដែរ ដែលស្រឡាញ់ប្រទេសថៃ គាំទ្រ ជំរុញអត្តសញ្ញាណ និងវប្បធម៌ជាតិឱ្យពិភពលោកស្គាល់កាន់តែច្រើន ។ លោកនាយករដ្ឋមន្ត្រីនឹងជំរុញក្រម៉ាឱ្យបានចុះក្នុងបញ្ជីបេតិកភណ្ឌវប្បធម៌ជាមួយអង្គការយូណេស្កូផងដែរ» ។

ជុំវិញការចុះបញ្ជីក្រម៉ាក្នុងបញ្ជីបេតិកភណ្ឌវប្បធម៌ជាមួយអង្គការយូណេស្កូនេះ អ្នកលេងបណ្តាញសង្គមថៃនិយាយថា ប្រទេសថៃប្រញាប់ចុះបញ្ជីក្រម៉ាជាមួយអង្គការយូណេស្កូឱ្យបានឆាប់រហ័ស ព្រោះខ្លាចប្រទេសជិតខាងថា ក្រម៉ាជារបស់ខ្លួនទៀត ។ ផ្ទុយពីនេះ អ្នកលេងបណ្តាញសង្គមម្នាក់ទៀតថា មិនគួរចុះឈ្មោះក្រម៉ាជារបស់ប្រទេសណាមួយទេ ពីព្រោះវាជាវប្បធម៌រួមគ្នា ។ ដូចគ្នានេះ អ្នកលេងបណ្តាញសង្គមម្នាក់ទៀតថា ក្រម៉ាមានប្រភពមកពីមជ្ឈិមបូព៌ា ហេតុអ្វីប្រទេសថៃអះអាងថា ជារបស់ខ្លួន ? ប្រភព ៖ Thansettakij

យោងតាមការចេញផ្សាយរបស់សារព័ត៌មាន បាងកក ប៉ុស្តិ៍ កាលពីថ្ងទី២២ ខែឧសភា បានឱ្យដឹងថា ប្រជាជនថៃកំពុងរង់ចាំយ៉ាងអន្ទះសារចំពោះការបើកឡើងវិញនូវប្រាសាទព្រះវិហារ បន្ទាប់ពីផ្អាកអស់រយៈពេល ១៥ឆ្នាំ។

កាលពីឆ្នាំ២០០៨ ​ជម្លោះ​ព្រំដែនរវាងប្រទេសទាំងពីរ បានកើតឡើងដែលបង្កឱ្យមានការអសន្តិសុខជាខ្លាំងនៅតំបន់ប្រវត្តិសាស្ត្ររបស់កម្ពូជា ដែលបានធ្វើឱ្យខាងកម្ពុជា សម្រេចចិត្តបិទមិនអោយភ្ញៀវទេសចរពីខាងថៃបានចូលទស្សនាព្រះវិហារចាប់តាំងពីពេលនោះមក។

នេះមិនមែនជាលើកទីមួយនោះទេ ដែលខាងថៃបានស្នើឱ្យកម្ពុជា បើកឱ្យភ្ញៀវទេសចរពីខាងថៃបានចូលទស្សនាព្រះវិហារនោះទេ ពោលគឺអជ្ញាធរថៃ តែងតែសុំធ្វើការចរចារជាច្រើនលើកច្រើនសារ ក៏ប៉ុន្តែអជ្ញាធរខាងខ្មែរលើកឡើងថា ខ្លួនមិនមានសិទ្ធសម្រេចនោះទេ មានតែរងចាំការសម្រេចពីសម្តេចតេជោហ៊ុនសែនតែប៉ុណ្ណោះ។

បច្ចុប្បន្នស្ថានភពនៅព្រំដែនប្រទេសទាំងពីរមិនមានភាពតានតឹងអ្វីនោះទេ​ ក៏ប៉ុន្តែក៏នៅតែមានការដាក់ពង្រាយទាហាន​រាប់​ពាន់​នាក់ពីសំណាកខាងកម្ពុជា ឱ្យ​ឈរ​ជើង​នៅ​តាម​ព្រំដែន​ក្នុង​ព្រះវិហារ-សុីសេកេត។

អ្វីដែលគួរឱ្យប្រុងប្រយ័ត្ននោះ គឺខាងភាគថៃ មិនដែលបញ្ជាក់ចំនួនពិតនៃកងទ័ពឈុតខ្មៅ​ថៃ ដែលកំពុង​ដាក់​ពង្រាយ​នៅ​ជួរ​មុខ​ តាមបន្ទាត់ព្រំដែនប្រទេសទាំងពីរឡើយ។

គួរបញ្ជាក់ផងដែរថា កាលពីថ្ងៃទី១១ ខែវិច្ឆិកា ឆ្នាំ២០១៣តុលាការ ICJ បានប្រកាសក្នុងការសម្រេចចិត្តជាឯកច្ឆ័ន្ទថា សាលក្រមឆ្នាំ១៩៦២របស់ ICJ បានប្រគល់ប្រាសាទព្រះវិហារទាំងអស់ឱ្យកម្ពុជា ហើយបានបញ្ជាឱ្យប្រទេសថៃចដកទ័ព ប៉ូលីស ឬឆ្មាំថៃដែលឈរជើងនៅក្នុងតំបន់នោះ៕

ប្រភព៖ Bangkok post