ប្រទេសថៃ ៖ នាពេលកន្លងមក ទំព័រហ្វេសប៊ុករបស់ថៃមួយឈ្មោះធួរលុង (TOURLONG) បានចុះផ្សាយថា ពលករខ្មែរ និងឡាវដែលធ្វើការនៅប្រទេសថៃ គឺត្រូវត្រៀមប្រមូលបង្វេចត្រឡប់ទៅប្រទេសកំណើតវិញ ដោយសារតែក្រសួងការងារប្រទេសថៃបានចាត់វិធានការតឹងរ៉ឹងជាងមុននោះ គឺជាព័ត៌មានមិនផ្លូវការទេ ។ ការចុះផ្សាយរបស់ទំព័រហ្វេសប៊ុកថៃឈ្មោះធួរលុងនេះ គ្រាន់តែជាការញុះញង់ និងបង្កភាពចលាចលប៉ុណ្ណោះ ។

យោងតាមព័ត៌មានច្បាស់ការណ៍ដែលសារព័ត៌មាន KBN News ទទួលបានពីមន្ត្រីអន្តោប្រវេសន៍ថៃម្នាក់លើកឡើងថា ជុំវិញការចុះផ្សាយថា ប្រទេសថៃមិនទទួលយកពលករខ្មែរ និងឡាវនោះ គឺជាព័ត៌មានមិនពិតទេ គ្រាន់តែប្រទេសថៃនឹងផ្លាស់ប្តូរខ្លះៗនូវដំណើរការស្នើសុំនាំចូលពលករបរទេសតាម MOU ។ មន្ត្រីអន្តោប្រវេសន៍ថៃរូបនេះបន្តថា ប្រទេសថៃនៅតែទទួលពលករបរទេសចូលមកធ្វើការនៅថៃតាមធម្មតា ហើយពុំមានការបដិសេធចំពោះពលករខ្មែរ និងឡាវទេ គឺពលករខ្មែរ ឡាវ មីយ៉ាន់ម៉ា និងវៀតណាមអាចមកធ្វើការនៅថៃដោយស្របច្បាប់ ។

ដោយឡែក លោក Anucha Burapachaisri អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងជាអ្នកនាំពាក្យការិយាល័យនាយករដ្ឋមន្ត្រី បានថ្លែងថា ក្នុងកិច្ចប្រជុំគណៈរដ្ឋមន្ត្រី តាមសំណើរបស់ក្រសួងការងារពាក់ព័ន្ធនឹងការគ្រប់គ្រងលើការងាររបស់ពលករបរទេសចំនួន២ក្រុម គឺពលករមកពី៣ប្រទេស (កម្ពុជា ឡាវ និងមីយ៉ាន់ម៉ា) និងពលករមកពី៤ប្រទេស (កម្ពុជា ឡាវ មីយ៉ាន់ម៉ា និងវៀតណាម) គឺមានពលករបរទេសចំនួន៥សែននាក់បានក្លាយជាពលករខុសច្បាប់ ។

ក្រុមទី១ ៖ ការធ្វើការរបស់ពលករមកពី៣ប្រទេស (កម្ពុជា ឡាវ និងមីយ៉ាន់ម៉ា)
ជាក្រុមពលករចូលមកធ្វើការនៅប្រទេសថៃតាមអនុស្សរណៈការយោគយល់នៃកិច្ចសហការការងារ (MOU) ដោយព្រមព្រៀងថា ការជួលពលករមកធ្វើការតាម (MOU) ហើយលិខិតអនុញ្ញាតការងារផុតសុពលភាពក្នុងរយៈពេល៤ឆ្នាំ ។ បច្ចុប្បន្ន មានបញ្ហាជាច្រើនដែលធ្វើឱ្យពលករបរទេសមិនអាចធ្វើដំណើរត្រឡប់ទៅប្រទេសកំណើតរបស់ខ្លួនបាន ដូចជា មានភាពចលាចល និងការឆ្លងរាតត្បាតនៃជំងឺកូវីដ-១៩ ។ ចាប់ពីខែមករា ឆ្នាំ២០២៣ កន្លងមក ពលករបរទេសក៏ផុតសុពលភាពការងារតាម MOU ហើយធ្វើឱ្យពលករបរទេសនៅប្រទេសថៃជាង២សែននាក់ក្លាយជាពលករខុសច្បាប់ ហើយម្ចាស់អាជីវកម្មថៃ ក៏ខ្វះខាតកម្លាំងពលកម្មផងដែរ ។

