លោក ទួន សុខគា ប្រធានក្លឹបបណ្ដុះបណ្ដាលវប្បធម៌ខ្មែរអង្គរ ដែលជាក្លឹបកុមារ រឿន កក្កដា (ហនុមានតូច) ហាត់រៀនបានលើកឡើងថាលោកស្ទើរតែបោះបង់ម្តងៗហើយក្នុងការបើកក្លឹបនេះព្រោះតែជួបវិបត្តិសេដ្ឋកិច្ច។ ប៉ុន្តែដោយក្តីស្រលាញ់ពិតប្រាកដទើបលោកនៅបន្តបើកបណ្តុះបណ្តាលក្មេងៗជំនាន់ក្រោយហើយតស៊ូរយៈពេល៥ឆ្នាំមកនេះ ខណៈទើបដាច់ចិត្តអំពាវនាវរកសប្បុរសជនជួយទ្រទ្រង់ ប្រសិនជាបន្តដោយគ្មានថវិកាជួយទ្រទ្រង់ពិតណាស់ក្លឹបនេះនឹងប្រឈមការបាត់បង់មិនខាន។
អ្នកលេងបណ្តាញសង្គមមួយចំនួនធំជ្រាបមកហើយរយៈពេលថ្មីៗនេះកុមារា រឿន កក្កដា ដែលមហាជនដាក់នាមឱ្យហនុមានតូច ទទួលការកោតសរសើរយ៉ាងខ្លាំងពីទេពកោសល្យសិល្បៈបុរាណរបស់កុមាររូបនេះដែលបានបញ្ចេញឱ្យមនុស្សជាច្រើនទស្សនានៅក្នុងកម្មវិធីសប្បុរសធម៌របស់ កញ្ញា ឆន ស្រីណេត ដែលមានទីតាំងនៅភូមិរុនតាឯក ខេត្តសៀមរាប កាលពីថ្ងៃទី២០ ឧសភា។
ជាមួយគ្នានេះ នៅលើបណ្តាញសង្គមប្រធាន «ក្លឹបបណ្ដុះបណ្ដាលវប្បធម៌ខ្មែរអង្គរ» ក៏បានអំពាវនាវទៅដល់សប្បុរសជននានាជួយទ្រទ្រង់ក្លឹបរបស់លោកដែលបានផ្លាស់ប្តូរទីតាំងថ្មីត្រូវការរោងសំរាប់ក្មេងៗហាត់រៀននៅផ្នែកភ្លេងនិងរបាំផងដែរ ។
ផ្តល់បទសម្ភាសតាមសារអេឡិចត្រូនិចមកកាន់ KBN News នាល្ងាចថ្ងៃទី២៤ ខែឧសភា ឆ្នាំ២០២៣ លោក ទួន សុខគា ដែលជាប្រធានក្លឹបបណ្ដុះបណ្ដាលវប្បធម៌ខ្មែរអង្គរ មានទីតាំងស្ថិតនៅ ភូមិចុងកៅស៊ូ សង្កាត់ស្លក្រាម ក្រុងសៀមរាប បានឱ្យដឹងថា ការដាច់ចិត្តអំពាវនាវស្វែងរកសប្បុរសជនជួយទ្រទ្រង់តាមរយៈបណ្តាញសង្គមនេះគឺជាទឹកចុងក្រោយហើយព្រោះលោកតស៊ូរយៈពេល៥ឆ្នាំមកនេះជួបការលំបាកច្រើនណាស់ស្ទើរតែបោះបង់ចោលម្តងៗប៉ុន្តែដោយសារក្តីស្រលាញ់ទើបអាចបន្តមកដល់ពេលនេះ។ យ៉ាងណាបើសិនគ្មានការជួយទ្រទ្រង់បន្ថែមពិតណាស់ក្លឹបបណ្តុះបណ្តាលមួយនេះប្រឈមនឹងការបាត់បង់មិនខាន។ ជាក់ស្តែងរយៈពេល១ឆ្នាំចុងក្រោយនេះក្លឹបរបស់លោកស្វែងរកថវិកាតាមរយៈការសម្តែងមិនបានឡើយ។
ប្រធានក្លឹបវ័យ៤២ឆ្នាំរូបនេះបន្តទៀតថា ដំបូងឡើងការបង្កើតក្លឹបនេះមានគ្នាច្រើន តែក្រោយមកនៅសល់៦នាក់ ក្នុងនោះមានអ្នកគ្រូ២នាក់ និងសិស្សដែលមកហ្វឹកហាត់ពិតប្រាកដជារៀងរាល់ថ្ងៃមានចំនួន៥៤នាក់ (សិស្សប្រុស២៣នាក់ សិស្សស្រី៣១នាក់) ដោយមិនគិតថ្លៃ។ លោក ទួន សុខគា បានបញ្ជាក់ថាការហ្វឹកហាត់មានរយៈពេល២ពេល ដោយនៅពេលព្រឹកសិស្សហ្វឹកហាត់ពីម៉ោង៩ព្រឹកដល់ម៉ោង១១ព្រឹក និងពេលល្ងាចពីម៉ោង ៥ល្ងាចដល់ម៉ោង៨:៣០នាទីយប់ ដើម្បីកុំឱ្យប៉ះពាល់ការសិក្សារបស់សិស្ស។
ភ្ជាប់ជាមួយគ្នានេះ ប្រធានក្លឹបបណ្ដុះបណ្ដាលវប្បធម៌ខ្មែរអង្គរ បានបញ្ជាក់ទៀតថា ការបង្រៀនរបស់លោកគ្រូអ្នកគ្រូ ពុំមានប្រាក់ខែនោះទេ ហើយត្រូវចំណាយថ្លៃសាំងដោយខ្លួនឯងក្នុងការមកបង្រៀនទៀត ខណៈការបើកក្លឹបនេះគឺបង្កើតឡើងដោយក្តីស្រលាញ់វប្បធម៌ខ្មែរពិតប្រាកដដោយមិនស្ថិតក្រោមអង្គការណាមួយទៀត។
ជាចុងក្រោយ លោក ទួន សុខគា ថាបើសិនជាអាចលោកចង់សំណូមពរសប្បុរសជួយសាងសង់រោងដែលអាចឱ្យសិស្សហាត់រៀនត្រឹមត្រូវ និងចង់ឱ្យស្ថាប័នណាដែលអាចជួយបរិច្ចាគថ្លៃសាំងឱ្យអ្នកគ្រូ លោកគ្រូក៏ជាការល្អដែរ៕