(ភ្នំពេញ)៖ នៅថ្ងៃទី២០ ខែមករា ឆ្នាំ២០២៥ មានរូបភាពជាច្រើនបានបង្ហាញថា ជនបរទេសរាប់ពាន់នាក់ដែលភាគច្រើនជាជនជាតិវៀតណាម និងចិន បាននាំគ្នាសម្រុកទៅតម្រង់ជួរយ៉ាងកកកុញនៅច្រកទ្វារព្រំដែនអន្តរជាតិបាវិត ខេត្តស្វាយរៀង ដើម្បីចាកចេញពីកម្ពុជា ស្របពេលដែលកម្ពុជាកំពុងបើកយុទ្ធនាការបង្រ្កាបឧក្រិដ្ឋកម្មឆបោ.កតាមអនឡាញខ្លាំងក្លាបំផុត។

ខណៈសមត្ថកិច្ចកម្ពុជាកំពុងដុតដៃដុតជើងប្រយុទ្ធប្រឆាំងឧក្រិដ្ឋកម្មតាមបច្ចេកវិទ្យា និងបង្រ្កាបបណ្ដាញឆបោ.កដោយមិនមានការលើកលែង រូបភាព និងវីដេអូ ជាច្រើនដែលត្រូវបានចែករំលែកនៅលើបណ្ដាញសង្គមនាពេលថ្មីៗនេះបានបង្ហាញថា ជនបរទេសចម្រុះជាតិសាសន៍ បានរៀបចំបង្វិចចាកចេញពីកម្ពុជាយ៉ាងតក់ក្រហល់ដោយមិនច្បាស់ពីមូលហេតុ។

តួយ៉ាងនៅក្រុងបាវិត ចាប់ពីយប់ថ្ងៃទី១៨ ដល់ថ្ងៃទី២០ ខែមករានេះ គេឃើញមានជនបរទេសបានឈរតម្រង់ជួរយ៉ាងហូរហែរ នៅមុខច្រកទ្វារអន្តរជាតិដើម្បីធ្វើដំណើរចាកចេញពីកម្ពុជាចូលទៅកាន់ប្រទេសវៀតណាម។ វត្តមានដ៏ច្រើនសម្បើមរបស់ជនបរទេសទាំងនោះនៅច្រកព្រំដែន ត្រូវបានគេសន្និដ្ឋានថា ទំនងជាការរត់គេចពីការប្រមា.ញ់របស់សកមត្ថកិច្ចកម្ពុជា ដោយសារពួកគេមានជាប់ពាក់ព័ន្ធជាមួយនឹងកាងារឆបោកតាមអនឡាញ។

ដោយឡែកនៅខាងភ្នំពេញឯណេះ ក៏មានជនជាតិចិនច្រើនរយនាក់ផងដែរ មកតម្រង់ជួរមុខស្ថានទូតក្នុងគោលបំណងស្នើសុំជំនួយពាក់ព័ន្ធនឹងការរៀបចំឯកសារផ្សេងៗរបស់ពួកគេ ព្រោះបើតាមសេចក្ដីរាយការណ៍មួយចំនួនបានអះអាងថា ជនជាតិចិនទាំងនោះភាគច្រើនមិនមានលិខិតឆ្លងដែនជាប់ខ្លួននោះទេ។

សរុបសេចក្ដីមក នៅអំឡុងពេលមួយរយៈចុងក្រោយនេះគេសង្កេតឃើញថា ប្រតិបត្តិការបង្រ្កាបទៅលើបណ្ដាញក្រុមឧក្រិដ្ឋជនឆបោ.កតាមអនឡាញ មានការកើនឡើងខ្លាំងគួរឲ្យកត់សម្គាល់។ ក្នុងនោះសមត្ថកិច្ចកម្ពុជាបានធ្វើការចាប់និងបញ្ជូនជនបរទេសដែលពាក់ព័ន្ធត្រឡប់ទៅកាន់ប្រទេសកំណើតរបស់ពួកគេ ដើម្បីបន្តនីតិវិធីស៊ើបអង្កេត និងផ្តន្ទាទោសជាបន្តបន្ទាប់។