ហេតុនេះ ក្រសួងការងារថៃបានសំណូមពរឱ្យលើកលែងចំពោះពលករបរទេសអាចស្នាក់នៅប្រទេសថៃក្នុងករណីពិសេស ហើយពួកគេអាចធ្វើការជាបណ្តោះអាសន្ន រហូតដល់ថ្ងៃទី៣១ ខែកក្កដា ឆ្នាំ២០២៣ ព្រោះបច្ចុប្បន្ន ប្រទេសថៃកំពុងរៀបចំរដ្ឋាភិបាលថ្មី ។ ដំណាក់កាលបន្តទៀត រដ្ឋាភិបាលថៃថ្មីនឹងពិចារណាអំពីការប្រើប្រាស់លិខិតឆ្លងដែន ឬឯកសារជំនួសលិខិតឆ្លងដែន, លិខិតអនុញ្ញាតធ្វើការ ឬឯកសារបញ្ជាក់ដោយនាយកដ្ឋានការងារធ្វើជាភស្តុតាង ។

ក្នុងអំឡុងពេលនេះ ម្ចាស់អាជីវកម្មថៃទាំងចាស់ និងថ្មី ដែលមានគោលបំណងជួលពលករបរទេស គឺត្រូវដំណើរការឯកសារស្នើសុំអនុញ្ញាតនាំពលករបរទេសមកធ្វើការនៅប្រទេសថៃតាម MOU ។ លើសពីនេះ ពលករបរទេសដែលកាន់លិខិតឆ្លងដែន ឬឯកសារជំនួសលិខិតឆ្លងដែនផុតសុពលភាព គឺពួកគេអាចធ្វើដំណើរត្រឡប់ទៅប្រទេសកំណើតបានដោយមិនចាត់ទុកថាខុសច្បាប់ ។

ក្រុមទី២ ៖ ការធ្វើការរបស់ពលករមកពី៤ប្រទេស (កម្ពុជា ឡាវ មីយ៉ាន់ម៉ា និងវៀតណាម)
តាមសេចក្តីសម្រេចរបស់គណៈរដ្ឋមន្ត្រីថៃនាពេលកន្លងមក បានឯកភាពឱ្យពលករបរទេសចូលមកធ្វើការនៅប្រទេសថៃ ប៉ុន្តែមានបញ្ហាដូចជា ពួកគេមិនអាចធ្វើលិខិតឆ្លងដែន ឬឯកសារជំនួសលិខិតឆ្លងដែន ឱ្យបានមុនថ្ងៃទី១៥ ខែឧសភា ឆ្នាំ២០២៣ ។ ដូច្នេះ ធ្វើឱ្យពលករបរទេសចំនួន៣សែននាក់ក្លាយជាពលករខុសច្បាប់នៅប្រទេសថៃ ។ ហេតុនេះ ប្រទេសថៃបានបន្ថែមរយៈពេលសម្រាប់ធ្វើលិខិតឆ្លងដែន ឬឯកសារជំនួសលិខិតឆ្លងដែនសម្រាប់ពលករបរទេសចំនួន៤ប្រទេស (កម្ពុជា ឡាវ មីយ៉ាន់ម៉ា និងវៀតណាម) ដោយពួកគេអាចស្នាក់នៅប្រទេសថៃក្នុងករណីពិសេស និងអាចធ្វើការបណ្តោះអាសន្នសិន រហូតដល់ថ្ងៃទី៣១ ខែកក្កដា ឆ្នាំ២០២៣ ។

ពលករបរទេសអាចប្រើប្រាស់ឯកសារដើមដែលអនុញ្ញាតឱ្យធ្វើការនៅប្រទេសថៃធ្វើជាភស្តុតាងសម្គាល់ខ្លួន ហើយនៅពេលពួកគេទទួលបានលិខិតឆ្លងដែន ឬឯកសារជំនួសលិខិតឆ្លងដែនហើយ ទើបការិយាល័យជនអន្តោប្រវេសន៍ថៃត្រួតពិនិត្យការបោះត្រា និងអនុញ្ញាតឱ្យស្នាក់នៅប្រទេសថៃ រហូតដល់ថ្ងៃទី១៣ ខែកុម្ភៈ ឆ្នាំ២០២៤ ឬរហូតដល់ថ្ងៃទី១៣ ខែកុម្ភៈ ឆ្នាំ២០២៥ គឺអាស្រ័យលើករណីនីមួយៗ ៕ ប្រភព ៖ Thansettakij

