អ្នកមេម៉ាយ សេង សុខឃីម ដែលជាអតីតសង្សារតារាចម្រៀងនាយ ចឺម បានបង្ហោះសំណេរនៅលើបណ្តាញសង្គមពីរឿងអាហារកិច្ចរបស់កូនថានាងមិនដែលទាមទារអ្វីពីអតីតស្វាមីឡើយ ព្រមទាំងលើកឡើងទៀតថាបើសម្រេចចិត្តចង់ចិញ្ចឹមកូនម្នាក់ហើយកុំយករឿងកូនមកទាមទារលុយពីគេ និយាយមិនល្អពីឪពុកប្រាប់កូន ព្រោះធ្វើបែបនេះកាន់តែធ្វើឱ្យយើងអស់តម្លៃ។
ដូចមហាជនជ្រាបមកហើយរឿងអាស្រូវក្នុងគ្រួសារតារាចម្រៀង ហ្សូណូ និងអតីតភរិយា ចាន់ សុផានី នៅតែមានជាប្រធានបទនៅលើបណ្តាញសង្គម រហូតកូនស្រីលោក ហ្សូណូ ចេញមក Live នៅលើហ្វេកប៊ុកតតាំងយកភាពយុត្តិធម៌ជូនម្តាយផងដែរ ក្រោយពីអ្នកលេងបណ្តាញសង្គមរិះគន់។
ជាមួយគ្នានេះផងដែរ នៅលើហ្វេកប៊ុករបស់ស្រីស្អាត សេង សុខឃីម វិញក៏បានបង្ហោះពីខ្លឹមសារក្នុងនាមជាម្តាយមួយរូបដែលចិញ្ចឹមកូនប្រុសតែម្នាក់ឯងដោយមិនទាមទារការជួយពីអតីតស្វាមីឡើយ។
ស្រីស្អាតសាច់សខ្ចីរូបនេះបានរៀបរាប់នៅយប់ថ្ងៃទី៣០ ខែឧសភា ឆ្នាំ២០២៣ថា «ខ្ញុំលែងលះ អាហារកិច្ចគេថាជួយ តែមិនដែលជួយ… ខ្ញុំក៏មិនដែលទាមទារ មិនមែនខ្ញុំខ្លាំងទេ ខ្ញុំចេញមកតែខ្លួននិងយកកូនប្រុសមកផ្ទះវិញ តែខ្ញុំមិនសុំគេឡើយ ទោះក្រម៉េចក៏ដោយ ព្រោះបើគេមានចិត្តជាឪពុកគេនិងមើលថែកូនហើយ តែបើគេគ្មានចិត្តចាប់ទុកថាគេជាមនុស្សមិនចេះស្រលាញ់កូន ខ្ញុំគិតត្រូវដែលលែងលះនិងគេ»។
អ្នកនាង បន្តទៀតថា «បើអ្នកសំរេចចិត្តថាចង់ចិញ្ចឹមកូនម្នាក់ឯងហើយ កុំយករឿងកូនមកទាមទារលុយពីគេ កុំនិយាយរឿងឪពុកមិនល្អ មិនដែលមើលថែ និយាយឱ្យកូនស្អប់ ខឹង ឪពុក ធ្វើបែបនេះ ស្មើនិងយើងជាម្តាយអ្នកដាក់សម្ពាធឱ្យកូន មានអារម្មណ៍ថាខ្លួនឯងគ្មានខ្វះភាពកក់ក្តៅពីឪពុក-ល- យើងធ្វើបែបនេះកាន់តែធ្វើឱ្យខ្លួនឯងអត់តម្លៃ និយាយក្នុងនាមមនុស្សស្រី»។
បន្ទាប់ពីលើកឡើងបែបនេះ អ្នកលេងបណ្តាញសង្គមក៏បានចូលទៅបញ្ចេញមតិយោបល់លើការបង្ហោះរបស់ សេង សុខឃីម ទាំងមតិស្រប និងមតិមិនស្រប។ អ្នកខ្លះបានលើកឡើងថា ស្ថានភាពមិនដូចគ្នាទេហើយក៏បាននិយាយថាកុំឱ្យស្រីស្អាតរូបនេះដៀមដាមអតីតភរិយា ហ្សូណូ ព្រោះអ្នកនាង ចាន់ សុផានី ចង់ឱ្យកូនស្រីល្អ ខណៈអ្នកខ្លះក៏បង្ហាញ ការគាំទ្រនូវការលើកឡើងរបស់ សេង សុខឃីម ផងដែរ៕