សកម្មភាពចុះបង្រ្កាបដោយគ្មានការលើកលែងនេះ មិនត្រឹមតែបានបំបែ.កសម្បុកក្រុមឧក្រិដ្ឋជនទាំងនោះបានតែមួយទេ ប៉ុន្តែក៏ទទួលបានការកោតសរសើពីអន្តរជាតិ និងមានការសាទរពីប្រជាពលរដ្ឋកម្ពុជាយ៉ាងផុសផុលផងដែរ ហើយយើងទាំងអស់គ្នាសង្ឃឹមយ៉ាងមុតមាំថា កិច្ចខិតខំប្រឹងប្រែងនេះនឹងជួយរក្សាបាននូវសន្តិភាព ស្ថិរភាព និងសណ្ដាប់ធ្នាប់នៅក្នុងសង្គមជាតិ និងតំបន់ទាំងមូល៕

សេដ្ឋីនីចិត្តធម៌ Sophea Böttcher បានបង្ហាញថាអ្នកមួយចំនួនបានផ្ញើសារជាច្រើនទៅកាន់ស្វាមីរបស់ខ្លួនក្នុងការសុំជំនួយដោយលោកស្រីបញ្ជាក់ថាខ្លួនគឺជាអ្នកកាន់គណនេយ្យ និងគ្រប់គ្រងការបរិច្ចាគ។ មិនត្រឹមតែប៉ុណ្ណោះមានអ្នកខ្លះថែមទាំងស្នើសុំតាមរយៈកុងធនាគារទៀតដែលប៉ះពាល់ដល់ជីវិតឯកជននិងជារឿងរំខានខ្លាំងហើយមិនសមរម្យឡើយ។

នៅយប់ថ្ងៃទី២០ មករា សេដ្ឋីនីចិត្តធម៌ Sophea Böttcher បានបង្ហោះវីដេអូមួយនិយាយអំពីអ្នកមួយចំនួនបានផ្ញើសារសុំជំនួយរាប់មិនអស់មកកាន់ស្វាមីរបស់ខ្លួន។ លោកស្រីបានភ្ជាប់មកជាមួយនឹងសំណេរថា «សូមបងប្អូនទាំងអស់ដែលផ្ញើសារទៅស្វាមីខ្ញុំ ដើម្បីសុំជំនួយ សូមមេត្តាជ្រាបថា គាត់មិនមានពេលឆ្លើយតបទេហើយក៏មិនយល់ភាសាខ្មែរដែរ ការងារគាត់ មិនមែនសម្រាប់ទទួលសារ ឬផ្ញើលុយជំនួយទេ។ អ្នកណាចង់សុំជំនួយ សូមផ្ញើមកខ្ញុំដោយផ្ទាល់ ខ្ញុំជាអ្នកកាន់គណនេយ្យ និងគ្រប់គ្រងការបរិច្ចាគទាំងអស់។ ហើយសូមជម្រាបជាពិសេស ក្មេងស្រីៗស្អាតៗ មិនបាច់ផ្ញើសារទៅគាត់ទេព្រោះ Facebook គាត់ខ្ញុំជាអ្នកកាន់!សូមអរគុណសម្រាប់ការយល់ដឹង»។

ការបង្ហោះនេះបានធ្វើឱ្យទស្សនិកជនសម្តែងការហួសចិត្តយ៉ាងខ្លាំងខណៈនៅក្នុងផ្នែកបញ្ចេញមតិយោបល់វិញគេបានឃើញថាអ្នកមួយចំនួនទទូចសុំលុយពីលោកស្រី Sophea Böttcher ដោយមិនក្រែងចិត្ត។ អ្វីដែលកាន់ហួសចិត្តថែមទៀតមិនត្រឹមតែផ្ញើសារសុំជំនួយតាមបណ្តាញសង្គមប៉ុណ្ណោះមានបុគ្គលខ្លះថែមទាំងបានផ្ញើសារសុំជំនួយតាមរយៈកុងធនាគារទៀតដែលធ្វើឱ្យប៉ះពាល់ជីវិតឯកជនរបស់លោកស្រីយ៉ាងខ្លាំង។