រដ្ឋធានីមូស្គូ៖ ការវាយប្រហារដោយដ្រូន មកលើរដ្ឋធានីមូស្គូ ជាបេះដូង នៃសហព័ន្ធន៍រុស្ស៊ី ជាលើកទី២ នៅក្នុងខែឧសភា នេះ កំពុងតែធ្វើឲ្យប្រជាជនរុស្ស៊ី មានការភ័យខ្លាច លាយឡំនឹងការខឹងសម្បា ចាប់តាំងពីសង្គ្រាមរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន បានចូលលុកលុយទៅលើទឹកដីរបស់អ៊ុយក្រែន កាលពីថ្ងៃទី២៤ ខែឧសភា ឆ្នាំ២០២២មក ប៉ុន្ដែរដ្ឋាភិបាលក្រុងកៀវ តែងតែច្រានចោលរាល់សកម្មភាពណាមួយ ជាប់ពាក់ព័ន្ធជាមួយនឹងការវាយប្រហារ នៅលើទឹកដីរបស់រុស្ស៊ី។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃពុធ ទី៣១ ខែឧសភា ថា យន្តហោះគ្មានមនុស្សបើក ឬ ដ្រូនវាយប្រហារ យ៉ាងតិចចំនួន៨គ្រឿង កាលពីព្រឹក ថ្ងៃអង្គារ បានហោះចូលទៅក្នុងដែនអាកាសរបស់ទីក្រុងមូស្គូ មុនពេលត្រូវបានបាញ់ទម្លាក់ ដោយប្រព័ន្ធការពារដែនអាកាសរបស់រុស្ស៊ី នៅក្នុងរដ្ឋធានីនេះ ខណៈដ្រូនជាច្រើនទៀត បានហោះទៅវាយប្រហារ លើអគារជាលំនៅឋានមួយចំនួនទៀត។ ស្របគ្នានេះដែរ រដ្ឋាភិបាលរុស្ស៊ី បានចោទប្រកាន់ថា អ៊ុយក្រែន ជាអ្នកវាយប្រហារភេរវកម្មនេះ ប៉ុន្ដែក្រុមមន្ត្រីក្រុងកៀវ បានបដិសេធយ៉ាងដាច់អហង្ការ ចំពោះការចោទប្រកាន់ទាំងនេះ។

លោក មីខៃឡូ ប៉ូដូលយ៉ាក (Mykhailo Podolyak) ទីប្រឹក្សាជាន់ខ្ពស់របស់លោក វ៉ូឡូឌីមៀរ ហ្សេឡែនស្គី ប្រធានាធិបតីអ៊ុយក្រែន បានថ្លែង នៅក្នុងកម្មវិធីអាហារពេលព្រឹក YouTube របស់អ្នកកាសែតរុស្ស៊ី ដែលកំពុងតែនិរទេសខ្លួន គឺលោក អាឡិកសាន់ដឺរ ផ្លូសេវ (Alexander Plushev) ថា «អ្នកដឹងទេ យើងកំពុងតែត្រូវបានគេអូសទាញឲ្យចូលទៅក្នុងយុគសម័យ នៃបញ្ញាសិប្បនិម្មិត។ ករណីនេះប្រហែលជាមិនមែនសុទ្ធតែដ្រូនទាំងអស់ ត្រៀមខ្លួន សម្រាប់តែការវាយប្រហារ ប្រឆាំងនឹងប្រទេសអ៊ុយក្រែន ប៉ុណ្ណោះទេ។ បញ្ហានេះទំនងជាអាចនឹងវិលត្រឡប់ទៅរកអ្នកបង្កើតរបស់សង្គ្រាមនោះវិញ។ យើងចង់សួរនូវសំណួរទៅកាន់ពួកគេវិញ ថា ហេតុអ្វីបានជាអ្នកបញ្ជូនគ្រឿងសព្វាវុធទាំងនោះ មកវាយប្រហារលើពួកយើង វាយប្រហារដល់អ៊ុយក្រែន ជាពិសេស វាយប្រហាររដ្ឋធានីក្រុងកៀវ ?

លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី បានថ្លែង ថា ការវាយប្រហារ មកលើរដ្ឋធានីមូស្គូ មានចេតនា កំណត់គោលដៅលើជនស៊ីវិល ជាមួយនឹងគោលបំណងបំភិតបំភ័យ ដល់ប្រជាជនរុស្ស៊ី។

ជាមួយគ្នានេះ លោក ស៊ើរហ្គេ សូប៊ីយ៉ានីន (Sergei Sobyanin) អភិបាលទីក្រុងមូស្គូ បានបញ្ជាក់ ថា រដ្ឋធានីរបស់រុស្ស៊ី និង តំបន់ជុំវិញទីក្រុងមួយនេះ កំពុងតែក្លាយជាគោលដៅ វាយប្រហារដ៏កម្រ ដោយដ្រូន កាលពីព្រឹក ថ្ងៃអង្គារ។ សកម្មភាពនេះ បានធ្វើឲ្យអគារមួយចំនួន រងការខូចខាតបន្តិចបន្តួច ហើយមានមនុស្សចំនួន២នាក់ បានរងរបួស។

