អ្នកគាំទ្ររបស់តារាចម្រៀង តន់ ចន្ទសីម៉ា ជាច្រើនរូបបានបង្ហាញការខកចិត្តសឹងតែគ្រប់គ្នា ក្រោយពីគណនីតារាស្រីរូបនេះបានស៊ែរយ៉ាងផុសផុលលើបណ្តាញសង្គមជុំវិញករណីបកស្រាយពីជនអគតិមួយចំនួនដែលលើកឡើងថាអ្នកឧកញ៉ា ឡេង ណាវ៉ាត្រា បោកប្រាស់ប្រជាជនរឿងបង់លុយមិនបានផ្ទះ។
មានរយៈចុងក្រោយនេះ គ្រាប់ពេជ្រប្រចាំផលិតកម្ម ហ្គាឡាក់ស៊ី កញ្ញា តន់ ចន្ទសីម៉ា រងនូវពាក្យរិះគន់ជាបន្តបន្ទាប់ពីសំណាក់មហាជនតាំងពីការតបតប្រើពាក្យមិនសមរម្យនៅលើបណ្តាញសង្គម ដោយនាងមានការបកស្រាយថាពុំមែនជាពាក្យពេចន៍របស់នាងនិយាយឡើយ និងមានការរិះគន់ទៅលើនាងបកស្រាយបទ Cover អង់គ្លេសថាច្រៀងមិនត្រូវតុងដោយអ្នកកាន់ការងារcoverរបស់នាងលើកឡើងថាខ្លាចជាប់ copyright ជាដើម។
ក្រៅពីរឿងខាងលើនេះ ស្រាប់តែនាពេលថ្មីៗនេះអ្នកគាំទ្របានសម្តែងការខកចិត្តចំពោះនាងសឹងតែគ្រប់គ្នា ក្រោយពីផេកផ្លូវការរបស់តារាចម្រៀង តន់ ចន្ទសីម៉ា មានការទទួលស្គាល់ពីក្រុមហ៊ុនហ្វេកប៊ុកបានស៊ែរយ៉ាងផុសផុលជុំវិញការបកស្រាយបំភ្លឺរឿងអ្នកឧកញ៉ា ឡេង ណាវ៉ាត្រា ដែលមានជនអគតិក្រៅប្រទេសមួយចំនួនលើកឡើងថា អ្នកឧកញ៉ា ដែលជាម្ចាស់ផលិតកម្មហ្គាឡាក់ស៊ី បោកប្រាស់លុយប្រជាជនរឿងបង់លុយឱ្យក្រុមហ៊ុនតែមិនទាន់បានផ្ទះ។
អ្នកលេងបណ្តាញសង្គមធ្លាប់តែជាហ្វេនរបស់ តន់ ចន្ទសីម៉ា បានលើកឡើងថា «ប្រយ័ត្នអស់អ្នកគាំទ្រ កំពុងធ្លាក់កូដផងមួយរយៈហ្នឹង កុំខំយករឿងការងារមេ មកឡូកឡំនិងសិល្បៈ ប្រយ័ត្នអស់អ្នកគាំទ្រ…មើលតារាគេឯងផង ពីអ្នកធ្លាប់ស្តាប់ចម្រៀង , Top fan ម្នាក់នេះចង់ឆ្កួតហើយ Idol ស៊ែរឡើងខ្ញុំតាមដាន ដាច់បាយដាច់ទឹក, ធ្លាប់តែជាfan តាំងពីដំបូងរហូតមកដល់បច្ចុប្បន្ន តែមួយរយៈនេះidol ខ្ញុំមិនដូចមុន ចូលចិត្តសំឡេងតែមិនគាំទ្រទង្វើ , ហេតុអីអាយដលខ្ញុំកំពុងពេញស្រលាញ់ប្រែទៅជាទៅអញ្ចឹងវិញ រឿងមេនឹងកូនចៅបែងចែកអោយដាច់ មិនត្រូវការអែបអបនឹងបង្ហាញទង្វើបែបហ្នឹងទេ ក្ដីស្រលាញ់100%-95%ហើយ អាយដលសុំទោស រួមទាំងការបញ្ចេញមតិជាច្រើនទៀត»៕