លោកស្រី បានបង្ហោះសំណេរទៀតថា «ខ្ញុំសូមអភ័យទោសជាមុន និងសូមជម្រាបជូនជាផ្លូវការថា ចាប់ពីពេលនេះតទៅ អ្នកណាដែលផ្ញើសារ ស្នើសុំប្រាក់ ឬព្យាយាមទាក់ទងខ្ញុំតាមរយៈ គណនីធនាគារផ្ទាល់ខ្លួន របស់ខ្ញុំ នឹង មិនទទួលបានការឆ្លើយតប ការឧបត្ថម្ភ ឬការផ្តល់អំណោយណាមួយពីខ្ញុំទៀតឡើយ។ ខ្ញុំបានជូនដំណឹងជាច្បាស់រួចហើយពីមុនថា ខ្ញុំ មិនទទួលសារ មិនទទួលសំណើ និងមិនអនុញ្ញាតឱ្យប្រើគណនីធនាគារផ្ទាល់ខ្លួនរបស់ខ្ញុំ សម្រាប់ការស្នើសុំ ឬការទាក់ទងអំពីការបរិច្ចាគ ទេ។ ដូច្នេះ ខ្ញុំបានបិទ និងលុបជម្រើសទាំងអស់ដែលពាក់ព័ន្ធនឹងការទាក់ទងតាមវិធីនេះ។

ចាប់ពីពេលនេះតទៅ ប្រសិនបើនៅមានអ្នកបន្តផ្ញើសារ ឬស្នើសុំតាមគណនីធនាគាររបស់ខ្ញុំ ខ្ញុំនឹងកត់ត្រាឈ្មោះទុកជាឯកសារ ហើយរាល់សារទាំងនោះ នឹងត្រូវចាត់ទុកថា មិនមានការទទួលស្គាល់ និងមិនមានការឆ្លើយតបពីខ្ញុំឡើយ។ បងប្អូនមានពេលវេលា និងឱកាសគ្រប់គ្រាន់ក្នុងការទាក់ទងតាមរយៈ Facebook ទាំងពីរគណនីរបស់ខ្ញុំ ឬតាម ក្រុម (Group) ដែលខ្ញុំធ្វើការជាមួយ ដែលត្រូវបានរៀបចំឡើងសម្រាប់ការទំនាក់ទំនង និងការជួយគ្នាតាមរបៀបត្រឹមត្រូវ និងមានការគ្រប់គ្រង។ សូមមេត្តាគោរពការសម្រេចចិត្ត ភាពឯកជន និងគណនីផ្ទាល់ខ្លួនរបស់ខ្ញុំ។ សូមកុំផ្ញើសារ ឬទាក់ទងមកខ្ញុំតាមរយៈគណនីធនាគារផ្ទាល់ខ្លួននេះទៀត»។

លោកស្រី Sophea Böttcher បានបញ្ជាក់ទៀតថា «ប្រសិនបើគាត់មានភាពលំបាកពិតប្រាកដ នាងខ្ញុំព្រមជួយតាមសទ្ធាជ្រះថ្លា ដូចដែលបានជួយអ្នកដទៃដែរ ដោយចិត្តពេញបេះដូង និងសេចក្តីស្រឡាញ់មិនថាជាវីរបុរសកងទ័ព ជនពិការចាស់ជរា ឬក្មេងកំព្រាក្តី។

ការជួយទាំងអស់ នាងខ្ញុំនឹងធ្វើ តែតាមរយៈគណនី (account) របស់នាងខ្ញុំ និងតាមក្រុមការងាររបស់នាងខ្ញុំប៉ុណ្ណោះ ដើម្បីឲ្យមានការគ្រប់គ្រងត្រឹមត្រូវ និងមានសុចរិតភាព។
ប៉ុន្តែ ប្រសិនបើមានការទាក់ទង ឬស្នើសុំដោយផ្ទាល់ទៅកាន់គណនីធនាគាររបស់នាងខ្ញុំ វាជារឿងរំខានខ្លាំង ហើយមិនសមរម្យឡើយ។ ក្នុងករណីបែបនេះ នាងខ្ញុំមិនអាចផ្តល់ជំនួយឱ្យបានទេ។សូមមេត្តាយល់ដឹង និងគោរពវិធីសាស្ត្រនៃការជួយរបស់នាងខ្ញុំ»៕

សុខភាព៖ ទឹកអប់បានក្លាយជាគ្រឿងតុបតែងខ្លូនដែលមិនអាចខ្វះបានរបស់បុរសនារីជាច្រើន ជាយូរយាណាស់មកហើយ។ វាមានច្រើនក្លិន ក្រអូបឈ្ងុយឈ្ងប់ ធ្វើឲ្យអ្នកមានភាពទាក់ទាញ និងមានទំនុកចិត្តផងដែរ។ ប៉ុន្តែតើអ្នកដឹងទេថា ការបាញ់ទឹកអប់ដោយផ្ទាល់លើកញ្ចឹងក និងឆ្អឹងដងកាំបិត អាចនឹងកំពុងបំផ្លាញសុខភាពអ័រម៉ូន និងក្រពេញទីរ៉ូអ៊ីតរបស់អ្នកដោយមិនដឹងខ្លួន។ នេះបើតាមអ្នកជំនាញផ្នែកសុខភាព និងអាហារូបត្ថម្ភ លោកស្រី Manpreet Kalra ។