លោក អាន់ឌ្រី វ៉ូរ៉ូបយូវ (Andrei Vorobyov) ប្រធានតំបន់មូស្គូ បានអះអាង ថា ដ្រូនមួយចំនួន ត្រូវបានបាញ់កម្ទេចចោល ខណៈកំពុងហោះសំដៅមកកាន់រដ្ឋធានីមូស្គូ។ ប៉ុន្ដែគាត់នៅតែមិនទាន់ដឹងច្បាស់ ថា តើនរណាជាអ្នកនៅពីក្រោយការវាយប្រហារដោយដ្រូននេះឡើយ។ នេះជាការប្រហារលើកទី២ នៅក្នុងទីក្រុងមូស្គូ នៅក្នុងខែឧសភានេះ ក្រោយពេលអាជ្ញាធររុស្ស៉ី បានអះអាង ថា ដ្រូនចំនួន២គ្រឿង បានវាយប្រហារ មកលើវិមានក្រឹមឡាំង ខណៈរដ្ឋាភិបាលក្រុងមូស្គូ បានចាត់ទុកជាសកម្មភាពប៉ុនប៉ង ធ្វើឃាតមកលើលោក វ៉្លាឌីមៀ ពូទីន ប្រធានាធិបតីរុស្ស៉ី ។

រដ្ឋាភិបាលរុស្ស៊ី បានចោទប្រកាន់ ថា អ៊ុយក្រែន បានវាយប្រហារដោយដ្រូនដ៏ខ្លាំងក្លា មកលើទីក្រុងមូស្គូ។ ប៉ុន្ដែប្រព័ន្ធការពារដែនអាកាស បានបាញ់កម្ទេចដ្រូន ចំនួន៨គ្រឿង។

នៅក្នុងរដ្ឋធានីកៀវរបស់អ៊ុយក្រែន ឯណោះវិញ កាលពីព្រឹក ថ្ងៃអង្គារ ក៏នៅតែបន្តរងការវាយប្រហារតាមផ្លូវអាកាស ដោយមីស៊ីល និង ដ្រូន ពីកម្លាំងទាហានរុស្ស៉ី ដោយបានសម្លាប់មនុស្សម្នាក់ និង ៣នាក់ផ្សេងទៀតបានរងរបួស ក្រោយពេលអគារដ៏ខ្ពស់មួយ បានរងការឆាបឆេះ។ ទាហានរុស្សី បានបង្កើនការវាយប្រហារជាថ្មី តាមផ្លូវអាកាស ដោយការប្រើប្រាស់ដ្រូន និង មីស៊ីល បាញ់ស្រោចទៅលើរដ្ឋធានីកៀវ និង តំបន់មួយចំនួនទៀត នៃប្រទេសអ៊ុយក្រែន ចាប់តាំងពីថ្ងៃអាទិត្យ ទី២៨ ខែឧសភា រហូតមក៕

ប្រសិនបើនិយាយអំពីអគារដែលខ្ពស់ជាងគេនៅលើពិភពលោក ប្រាកដណាស់គេនឹងនឹកឃើញដល់អគារ Burj Khalifa នៅទីក្រុងឌូបៃ ដោយមានកម្ពស់ ៨២៣ម៉ែត្រឯណោះ។ ចុះអ្នកទាំងអស់គ្នាដែរដឹងអត់ ប្រទេសនៅតំបន់អាស៊ានយើងមួយ មានអគារខ្ពស់ជាងគេលំដាប់ទី២នៅលើពិភពលោក។

អគារ Merdeka 118 នៅក្នុងទីក្រុងកូឡាឡាំពួ ប្រទេសម៉ាឡេស៊ីដែលជាអគារខ្ពស់ជាងគេនៅក្នុងតំបន់អាស៊ីអាគ្នេយ៍ និងលំដាប់លេខ២នៅលើសាកលលោក។ អគារនេះ មានកម្ពស់រហូតដល់ទៅដល់៦៧៨.៩ម៉ែត្រ ១១៨ជាន់ (មាន៥ជាន់ក្រោមដី)។

អគារពាណិជ្ជកម្មដ៏ខ្ពស់នេះ ចំណាយពេលសាងសង់ដល់តែ៨ឆ្នាំ ពោលពីថ្ងៃទី៣ ខែកក្កដា ឆ្នាំ២០១៤ ដល់ឆ្នាំ ២០២២ ក្រោមកញ្ចប់ថវិការ១,២១ ពាន់លានដុល្លារ។ ថ្វីតែសាងសង់រួចរាល់នៅក្នុងឆ្នាំនេះ ក៏ប៉ុន្តែអគារនេះ នឹងដាក់សម្ពោធជាផ្លូវការនៅពាក់កណ្តាល ឆ្នាំ ២០២៣ ឯណោះ។

