ដ្បិតតែព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះបានបញ្ចប់ហើយក្តីតែមហាព្រឹត្តិការណ៍នេះនៅតែដក់ជាប់ក្នុងចិត្តកូនខ្មែរគ្រប់រូបចងចាំគ្មានថ្ងៃភ្លេច ជាប្រទេសតូចតែមានបេះដូងធំជាប្រវត្តិសាស្រ្តរបស់ជាតិខេមរា។ មិនត្រឹមតែទទួលបដិសណ្ឋាកិច្ចដល់ភ្ញៀវបរទេសបានល្អទទួលបានការកោតសរសើរមិនដាច់ពីមាត់ប៉ុណ្ណោះទេ តែអត្តពលិកឆ្នើមរបស់កម្ពុជាក៏ធ្វើឱ្យពិភពលោកកាន់តែស្គាល់ទឹកដីសុវណ្ណភូមិ តួយ៉ាងងដូចជាកីឡាការិនី បូ សំណាង ជាដើម។
ជាមួយគ្នានេះដែរ ថ្មីៗនេះកាសែត The New York Times ដែលជាបណ្តាញផ្សព្វផ្សាយល្បីឈ្មោះនៅសហរដ្ឋអាម៉េរិកបានចុះផ្សាយពីកីឡាការិនី បូ សំណាង ដែលជាអត្តពលិករត់ប្រណាំង៥០០០ម៉ែត្រ ទោះជាមិនបានឈ្នះមេដាយ តែមានឆន្ទៈខ្ពស់រត់ប្រណាំងក្រោមតំណក់ទឹកភ្លៀង ធ្វើឱ្យមហាជនទូទាំងប្រទេសពោលស្ងើចសរសើរយ៉ាងខ្លាំង។
មិនត្រឹមតែកាសែតខាងលើចុះផ្សាយនាពេលថ្មីៗនេះប៉ុណ្ណោះទេ កីឡាការិនី បូ សំណាង ក៏ត្រូវសារព័ត៌មានបរទេសល្បីៗជាច្រើនចុះផ្សាយ នាពេលកន្លងមកផងដែរមានដូចជា CNN , Time , CAN , The Guardian , South China Morning Post , The Olympic Games . DW News រួមទាំងបណ្តាព័ត៌មានជាច្រើនទៀត។
គួរបញ្ជាក់ផងដែរថា កីឡាការិនី បូ សំណាង បន្ទាប់ពីបង្ហាញពីឆន្ទៈមោះមុតក្នុងការប្រកួតកីឡាស៊ីហ្គេម រត់ប្រណាំងទាល់តែដល់ទីបញ្ចប់ទោះបីជាដឹងលទ្ធផលមុនហើយក្តីថាខ្លួនមិនអាចយកឈ្នះបានតែនៅមិនបោះបង់ ធ្វើឱ្យមហាជនរំជួលចិត្ត ព្រមទាំងទទួលបានការឧបត្ថម្ភជាបន្តបន្ទាប់ពីថ្នាក់ដឹកនាំ និងសប្បុរសជននានាតបទៅនឹងទង្វើដែលកីឡាការិនីរូបនេះប្រឹងប្រែង៕