ខាងក្រោមនេះគឺជាផលប៉ះពាល់សំខាន់ៗ និងមូលហេតុដែលអ្នកគួរផ្លាស់ប្តូរទម្លាប់នេះភ្លាមៗ៖

១. ការរំខានដល់ប្រព័ន្ធអ័រម៉ូន (Endocrine Disruptors)៖ ទឹកអប់សំយោគភាគច្រើនមានផ្ទុកសារធាតុ Phthalates។ សារធាតុគីមីនេះមានសមត្ថភាព បន្លំ ធ្វើជាអ័រម៉ូនធម្មជាតិក្នុងរាងកាយ ឬរារាំងមុខងាររបស់វា។ ការប្រើប្រាស់រយៈពេលវែងអាចនាំឱ្យមានអតុល្យភាពអ័រម៉ូន ដែលប៉ះពាល់ដល់ថាមពលរាងកាយ និងសុខភាពបន្តពូជ។

២. គ្រោះថ្នាក់ចំពោះក្រពេញទីរ៉ូអ៊ីត៖ ក្រពេញទីរ៉ូអ៊ីតស្ថិតនៅត្រង់ផ្នែកខាងមុខនៃកញ្ចឹងក វាមានតួនាទីយ៉ាងសំខាន់ក្នុងការគ្រប់គ្រងការរំលាយអាហារ (Metabolism)។ ស្បែកត្រង់កញ្ចឹងកមានលក្ខណៈស្តើង និងងាយស្រូបយកសារធាតុគីមីចូលទៅក្នុងចរន្តឈាមបានលឿនជាងតំបន់ផ្សេងទៀត។ នៅពេលជាតិពុលជ្រាបចូលទៅដល់ក្រពេញទីរ៉ូអ៊ីត វានាំឱ្យមានរោគសញ្ញាដូចជា អស់កម្លាំងខ្លាំង ប្រែប្រួលអារម្មណ៍ និងការឡើងទម្ងន់ខុសធម្មតា។

៣. បញ្ហាស្បែក និងស្នាមខ្មៅ (Poikiloderma of Civatte)៖ ក្រៅពីបំផ្លាញសុខភាពខាងក្នុង ទឹកអប់ក៏អាចនាំឲ្យខូចសម្រស់ស្បែកករបស់អ្នកផងដែរ ដោយសារ គ្រឿងផ្សំដូចជាប្រេងប៊ឺហ្គាម៉ុត (Bergamot) ក្នុងទឹកអប់ ធ្វើឱ្យស្បែកឆាប់ប្រតិកម្មពេលត្រូវនឹងពន្លឺព្រះអាទិត្យ។ នេះអាចបណ្តាលឱ្យកើតមាន pigmentation ឬចំណុចខ្មៅៗ និងស្នាមក្រហមដែលពិបាកព្យាបាល។

៤. ការប៉ះពាល់ដល់ដំណេក និងផ្លូវចិត្ត៖ ស្ដាប់មើលទៅដូចចម្លែកបន្តិច ប៉ុន្តែការកកកុញនៃសារធាតុគីមីក្នុងរាងកាយអាចរំខានដល់ប្រព័ន្ធប្រសាទ នាំឱ្យអ្នកមានអារម្មណ៍មួម៉ៅ គេងមិនលក់ ឬគេងមិនស្កប់ស្កល់ ដែលនឹងជះឥទ្ធិពលអវិជ្ជមានដល់គុណភាពជីវិតប្រចាំថ្ងៃ។

យ៉ាងណាមិញ ដើម្បីរក្សាក្លិនក្រអូបផង និងសុខភាពផង អ្នកជំនាញណែនាំឱ្យផ្លាស់ប្តូរទីតាំងបាញ់ទឹកអប់ ដូចជាបាញ់លើសម្លៀកបំពាក់ ឬ កដៃ ជំនួសឱ្យការបាញ់ផ្ទាល់លើស្បែកកញ្ចឹងកវិញ។ ម៉្យាងទៀត គួរជ្រើសរើសប្រើប្រាស់ទឹកអប់ដែលចម្រាញ់ចេញពីប្រេងផ្កាធម្មជាតិ (Essential Oils) ឬប្រភេទ Roll-on ដែលគ្មានជាតិអាល់កុល និងគ្មានសារធាតុ Phthalates៕