គួរបញ្ជាក់ផងដែរថា ប្រសិនបើប្រៀបធៀបអគារMerdeka 118 ទៅអគារ Burj Khalifa នៅទីក្រុងឌូបៃ គឺខុសគ្នាតែ១៥០ម៉ែត្រ តែប៉ុណ្ណោះ៕

ប្រភព៖ Wikipedia

ប្រទេសចិន៖ យោងតាម ទីភ្នាក់ងារសារព័ត៌មាន Reuters បានឱ្យដឹងថា សីតុណ្ហភាពដែលបានកត់ត្រានៅថ្ងៃទី ២៩ ខែឧសភា នៅទីក្រុងសៀងហៃគឺ ៣៦.១ អង្សាសេ ដែលបន្តនិន្នាការក្តៅមិនធម្មតានៅក្នុងប្រទេសចិនចាប់តាំងពីខែមីនា។ សីតុណ្ហភាពនេះបានលើសពីកំណត់ត្រា ៣៥.៧ អង្សាសេដែលបានកំណត់ក្នុងឆ្នាំ ១៨៧៦, ១៩០៣, ១៩១៥ និង ២០១៨ ។ សីតុណ្ហភាពនៅក្នុងតំបន់នឹងបន្តកើនឡើងខ្ពស់ជាងនេះចាប់ពីខែមិថុនា, កក្កដា និងខែសីហា។

ប្រព័ន្ធផ្សព្វផ្សាយក្នុងស្រុកបានរាយការណ៍ថា ផ្នែកខ្លះនៃខេត្តស៊ីឈួន ដែលជាកន្លែងរស់នៅរបស់ប្រជាជន ៨០លាននាក់ ក៏បានចេញការព្រមានអំពីសីតុណ្ហភាពខ្ពស់ ដោយឈានដល់ ៤២ អង្សាសេផងដែរ។ យោងតាមប្រព័ន្ធផ្សព្វផ្សាយរដ្ឋ បានឱ្យដឹងថា ក្នុងរយៈពេល ៣-៥ ថ្ងៃខាងមុខ សីតុណ្ហភាពអតិបរមានៅក្នុងទីក្រុងមួយចំនួនក្នុងខេត្ត Sichuan នឹងឡើងដល់ ៣៨-៤២ អង្សាសេផងដែរ។

រួមជាមួយអាកាសធាតុមិនប្រក្រតីប្រទេសចិនក៏បានជួបប្រទះនឹងភ្លៀងធ្លាក់ខ្លាំងជាច្រើនសប្តាហ៍ក្នុងតំបន់មួយចំនួន។ ភ្នាក់ងារសង្គ្រោះបន្ទាន់ក្នុងខេត្ត Sichuan ភាគឦសានកាលពីថ្ងៃទី ២៩ ខែឧសភា បានជម្លៀសមនុស្សរាប់ពាន់នាក់ដើម្បីការពារភ្លៀងធ្លាក់ខ្លាំងនៅក្នុងតំបន់នេះ។ជាមួយគ្នានេះដែរ រដ្ឋាភិបាលទីក្រុង Chongqing បានព្រមានអំពីហានិភ័យនៃទឹកជំនន់ ដោយកម្រិតទឹកនៃទន្លេ Jialing បានកំណត់នឹងកើនឡើងប្រហែល ៦ ម៉ែត្រនៅថ្ងៃទី ៣០ ខែឧសភា ដោយសារទឹកជំនន់មានភ្លៀងធ្លាក់ខ្លាំង និង ការសម្របសម្រួលអាងស្តុកទឹក៕

ប្រភព៖cafef.com

ប្រទេសជប៉ុន ៖ នាយករដ្ឋមន្ត្រីជប៉ុន លោក Fumio Kishida បានប្រកាសក្នុងអំឡុងពេលកិច្ចប្រជុំក្រុមប្រឹក្សាយុទ្ធសាស្ត្រអនាគតកុមារថា លោកនឹងមិនប្រមូលពន្ធថ្មី ឬមិនដំឡើងពន្ធទេ ដើម្បីលើកទឹកចិត្តឱ្យគូស្វាមីភរិយាមានកូនបន្ថែមទៀត ក្នុងគោលបំណងដោះស្រាយបញ្ហាសង្គមមនុស្សចាស់នៅប្រទេសជប៉ុន ។ កាលពីខែមករា ឆ្នាំ២០២៣ កន្លងមក លោកនាយករដ្ឋមន្ត្រីជប៉ុនធ្លាប់លើកឡើងថា ការជួយគ្រួសារនីមួយៗឱ្យមានកូន គឺជាគោលនយោបាយសំខាន់បំផុតរបស់រដ្ឋាភិបាល ។

ក្រៅពីនេះ រដ្ឋាភិបាលនឹងបន្ថែមប្រាក់ចំណូលដល់គ្រួសារ និងលើកកម្ពស់ស្ត្រីក្នុងតួនាទីការងារឱ្យកាន់តែច្រើនជាងមុន រហូតដល់ផ្តល់ជំនួយដល់គ្រួសារឱ្យមានកូន ដូចជា បង្កើនចំនួនសាលាមត្តេយ្យដើម្បីជួយថែទាំក្មេងតូចៗ ។ ផែនការទាំងនេះស្ថិតនៅក្នុងគោលនយោបាយ «New Capitalism» របស់លោក Fumio Kishida ។

ចំណែកក្រុមប្រឹក្សាយុទ្ធសាស្ត្រអនាគតកុមារបានបង្ហាញវិធីបង្កើនអត្រាកំណើតរបស់ជប៉ុន ហើយនឹងប្រកាសយុទ្ធសាស្ត្រទាំងអស់យ៉ាងលម្អិតនៅខែមិថុនា ឆ្នាំ២០២៣ ។ គេសង្ឃឹមថា នឹងត្រូវការប្រើប្រាស់ប្រាក់ដ៏ច្រើន ហើយមានសំណួរថា តើរដ្ឋាភិបាលបានប្រាក់មកពីណា ? ប៉ុន្តែលោក Fumio Kishida បានបដិសេធការដំឡើងពន្ធផ្សេងៗ ។ ទោះយ៉ាងណា លោក Fumio Kishida ពិបាកស្វែងរកប្រាក់ដើម្បីដំណើរការគោលនយោបាយសំខាន់ៗចំនួន២ ដែលត្រូវការប្រើប្រាស់ប្រាក់ជាច្រើន ខណៈចំនួនពលរដ្ឋធ្លាក់ចុះ និងផ្នែកការពារជាតិ គឺមានសារសំខាន់ដូចគ្នាសម្រាប់ប្រទេសជប៉ុន ។

រដ្ឋាភិបាលជប៉ុនចាំបាច់ត្រូវដោះស្រាយបញ្ហាពលរដ្ឋធ្លាក់ចុះឱ្យបានឆាប់រហ័ស ពីព្រោះបញ្ហានេះកាន់តែធ្ងន់ធ្ងររៀងរាល់ឆ្នាំ ។ កាលពីឆ្នាំ២០២២ ជប៉ុនមានអត្រាកំណើតថ្មីត្រឹមតែ៧៩៩.៧២៨នាក់ប៉ុណ្ណោះ ដែលវាជាចំនួនតិចបំផុតតាំងពីគេបានកត់ត្រាមក ហើយក៏ជាលើកដំបូងផងដែរ ដែលអត្រាកំណើតថ្មីទាបជាង៨សែននាក់ ។ កាលពីមុន រដ្ឋាភិបាលជប៉ុនរំពឹងថា អត្រាកំណើតថ្មីនឹងមានចំនួនតិចជាង៨សែននាក់នៅឆ្នាំ២០៣០ ។

ចំនួនពលរដ្ឋជប៉ុននៅឆ្នាំ២០២២ ស្មើនឹង១២៤.៤៩លាននាក់ ខណៈនៅឆ្នាំ២០១៧ ជប៉ុនមានពលរដ្ឋរហូតដល់១២៨លាននាក់ ។ បើតាមការស្រាវជ្រាវមួយចេញផ្សាយដោយ The Lancet បង្ហាញថា ចំនួនពលរដ្ឋជប៉ុននឹងធ្លាក់ចុះពាក់កណ្តាល គឺនៅសល់ត្រឹមតែ៥៣លាននាក់ប៉ុណ្ណោះនៅចុងសតវត្សរ៍នេះ ៕ ប្រភព ៖ TNN World

ប្រទេសចិន៖ យានអវកាស Shenzhou ១៦ របស់ចិនបានចាកចេញពីកន្លែងបាញ់បង្ហោះនៅម៉ោង ៩:៣១ ព្រឹក (ស្មើនឹង ៨:៣១ នាទីព្រឹកនៅកម្ពុជា) ដោយនាំយកអវកាសយានិក ៣ នាក់ទៅកាន់ស្ថានីយ៍ Thien Cung សម្រាប់បេសកកម្មរយៈពេល ៥ ខែក្នុងលំហ ។យោងតាមប្រភពព័ត៌មាន SCMP នៅថ្ងៃទី៣០ ខែឧសភា បានឱ្យដឹងថា ទីភ្នាក់ងារអវកាសចិន China Manned Space (CMS) បានប្រកាសពីការបាញ់បង្ហោះដោយជោគជ័យប្រហែល ១៩ នាទីបន្ទាប់ពីយានអវកាសនេះបានហោះចេញពីមជ្ឈមណ្ឌលបាញ់បង្ហោះផ្កាយរណប Jiuquan នៅវាលខ្សាច់ Gobi ភាគខាងជើងប្រទេសចិនតាមការគ្រោងទុក។