(ភ្នំពេញ) ៖ ទូតចិនបានថ្លែងអំណរគុណចំពោះរាជរដ្ឋាភិបាលកម្ពុជា ដែលបានសហការក្នុងការចាប់ខ្លួន មេខ្លោងជនជាតិចិននិងបក្ខពួកពាក់ព័ន្ធនឹងបណ្ដាញឆបោ.កអនឡាញ និងបញ្ជូនត្រលប់ទៅប្រទេសចិន ដើម្បីបន្តនីតិវិធីស៊ើបអង្កេតនិងផ្តន្ទាទោស។

ការអរគុណនេះ ធ្វើឡើងក្នុងពេល លោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា បានចូលជួបពិភាក្សាការងារជាមួយទេសរដ្ឋមន្ត្រី ឆៃ ស៊ីណារិទ្ធ ប្រធានលេខាធិការដ្ឋានគណៈកម្មការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា កាលពីថ្ងៃទី២០ ខែមករា ឆ្នាំ២០២៦ ។

នៅក្នុងពេលជំនួបនោះ លោក វ៉ាង វិនពីន បានថ្លែងគុណដល់រាជរដ្ឋាភិបាលក៏ដូចជាសមត្ថកិច្ចរបស់កម្ពុជា ដែលបានសហការក្នុងការចាប់ខ្លួន និងបញ្ជូនមេខ្លោងជនជាតិចិន និងគូកន ត្រលប់ទៅប្រទេសចិន ដើម្បីបន្តនីតិវិធីស៊ើបអង្កេត និងផ្តន្ទាទោស ដោយសង្កត់ធ្ងន់ថា កិច្ចសហប្រតិបត្តិការនេះ ជាសក្ខីកម្មសបង្ហាញពីកិច្ចខិតខំប្រឹងប្រែង ក៏ដូចជាលទ្ធផលជាក់ស្តែងរបស់កម្ពុជាក្នុងការប្រយុទ្ធប្រឆាំងការឆបោកតាមអនឡាញ ទៅកាន់សហគមន៍អន្តរជាតិ ហើយវាក៏សបញ្ជាក់ពីកិច្ចសហប្រតិបត្តិការល្អរវាងសមត្ថកិច្ចកម្ពុជា និងចិនផងដែរ។

ទន្ទឹមនឹងនេះ ទេសរដ្ឋមន្ត្រី ឆៃ ស៊ីណារិទ្ធ បានធ្វើការបញ្ជាក់ជាថ្មីថា រាជរដ្ឋាភិបាលកម្ពុជា មានជំហររឹងមាំ និងជាក់លាក់ក្នុងការដាក់វិធានការបង្ក្រាប និងបោសសម្អាតទីតាំង និងក្រុមឧក្រិដ្ឋជនឆបោកតាមប្រព័ន្ធបច្ចេកវិទ្យា ក៏ដូចជាការអនុវត្តនីតិវិធីលើជនល្មើសផងដែរ។ កម្ពុជានឹងបន្តកិច្ចសហប្រតិបត្តិការជាមួយបណ្តាប្រទេសជាដៃគូ ដើម្បីបន្តធ្វើការរួមគ្នាអនុវត្តប្រតិបត្តិការបង្ក្រាបប្រកបដោយសង្គតិភាព សំដៅធ្វើយ៉ាងណាបំបែកសម្បុកក្រុមឧក្រិដ្ឋជនទាំងនោះឲ្យបាន។

ហើយភាគីទាំងពីរបានវាយតម្លៃខ្ពស់ចំពោះកិច្ចសហប្រតិបត្តិការរវាងប្រទេសកម្ពុជា និងចិនលើគ្រប់វិស័យនិយាយជារួម និងដោយឡែកកិច្ចសហប្រតិបត្តិការក្នុងវិស័យសន្តិសុខ និងការប្រយុទ្ធប្រឆាំងឧក្រិដ្ឋកម្ម ជាពិសេសឧក្រិដ្ឋកម្មឆបោកតាមប្រព័ន្ធបច្ចេកវិទ្យាក៏មានភាពជិតស្និទ្ធ និងទទួលបានលទ្ធផលជាផ្លែផ្កាផងដែរ៕