មេបញ្ជាការបេសកកម្ម Shenzhou ១៦ លោក Jing Haipeng បានសង្កត់ធ្ងន់ថា ការបាញ់បង្ហោះនេះគឺជាដំណាក់កាលថ្មីនៃការអនុវត្ត និងការអភិវឌ្ឍន៍នៅក្នុងកម្មវិធីអវកាសរបស់ប្រទេសចិន។ នេះជាការហោះហើរទីបួនរបស់លោក Jing ទៅកាន់ទីអវកាស ដែលជាកំណត់ត្រាសម្រាប់អវកាសយានិកចិន។អវកាសយានិកនឹងជំនួសសមាជិកនៅលើស្ថានីយ Thien Cung ដែលត្រូវបានគេរំពឹងថានឹងត្រលប់មកផែនដីវិញនៅខែក្រោយ។ ពួកគេនឹងធ្វើការពិសោធន៍ និងការប្រមូលផ្តុំជាច្រើនក្នុងអំឡុងពេល ៥ ខែនៅក្នុងលំហ ខណៈពេលដែលបន្តការងារស្រាវជ្រាវ។ ក្រុមនាវិកនឹងធ្វើតេស្ដគន្លង ស៊ើបអង្កេតបាតុភូតកង់ទិច ប្រព័ន្ធប្រេកង់ពេលវេលាអវកាសដែលមានភាពជាក់លាក់ខ្ពស់ សាកល្បងទំនាក់ទំនងទូទៅ និងស្វែងរកប្រភពដើមនៃជីវិត៕ ប្រភព៖vnexpress

រាជធានីអូស្លូ (Oslo)៖ ក្រោយការដួលរលំ នៃមហាអំណាចសហភាពសូវៀត ជាគូប្រជែងដ៏ខ្លាំងក្លា ជាមួយនឹងសហរដ្ឋអាមេរិក នៅក្នុងឆ្នាំ១៩៩១នោះមក មរតក នៃប្រទេសមហាអំណាចកំពូលមួយនេះ បានធ្លាក់មកនៅលើរុស្ស៊ីទាំងអស់ ទើបធ្វើឲ្យក្រុងមូស្គូ នៅតែមានអំណាចដ៏ខ្លាំងលើសលប់ នៅលើពិភពលោក ហើយឥឡូវនេះ ក្រុមមន្រ្ដីន័រវ៉ែស បានអះអាង អំពីត្រីបាឡែនចារកម្មរបស់ក្រុងមូស្គូ បង្ហាញវត្ដមាន នៅឆ្នេរសមុទ្រ នៃប្រទេសស៊ុយអែត។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃអង្គារ ទី៣០ ខែឧសភា ថា អង្គការមួយ តាមដានសកម្មភាពរបស់សត្វសមុទ្រ បានអះអាង ថា ត្រីបាឡែនបែលូហ្កា (Beluga Whale) ធ្លាប់បង្ហាញខ្លួន នៅក្នុងប្រទេសន័រវ៉ែស កាលពីអំឡុងឆ្នាំ២០១៩។ ត្រីបាឡែននោះ ត្រូវគេជឿ ថា កងទ័ពជើងទឹករបស់រុស្ស៊ី ជាអ្នកបង្វឹកបង្ហាត់វា ដោយសារឃើញមានបំពាក់ខ្សែក្រវាត់ នៅលើខ្លួនរបស់វា ហើយបានបង្ហាញខ្លួនជាថ្មី នៅឆ្នេរសមុទ្រ នៃប្រទេសស៊ុយអែត។

ក្រុមជីវវិទូសមុទ្រ នៃនាយករដ្ឋានជលផលសមុទ្រន័រវ៉ែស បានអះអាង ថា ត្រីបាឡែនបែលូហ្កានេះ បានបង្ហាញខ្លួន ជាលើកដំបូង នៅក្នុងតំបន់អាក់ទិក នាភាគខាងជើង ប្រទេសន័រវ៉ែស ហើយត្រូវបានក្រុមអ្នកជីវវិទូសមុទ្រន័រវ៉ែស ហូតចេញនូវខ្សែក្រវាត់ចងភ្ជាប់ជាមួយនឹងឧបករណ៍កាមេរ៉ា សម្រាប់ថតសកម្មភាព និង មានពាក្យថា «បរិក្ខារសាំងពេធើរប៊ឺគ» បោះពុម្ពនៅលើខ្សែក្រវាត់ប្លាស្ទិកនោះ។

ត្រីបាឡែនបែលូហ្កានេះ អាចមានប្រវែង រហូតដល់៦ម៉ែត្រ ហើយវាអាចរស់នៅ ចន្លោះពី៤០ទៅ៦០ឆ្នាំ។ បើតាមធម្មតារបស់វា ត្រីបាឡែនប្រភេទនេះ មានទម្លាប់រស់នៅក្នុងតំបន់ទឹកកក ដូចជា នៅតំបន់ជុំវិញកោះហ្គ្រីនឡែនដ៍ (Greenland) ហើយតំបន់ភាគខាងជើង នៃប្រទេសន័រវ៉ែស និង រុស្ស៊ី។

ក្រុមមន្ត្រីនាយកដ្ឋានជលផលន័រវ៉ែស បានបញ្ជាក់ ថា ត្រីបាឡែននេះ ប្រហែលជាអាចគេចចេញពីកន្លែងហ៊ុមព័ទ្ធជុំវិញ ហើយក៏ប្រហែលជាត្រូវបានបង្វឹកបង្ហាត់ ដោយកងទ័ពជើងទឹករបស់រុស្ស៊ី ព្រោះវាហាក់បីដូចជាភាពបន្ស៊ាំង ទៅនឹងមនុស្សម្នា។

អង្គការ OneWhale បានបញ្ជាក់ កាលពីថ្ងៃចន្ទ ថា ត្រីបាឡែនបែលូហ្កា បានចំណាយពេលជាង៣ឆ្នាំ ហើយវាបានហែលបន្តិចម្តងៗ រំកិលខ្លួន រហូតមកដល់កណ្តាល នៃចុងឆ្នេរសមុទ្ររបស់ប្រទេសន័រវ៉ែស មុនពេលវាបង្កើនល្បឿនភ្លាមៗ នៅក្នុងរយៈពេលប៉ុន្មានខែកន្លងទៅថ្មីៗនេះ បន្តដំណើរទៅកាន់ប្រទេសស៊ុយអែត។

លោក សេបាស្ទៀន ស្ត្រានដ៍ (Sebastian Strand) ជីវវិទូសមុទ្រ នៃអង្គការ OneWhale បានប្រាប់ដល់ទីភ្នាក់ងារសារព័ត៌មានរបស់បារាំង AFP ថា «យើងមិនដឹងថា ហេតុអ្វីបានជាវាមានល្បឿនលឿនបែបនេះទេ ជាពិសេស ចាប់តាំងពីវាកំពុងតែហែលយ៉ាងលឿន ឃ្លាតឆ្ងាយចេញពីបរិស្ថានធម្មជាតិរបស់វា។ យើងជឿ ថា វាមិនមែនជាត្រីបាឡែនធម្មជាតិនោះឡើយ ដោយសារតែវាមានចរិត ដូចសត្វដែលបានរួចចេញពីម្ចាស់ ឬ ត្រូវគេបោះបង់ចោល។

បើទោះជាយ៉ាងណាក៏ដោយ រដ្ឋាភិបាលក្រុងមូស្គូ មិនធ្លាប់ប្រតិកម្មជាផ្លូវការណាមួយ ប្រឆាំងនឹងការសន្និដ្ឋានរបស់ន័រវ៉ែស ដែលជាប្រទេសសមាជិករបស់អង្គការណាតូ អះអាង ថា ត្រីបាឡែនបែលូហ្កានោះ អាចជាចារកម្មរបស់រុស្ស៊ី។

សមុទ្របារ៉ែនស៍ (Barents) ក្លាយជាតំបន់ភូមិសាស្ត្រនយោបាយខាងយុទ្ធសាស្រ្ដដ៏សំខាន់បំផុតមួយ ដោយសារតែសកម្មភាព នៃកងនាវាមុជទឹករបស់លោកខាងលិច និង រុស្ស៊ី បានត្រួតពិនិត្យយ៉ាងដិតដល់បំផុត។ ចំណែកតំបន់សមុទ្រនោះ ក៏ជាច្រកដ៏សំខាន់ ឆ្ពោះទៅកាន់តំបន់ភាគខាងជើង ដោយសារវាអាចកាត់បន្ថយនូវការធ្វើដំណើរតាមសមុទ្រ រវាងមហាសមុទ្រអាត្លង់ទិក និង មហាសមុទ្រប៉ាស៊ីហ្វិក ផងដែរ៕